TITUS
Vetus Testamentum graece iuxta LXX interpretes
Part No. 800
Previous part

Chapter: 11 
Verse: 1  ῾Υπολαβὼν δὲ Σωϕαρ ὁ Μιναῖος λέγει
Verse: 2  ῾Ο τὰ πολλὰ λέγων καὶ ἀντακούσεται·
ἢ καὶ ὁ εὔλαλος οἴεται εἶναι δίκαιος;
εὐλογημένος γεννητὸς γυναικὸς ὀλιγόβιος.
Verse: 3  μὴ πολὺς ἐν ῥήμασιν γίνου,
οὐ γάρ ἐστιν ὁ ἀντικρινόμενός σοι.
Verse: 4  μὴ γὰρ λέγε ὅτι Καθαρός εἰμι τοῖς ἔργοις
καὶ ἄμεμπτος ἐναντίον αὐτοῦ.
Verse: 5  ἀλλὰ πῶς ἂν ὁ κύριος λαλήσαι πρὸς σέ;
καὶ ἀνοίξει χείλη αὐτοῦ μετὰ σοῦ.S
Verse: 6  εἶτα ἀναγγελεῖ σοι δύναμιν σοϕίας,
ὅτι διπλοῦς ἔσται τῶν κατὰ σέ·
καὶ τότε γνώσῃ ὅτι ἄξιά σοι ἀπέβη ἀπὸ κυρίου ὧν ἡμάρτηκας.
Verse: 7  ἦ ἴχνος κυρίου εὑρήσεις
ἢ εἰς τὰ ἔσχατα ἀϕίκου, ἃ ἐποίησεν ὁ παντοκράτωρ;
Verse: 8  ὑψηλὸς ὁ οὐρανός, καὶ τί ποιήσεις;
βαθύτερα δὲ τῶν ἐν ᾅδου τί οἶδας;
Verse: 9  ἢ μακρότερα μέτρου γῆς
ἢ εὔρους θαλάσσης;
Verse: 10  ἐὰν δὲ καταστρέψῃ τὰ πάντα, τίς ἐρεῖ αὐτῷ Τί ἐποίησας;
Verse: 11  αὐτὸς γὰρ οἶδεν ἔργα ἀνόμων,
ἰδὼν δὲ ἄτοπα οὐ παρόψεται.
Verse: 12  ἄνθρωπος δὲ ἄλλως νήχεται λόγοις,
βροτὸς δὲ γεννητὸς γυναικὸς ἴσα ὄνῳ ἐρημίτῃ.
Verse: 13  εἰ γὰρ σὺ καθαρὰν ἔθου τὴν καρδίαν σου,
ὑπτιάζεις δὲ χεῖρας πρὸς αὐτόν,
Verse: 14  εἰ ἄνομόν τί ἐστιν ἐν χερσίν σου,
πόρρω ποίησον αὐτὸ ἀπὸ σοῦ,
ἀδικία δὲ ἐν διαίτῃ σου μὴ αὐλισθήτω.
Verse: 15  οὕτως γὰρ ἀναλάμψει σου τὸ πρόσωπον ὥσπερ ὕδωρ καθαρόν,
ἐκδύσῃ δὲ ῥύπον καὶ οὐ μὴ ϕοβηθῇς·
Verse: 16  καὶ τὸν κόπον ἐπιλήσῃ
ὥσπερ κῦμα παρελθὸν καὶ οὐ πτοηθήσῃ·
Verse: 17  ἡ δὲ εὐχή σου ὥσπερ ἑωσϕόρος,
ἐκ δὲ μεσημβρίας ἀνατελεῖ σοι ζωή·
Verse: 18  πεποιθώς τε ἔσῃ ὅτι ἔστιν σοι ἐλπίς,
ἐκ δὲ μερίμνης καὶ ϕροντίδος ἀναϕανεῖταί σοι εἰρήνη.
Verse: 19  ἡσυχάσεις γάρ, καὶ οὐκ ἔσται ὁ πολεμῶν σε·
μεταβαλόμενοι δὲ πολλοί σου δεηθήσονται.
Verse: 20  σωτηρία δὲ αὐτοὺς ἀπολείψει·
ἡ γὰρ ἐλπὶς αὐτῶν ἀπώλεια,
ὀϕθαλμοὶ δὲ ἀσεβῶν τακήσονται.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.