TITUS
Atharva-Veda-Samhita (Saunaka)
Part No. 106
Previous part

Hymn: 4 
Verse: 1 
Halfverse: a    yā́ṃ tvā gandʰarvó ákʰanad váruṇāya mr̥tábʰraje /
Halfverse: c    tā́ṃ tvā vayáṃ kʰanāmasy óṣadʰiṃ śepahárṣaṇīm //1//

Verse: 2 
Halfverse: a    úd uṣā́ úd u sū́rya úd idáṃ māmakáṃ vácaḥ /
Halfverse: c    úd ejatu prajā́patir vŕ̥ṣā śúṣmeṇa vājínā //2//

Verse: 3 
Halfverse: a    yátʰā sma te viróhato 'bʰítaptam ivā́nati /
Halfverse: c    tátas te śúṣmavattaram iyáṃ kr̥ṇotv óṣadʰiḥ //3//

Verse: 4 
Halfverse: a    úc cʰúṣmaúṣadʰīnāṃ sā́rā r̥ṣabʰā́ṇām /
Halfverse: c    sáṃ puṃsā́m indra vŕ̥ṣṇyam asmín dʰehi tanūvaśin //4//

Verse: 5 
Halfverse: a    apā́ṃ rásaḥ pratʰamajó 'tʰo vánaspátīnām /
Halfverse: c    utá sómasya bʰrā́tāsy utā́rśám asi vŕ̥ṣṇyam //5//

Verse: 6 
Halfverse: a    adyā́gne adyá savitar adyá devi sarasvati /
Halfverse: c    adyā́syá brahmaṇas pate dʰánur ivā́ tānayā pásaḥ //6//

Verse: 7 
Halfverse: a    ā́háṃ tanomi te páso ádʰi jyā́m iva dʰánvani /
Halfverse: c    krámasvárśa iva rohítam ánavaglāyatā sádā //7//

Verse: 8 
Halfverse: a    áśvasyāśvatarásyājásya pétvasya ca /
Halfverse: c    átʰa r̥ṣabʰásya yé vā́jās tā́n asmín dʰehi tanūvaśin //8//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.