TITUS
Atharva-Veda-Samhita (Saunaka)
Part No. 105
Previous part

Hymn: 3 
Verse: 1 
Halfverse: a    úd itás tráyo akraman vyāgʰráḥ púruṣo vŕ̥kaḥ /
Halfverse: c    hírug gʰí yánti síndʰavo hírug devó vánaspátir híruṅ namantu śátravaḥ //1//

Verse: 2 
Halfverse: a    páreṇaitu patʰā́ vŕ̥kaḥ paraméṇotá táskaraḥ /
Halfverse: c    páreṇa datvátī rájjuḥ páreṇāgʰāyúr arṣatu //2//

Verse: 3 
Halfverse: a    akṣyaù ca te múkʰaṃ ca te vyā́gʰra jambʰayāmasi /
Halfverse: c    ā́t sárvān viṃśatíṃ nakʰā́n //3//

Verse: 4 
Halfverse: a    vyāgʰráṃ datvátāṃ vayáṃ pratʰamáṃ jambʰayāmasi /
Halfverse: c    ā́d u ṣṭenám átʰo áhiṃ yātudʰā́nam átʰo vŕ̥kam //4//

Verse: 5 
Halfverse: a    yó adyá stená ā́yati sá sáṃpiṣṭo ápāyati /
Halfverse: c    patʰā́m apadʰvaṃsénaitv índro vájreṇa hantu tám //5//

Verse: 6 
Halfverse: a    mūrṇā́ mr̥gásya dántā ápiśīrṇā u pr̥ṣṭáyaḥ /
Halfverse: c    nimrúk te godʰā́ bʰavatu nīcā́yac cʰaśayúr mr̥gáḥ //6//

Verse: 7 
Halfverse: a    yát saṃyámo ná ví yamo ví yamo yán ná saṃyámaḥ /
Halfverse: c    indrajā́ḥ somajā́ ātʰarvaṇám asi vyāgʰrajámbʰanam //7//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.