TITUS
Lancelot und Ginover I: Prosalancelot
Part No. 190
Previous part

Page: (2) 
Sentence: 173    Da kam der ritter der den knappen dar hett bracht, und die jungfrauw mit im die er da gewuͦnnen hett im lack, und wundert sie des sere das er den großen ritter darnyder gestochen hett.
Sentence: 174    Der knapp ging in das pavilune und nam die jungfrauwen mit der hant und gab sie dem ritter der yn dar hett bracht.
Sentence: 175    »Seht hin, herre«, sprach er, »nu hant ir zwo!«
Sentence: 176    »Myn ensint sie nicht«, sprach der ritter, »sie sint uwer, ir hant sie gewuͦnnen; sie sint fast schön und kument uch recht.«
Sentence: 177    »Myn enwerdent sie nymer«, sprach er, »ich han sie uch gelobet, und ir solt sie han.«
Sentence: 178    »Herre«, sprach der ritter, »ob ir der jungfrauwen keyne wolt, so sagent mir was ich da mit thun soll, ich wil uwern willen da mit thuͦn.«
Sentence: 179    »Wolt ir dann?« sprach der knapp.
Sentence: 180    »Ja ich werlich«, sprach der ritter.
Sentence: 181    »So wil ich das ir sie furet zu des konig Artus hoff myns herren und gebent sie myner frauwen der koniginne; und sprechent das irs der knapp syner ersten gewinnung hab gesant der fuͦr die frauwen von Noaus fur vechten; und sagent ir das sie mir ein schwert sende und mach mich ritter, uff das ich úmmer ir ritter wil wesen als lang als ich lebe; und sagent ir das myn herre der konig vergeße und das er mir myn schwert nit umbguͦrte da er mich ritter macht und manigen andern!«
Sentence: 182    Da der ritter hort das er núwelich ritter was worden, da wuͦndert yn noch me das er so große ritterschafft gethan hett, und fraget yn wo ern finden solt als er wiedder keme.
Sentence: 183    »Koment recht zu Noaus!« sprach der knappe.
Sentence: 184    Der ritter nam die jungfrauwen mit im und fuͦre zu hofe syn botschafft thun.
Sentence: 185    Er sagt der konigin das wunder das er gesehen hett von dem knappen.
Sentence: 186    Und die koniginn was des ser fro und sant im ein guͦt schwert und ein schönes.
Sentence: 187    Der ritter der nam urlob und fuͦr so er allerbaldest mocht zu Noaus.
Sentence: 188    Da er by die statt kam, da fand er den knappen, der noch nit zu Noaus komen was, wann er viel umbgeritten hett.
Sentence: 189    Er gab im das schwert und sprach das im die koniginn embót das ers umbgúrt von yrentwegen.
Sentence: 190    Er nam das schwert und gurt es zuhant umb.
Sentence: 191    »Gott siß gelobet«, sprach er, »nu bin ich ritter!«
Sentence: 192    Er nam das schwert das forn an sym sattel hing und gab es dem ritter.
Sentence: 193    »Got lone myner frauwen«, sprach er, »das sie mich ritter hatt gemacht; nu bin ich ritter zu recht!«
Sentence: 194    Darumb han wir yn bißherre knapp geheißen, wann er nye keyn schwert umbgegurt sitherre das er ritter wart.
Sentence: 195    Nuͦ mußen wir yn sus fúrter ein wil heißen den ritter mit den wißen wapen.


Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.