TITUS
Black Yajur-Veda: Maitrayani-Samhita
Part No. 21
Previous part

Prapathaka: 10  
Anuvaka: 1  
Page: 131  
Line : 1  Pada: a     áśmann ū́rjaṃ párvate śiśriyāṇā́m adbʰyá óṣadʰībʰyo vánaspátibʰyó 'dʰi sáṃbʰr̥tām /

Line : 3  Pada: b     tā́ṃ nā íṣam ū́rjaṃ dʰatta marutaḥ sam̐rarāṇā́s \

Pada: c     áśmam̐s te kṣút \

Pada: d     máyi tā ū́rk \

Line : 4  Pada: e     yáṃ dviṣmás táṃ te śúg r̥cʰatu //

Line : 5  Pada: f     samudrásya tvā́vakāyā́gne párivyayāmasi /

Line : 6  Pada: g     pāvakó asmábʰyam̐ śivó bʰava //

Line : 7  Pada: h     himásya tvā jarā́yuṇā́gne párivyāyamasi /

Line : 8  Pada: i     pāvakó asmábʰyam̐ śivó bʰava //

Line : 9  Pada: j     úpa jmánn úpa vetasé 'vatara nadī́ṣv ā́ /

Line : 10  Pada: k     ágne pittám apā́m asi máṇḍūki tā́bʰir ā́gahi /

Line : 11  Pada: l     sémáṃ no yajñáṃ pāvakávarṇam̐ śiváṃ kr̥dʰi //

Line : 12  Pada: m     apā́m idáṃ nyáyanam̐ samudrásya nivéśanam /

Line : 13  Pada: n     anyā́m̐s te asmát tapantu hetáyaḥ pāvakó asmábʰyam̐ śivó bʰava //

Line : 14  Pada: o     ágne pāvaka rocíṣā

Pada: p     sá naḥ pāvaka dīdivaḥ //

Line : 15  Pada: q     pāvakáyā yáś citáyantyā kr̥pā́ kṣā́man rurucá uṣáso ná ketúnā /

Line : 16  Pada: r     ā́ yó gʰr̥ṇé ná tatr̥ṣāṇó ajáras tū́rvan ná yā́mann étaśasya nū́ ráṇe //

Page: 132  
Line : 1  Pada: s     námas te hárase śocíṣe cā́tʰo te arcíṣe námaḥ /

Line : 2  Pada: t     anyā́m̐s te asmát tapantu hetáyaḥ pāvakó asmábʰyam̐ śivó bʰava //

Line : 3  Pada: u     druṣáde váṭ \

Pada: v     nr̥ṣáde váṭ \

Pada: w     apsuṣáde váṭ \

Pada: x     barhiṣáde váṭ \

Pada: y     vanarṣáde váṭ

Pada: z     svarvíde váṭ //

Line : 5  Pada: aa     ánnapate ánnasya no dehy anamīvásya śuṣmíṇaḥ /

Line : 6  Pada: ab     prápra dātā́raṃ tāriṣā ū́rjaṃ no dʰehi dvipáde cátuṣpade //

Line : 7  Pada: ac     yé devā́ devā́nām̐ yajñíyā yajñíyānām̐ sam̐vatsarī́yam úpa bʰāgám ā́sate /

Line : 9  Pada: ad     ahutā́do havíṣo yajñé asmínt svayáṃ pibantu mádʰuno gʰr̥tásya //

Line : 10  Pada: ae     yé devā́ devébʰyo ádʰi devatvám ā́yan yé bráhmaṇaḥ puraetā́ro asyá /

Line : 11  Pada: af     yébʰyo ná r̥té pávate dʰā́ma kíṃ caná ná té divó ná pr̥tʰivyā́ ádʰi snúṣu //

Line : 13  Pada: ag     prāṇadā́ apānadā́ vyānadā́ varcodʰā́ varivodʰā́ḥ /

Line : 14  Pada: ah     anyā́m̐s té asmát tapantu hetáyaḥ pāvakó asmábʰyam̐ śivó bʰava //


Anuvaka: 2  
Line : 16  Pada: a     agnís tigména śocíṣā yā́sad víśvaṃ ny àtríṇam /

Line : 17  Pada: b     agnír no vanate rayím //

Page: 133  
Line : 1  Pada: c     yá imā́ víśvā bʰúvanāni júhvad ŕ̥ṣir hotā nyásīdat pitā́ naḥ /

Line : 2  Pada: d     sá āśíṣā dráviṇam icʰámānaḥ pratʰamacʰád ávaraṃ ā́viveśa //

Line : 3  Pada: e     kím̐ svid vánaṃ ká u sá vr̥kṣá āsīd yáto dyā́vāpr̥tʰivī́ niṣṭatakṣúḥ /

Line : 5  Pada: f     mánīṣiṇo mánasā pr̥cʰátéd u tád yád adʰyátiṣṭʰad bʰúvanāni dʰāráyan //

Line : 6  Pada: g     kím̐ svid āsīd adʰiṣṭʰā́nam ārámbʰaṇaṃ katamát svit katʰā́sīt /

Line : 7  Pada: h     yáto bʰū́miṃ janáyan viśvákarmā ví dyā́m aúrṇon mahinā́ viśvácakṣāḥ /

Line : 8  Pada: i     yó viśvácakṣur utá viśvátomukʰo viśvátohasta utá viśvátaspāt /

Line : 9  Pada: j     sáṃ bāhúbʰyām ádʰamat sáṃ pátatrair dyā́vābʰū́mī janáyan devá ékaḥ //

Line : 10  Pada: k     yā́ te dʰā́māni paramā́ṇi yā́vamā́ yā́ madʰyamā́ viśvakarmann utémā́ /

Line : 12  Pada: l     śíkṣā sákʰibʰyo havíṣā svadʰāvaḥ svayám̐ yajasva tanvàṃ juṣāṇáḥ //

Line : 14  Pada: m     víśvakarman havíṣā várdʰanena trātā́ram índram akr̥ṇor avadʰyám /

Line : 15  Pada: n     tásmai víśaḥ sámanamanta daívīr ayám ugró vihavyò yátʰā́sat //

Line : 16  Pada: o     víśvakarman havíṣā vāvr̥dʰānáḥ svayám̐ yajasva pr̥tʰivī́m utá dyā́m /

Line : 17  Pada: p     múhyantv anyé abʰíto jánāsa ihā́smā́kaṃ magʰávā sūrír astu //

Line : 18  Pada: q     vācáspátim̐ viśvákarmāṇam ūtáye manoyújam̐ vā́je adyā́huvema /

Line : 19  Pada: r     sá no nédiṣṭʰā hávanā jujoṣa viśváśaṃbʰūr ávase sādʰúkarmā //


Anuvaka: 3  
Page: 134  
Line : 1  Pada: a     cákṣuṣaḥ pitā́ mánasā hí dʰī́ro gʰr̥tám ene ajanan námnamāne /

Line : 2  Pada: b     yadéd ántā ádadr̥hanta pū́rvā ā́d íd dyā́vāpr̥tʰivī́ apratʰetām //

Line : 3  Pada: c     viśvákarmā vímame yó víhāyā dʰartā́ vidʰartā́ paramótá saṃdŕ̥k /

Line : 4  Pada: d     téṣām iṣṭā́ni sám iṣā́ madanti yátrā saptar̥ṣī́n pará ékam āhúḥ /

Line : 6  Pada: e     tá ā́yajanta dráviṇā sám asminn ŕ̥ṣayaḥ pū́rve jaritā́ro ná bʰūnā́ /

Line : 7  Pada: f     asū́rtā sū́rte rájasi niṣattā́ yé bʰūtā́ni samákr̥ṇvann imā́ni //

Line : 8  Pada: g     yó naḥ pitā́ janitā́ yó vidʰartā́ yó naḥ sató abʰy ā́ sáj jajā́na /

Line : 10  Pada: h     yó devā́nāṃ nāmadʰā́ éka evá tám̐ saṃpraśnáṃ bʰúvanā yanty anyā́ //

Line : 12  Pada: i     paró diváḥ pará enā́ pr̥tʰivyā́ḥ paró devébʰyo ásuram̐ yád ásti /

Line : 13  Pada: j     kám̐ svid gárbʰaṃ pratʰamáṃ dadʰrā ā́po yátra devā́ḥ samágacʰanta sárve /

Line : 14  Pada: k     tám íd gárbʰaṃ pratʰamáṃ dadʰrā ā́po yátra devā́ḥ samápaśyanta víśve /

Line : 15  Pada: l     ajásya nā́bʰā ádʰy ékam árpitam̐ yásmin víśvā bʰúvanā́dʰi tastʰúḥ //

Line : 16  Pada: m     viśvákarmā céd ájaniṣṭa devá ā́d íd gandʰarvó abʰavad dvitī́yaḥ /

Line : 17  Pada: n     tr̥tī́yaḥ pitā́ janitaúṣadʰīnām apā́ṃ gárbʰam̐ vyàdadʰuḥ purutrā́ //

Page: 135  
Line : 1  Pada: o     ná tám̐ vidātʰa yá imā́ jajā́nānyád yuṣmā́kam ántaraṃ babʰūva /

Line : 2  Pada: p     nīhāréṇa prā́vr̥tā jálpyā cāsutŕ̥pa uktʰaśāsaś caranti //


Anuvaka: 4  
Line : 3  Pada: a     úd enam uttaráṃ nayā́gne gʰr̥tenāhuta /

Line : 4  Pada: b     sám enam̐ várcasā sr̥ja prajáyā ca bahúṃ kr̥dʰi //

Line : 5  Pada: c     índremáṃ prataráṃ naya sajātā́nām asad vaśī́ //

Line : 6  Pada: d     rāyáspóṣeṇa sám̐sr̥ja devébʰyo bʰāgadā́ asat //

Line : 7  Pada: e     yásya kurmó gr̥hé havís tám agne vardʰayā tvám /

Line : 8  Pada: f     tásmai devā́ ádʰibruvann ayáṃ ca bráhmaṇaspátiḥ //

Line : 9  Pada: g     āśúḥ śíśāno vr̥ṣabʰó ná yudʰmó gʰanāgʰanáḥ kṣóbʰanaś carṣaṇīnā́m /

Line : 10  Pada: h     saṃkrándano 'nimiṣá ekavīráḥ śatám̐ sénā ajayat sākám índraḥ //

Line : 11  Pada: i     saṃkrándanenānimiṣéṇa jiṣṇúnā yutkāréṇa duścyavanéna dʰr̥ṣṇúnā /

Line : 12  Pada: j     tád índreṇa jayata tát sahadʰvam̐ yúdʰo narā íṣuhastena vŕ̥ṣṇā //

Line : 13  Pada: k     sá íṣuhastaiḥ sá niṣaṅgíbʰir vaśī́ sám̐sr̥ṣṭāsu yutsv índro gaṇéṣu /

Line : 14  Pada: l     sam̐sr̥ṣṭʰajít somapā́ bāhuśardʰy ū̀rdʰvádʰanvā prátihitābʰir ástā //

Line : 15  Pada: m     bŕ̥haspate páridīyā rátʰena rakṣohā́mítraṃ apabā́dʰamānaḥ /

Line : 16  Pada: n     prabʰañjánt sénāḥ pramr̥ṇó yudʰā́ jáyann asmā́kam edʰy avitā́ rátʰānām //

Line : 17  Pada: o     abʰí gotrā́ṇi sáhasā gā́hamāna ādāyó vīráḥ śatámanyur índraḥ /

Page: 136  
Line : 1  Pada: p     duścyavanáḥ pr̥tanāṣā́ḍ ayodʰyò 'smā́kam̐ sénā avatu prá yutsú //

Line : 2  Pada: q     balavijñāyáḥ stʰáviraḥ právīraḥ sáhasvān vājī́ sáhamāna ugráḥ /

Line : 3  Pada: r     abʰívīro abʰísatvā sahojíj jaítram indra rátʰam ā́tiṣṭʰa govít //

Line : 4  Pada: s     gotrabʰídaṃ govídam̐ vájrabāhuṃ jáyantam ájma pramr̥ṇántam ójasā /

Line : 5  Pada: t     imám̐ sajātā ánuvīrayadʰvam índram̐ sakʰāyo ánu sám̐rabʰadʰvam //

Line : 6  Pada: u     índra eṣāṃ netā́ bŕ̥haspátir dákṣiṇā yajñáḥ purá etu sómaḥ /

Line : 7  Pada: v     devasenā́nām abʰibʰañjatīnā́ṃ jáyantīnāṃ marúto yantu mádʰye //

Line : 8  Pada: w     índrasya vŕ̥ṣṇo váruṇasya rā́jña ādityā́nāṃ marútām̐ śardʰa ugrám /

Line : 10  Pada: x     mahā́manasāṃ bʰuvanacyavā́nāṃ gʰóṣo devā́nāṃ jáyatām údastʰāt //

Line : 11  Pada: y     asmā́kam índraḥ sámr̥teṣu dʰvajéṣv asmā́kam̐ yā́ íṣavas tā́ jayantu /

Line : 12  Pada: z     asmā́kam̐ vīrā́ úttare bʰavantv asmā́n u devā avatā bʰáreṣv ā́ //


Anuvaka: 5  
Line : 13  Pada: a     úd u tvā //

Line : 14  Pada: b     páñca díśo daívīr yajñám avantu devī́r ápā́matiṃ durmatíṃ bā́dʰamānāḥ /

Line : 15  Pada: c     rāyaśpóṣe yajñápatim ābʰájantī rāyáspóṣe ádʰi yajñó astʰāt //

Line : 17  Pada: d     sámiddʰe agnā́ ádʰi māmahāná uktʰápatrā ī́ḍyo gr̥bʰītáḥ /

Line : 18  Pada: e     taptáṃ gʰarmáṃ parigŕ̥hyāyajantorjā́ yád yajñám áśamanta devā́ḥ //

Page: 137  
Line : 1  Pada: f     daívyāya dʰātré déṣṭre devaśrī́ḥ śrī́manāḥ śatápāt /

Line : 2  Pada: g     parigŕ̥hya yajñám āyan //

Line : 3  Pada: h     hárikeśaḥ sū́ryaraśmiḥ purástāt savitā́ jyótir údayaṃ ájasram /

Line : 4  Pada: i     tásya pūṣā́ prasavé yāti vidvā́nt saṃpáśyan víśvā bʰúvanāni gopā́ḥ //

Line : 6  Pada: j     devā́ devéṣv adʰvaryánto astʰur vītám̐ śamitrā́ śamitám̐ yájadʰyai /

Line : 7  Pada: k     turī́yo yajñó yátra havyám éti táto vākā́ āśíṣo no juṣantām //

Line : 9  Pada: l     índram̐ víśvā avīvr̥dʰant samudrávyacasaṃ gíraḥ /

Line : 10  Pada: m     ratʰī́tamam̐ ratʰī́nām̐ vā́jānām̐ sátpatiṃ pátim //

Line : 11  Pada: n     vimā́na eṣá divó mádʰya āsta āpapr̥vā́n ródasī antárikṣam /

Line : 13  Pada: o     sá viśvā́cīr abʰícaṣṭe gʰr̥tā́cīr antarā́ pū́rvam áparaṃ ca ketúm //

Line : 14  Pada: p     ukṣā́ samudré aruṇáḥ suparṇáḥ pū́rvasya yóniṃ pitúr ā́viveśa /

Line : 15  Pada: q     mádʰye divó níhitaḥ pŕ̥śnir áśmā vícakrame rájasas pāty ántau //

Line : 16  Pada: r     sumnahū́r yajñá ā́ ca vakṣad yákṣad agnír devó deváṃ ā́ ca vakṣat /

Line : 17  Pada: s     devahū́r yajñá ā́ ca vakṣad yákṣad agnír devó deváṃ ā́ ca vakṣat //

Line : 18  Pada: t     vā́jasya mā prasavénéti dvé //


Anuvaka: 6  
Page: 138  
Line : 1  Pada: a     krámadʰvam agnínā nā́kam úkʰyam̐ hásteṣu bíbʰrataḥ /

Line : 2  Pada: b     diváḥ pr̥ṣṭʰám̐ svar gatvā́ miśrā́ devébʰir ādʰvam //

Line : 3  Pada: c     prā́cīm ánu //

Line : 4  Pada: d     ágne préhi pratʰamó devāyatā́ṃ cákṣur devā́nām utá mártyānām /

Line : 5  Pada: e     íyakṣamāṇā bʰŕ̥gubʰiḥ sahá svàr * yantu yájamānāḥ svastí //
      FN emended. Ed.: svar.

Line : 6  Pada: f     pr̥tʰivyā́ ahám úd * antárikṣam ā́ruham antárikṣād dívam ā́ruham /
      FN emended. Ed.: ud.

Line : 7  Pada: g     divó nā́kasya pr̥ṣṭʰā́t svàr jyótir agām ahám //

Line : 8  Pada: h     svàr * yánto nā́pekṣantā ā́ dyā́m̐ rohanti ródasī /
      FN emended. Ed.: svar.

Line : 9  Pada: i     yajñám̐ yé viśvátodʰāram̐ súvidvām̐so viteniré //

Line : 10  Pada: j     náktoṣā́sā \

Pada: k     ágne sahasrākṣa //

Line : 11  Pada: l     suparṇò 'si garútmān

Pada: m     pr̥ṣṭʰé pr̥tʰivyā́ḥ sīda /

Line : 12  Pada: n     bʰāsā́ntárikṣam ā́pr̥ṇa

Pada: o     jyótiṣā dívam úttabʰāna

Pada: p     téjasā díśā úddr̥m̐ha //

Line : 14  Pada: q     ājúhvānaḥ suprátīkaḥ purástād ágne svám̐ yónim ā́sīda sādʰyā́ /

Line : 15  Pada: r     asmínt sadʰástʰe ádʰy úttarasmin víśve devā yájamānaś ca sīdata //

Line : 16  Pada: s     tā́m̐ savitúr váreṇyasya citrā́m ā́hám̐ vr̥ṇe sumatím̐ viśvájanyām /

Page: 139  
Line : 1  Pada: t     yā́m asya káṇvo áduhat prápīnām̐ sahásradʰārāṃ páyasā mahī́ṃ gā́m //

Line : 3  Pada: u     vidʰéma te paramé jánmann agne vidʰéma stómair ávare sadʰástʰe /

Line : 4  Pada: v     yásmād yóner udā́ritʰā yájā táṃ prá tvé sámiddʰe juhure havī́m̐ṣi //

Line : 5  Pada: w     préddʰo agne dīdihi puró nó 'jasrayā sūrmyā̀ yaviṣṭʰa /

Line : 6  Pada: x     tā́m̐ śáśvantā úpayanti vā́jāḥ //

Line : 7  Pada: y     ágne tám adyá

Pada: z     saptá te agne //

Line : 8  Pada: aa     cítiṃ juhomi mánasā yátʰā devā́ ihā́gáman /

Line : 9  Pada: ab     vītíhotrā r̥tāvŕ̥dʰaḥ //

Line : 10  Pada: ac     samudrásya vo vayúnasya pátman juhómi viśvákarmaṇe /

Line : 11  Pada: ad     viśvā́hā́dābʰyam̐ havíḥ //


Next part


This text is part of the TITUS edition of Black Yajur-Veda: Maitrayani-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.