TITUS
Lancelot und Ginover I: Prosalancelot
Part No. 210
Previous part

Page: (22) 
Sentence: 934    Alsus was myn herre Gawan und syn gesellen lange gefangen, das der wiß ritter nichts darumb enwúst.
Sentence: 935    Da ers da befriesch, da wart er so sere unfro das er nicht enwúst was er thun solt vor unfreuden.
Sentence: 936    Eins tages geschach das, das der wiß ritter saß und aß ser herlich off eim hohen thorn, der zu dem ende von dem pallast stunt.
Sentence: 937    Die jungfrau saß und aß mit im die sin frauw von dem Lack dar gesant hett.
Sentence: 938    Yn wart herlich gedient mit silberinn kopffen und guldenin kopffen und mit herlichen nepffen und mit großen silberin schußseln.
Sentence: 939    Da er alsus saß und aß, da kam ein knappe fur yn gegangen und weynd sere.
Sentence: 940    Die jungfrauw fragt yn warumb er weinde.
Sentence: 941    »Werlich jungfrauw«, sprach er, »mich erbarmt ein jungfrauw so sere das ich muß weinen, ich wöl oder enwöl.
Sentence: 942    Sie fert dort nyden under jhenem roch und macht den meisten iamer den ye kein mensch macht.«
Sentence: 943    »Warumb ist das?« sprach der ritter.
Sentence: 944    »Sie clagt myn herrn Gawan fast sere und myn herrn Ywan und ir gesellen allsament.«
Sentence: 945    »Wo ryt sie?« sprach der ritter.
Sentence: 946    »Herre«, sprach er, »sie reit die straß die zu Galle wert geet.«
Sentence: 947    »Hei myn herre Ywan, ir leistet mir doch fast gut gesellschafft, ir wart myn gut geselle und myn meister und datent mir allen mynen guten willen getruweclichen, und der guͦt myn herre Gawan, der mir an den konig myn erst bete det geben, er sprach allweg wol zu mynen dingen.
Sentence: 948    Nymer enhelff mir got«, sprach er, »ob mir úmmer wol zu muͦt werde, ich wiß dann wie es umb sie stee und wo sie sint!«
Sentence: 949    Er sprang zuhant off von der tafeln und hieß im syn cleider bringen und sin wapen und wapente sich sere herlich, und die jungfrauw fraget yn war er wolt.
Sentence: 950    »Ich wil nach der jungfrauwen ryten und wil sie fragen wo myn herre Gawan sy und sin gesellen.«
Sentence: 951    »Ich wil sies fragen«, sprach die jungfrauwe.
Sentence: 952    »Ir ensolt«, sprach er, »ir solt myn alhie beiten biß ich wiedder kuͦm.
Sentence: 953    Ich manen uch by der truw die ir schuldig sint myner frauwen das ir nyrgent farent, ich kum dann zu erst erwiedder«, sprach er, »wann ich wil zuhant herwiedder komen.«
Sentence: 954    Sie gelobet im synen willen, und er reit hinweg nach der jungfrauwen die da weind, und kam nach ir rytende und fand sie alda da sie yczunt in den walt solt riten.
Sentence: 955    Er grußt sie und bat sie das sie im mere sagt von hern Gawan und von synen gesellen.
Sentence: 956    »Ich mag uch böse mere von yn sagen«, sprach sie; »der da herre was zu der Dolorosen Garden hatt yn gefangen und syner gesellen nún.«
Sentence: 957    »Nu sagent mir, liebe jungfrau«, sprach er, »wo er sie hab gefangen!«
Sentence: 958    Die jungfrauw sah yn ane und sprach das er synen helm abe tet, sie wolt yn besehen.
Sentence: 959    Er det den helm zuhant abe.
Sentence: 960    Die jungfrauw nam yn in ir beide arme und kußt yn fur synen muͦnt, und er bekant sie zuhant: sie was syner frauwen jungfrauw eine von dem Lack; und hett sie ir frauw zu im gesant, das sie im ein ding solt sagen das ir frauw der andern jungfrauwen nit gesaget hett, wann es ir nit gedacht da die jungfrauw von ir reit.
Sentence: 961    »Man saget mir«, sprach die jungfrau, »das myn herre Gawan gefangen lege und das ir dot geslagen werent und wert off eim kirchoff in ein grab geleit zu der Dolorosen Garden.
Sentence: 962    Darumb reyt ich dar fúr und kund vor großem leid darwert nit gesehen.«
Sentence: 963    »Was was das«, sprach er, »das myner frauwen mir vergaß zu enbieten mit der ersten jungfrauwen?«
Sentence: 964    »Das was«, sprach sie, »das ir nymer an dheyner statt geminnetent, ir enmögent mere daby gebeßert werden dann geergert.«
Sentence: 965    »Nu sagent mir«, sprach er, »wo myn herre Gawan gefangen lige!«
Sentence: 966    »Fart dar mit mir«, sprach sie, »ich wil uch dar leyten!«
Sentence: 967    Sie kerten beid umb und rytten biß sie der burg so nah kament das sie sie sahent, sie furen byneben abe in einen dicken buͦsch.
Sentence: 968    »Alhie«, sprach sie, »mag uns nymand gesehen, und wir sehent alle die die yn und uß farent.«
Sentence: 969    Uber ein kurcze wil sahen sie wol funffczehen gewapent ritter ußer der burg komen, und kamen in eim schiff heruber gefarn und ritten den rechten weg zu der Dolorosen Garden wert.
Sentence: 970    Er ließ sie yn komen und nam das roß mit den sporen und nam den schilt mit den dryn barren fur syn brust, den im die jungfrauw selb hett umb synen hals gethan da er von der Dolorosen Garden reit.
Sentence: 971    Da sie vernamen das er kame, da flohen sie allesampt und der herre selb.
Sentence: 972    Sie kuͦnten so bezitt nit entfarn, er hett sie erfarn und stach den ersten dott und bracht ir vier in kurczer stunt darzu das sie alda musten bliben und tot geslagen und ettlichem ein beyn, ettlichem ein arm abgeschlagen, und die andern entfuren im uff den werd in den schiffen.


Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.