TITUS
Lancelot und Ginover I: Prosalancelot
Part No. 188
Previous part

Page: (384) 
Sentence: 2752    Myn herre Ywan solt im das schwert umb gurten, und gedacht im das im der konig das schwert nicht her umbgegürt.
Sentence: 2753    »So mir myn lip, herre«, sprach er, »ir ensint nicht ritter noch!« »Warumb?« sprach der knapp.
Sentence: 2754    »Darumb«, sprach myn herre Ywan, »das uch der konig uwer schwert nicht umb hatt gegurtet; woldann, geen wir zu im, er sol es uch umbgürteni« »Nu beitent ein wenig«, sprach der knapp, »myn knecht hatt myn schwert hinweg; ich wil es bald ryten holn, ich wil nit das er mir anders keyns gurt dann mynselbs schwert.« »Ich wil darnach ryten«, sprach myn herre Ywan.
Sentence: 2755    »Ir solt hie bliben«, sprach der knap, »und ich wil darnach ryten was das roß úmmer gelauffen mag, und wil alherre wiedder komen zu uch.« Der knapp reyt hinweg, und myn herre Ywan beit syn in der herberg.
Sentence: 2756    Er mocht lang beyten, wann der knap her keynen gedanck wiedder zu komen zu dem mal, wann er von des koniges hant nicht ritter wolt werden.
Sentence: 2757    Er gedacht von eyner andern hant ritter zu werden, da er sich me mit beßsert.
Sentence: 2758    Lang beyte syn myn herre Ywan.
Sentence: 2759    Da er sah das er nicht wiedder kam, er ging zu dern konig und sagt es im.
Sentence: 2760    »Herre«, sprach er, »wir sint bößlich betrogen mit uwerm knappen den ir zu Noaus gesant hant.« »Wie so?« sprach der konig.
Sentence: 2761    »Werlich herre«, sprach er, »ir hant im syn schwert noch nit gegurtet«, und sagt im wie er darnach riett und nit wiedder keine.
Sentence: 2762    Den konig wundert sere warumb er nit wiedder komen was und im her Ywan gesagt hett das er nit ritter enwere.
Sentence: 2763    »Werlich«, sprach myn herre Gawan, »ich wen das er ein hart edelman was und von großem thun.
Sentence: 2764    Er hat es wetlich von großer unwird gethan, umb das im myn herre syn swert nicht zu dem ersten umbgurt vor den andern, und darumb ist er von unwird hinweg geritten.« »Also mag es wol syn«, sprach der konig und manig ritter der da by stunt.
Sentence: 2765    - Nu múßen wir die rede laßen von dem konig und von der koniginne und von syner gesellschafft und der yren und sprechen furwert von dem knappen der zu Noaus reyt, fur die frauwen da zu fechten.




Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.