TITUS
Vetus Testamentum graece iuxta LXX interpretes
Part No. 877
Previous part

Chapter: 26 
Verse: 1    Γυναικὸς ἀγαθῆς μακάριος ὁ ἀνήρ,
   καὶ ἀριθμὸς τῶν ἡμερῶν αὐτοῦ διπλάσιος.
Verse: 2    γυνὴ ἀνδρεία εὐϕραίνει τὸν ἄνδρα αὐτῆς,
   καὶ τὰ ἔτη αὐτοῦ πληρώσει ἐν εἰρήνῃ.
Verse: 3    γυνὴ ἀγαθὴ μερὶς ἀγαθή,
   ἐν μερίδι ϕοβουμένων κύριον δοθήσεται·
Verse: 4    πλουσίου δὲ καὶ πτωχοῦ καρδία ἀγαθή,
   ἐν παντὶ καιρῷ πρόσωπον ἱλαρόν.
Verse: 5    ᾽Απὸ τριῶν εὐλαβήθη ἡ καρδία μου,
   καὶ ἐπὶ τῷ τετάρτῳ προσώπῳ ἐδεήθην·
   διαβολὴν πόλεως, καὶ ἐκκλησίαν ὄχλου,
   καὶ καταψευσμόν, ὑπὲρ θάνατον πάντα μοχθηρά.
Verse: 6    ἄλγος καρδίας καὶ πένθος γυνὴ ἀντίζηλος ἐπὶ γυναικὶ
   καὶ μάστιξ γλώσσης πᾶσιν ἐπικοινωνοῦσα.
Verse: 7    βοοζύγιον σαλευόμενον γυνὴ πονηρά,
   ὁ κρατῶν αὐτῆς ὡς ὁ δρασσόμενος σκορπίου.
Verse: 8    ὀργὴ μεγάλη γυνὴ μέθυσος
   καὶ ἀσχημοσύνην αὐτῆς οὐ συγκαλύψει.
Verse: 9    πορνεία γυναικὸς ἐν μετεωρισμοῖς ὀϕθαλμῶν
   καὶ ἐν τοῖς βλεϕάροις αὐτῆς γνωσθήσεται.
Verse: 10    ἐπὶ θυγατρὶ ἀδιατρέπτῳ στερέωσον ϕυλακήν,
   ἵνα μὴ εὑροῦσα ἄνεσιν ἑαυτῇ χρήσηται·
Verse: 11    ὀπίσω ἀναιδοῦς ὀϕθαλμοῦ ϕύλαξαι
   καὶ μὴ θαυμάσῃς, ἐὰν εἰς σὲ πλημμελήσῃ·
Verse: 12    ὡς διψῶν ὁδοιπόρος τὸ στόμα ἀνοίξει
   καὶ ἀπὸ παντὸς ὕδατος τοῦ σύνεγγυς πίεται,
   κατέναντι παντὸς πασσάλου καθήσεται
   καὶ ἔναντι βέλους ἀνοίξει ϕαρέτραν.
Verse: 13    Χάρις γυναικὸς τέρψει τὸν ἄνδρα αὐτῆς,
   καὶ τὰ ὀστᾶ αὐτοῦ πιανεῖ ἡ ἐπιστήμη αὐτῆς.
Verse: 14    δόσις κυρίου γυνὴ σιγηρά,
   καὶ οὐκ ἔστιν ἀντάλλαγμα πεπαιδευμένης ψυχῆς·
Verse: 15    χάρις ἐπὶ χάριτι γυνὴ αἰσχυντηρά,
   καὶ οὐκ ἔστιν σταθμὸς πᾶς ἄξιος ἐγκρατοῦς ψυχῆς.
Verse: 16    ἥλιος ἀνατέλλων ἐν ὑψίστοις κυρίου
   καὶ κάλλος ἀγαθῆς γυναικὸς ἐν κόσμῳ οἰκίας αὐτῆς·
Verse: 17    λύχνος ἐκλάμπων ἐπὶ λυχνίας ἁγίας
   καὶ κάλλος προσώπου ἐπὶ ἡλικίᾳ στασίμῃ·
Verse: 18    στῦλοι χρύσεοι ἐπὶ βάσεως ἀργυρᾶς
   καὶ πόδες ὡραῖοι ἐπὶ στέρνοις εὐσταθοῦς.
Verse: 28    ᾽Επὶ δυσὶ λελύπηται ἡ καρδία μου,
   καὶ ἐπὶ τῷ τρίτῳ θυμός μοι ἐπῆλθεν·
   ἀνὴρ πολεμιστὴς ὑστερῶν δι' ἔνδειαν,
   καὶ ἄνδρες συνετοὶ ἐὰν σκυβαλισθῶσιν,
   ἐπανάγων ἀπὸ δικαιοσύνης ἐπὶ ἁμαρτίαν·
   ὁ κύριος ἑτοιμάσει εἰς ῥομϕαίαν αὐτόν.
Verse: 29    Μόλις ἐξελεῖται ἔμπορος ἀπὸ πλημμελείας,
   καὶ οὐ δικαιωθήσεται κάπηλος ἀπὸ ἁμαρτίας.

Next part


This text is part of the TITUS edition of Vetus Testamentum graece iuxta LXX interpretes.

Copyright TITUS Project, Frankfurt a/M, 23.1.2025. No parts of this document may be republished in any form without prior permission by the copyright holder.