TITUS
Atharva-Veda-Samhita (Saunaka)
Part No. 145
Previous part

Hymn: 3 
Verse: 1 
Halfverse: a    mámāgne várco vihavéṣv astu vayáṃ tvéndʰānās tanvàm puṣema /
Halfverse: c    máhyaṃ namantāṃ pradíśaś cátasras tváyā́dʰyakṣeṇa pŕ̥tanā jayema //1//

Verse: 2 
Halfverse: a    ágne manyúṃ pratinudán páreṣāṃ tváṃ no gopā́ḥ pári pāhi viśvátaḥ /
Halfverse: c    ápāñco yantu nivátā durasyávo 'maíṣāṃ cittáṃ prabúdʰāṃ ví neśat //2//

Verse: 3 
Halfverse: a    máma devā́ vihavé santu sárva índravanto marúto víṣṇur agníḥ /
Halfverse: c    mámāntárikṣam urúlokam astu máhyaṃ vā́taḥ pavatāṃ kā́māyāsmaí //3//

Verse: 4 
Halfverse: a    máhyaṃ yajantāṃ máma yā́nīṣṭā́kūtiḥ satyā́ mánaso me astu /
Halfverse: c    éno mā́ ní gāṃ katamác canāháṃ víśve devā́ abʰí rakṣantu mehá //4//

Verse: 5 
Halfverse: a    máyi devā́ dráviṇam ā́ yajantāṃ máyi āśī́r astu máyi deváhūtiḥ /
Halfverse: c    daivā́ hótāraḥ saniṣan na etád áriṣṭāḥ syāma tanvā̀ suvī́rāḥ //5//

Verse: 6 
Halfverse: a    daívīḥ ṣaḍ urvīr urú naḥ kr̥ṇota víśve devāsa ihá mādayadʰvam /
Halfverse: c    mā́ no vidad abʰibʰā́ mó áśastir mā́ no vidad vr̥jinā́ dvéṣyā yā́ //6//

Verse: 7 
Halfverse: a    tísro devīr máhi naḥ śárma yacʰata prajā́yai nas tanvè3 yác ca puṣṭám /
Halfverse: c    mā́ hāsmahi prajáyā mā́ tanū́bʰir mā́ radʰāma dviṣaté soma rājan //7//

Verse: 8 
Halfverse: a    uruvyácā no mahiṣáḥ śárma yacʰatv asmín háve puruhūtáḥ purukṣú /
Halfverse: c    sá naḥ prajā́yai haryaśva mr̥ḍéndra mā́ no rīriṣo mā́ párā dāḥ //8//

Verse: 9 
Halfverse: a    dʰātā́ vidʰātā́ bʰúvanasya yás pátir deváḥ savitā́bʰimātiṣāháḥ /
Halfverse: c    ādityā́ rudrā́ aśvínobʰā́ devā́ḥ pāntu yájamānaṃ nirr̥tʰā́t //9//

Verse: 10 
Halfverse: a    yé naḥ sapátnā ápa té bʰavantv indrāgníbʰyām áva bādʰāmaha enān /
Halfverse: c    ādityā́ rudrā́ uparispŕ̥śo na ugráṃ cettā́ram adʰirājám akrata //10//

Verse: 11 
Halfverse: a    arvā́ñcam índram amúto havāmahe yó gojíd dʰanajíd aśvajíd yáḥ /
Halfverse: c    imáṃ no yajñáṃ vihavé śr̥ṇotv asmā́kam abʰūr haryaśva medī́ //11//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.