TITUS
Lancelot und Ginover I: Prosalancelot
Part No. 241
Previous part

Page: (53) 
Sentence: 2194    Da Gwerier synen bruder off jhener erden sah ligen, da nam er das roß mit den sporn und jostiert wiedder den ritter.
Sentence: 2195    Der ander sah yn komen und nam ein spere.
Sentence: 2196    Sie kamen zuhauff gerant was sie mochten.
Sentence: 2197    Die ritter waren beid starck und kune, und ir spere waren kurcz und starck; sie brachen ir spere beide und blieben siczen.
Sentence: 2198    Das was yn beiden ußermaßen zorn, wann der ein hett den andern gern abgestochen.
Sentence: 2199    Sie ritten bald affterwert und namen große spere und starcke, und kamen wiedder zuhauff gerant mit großem zorn und stachen freischlich off jhen schilt.
Sentence: 2200    Gwerier brach syn spere, und der ritter stach yn mit roß mit all darnyder.
Sentence: 2201    »Seht hie, herre«, sprach Keheries zu mym herrn Gawan, »nu ist es erger dann zu dem ersten!«
Sentence: 2202    Der ritter uberwand des tages den thorney zu beider syt.
Sentence: 2203    Da myn herre Gawan sah das der ritter den thurney von beiden syten hett uberwunden und das er syn bruder beid nyder hett gestochen, da gedacht er zuhant das das der ritter were den er suͦcht.
Sentence: 2204    Er reit zu der jungfrauwen in die statt, die im des ritters namen gelobet hett zu sagen.
Sentence: 2205    »Werlich herre«, sprach sie, »ich wene, er sy das der den thorney uberwant.«
Sentence: 2206    »Nu ritent dann mit mir«, sprach er, »laßent uns warten ware er kere!«
Sentence: 2207    »Das ist mir lieb«, sprach sie.
Sentence: 2208    Zuhant da der thurney gescheiden was, der ritter der den thorney uberwunden hett det sich in den walt, wann er heimlich synen weg wolt ryten.
Sentence: 2209    Es was by dem abende, und er reit ußer dem wege, wann er nit enwolt das im ymant volgete.
Sentence: 2210    Min herre Gawan und die jungfrauw ritten nach im und ervolgeten yn in dem wald.
Sentence: 2211    »Got muß uch geleyten, herre!« sprach myn herre Gawan.
Sentence: 2212    Er sach umb und erkant myn herren Gawan wol.
Sentence: 2213    »Gott muß uch minnen, lieber herre!« sprach er und was sere unfro das sie yn ervolget herren.
Sentence: 2214    »Gut herre«, sprach myn herre Gawan, »sagt mir, wer sint ir?«
Sentence: 2215    »Herre«, sprach er, »ir mögent wol sehen das ich ein ritter bin.«
Sentence: 2216    »Das ist nemlich ware das ir der best ritter von der welt sint.
Sentence: 2217    Ich bit uch durch alle fruntschafft das ir mir uwern namen sagent.«
Sentence: 2218    »Ich enwil sin uch nit sagen«, sprach er.
Sentence: 2219    »Lieber herre«, sprach die jungfrauw, »sagent im uwern namen, oder ich sagen im, wann er hat manige pin darumb gelitten!«
Sentence: 2220    Er schweig alschon und sprach ein wort nit.
Sentence: 2221    »Herre«, sprach die jungfrauw zu mym herren Gawan, »ich siehe wol das ern uch nit sagen wil; ich wil yn uch sagen, ich wurd anders meyneydig.


Next part


This text is part of the TITUS edition of Lancelot und Ginover I: Prosalancelot.

Copyright TITUS Project, Frankfurt a/M, 7.5.2019. No parts of this document may be republished in any form without prior permission by the copyright holder.