TITUS
Atharva-Veda-Samhita (Saunaka)
Part No. 561
Previous part

Hymn: 45 
Verse: 1 
Halfverse: a    r̥ṇā́d r̥ṇám iva sáṃ naya kr̥tyā́ṃ kr̥tyākŕ̥to gr̥hám /
Halfverse: c    
cákṣurmantrasya durhā́rdaḥ pr̥ṣṭī́r ápi śr̥ṇāñjana //1//

Verse: 2 
Halfverse: a    
yád asmā́su duṣvápnyaṃ yád góṣu yác ca no gr̥hé /
Halfverse: c    
ánāmagas táṃ ca durhā́rdaḥ priyáḥ práti muñcatām //2//

Verse: 3 
Halfverse: a    
apā́m ūrjá ójaso vāvr̥dʰānám agnér jātám ádʰi jātávedasaḥ /
Halfverse: c    
cáturvīraṃ parvatī́yaṃ yád ā́ñjanaṃ díśaḥ pradiśaḥ karad íc cʰivā́s te //3//

Verse: 4 
Halfverse: a    
cáturvīraṃ badʰyata ā́ñjanaṃ te sárvā díśo ábʰayās te bʰavantu /
Halfverse: c    
dʰruvás tiṣṭʰāsi savitéva cā́rya imā́ víśo abʰí harantu te balím //4//

Verse: 5 
Halfverse: a    
ā́kṣvaíkaṃ maṇím ékaṃ krṇuṣva snāhy ékenā́ pibaíkam eṣām /
Halfverse: c    
cáturvīraṃ nairr̥tébʰyaś catúrbʰyo grā́hyā bandʰébʰyaḥ pári pātv asmā́n //5//

Verse: 6 
Halfverse: a    
agnír māgnínāvatu prāṇā́yāpānā́yā́yuṣe várcasa ójase /
Halfverse: c    
téjase svastáye subʰūtáye svā́hā //6//

Verse: 7 
Halfverse: a    
índro mendriyéṇāvatu prāṇā́yāpānā́yā́yuṣe várcasa ójase /
Halfverse: c    
téjase svastáye subʰūtáye svā́hā //7//

Verse: 8 
Halfverse: a    
sómo saúmyenāvatu prāṇā́yāpānā́yā́yuṣe várcasa ójase /
Halfverse: c    
téjase svastáye subʰūtáye svā́hā //8//

Verse: 9 
Halfverse: a    
bʰágo ma bʰágenāvatu prāṇā́yāpānā́yā́yuṣe várcasa ójase /
Halfverse: c    
téjase svastáye subʰūtáye svā́hā //9//

Verse: 10 
Halfverse: a    
marúto gaṇaír avantu prāṇā́yāpānā́yuṣe várcasa ójase téjase /
Halfverse: c    
svastáye subʰūtáye svā́hā //10//

Next part



This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.