TITUS
Lancelot und Ginover I: Prosalancelot
Part No. 223
Previous part

Page: (35) 
Sentence: 1447    Uns sagt die hystoria furter von mym herren Gawan: da er den ritter sucht der die Dolorosen Garden gewann, er reyt funffczehen tag das er nye keyn mere von im kund vernemen.
Sentence: 1448    Eins tags kam er rytend, und begegent im ein jungfrauw.
Sentence: 1449    Er grúßt sie, sie genadet im.
Sentence: 1450    »Liebe jungfrauw«, sprach er, »vernament ir kein mere von dem ritter der die Dolorosen Garden gewann?«
Sentence: 1451    »Das ist ware, herre«, sprach sie, »ich weiß wol das ir myn herre Gawan synt, des koniges nefe, der die jungfrau in gefengniß hatt gelaßen.«
Sentence: 1452    »So mir got, jungfrauw«, sprach er, »das ist mir leyt.
Sentence: 1453    Liebe jungfrau, wißent ir was ich such?« sprach er.
Sentence: 1454    »Neyn ich«, sprach sie.
Sentence: 1455    »Kúnnent ir mich nichtes bescheiden?«
Sentence: 1456    »Ja«, sprach sie, »man beschied es uch wol zu der Dolorosen Garden.«
Sentence: 1457    »Dar wil ich nit«, sprach er und bevalh sie got und schied von ir.
Sentence: 1458    Und das was die jungfrauw die zuletst wiedder den ritter geredet hett den myn herre Gawan sucht.
Sentence: 1459    Sie was auch dieselb jungfrauw die die frauw von dem Lack júngestwarb uß sante.
Sentence: 1460    Sie sucht auch selb den ritter, und hett sie die jungfrauw ußgesant die gefangen lag zu der Dolorosen Garden.
Sentence: 1461    Min herre Gawan kam rytende in eynen walt.
Sentence: 1462    Da er dardurch kam, er fant ein schön wiesen, und waren da herliche pavilune uffgeschlagen und hetten wol zwey hundert ritter da geherbergt.
Sentence: 1463    Er sah zu der rechten hant und sah wo zwey schöne pfert kamen und brachten die roßbare getragen da der wiß ritter uff lag.
Sentence: 1464    Myn herre Gawan beyt der roßbare biß sie zu im kam; er was ein wenig fur geritten.
Sentence: 1465    Die roßbare ducht yn gar herlich und wol bereyt und das er nye keyn herlicher gesehen hett.
Sentence: 1466    Er fragt den knappen der sie furt, wer da uff lege.
Sentence: 1467    »Herre«, sprachen sie, »da lyt ein wunt ritter uff.«
Sentence: 1468    Und der gewunt ritter hieß das tuͦch off heben und fragt were da were.
Sentence: 1469    »Ich bin, herre, ein ritter uß des konig Artus hoff«, sprach myn herre Gawan.
Sentence: 1470    Er ließ das tuch wiedder nyder und forcht das er yn bekente.


Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.