TITUS
Beatrijs
Part No. 10
Previous part

Chapter: (10) 
Verse: 307    Ay, wat segdi, suuerlike!
Verse: 308    Ocht ic v e[m]mermeer beswike

Verse: 309    Soe moete mi god scinden!
Verse: 310    Waer dat wi ons bewinden,

Verse: 311    Jn scede van v te ghere noet,
Verse: 312    Ons en scede die bitter doet!

Verse: 313    Hoe mach v aen mi twien?
Verse: 314    Ghi en hebt aen mi niet v[er]sien

Verse: 315    Dat ic v fel was ofte loes.
Verse: 316    Sint dat ic v ierst vercoes

Verse: 317    En haddic niet in minen sinne
Verse: 318    Ghedaen een keyserinne;

Verse: 319    Op dat ic haers werdech ware,
Verse: 320    Lief, en liete v niet om hare!

Verse: 321    Des moghedi seker wesen!
Verse: 322    Jc vore met ons vte ghelesen

Verse: 323    .V.c. pont wit seluerijn;
Verse: 324    Daer seldi, lief, vrouwe af sijn,

Verse: 325    Al varen wi in vremde lande,
Verse: 326    Wine deruen v[er]teren ghene pande

Verse: 327    Binnen desen seuen iaren.'
Verse: 328    Dus quame[n] se den telt gheuaren

Verse: 329    Smorgens aen een foreest,
Verse: 330    D[aer] die voghele hadden feest.

Verse: 331    Si maecten soe groet ghescal,
Verse: 332    Datment hoerde ouer al;

Verse: 333    Elc sanc na der naturen sine.
Verse: 334    D[aer] stonden scone bloemkine

Verse: 335    Op dat groene velt ontploken,
Verse: 336    Die scone waren en[de] suete roke[n].

Verse: 337    Die locht was claer en[de] scone.
Verse: 338    D[aer] stonden vele rechte bome,

Verse: 339    Die ghelouert waren rike.
Verse: 340    Die ionghelinc sach op die suu[er]like

Verse: 341    D[aer] hi ghestade mi[n]ne toe droech.
Verse: 342    Hi seide: 'Lief, waert v gheuoech,

Verse: 343    Wi souden beeten en[de] bloeme[n] lesen;
Verse: 344    Het dunct mi hier scone wesen.

Verse: 345    Laat ons spelen d[er] minne[n] spel.'
Verse: 346    'Wat segdi', sprac si, 'dorper fel!

Verse: 347    Soudic beeten op tfelt
Verse: 348    Ghelijc ene[n] wiue, die wint ghelt

Verse: 349    Dorperlijc met haren lichame?
Verse: 350    Seker soe haddic cleine scame!

Verse: 351    Dit en ware v niet ghesciet,
Verse: 352    Waerdi van dorp[er]s aerde niet!

Verse: 353    Jc mach mi bedinken onsochte.
Verse: 354    Godsat hebdi diet sochte!

Verse: 355    Swighet meer deser talen
Verse: 356    En[de] hoert die voghele inden dalen,

Verse: 357    Hoe si singhe[n] en[de] he[m] v[er]vroyen.
Verse: 358    Die tijt sal v te min v[er]noyen.

Verse: 359    Alsic bi v ben, al naect,
Verse: 360    Op een bedde wel ghemaect,

Verse: 361    Soe doet al dat v ghenoecht
Verse: 362    En[de] dat uwer herten voeght.

Verse: 363    Jc hebs in mijn herte toren
Verse: 364    Dat ghijt mi heden leit te voren.'


Next part


This text is part of the TITUS edition of Beatrijs.

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.