TITUS
Black Yajur-Veda: Maitrayani-Samhita
Part No. 44
Previous part

Prapathaka: 4  
Anuvaka: 1  
Line : 3  Pada: a     pratīpám anyá ūrmír yúdʰyaty anvī́pam anyó mitʰunatvā́ya

Pada: b     yát tásya gr̥hṇā́ti yáḥ pratīpám̐ yúdʰyati \

Line : 4  Pada: c     ójasā vā́ eṣá vīryèṇa pratīpám̐ yudʰyati \

Pada: d     ójasā vā́ etád vīryèṇa rāṣṭrá ójo vīryàṃ dadʰāti \

Line : 5  Pada: e     átʰa yát tásya gr̥hṇā́ti yò 'nvīpám īráyati

Line : 6  Pada: f     māhiṣáṃ téna tokáṃ prájanayati \

Pada: g     átʰa yán nadīpatér

Pada: h     apā́m̐ vā́ etán mitʰunám

Line : 7  Pada: i     apā́m̐ vā́ etán mitʰunéna rāṣṭré mitʰunáṃ dadʰāti \

Pada: j     átʰa yád áprahāvarīṇām \

Pada: k     madʰyameṣṭʰéyaṃ ténāvarunddʰe \

Line : 8  Pada: l     átʰa yát parivāhíṇīnām \

Pada: m     pārevasyantyā́s téna tokáṃ prájanayati \

Line : 9  Pada: n     átʰa yā́ ā́po 'ñśérā ójasā vā́ etā́ vīryèṇā́po 'ñśérās \

Line : 10  Pada: o     ójasā vā́ etád vīryèṇa rāṣṭrá ójo vīryàṃ dadʰāti \

Pada: p     átʰa yát kū́pyānām

Line : 11  Pada: q     ubʰáyīs ténāpó 'varunddʰe

Pada: r     yā́ś ca samudríyā yā́ś cā́samudriyā īśvarā́ vā́ etám etā́ srotasyā̀ ā́pó 'śāntā nirmŕ̥jas \

Line : 12  Pada: s     yát stʰāvarā́ṇāṃ gr̥hṇā́ti

Line : 13  Pada: t     śā́ntyā ánirmārgāya

Pada: u     yā́ ātápati várṣati yā́ś ca paridádr̥śre tā́ ā́po brahmavarcasyā̀s

Line : 14  Pada: v     tā́bʰī rāṣṭré brahmavarcasaṃ dadʰāti \

Pada: w     átʰa yád dʰrādúnīnām \

Page: 51  
Line : 1  Pada: x     viśás téna vīryàm ávarunddʰe \

Pada: y     átʰa yát púṣpāṇām

Pada: z     āraṇyáṃ téna \

Pada: aa     átʰa yád úlbyānām \

Line : 2  Pada: ab     vájro vaí paśávas \

Pada: ac     vájrā úlbyās \

Pada: ad     vájreṇa vā́ etád rāṣṭré vájraṃ dadʰāti \

Line : 3  Pada: ae     átʰa yát páyasaḥ

Pada: af     páyasā vā́ etád rāṣṭré páyo dadʰāti \

Pada: ag     átʰa yád gʰr̥tásya \

Pada: ah     etā́ vā́ ā́po 'nādʰr̥ṣyā́s

Line : 4  Pada: ai     tā́bʰī rāṣṭrám anādʰr̥ṣyáṃ karoti \

Pada: aj     átʰa yán mádʰos \

Pada: ak     apā́m̐ vā́ eṣá óṣadʰīnām̐ rásas \

Line : 5  Pada: al     apā́m̐ vā́ etád óṣadʰīnām̐ rásena rāṣṭré rásaṃ dadʰāti

Line : 6  Pada: am     ṣóḍaśa vā́ eté gráhāḥ prājāpatyā́ḥ

Pada: an     samā́nītaḥ saptadaśáḥ

Pada: ao     prajā́patiḥ saptadaśáḥ

Line : 7  Pada: ap     prajā́patim evā́pnoti //


Anuvaka: 2  
Line : 8  Pada: a     dévīr āpo mádʰumatīḥ sám̐sr̥jyadʰvaṃ máhi kṣatráṃ kṣatríyāya vanvānā́ íti \

Line : 9  Pada: b     etā́ hí kṣatrásya vantrī́s \

Pada: c     ánādʰr̥ṣṭāḥ sīdatórjasvatīr máhi várcaḥ kṣatríyāya dádʰatīr íti \

Line : 10  Pada: d     etā́ hí kṣatrásya dʰātrī́s \

Pada: e     ánibʰr̥ṣṭam asī́ti \

Pada: f     ánibʰr̥ṣṭam̐ hy èvá rāṣṭrám akas

Line : 11  Pada: g     tapojā́ íti \

Pada: h     tapojā́ hí rāṣṭrám \

Pada: i     sómasya dātrám íti

Pada: j     sómasya hy ètad dātrám \

Line : 12  Pada: k     śukrā́ * vaḥ śukréṇa punāmi candrā́ váś candréṇa punāmī́ti \
      FN emended. Ed.: śrukrā́. cf.2.6.8:68.12

Pada: l     ā́yur vaí híraṇyam

Line : 13  Pada: m     āyuṣyā̀ evaínā akar

Pada: n     várco vaí híraṇyam \

Pada: o     varcasyā̀ evaínā akar

Line : 14  Pada: p     devó vaḥ savitā́ punātv ácʰidreṇa pavítreṇeti \

Pada: q     etád vā́ ácʰidraṃ pavítram̐ yát sū́ryasa raśmáyas \

Line : 15  Pada: r     ácʰidreṇaivaínāḥ pavítreṇa punāti

Pada: s     svā́hā rājasū́yā íti \

Pada: t     rājasū́yā hy ètā́ḥ

Line : 16  Pada: u     sadʰamā́do dyumnyā̀ ū́rjā ékā íti vyā́nayati vāruṇyā́

Line : 17  Pada: v     vāruṇī́r hy ā́paḥ

Pada: w     sváyaivá devátayā

Pada: x     rúdra yát te giripáraṃ nā́méti

Pada: y     rudrám evā́smāt téna nirávadayate

Line : 18  Pada: z     tásmin hutám asi

Pada: aa     yaméṣṭam asi svā́héti *
      FN emended. Ed.: svā́hési.

Pada: ab     mr̥tyúr vaí yamás \

Line : 19  Pada: ac     mr̥tyúm evā́smāt téna nirávadayate

Pada: ad     sómā índro váruṇo mitró agnís té devā́ dʰarmadʰŕ̥to dʰármaṃ dʰārayantv íti \

Page: 52  
Line : 1  Pada: ae     eté vaí devā́ dʰarmadʰŕ̥to yád imé prāṇā́s \

Line : 2  Pada: af     yád enam etébʰyó 'procyābʰiṣiñceyur aparódʰukā enam̐ syus \

Pada: ag     átʰa yád enam etébʰyaḥ prócyābʰiṣiñcánti tátʰā hainam ánaparodʰukā bʰavanti

Line : 3  Pada: ah     parṇásya vā́ ágré 'nte bráhma sámavadanta

Line : 4  Pada: ai     tád vā́vá suśrávā yát tád áśr̥ṇot

Pada: aj     parṇamáyenābʰíṣiñcati

Line : 5  Pada: ak     brahmā́bʰíṣiñcati

Pada: al     brahmavarcasénaivaínam abʰíṣiñcati \

Pada: am     átʰo bráhma vaí brahmā́

Line : 6  Pada: an     bráhmaṇaivaínaṃ brahmā́bʰíṣiñcati \

Pada: ao     ā́śvattʰena vaíśyas \

Pada: ap     viśó vīryàm ápākrāmat

Line : 7  Pada: aq     tád aśvattʰáṃ prā́viśat

Pada: ar     sá téna vīryèṇa bʰarbʰarā́bʰavat

Pada: as     tád viśá evaíténa vīryàm ávarunddʰe \

Line : 8  Pada: at     aúdumbareṇa bʰrā́tr̥vyas \

Pada: au     ū́rg vā́ udumbárās \

Pada: av     ū́rjam̐ vā́ etád annā́dyam̐ yájamāno bʰrā́tr̥vyasya vr̥ṅkte

Line : 9  Pada: aw     yó jányo mitrám̐ sá naíyagrodʰena

Pada: ax     mitréṇa vaí kṣatrám̐ vyávatatam

Line : 10  Pada: ay     avarodʰaír nyagródʰas \

Pada: az     mitréṇa vā́ etát kṣatrám̐ vyávatanoti

Line : 11  Pada: ba     draḍʰimné 'śitʰiratvāya //


Anuvaka: 3  
Line : 12  Pada: a     kṣatrásya yónir asi

Pada: b     kṣatrásyólbam asi

Pada: c     kṣatrásya nā́bʰir asi \ íti \

Pada: d     índro vaí yád ájāyata tásya vā́ eṣá yónir āsīd yát tārpyám

Line : 13  Pada: e     úlbaṃ pāṇḍarám \

Pada: f     nā́bʰir uṣṇī́ṣaḥ

Line : 14  Pada: g     sūtávaśāyā ádʰyajāyata

Pada: h     sūnā́ cátuḥpady ū́dʰar ā́sīt \

Pada: i     nīvā́rāḥ pīyū́ṣas

Pada: j     tásmān naivāráḥ puroḍā́śaḥ

Line : 15  Pada: k     pañcāśátam anyásminn akṣáṇy ānákty ékapañcāśatam anyásmin

Line : 16  Pada: l     śatā́yur vaí púruṣaḥ śatávīryāḥ \

Pada: m     ā́yur evá vīryàm āpnoti \

Pada: n     apá úpaspr̥śati \

Pada: o     amŕ̥tam̐ vā́ ā́pas \

Line : 17  Pada: p     amŕ̥tenaivaínam̐ sam̐rambʰayati \

Pada: q     ā́vitto agnír gr̥hápatir íti

Pada: r     gā́rhapatyāyaivaínam ā́vedayati \

Line : 18  Pada: s     ā́vittā índro vr̥ddʰáśravā íti \

Pada: t     indriyám̐ vā́ índraḥ \

Pada: u     indriyā́yaivaínam ā́vedayati \

Line : 19  Pada: v     ā́vittau mitrā́váruṇau dʰr̥távratā íti \

Pada: w     ahorātré vaí mitrā́váruṇau \

Page: 53  
Line : 1  Pada: x     ahorātrā́bʰyām evaínam ā́vedayati \

Pada: y     ā́vitte dyā́vāpr̥tʰivī́ r̥tāvŕ̥dʰā íti

Pada: z     dyā́vāpr̥tʰivī́bʰyām evaínam ā́vedayati \

Line : 2  Pada: aa     ā́vittaḥ pūṣā́ viśvávedā íti

Pada: ab     paśávo vaí pūṣā́

Line : 3  Pada: ac     paśúbʰya evaínam ā́vedayati \

Pada: ad     ā́vittā devy áditir íti \

Pada: ae     ādityā́ vā́ imā́ḥ prajā́s

Line : 4  Pada: af     tā́bʰya evaínam ā́vedayati \

Pada: ag     ā́vitto 'yám asā́ āmuṣyāyaṇò 'múṣyāḥ putrò 'múṣyām̐ viśī́ti

Line : 5  Pada: ah     viśá evaínam ā́vedayati

Pada: ai     tásmād vā́ eṣá viśáḥ priyáḥ \

Line : 6  Pada: aj     viśé hy ènam āvedáyati \

Pada: ak     eṣá te janate rā́jéti

Pada: al     janátāyā evaínam ā́vedayati

Line : 7  Pada: am     sómo 'smā́kaṃ brāhmaṇā́nām̐ rā́jéti bráhmóddʰarati

Pada: an     sárvebʰya evaínam anyébʰyo bʰūtébʰya āvedáyati

Line : 8  Pada: ao     bráhmóddʰarati

Pada: ap     tásmād āhus \

Pada: aq     bráhmóddʰr̥tam íti

Line : 9  Pada: ar     bráhma hy ùddʰárati \

Pada: as     índrasya várjo 'si vā́rtragʰnas

Pada: at     tváyāyám̐ vr̥trám̐ vadʰyād íti dʰánuḥ práyaccʰati

Line : 10  Pada: au     vájro vaí dʰánuḥ \

Pada: av     vájro rājanyàḥ \

Pada: aw     vájreṇaivá vájram̐ sámardʰayati

Pada: ax     śatrubā́dʰanāḥ stʰéti bā́ṇavataḥ \

Line : 11  Pada: ay     ánto vaí bā́ṇavantaḥ \

Pada: az     ánto rājanyàḥ \

Pada: ba     ántenaivā́ntam̐ sámardʰayati

Line : 12  Pada: bb     trī́n práyaccʰati

Pada: bc     tisró vaí śarávyā divyā́ pā́rtʰivā samudríyā

Line : 13  Pada: bd     tā́ asmād yoyāva

Pada: be     pātá prā́ñcam \

Pada: bf     pātá pratyáñcam \

Pada: bg     pātá tiryáñcam \

Pada: bh     pātā́nváñcam \

Line : 14  Pada: bi     pātórdʰám \

Pada: bj     digbʰyá enaṃ pātéti

Pada: bk     digbʰyá enaṃ pānti

Pada: bl     mitrò 'sī́tīmám abʰímantrayate

Line : 15  Pada: bm     mitrásya hy ètád rūpám \

Pada: bn     váruṇo 'sī́tīmám \

Pada: bo     váruṇasya hy ètád rūpám̐ * *
      < rūpám
      FN emended. Ed.: rapám̐.

Line : 16  Pada: bp     híraṇyavarṇam uṣáso vyùṣṭā íty údvatā abʰímantrayeta \

Pada: bq     ūrdʰvabāhúṃ * tíṣṭʰantam abʰiṣiñcáti
      FN emended. Ed.: ūrdʰvabāhús. Dharmadhikari, p.485

Line : 17  Pada: br     br̥hát sā́ma bʰavati

Pada: bs     svargám evaínaṃ lokám abʰisáṃtanoti //


Anuvaka: 4  
Line : 19  Pada: a     díśa enam̐ vyā́stʰāpayati

Pada: b     vájreṇa vā́ etád imā́ díśo 'bʰíjayati

Page: 54  
Line : 1  Pada: c     tásmād vā́ etásya sárvā díśo 'bʰíjitā yām̐yām abʰiparyāvártate

Pada: d     díśo vaí svargó lokás \

Line : 2  Pada: e     etaddevatyā̀ vā́ imā́ díśas \

Pada: f     yatʰādevatám̐ vā́ etád ābʰyó digbʰyó 'dʰi svargáṃ lokám eti

Line : 3  Pada: g     sómasya tvíṣir asi tvíṣimat

Pada: h     táveva me tvíṣir bʰūyād íti vyāgʰracarmám̐ víveṣṭayati

Line : 4  Pada: i     sóme vā́ ékā tvíṣis \

Line : 5  Pada: j     vyāgʰrá ékā

Pada: k     sarpá ékā

Pada: l     tā́ evā́varunddʰe

Pada: m     prátyastaṃ námuceḥ śirā íti sī́saṃ páṇḍagāya prátyasyati

Line : 6  Pada: n     pāpmā́ vaí námuceḥ śíraḥ

Pada: o     pāpmā́nam̐ vā́vā́smā etát prátyasyati svargáṃ lokám abʰyāróhan \

Line : 7  Pada: p     áveṣṭā dandaśū́kā íti lohitāyasáṃ keśavāpā́ya

Line : 8  Pada: q     dandaśū́kān evā́smāt téna nirávadayate

Pada: r     tásmād vā́ etásya nā́bʰicārò 'sti

Line : 9  Pada: s     yā́vanto hí mr̥tyávas tā́n asmān niravadáyate

Pada: t     mr̥tyóḥ pāhī́ti rajatám̐ rukmám adʰástād úpohate

Line : 10  Pada: u     mr̥tyór vā́ etád rūpám̐ yád vyāgʰrás \

Line : 11  Pada: v     amŕ̥tam̐ híraṇyam

Pada: w     amŕ̥tenaivá mr̥tyúm antárdʰatte

Pada: x     didiváḥ pāhī́ti háritam̐ rukmám upáriṣṭād ádʰyūhate

Line : 12  Pada: y     divyā́yā evaínam aśányā yoyāva \

Pada: z     iyám̐ vaí rajatā́ \

Line : 13  Pada: aa     asaú háriṇī \

Pada: ab     ābʰyā́m evaínaṃ parigŕ̥hya \

Pada: ac     ā́yur vaí híraṇyam

Pada: ad     āyuṣyā̀ evaínam abʰyátikṣaranti

Line : 14  Pada: ae     várco vaí híraṇyam \

Pada: af     varcasyā̀ evaínam abʰyátikṣaranti

Pada: ag     váruṇasya vā́ abʰiṣicyámānasyā́pa indriyám̐ vīryàṃ níragʰnan

Line : 15  Pada: ah     yád rukmám antardádʰāti \

Pada: ai     indriyásya vīryàsyā́nirgʰātāya

Line : 16  Pada: aj     śatámāno bʰavati śatákṣaraḥ

Pada: ak     śatā́yur vaí púruṣaḥ śatávīryas \

Line : 17  Pada: al     ā́yur evá vīryàm āpnoti //


Anuvaka: 5  
Line : 18  Pada: a     átʰaitā́ni pārtʰā́ni

Pada: b     sam̐vatsaró vaí pārtʰā́ni

Pada: c     sam̐vatsarám̐ vā́ etán madʰyatáḥ práviśati

Line : 19  Pada: d     tásmād vā́ eṣá duḥparāṇódaḥ

Pada: e     sam̐vatsarám̐ hí madʰyatáḥ praviśati


Page: 55  
Line : 1  Pada: f     girī́ vā́ etaú rājasū́yasya

Pada: g     bārhaspatyám anyéṣām uttamáṃ bʰávaty aindrám anyéṣāṃ pratʰamám \

Line : 2  Pada: h     vīryàm̐ vaí bŕ̥haspátis \

Pada: i     vīryàm índras \

Pada: j     vīryà evaínam abʰisaṃdʰatte \

Line : 3  Pada: k     ādityanāmā́ni vā́ etā́ni \

Pada: l     ādityā́ vā́ imā́ḥ prajā́s

Pada: m     tā́bʰya evá sūyate

Line : 4  Pada: n     sómasya tvā dyumnénāgnés téjaséndrasyendriyéṇa víśveṣāṃ tvā devā́nāṃ krátunābʰíṣiñcāmī́ti \

Line : 5  Pada: o     etaír evaínam indriyaír etā́bʰir devátābʰir abʰíṣiñcati \

Pada: p     índrasya yónir asi

Line : 6  Pada: q     janáyéti \

Pada: r     áto vā́ ádʰī́ndro 'jāyata

Pada: s     svā́d evaínam̐ yóner janayati \

Pada: t     áti dyū́n pāhī́ty āha

Line : 7  Pada: u     svargásya lokásya sámaṣṭyai

Pada: v     samā́vavr̥trann adʰarā́g údak tā́ íti samúnmārṣṭi \

Line : 8  Pada: w     indriyám̐ vā́ etád vīryàm abʰiṣicyámānasya vyávaiti

Pada: x     tád evá samúnmārṣṭi

Line : 9  Pada: y     ténainam̐ sámardʰayati \

Pada: z     aindryā́ triṣṭúbʰā brahmā́nveti \

Pada: aa     aindró vaí rājanyàs triṣṭúpcʰandāḥ

Line : 10  Pada: ab     svénaivaínaṃ cʰándasā́nveti \

Pada: ac     átʰo prajā́patir vaí brahmā́ yajñásya

Pada: ad     prajā́pater ádʰī́ndro 'sūyata

Line : 11  Pada: ae     prajā́pater evā́dʰi sūyate \

Pada: af     índrasya vájro 'si vājasánis

Line : 12  Pada: ag     tváyāyám̐ vā́jam̐ sed íti rátʰam upā́vaharati

Pada: ah     sváyaivá devátayā

Pada: ai     mitrā́váruṇayos tvā praśāstróḥ praśíṣā yunajmī́ti yunakti

Line : 13  Pada: aj     sváyaivá devátayā

Line : 14  Pada: ak     víṣṇoḥ krámo 'si sapatnahéti rátʰam abʰyā́tiṣṭʰati \

Pada: al     áto vaí víṣṇur imā́ṃl lokā́n údajayat \

Line : 15  Pada: am     víṣṇor evójjitim ánv imā́ṃl lokā́n újjayati

Pada: an     praíbʰyó lokébʰyo bʰrā́tr̥vyaṃ nudate

Line : 16  Pada: ao     marútāṃ prasavé jayéti

Pada: ap     mārutá evá gaṇó bʰūtvójjayati

Line : 17  Pada: aq     rājanyàṃ jināti \

Pada: ar     ántam evā́kramīt

Pada: as     tád asya ná káścanā́jyeyá úñśiṣyate

Line : 18  Pada: at     tásmai tā́m íṣum asyati

Pada: au     tád asyā́mogʰāyāstám abʰūt \

Pada: av     āptáṃ mánaḥ sám indriyéṇéty uktvā́ vartate \

Line : 19  Pada: aw     ántam evá gatvā́vartate \

Pada: ax     ātmánó 'him̐sāyai \

Pada: ay     eṣá vájro vājasā́tamas téna nau putró vā́jam̐ sed íti pátnyai dʰanvārtíṃ práyacʰati \

Page: 56  
Line : 1  Pada: az     eṣá vaí pátnyā yajñásyānvārambʰáḥ

Pada: ba     sahá svargé loké bʰavataḥ //


Anuvaka: 6  
Line : 3  Pada: a     íyad asi \

Pada: b     ā́yur asi \

Pada: c     ā́yur me dʰehī́ti \

Pada: d     ā́yur evā́smin dadʰāti

Pada: e     yúṅṅ asi

Pada: f     várco 'si

Line : 4  Pada: g     várco me dʰehī́ti

Pada: h     várca evā́smin dadʰāti \

Pada: i     ū́rg asi \

Pada: j     ū́rjaṃ máyi dʰehī́ti \

Pada: k     iyám̐ vaí rajatā́ \

Line : 5  Pada: l     asaú háriṇī \

Pada: m     imé evā́lábʰya \

Pada: n     ū́rg vā́ udumbáras \

Pada: o     ū́rjam̐ vā́ etán madʰyatá ātmáno dʰatte prajā́nāṃ ca

Line : 6  Pada: p     mitrò 'sī́tīmám upā́vaharati

Pada: q     mitrásya hy ètád rūpám \

Line : 7  Pada: r     váruṇo 'sī́tīmám \

Pada: s     váruṇasya hy ètád rūpám \

Pada: t     sád asi

Pada: u     sám ahám̐ víśvair dévaír íti hástā āmíkṣām abʰyávaharati

Line : 8  Pada: v     sád vā́ āmíkṣā

Pada: w     sád evā́bʰyávaharati

Line : 9  Pada: x     tátra té híraṇye dadāti

Pada: y     sā́ dákṣiṇā

Pada: z     hinásti kʰálu vā́ eṣá paśū́n pr̥tʰivī́m abʰyavaróhan

Line : 10  Pada: aa     námo mātré pr̥tʰivyā́ íti vā́rāhī upānáhā abʰyávarohati \

Line : 11  Pada: ab     āraṇyā́n evá paśū́n abʰyávarohati

Pada: ac     varāhás tv èvaítám̐ ságdʰum arhati

Line : 12  Pada: ad     tád varāhá evaínam̐ sagʰnoti

Pada: ae     práti tyán nā́ma rājyám adʰāyi svā́ṃ tanvàm̐ váruṇo 'suṣod íti

Line : 13  Pada: af     varuṇasavó vā́ eṣá

Pada: ag     váruṇāyaivaínaṃ prā́ha

Line : 14  Pada: ah     ní tritó jarimā́ṇaṃ na ānaḍ íti

Pada: ai     jarimā́ṇam evā́smin yunakti

Pada: aj     syonā́si suṣádéti

Line : 15  Pada: ak     syonā́ hy èṣā́ suṣádā

Pada: al     syonā́m ā́sīda

Pada: am     suṣádām ā́sīdéti

Line : 16  Pada: an     suṣádaivaínam̐ sādayati //

Line : 17  Pada: ao     níṣasāda dʰr̥távrato váruṇaḥ pastyā̀sv ā́ /

Line : 18  Pada: ap     sā́mrājyāya sukrátuḥ // íti

Page: 57  
Line : 1  Pada: aq     varuṇasavó vā́ eṣá

Pada: ar     váruṇam evaínam akar

Pada: as     agnáye svā́hā

Pada: at     sómāya svā́hā \

Line : 2  Pada: au     índrasyaújase svā́hā

Pada: av     marútāṃ bálāya svā́héti ratʰavimocanī́yaṃ juhoti

Line : 3  Pada: aw     yájuṣaivá yujyánte yájuṣā vímucyante

Pada: ax     ham̐sáḥ śuciṣád vásur antarikṣasád íti

Line : 4  Pada: ay     rátʰam̐ vā́ etát párivadati

Pada: az     sahá sā́ratʰinā ratʰavā́hane rátʰam ā́dadʰati

Pada: ba     sarvatvā́yaivá prasavā́ya

Line : 5  Pada: bb     bráhmā́3m̐s tváṃ brahmā́sī́ti

Pada: bc     kím abʰūṃ kím abʰūm íti vā́ etád āha

Line : 6  Pada: bd     savitā́si satyásavā íti \

Pada: be     idám asīdám asī́ti vā́vaínam etád āha yádyad bʰávati \

Line : 7  Pada: bf     eṣá vájras téna me radʰyéti spʰyáṃ práyacʰati

Pada: bg     vájro vaí spʰyás \

Pada: bh     vájreṇa vā́ etád rāṣṭrám̐ randʰayate

Line : 8  Pada: bi     tám avarasparáṃ práyacʰati

Pada: bj     ténāvarasparám̐ rāṣṭrám̐ randʰáyamāṇa eti

Line : 9  Pada: bk     tásmād vā́ etá etásmā avarasparám̐ raddʰā́s \

Pada: bl     balím̐ haranti

Pada: bm     téna spʰyénādʰidévanaṃ kurvanti

Line : 10  Pada: bn     tátra paṣṭʰauhī́m̐ vídīvyante \

Pada: bo     āśā́m̐ vā́ eṣá upābʰíṣiñcate \

Line : 11  Pada: bp     āśā́ paṣṭʰauhī́ \

Pada: bq     āśā́m evā́smā akas

Pada: br     tátaś cátuḥśatam akṣā́ṇ avóhyāha //

Line : 12  Pada: bs     údbʰinnam̐ rā́jñaḥ // íti

Pada: bt     catvā́ro vaí púruṣās \

Pada: bu     brāhmaṇó rājanyò vaíśyaḥ śūdras

Line : 13  Pada: bv     téṣām evaínam údbʰedayati

Pada: bw     tátaḥ páñcākṣā́n prayácʰann āha

Line : 14  Pada: bx     díśo abʰyàbʰūd ayám íti \

Pada: by     imā́ evā́smai páñca díśo 'nnā́dyāya práyacʰati

Line : 15  Pada: bz     kṣétraṃ dadāti

Pada: ca     téna kṣétre dʰr̥tó bʰavati

Pada: cb     váram̐ vr̥ṇīte

Pada: cc     sò 'smai kā́maḥ sámr̥dʰyate yátkāmo bʰávati

Line : 16  Pada: cd     maṅgalyànāmno hvayati

Pada: ce     yát pū́rvam̐ vyā́hārṣaṃ tán nén mogʰám asad íti \

Line : 17  Pada: cf     asā́ amúṣya putrò 'múṣyāsaú putrá íti nā́manī vyátiṣajati

Line : 18  Pada: cg     svargásya lokásya sámaṣṭyai //


Anuvaka: 7  
Page: 58  
Line : 1  Pada: a     samānó vā́ eṣá yajñakratúḥ sam̐vatsaráṃ bʰavati

Pada: b     ví vā́ etád daśapéyaś cʰidyate yád avabʰr̥tʰám avayánti

Line : 2  Pada: c     yád apā́ṃ náptre svā́horjó náptre svā́hāgnáye gr̥hápataye svā́héti júhvata āyánti

Line : 3  Pada: d     yajñásya sáṃtatyā ávicʰedāya

Pada: e     yajñó vaí devébʰyas tirò 'bʰavat

Line : 4  Pada: f     táṃ devā́ḥ sam̐sŕ̥psv ánvaicʰan

Pada: g     yát sāvitráḥ

Pada: h     savitŕ̥prasūtā evā́nvaicʰan

Pada: i     yát sārasvatás \

Line : 5  Pada: j     vā́g vaí sárasvatī

Pada: k     vācy èvā́nvaicʰan

Pada: l     yát pauṣṇáḥ

Pada: m     paśávo vaí pūṣā́

Line : 6  Pada: n     paśúṣv evā́nvaicʰan

Pada: o     yád bārhaspatyás \

Pada: p     bráhma vaí bŕ̥haspátis \

Pada: q     bráhmaṇy evā́nvaicʰan

Pada: r     yád aindrás \

Line : 7  Pada: s     indriyám̐ vā́ índras \

Pada: t     indriyá evā́nvaicʰan

Pada: u     yád vāruṇás \

Pada: v     váruṇa evā́nvaicʰan

Pada: w     yát tvāṣṭráḥ

Line : 8  Pada: x     sam̐vatsaró vaí tváṣṭā

Pada: y     sam̐vatsará evā́nvaicʰan

Pada: z     yád āgneyás \

Pada: aa     agnír vaí sárvā devátās \

Line : 9  Pada: ab     devátāsv evā́nvaicʰan

Pada: ac     yát saumyáḥ

Pada: ad     saumī́r vā́ óṣadʰayas \

Pada: ae     óṣadʰīṣv evā́nvaicʰan

Line : 10  Pada: af     yád vaiṣṇavás \

Pada: ag     víṣṇur vaí yajñás \

Pada: ah     yajñá evā́nvaicʰan \

Pada: ai     tám̐ víṣṇā avindan daśamé

Line : 11  Pada: aj     tásmād eṣá daśamás \

Pada: ak     daśamé hy ávindan

Pada: al     dáśa camasā́s \

Pada: am     dáśa camasā́dʰvaryavas \

Line : 12  Pada: an     dáśadaśa camasā́n abʰítā ā́ daśamā́t púruṣād anvā́caṣṭe

Pada: ao     sámr̥ddʰyai

Line : 13  Pada: ap     dáśasamr̥ddʰo hy èṣá yajñás \

Pada: aq     etám̐ vaí té tád yajñám ánvaicʰan \

Pada: ar     tá ārdʰnuvan \

Pada: as     tád yá eténa yájata r̥dʰnóti

Line : 14  Pada: at     saptadaśáḥ sárvo bʰavati

Pada: au     prajā́patir vaí saptadaśáḥ

Line : 15  Pada: av     prajā́patim evā́pnoti \

Pada: aw     utsannayajñó vā́ eṣá

Pada: ax     sam̐vatsarā́d vā́ ádʰy utsannayajñó 'varudʰyate

Line : 16  Pada: ay     sam̐vatsarā́d evaínam ádʰy āptvā́varunddʰe \

Pada: az     índro vaí vr̥trám ahan \

Pada: ba     tásyemé rūpā́ṇy úpaitām \

Line : 17  Pada: bb     citrā́ṇīyám nákṣatrāṇy asaú

Pada: bc     nákṣatrāṇām̐ vā́ avakāśé puṇḍarīkaṃ jāyate

Line : 18  Pada: bd     kṣatrásya vā́ etád rūpáṃ *
      FN emended. Ed.: rapáṃ.

Pada: be     kṣatrásyaivá rūpáṃ prátimuñcate

Pada: bf     dvā́daśapuṇḍarīkā bʰavanti

Line : 19  Pada: bg     dvā́daśa mā́sāḥ sam̐vatsaráḥ

Pada: bh     sam̐vatsarám evā́ptvā́varunddʰe //


Anuvaka: 8  
Page: 59  
Line : 1  Pada: a     rukmó hótus \

Pada: b     āgneyó vaí hótā

Pada: c     ná vā́ etásmai vyùcʰati

Pada: d     vy èvā́smai vāsayati

Line : 2  Pada: e     srág udgātúḥ

Pada: f     sauryó vā́ udgātā́ \

Pada: g     átʰo amúm evā́smā ādityám āptvónnayati

Line : 3  Pada: h     prāvepā́ adʰvaryós \

Pada: i     yamā́ iva hy àdʰvaryúḥ //

Pada: j     áśvaḥ prastotúḥ

Pada: k     prājāpatyó vā́ áśvaḥ

Line : 4  Pada: l     prājāpatyáḥ prastotā́ \

Pada: m     átʰo préva hy èṣá prótʰati

Pada: n     préva prastotā́

Line : 5  Pada: o     dʰenúḥ pratihartúḥ

Pada: p     prátīvā hy èṣā́ hárati

Pada: q     prátīva pratihartā́

Pada: r     vaśā́ maitrāvaruṇásya

Line : 6  Pada: s     váśaṃ mā nayād íti \

Pada: t     r̥ṣabʰó brāhmaṇāñśam̐sínaḥ

Pada: u     sendriyatvā́ya

Pada: v     vā́saḥ pótuḥ

Line : 7  Pada: w     pavitratvā́ya \

Pada: x     anaḍvā́n néṣṭur agnī́dʰo 'nyás \

Pada: y     yúktyā evá

Pada: z     stʰū́ri yavācitám acʰāvākásya

Line : 8  Pada: aa     stʰū́rīr iva hy èṣā́ hótrā svargyā̀ yád acʰāvākyā́ \

Pada: ab     átʰo nirvaruṇatvā́yaivá yávās \

Line : 9  Pada: ac     ná vā́ asyai tárhi sadasyèbʰyo dákṣiṇā dīyante

Pada: ad     tá evā́syai ténābʰī̀ṣṭāḥ prītā́ bʰavanti

Line : 10  Pada: ae     dvā́daśa paṣṭʰauhī́r garbʰíṇīr brahmáṇas \

Line : 11  Pada: af     vā́g vaí dʰenús \

Pada: ag     gárbʰo mántras \

Pada: ah     vācy èvā́sya mántraṃ dadʰāti \

Pada: ai     āmantraṇī́yo ha bʰavati

Line : 12  Pada: aj     dʰenuṃbʰávyā bʰavanti

Pada: ak     dvā́daśa vaí páyām̐si

Pada: al     tā́ny asmin dadʰāti

Pada: am     tásmād vā́ etám āhuḥ

Line : 13  Pada: an     payasvī́ rā́jā púṇyā íti

Pada: ao     yā́vad dʰí páyas tád asmin dʰīyate //


Anuvaka: 9  
Line : 15  Pada: a     śrāyantī́yaṃ brahmasāmáṃ bʰavati \

Pada: b     anuṣṭúpsu yajñāyajñíyaṃ próhanti

Pada: c     vāravantī́yam agniṣṭomasāmam

Line : 16  Pada: d     índro vaí vr̥trám ahan \

Pada: e     sá ójasā vīryèṇa vyā̀rdʰyata

Pada: f     sá etát sā́māpaśyat

Line : 17  Pada: g     ténātmā́nam̐ sámaśrayata \

Pada: h     ójasā vā́ eṣá vīryèṇa vyr̥̀dʰyate yó rājasū́yenābʰiṣiñcáte

Line : 18  Pada: i     tád eténaivā́tmā́nam̐ sám̐śrayate

Pada: j     bráhma vaí yád ágre vyábʰavad ŕ̥k sā́ma yájus

Page: 60  
Line : 1  Pada: k     tásya vā́ eṣá ráso yád yajñāyajñíyam \

Pada: l     yád yajñāyajñíyaṃ gā́yate

Line : 2  Pada: m     bráhmaṇy evá rásaṃ dadʰāti

Pada: n     vācā́ vā́ eṣá vyr̥̀dʰyate yó rājasū́yenābʰiṣiñcáte

Line : 3  Pada: o     vā́g anuṣṭúb

Pada: p     yád anuṣṭúpsu yajñāyajñíyaṃ bʰávati

Pada: q     vācy èvā́sya rásaṃ dadʰāti \

Line : 4  Pada: r     indriyéṇa vā́ eṣá vīryèṇa vyr̥dʰyate yó rājasū́yenābʰiṣiñcáte \

Line : 5  Pada: s     indriyám̐ vīryàm̐ vāravantī́yam \

Pada: t     yád vāravantī́yam agniṣṭomasāmáṃ bʰávati \

Line : 6  Pada: u     indriyásya vīryàsyā́varuddʰyai \

Pada: v     áśrayan vā́vá śrāyantī́yena \

Pada: w     ávārayanta vāravantī́yena

Line : 7  Pada: x     tád indriyásyaivaíté vīryàsya párigr̥hītyai

Pada: y     yátra vā́ enam adó díśo vyāstʰāpáyati tát svargáṃ lokám abʰyā́rohati

Line : 8  Pada: z     yád imáṃ lokáṃ púnar nópāvaróhed atijanám̐ vā gácʰed úd vā mādyét \

Line : 9  Pada: aa     yád etā́ diśā́m áveṣṭayas \

Pada: ab     imám̐ vā́ etál * lokáṃ púnar upā́varohati \
      FN emended. Ed.: etáṃ

Line : 10  Pada: ac     ánnakāmo yajeta \

Pada: ad     etaddevatyā̀ vā́ imā́ díśas \

Line : 11  Pada: ae     yatʰādevatám̐ vā́ etád ābʰyó digbʰyó 'dʰy annā́dyam ávarunddʰe

Pada: af     yádi brāhmaṇó yájeta bārhaspatyáṃ mádʰye nidʰā́yā́hutimāhutim̐ hutvā́bʰígʰārayet \

Line : 12  Pada: ag     yádi vaíśyo vaiśvadevám \

Line : 13  Pada: ah     yádi rājanyà aindrám

Pada: ai     ekadʰaívā́sminn annā́dyaṃ prátiṣṭʰāpayati

Line : 14  Pada: aj     samānó vā́ eṣá yajñakratúḥ sam̐vatsaráṃ bʰavati

Pada: ak     ví vā́ etád yajñáś cʰidyate yát saṃtíṣṭʰate

Line : 15  Pada: al     yád etā́ḥ prayúja upaíti sāyám anyā́ḥ prātár anyā́s \

Pada: am     dvaú vā́ r̥tū́ áhaś ca rā́triś ca

Line : 16  Pada: an     tā́ evá práyuṅkte

Pada: ao     ṣáḍ anyā́ḥ ṣáḍ anyā́ḥ

Pada: ap     ṣaḍ vā́ r̥távas \

Pada: aq     r̥tū́n evá práyuṅkte

Line : 17  Pada: ar     tā́ ubʰáyīr dvā́daśa

Pada: as     dvā́daśa mā́sāḥ sam̐vatsaráḥ

Pada: at     sam̐vatsarám evá práyuṅkte \

Line : 18  Pada: au     anaḍvā́hau dákṣiṇā

Pada: av     yúktyā evá

Pada: aw     mārutī́ pŕ̥śniḥ paṣṭʰauhī́ garbʰíṇī́ti

Line : 19  Pada: ax     víḍ vaí marútas \

Pada: ay     viśó vā́ enam etád gárbʰaṃ karoti

Pada: az     tásmād vā́ eṣá viśáḥ priyáḥ

Line : 20  Pada: ba     priyó hí gárbʰas \

Pada: bb     ādityā́jā́ malihā́ garbʰíṇī́ti \

Pada: bc     iyám̐ vā́ áditis \

Pada: bd     asyā́ vā́ enam etád gárbʰaṃ karoti

Page: 61  
Line : 1  Pada: be     tásmād vā́ eṣá duḥparāṇódas \

Pada: bf     asyā́ hí gárbʰás \

Line : 2  Pada: bg     átʰaité satyádūtāḥ

Pada: bh     prasavā́ya sāvitrás \

Pada: bi     devā́ ásurair vijayám upayánto 'śvínoḥ pūṣáṇi satyáṃ nyàdadʰata

Line : 3  Pada: bj     vā́g vaí sárasvatī

Pada: bk     vācā́ satyáṃ práhiṇoti //

Pada: bl     abʰyàṣikṣi rā́jābʰūm // íti

Line : 4  Pada: bm     śrád dʰāsmai suṣuvāṇā́ya dadʰati

Pada: bn     sam̐vatsarám agnihotráṃ juhoti \

Line : 5  Pada: bo     anusáṃtatyai //


Anuvaka: 10  
Line : 6  Pada: a     agniṣṭomám ágre jyótiṣṭomam ā́harati

Pada: b     yajñamukʰám̐ vā́ agniṣṭomás \

Pada: c     yajñamukʰám evā́lábʰya savám ā́kramate \

Line : 7  Pada: d     átʰaiṣá tríṣṭomas

Pada: e     tásya trivŕ̥t prātaḥsavanáṃ pañcadaśáṃ mā́dʰyaṃdinam̐ sávanam \

Line : 8  Pada: f     téjo vaí trivŕ̥t

Pada: g     kṣatráṃ pañcadaśás

Pada: h     téja evā́sya kṣatré dadʰāti

Line : 9  Pada: i     ná vā́ átrā́pi saptadaśás tāyate

Pada: j     prajāpátir vaí saptadaśás \

Pada: k     yajñáḥ prajā́patis \

Line : 10  Pada: l     yád yajñás tāyáte

Pada: m     téna saptadaśó 'nantaritaḥ

Pada: n     pañcadaśáṃ mā́dʰyaṃdinam̐ sávanam

Line : 11  Pada: o     ekavim̐śáṃ tr̥tīyasavanám íti

Pada: p     víḍ vā́ ekavim̐śáḥ

Pada: q     kṣatráṃ pañcadaśás \

Line : 12  Pada: r     víśi vā́vā́syaitát kṣatráṃ pratiṣṭʰāpayā́m akaḥ

Pada: s     sárve catustrim̐śā́ḥ pávamānā abʰiṣecanī́yasya

Line : 13  Pada: t     tráyastrim̐śad devátās

Pada: u     tā́ evā́syaiténābʰī̀ṣṭāḥ prītā́ bʰavanti \

Line : 14  Pada: v     átʰa yá eṣá catustrim̐śáḥ

Pada: w     prajā́patir vaí catustrim̐śáḥ

Pada: x     prajā́patim evā́pnoti

Line : 15  Pada: y     sam̐śaró * vā́ eṣá stómānām áyatʰāpūrvaṃ yád víṣamāḥ stómās \
      FN emended. Ed.: saśaró. cf. TB.1.8.7.1

Pada: z     yát samā́ḥ pávamānās

Line : 16  Pada: aa     ténaivā́sam̐śaras téna yatʰāpūrvám

Pada: ab     ātmánā vā́ agniṣṭoména r̥dʰnóty * ātmánā púṇyo bʰavati
      FN TB.1.8.7.2: ātmánaivā́gniṣṭoménardʰnóti

Line : 17  Pada: ac     prajā́ vā́ uktʰā́ni

Pada: ad     paśáva uktʰā́ni

Line : 18  Pada: ae     yád uktʰyàs \

Pada: af     anusáṃtatyai

Pada: ag     yó vaí savā́d éti naínam̐ savá úpanamati

Pada: ah     yáḥ sā́mabʰyā éti pā́pīyānt suṣuvāṇó bʰavati

Line : 19  Pada: ai     yā́ni devarājā́nām̐ sā́māni yát tébʰyo naíti

Line : 20  Pada: aj     ténaivá savā́n naíti \

Pada: ak     etā́ni vaí sā́māni yát pr̥ṣṭʰā́ni

Pada: al     yát pr̥ṣṭʰā́ny upayánti

Page: 62  
Line : 1  Pada: am     ténaivá sā́mabʰyo naíti

Pada: an     yā́ni devarājā́nām̐ sā́māni taír asmíṃl loká r̥dʰnóti yā́ni manuṣyarājā́nām̐s taír amúṣmin \

Line : 2  Pada: ao     tád ubʰáyor evaítaír lokáyor r̥dʰnoty asmím̐ś cāmúṣmim̐ś ca \

Line : 3  Pada: ap     údvatīṣu sruvate \

Pada: aq     údvad vā́ anuṣṭúbʰo rūpám

Pada: ar     ā́nuṣṭubʰo rājanyàs

Line : 4  Pada: as     tásmād údvatīṣu sruvate \

Pada: at     anuṣṭúp pratʰamā́ bʰávaty anuṣṭúb uttamā́

Pada: au     vā́g vā́ anuṣṭúb

Line : 5  Pada: av     vācā́ vā́ etát prayánti vācódyanti

Pada: aw     saury ànuṣṭúb uttamā́ bʰavati

Line : 6  Pada: ax     svargásya lokásya sámaṣṭyai \

Pada: ay     ekavim̐śáṃ keśavapanī́yasya bahiṣpavamānám ekavim̐śám abʰiṣecanī́yasyottamám íti

Line : 7  Pada: az     víḍ vā́ ekavim̐śáḥ

Pada: ba     kṣatrám̐ saptadaśás \

Line : 8  Pada: bb     viśó vā́ etán madʰyatáḥ sūyate

Pada: bc     tásmād vā́ eṣá viśáḥ priyás \

Pada: bd     viśó hí madʰyatáḥ sūyáte

Line : 9  Pada: be     yátra vā́ enam adó díśo vyāstʰāpáyati tát svargáṃ lokám abʰyā́rohati

Line : 10  Pada: bf     yád imáṃ lokáṃ púnar nópāvaróhed atijanám̐ vā gácʰed úd vā mādyet \

Line : 11  Pada: bg     yád eṣá pratīcī́nastomas \

Pada: bh     imám̐ vā́ etál * lokáṃ púnar upā́varohati //
      FN emended. Ed.: etáṃ


Next part


This text is part of the TITUS edition of Black Yajur-Veda: Maitrayani-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.