TITUS
Lancelot und Ginover I: Prosalancelot
Part No. 183
Previous part

Page: (374) 
Sentence: 2679    Es ist beßer das ich sterbe ob es wesen múß, dann ein so frummer ritter sturbe«, sprach der knapp, »als mich duncket das er sy; man weiß noch nit ob ich gut oder böse sy, ich han auch des nicht gethan das des koniges laster sy noch synes huses.
Sentence: 2680    Durch gott, herre«, sprach er, »sittherre das diß ding so ferre komen ist, so heißer im einen arczat gewinnen!« Myn herre Ywan sprach, er solt arczatt gnung han, und sant zuhant nach eim.
Sentence: 2681    Er nam synen knappen mit der hant und leyt yn in den sale fur den konig, und der konig hett wol hören sagen wie der knapp gethan hett mit dem ritter.
Sentence: 2682    »Herre Ywan«, sprach der konig, »hatt der knapp den ritter erlößt von den glenenstucken?« »ja herre«, sprach myn herre Ywan.
Sentence: 2683    »Das mag uch werlich leyt syn«, sprach der konig, »ir datet auch wunderlich das irs gestattet.
Sentence: 2684    Ich wil es uch úmmer undanck sagen«, sprach er, »das ir den schönsten knappen von aller der welt und den besten gehenget hant, das er das understunt, das er on zwyvel den lip darumb verliesen muß.« »Herre«, sprach myn herre Ywan, »by den truwen die ich uch schuldig bin, ich was darby nicht da er im die stück uß zoh, ich han yn sere darumb gescholten und gelestert.
Sentence: 2685    So mir got múß helffen, mir wer lieber das mir der arm gebrochen were dann es im geschah.« »Ir hett werlich recht«, sprach der konig, »es duncket mich mere schade von im dann von dheynem mann der nu lebet.
Sentence: 2686    Er hatt ein dinck understanden das keyn man zu end bringen mag.« »Hei herre, durch gott gnad«, sprach er, »es ist vil beßer das ich darumb sterb dann keyn ritter in uwerm hofe.
Sentence: 2687    Sie sint allsampt so gut ritter und so gepriset.« Der konig ließ das heubt nyder bangen und wart so zornig das im die tregen uß den augen sprungen.
Sentence: 2688    So vil wart darumb gesprochen off und nyder das es die koniginn erfure, und was ir ußermaßen leyt.
Sentence: 2689    Sie forcht das ers gethan hett umb das er sie so sere mynnet und das er synen brise da mit wolt hohen.
Sentence: 2690    »Hei«, sprach sie, »wie groß schade ist das von dißem schönen knappen!« Und alle die in dem hof waren machten großen jamer durch synen willen.
Sentence: 2691    Da mit vergaß der konig und alle die da waren das im das schwert nicht umb gegurt wart.
Sentence: 2692    Die tafeln waren gerechter, und die núwen ritter entwapenten sich allesampt.
Sentence: 2693    Der kónig nam waßer und ging siezen eßsen und die ritter allsampt.

Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.