TITUS
Rg-Veda: Aitareya-Brahmana
Part No. 32
Previous part

Paragraph: 2 


Sentence: 1    añjmo yūpam, anubrūhīty āhādʰvaryur
Sentence: 2    añjanti tvām adʰvare devayanta ity auvāhā/dʰvare
Sentence: 3    hy enaṃ devayanto 'ñjanti
Sentence: 4    vanaspate madʰunā daivyenety. etad vai madʰu daivyaṃ yad ājyaṃ
Sentence: 5    yad ūrdʰvas tiṣṭhā draviṇeha dʰattād
   yad vā kṣayo mātur asyā upastʰa iti. yadi ca tiṣṭhāsi yadi ca śayāsai
   draviṇam evāsmāsu dʰattād ity eva tad āho/c
Sentence: 6    cʰrayasva vanaspata ity uccʰrīyamāṇāyābʰirūpā.
   yad yajñe 'bʰirūpaṃ tat samr̥ddʰaṃ
Sentence: 7    varṣman pr̥tʰivyā adʰīty.
   etad vai varṣma pr̥tʰivyai yatra yūpam unminvanti
Sentence: 8    sumitī mīyamāno varco dʰā yajñavāhasa ity āśiṣam āśāste
Sentence: 9    samiddʰasya śrayamāṇaḥ purastād īti
Sentence: 10    samiddʰasya hy eṣa etat purastāc cʰrayate
Sentence: 11    brahma vanvāno ajaraṃ suvīram īty āśiṣam evāśāsta
Sentence: 12    āre asmad amatim bādʰamāna ity. aśanāyā vaī pāpmāmatis,
   tām eva tad ārān nudate yajñāc ca yajamānāc co/c
Sentence: 13    cʰrayasva mahate saubʰagāyety āśiṣam evāśāsta
Sentence: 14    ūrdʰva ū ṣu ṇa ūtaye tiṣṭhā devo na saviteti
Sentence: 15    yad vai devānāṃ neti tad eṣām o+m iti.
   tiṣṭha deva iva Savitety eva tad āho/rdʰvo
Sentence: 16    vājasya saniteti. vājasanim evainaṃ tad dʰanasāṃ sanoti
Sentence: 17    yad añjibʰir vāgʰadbʰir vihvayāmaha iti.
   cʰandāṃsi vā añjayo vāgʰatas, tair etad devān yajamānā vihvayante:
   mama yajñam āgacʰata mama yajñam iti
Sentence: 18    yadi ha vā api bahava iva yajante,
   'tʰa hāsya devā yajñam aiva gacʰanti yatraivaṃ vidvān etām anvāho/rdʰvo
Sentence: 19    naḥ pāhy aṃhaso ni ketunā viśvaṃ sam atriṇaṃ daheti
Sentence: 20    rakṣāṃsi vai pāpmātriṇo, rakṣāṃsi pāpmānaṃ dahety eva tad āha
Sentence: 21    kr̥dʰī na ūrdʰvāñ caratʰāya jīvasa iti yad āha,
   kr̥dʰī na ūrdʰvāñ caraṇāya jīvasa ity eva tad āha
Sentence: 22    yadi ha vā api nīta iva yajamāno bʰavati,
   pari haivainaṃ tat saṃvatsarāya dadāti
Sentence: 23    vidā deveṣu no duva ity āśiṣam evāśāste
Sentence: 24    jāto jāyate sudinatve ahnām iti
Sentence: 25    jāto hy eṣa etāj jāyate
Sentence: 26    samarya ā vidatʰe vardʰamāna iti.
   vardʰayanty evainaṃ tat
Sentence: 27    punanti dʰīrā apaso manīṣeti.
   punanty evainaṃ tat
Sentence: 28    devayā vipra ad iyarti vācam iti.
   devebʰya evainaṃ tan nivedayati
Sentence: 29    yuvā suvāsāḥ parivīta āgād ity uttamayā paridadʰāti
Sentence: 30    prāṇo vai yuvā suvā-sāḥ, so 'yaṃ śarīraiḥ parivr̥taḥ
Sentence: 31    sa u śreyān bʰavati jāyamāna iti.
   śreyāñcʰreyān hy eṣa etad bʰavati jāyamānas
Sentence: 32    taṃ dʰīrāsaḥ kavaya un nayanti svādʰyo manasā devayanta iti.
   ye vā anūcānās te kavayas, ta evainaṃ tad unnayanti
Sentence: 33    tā etāḥ saptānvāha rūpasamr̥ddʰā.
   etad vai yajñasya samr̥ddʰaṃ yad rūpasaṃr̥ddʰaṃ,
   yat karma kriyamāṇam r̥g abʰivadati.
   tāsāṃ triḥ pratʰamām anvāha trir uttamāṃ, tā ekādaśa sampadyanta.
   ekādaśākṣarā vai triṣṭup, triṣṭub īndrasya vajra.
   indrāyatanābʰir evābʰī rādʰnoti ya evaṃ veda.
   triḥ pratʰamāṃ trir uttamām anvāha,
   yajñasyaiva tad barsau nahyati stʰemne balāyāvisraṃsāya



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.