TITUS
Atharva-Veda-Samhita (Saunaka)
Part No. 563
Previous part

Hymn: 47 
Verse: 1 
Halfverse: a    ā́ rātri pā́rtʰivaṃ rájaḥ pitúr aprāyi dʰā́mabʰiḥ /
Halfverse: c    
diváḥ sádāṃsi br̥hatī́ tiṣṭʰasa ā́ tveṣáṃ vartate támaḥ //1//

Verse: 2 
Halfverse: a    
yásyāḥ pāráṃ dádr̥śe yóyuvad víśvam asyā́ṃ viśate yád éjāti /
Halfverse: c    
áriṣṭāsas ta urvi tamasvati rā́tri pārám aśīmahi bʰádre pārám aśīmahi //2//

Verse: 3 
Halfverse: a    
te rātri nr̥cákṣaso draṣṭā́ro navatī́r náva /
Halfverse: c    
aśītíḥ sánty aṣṭā́ utó te saptá saptatíḥ //3//

Verse: 4 
Halfverse: a    
ṣaṣṭíś ca ṣáṭ ca revati pañcāśát páñca sumnayi /
Halfverse: c    
catvā́raś catvāriṃśác ca tráyas triṃśác ca vājini //4//

Verse: 5 
Halfverse: a    
dvaú ca te viṃśatíś ca te rā́try ékādaśāvamā́ḥ /
Halfverse: c    
tébʰir no adyá pāyúbʰir pāhi duhitar divaḥ //5//

Verse: 6 
Halfverse: a    
rákṣā mā́kir no adʰáśaṃsa īśata mā́ no duḥśáṃsa īśata /
Halfverse: c    
mā́ no adyá gávāṃ stenó mā́vīnāṃ vŕ̥ka īśata //6//

Verse: 7 
Halfverse: a    
mā́śvānāṃ bʰadre táskaro mā́ nr̥ṇā́ṃ yātudʰānyàḥ /
Halfverse: c    
paramébʰiḥ patʰíbʰiḥ stenó dʰāvatu táskaraḥ /
Halfverse: e    
páreṇa datvátī rájjuḥ páreṇāgʰayúr arṣatu //7//

Verse: 8 
Halfverse: a    
ádʰa rātri tr̥ṣṭádʰūmam aśīrṣā́ṇam áhiṃ kr̥ṇu /
Halfverse: c    
hánū vŕ̥kasya jambʰáyā stenáṃ drupadé jahi //8//

Verse: 9 
Halfverse: a    
tváyi rātri vasāmasi svapiṣyā́masi jāgr̥hí /
Halfverse: c    
góbʰyo naḥ śárma yacʰā́śvebʰyaḥ púruṣebʰyaḥ //9//

Next part



This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.