TITUS
Black Yajur-Veda: Maitrayani-Samhita
Part No. 17
Previous part

Prapathaka: 6  
Anuvaka: 1  
Page: 64  
Line : 1  Pada: a     ánumatyā aṣṭā́kapālaṃ nírvapanti

Pada: b     yé pratyáñcaḥ śámyām atiśī́yante tán nairr̥tám ékakapālam

Line : 2  Pada: c     ubʰaú sahá śr̥taú kurvanti

Pada: d     nairr̥téna pū́rveṇa prácaranti

Line : 3  Pada: e     dakṣiṇā́ parétya svákr̥tā íriṇa ekolmukáṃ nidʰā́ya visrám̐sikāyāḥ kā́ṇḍābʰyāṃ juhoti //

Line : 4  Pada: f     juṣāṇā́ nírr̥tir vetu svā́hā //

Pada: g     vā́saḥ kr̥ṣṇáṃ bʰinnā́ntaṃ dákṣiṇā

Line : 5  Pada: h     púnar étyā́numatyā aṣṭā́kapālena prácaranti

Pada: i     dʰenúr dákṣiṇā \

Line : 6  Pada: j     átʰa yá údañcaḥ śámyām atiśī́yante tā́n údaṅ parétya valmīkavapā́m udrújya juhuyāt //

Line : 7  Pada: k     idám ahám amúṣyāmuṣyāyaṇásya kṣetriyám ávayaje //

Pada: l     tát púnar ápidadʰāti //

Line : 8  Pada: m     idám ahám amúṣyāmuṣyāyaṇásya kṣetriyám ápidadʰāmi //

Pada: n     śvó bʰūtá ādityébʰyo bʰúvadvadbʰyo gʰr̥té carús \

Line : 9  Pada: o     váro dákṣiṇā

Pada: p     śvó bʰūtá āgnāvaiṣṇavá ékādaśakapālas \

Line : 10  Pada: q     anaḍvā́n vāmanó dákṣiṇā

Pada: r     śvó bʰūtè 'gnīṣomī́yā ékādaśakapālas \

Line : 11  Pada: s     híraṇyaṃ dákṣiṇā

Pada: t     śvó bʰūtá aindrāgná ékādaśakapālas \

Line : 12  Pada: u     anaḍvā́n r̥ṣabʰó dákṣiṇā

Pada: v     śvó bʰūtá āgneyò 'ṣṭā́kapālas \

Pada: w     māhendráṃ dádʰi

Line : 13  Pada: x     vā́saḥ kṣaúmaṃ dákṣiṇā //


Anuvaka: 2  
Line : 14  Pada: a     aindrāgnám ékādaśakapālaṃ nírvaped āgnendrám̐ vā

Pada: b     vaiśvadeváś carúḥ

Pada: c     saumyáḥ śyāmākáś carús \

Line : 15  Pada: d     dyāvāpr̥tʰivī́yā ékakapālas \

Pada: e     vatsáḥ pratʰamajó dákṣiṇā

Line : 16  Pada: f     sī́raṃ dvādaśāyogáṃ dákṣiṇoṣṭā́ro vānaḍvā́n //


Anuvaka: 3  
Line : 17  Pada: a     āgneyò 'ṣṭā́kapālas \

Pada: b     vāruṇó yavamáyaś carús \

Pada: c     raudró gāvīdʰukáś carús \

Line : 18  Pada: d     aindráṃ dádʰi

Pada: e     dʰenúr anaḍvāhī́ dákṣiṇā \

Pada: f     apā́ṃ nyáyanād apāmārgā́n ā́haranti

Pada: g     tā́nt sáktūn kr̥tvā́ dakṣiṇā́ parétya svákr̥tā íriṇa ekolmukáṃ nidʰā́ya parṇamáyena sruvéṇa juhoti //

Page: 65  
Line : 2  Pada: h     devásya tvā savitúḥ prasavè 'śvínor bāhúbʰyāṃ pūṣṇó hástābʰyām índrasyaújasā rakṣohā́si svā́hā

Line : 3  Pada: i     hatám̐ rákṣas \

Pada: j     ávadʰiṣma rákṣaḥ //

Line : 4  Pada: k     váro dákṣiṇā //

Pada: l     yé devā́ḥ puraḥsádo agnínetrā rakṣoháṇas té no 'vantu

Line : 5  Pada: m     té naḥ pāntu

Pada: n     tébʰyaḥ svā́hā

Pada: o     yé devā́ dakṣiṇātsádo yamánetrā rakṣoháṇas té no 'vantu

Line : 6  Pada: p     té naḥ pāntu

Pada: q     tébʰyaḥ svā́hā

Pada: r     yé devā́ḥ paścātsádo marúnnetrā rakṣoháṇas té no 'vantu

Line : 7  Pada: s     té naḥ pāntu

Pada: t     tébʰyaḥ svā́hā

Line : 8  Pada: u     yé devā́ uttarātsádo mitrāváruṇanetrā rakṣoháṇas té no 'vantu

Pada: v     té naḥ pāntu

Line : 9  Pada: w     tébʰyaḥ svā́hā

Pada: x     yé devā́ upariṣádó 'vasvadvantaḥ sómanetrā rakṣoháṇas té no 'vantu

Line : 10  Pada: y     té naḥ pāntu

Pada: z     tébʰyaḥ svā́hā \

Pada: aa     idám ahám̐ rákṣo 'bʰisámūhāmi \

Line : 11  Pada: ab     ágne sáṃdaha rákṣaḥ

Pada: ac     sáṃdagdʰam̐ rákṣas \

Pada: ad     agnáye puraḥsáde svā́hā

Pada: ae     yamā́ya dakṣiṇātsáde svā́hā

Line : 12  Pada: af     marúdbʰyaḥ paścātsádbʰyaḥ svā́hā

Pada: ag     mitrā́váruṇābʰyām uttarātsádbʰyām̐ svā́hā

Line : 13  Pada: ah     sómāyopariṣádé 'vasvadvate rakṣogʰné svā́hā

Pada: ai     rátʰaḥ pañcavāhī́ dákṣiṇā //


Anuvaka: 4  
Line : 15  Pada: a     ánumatyai carús \

Pada: b     rākā́yai carúḥ

Pada: c     sinīvālyaì carúḥ

Pada: d     kuhvaì carús \

Pada: e     dʰātré dvā́daśakapālaḥ

Line : 16  Pada: f     paṣṭʰauhī́ dákṣiṇā \

Pada: g     āgnāvaiṣṇavá ékādaśakapālas \

Pada: h     aindrāvaiṣṇāváś carus \

Line : 17  Pada: i     vaiṣṇavás tríkapālas \

Pada: j     vāmanó dákṣiṇā

Pada: k     saumāpauṣṇá ékādaśakapālas \

Page: 66  
Line : 1  Pada: l     aindrāpauṣṇáś carúḥ

Pada: m     pauṣṇáś carúḥ

Pada: n     śyāmó dákṣiṇā \

Pada: o     agnáye vaiśvānarā́ya dvā́daśakapālas \

Line : 2  Pada: p     vāruṇó yavamáyaś carús \

Pada: q     híraṇyaṃ cā́śvaś ca dákṣiṇā //


Anuvaka: 5  
Line : 3  Pada: a     bārhaspatyáś carúr brahmáṇo gr̥hé

Pada: b     śitipr̥ṣṭʰó dákṣiṇā \

Pada: c     aindrá ékādaśakapālo rā́jño gr̥hé \

Line : 4  Pada: d     r̥ṣabʰó dákṣiṇā \

Pada: e     ādityáś carúr máhiṣyā gr̥hé

Pada: f     dʰenúr dákṣiṇā

Pada: g     nairr̥táś carúr nakʰā́vapūtānāṃ parivr̥ktyā́ gr̥hé

Line : 5  Pada: h     śyénī vaṇḍā́paspʰurā́ dákṣiṇā \

Pada: i     āgneyò 'ṣṭā́kapālaḥ senānyò gr̥hé

Line : 6  Pada: j     híraṇyaṃ dákṣiṇā \

Pada: k     āśvinó dvíkapālaḥ saṃgrahītúr gr̥hé

Line : 7  Pada: l     savatyaù dákṣiṇā

Pada: m     sāvitrò 'ṣṭā́kapālaḥ kṣattúr gr̥hé

Line : 8  Pada: n     śyetó dákṣiṇā

Pada: o     vāruṇó yavamáyo dáśakapālaḥ sūtásya gr̥hé

Pada: p     babʰrúr mahāniraṣṭó dákṣiṇā

Line : 9  Pada: q     mārutáḥ saptákapālo vaíśyasya grāmaṇyò gr̥hé

Pada: r     pŕ̥śniḥ paṣṭʰauhī́ dákṣiṇā

Line : 10  Pada: s     pauṣṇáś cárur bʰāgadugʰásya gr̥hé

Pada: t     śyāmó dákṣiṇā

Pada: u     vaiṣṇavás tríkapālas takṣaratʰakāráyor gr̥hé

Line : 11  Pada: v     sárvāyasā́ni dákṣiṇā

Pada: w     raudró gāvīdʰukáś carúr akṣāvāpásya gr̥hé govikartásya ca \

Line : 12  Pada: x     asír vālāpitastʰó dákṣiṇā śabálo vā trivatsò 'bʰidʰā́nī vā késarapāśā //


Anuvaka: 6  
Line : 14  Pada: a     índrāyām̐homúcā ékādaśakapālaṃ nírvapet \

Pada: b     índrāya sutrā́mṇā ékādaśakapālam

Line : 15  Pada: c     r̥ṣabʰó dákṣiṇā

Pada: d     svayam̐rugṇā́yā aśvattʰaśākʰā́yāḥ pā́traṃ bʰavati \

Page: 67  
Line : 1  Pada: e     átʰa śvetā́m̐ śvetávatsāṃ duhanti

Pada: f     tát svayáṃ mūrcʰati

Pada: g     svayáṃ matʰyate

Line : 2  Pada: h     svayam̐vilīnám ā́jyaṃ bʰavati \

Pada: i     átʰa maitrābārhaspatyám̐ havír nírvapanti

Pada: j     yé kṣódiṣṭʰās taṇḍulā́s táṃ bārhaspatyáṃ carúm̐ śr̥táṃ kurvanti

Line : 3  Pada: k     tátra tát pā́tram apidʰā́yā́jyam āsícya yé stʰáviṣṭʰās taṇḍulā́s tā́n ā́vapanti \

Line : 4  Pada: l     ubʰaú sahá śr̥taú kurvanti

Line : 5  Pada: m     maitréṇa pū́rveṇa prácaranti \

Pada: n     áśvo maitrásya dákṣiṇā

Pada: o     śitipr̥ṣṭʰó bārhaspatyásya \

Pada: p     agnáye gr̥hápataya āpatantā́nām aṣṭā́kapālaṃ nírvapet

Line : 6  Pada: q     sómāya vánaspátaye śyāmākáṃ carúm \

Line : 7  Pada: r     savitré prasavitré satīnā́nām aṣṭā́kapālam \

Pada: s     bŕ̥haspátaye vācáspátaye naivāráṃ carúm

Line : 8  Pada: t     índrāya jyeṣṭʰā́ya hāyanā́nām ékādaśakapālam \

Line : 9  Pada: u     mitrā́ya satyásya pátaye nāmbā́nāṃ carúm \

Pada: v     váruṇāya dʰármasya pátaye yavamáyaṃ carúm \

Line : 10  Pada: w     rudrā́ya paśupátaye gāvīdʰukáṃ carúm //

Pada: x     savitā́ tvā prasavā́nām̐ suvatām

Line : 11  Pada: y     agnír gā́rhapatyānām \

Pada: z     sómo vánaspátīnām \

Pada: aa     bŕ̥haspátir vācā́m

Pada: ab     índro jyaíṣṭʰyānām \

Line : 12  Pada: ac     mitráḥ satyā́nām \

Pada: ad     váruṇo dʰármaṇām \

Pada: ae     rudráḥ paśūnā́m \

Pada: af     té devā asapatnám imám̐ suvadʰvam amúm āmuṣyāyaṇam amúṣyāḥ putrám amúṣyām̐ viśí mahaté kṣatrā́ya mahaté jā́narājyāya

Line : 14  Pada: ag     śukrájyotiś ca citrájyotiś ca

Pada: ah     satyájyotiś ca jyótiṣmām̐ś ca

Line : 15  Pada: ai     satyáś ca r̥tapā́ś cā́tyam̐hās \

Pada: aj     r̥tajíc ca styajíc ca

Line : 16  Pada: ak     senajíc ca suṣéṇaś ca \

Pada: al     ántimitraś ca dūré'mitraś ca gaṇás \

Pada: am     r̥táś ca satyáś ca

Pada: an     dʰruváś ca dʰarúṇaś ca

Line : 17  Pada: ao     dʰartā́ ca vidʰartā́ ca vidʰārayáḥ //


Anuvaka: 7  
Line : 18  Pada: a     dévīr āpo apāṃ napāt \

Pada: b     rāṣṭradā́ḥ stʰa

Pada: c     rāṣṭráṃ datta svā́hā

Pada: d     dévīr āpo apāṃ napāt \

Page: 68  
Line : 1  Pada: e     rāṣṭradā́ḥ stʰa

Pada: f     rāṣṭrám amúṣmai datta

Pada: g     vŕ̥ṣormír asi

Pada: h     vr̥ṣasenò 'si \

Pada: i     apā́ṃ pátir asi \

Line : 2  Pada: j     áprahāvarīḥ stʰa

Pada: k     parivāhíṇīḥ stʰa \

Pada: l     ojasvínīḥ stʰa

Pada: m     mā́ndāḥ stʰa

Line : 3  Pada: n     vrajakṣítaḥ stʰa

Pada: o     sū́ryavarcasaḥ stʰa

Pada: p     sū́ryatvacasaḥ stʰa

Pada: q     marútām ójaḥ stʰa

Pada: r     vaśā́ḥ stʰa

Line : 4  Pada: s     śákvarīḥ stʰa

Pada: t     viśvabʰŕ̥taḥ stʰa janabʰŕ̥tas \

Pada: u     apā́m óṣadʰīnām̐ rásaḥ

Pada: v     śráviṣṭʰāḥ stʰa

Line : 5  Pada: w     rāṣṭradā́ḥ stʰa

Pada: x     rāṣṭrám amúṣmai datta //


Anuvaka: 8  
Line : 6  Pada: a     dévīr āpo mádʰumatīḥ sám̐sr̥jyadʰvaṃ máhi kṣatráṃ kṣatríyāya vanvānā́ḥ /

Line : 8  Pada: b     ánādʰr̥ṣṭāḥ sīdatórjasvatīr máhi várcaḥ kṣatríyāya dádʰatīḥ //

Line : 9  Pada: c     apó devī́r mádʰumatīr agr̥bʰṇām ū́rjasvatī rājasū́yāś cítānāḥ /

Line : 10  Pada: d     yā́bʰir mitrā́váruṇā abʰyáṣiñcam̐s tā́bʰir índram anayann áty árātīḥ /

Line : 11  Pada: e     ánibʰr̥ṣṭam asi vācó bándʰus tapojā́ḥ

Pada: f     sómasya dātrám //

Line : 12  Pada: g     śukrā́ vaḥ śukréṇa punāmi

Pada: h     candrā́ vaś candréṇa punāmi //

Line : 13  Pada: i     devó vaḥ savitā́ punātv ácʰidreṇa pavítreṇa / vásoḥ sū́ryasya raśmíbʰiḥ //

Line : 15  Pada: j     svā́hā rājasū́yāḥ //

Line : 16  Pada: k     sadʰamā́do dyumnyā̀ ū́rjā ékā ánādʰr̥ṣṭā apasyò vásānāḥ /

Line : 18  Pada: l     pastyā̀su cakre váruṇaḥ sadʰástʰam apām̐ śiśur mātŕ̥tamāsv antáḥ //

Page: 69  
Line : 1  Pada: m     rúdra yát te giripáraṃ nā́ma tásmin hutám asi

Pada: n     yaméṣṭam asi svā́hā

Pada: o     sómā índro váruṇo mitró agnís té devā́ dʰarmadʰŕ̥to dʰármaṃ dʰārayantu //


Anuvaka: 9  
Line : 3  Pada: a     kṣatrásya yónir asi

Pada: b     kṣatrásyólbam asi

Pada: c     kṣatrásya nā́bʰir asi \

Pada: d     ā́vitto agnír gr̥hápatir

Line : 4  Pada: e     ā́vittā índro vr̥ddʰáśravāḥ \

Pada: f     ā́vittau mitrā́váruṇau dʰr̥távratau \

Line : 5  Pada: g     ā́vitte dyā́vāpr̥tʰivī́ r̥tāvr̥dʰau \

Pada: h     ā́vittaḥ pūṣā́ viśvávedās \

Pada: i     ā́vittā devy áditis \

Line : 6  Pada: j     ā́vitto 'yám asā́ āmuṣyāyaṇò 'múṣyāḥ putrò 'múṣyām̐ viśí mahaté kṣatrā́ya mahaté jā́narājyāya \

Line : 7  Pada: k     eṣá te janate rā́jā

Line : 8  Pada: l     sómo 'smā́kaṃ brāhmaṇā́nām̐ rā́jā \

Pada: m     índrasya vájro 'si vā́rtragʰnas

Pada: n     tváyāyám̐ vr̥trám̐ vadʰyāt \

Line : 9  Pada: o     śatrubā́dʰanāḥ stʰa

Pada: p     pātá prā́ñcam \

Pada: q     pātá pratyáñcam \

Pada: r     pātá tiryáñcam \

Line : 10  Pada: s     pātā́nváñcam \

Pada: t     pātórdʰvam \

Pada: u     digbʰyá enaṃ pāta

Pada: v     mitrò 'si

Pada: w     váruṇo 'si //

Line : 11  Pada: x     híraṇyavarṇam uṣáso vyùṣṭā áyaḥstʰūṇam úditau sū́ryasya /

Line : 12  Pada: y     ā́rohatʰo varuṇa mitra gártaṃ tátaś cakrātʰe áditiṃ dítiṃ ca //


Anuvaka: 10  
Line : 13  Pada: a     samídʰam ā́tiṣṭʰa

Pada: b     gāyatrī́ tvā cʰándasām avatu

Pada: c     trivŕ̥t stómas \

Pada: d     ratʰantarám̐ sā́ma \

Line : 14  Pada: e     agnír devátā

Pada: f     bráhma dráviṇam

Pada: g     ugrā́m ā́tiṣṭʰa

Pada: h     triṣṭúp tvā cʰándasām avatu

Pada: i     pañcadaśáḥ stómaḥ \

Line : 15  Pada: j     br̥hát sā́ma \

Pada: k     índro devátā

Pada: l     kṣatráṃ dráviṇam \

Pada: m     prā́cīm ā́tiṣṭʰa

Pada: n     jágatī tvā cʰándasām avatu

Line : 16  Pada: o     saptadaśáḥ stómas \

Pada: p     vairūpám̐ sā́ma

Pada: q     víśve devā́ devátā

Line : 17  Pada: r     víḍ dráviṇam

Pada: s     údīcīm ā́tiṣṭʰa \

Pada: t     anuṣṭúp tvā cʰándasām avatu \

Pada: u     ekavim̐śáḥ stómaḥ \

Pada: v     vairājám̐ sā́ma

Page: 70  
Line : 1  Pada: w     mitrā́váruṇau devátā

Pada: x     puṣṭáṃ dráviṇam

Pada: y     ūrdʰvā́m ā́tiṣṭʰa

Pada: z     paṅktis tvā cʰándasām avatu

Line : 2  Pada: aa     triṇavatrayastrim̐śaú stómau

Pada: ab     śākvararaivaté sā́manī

Line : 3  Pada: ac     bŕ̥haspátir devátā

Pada: ad     pʰálaṃ dráviṇam \

Pada: ae     sómasya tvíṣir asi tvíṣimat

Pada: af     táveva me tvíṣir bʰūyāt //

Line : 5  Pada: ag     prátyastaṃ námuceḥ śíras \

Pada: ah     áveṣṭā dandaśū́kāḥ /

Line : 6  Pada: ai     mr̥tyóḥ pāhi

Pada: aj     didiváḥ pāhi //


Anuvaka: 11  
Line : 7  Pada: a     agnáye svā́hā

Pada: b     sómāya svā́hā

Pada: c     savitré svā́hā

Pada: d     sárasvatyai svā́hā

Line : 8  Pada: e     pūṣṇé svā́hā

Pada: f     bŕ̥haspátaye svā́hā \

Pada: g     índrāya svā́hā

Pada: h     gʰóṣāya svā́hā

Pada: i     ślókāya svā́hā \

Line : 9  Pada: j     ám̐śāya svā́hā

Pada: k     bʰágāya svā́hā

Pada: l     kṣétrasya pátaye svā́hā

Pada: m     sómasya tvā dyumnénāgnés téjaséndrasyendriyéṇa víśveṣāṃ tvā devā́nāṃ krátunābʰíṣiñcāmi \

Line : 11  Pada: n     índrasya yónir asi

Pada: o     janáya \

Pada: p     áti dyū́n pāhi //

Line : 12  Pada: q     samā́vavr̥trann adʰarā́g údak tā́ áhiṃ budʰnyàm ánvī́yamānāḥ /

Line : 13  Pada: r     tā́ḥ párvatasya vr̥ṣabʰásya pr̥ṣṭʰā́n nā́vo víyanti susíco ná vā́ṇīḥ //

Line : 14  Pada: s     índrasya vájro 'si vājasánis

Pada: t     tváyāyám̐ vā́jam̐ set \

Pada: u     mítrā́váruṇayos tvā praśāstróḥ praśíṣā yunajmi

Line : 15  Pada: v     víṣṇoḥ krámo 'si sapatnahā́

Pada: w     marútāṃ prasavé jaya \

Page: 71  
Line : 1  Pada: x     āptáṃ mánaḥ

Pada: y     sám indriyéṇa \

Pada: z     eṣá vájro vājasā́tamas téna nau putró vā́jam̐ set //


Anuvaka: 12  
Line : 3  Pada: a     íyad asi \

Pada: b     ā́yur asi \

Pada: c     ā́yur me dʰehi

Pada: d     yúṅṅ asi

Pada: e     várco 'si

Pada: f     várco me dʰehi \

Pada: g     ū́rg asi \

Pada: h     ū́rjaṃ máyi dʰehi

Line : 4  Pada: i     mitrò 'si

Pada: j     váruṇo 'si

Pada: k     sád asi

Pada: l     sám ahám̐ víśvair devaís \

Pada: m     námo mātré pr̥tʰivyaí

Line : 5  Pada: n     mā́ mā́ṃ mātā́ pr̥tʰivī́ him̐sīt //

Line : 6  Pada: o     práti tyán nā́ma rājyám adʰāyi svā́ṃ tanvàm̐ váruṇo 'suṣot /

Line : 7  Pada: p     śúcer mitrásya vrátyā abʰūmā́manmahi mahád r̥tásya nā́ma //

Line : 8  Pada: q     sárve vrā́tā váruṇasyābʰūma ní mitrayúr aratī́n atārīt /

Line : 9  Pada: r     áśūśubʰanta yajñíyā r̥téna ní tritó jarimā́ṇaṃ na ānaṭ //

Line : 10  Pada: s     syonā́si suṣádā

Pada: t     syonā́m ā́sīda

Pada: u     suṣádām ā́sīda //

Line : 11  Pada: v     níṣasāda dʰr̥távrato váruṇaḥ pastyā̀sv ā́ /

Line : 12  Pada: w     sā́mrājyāya sukrátuḥ //

Line : 13  Pada: x     agnáye svā́hā

Pada: y     sómāya svā́hā \

Pada: z     índrasyaújase svā́hā

Pada: aa     marútāṃ bálāya svā́hā //

Line : 14  Pada: ab     ham̐sáḥ śuciṣád vásur antarikṣasád dʰótā vediṣád átitʰir duroṇasát /

Line : 15  Pada: ac     nr̥ṣád varasád r̥tasád vyomasád abjā́ gojā́ r̥tajā́ adrijā́ r̥tám //

Line : 16  Pada: ad     bráhmā́3m̐s tváṃ brahmā́si

Pada: ae     savitā́si satyásavas \

Pada: af     bráhmā́3m̐s tváṃ brahmā́si

Pada: ag     mitrò 'si suśévas \

Page: 72  
Line : 1  Pada: ah     brahmā́si \

Pada: ai     índro 'si satyaújās \

Pada: aj     bráhmā́3m̐s tváṃ brahmā́si

Pada: ak     váruṇo 'si viśvaújāḥ //

Line : 3  Pada: al     eṣá vajrás téna me radʰya

Pada: am     díśo abʰyàbʰūd ayám //

Line : 4  Pada: an     prájāpate ná tvad etā́ny anyó víśvā jātā́ni pári tā́ babʰūva /

Line : 5  Pada: ao     yásmai káṃ juhumás tán no astu //

Line : 6  Pada: ap     asā́ amúṣya putrò 'múṣyāsaú putráḥ //

Line : 7  Pada: aq     vayám̐ syāma pátayo rayīṇā́m //


Anuvaka: 13  
Line : 8  Pada: a     apā́ṃ náptre svā́hā \

Pada: b     ūrjó náptre svā́hā \

Pada: c     agnáye gr̥hápataye svā́hā //

Pada: d     sāvitrò 'ṣṭā́kapālaḥ

Line : 9  Pada: e     śyéto dákṣiṇā

Pada: f     sārasvatáś carús \

Pada: g     dʰenúr dákṣiṇā

Pada: h     pauṣṇáś carúḥ

Line : 10  Pada: i     śyāmó dákṣiṇā

Pada: j     bārhaspatyáś carúḥ

Pada: k     śitipr̥ṣṭʰó dákṣiṇā \

Pada: l     aindrá ékādaśakapālas \

Line : 11  Pada: m     r̥ṣabʰó dákṣiṇā

Pada: n     vāruṇó yavamáyo dáśakapālas \

Pada: o     babʰrúr mahāniraṣṭó dákṣiṇā

Line : 12  Pada: p     tvāṣṭrò 'ṣṭā́kapālas \

Pada: q     ám̐sepāñ śuṇṭʰò 'dʰirūḍʰākárṇo vā dákṣiṇā \

Line : 13  Pada: r     āgneyò 'ṣṭā́kapālas \

Pada: s     híraṇyam aṣṭā́pr̥ḍaṃ dákṣiṇā

Pada: t     saumyáś carús \

Pada: u     babʰrúr dákṣiṇā

Line : 14  Pada: v     vaiṣṇavás tríkapālas \

Pada: w     vāmanó dákṣiṇā \

Pada: x     āgneyò 'ṣṭā́kapālas \

Pada: y     híraṇyaṃ dákṣiṇā

Line : 15  Pada: z     bārhaspatyáś carúḥ

Pada: aa     śitipr̥ṣṭʰó dákṣiṇā \

Pada: ab     aindrá ékādaśakapālas \

Line : 16  Pada: ac     r̥ṣabʰó dákṣiṇā

Pada: ad     vaiśvadeváś carúḥ

Pada: ae     piśáṅgo dákṣiṇā

Pada: af     maitrāvaruṇy ā̀míkṣā

Line : 17  Pada: ag     vaśā́ dákṣiṇā \

Pada: ah     āgneyò 'ṣṭā́kapālaḥ

Pada: ai     saumyáś carúḥ

Pada: aj     sāvitró dvā́daśakapālas \

Page: 73  
Line : 1  Pada: ak     bārhaspatyáś carús \

Pada: al     agnáye vaiśvānarā́ya dvā́daśakapālas

Pada: am     tvāṣṭrò 'ṣṭā́kapālas \

Pada: an     dákṣiṇo ratʰavāhanavāhó dákṣiṇā

Line : 2  Pada: ao     sārasvatás carúḥ

Pada: ap     pauṣṇáś carús \

Pada: aq     maitráś carus \

Pada: ar     vāruṇáś carús \

Line : 3  Pada: as     ádityai carúḥ

Pada: at     kṣétrasya pátaye carúḥ

Pada: au     savyó ratʰavāhanavāhó dákṣiṇā

Line : 4  Pada: av     mārutī́ pŕ̥śniḥ paṣṭʰauhī́ garbʰíṇī \

Pada: aw     ādityā́jā́ malihā́ * garbʰíṇī savitré prasavitré
      FN emended. Ed.: malhā́. cf. MS.4.4.9:60.20.

Line : 5  Pada: ax     satīnā́nām aṣṭā́kapālo 'śvíbʰyām \

Pada: ay     pūṣṇá ékādaśakapālaḥ

Line : 6  Pada: az     sárasvatyai satyavā́ce carúr

Pada: ba     daṇḍá upānáhau śuṣkadr̥tíḥ sā́ dákṣiṇā //


Next part


This text is part of the TITUS edition of Black Yajur-Veda: Maitrayani-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.