TITUS
Black Yajur-Veda: Maitrayani-Samhita
Part No. 30
Previous part

Prapathaka: 6  
Anuvaka: 1  
Pada: a     āgnāvaiṣṇavám ékādaśakapālaṃ nírvapet \

Pada: b     agnír vaí sárvā devátās \

Pada: c     víṣṇur yajñás \

Line : 4  Pada: d     devátāś caivá yajñáṃ cā́labdʰa \

Pada: e     agnír vaí yajñásyāntò 'vástāt \

Pada: f     víṣṇuḥ purástāt \

Pada: g     ubʰayáta evá yajñásyāntā́ ā́labdʰa

Line : 5  Pada: h     tád āhus \

Pada: i     ná r̥tá índrād yajñò 'stv íti

Line : 6  Pada: j     yád aṣṭā́kapalas ténāgneyás \

Pada: k     yát tríkapālas téna vaiṣṇavás \

Pada: l     yád ékādaśakapālaḥ saṃpádyate ténaindrás \

Line : 7  Pada: m     agnír vaí yajñásya pavítram \

Pada: n     víṣṇur yajñáḥ

Pada: o     pavítrapūtam evá yajñám ā́labdʰa

Line : 8  Pada: p     médʰasya vā́ etád yajñásya rūpám̐ yát puroḍā́śas

Pada: q     tásmāt puroḍā́śa evá kāryàs \

Line : 9  Pada: r     carū́ kurvanti

Pada: s     dʰenvā́ vaí gʰr̥táṃ páyas \

Pada: t     anaḍúhas taṇḍulā́s

Line : 10  Pada: u     tán mitʰunám \

Pada: v     mitʰunám evā́sya yajñamukʰé dadʰāti

Pada: w     téjo vaí gʰr̥tám \

Pada: x     téjasa evá prájāyate

Line : 11  Pada: y     púruṣo vā́ eṣá médʰāyā́labʰyate

Pada: z     púruṣasyeva hy èṣā́ pratimā́

Line : 12  Pada: aa     yatá iva hí rūpám \

Pada: ab     tásmāc carúr evá kāryàs \

Pada: ac     védimati dīkṣate *
      FN Corrigenda. Ed.: dī́kṣate.

Pada: ad     vindā́ íti vaí védimati dīkṣate *
      FN Corrigenda. Ed.: dī́kṣate.

Line : 13  Pada: ae     vindáte ha vaí yó védimati dī́kṣate \

Pada: af     átʰo yajñapatʰá evā́dīkṣiṣṭa

Line : 14  Pada: ag     védyā vaí devā́ imám ásurāṇām avindata \

Pada: ah     imā́m evá vindate yó védimati dī́kṣate \

Line : 15  Pada: ai     átʰo yajñapatʰám evā́labdʰa

Pada: aj     prācī́navam̐śaṃ kurvanti

Page: 60  
Line : 1  Pada: ak     díśo yád imā́m̐ vyákalpayann imā́m evá devébʰyó 'kalpayann imā́ṃ pitŕ̥bʰya imā́m ásurebʰya imā́ṃ manuṣyèbʰyas \

Line : 2  Pada: al     devátām eṣá úpaiti yó dī́kṣate

Pada: am     devā́nām evá díśam upā́vartate

Line : 3  Pada: an     prā́cīnām evá díśam upā́vartate \

Pada: ao     átʰo devakṣetrám evá prā́vasyati páriśrayanti \

Line : 4  Pada: ap     antárhito vaí daívāt kṣáyān mānuṣáḥ kṣáyas \

Pada: aq     mānuṣā́d evaínaṃ kṣáyād antárdadʰati \

Line : 5  Pada: ar     átʰo rákṣasām ánanvavāyāya \

Pada: as     éti vā́ eṣò 'smā́l lokā́d yó dī́kṣate

Line : 6  Pada: at     jánam̐ hy èti

Pada: au     devalokám abʰyā́rohati

Pada: av     pariśráyanto 'tirokā́n kurvanti

Line : 7  Pada: aw     ténāsmā́l lokā́n naíti

Pada: ax     ténāsmíṃl loké dʰr̥táḥ

Pada: ay     purástāt prā́yaṇaṃ kuryāt svargákāmasya \

Line : 8  Pada: az     asaú vā́ ādityáḥ svargó lokás \

Pada: ba     amúṣyainam ādityásya sā́makṣaṃ gamayati

Line : 9  Pada: bb     dakṣiṇatáḥ prā́yaṇaṃ kuryād yáṃ kāmáyeta pitr̥loká r̥dʰnuyād íti \

Line : 10  Pada: bc     eṣā́ vaí pitr̥̄ṇā́ṃ dík

Pada: bd     pitr̥loká evá r̥dʰnoti

Line : 11  Pada: be     paścā́t prā́yaṇaṃ kuryāt prajā́kāmasya

Pada: bf     paścā́d vaí réto dʰīyate

Pada: bg     réto dīkṣitás \

Line : 12  Pada: bh     réto 'smin dadʰāti \

Pada: bi     uttaratáḥ prā́yaṇaṃ kuryād yáṃ kāmáyeta manuṣyaloká r̥dʰnuyād íti \

Line : 13  Pada: bj     eṣā́ vaí manuṣyā̀ṇāṃ dík \

Pada: bk     manuṣyaloká evá r̥dʰnoti \

Pada: bl     uttaratáḥ purástāt prā́yaṇaṃ kuryād yáṃ kāmáyetobʰáyor lokáyor r̥dʰnuyād íti \

Line : 14  Pada: bm     ubʰáyor vā́ etál lokáyos \

Line : 15  Pada: bn     ubʰáyor evá lokáyor r̥dʰnoti

Pada: bo     sarvátaḥ prā́yaṇaṃ kuryād yáṃ kāmáyeta sárvāsu dikṣv íty r̥dʰnuyād íti

Line : 16  Pada: bp     sárvāsu dikṣv íty r̥dʰnoti //


Anuvaka: 2  
Line : 17  Pada: a     keśaśmaśrú vapate

Pada: b     dató dʰāvate

Pada: c     nakʰā́n nikr̥ntate

Pada: d     snā́ti

Pada: e     mr̥tā́ vā́ eṣā́ tvág

Line : 18  Pada: f     amedʰyám̐ vā́ asyaitád ātmáni śámalam \

Pada: g     tád evā́pahate

Pada: h     médʰya evá médʰam úpaiti \


Page: 61  
Line : 1  Pada: i     apsú dīkṣā́ṃ praveśayitvā́ devā́ḥ svargáṃ lokám āyan

Pada: j     yád apsú snā́ti

Pada: k     tā́m evá dīkṣā́m ā́labʰate \

Line : 2  Pada: l     átʰa yád apò 'vabʰr̥tʰám abʰyavaíti

Pada: m     tā́m̐ vā́ etád dīkṣā́ṃ púnar apsú práveśayati \

Line : 3  Pada: n     óṣadʰe trā́yasvainam íty āha

Pada: o     trā́tyā evá

Pada: p     svádʰite maínam̐ him̐sīr íti

Line : 4  Pada: q     vájro vaí svádʰitiḥ

Pada: r     sá īśvaró 'śānto yájamānam̐ hím̐sitos \

Line : 5  Pada: s     yát tŕ̥ṇam antardádʰāti *
      FN emended. Ed.: antár dadʰāti

Pada: t     yájamānasyā́him̐sāyai

Pada: u     devaśrúd imā́n právapā íti

Line : 6  Pada: v     devaśrúd hy ètā́n pravápate

Pada: w     svasty úttaraṃ aśīyéti

Pada: x     svasty àsyá yajñásyodŕ̥cam aśīyéti vā́ etád āha \

Line : 7  Pada: y     ā́po mā mātáraḥ sūdayantv íti \

Pada: z     ā́po hí yajñás \

Line : 8  Pada: aa     gʰr̥téna mā gʰr̥tapvàḥ punantv íti

Pada: ab     devátābʰir evā́tmā́naṃ pāvayate

Pada: ac     víśvam̐ hí ripráṃ praváhantu devī́r íti

Line : 9  Pada: ad     yád evā́sya riprám amedʰyám ātmáni śámalaṃ tád asmād ádʰi právahanti \

Line : 10  Pada: ae     úd íd ābʰyaḥ śrúcir ā́ pūtá emī́ti

Pada: af     śrúcir evā́bʰyo yajñíyo médʰyaḥ pūtá údeti

Line : 11  Pada: ag     havír vaí dīkṣitás \

Pada: ah     yadā́ vaí havír yájuṣā prokṣáty átʰa havír bʰavati

Line : 12  Pada: ai     yád yájuṣā snapáyati

Pada: aj     havír evaínam akar

Pada: ak     aśnā́ti

Pada: al     prāṇā́ vā́ áśanam \

Line : 13  Pada: am     prāṇā́n evā́tmán dʰitvā́ dīkṣate

Pada: an     suṣiró vaí púruṣaḥ

Pada: ao     sá vaí tárhy evá sárvo yárhy ā́śitas \

Line : 14  Pada: ap     yád ā́śito bʰavati

Pada: aq     médʰya evá médʰam úpaiti

Pada: ar     yátʰā vā́ ihá dīkṣitá evám̐ vā́ eṣò 'múṣmiṃl loká evá vā́ atyāśitasya tiṣṭʰati

Line : 16  Pada: as     tásmān nā́tyāśitena bʰavitavyàm \

Pada: at     tán ná sū́rkṣyam

Pada: au     ā́śitenaivá bʰavitavyàm \

Line : 17  Pada: av     yátʰaivá kánīyaḥkanīyo 'śnīyā́d evám aśnīyāt \

Pada: aw     yád dʰí dīkṣitáḥ sán kánīyo 'śnā́ti téna dīksitá āṅkte \

Line : 18  Pada: ax     abʰyàṅkte

Pada: ay     vā́saḥ páridʰatte \

Pada: az     etā́ vaí púruṣasya tanvàḥ

Line : 19  Pada: ba     sátanūr evá médʰyam úpaiti

Pada: bb     návanītenābʰyàṅkte

Pada: bc     gʰr̥táṃ devā́nām

Pada: bd     ā́yutaṃ manuṣyā̀ṇām \

Line : 20  Pada: be     níṣpakvaṃ gandʰarvā́ṇām \

Pada: bf     svayam̐vilīnáṃ pitr̥̄ṇā́m \

Pada: bg     sarvadevatyàm̐ vā́ etát

Page: 62  
Line : 1  Pada: bh     tásmān návanītenā́bʰyàṅkte

Pada: bi     darbʰapiñjúlā́bʰyām̐ samā́yauti

Line : 2  Pada: bj     tát svid * abʰyáñjanam akar
      FN emended. Ed.: svíd

Pada: bk     átʰo abʰy èvaítád gʰārayati

Pada: bl     medʰatvā́ya

Pada: bm     mahīnā́ṃ páyo 'sī́ty āha

Line : 3  Pada: bn     mahīnā́m̐ hy ètát páyas \

Pada: bo     apā́m óṣadʰīnām̐ rásā íti \

Pada: bp     apā́m̐ hy èṣá óṣadʰīnām̐ rásas \

Line : 4  Pada: bq     varcodʰā́ asi

Pada: br     várco me dʰehī́ti \

Pada: bs     āśíṣam evā́śāste //


Anuvaka: 3  
Line : 5  Pada: a     prasvā́ṅkte

Pada: b     prájātyai \

Pada: c     īṣī́kayā́ṅkte

Pada: d     śalasyā̀ hí manuṣyā̀ āñjáte

Line : 6  Pada: e     sátūlayā́ṅkte \

Pada: f     ápatūlayā hí manuṣyā̀ āñjáte

Pada: g     dakṣiṇáṃ pū́rvam ā́ṅkte

Pada: h     savyám̐ hí pū́rvaṃ manuṣyā̀ āñjáte

Line : 7  Pada: i     trír anyát trír anyád ā́ṅkte \

Pada: j     áparimitam̐ hí manuṣyā̀ āñjáte

Line : 8  Pada: k     ná púnar níṣevayati

Pada: l     punarāvártam̐ hí manuṣyā̀ āñjáte \

Pada: m     índro vaí vr̥trám ahan \

Line : 9  Pada: n     tásya kanī́nikā párāpatat

Pada: o     sā́ trikakúbʰam agacʰat

Pada: p     tádāñjanaṃ traikakubʰám ā́ṅkte *
      FN emended. Ed.: āṅkte.

Line : 10  Pada: q     satyám̐ vaí cákṣus \

Pada: r     néva vācé śrád dadʰāti

Pada: s     satyám evā́lábʰya dīkṣā́m úpaiti \

Line : 11  Pada: t     antár aháṃ tváyā dvéṣo antarā́rātīr dadʰe mahatā́ párvatenéti

Pada: u     párvatena vā́ etád dvéṣó 'rātīr antár dʰatte

Line : 12  Pada: v     cakṣuḥpā́ asi

Pada: w     cákṣur me pāhī́ti \

Pada: x     āśíṣam evā́śāste \

Line : 13  Pada: y     ūrdʰváṃ cā́vāñcaṃ ca pāvayati \

Pada: z     ūrdʰváś ca hy àyám ávāṅ ca prāṇás \

Line : 14  Pada: aa     yáṃ dviṣyā́t tám akṣṇayā́ pāvayet

Pada: ab     prāṇā́n asya mohayati

Pada: ac     pramā́yuko bʰavati

Line : 15  Pada: ad     citpatís tvā punātv íti

Pada: ae     yajñó vaí citpatís \

Pada: af     vācáspátis tvā punātv íti

Line : 16  Pada: ag     vācáspátir evaínam̐ yajñā́ya pāvayati

Pada: ah     devás tvā savitā́ punātv íti

Line : 17  Pada: ai     savitr̥prasūta evaítā́bʰir devátābʰir médʰāyātmā́naṃ pāvayate \

Pada: aj     ácʰidreṇa pavítreṇéti \

Line : 18  Pada: ak     etád vā́ ácʰidraṃ pavítram̐ yát sū́ryasya raśmáyas \

Pada: al     ácʰidreṇaivaínaṃ pavítreṇa punāti


Page: 63  
Line : 1  Pada: am     tásya te pavitrapate pavítreṇéti

Pada: an     yajñó vaí pavítrapatis \

Pada: ao     yajñā́ya kʰálu vā́ eṣá kám ātmā́naṃ pāvayate //

Line : 2  Pada: ap     yajñám̐ śakeyam // íti \

Pada: aq     índro vaí vr̥trám apsv ádʰyahan \

Line : 3  Pada: ar     tā́sām̐ yád yajñíyaṃ médʰyam ā́sīt tád údakrāmat

Pada: as     tā́ imā́ óṣadʰayo 'bʰavan \

Line : 4  Pada: at     tā́sām̐ vā́ etát téjo yád darbʰā́s \

Pada: au     etā́ vaí śúṣkā ā́pas \

Line : 5  Pada: av     yád evā́sām̐s téjas tád ávarunddʰe

Pada: aw     trayī́r vā́ ā́po divyā́ḥ pā́rtʰivāḥ samudríyās

Line : 6  Pada: ax     tā́ḥ sárvā darbʰó vívastʰait

Pada: ay     tásmād darbʰáḥ pavítram \

Pada: az     dvā́bʰyāṃ pāvayati

Pada: ba     dvé pavítre

Line : 7  Pada: bb     dvipā́d yájāmānas \

Pada: bc     yā́vān evā́syātmā́ táṃ pāvayati

Pada: bd     tríḥ pāvayati

Line : 8  Pada: be     tríṣatyā hí devā́s \

Pada: bf     átʰo tráyo vā́ imé prāṇā́ḥ prāṇò 'pānó vyānás \

Line : 9  Pada: bg     yā́vān evā́syātmā́ táṃ pāvayati

Pada: bh     saptábʰiḥ pāvayati

Pada: bi     saptá vaí cʰándām̐si

Line : 10  Pada: bj     cʰándobʰir evaínaṃ pāvayati \

Pada: bk     átʰo bráhma vaí cʰándām̐si

Pada: bl     bráhmaṇaivaínaṃ pāvayati \

Pada: bm     ékavim̐śatyā pāvayati

Line : 11  Pada: bn     dáśa hástyā aṅgúlayo dáśa pā́dyās \

Pada: bo     ātmaíkavim̐śás \

Line : 12  Pada: bp     yā́vān evā́syātmā́ táṃ pāvayati

Pada: bq     trayā́ vaí naírr̥tā akṣā́ḥ stríyaḥ svápnas \

Line : 13  Pada: br     yád dī́kṣate ténākṣaíś ca strībʰíś ca vyā́vartate

Pada: bs     yā́ṃ pratʰamā́ṃ dīkṣitó rā́trīṃ jāgárti táyā svápnena vyā́vartate

Line : 14  Pada: bt     yā́ṃ pratʰamā́ṃ dīkṣito vásati yajñáṃ táyā́varunddʰe

Line : 15  Pada: bu     yā́m̐ sóme krīté prajā́ṃ táyā

Pada: bv     yā́m̐ śvaḥsutyáyā paśū́m̐s táyā //


Anuvaka: 4  
Line : 17  Pada: a     ā́kūtyai prayúje agnáye svā́héti \

Pada: b     ā́kūtyā vā́ ā́kūtir yakṣyáte syá íti

Line : 18  Pada: c     prayújaḥ kʰálu vā́ enam̐ yajñā́ya práyuñjate

Pada: d     medʰā́yai mánase agnáye svā́héti

Line : 19  Pada: e     medʰáyā hí mánasā yajñám aśnuté

Pada: f     dīkṣā́yai tápase agnáye svā́héti

Pada: g     dīkṣáyā hí tápasā yajñám aśnuté


Page: 64  
Line : 1  Pada: h     sárasvatyai pūṣṇé agnáye svā́héti

Pada: i     vā́g vaí sárasvatī

Line : 2  Pada: j     vācā́ vyā́harati yakṣyáte syá íti

Pada: k     pūṣā́ kʰálu vā́ enam̐ yajñáṃ prā́pipad * yá enam ápūpuṣat \
      FN Corrigenda. Ed.: prā́pibad.

Line : 3  Pada: l     ā́po devīr br̥hatīr viśvaśaṃbʰuvā íti \

Pada: m     ā́po hí yajñás \

Line : 4  Pada: n     dyā́vāpr̥tʰivī́ úro antarikṣéti

Pada: o     dyā́vāpr̥tʰivī́ vā́ ánv antárikṣam̐ yajñá úpaśritas

Line : 5  Pada: p     táta evá yajñám ā́labdʰa

Pada: q     bŕ̥haspátir no havíṣā vr̥dʰātu svā́héti

Line : 6  Pada: r     bráhma vaí bŕ̥haspátis \

Pada: s     bráhmaṇā vā́ etát purástāt sárvān kā́mān āptvā́ dīkṣā́m ā́labʰate

Line : 7  Pada: t     yátra vā́ asyá yajñáḥ śritó yátrayatrópaśritas tátastato vā́ etát sárvaṃ bráhmaṇā yajñám̐ saṃbʰr̥tyā́labdʰa

Line : 8  Pada: u     ná vā́ ekā́hutir dīkṣitáṃ karoti

Line : 9  Pada: v     yád etā́ni juhóti

Pada: w     dvitīyatvā́ya

Pada: x     prajā́patir vaí yát kíṃca mánasā́dīdʰet tád ādʰītayajúrbʰir evā́pnot

Line : 10  Pada: y     tád ādʰītayajúṣām ādʰītayajuṣṭvám \

Pada: z     tád yá evám̐ vidvā́n ādʰītayajū́m̐ṣi juhóti yád evá kíṃca mánasā dī́dʰyaj juhóti tád āpnoti \

Line : 12  Pada: aa     eté vaí yajñásya saṃbʰārā́s \

Pada: ab     eṣá ha tv èvá sáṃbʰr̥tasaṃbʰāreṇa yajñéna yajate yásyaitā́ni hūyánte \

Line : 13  Pada: ac     etád dʰa sma vā́ āhāruṇá aúpaveśiḥ

Pada: ad     kím u sá yajñéna yajeta yó yajñásya saṃbʰārā́n ná vidyā́d íti

Line : 14  Pada: ae     pañcábʰir juhoti

Line : 15  Pada: af     pā́ṅkto yajñás \

Pada: ag     yā́vān evá yajñás tám ā́labdʰa

Pada: ah     ṣaḍbʰír juhoti

Pada: ai     ṣáḍ vā́ r̥távas \

Line : 16  Pada: aj     r̥túṣv evá prátitiṣṭʰati

Pada: ak     yajñó vaí sr̥ṣṭáḥ

Pada: al     prá sā́mā́vlināt

Pada: am     prá yájus

Pada: an     tám̐ vā́ ŕ̥g evā́yacʰat \

Line : 17  Pada: ao     ékā vā́ enam ŕ̥g áyacʰat \

Pada: ap     dvā́daśa yájūm̐ṣi

Pada: aq     náva sā́māni

Line : 18  Pada: ar     tásmān navábʰir bahiṣpavamāné stuvate

Pada: as     náva hy ènam̐ sā́māny áyacʰan \

Pada: at     tásmād vātsaṃbandʰavído dvādaśábʰir audgrabʰaṇáṃ juhvati

Line : 19  Pada: au     dvā́daśa hy ènam̐ yájūm̐ṣy ā́yacʰan \

Line : 20  Pada: av     etárhi kʰálu vā́ eṣá sr̥jyate yárhi dī́kṣate

Pada: aw     yád r̥caúdgrabʰaṇáṃ juhóti

Pada: ax     yajñám̐ vā́ etát sr̥ṣṭám r̥cā́yacʰati

Page: 65  
Line : 1  Pada: ay     tásmād āruṇivída r̥caúdgrabʰaṇáṃ juhvati \

Pada: az     ékā hy ènam ŕ̥g áyacʰat //


Anuvaka: 5  
Line : 3  Pada: a     yajñó vaí prajā́patiḥ

Pada: b     prājāpatyám etác cʰándo yád anuṣṭúbʰ \

Pada: c     yád anuṣṭúbʰā juhóti

Line : 4  Pada: d     svénaivaínaṃ cʰándasā́varunddʰe \

Pada: e     ékayā juhoti \

Pada: f     éko hí prajā́patis \

Pada: g     ániruktayā juhoti \

Line : 5  Pada: h     ánirukto hí prajā́patiḥ

Pada: i     pūrṇáyā juhoti

Pada: j     pūrṇó hí prajā́patis \

Line : 6  Pada: k     yád ūnáyā juhuyā́d bʰrā́tr̥vyāya lokám úñśim̐ṣet \

Pada: l     átʰa yát pūrṇáyā juhóti

Line : 7  Pada: m     ná bʰrā́tr̥vyāya lokám úñśim̐ṣati \

Pada: n     ūrjó vā́ etád rūpám̐ yát pūrṇám \

Pada: o     yát pūrṇáyā juhóti

Line : 8  Pada: p     yajñé vā́ etád ū́rjaṃ dadʰāti

Pada: q     víśvo devásya netúr íti sāvitrám \

Line : 9  Pada: r     márto vurīta sakʰyám íti pitr̥devatyàm \

Pada: s     víśvo rāyá iṣudʰyatī́ti vaiśvadevám \

Line : 10  Pada: t     dyumnám̐ vr̥ṇītéti bārhaspatyám \

Pada: u     puṣyásā íti pauṣṇám \

Pada: v     sārasvatáḥ svāhākāráḥ

Line : 11  Pada: w     sarvadevatyā̀ vā́ eṣā́ ŕ̥k

Pada: x     tásmād eṣaíkā satyaúdgrabʰaṇáṃ paribabʰūva

Line : 12  Pada: y     sárvābʰyo devátābʰyo yajñá ālábʰyā íty āhuḥ

Pada: z     sarvadevatyā̀ vā́ eṣā́ ŕ̥k \

Line : 13  Pada: aa     yád etáyā r̥caúdgrabʰaṇáṃ juhóti

Pada: ab     sárvābʰyo vā́ etád devátābʰyo yajñám ā́labʰate \

Line : 14  Pada: ac     anuṣṭúbʰo vā́ etásyāḥ satyā́s trī́ṇy aṣṭā́kṣarāṇi padā́ny ékam̐ saptā́kṣaram \

Line : 15  Pada: ad     yát saptā́kṣaraṃ tásya catvā́ry akṣárāṇy ékasmin padá upayánti

Pada: ae     trī́ṇy ékasmin

Line : 16  Pada: af     yátra catvā́ry upayánti sā́ jágatī

Pada: ag     yátra trī́ṇi sā́ triṣṭúb

Pada: ah     yád aṣṭā́kṣaraṃ téna gāyatrī́

Line : 17  Pada: ai     yád anuṣṭúp ténānuṣṭúp

Pada: aj     sárvair evā́sya cʰándobʰir hutáṃ bʰavati

Pada: ak     cʰándaḥpratiṣṭʰāno vaí yajñás \

Line : 18  Pada: al     cʰándaḥsu vā́vā́syaitád yajñáṃ pratiṣṭʰāpayā́m akaḥ

Pada: am     svāhākāréṇa kʰálu vā́ eṣā́ paṅktíḥ

Page: 66  
Line : 1  Pada: an     pā́ṅkto yajñáḥ paṅktíprāyaṇaḥ paṅktyùdayanaḥ

Line : 2  Pada: ao     paṅktíprāyaṇam evā́sya yajñáṃ paṅktyùdayanam akar

Pada: ap     átʰo vā́g vaí cʰándām̐si

Pada: aq     vā́cam̐ vā́ etán madʰyatá āptvā́varunddʰe

Line : 3  Pada: ar     tásmād iyám̐ vā́ṅ madʰyató vadati

Pada: as     madʰyató hī̀yáṃ vā́k

Line : 4  Pada: at     prajā́patir vaí svā́ṃ duhitáram ádʰyaid uṣásam \

Pada: au     tásya rétaḥ párāpatat

Pada: av     té devā́ abʰisámagacʰanta

Line : 5  Pada: aw     tásmād dīkṣitó ná dádāti ná pacati \

Pada: ax     átʰainam abʰisáṃgacʰante

Line : 6  Pada: ay     tád údagr̥bʰṇan \

Pada: az     tád audgrabʰaṇásyaudgrabʰaṇatvám \

Pada: ba     téna yajñám atanvanta

Pada: bb     yajñó yád ágre vyábʰavat sá tredʰā́ vyàbʰavat

Line : 7  Pada: bc     sá vā́ r̥kṣv èvá tŕ̥tīyenā́śrayata

Pada: bd     sā́masu tŕ̥tīyena

Line : 8  Pada: be     yájuḥṣu tŕ̥tīyena

Pada: bf     yā́ vā́ asya priyā́ tanū́r ā́sīt táyā yájur aśrayata \

Line : 9  Pada: bg     uccaír r̥cā́ kriyáta uccaíḥ sā́mnopām̐śú yájuṣā

Pada: bh     yajñásya hy átra priyā́ tanū́s \

Line : 10  Pada: bi     yád yájuṣoccaíḥ kuryā́d yajñásya priyā́ṃ tanvàm uddʰr̥tā́ṃ kuryāt \

Pada: bj     ábrahmavarcasī syān nagnaṃbʰā́vukaḥ //


Anuvaka: 6  
Line : 12  Pada: a     ā́hitāgnir vā́ eṣá sán nā́gnihotráṃ * juhóti ná darśapūrṇamāsaú yajate
      FN emended. Mittwede. Ed.: nāgnihotráṃ

Line : 13  Pada: b     tád yā́ āhutibʰā́jo devátās tā́ anudʰyāyínīḥ karoti

Pada: c     karśáyata ātmā́nam \

Line : 14  Pada: d     ténaivā́sya tád dʰutáṃ bʰavati

Pada: e     devā́ ásurān hatvaíbʰyo lokébʰyaḥ prā́ṇudanta

Line : 15  Pada: f     téṣām ásavo manuṣyā̀n prā́viśan \

Pada: g     tád idám̐ ripráṃ púruṣe 'ntár

Pada: h     átʰo kr̥ṣṇám iva cákṣuṣy antár \

Line : 16  Pada: i     tán nā́śnīyāt \

Pada: j     asuryàm evā́pahate

Pada: k     yadā́ vaí púruṣe ná kíṃcanā́ntár bʰávati yadā́sya kr̥ṣṇáṃ cákṣuṣor náśyaty átʰa médʰyo

Line : 17  Pada: l     yádi kuryā́n náktaṃ kuryāt \

Line : 18  Pada: m     asuryò vaí rā́tris \

Pada: n     asūryàm evā́sūryàṃ kriyate

Pada: o     vā́cam̐ vā́ etád dīkṣayantī́ti ha smāhāruṇá aúpaveśis \

Page: 67  
Line : 1  Pada: p     yá utā́ñjānò 'bʰyañjānó 'tʰa dīkṣitavādám̐ vádati sá vā́vá dīkṣitá íti

Line : 2  Pada: q     sāyáṃ prātár * vaí manuṣyā̀ṇāṃ deváhitam áśanam
      FN emended. Ed.: prā́tar.

Line : 3  Pada: r     atinī́ya sāyamaśanám atinī́ya prātaraśanám̐ vratám̐ vratayati

Line : 4  Pada: s     mānuṣásya vyā́vr̥ttyai \

Pada: t     adantī́ti vaí gā́ āhús \

Pada: u     aśnántī́ti manuṣyā̀n

Pada: v     juhudʰī́ti devébʰyas \

Line : 5  Pada: w     atʰavā́ etám āhuḥ //

Pada: x     vratám úpehi vratya // íti

Pada: y     vratám̐ hy ètásya

Line : 6  Pada: z     vraténa yajñáḥ sáṃtatas \

Pada: aa     vraténaivá yajñám̐ sáṃtanoti \

Pada: ab     abʰyardʰó vā́ r̥ksāmé yajñā́d āstāṃ * *
      < āstām
      FN emended. Mittwede. Ed.: ā́stāṃ.

Line : 7  Pada: ac     táyor yaú mahimā́nā ā́stāṃ tā́ apanidʰā́ya * yajñám upā́vartetām \
      FN emended. Mittwede. Ed.: apinidʰā́ya.

Line : 8  Pada: ad     taú mahimā́nā ahorātré ábʰavatām \

Pada: ae     táyor vā́ etád rūpám̐ yát kr̥ṣṇājinásya

Line : 9  Pada: af     yáñ śukláṃ tád áhno rūpám \

Pada: ag     yát kr̥ṣṇáṃ tád rā́tres

Pada: ah     taú vā́ etán mahimā́nā anvā́rabʰate

Line : 10  Pada: ai     saṃpā́raṇāya

Pada: aj     sáṃ mā pārayatā íti \

Pada: ak     ahorātré mitʰunám̐ sámabʰavatām \

Line : 11  Pada: al     táyos téjo 'pākrāmat

Pada: am     tát kr̥ṣṇáṃ prā́viśat

Pada: an     tád vā́ etád anvā́rabʰate

Line : 12  Pada: ao     dyā́vāpr̥tʰivī́ mitʰunám̐ sámabʰavatām \

Pada: ap     táyor vīryàm ápākrāmat

Pada: aq     tát kr̥ṣṇáṃ prā́viśat

Line : 13  Pada: ar     tád vā́ etád anvā́rabʰate

Pada: as     yátʰā vā́ idáṃ nā́vaṃ pāráṃ tariṣyànn āróhaty evám̐ vā́ etád r̥ksāmé ā́rukṣat

Line : 14  Pada: at     té enam ā́ yajñásyodŕ̥caḥ sáṃpārayatas \

Pada: au     yáto vaí lómāni kr̥ṣṇājinásya táto yajñás \

Line : 15  Pada: av     yáto yajñás táto devátās \

Pada: aw     yád bahírlomaṃ paryū́rṇuvītāntárhito dīkṣitó yajñā́t syāt \

Line : 16  Pada: ax     yád antárlomam

Pada: ay     antárhito yajñó devátābʰyas \

Line : 17  Pada: az     dvé víṣūcī pratimúcye

Pada: ba     ánantarhito dīkṣitó yajñā́d bʰavati \

Pada: bb     ánantarhito yajñó devátābʰyas \

Line : 18  Pada: bc     yády ékam̐ syā́d ántaṃ prátibʰujet

Pada: bd     ténaivá tád ubʰáyam āpnoti

Line : 19  Pada: be     havír vaí dīkṣitás \

Pada: bf     yád anyátra kṣr̥ṇājinā́d āsīta yátʰā havíḥ skannám evám̐ syā́d yátʰā havíṣe skannā́ya prā́yaścittim icʰáty evám asmai prā́yaścittim icʰeyus \

Line : 21  Pada: bg     cʰándām̐si ca vā́ eṣá devátāś cābʰyā́rohati

Pada: bh     tā́ny enam īśvarā́ṇi pratinúdas \

Page: 68  
Line : 1  Pada: bi     yád ā́ha

Pada: bj     námas te astu

Pada: bk     mā́ mā him̐sīr íti

Pada: bl     namaskāró vā́ eṣás \

Line : 2  Pada: bm     ápratinodāya

Pada: bn     devátā vaí yajñásya śárma yajñó yájamānasya

Line : 3  Pada: bo     yád ā́ha

Pada: bp     víṣṇoḥ śármāsi

Pada: bq     śárma me yacʰéti

Pada: br     devátā vā́ etád yajñásya śármā́kar yajñám̐ yájamānasya

Line : 4  Pada: bs     prórṇute

Pada: bt     prā́vr̥ta iva hí dīkṣitás \

Pada: bu     átʰo etád iva hí dīkṣitásya rūpám̐ yát prā́vr̥tam \

Line : 5  Pada: bv     tásmāt prórṇute

Pada: bw     vā́saḥ páridʰatte

Pada: bx     sarvadevatyàm̐ vaí vā́saḥ

Line : 6  Pada: by     sárvābʰir vā́ etád devátābʰir ātmā́naṃ páriśrayanti //


Anuvaka: 7  
Line : 7  Pada: a     yajñásya vaí sr̥ṣṭásyólbam ánvalambata

Pada: b     tád vā́saḥ kṣaúmam abʰavat

Pada: c     tásmāt kṣaúmeṇa dīkṣayanti

Line : 8  Pada: d     yajñásya sayonitvā́ya

Pada: e     prācī́namātrā pátnī dīkṣáyanti \

Line : 9  Pada: f     índrasya vaí prācī́namātrā \

Pada: g     indriyám̐ striyā́ḥ prajā́

Pada: h     yát prācī́namātrā pátnī dīkṣáyanti \

Line : 10  Pada: i     indriyám asyāṃ dadʰāti

Pada: j     yónir vaí dīkṣitásya dīkṣitavimitám \

Line : 11  Pada: k     jarā́yu kr̥ṣṇājinám

Pada: l     úlbaṃ dīkṣitavāsás \

Pada: m     nā́bʰir mékʰalā

Pada: n     gárbʰo dīkṣitáḥ

Line : 12  Pada: o     svám̐ vā́ etád yóniṃ dīkṣitá ā́śaye *
      FN emended. Ed.: ā́śayet

Pada: p     tásmād dīkṣiténa dīkṣitavimitā́n nā́nr̥túbʰiḥ krámyam

Line : 13  Pada: q     eṣá hy ètásya yónis \

Pada: r     áto hy èṣó 'dʰi prajā́yate gárbʰo dīkṣitás \

Line : 14  Pada: s     yád r̥tá āviḥkurvītá datvánto gárbʰā jāyeran

Pada: t     yád anr̥tú smáyeta téjo 'sya parāpā́tukam̐ syāt

Line : 15  Pada: u     tásmān nā́nr̥tú smetavyàm \

Pada: v     téjasó 'parāpātāya \

Line : 16  Pada: w     ájāto vaí púruṣaḥ

Pada: x     sá vaí yajñénaivá jāyate

Pada: y     sá vaí tárhy evá jāyate yárhy adáḥ sóme krīté prorṇutā́

Line : 17  Pada: z     itó 'gre prorṇuté \

Pada: aa     átʰo hy ágre púruṣo jā́yate

Line : 18  Pada: ab     sá vaí tárhy evá sárvo jāyate yárhy adó 'pò 'vabʰr̥tʰám abʰyavaíti

Page: 69  
Line : 1  Pada: ac     tárhi sá tásmāt sárvo nírmucyate

Pada: ad     trivŕ̥tā vaí stómena prajā́patiḥ prajā́ asr̥jata

Line : 2  Pada: ae     yát trivŕ̥n mékʰalā bʰávati

Pada: af     prajánanāya

Pada: ag     trivŕ̥d vaí vájra udáram̐ vr̥tráḥ pāpmā́ kṣúd bʰrā́tr̥vyaḥ púruṣasya

Line : 3  Pada: ah     yán mékʰalāṃ paryásyate

Pada: ai     vájram evá sapátnāya bʰrā́tr̥vyāya práharati

Line : 4  Pada: aj     yáṃ dviṣyā́t táṃ tárhi mánasā dʰyāyet \

Pada: ak     vájram evā́smai práharati

Line : 5  Pada: al     str̥ṇutá evá \

Pada: am     áṅgiraso vaí svaryánto yátra mékʰalāḥ saṃnyā́syam̐s tátaḥ śarò 'jāyata

Line : 6  Pada: an     tásmāñ śaramáyī \

Pada: ao     ū́rg vā́ óṣadʰayas \

Pada: ap     ū́rjam̐ vā́ etán madʰyatá ātmáno dʰatte prajā́nāṃ ca

Line : 7  Pada: aq     yóktreṇa pátnī sáṃnahyate

Pada: ar     mékʰalayā dīkṣitás \

Line : 8  Pada: as     átʰo mitʰunatvā́ya \

Pada: at     ūrdʰvám̐ vaí púruṣasya nā́bʰer médʰyam

Pada: au     avācī́nam amedʰyám \

Pada: av     yán mékʰalāṃ paryásyate

Line : 9  Pada: aw     médʰyasya cāmedʰyásya ca vídʰr̥tyai

Pada: ax     devátābʰyo vā́ eṣá médʰāyātmā́nam ā́labʰate yó dī́kṣate

Line : 10  Pada: ay     badʰnītá iva vā́ etád ātmā́nam̐ yán mékʰalāṃ paryásyate

Line : 11  Pada: az     tásmād vā́ etásyā́nnam annā́dyam

Pada: ba     ā́rta iva hy èṣá baddʰás

Line : 12  Pada: bb     tásmād u baddʰásyā́nnam annā́dyam \

Pada: bc     yátʰā vā́ ihá garagī́r evám̐ vā́ eṣò 'múṣmiṃl loké yó dīkṣitásyā́nnam átti

Line : 13  Pada: bd     yajñéna tv èvā́sya tátā únmuktis \

Pada: be     havír vaí dīkṣitás \

Line : 14  Pada: bf     yád asya juhuyā́t tám evá juhuyāt

Pada: bg     pramā́yukaḥ syāt

Pada: bh     sárvābʰyo vā́ eṣá devátābʰyā ā́pyāyate yó dī́kṣate

Line : 15  Pada: bi     yád asya juhuyā́d yajñám asya víduhyāt \

Line : 16  Pada: bj     úpadʰīto 'sya yajñáḥ syāt

Pada: bk     tám̐ vā́ etád ā́gate kālé sárvam̐ sám̐spʰītam̐ yajñáṃ devátābʰyo duhet

Line : 17  Pada: bl     tredʰā́ vā́ etásya pāpmā́nam̐ víbʰajante yó dī́kṣate

Line : 18  Pada: bm     yò 'syā́nnam átti sá tŕ̥tīyam \

Pada: bn     yò 'syāślīláṃ kīrtáyati sá tr̥tīyam \

Line : 19  Pada: bo     yā́ enaṃ pipī́likā dáśanti tā́s tŕ̥tīyam \

Pada: bp     tásmād vā́ etásyā́nnam annā́dyam \

Page: 70  
Line : 1  Pada: bq     tásmād asyāślīláṃ ná kīrtayitavyàm \

Pada: br     tásmād dīkṣitavāsò 'bʰartavyám

Line : 2  Pada: bs     átra hí tā́ḥ pipī́likā yā́ enaṃ dáśanti //


Anuvaka: 8  
Line : 3  Pada: a     dákṣiṇā vaí devéṣv āsīt \

Pada: b     yajñó 'sureṣu

Pada: c     tā́ṃ dákṣiṇām̐ yajñò 'bʰyàkāmayata

Line : 4  Pada: d     tā́m abʰiparyā́vartata

Pada: e     tā́m̐ sámabʰavat

Pada: f     sá índro 'vet \

Pada: g     yó vā́ asmā́d yóneḥ sáṃbʰaviṣyáti sá idáṃ bʰaviṣyatī́ti

Line : 5  Pada: h     tā́m índraḥ prā́viśat

Pada: i     tátā índraḥ sámabʰavat

Line : 6  Pada: j     tátā índro 'jāyata

Pada: k     sá jā́yamāno 'vet \

Pada: l     yó vā́ asmā́d yóner anyó mát saṃbʰaviṣyáti mādŕ̥k sáṃbʰaviṣyatī́ti

Line : 7  Pada: m     táyā sahópaveṣṭáyann ajāyata

Pada: n     yán nyáveṣṭayat tásmān níveṣṭitā

Line : 8  Pada: o     yán niveṣṭyámānā śyāvā́bʰavat tásmāt kr̥ṣṇā́ \

Line : 9  Pada: p     índraṃ ca vā́ eṣá prépsati dákṣiṇāṃ ca \

Pada: q     índrasya ca kʰálu vā́ etád yónim ā́labdʰa dákṣiṇāyāś cātmā́nam

Line : 10  Pada: r     átʰo sáyonim evá yajñám ā́labʰate

Pada: s     kr̥ṣím̐ susasyā́m útkr̥ṣā íti viṣā́ṇayā bʰū́myām úpahanti

Line : 11  Pada: t     kr̥ṣím evā́sya sasyéna sámardʰayati

Line : 12  Pada: u     yájuṣā kaṇḍūyate

Pada: v     yájuṣā hí manuṣyā̀ḥ kaṇḍūyánte

Pada: w     vyā́vr̥ttyai

Line : 13  Pada: x     yájuṣā kaṇḍūyate

Pada: y     tásmād prajā́ ápāmaṃbʰaviṣṇavaḥ

Pada: z     pāmaṃbʰaviṣṇávaḥ prajā́ḥ syur yád ayajúṣā kaṇḍūyéta

Line : 14  Pada: aa     supippalā́ óṣadʰīs kr̥dʰī́ti śíraḥ kaṇḍūyate \

Line : 15  Pada: ab     óṣadʰīr evá pʰálaṃ grāhayati

Pada: ac     tásmād óṣadʰayaḥ śīrṣán pʰálaṃ gr̥hṇanti

Pada: ad     vā́g vaí sr̥ṣṭā́ caturdʰā́ vyàbʰavat

Line : 16  Pada: ae     táto yā́ atyáricyata sā́ vánaspátīn prā́viśat

Pada: af     saíṣā́ yā́kṣe yā́ dundubʰaú yā́ tū́ṇave yā́ vī́ṇāyām \

Line : 17  Pada: ag     daṇḍáṃ práyacʰati

Pada: ah     tā́m evā́smai vā́caṃ práyacʰati \

Line : 18  Pada: ai     átʰo vájram evā́smai práyacʰati

Pada: aj     gopītʰā́ya \

Pada: ak     āsyadagʰnáṃ práyacʰati \

Pada: al     etā́vatī hī̀yám̐ vā́g vádati \

Page: 71  
Line : 1  Pada: am     átʰo etā́vatī hí vācā́ vīryàṃ kriyate

Pada: an     yád várṣīyām̐saṃ prayácʰet svā́m̐ vā́caṃ maitrāvaruṇó víbʰajet

Line : 2  Pada: ao     tám̐ śvaḥsutyā́yāṃ maitrāvaruṇā́ya práyacʰati

Line : 3  Pada: ap     tā́m̐ śvo bʰūté maitrāvaruṇá r̥tvígbʰyo víbʰajati //

Line : 4  Pada: aq     hótar yája pótar yája néṣṭar yája // íti

Pada: ar     sā́ sahá vaṣaṭkāréṇāhavanī́yaṃ gacʰati

Line : 5  Pada: as     tā́ṃ purò 'dʰvaryúr víbʰajati //

Pada: at     hótar yája pótar yája néṣṭár yája // íti \

Pada: au     adʰvaryúḥ púro vā́cam̐ víbʰajati

Line : 6  Pada: av     maitrāvaruṇáḥ paścā́t //

Pada: aw     svā́hā yajñáṃ mánasā // íti *
      FN This saṃdʰi comes from mánasas and íti. cf. 1.2.2:11.13

Line : 7  Pada: ax     mánasā yajñám abʰígacʰanti

Pada: ay     táta evá yajñám ā́labdʰa

Pada: az     svā́hā diváḥ svā́hā pr̥tʰivyā́ḥ íti

Line : 8  Pada: ba     dyā́vāpr̥tʰivī́ vā́ ánv antárikṣam̐ yajñá úpaśritas

Line : 9  Pada: bb     táta evá yajñám ā́labdʰa

Pada: bc     svā́horór antárikṣād íti \

Pada: bd     antárikṣam̐ vaí yajñás \

Line : 10  Pada: be     yádi vā́to yádi vā paśávas táta evá yajñám ā́labdʰa

Pada: bf     svā́hā vā́tāt párigr̥hṇāmi svā́héti \

Line : 11  Pada: bg     ayám̐ vā́vá yáḥ pávata eṣá yajñás tám evā́labdʰa

Pada: bh     vā́cam̐ yacʰati

Line : 12  Pada: bi     yajñám̐ vā́ etád yacʰati

Pada: bj     yád vā́cam̐ visr̥jéd yajñám̐ vísr̥jet

Pada: bk     tád āhuḥ

Line : 13  Pada: bl     púnar dīkṣayitvā́ vā́g yantavyéti

Pada: bm     yát púnar dīkṣáyed ā́hutīr átirecayet \

Pada: bn     vaiṣṇavī́m anū́cya vā́g yantavyā̀

Line : 14  Pada: bo     víṣṇur vaí yajñás \

Pada: bp     yajñám evā́labdʰa \

Pada: bq     āgnāvaiṣṇavī́m anū́cya vā́g yantavyā̀ \

Line : 15  Pada: br     agnír vaí sárvā devátās \

Pada: bs     víṣṇur yajñás \

Pada: bt     devátāś caivá yajñáṃ cā́labdʰa

Line : 16  Pada: bu     sā́rasvatīm anū́cya vā́g yantavyā̀

Pada: bv     vā́g vaí sárasvatī

Pada: bw     vācā́ yajñáḥ sáṃtatas \

Line : 17  Pada: bx     vācaívá yajñám̐ sáṃtanoti

Pada: by     bārhaspatyā́m anū́cya vā́g yantavyā̀

Pada: bz     bráhma vaí bŕ̥haspátis \

Line : 18  Pada: ca     bráhmaṇā yajñáḥ sám̐hitas \

Pada: cb     bráhmaṇaivá yajñám̐ sáṃdadʰāti //


Anuvaka: 9  
Page: 72  
Line : 1  Pada: a     dīkṣitò 'yám asā́ āmuṣyāyaṇáḥ // íti \

Pada: b     údvadati vā́ āha

Pada: c     priyó vaí devā́nāṃ dīkṣitás \

Line : 2  Pada: d     devébʰya evaínaṃ prā́ha

Pada: e     trír āha

Pada: f     tríṣatyā hí devā́s \

Line : 3  Pada: g     átʰo tráyo vā́ imé lokā́s \

Pada: h     ebʰyá evaínaṃ lokébʰyā ā́vedayati

Pada: i     tásmād dīkṣitáṃ dūrā́ñ śr̥ṇvanti \

Line : 4  Pada: j     ebʰyó hy ènaṃ lokébʰyā ā́vedayati

Pada: k     nákṣatraṃ dr̥ṣṭvā́ vā́cam̐ vísr̥jate

Line : 5  Pada: l     dvaú vā́ r̥tū́

Pada: m     áhaś ca rā́triś ca \

Pada: n     anyám evá r̥túm̐ saṃprā́pya vā́cam̐ vísr̥jate

Line : 6  Pada: o     vratáṃ caratéti vā́cam̐ vísr̥jate

Pada: p     vratám̐ hy ètásya

Pada: q     vraténa yajñáḥ sáṃtatas \

Line : 7  Pada: r     vraténaivá yajñám̐ sáṃtanoti

Pada: s     daívīṃ dʰíyaṃ manāmahā íti yájuṣā hástā ávanenikte

Line : 8  Pada: t     yájuṣā hí manuṣyā̀ avanénijate

Pada: u     vyā́vr̥ttyai bráhmaṇaḥ sadevatvā́ya \

Line : 9  Pada: v     átʰo ā́po me dīkṣā́ṃ nét prámuṣṇān íti \

Pada: w     ánnam̐ vaí manuṣyèbʰyā údabībʰatsata

Line : 10  Pada: x     tád evā́ manuṣyèṣv adidʰīrṣan \

Pada: y     tád ā́po 'bruvan

Pada: z     vayám̐ va etā́m̐ śúndʰāma \

Line : 11  Pada: aa     átʰopā́vartasvéti

Pada: ab     tátó 'nnaṃ manuṣyā̀n upā́vartanta

Pada: ac     tá idám ánnaṃ manuṣyèṣu dʰr̥tám \

Line : 12  Pada: ad     tásmād brāhmaṇá āhāryā̀s \

Pada: ae     ā́hr̥te hástā ávanenijīta \

Line : 13  Pada: af     annā́dyasyā́varuddʰyai \

Pada: ag     átʰo ánnāya vā́ etád ātmā́naṃ pāvayate

Line : 14  Pada: ah     yé devā́ mánujātā manoyújā íti vratám̐ vratayati \

Pada: ai     eté vaí devā́ mánujātā manoyújo yád imé prāṇā́s \

Line : 15  Pada: aj     eṣā́ vā́ asminn etárhi devátā

Pada: ak     tā́ṃ prīṇāti

Line : 16  Pada: al     tásyām̐ hutám̐ vratayati

Pada: am     yád éto 'nyátʰā vratáyet prāṇaír enam̐ vyàrdʰayet pramā́yukaḥ syāt

Line : 17  Pada: an     tvám agne vratapā́ asī́ti vadet svapsyánt suptvā́ vā prabúdʰya yádi vā dīkṣitavādám̐ vádet \

Line : 18  Pada: ao     agnír vaí devā́nām̐ vratápatis

Pada: ap     tásmād evā́dʰi vratám ā́labʰate

Line : 19  Pada: aq     nóttānáḥ śayīta

Pada: ar     yád uttānáḥ śayītemé lokā́ yayeyus \

Pada: as     nā́gnér ádʰi párāṅ paryā́varteta

Page: 73  
Line : 1  Pada: at     yát paryāvárteta yajñā́t paryāvárteta

Pada: au     nā́nyátradīkṣitaṃ dīkṣitavimitā́nt sū́ryo 'bʰinimrócen nā́bʰyúdiyāt \

Line : 2  Pada: av     dīkṣitavratám evá tát \

Pada: aw     yajñó vaí devā́nāṃ ná sámabʰavat

Line : 3  Pada: ax     táṃ bʰr̥tyā́ sámabʰāvayan

Pada: ay     yád bʰr̥tím̐ vanuté

Pada: az     yajñásya sáṃbʰūtyai

Pada: ba     rā́svéyat sométi yád brūyā́d etā́vad asya syā́n ná bʰū́yas \

Line : 4  Pada: bb     yád ā́ha \

Pada: bc     ā́ bʰū́yo bʰaréti \

Pada: bd     áparimitasyā́varuddʰyai

Line : 5  Pada: be     deváḥ savitā́ vásor vasudā́véti

Pada: bf     savitŕ̥prasūta evaítā́bʰir devátābʰir úpa prátigr̥hṇāti \

Line : 6  Pada: bg     ātmánó 'him̐sāyai

Pada: bh     vāyúr gopā́s tváṣṭā́dʰipatiḥ pūṣā́ pratigrahītéti

Line : 7  Pada: bi     vāyúm evā́sāṃ góptāram ákas tváṣṭāram ádʰipatiṃ pūṣáṇaṃ pratigrahītā́ram

Line : 8  Pada: bj     ā́po vaí yajñás \

Pada: bk     yád apó dīkṣitò 'vagā́heta yajñám ávakr̥śnīyāt \

Pada: bl     yád ā́ha

Line : 9  Pada: bm     dévīr āpo apāṃ napād íti

Pada: bn     yád evā́sām̐ yajñíyaṃ médʰyaṃ tán nā́krāmati

Line : 10  Pada: bo     yád apó dīkṣitò 'vagā́heta vihradínīḥ syus

Pada: bp     tásmān nā́vagāheta

Pada: bq     yády avagā́heta loṣṭám̐ vimr̥ṇám̐s taret

Line : 11  Pada: br     tám evá sétum anusáṃtarati

Pada: bs     ná vaí dīkṣitáṃ tárantaṃ devátā ánutaranti \

Line : 12  Pada: bt     aráṇibʰyām̐ sahá tarati

Pada: bu     sahaívá devátābʰis tarati

Pada: bv     ná vaí dīkṣitáṃ tárantam̐ yajñó 'nutarati

Line : 13  Pada: bw     ratʰāṅgéna sahá tarati

Pada: bx     sahaívá yajñéna tarati //


Anuvaka: 10  
Line : 15  Pada: a     amúm̐ vā́ ādityám̐ sárvā vā́co gacʰanti

Pada: b     tā́ udyatí sárvāḥ sr̥jyante

Line : 16  Pada: c     yád ā́ha

Pada: d     yā́ḥ paśūnā́m r̥ṣabʰé vā́cā íti

Pada: e     sr̥jyámānām̐ vā́ etád vā́caṃ púnar ā́labʰate

Line : 17  Pada: f     vāyáve tvéti naṣṭā́m ánudiśati

Pada: g     váruṇāya tvéty apsú magnā́m \

Page: 74  
Line : 1  Pada: h     rudrā́ya tvéti mahādevā́hatām \

Pada: i     nírr̥tyai tvéty ávasannām

Pada: j     índrāya tvéti vleṣkáhatām̐ yā́ vā sam̐śīyéta *
      FN Correcturen und Conjecturen zu dem ganzen Werk.

Line : 2  Pada: k     marúdbʰyas tvéti hrādúnihatām

Pada: l     eté vaí devā́ bʰr̥tyā́ skannábʰāgās

Line : 3  Pada: m     tā́n evá prīṇāti

Pada: n     devébʰyo vā́ anyā́ dákṣiṇā dīyánte manuṣyèbʰyo 'nyā́s \

Line : 4  Pada: o     etā́ vaí devébʰyaḥ pratyákṣaṃ dákṣiṇā dīyánta etā́bʰir vaí bʰū́yó 'varunddʰe

Line : 5  Pada: p     yád u cétarābʰir devā́ś ca vā́ ásurāś cāspardʰanta \

Line : 6  Pada: q     etā́vān vaí tárhi yajñá āsīd agnihotráṃ darśapaurṇamāsaú cāturmāsyā́ni

Line : 7  Pada: r     té devā́ yajñám apaśyan \

Pada: s     ténādīkṣanta

Pada: t     téṣām̐ yád agnihotrám ā́sīt tád vratám úpāyan \

Line : 8  Pada: u     tásmād vívratena bʰavitavyàm \

Pada: v     dvír hy àgnihotrám̐ hūyáte

Pada: w     yád agnīṣomī́yaṃ pūrṇámāse havír ā́sīt tám agnīṣomī́yaṃ pūrvedyúḥ paśúm ā́labʰanta

Line : 10  Pada: x     yád aindrāgnám amāvāsyā̀yāṃ tám āgneyám̐ śvó bʰūté paśúm ā́labʰanta

Pada: y     vaiśvadeváṃ prātaḥsavanám akurvata

Line : 11  Pada: z     varuṇapragʰāsā́n mā́dʰyaṃdinam̐ sávanam \

Pada: aa     sākamedʰā́n pitr̥yajñám \

Line : 12  Pada: ab     tryàmbakās tát tr̥tīyasavanám \

Pada: ac     tásmāt tr̥tīyasavané víśvam̐ rūpám̐ śasyate

Line : 13  Pada: ad     víśvam̐ hy ètád rūpám \

Pada: ae     tám eṣām̐ yajñám ásurā ṇā́nvávāyan \

Pada: af     téna vā́ enān ápānudanta

Line : 14  Pada: ag     táto devā́ ábʰavan

Pada: ah     párā́surās

Pada: ai     tád yá evám̐ véda bʰávaty ātmánā

Line : 15  Pada: aj     párāsya bʰrā́tr̥vyo bʰavati

Pada: ak     té 'dʰvr̥to 'yám abʰūd íty ápākrāman \

Pada: al     tád adʰvarásyādʰvaratvám \

Line : 16  Pada: am     tásmād ékavratena bʰavitavyàm \

Pada: an     sakŕ̥d dʰy àgnihotrám̐ hūyáte //

Line : 17  Pada: ao     iti tr̥tīyakāṇḍa āgnāvaiṣṇavaṃ nāma ṣaṣṭʰaḥ prapāṭʰakaḥ //


Next part


This text is part of the TITUS edition of Black Yajur-Veda: Maitrayani-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.