TITUS
Atharva-Veda-Samhita (Saunaka)
Part No. 144
Previous part

Hymn: 2 
Verse: 1 
Halfverse: a    tád íd āsa bʰúvaneṣu jyéṣṭʰam yáto yajñá ugrás tveṣánr̥mṇaḥ /
Halfverse: c    sadyó jajñānó ní riṇāti śátrūn ánu yád enaṃ mádanti víśva ū́māḥ //1//

Verse: 2 
Halfverse: a    vavr̥dʰānáḥ śávasā bʰū́ryojāḥ śátrur dāsā́ya bʰiyásaṃ dadʰāti /
Halfverse: c    ávyanac ca vyanác ca sásni sáṃ te navanta prábʰr̥tā mádeṣu //2//

Verse: 3 
Halfverse: a    tvé krátum ápi pr̥ñcanti bʰū́ri dvír yád eté trír bʰavanty ū́māḥ /
Halfverse: c    svadóḥ svā́dīyaḥ svādúnā sr̥jā sám adáḥ sú mádʰu mádʰunābʰí yodʰīḥ //3//

Verse: 4 
Halfverse: a    yádi cin nú tvā dʰánā jáyantaṃ ráṇeraṇe anumádanti viprāḥ /
Halfverse: c    ójīyaḥ śuṣmint stʰirám ā́ tanuṣva mā́ tvā dabʰan durévāsaḥ kaśókāḥ //4//

Verse: 5 
Halfverse: a    tváyā vayáṃ śāśadmahe ráṇeṣu prapáśyanto yudʰényāni bʰū́ri /
Halfverse: c    codáyāmi ta ā́yudʰā vácobʰiḥ sáṃ te śiśāmi bráhmaṇā váyāṃsi //5//

Verse: 6 
Halfverse: a    ní tád dadʰiṣé 'vare páre ca yásminn ā́vitʰā́vasā duroṇé /
Halfverse: c    ā́ stʰāpayata mātáraṃ jigatnúm áta invata kárvarāṇi bʰū́ri //6//

Verse: 7 
Halfverse: a    stuṣvá varṣman puruvártmānaṃ sám ŕ̥bʰvāṇam inátamam āptám āptyā́nām /
Halfverse: c    ā́ darśati śávasā bʰū́ryojāḥ prá sakṣati pratimā́naṃ pr̥tʰivyā́ḥ //7//

Verse: 8 
Halfverse: a    imā́ bráhma br̥háddivaḥ kr̥ṇavad índrāya śūṣám agriyáḥ svarṣā́ḥ /
Halfverse: c    mahó gotrásya kṣayati svarā́jā túraś cid víśvam arṇavat tápasvān //8//

Verse: 9 
Halfverse: a    evā́ mahā́n br̥háddivo átʰarvā́vocat svā́ṃ tanvà1m índram evá /
Halfverse: c    svásārau mātaríbʰvarī aripré hinvánti caine śávasā vardʰáyanti ca //9//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.