TITUS
Sama-Veda: Gobhila-Grhyasutra
Part No. 31
Previous part

Paragraph: 2 
Verse: 1    - śvas tato 'nvaṣṭakyam,
Verse: 2    aparaśvo vā.
Verse: 3    dakṣiṇapūrve 'ṣṭamadeśe parivārayanti,
Verse: 4    tatʰāyatam,
Verse: 5    tatʰāmukʰaiḥ kr̥tyam,
Verse: 6    caturavarārdʰyān prakramān.
Verse: 7    paścād upasaṃcāraḥ.
Verse: 8    uttarārdʰe parivr̥tasya lakṣaṇaṃ kr̥tvā 'gniṃ praṇayanti.
Verse: 9    paścād agner ulūkʰalaṃ dr̥m̐hayitvā sakr̥tsaṃgr̥hītaṃ vrīhimuṣṭim avahanti savyottarābʰyāṃ pāṇibʰyām.
Verse: 10    yadā vituṣāḥ syuḥ,
Verse: 11    sakr̥d eva supʰalīkr̥tān kurvīta.
Verse: 12    atʰā 'muṣmāc ca saktʰno mām̐sapeśīm avakr̥tya navāyāṃ sūnāyām aṇuśaś cʰedayet,
Verse: 13    yatʰā mām̐sābʰigʰārāḥ piṇḍā bʰaviṣyantī 'ti.
Verse: 14    tasminn evā 'gnau śrapayaty odanacaruṃ ca mām̐sacaruṃ ca pr̥tʰaṅ, mekṣaṇābʰyāṃ prasavyam udāyuvan;
Verse: 15    śr̥tāv abʰigʰārya, dakṣiṇo 'dvāsya na pratyabʰigʰārayet.
Verse: 16    - dakṣiṇārdʰe parivr̥tasya tisraḥ karṣūḥ kʰanayet pūrvopakramāḥ,
Verse: 17    prādeśāyāmāś, caturaṅgulapr̥tʰvīs, tatʰāvakʰātāḥ.
Verse: 18    pūrvasyāḥ karṣvāḥ purastāl lakṣaṇaṃ kr̥tvā 'gniṃ praṇayanti;
Verse: 19    apareṇa karṣūḥ paryāhr̥tya lakṣaṇe nidadʰyāt.
Verse: 20    sakr̥dāccʰinnaṃ darbʰamuṣṭiṃ str̥ṇoti,
Verse: 21    karṣūś ca
Verse: 22    pūrvopakramāḥ.
Verse: 23    paścāt karṣūṇāṃ svastaram āstārayet,
Verse: 24    dakṣiṇāgraiḥ kuśaiḥ,
Verse: 25    dakṣiṇāpravaṇam,
Verse: 26    vr̥ṣīṃ co 'padadʰyāt;
Verse: 27    tatrā 'smā āharanty ekaikaśaḥ savyaṃ bāhum anu:
Verse: 28    carustʰālyau mekṣaṇe kam̐saṃ darvīm udakam iti,
Verse: 29    - patnī barhiṣi śilāṃ nidʰāya stʰagaraṃ pinaṣṭi,
Verse: 30    tasyāṃ cai 'vā 'ñjanaṃ nigʰr̥ṣya tisro darbʰapiñjūlīr añjati savyantarāḥ,
Verse: 31    - tailaṃ co 'pakalpayet
Verse: 32    kṣaumadaśāṃ ca.
Verse: 33    śucau deśe brāhmaṇān anindyān ayugmān udaṅmukʰān upaveśya,
Verse: 34    darbʰān pradāya,
Verse: 35    udakapūrvaṃ tilodakaṃ dadāti pitur nāma gr̥hītvā: 'sāv etat te tilodakaṃ,, ye cā 'tra tvā 'nu yām̐ś ca tvam anu, tasmai te svadʰe 'ti;
Verse: 36    apa upaspr̥śyai 'vam eve 'tarayoḥ.
Verse: 37    tatʰā gandʰān.-
Verse: 38    agnau kariṣyāmī 'ty āmantraṇaṃ hoṣyataḥ;
Verse: 39    kurv ity ukte, kam̐se carū samavadāya mekṣaṇeno 'pagʰātaṃ juhuyāt svāhā somāya pitr̥mata iti pūrvāṃ, svāhā 'gnaye kavyavāhanāya ity uttarām.-

Next part


This text is part of the TITUS edition of Sama-Veda: Gobhila-Grhyasutra.

Copyright TITUS Project, Frankfurt a/M, 8.12.2008. No parts of this document may be republished in any form without prior permission by the copyright holder.