TITUS
Atharva-Veda-Samhita (Saunaka)
Part No. 562
Previous part

Hymn: 46 
Verse: 1 
Halfverse: a    prajā́patiṣ ṭvā badʰnāt pratʰamám ástr̥taṃ vīryā̀ya kám /
Halfverse: c    tát te badʰnāmy ā́yuṣe várcasa ójase ca bálāya cā́str̥tas tvābʰí rakṣatu //1//

Verse: 2 
Halfverse: a    ūrdʰvás tiṣṭʰatu rákṣann ápramādam ástr̥temám mā́ tvā dabʰan paṇáyo yātudʰā́nāḥ /
Halfverse: c    índra iva dásyūn áva dʰūnuṣva pr̥tanyatáḥ sárvāṃ cʰátrūn ví ṣahasvā́str̥tas tvābʰí rakṣatu //2//

Verse: 3 
Halfverse: a    śatáṃ ca na praháranto nigʰnánto ná tastiré /
Halfverse: c    tásminn índraḥ páry adatta cákṣuḥ prāṇám átʰo bálam ástr̥tas tvābʰí rakṣatu //3//

Verse: 4 
Halfverse: a    índrasya tvā vármaṇā pári dʰāpayāmo yó devā́nām adʰirājó babʰū́va /
Halfverse: c    púnas tvā devā́ḥ prá ṇayantu sárvé 'str̥tas tvābʰí rakṣatu //4//

Verse: 5 
Halfverse: a    asmín maṇā́v ékaśataṃ vīryā̀ṇi sahásraṃ prāṇā́ asminn ástr̥te /
Halfverse: c    vyāgʰráḥ śátrūn abʰí tiṣṭʰa sárvān yás tvā pr̥tanyād ádʰaraḥ só astv ástr̥tas tvābʰí rakṣatu //5//

Verse: 6 
Halfverse: a    gʰr̥tā́d úllupto mádʰumān páyasvānt sahásraprāṇaḥ śatáyonir vayodʰā́ḥ /
Halfverse: c    śambʰū́ś ca mayobʰū́ś córjasvāṃś ca páyasvāṃś cā́str̥tas tvābʰí rakṣatu //6//

Verse: 7 
Halfverse: a    yátʰā tvám uttaró 'so asapatnáḥ sapatnahā́ /
Halfverse: c    sajātā́nām asad vaśī́ tátʰā tvā savitā́ karad ástr̥tas tvābʰí rakṣatu //7//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.