TITUS
Rg-Veda: Rg-Veda-Samhita
Part No. 860
Previous part

Hymn: 23_(849) 
Verse: 1 
Halfverse: a    yájāmaha índraṃ vájradakṣiṇaṃ hárīṇāṃ ratʰyàṃ vívratānām /
   yájāmaha índraṃ vájradakṣiṇaṃ
   yájāmahe índram vájradakṣiṇam
   yájāmaha índaraṃ vájradakṣiṇaṃ

Halfverse: b    hárīṇāṃ ratʰyàṃ vívratānām /
   hárīṇām ratʰyàm vívratānām /
   hárīṇãaṃ ratʰíyaṃ vívratānãam /

Halfverse: c    prá śmáśru dódʰuvad ūrdʰvátʰā bʰūd ví sénābʰir dáyamāno ví rā́dʰasā //
   prá śmáśru dódʰuvad ūrdʰvátʰā bʰūd
   prá śmáśru dódʰuvat ūrdʰvátʰā bʰūt
   prá śmáśaru dódʰuvad ūrdʰvátʰā bʰũud

Halfverse: d    ví sénābʰir dáyamāno ví rā́dʰasā //
   ví sénābʰiḥ dáyamānaḥ ví rā́dʰasā //
   ví sénābʰir dáyamāno ví rā́dʰasā //


Verse: 2 
Halfverse: a    hárī nv àsya yā́ váne vidé vásv índro magʰaír magʰávā vr̥trahā́ bʰuvat /
   hárī nv àsya yā́ váne vidé vásv
   hárī nú asya yā́ váne vidé vásu
   hárī nú asya yā́ váne vidé vásu

Halfverse: b    índro magʰaír magʰávā vr̥trahā́ bʰuvat /
   índraḥ magʰaíḥ magʰávā vr̥trahā́ bʰuvat /
   índro magʰaír magʰávā vr̥trahā́ bʰuvat /

Halfverse: c    r̥bʰúr vā́ja r̥bʰukṣā́ḥ patyate śávó 'va kṣṇaumi dā́sasya nā́ma cit //
   r̥bʰúr vā́ja r̥bʰukṣā́ḥ patyate śávó
   r̥bʰúḥ vā́jaḥ r̥bʰukṣā́ḥ patyate śávaḥ
   r̥bʰúr vā́ja r̥bʰukṣā́ḥ patyate śávo

Halfverse: d    'va kṣṇaumi dā́sasya nā́ma cit //
   áva kṣṇaumi dā́sasya nā́ma cit //
   áva kṣṇaumi dâásasya nā́ma cit //


Verse: 3 
Halfverse: a    yadā́ vájraṃ híraṇyam íd átʰā rátʰaṃ hárī yám asya váhato ví sūríbʰiḥ /
   yadā́ vájraṃ híraṇyam íd átʰā rátʰaṃ
   yadā́ vájram híraṇyam ít átʰa+ rátʰam
   yadā́ vájraṃ híraṇyam íd átʰā rátʰaṃ

Halfverse: b    hárī yám asya váhato ví sūríbʰiḥ /
   hárī yám asya váhataḥ ví sūríbʰiḥ /
   hárī yám asya váhato ví sūríbʰiḥ /

Halfverse: c    ā́ tiṣṭʰati magʰávā sánaśruta índro vā́jasya dīrgʰáśravasas pátiḥ //
   ā́ tiṣṭʰati magʰávā sánaśruta
   ā́ tiṣṭʰati magʰávā sánaśrutaḥ
   ā́ tiṣṭʰati ? magʰávā sánaśruta

Halfverse: d    índro vā́jasya dīrgʰáśravasas pátiḥ //
   índraḥ vā́jasya dīrgʰáśravasaḥ pátiḥ //
   índro vā́jasya dīrgʰáśravasas pátiḥ //


Verse: 4 
Halfverse: a    só cin nú vr̥ṣṭír yūtʰyā̀ svā́ sácām̐ índraḥ śmáśrūṇi háritābʰí pruṣṇute /
   só cin nú vr̥ṣṭír yūtʰyā̀ svā́ sácām̐
   sá u cit nú vr̥ṣṭíḥ yūtʰyā̀ svā́ sácā
   só cin nú vr̥ṣṭír yūtʰíyā suvā́ sácām̐

Halfverse: b    índraḥ śmáśrūṇi háritābʰí pruṣṇute /
   índraḥ śmáśrūṇi háritā abʰí pruṣṇute /
   índraḥ śmáśrūṇi háritābʰí pruṣṇute /

Halfverse: c    áva veti sukṣáyaṃ suté mádʰū́d íd dʰūnoti vā́to yátʰā vánam //
   áva veti sukṣáyaṃ suté mádʰu_
   áva veti sukṣáyam suté mádʰu
   áva veti sukṣáyaṃ suté mádʰu

Halfverse: d    _úd íd dʰūnoti vā́to yátʰā vánam //
   út ít dʰūnoti vā́taḥ yátʰā vánam //
   úd íd dʰūnoti vâáto yátʰā vánam //


Verse: 5 
Halfverse: a    yó vācā́ vívāco mr̥dʰrávācaḥ purū́ sahásrā́śivā jagʰā́na /
   yó vācā́ vívāco mr̥dʰrávācaḥ
   yáḥ vācā́ vívācaḥ mr̥dʰrávācaḥ
   yó vācā́ vívāco mr̥dʰrávācaḥ

Halfverse: b    purū́ sahásrā́śivā jagʰā́na /
   purú+ sahásrā áśivā jagʰā́na /
   purū́ sahásrā́śivā jagʰā́na /

Halfverse: c    tát-tad íd asya paúṃsyaṃ gr̥ṇīmasi pitéva yás táviṣīṃ vāvr̥dʰé śávaḥ //
   tát-tad íd asya paúṃsyaṃ gr̥ṇīmasi
   tát-tat ít asya paúṃsyam gr̥ṇīmasi
   tát-tad íd asya paúṃsiyaṃ gr̥ṇīmasi

Halfverse: d    pitéva yás táviṣīṃ vāvr̥dʰé śávaḥ //
   pitā́ iva yáḥ táviṣīm vāvr̥dʰé śávaḥ //
   pitéva yás táviṣīṃ vāvr̥dʰé śávaḥ //


Verse: 6 
Halfverse: a    stómaṃ ta indra vimadā́ ajījanann ápūrvyam purutámaṃ sudā́nave /
   stómaṃ ta indra vimadā́ ajījanann
   stómam te indra vimadā́ḥ ajījanan
   stómaṃ ta indra vimadā́ ajījanann

Halfverse: b    ápūrvyam purutámaṃ sudā́nave /
   ápūrvyam purutámam sudā́nave /
   ápūrviyam purutámaṃ sudā́nave /

Halfverse: c    vidmā́ hy àsya bʰójanam inásya yád ā́ paśúṃ ná gopā́ḥ karāmahe //
   vidmā́ hy àsya bʰójanam inásya
   vidmá+ hí asya bʰójanam inásya
   vidmā́ hí asya bʰójanam inásya

Halfverse: d    yád ā́ paśúṃ ná gopā́ḥ karāmahe //
   yát ā́ paśúm ná gopā́ḥ karāmahe //
   yád ā́ paśúṃ ná gopâáḥ karāmahe //


Verse: 7 
Halfverse: a    mā́kir na enā́ sakʰyā́ ví yauṣus táva cendra vimadásya ca ŕ̥ṣeḥ /
   mā́kir na enā́ sakʰyā́ ví yauṣus
   mā́kiḥ naḥ enā́ sakʰyā́ ví yauṣuḥ
   mā́kir na enā́ sakʰiyā́ ví yauṣus

Halfverse: b    táva cendra vimadásya ca ŕ̥ṣeḥ /
   táva ca indra vimadásya ca ŕ̥ṣeḥ /
   táva ca indra vimadásya ca rṣeḥ /

Halfverse: c    vidmā́ hí te prámatiṃ deva jāmivád asmé te santu sakʰyā́ śivā́ni //
   vidmā́ hí te prámatiṃ deva jāmivád
   vidmá+ hí te prámatim deva jāmivát
   vidmā́ hí te prámatiṃ deva jāmivád

Halfverse: d    asmé te santu sakʰyā́ śivā́ni //
   asmé te santu sakʰyā́ śivā́ni //
   asmé te santu sakʰiyā́ śivā́ni //



Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.