TITUS
Atharva-Veda-Samhita (Saunaka)
Part No. 560
Previous part

Hymn: 44 
Verse: 1 
Halfverse: a    ā́yuṣo 'si pratáraṇaṃ vípraṃ bʰeṣajám ucyase /
Halfverse: c    
tád āñjana tváṃ śaṃtāte śám ā́po ábʰayaṃ kr̥tam //1//

Verse: 2 
Halfverse: a    
harimā́ jāyā́nyo 'ṅgabʰedó viṣálpakaḥ /
Halfverse: c    
sárvaṃ te yákṣmam áṅgebʰyo bahír nír hantv ā́ñjanam //2//

Verse: 3 
Halfverse: a    
ā́ñjanaṃ pr̥tʰivyā́ṃ jātáṃ bʰadráṃ puruṣajī́vanam /
Halfverse: c    
kr̥ṇótv ápramāyukaṃ rátʰajūtim ánāgasam //3//

Verse: 4 
Halfverse: a    
prā́ṇa prāṇáṃ trāyasvāso ásave mr̥ḍa /
Halfverse: c    
nírr̥te nírr̥tyā naḥ pā́śebʰyo muñca //4//

Verse: 5 
Halfverse: a    
síndʰor gárbʰo 'si vidyútaṃ púṣpam /
Halfverse: c    
vātaḥ prāṇáḥ sū́ryaś cákṣur divás páyaḥ //5//

Verse: 6 
Halfverse: a    
dévāñjana traíkakuda pári pāhi viśvátaḥ /
Halfverse: c    
tvā taranty óṣadʰayo bā́hyāḥ parvatī́yā utá //6//

Verse: 7 
Halfverse: a    
vī́dáṃ mádʰyam ávāsr̥pad rakṣohā́mīvacā́tanaḥ /
Halfverse: c    
ámīvāḥ sárvāś cātáyan nāśáyad abʰibʰā́ itáḥ //7//

Verse: 8 
Halfverse: a    
bahv ì3dáṃ rājan varuṇā́nr̥tam āha pū́ruṣaḥ /
Halfverse: c    
tásmāt sahasravīrya muñcá naḥ páry áṃhasaḥ //8//

Verse: 9 
Halfverse: a    
yád āpo agʰnyā́ íti váruṇéti yád ūcimá /
Halfverse: c    
tásmāt sahasravīrya muñcá naḥ páry áṃhasaḥ //9//

Verse: 10 
Halfverse: a    
mitráś ca tvā váruṇaś cānupréyatur āñjana /
Halfverse: c    
taú tvānugátya dūráṃ bʰogā́ya púnar óhatuḥ //10//

Next part



This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.