TITUS
Vetus Testamentum graece iuxta LXX interpretes
Part No. 874
Previous part

Chapter: 23 
Verse: 1    κύριε πάτερ καὶ δέσποτα ζωῆς μου,
   μὴ ἐγκαταλίπῃς με ἐν βουλῇ αὐτῶν,
   μὴ ἀϕῇς με πεσεῖν ἐν αὐτοῖς.
Verse: 2    τίς ἐπιστήσει ἐπὶ τοῦ διανοήματός μου μάστιγας
   καὶ ἐπὶ τῆς καρδίας μου παιδείαν σοϕίας,
   ἵνα ἐπὶ τοῖς ἀγνοήμασίν μου μὴ ϕείσωνται
   καὶ οὐ μὴ παρῇ τὰ ἁμαρτήματα αὐτῶν,
Verse: 3    ὅπως μὴ πληθυνθῶσιν αἱ ἄγνοιαί μου
   καὶ αἱ ἁμαρτίαι μου πλεονάσωσιν
   καὶ πεσοῦμαι ἔναντι τῶν ὑπεναντίων
   καὶ ἐπιχαρεῖταί μοι ὁ ἐχθρός μου;
Verse: 4    κύριε πάτερ καὶ θεὲ ζωῆς μου,
   μετεωρισμὸν ὀϕθαλμῶν μὴ δῷς μοι
Verse: 5    καὶ ἐπιθυμίαν ἀπόστρεψον ἀπ' ἐμοῦ·
Verse: 6    κοιλίας ὄρεξις καὶ συνουσιασμὸς μὴ καταλαβέτωσάν με,
   καὶ ψυχῇ ἀναιδεῖ μὴ παραδῷς με.
Verse: 7    Παιδείαν στόματος ἀκούσατε, τέκνα,
   καὶ ὁ ϕυλάσσων οὐ μὴ ἁλῷ.
Verse: 8    ἐν τοῖς χείλεσιν αὐτοῦ καταληϕθήσεται ἁμαρτωλός,
   καὶ λοίδορος καὶ ὑπερήϕανος σκανδαλισθήσονται ἐν αὐτοῖς.
Verse: 9    ὅρκῳ μὴ ἐθίσῃς τὸ στόμα σου
   καὶ ὀνομασίᾳ τοῦ ἁγίου μὴ συνεθισθῇς·
Verse: 10    ὥσπερ γὰρ οἰκέτης ἐξεταζόμενος ἐνδελεχῶς
   ἀπὸ μώλωπος οὐκ ἐλαττωθήσεται,
   οὕτως καὶ ὁ ὀμνύων καὶ ὀνομάζων διὰ παντὸς
   ἀπὸ ἁμαρτίας οὐ μὴ καθαρισθῇ.
Verse: 11    ἀνὴρ πολύορκος πλησθήσεται ἀνομίας,
   καὶ οὐκ ἀποστήσεται ἀπὸ τοῦ οἴκου αὐτοῦ μάστιξ·
   ἐὰν πλημμελήσῃ, ἁμαρτία αὐτοῦ ἐπ' αὐτῷ,
   κἂν ὑπερίδῃ, ἥμαρτεν δισσῶς·
   καὶ εἰ διὰ κενῆς ὤμοσεν, οὐ δικαιωθήσεται,
   πλησθήσεται γὰρ ἐπαγωγῶν ὁ οἶκος αὐτοῦ.
Verse: 12    ῎Εστιν λέξις ἀντιπαραβεβλημένη θανάτῳ,
   μὴ εὑρεθήτω ἐν κληρονομίᾳ Ιακωβ·
   ἀπὸ γὰρ εὐσεβῶν ταῦτα πάντα ἀποστήσεται,
   καὶ ἐν ἁμαρτίαις οὐκ ἐγκυλισθήσονται.
Verse: 13    ἀπαιδευσίαν ἀσυρῆ μὴ συνεθίσῃς τὸ στόμα σου·
   ἔστιν γὰρ ἐν αὐτῇ λόγος ἁμαρτίας.
Verse: 14    μνήσθητι πατρὸς καὶ μητρός σου,
   ἀνὰ μέσον γὰρ μεγιστάνων συνεδρεύεις,
   μήποτε ἐπιλάθῃ ἐνώπιον αὐτῶν
   καὶ τῷ ἐθισμῷ σου μωρανθῇς
   καὶ θελήσεις εἰ μὴ ἐγεννήθης
   καὶ τὴν ἡμέραν τοῦ τοκετοῦ σου καταράσῃ.
Verse: 15    ἄνθρωπος συνεθιζόμενος λόγοις ὀνειδισμοῦ
   ἐν πάσαις ταῖς ἡμέραις αὐτοῦ οὐ μὴ παιδευθῇ.
Verse: 16    Δύο εἴδη πληθύνουσιν ἁμαρτίας,
   καὶ τὸ τρίτον ἐπάξει ὀργήν·
Verse: 17    ψυχὴ θερμὴ ὡς πῦρ καιόμενον,
   οὐ μὴ σβεσθῇ ἕως ἂν καταποθῇ·
   ἄνθρωπος πόρνος ἐν σώματι σαρκὸς αὐτοῦ,
   οὐ μὴ παύσηται ἕως ἂν ἐκκαύσῃ πῦρ·
   ἀνθρώπῳ πόρνῳ πᾶς ἄρτος ἡδύς,
   οὐ μὴ κοπάσῃ ἕως ἂν τελευτήσῃ.
Verse: 18    ἄνθρωπος παραβαίνων ἀπὸ τῆς κλίνης αὐτοῦ
   λέγων ἐν τῇ ψυχῇ αὐτοῦ Τίς με ὁρᾷ;
   σκότος κύκλῳ μου, καὶ οἱ τοῖχοί με καλύπτουσιν,
   καὶ οὐθείς με ὁρᾷ· τί εὐλαβοῦμαι;
   τῶν ἁμαρτιῶν μου οὐ μὴ μνησθήσεται ὁ ὕψιστος.
Verse: 19    καὶ ὀϕθαλμοὶ ἀνθρώπων ὁ ϕόβος αὐτοῦ,
   καὶ οὐκ ἔγνω ὅτι ὀϕθαλμοὶ κυρίου
   μυριοπλασίως ἡλίου ϕωτεινότεροι
   ἐπιβλέποντες πάσας ὁδοὺς ἀνθρώπων
   καὶ κατανοοῦντες εἰς ἀπόκρυϕα μέρη.
Verse: 20    πρὶν ἢ κτισθῆναι τὰ πάντα ἔγνωσται αὐτῷ,
   οὕτως καὶ μετὰ τὸ συντελεσθῆναι.
Verse: 21    οὗτος ἐν πλατείαις πόλεως ἐκδικηθήσεται,
   καὶ οὗ οὐχ ὑπενόησεν, πιασθήσεται.
Verse: 22    Οὕτως καὶ γυνὴ καταλιποῦσα τὸν ἄνδρα
   καὶ παριστῶσα κληρονόμον ἐξ ἀλλοτρίου.
Verse: 23    πρῶτον μὲν γὰρ ἐν νόμῳ ὑψίστου ἠπείθησεν,
   καὶ δεύτερον εἰς ἄνδρα αὐτῆς ἐπλημμέλησεν,
   καὶ τὸ τρίτον ἐν πορνείᾳ ἐμοιχεύθη
   καὶ ἐξ ἀλλοτρίου ἀνδρὸς τέκνα παρέστησεν.
Verse: 24    αὕτη εἰς ἐκκλησίαν ἐξαχθήσεται,
   καὶ ἐπὶ τὰ τέκνα αὐτῆς ἐπισκοπὴ ἔσται.
Verse: 25    οὐ διαδώσουσιν τὰ τέκνα αὐτῆς εἰς ῥίζαν,
   καὶ οἱ κλάδοι αὐτῆς οὐκ οἴσουσιν καρπόν.
Verse: 26    καταλείψει εἰς κατάραν τὸ μνημόσυνον αὐτῆς,
   καὶ τὸ ὄνειδος αὐτῆς οὐκ ἐξαλειϕθήσεται,
Verse: 27    καὶ ἐπιγνώσονται οἱ καταλειϕθέντες
   ὅτι οὐθὲν κρεῖττον ϕόβου κυρίου
   καὶ οὐθὲν γλυκύτερον τοῦ προσέχειν ἐντολαῖς κυρίου.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.