TITUS
Rg-Veda: Rg-Veda-Samhita
Part No. 10
Previous part

Hymn: 10 
Verse: 1 
Halfverse: a    gā́yanti tvā gāyatríṇó 'rcanty arkám arkíṇaḥ /
   gā́yanti tvā gāyatríṇó
   gā́yanti tvā gāyatríṇaḥ
   gā́yanti tvā gāyatríṇo

Halfverse: b    'rcanty arkám arkíṇaḥ /
   árcanti arkám arkíṇaḥ /
   árcanti arkám arkíṇaḥ /

Halfverse: c    brahmā́ṇas tvā śatakrata úd vaṃśám iva yemire //
   brahmā́ṇas tvā śatakrata
   brahmā́ṇaḥ tvā śatakrato
   brahmā́ṇas tvā śatakrata

Halfverse: d    úd vaṃśám iva yemire //
   út vaṃśám iva yemire //
   úd vaṃśám iva yemire //


Verse: 2 
Halfverse: a    yát sā́noḥ sā́num ā́ruhad bʰū́ry áspaṣṭa kártvam /
   yát sā́noḥ sā́num ā́ruhad
   yát sā́noḥ sā́num ā́ áruhat
   yát sā́noḥ sā́num ā́ruhad

Halfverse: b    bʰū́ry áspaṣṭa kártvam /
   bʰū́ri áspaṣṭa kártvam /
   bʰū́ri áspaṣṭa kártuvam /

Halfverse: c    tád índro ártʰaṃ cetati yūtʰéna vr̥ṣṇír ejati //
   tád índro ártʰaṃ cetati
   tát índraḥ ártʰam cetati
   tád índro ártʰaṃ cetati

Halfverse: d    yūtʰéna vr̥ṣṇír ejati //
   yūtʰéna vr̥ṣṇíḥ ejati //
   yūtʰéna vr̥ṣṇír ejati //


Verse: 3 
Halfverse: a    yukṣvā́ hí keśínā hárī vŕ̥ṣaṇā kakṣyaprā́ /
   yukṣvā́ hí keśínā hárī
   yukṣvá+ hí keśínā hárī
   yukṣvā́ hí keśínā hárī

Halfverse: b    vŕ̥ṣaṇā kakṣyaprā́ /
   vŕ̥ṣaṇā kakṣyaprā́ /
   vŕ̥ṣaṇā kakṣiyaprâá /

Halfverse: c    átʰā na indra somapā girā́m úpaśrutiṃ cara //
   átʰā na indra somapā
   átʰa+ naḥ indra somapāḥ
   átʰā na indra somapā

Halfverse: d    girā́m úpaśrutiṃ cara //
   girā́m úpaśrutim cara //
   girā́m úpaśrutiṃ cara //


Verse: 4 
Halfverse: a    éhi stómām̐ abʰí svarābʰí gr̥ṇīhy ā́ ruva /
   éhi stómām̐ abʰí svara_
   ā́ ihi stómān abʰí svara
   éhi stómām̐ abʰí svara

Halfverse: b    _ābʰí gr̥ṇīhy ā́ ruva /
   abʰí gr̥ṇīhi ā́ ruva /
   abʰí gr̥ṇīhi ā́ ruva /

Halfverse: c    bráhma ca no vaso sácéndra yajñáṃ ca vardʰaya //
   bráhma ca no vaso sácā_
   bráhma ca naḥ vaso sácā
   bráhma ca no vaso sácā

Halfverse: d    _índra yajñáṃ ca vardʰaya //
   índra yajñám ca vardʰaya //
   índra yajñáṃ ca vardʰaya //


Verse: 5 
Halfverse: a    uktʰám índrāya śáṃsyaṃ várdʰanam puruniṣṣídʰe /
   uktʰám índrāya śáṃsyaṃ
   uktʰám índrāya śáṃsyam
   uktʰám índrāya śáṃsiyaṃ

Halfverse: b    várdʰanam puruniṣṣídʰe /
   várdʰanam puruniṣṣídʰe /
   várdʰanam puruniṣṣídʰe /

Halfverse: c    śakró yátʰā sutéṣu ṇo rāráṇat sakʰyéṣu ca //
   śakró yátʰā sutéṣu ṇo
   śakráḥ yátʰā sutéṣu naḥ
   śakró yátʰā sutéṣu ṇo

Halfverse: d    rāráṇat sakʰyéṣu ca //
   rāráṇat sakʰyéṣu ca //
   rāráṇat sakʰiyéṣu ca //


Verse: 6 
Halfverse: a    tám ít sakʰitvá īmahe táṃ rāyé táṃ suvī́rye /
   tám ít sakʰitvá īmahe
   tám ít sakʰitvé īmahe
   tám ít sakʰitvá īmahe

Halfverse: b    táṃ rāyé táṃ suvī́rye /
   tám rāyé tám suvī́rye /
   táṃ rāyé táṃ suvī́riye /

Halfverse: c    sá śakrá utá naḥ śakad índro vásu dáyamānaḥ //
   sá śakrá utá naḥ śakad
   sá śakráḥ utá naḥ śakat
   sá śakrá utá naḥ śakad

Halfverse: d    índro vásu dáyamānaḥ //
   índraḥ vásu dáyamānaḥ //
   índro vásu dáyamānaḥ //


Verse: 7 
Halfverse: a    suvivŕ̥taṃ sunirájam índra tvā́dātam íd yáśaḥ /
   suvivŕ̥taṃ sunirájam
   suvivŕ̥tam sunirájam
   suvivŕ̥taṃ sunirájam

Halfverse: b    índra tvā́dātam íd yáśaḥ /
   índra tvā́dātam ít yáśaḥ /
   índra tvā́dātam íd yáśaḥ /

Halfverse: c    gávām ápa vrajáṃ vr̥dʰi kr̥ṇuṣvá rā́dʰo adrivaḥ //
   gávām ápa vrajáṃ vr̥dʰi
   gávām ápa vrajám vr̥dʰi
   gávām ápa vrajáṃ vr̥dʰi

Halfverse: d    kr̥ṇuṣvá rā́dʰo adrivaḥ //
   kr̥ṇuṣvá rā́dʰaḥ adrivaḥ //
   kr̥ṇuṣvá rā́dʰo adrivaḥ //


Verse: 8 
Halfverse: a    nahí tvā ródasī ubʰé r̥gʰāyámāṇam ínvataḥ /
   nahí tvā ródasī ubʰé
   nahí tvā ródasī ubʰé
   nahí tvā ródasī ubʰé

Halfverse: b    r̥gʰāyámāṇam ínvataḥ /
   r̥gʰāyámāṇam ínvataḥ /
   r̥gʰāyámāṇam ínvataḥ /

Halfverse: c    jéṣaḥ svàrvatīr apáḥ sáṃ gā́ asmábʰyaṃ dʰūnuhi //
   jéṣaḥ svàrvatīr apáḥ
   jéṣaḥ svàrvatīḥ apáḥ
   jéṣaḥ súvarvatīr apáḥ

Halfverse: d    sáṃ gā́ asmábʰyaṃ dʰūnuhi //
   sám gā́ḥ asmábʰyam dʰūnuhi //
   sáṃ gā́ asmábʰya* dʰūnuhi //


Verse: 9 
Halfverse: a    ā́śrutkarṇa śrudʰī́ hávaṃ nū́ cid dadʰiṣva me gíraḥ /
   ā́śrutkarṇa śrudʰī́ hávaṃ
   ā́śrutkarṇa śrudʰí+ hávam
   ā́śrutkarṇa śrudʰī́ hávaṃ

Halfverse: b    nū́ cid dadʰiṣva me gíraḥ /
   nú+ cit dadʰiṣva me gíraḥ /
   nū́ cid dadʰiṣva me gíraḥ /

Halfverse: c    índra stómam imám máma kr̥ṣvā́ yujáś cid ántaram //
   índra stómam imám máma
   índra stómam imám máma
   índra stómam imám máma

Halfverse: d    kr̥ṣvā́ yujáś cid ántaram //
   kr̥ṣvá+ yujáḥ cit ántaram //
   kr̥ṣvā́ yujáś cid ántaram //


Verse: 10 
Halfverse: a    vidmā́ hí tvā vŕ̥ṣantamaṃ vā́jeṣu havanaśrútam /
   vidmā́ hí tvā vŕ̥ṣantamaṃ
   vidmá+ hí tvā vŕ̥ṣantamam
   vidmā́ hí tvā vŕ̥ṣantamaṃ

Halfverse: b    vā́jeṣu havanaśrútam /
   vā́jeṣu havanaśrútam /
   vā́jeṣu havanaśrútam /

Halfverse: c    vŕ̥ṣantamasya hūmaha ūtíṃ sahasrasā́tamām //
   vŕ̥ṣantamasya hūmaha
   vŕ̥ṣantamasya hūmahe
   vŕ̥ṣantamasya hūmaha

Halfverse: d    ūtíṃ sahasrasā́tamām //
   ūtím sahasrasā́tamām //
   ūtíṃ sahasrasā́tamām //


Verse: 11 
Halfverse: a    ā́ tū́ na indra kauśika mandasānáḥ sutám piba /
   ā́ tū́ na indra kauśika
   ā́ tú+ naḥ indra kauśika
   ā́ tū́ na indra kauśika

Halfverse: b    mandasānáḥ sutám piba /
   mandasānáḥ sutám piba /
   mandasānáḥ sutám piba /

Halfverse: c    návyam ā́yuḥ prá sū́ tira kr̥dʰī́ sahasrasā́m ŕ̥ṣim //
   návyam ā́yuḥ prá sū́ tira
   návyam ā́yuḥ prá sú+ tira
   návyam ā́yuḥ prá sū́ tira

Halfverse: d    kr̥dʰī́ sahasrasā́m ŕ̥ṣim //
   kr̥dʰí+ sahasrasā́m ŕ̥ṣim //
   kr̥dʰī́ sahasrasā́m ŕ̥ṣim //


Verse: 12 
Halfverse: a    pári tvā girvaṇo gíra imā́ bʰavantu viśvátaḥ /
   pári tvā girvaṇo gíra
   pári tvā girvaṇaḥ gíraḥ
   pári tvā girvaṇo gíra

Halfverse: b    imā́ bʰavantu viśvátaḥ /
   imā́ḥ bʰavantu viśvátaḥ /
   imā́ bʰavantu viśvátaḥ /

Halfverse: c    vr̥ddʰā́yum ánu vŕ̥ddʰayo júṣṭā bʰavantu júṣṭayaḥ //
   vr̥ddʰā́yum ánu vŕ̥ddʰayo
   vr̥ddʰā́yum ánu vŕ̥ddʰayaḥ
   vr̥ddʰā́yum ánu vŕ̥ddʰayo

Halfverse: d    júṣṭā bʰavantu júṣṭayaḥ //
   júṣṭāḥ bʰavantu júṣṭayaḥ //
   júṣṭā bʰavantu júṣṭayaḥ //


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.