TITUS
Vetus Testamentum graece iuxta LXX interpretes
Part No. 802
Previous part

Chapter: 13 
Verse: 1  ἰδοὺ ταῦτα ἑώρακέν μου ὁ ὀϕθαλμὸς
καὶ ἀκήκοέν μου τὸ οὖς·
Verse: 2  καὶ οἶδα ὅσα καὶ ὑμεῖς ἐπίστασθε,
καὶ οὐκ ἀσυνετώτερός εἰμι ὑμῶν.
Verse: 3  οὐ μὴν δὲ ἀλλ' ἐγὼ πρὸς κύριον λαλήσω,
ἐλέγξω δὲ ἐναντίον αὐτοῦ ἐὰν βούληται.
Verse: 4  ὑμεῖς δέ ἐστε ἰατροὶ ἄδικοι
καὶ ἰαταὶ κακῶν πάντες.
Verse: 5  εἴη δὲ ὑμῖν κωϕεῦσαι,
καὶ ἀποβήσεται ὑμῖν εἰς σοϕίαν.
Verse: 6  ἀκούσατε ἔλεγχον στόματός μου,
κρίσιν δὲ χειλέων μου προσέχετε.
Verse: 7  πότερον οὐκ ἔναντι κυρίου λαλεῖτε,
ἔναντι δὲ αὐτοῦ ϕθέγγεσθε δόλον;
Verse: 8  ἦ ὑποστελεῖσθε;
ὑμεῖς δὲ αὐτοὶ κριταὶ γένεσθε.
Verse: 9  καλόν γε, ἐὰν ἐξιχνιάσῃ ὑμᾶς·
εἰ γὰρ τὰ πάντα ποιοῦντες προστεθήσεσθε αὐτῷ,
Verse: 10  οὐθὲν ἧττον ἐλέγξει ὑμᾶς·
εἰ δὲ καὶ κρυϕῇ πρόσωπα θαυμάσετε,
Verse: 11  πότερον οὐχὶ δεινὰ αὐτοῦ στροβήσει ὑμᾶς,
ϕόβος δὲ παρ' αὐτοῦ ἐπιπεσεῖται ὑμῖν;
Verse: 12  ἀποβήσεται δὲ ὑμῶν τὸ ἀγαυρίαμα ἴσα σποδῷ,
τὸ δὲ σῶμα πήλινον.
Verse: 13  κωϕεύσατε, ἵνα λαλήσω καὶ ἀναπαύσωμαι θυμοῦ
Verse: 14  ἀναλαβὼν τὰς σάρκας μου τοῖς ὀδοῦσιν,
ψυχὴν δέ μου θήσω ἐν χειρί.
Verse: 15  ἐάν με χειρώσηται ὁ δυνάστης, ἐπεὶ καὶ ἦρκται,
ἦ μὴν λαλήσω καὶ ἐλέγξω ἐναντίον αὐτοῦ·
Verse: 16  καὶ τοῦτό μοι ἀποβήσεται εἰς σωτηρίαν,
οὐ γὰρ ἐναντίον αὐτοῦ δόλος εἰσελεύσεται.
Verse: 17  ἀκούσατε ἀκούσατε τὰ ῥήματά μου·
ἀναγγελῶ γὰρ ὑμῶν ἀκουόντων.
Verse: 18  ἰδοὺ ἐγὼ ἐγγύς εἰμι τοῦ κρίματός μου,
οἶδα ἐγὼ ὅτι δίκαιος ἀναϕανοῦμαι.
Verse: 19  τίς γάρ ἐστιν ὁ κριθησόμενός μοι;
ὅτι νῦν κωϕεύσω καὶ ἐκλείψω.S
Verse: 20  δυεῖν δέ μοι χρήσῃ·
τότε ἀπὸ τοῦ προσώπου σου οὐ κρυβήσομαι·S
Verse: 21  τὴν χεῖρα ἀπ' ἐμοῦ ἀπέχου,
καὶ ὁ ϕόβος σου μή με καταπλησσέτω.
Verse: 22  εἶτα καλέσεις, ἐγὼ δέ σοι ὑπακούσομαι·
ἢ λαλήσεις, ἐγὼ δέ σοι δώσω ἀνταπόκρισιν.
Verse: 23  πόσαι εἰσὶν αἱ ἁμαρτίαι μου καὶ αἱ ἀνομίαι μου;
δίδαξόν με τίνες εἰσίν.
Verse: 24  διὰ τί ἀπ' ἐμοῦ κρύπτῃ,
ἥγησαι δέ με ὑπεναντίον σοι;
Verse: 25  ἦ ὡς ϕύλλον κινούμενον ὑπὸ ἀνέμου εὐλαβηθήσῃ
ἢ ὡς χόρτῳ ϕερομένῳ ὑπὸ πνεύματος ἀντίκεισαί μοι;
Verse: 26  ὅτι κατέγραψας κατ' ἐμοῦ κακά,
περιέθηκας δέ μοι νεότητος ἁμαρτίας,
Verse: 27  ἔθου δέ μου τὸν πόδα ἐν κωλύματι,
ἐϕύλαξας δέ μου πάντα τὰ ἔργα,
εἰς δὲ ῥίζας τῶν ποδῶν μου ἀϕίκου·
Verse: 28  ὃ παλαιοῦται ἴσα ἀσκῷ
ἢ ὥσπερ ἱμάτιον σητόβρωτον.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.