TITUS
Lancelot und Ginover I: Prosalancelot
Part No. 238
Previous part

Page: (50) 
Sentence: 2068    Der ritter sah das der pfucz schwarcz was und grúwelich geschaffen, und anderhalb stund ein man, der was grúwlich, und was im syn heubt schwarcz als bech, und ging im ein starcker flamme ußer der kelen, die augen und die zene luchten im als ein fuer.
Sentence: 2069    Er hielt ein helenbarten in syner hant.
Sentence: 2070    Da der ritter by yn kam, da ergreiff er die helenbarten mit beiden henden und zoch sie uber syn heubt.
Sentence: 2071    Der ritter stunt und gedacht wie er daruber keme.
Sentence: 2072    Und wer da anders nit gewesen dann die pfúcz, so wer es gnung gewesen; dannoch was es schwere gnung uber ein so sere gewapenten ritter zu kumen.
Sentence: 2073    Er det syn schwert wiedder in syn scheiden, er nam den schilt mit syner rechten hant, er ging wiedder hinder und kam gelauffen was er úmmer mocht, und sprangk uber jhen pfuczen und stieß den mit der helmaxt an das heubt mit dem schilt, das er aller zurbrach; und er bleib still steen als des nicht enwere.
Sentence: 2074    Der ander stieß den ritter so sere das er in die pfúcz gevallen were, hett er sich an den man nit gehalten.
Sentence: 2075    Der ein ließ die helenbarten vallen, wann yn der ritter mit der kelen hielt und zwang yn so sere das er uff jhen erden viel.
Sentence: 2076    Der ritter danß yn mit der kelen und warff yn darinn.
Sentence: 2077    Er raufft syn schwert und ging furter; da fant er ein jungfrau von kupffer gemacht gar schöne, die hielt die schlußel von dem zauber in ir rechten hant.
Sentence: 2078    Er nam die slußsel und ging zu eyner kúpfferinn súl, die stunt mitten in der kamern, und fant buchstaben daran geschriben, die sprachen: »Diße súl sol man entschließen mit dem großen schlußel, und darinn stet ein schryn, den entschlußet man mit dem cleynen schlußel.«
Sentence: 2079    Er nam den großen schlußel und entschloß die súl; da sah er den schryn und hort so groß gerúff das die sul alle bibent.
Sentence: 2080    Er segent sich und entschloß den schryn, darinn stunden wol drißig pfiffen; und ygliche gab ein grúweliche stymme, eine mere dann die ander, und die pfiffen ragten oben durch das liet.
Sentence: 2081    Da er das liet von dem schryn uff hub, da kam ein so freischlich wint ußgeslagen, das yn ducht wie alle die túfel von der helle mit dem winde furen, als es auch war was.
Sentence: 2082    Es waren alles böse geist die mit den pfiffen bliesen.
Sentence: 2083    Der ritter viel nyder in unmacht.
Sentence: 2084    Da er wiedder bekam, er nam die schlußel beide und ging herwiedder uß.
Sentence: 2085    Da er zu der pfuczen kam, da enfand er da nicht dann slecht ertrich.
Sentence: 2086    Er sah wiedder wo die kupfferin sul verschwand biß in jhen erden, also det die jungfrauw auch; und die zwen ritter die fur der thúr stunden die waren nyder gevallen und waren zurbrocben.
Sentence: 2087    Er kam uß mit den schlußeln, und die lut von der stat hetten sich gesamelt und kamen zu im gegangen.
Sentence: 2088    Da er off den kirchoff kam, er fant ein grab da nicht noch der helm keynen die allwege uff den zinnen steckten mit den heubten.
Sentence: 2089    Jhene lut waren syn allesamen fro.
Sentence: 2090    Er ging in die capell und opffert die schlußel off den altare.
Sentence: 2091    Sie leiten yn in den pallast und machten im große freude.
Sentence: 2092    Da sagten sie im wie sie den knappen nach im gesant hetten, das er im sagte das die koniginn gefangen were.
Sentence: 2093    »Da gedachten wir wol das uwer byderbekeit und uwer frumkeit nicht mocht verdulden, ee dann sie in gefengniß belibe, ir soltent uch ee gefangen fur sie geben.«
Sentence: 2094    Er hort zuhant wol das er betrogen was, nochdann was im lieb das er den zauber und das gauckel zurbrochen hette.
Sentence: 2095    Die nacht bleib er uff der burg; des morgens fruͦ reyt er hinweg, sie enkunden yn lenger nit behalten.
Sentence: 2096    Von dem tag was die burg úmmer men geheißen die Jovisegarde.
Sentence: 2097    Der ritter reyt so lang biß das er kam da der thorney solt wesen.
Sentence: 2098    Das im underwegen geschah das ensagt das buch nit, dann als vil das er einen wißen schilt det machen mit einer schwarczen barren in bellung in derselben stat da er den roten det machen.
Sentence: 2099    - Nu mußen wir ein wile von mym herren Gawan furter sprechen des koniges neven, wie der gefure.


Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.