TITUS
Atharva-Veda-Samhita (Saunaka)
Part No. 564
Previous part

Hymn: 48 
Verse: 1 
Halfverse: a    átʰo yā́ni ca yásmā ha yā́ni cāntáḥ parīṇáhi /
Halfverse: c    tā́ni te pári dadmasi //1//

Verse: 2 
Halfverse: a    rā́tri mā́tar uṣáse naḥ pári dehi /
Halfverse: c    uṣó no áhne pári dadātv áhas túbʰyaṃ vibʰāvari //2//

Verse: 3 
Halfverse: a    yát kíṃ cedáṃ patáyati yát kíṃ cedáṃ sarīsr̥pám /
Halfverse: c    yát kíṃ ca párvatāyāsátvaṃ tásmāt tváṃ rātri pāhi naḥ //3//

Verse: 4 
Halfverse: a    sā́ paścā́t pāhi sā́ puráḥ sóttarā́d adʰarā́d utá /
Halfverse: c    gopāyá no vibʰāvari stotā́ras ta ihá smasi //4//

Verse: 5 
Halfverse: a    yé rā́trim anutíṣṭʰanti yé ca bʰūtéṣu jā́grati /
Halfverse: c    paśū́n yé sárvān rákṣanti té na ātmásu jāgrati té naḥ paśúṣu jāgrati //5//

Verse: 6 
Halfverse: a    véda vaí rātri te nā́ma gʰr̥tā́cī nā́ma vā́ asi /
Halfverse: c    tā́ṃ tvā́ṃ bʰarádvājo veda sā́ no vitté 'dʰi jāgrati //6//

Next part


This text is part of the TITUS edition of Atharva-Veda-Samhita (Saunaka).

Copyright TITUS Project, Frankfurt a/M, 4.3.2015. No parts of this document may be republished in any form without prior permission by the copyright holder.