TITUS
Lancelot und Ginover I: Prosalancelot
Part No. 212
Previous part

Page: (24) 
Sentence: 1003    Er sah off zu der porten wert und sah den ritter ob der porten steen und besah die koniginn.
Sentence: 1004    »Herre ritter«, sprach er, »ir hant nit húbschlich gethan das ir myner frauwen hant gespottet.«
Sentence: 1005    Der ritter verstunde des nit, und die jungfrau kam zu im gande die yn geleitet het zu der Dolorosen Kartre; also hieß die burg da myn herre Gawan inne gefangen lag und sin gesellschafft.
Sentence: 1006    Sie het gehort wie das Key gesprochen hett, und stieß den ritter mit der hant: »Enhort ir nit«, sprach sie, »wie der ritter zu uch gesprochen hatt?«
Sentence: 1007    »Welch ritter ist das?« sprach er.
Sentence: 1008    »Der!« sprach sie und wißten im mit der hant.
Sentence: 1009    »Herre ritter«, sprach er, »was was das ir sprachent?«
Sentence: 1010    »Ich sprich es noch«, sprach her Key, »das ir mynen herren den konig und myn frauw die koniginn wol fur schnúdel habent ersehen, das ir sie nit gewertent die port offzuthuͦn als ir mym herren gelobetent.
Sentence: 1011    Ir engewirdigentet uch joch mir nicht zu antworten.«
Sentence: 1012    »Wer sint ir dann?« sprach der ritter.
Sentence: 1013    »Ich bin Key der truchseße.«
Sentence: 1014    Der ritter sah das die koniginn zornig hinweg reit, und wart so unfro das er nahe ußer synen sinnen gefarn was.
Sentence: 1015    Er ging bald zu dem wechter und sprach zorniclichen zu im: »Ich hieß dich doch die konigin inn laßen, warumb dethe du des nicht?«
Sentence: 1016    »In truwen herre«, sprach er, »ir enhießent michs nit.«
Sentence: 1017    »In rechten truwen«, sprach er mit großem zorn, »und werest du so alt nit, ich schlúg dir yczunt din heupt abe.
Sentence: 1018    Noch hut diß tags lauff und thu sie bald off und hut als dynes augen das sie dalang zu kuͦm!«
Sentence: 1019    Er saß off syn roß und reyt zu der posterne wiedder uß unfro und zornig.
Sentence: 1020    Die Jungfrau fragt yn war er fure; er enwolt ir anders nicht sagen dann das er schier wiedder keme.
Sentence: 1021    »Hút uch«, sprach er, »als lieb als uch uwer lip sy, das ir mir dalang einen fuß gevolgent!«
Sentence: 1022    Der wechter det die porten off, und das mere wart dem konig gesagt das die port offen were.
Sentence: 1023    Der konig saß off und die koniginn und all ir gesellschafft und ritten bald in jhen burg.
Sentence: 1024    Der zum ersten darinn mocht komen der enbeite des letsten nicht.
Sentence: 1025    Da sie inn die burg kamen, da funden sie die andern port vast beschloßen.
Sentence: 1026    Sie gingen in den kirchoff, und der konig hieß syn pfaffen lesen.
Sentence: 1027    Da myns hern Gawans name stunt geschriben, er lase: »Hie lit myn herre Gawan, und ist diß syn heubt.«
Sentence: 1028    Er laß off eim andern: »Hie lyt myn herre Ywan, und ist das syn heubt, des großen Friens eins koniges sun.«
Sentence: 1029    Sie lasen furter allenthalben, und der konig und alle die mit im waren machten den meisten jamer von aller der welt.
Sentence: 1030    Sie lasen furter off eim grab: »Hie lyt Galeguentins de Galois, und das ist syn heubt.«
Sentence: 1031    Also funden sie zehen, myn herren Gawan und sin gesellen die mit im waren gefangen.
Sentence: 1032    Sie funden also maniges hohen mannes namen geschriben von des koniges gesellschafft.
Sentence: 1033    »Hie lyt der, und sehent da syn heubt.«
Sentence: 1034    Also lasen sie so lang das sie kamen zu dem großen grab, und lasen das da unden lege ein der beste ritter von aller der welt und das das derselb were der die Dolorosen Garden gewunnen hett.
Sentence: 1035    »Ach leyder«, sprach der konig, »das was derselb ritter den ich an Sant Johans tag ritter macht mit den wißen wapen.«
Sentence: 1036    Er wart so unfro und alle die mit im waren, und machten so großen jamer umb myn herren Gawan und umb syn gesellen das ir dheyner den andern enkunde getrösten.
Sentence: 1037    Sie weynten als lang und machten groß unfreud.
Sentence: 1038    Der konig kam zu dem wechter und fragt yn ob man im die forderesten porten solt vor beschließen.
Sentence: 1039    »Neyn man, herre«, sprach er.
Sentence: 1040    »Wie sollen wir innerthalb der andern porten komen?« sprach der konig.
Sentence: 1041    »Herre«, sprach der ander, »ir múßent aber vier tag herre senden, als ir zu der fordersten porten tatet.«
Sentence: 1042    »Nu sag mir«, sprach der konig, »ist dir ichts kunt umb die ritter die hieinn begraben ligent, wer sie zu dot schlug?«
Sentence: 1043    »Anders enweiß ich darumb nicht, herre«, sprach der ander, »wann dút die tumben lesen, ir findent da me geschriben dann ich da umb wiße.«
Sentence: 1044    »Ah leyder«, sprach der konig, »wie han ich alle myn frunt also verlorn!«
Sentence: 1045    Er saß off und fuͦr wiedder zu synen loien und all syn geselschafft mit im; sie machten all die nacht mit im so großen jamer das ir dheyner nye wedder eßsens nach trinckens enbeiß by der nacht.
Sentence: 1046    - Nu spricht das buch furter von dem wißen ritter, wie er von der burgk reit da dem konig Artus die port entschloßsen wart und der konigin.


Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.