TITUS
Black Yajur-Veda: Maitrayani-Samhita
Part No. 45
Previous part

Prapathaka: 5  
Anuvaka: 1  
Line : 13  Pada: a     apó vaí vr̥tráḥ páryaśayat

Pada: b     táto yā́ atyámucyanta tā́ jīvā́ yajñíyās \

Line : 14  Pada: c     girír vaí vr̥tró yā́ atimumucānā́ dʰā́vanti tā́ jīvā́ yajñíyās \

Pada: d     yád váhantīnāṃ gr̥hṇā́ti

Line : 15  Pada: e     yā́ evá jīvā́ yajñíyās tā́sām evá gr̥hṇāti

Pada: f     pratīpám úpamārayati \

Page: 63  
Line : 1  Pada: g     ácʰambaṭkārāya

Pada: h     sū́ryasyāvakāśé gr̥hṇāti

Pada: i     séndrā evá gr̥hṇāti

Line : 2  Pada: j     havíṣmatīr imā́ ā́pā íti

Pada: k     havíṣmatīr evá gr̥hṇāti \

Pada: l     āviḥsūryé gŕ̥hyās \

Line : 3  Pada: m     úttaram evá yajñakratúm abʰígr̥hṇāti \

Pada: n     anuṣṭúbʰā gr̥hṇāti \

Pada: o     anuṣṭúb vaí sárvāṇi cʰándām̐si

Line : 4  Pada: p     sárvair evaínāś cʰándobʰir gr̥hṇāti

Pada: q     várṣma vā́ eṣā́ cʰándasām \

Pada: r     várṣmainam̐ samānā́nāṃ gamayati

Line : 5  Pada: s     catúrbʰir gr̥hṇā́ti tribʰíḥ sādayati

Pada: t     tát saptá

Line : 6  Pada: u     saptápadā śákvarī

Pada: v     śākvarā́ḥ paśávaḥ

Pada: w     paśū́n evā́varunddʰe \

Pada: x     apó vaí rā́trir dívā bʰūté práviśati

Line : 7  Pada: y     tásmād ā́po dívā kr̥ṣṇā́s \

Pada: z     apó 'har náktam \

Pada: aa     tásmād ā́po náktam̐ śuklā́s \

Line : 8  Pada: ab     yád dívā gr̥hṇā́ti \

Pada: ac     ubʰé evā́horātré gr̥hṇāti

Pada: ad     dívā vaí manuṣyā̀ yajñéna cáranti náktaṃ devā́s

Line : 9  Pada: ae     tásmād rā́tribʰiḥ śravasyate

Pada: af     sam̐stʰā́pya vaí manuṣyā̀ yajñáṃ níḥpadyante \

Line : 10  Pada: ag     ā́paḥ kʰálu vaí víśve devā́s \

Pada: ah     yád apáḥ pariháranti \

Line : 11  Pada: ai     adbʰyó vā́ etád yajñám̐ saṃprā́dāt \

Pada: aj     ányaste 'sya yajñé kriyate

Pada: ak     yád vaí yajñásyāntaryánti tác cʰidrám \

Line : 12  Pada: al     tád ánu rákṣām̐si yajñám ávayanti \

Pada: am     ā́po vaí rakṣogʰnī́s \

Pada: an     apó rákṣām̐si ná taranti

Line : 13  Pada: ao     yád apáḥ pariháranti

Pada: ap     rákṣasām ánanvavāyāya

Pada: aq     yā́ dívā gr̥hṇā́ti yā́ atrī́ḥ prajā́s tā́sām etā́ yónis

Line : 14  Pada: ar     tā́ etā́ anuprájāyante

Pada: as     yā́ náktaṃ gr̥hṇā́ti yā́ ādyā̀ḥ prajā́s tā́sām etā́ yónis

Line : 15  Pada: at     tā́ etā́ anuprájāyante \

Line : 16  Pada: au     ubʰáyīr evá prajā́ḥ prájanayaty atrī́ś cādyā̀ś ca \

Pada: av     ā́gnīdʰre sādayati \

Pada: aw     etád vā́ ánabʰijitam

Line : 17  Pada: ax     átʰo átra hí tā́m̐ rā́triṃ devátā upavásanti

Pada: ay     devā́ vaí yajñásya śvástanaṃ nā́paśyan \

Line : 18  Pada: az     té vā́ etád evá yajñásya śvástanam apaśyan yád vasatīvárīs \

Line : 19  Pada: ba     yád vasatīvárīr gr̥hītvópavásanti

Pada: bb     śvástanam̐ vā́ etád yajñásyālábʰyópavasanti \

Page: 64  
Line : 1  Pada: bc     átʰo ā́po vaí víśve devā́ḥ

Pada: bd     sárvā vā́ etád devátā ālábʰyópavasanti

Line : 2  Pada: be     yásyā́gr̥hītāḥ sū́ryo 'bʰinimróced yá ā́hitāgniḥ somayājī́ tásya kumbʰā́d gŕ̥hyās

Line : 3  Pada: bf     tásya hí gr̥hītā́ agním upáriṣṭād dʰāráyeyus \

Pada: bg     átʰa gr̥hṇīyāt \

Pada: bh     jyótiṣmatīr evaínā gr̥hṇāti

Line : 4  Pada: bi     híraṇyam̐ háste bʰávati \

Pada: bj     átʰa gr̥hṇāti

Pada: bk     satyám̐ vaí híraṇyam \

Line : 5  Pada: bl     satyénaivaínā gr̥hṇāti

Pada: bm     váro dákṣiṇā

Pada: bn     váreṇaivaínā gr̥hṇāti

Line : 6  Pada: bo     yát tátra dʰánam ádāsyant syā́t tád déyam //


Anuvaka: 2  
Line : 7  Pada: a     pracaraṇyā̀m ágre gr̥hṇāti \

Pada: b     eṣā́ hy ágre pracárati \

Pada: c     apó vaí sómasya rásaḥ práviṣṭas \

Line : 8  Pada: d     agníḥ sárvā devátās \

Pada: e     vaiśvadevī́r ā́pas \

Pada: f     yajñamukʰáṃ grā́vāṇaḥ

Pada: g     savitŕ̥prasūto vā́ etát sárvābʰir devátābʰir apā́m̐ sómasya rásam ácʰaiti

Line : 9  Pada: h     śr̥ṇótv agníḥ samídʰā hávaṃ mā íti

Line : 10  Pada: i     yásminn evā́gnaú juhóti tám etád āha

Pada: j     śr̥ṇvántv ā́pā íti

Line : 11  Pada: k     yā́ evā́pó 'cʰaíti tā́ etád āha

Pada: l     dʰiṣáṇā ca devī́ti

Pada: m     vā́g vaí dʰiṣáṇā devī́

Line : 12  Pada: n     vā́cam̐ vā́ etád āha

Pada: o     śr̥ṇóta grāvāṇo vidúṣo nú yajñám íti

Line : 13  Pada: p     yajñamukʰám̐ hí grā́vāṇaḥ

Pada: q     śr̥ṇótu deváḥ savitā́ hávaṃ mā íty āha

Pada: r     prásūtyā evá //

Line : 14  Pada: s     apá iṣya hotaḥ // íti

Pada: t     yajñáṃ préṣyéti vā́ etád āha //

Pada: u     prá * bráhmaṇā íti
      FN emended. Ed.: pra.

Line : 15  Pada: v     bráhmaṇaivá yajñám ácʰaiti

Pada: w     maitrāvaruṇásya camasénā́cʰaiti \

Pada: x     eṣá hy ágre pracárati \

Line : 16  Pada: y     átʰo mitrā́váruṇau hy àpā́m īśāte

Pada: z     yajñamukʰám̐ vaí mitrā́váruṇau

Pada: aa     yajñamukʰám ā́pas \

Line : 17  Pada: ab     yajñamukʰénaivá yajñamukʰám ácʰaiti

Pada: ac     yátra hótuḥ prātaranuvākám anubruvatá upaśr̥ṇuyā́t tád apò 'dʰvaryúr gr̥hṇīyāt \

Line : 18  Pada: ad     yán nópaśr̥ṇuyā́d badʰiráḥ syāt \

Pada: ae     vācó hí cʰidyáte \


Page: 65  
Line : 1  Pada: af     átʰa yáj juhóti

Pada: ag     havír bʰūtā evaínā gr̥hṇāti \

Pada: ah     átʰo abʰígʰr̥tā evá

Pada: ai     tŕ̥ṇaṃ prā́sya juhoti \

Line : 2  Pada: aj     agnimáty evá juhoty āyátanavati \

Pada: ak     andʰò 'dʰvaryúḥ syād yád anāyatané juhuyā́t \

Line : 3  Pada: al     gʰr̥tám̐ vaí devā́ vájraṃ kr̥tvā́ sómam agʰnan \

Pada: am     abʰí kʰálu vā́ etā́ gʰārayanti

Line : 4  Pada: an     tásmād ā́hutim ápaplāvayati \

Pada: ao     átʰo ā́hutiṃ néd dʰárāṇī́ti

Pada: ap     kā́rṣy asī́ty ā́hutim ápaplāvayati

Line : 5  Pada: aq     samudrásya vó 'kṣityā únnayā íty úpasārayati \

Pada: ar     apā́m evā́kṣityai \

Line : 6  Pada: as     apó vaí sómasya rásaḥ práviṣṭaḥ

Pada: at     sómam apā́m̐ rásas \

Pada: au     apā́c ca kʰálu vaí nápāc cāpā́m̐ sómasya rásasyeśāte

Line : 7  Pada: av     taú vā́ etád ā́hutyā bʰāgadʰéyenāpā́m̐ sómasya rásaṃ nírayāciṣṭa \

Line : 8  Pada: aw     ubʰé ahorātré vasatīvárīṣu grahītavyè íty āhuḥ

Line : 9  Pada: ax     pūrvedyúr anyā́ gr̥hṇā́ti purā́nyā́ḥ sū́ryasyódetos

Pada: ay     tátʰāsyobʰé ahorātré vasatīvárīṣu gr̥hīté bʰavataḥ

Line : 10  Pada: az     pūrvedyúr anyā́ gr̥hṇā́ti purā́nyā́ḥ sū́ryasyódetos \

Line : 11  Pada: ba     ubʰáyīr evaínāḥ sadyogr̥hītā́ akar

Pada: bb     bʰrā́tr̥vyā vā́ etā́ gr̥hyante yā́ maitrāvaruṇásya camasé yā́ś ca nigrābʰyā̀s

Line : 12  Pada: bc     tā́ ubʰáyīr upáriṣṭāc cā́tvālasya sámanakti

Line : 13  Pada: bd     saṃjñā́nam ābʰyaḥ karoti

Pada: be     mitrám ābʰyo dadāti

Pada: bf     cā́tvālān nírgr̥hyante \

Line : 14  Pada: bg     eṣá vā́ apā́m̐ yóniḥ

Pada: bh     svā́d evá yóner nírgr̥hyante \

Pada: bi     áskannatvāya //

Line : 15  Pada: bj     áver apò 'dʰvaryā́3óm // íti \

Pada: bk     ávido yajñā́3m íti vā́ etád āha //

Line : 16  Pada: bl     utém anamnamus \

Pada: bm     utémáṃ paśya //

Pada: bn     ayáṃ me raddʰá íti vā́ etád āha

Pada: bo     yády agniṣṭomó juhóti

Line : 17  Pada: bp     ná vā́ agním agniṣṭomásya stotréṇa ná śastréṇā́tiyanti \

Pada: bq     agniṣṭomám evá yajñakratúm anusáṃtanoti

Line : 18  Pada: br     yády uktʰyàḥ paridʰím anakati

Pada: bs     páre vā́ agnéḥ paridʰáyaḥ

Page: 66  
Line : 1  Pada: bt     párāṇi paridʰíbʰya uktʰā́ni \

Pada: bu     uktʰā́ny evá yajñakratúm anusáṃtanoti

Line : 2  Pada: bv     yády atirātrá etád evá yájur vádan havirdʰā́naṃ prápadyeta

Pada: bw     páram̐ vaí paridʰíbʰyo havirdʰā́nam \

Line : 3  Pada: bx     pároktʰébʰyo rā́trī

Pada: by     rā́trīm evá yajñakratúm anusáṃtanoti

Pada: bz     stenáṃ mánas \

Line : 4  Pada: ca     anr̥tavādínī vā́k \

Pada: cb     átʰa kéna sómā gr̥hyánte kéna hūyantā íti pr̥cʰet \

Pada: cc     r̥tám̐ vaí satyám̐ híraṇyam

Line : 5  Pada: cd     r̥ténaivá satyéna gr̥hyánta r̥téna hūyante //


Anuvaka: 3  
Line : 6  Pada: a     devébʰyo vaí manuṣyèbʰyaḥ svargā́ya lokā́ya yajñá ā́hriyate

Pada: b     yád dʰr̥dé tvéti

Line : 7  Pada: c     téna devébʰyas \

Pada: d     yán mánase tvéti

Pada: e     téna manuṣyèbʰyas \

Pada: f     yád ā́ha

Pada: g     divé tvā sū́ryāya tvéti

Line : 8  Pada: h     tád ánu yajñám̐ svargáṃ lokám̐ samā́rohayati

Pada: i     ví vā́ etád yajñáś cʰidyate yásmai kám āhriyáte

Line : 9  Pada: j     tád dʰy ènam ánu svargáṃ lokám̐ samā́rohayati

Pada: k     yád ā́ha

Line : 10  Pada: l     diví devéṣu hótrā yacʰéti

Pada: m     hótrābʰir vaí yajñáḥ sáṃtatas \

Pada: n     hótrābʰir evá yajñám̐ sáṃtanoti //

Line : 11  Pada: o     devébʰyaḥ prātaryā́vabʰyó 'nubrūhi // íti

Pada: p     cʰándām̐si vaí devā́ḥ prātaryā́vāṇas \

Line : 12  Pada: q     cʰándobʰyo vā́ etád anuvā́ca āha

Pada: r     purā́ vācáḥ právaditoḥ prātaranuvākám ánvāha

Line : 13  Pada: s     yájamānāyaivá vā́caṃ gr̥hṇāti

Pada: t     ná vā́ etárhi yájamāno hástā ávanenikte

Line : 14  Pada: u     yád apsumátīṃ pratʰamā́m anvā́ha

Pada: v     prātaravanegó vā́ eṣá yájamānasya

Line : 15  Pada: w     yátra vā́ adò 'páḥ pariháranty adbʰyó vā́ etád yajñám̐ saṃprā́dāt \

Line : 16  Pada: x     yád apsumátīṃ pratʰamā́m anvā́ha \

Pada: y     adbʰyó vā́ etád yajñáṃ púnar ā́labʰate

Line : 17  Pada: z     sárveṣām̐ vaí devā́nāṃ prātaranuvākás \

Pada: aa     ā́paḥ kʰálu vaí víśve devā́s \

Line : 18  Pada: ab     yád apsumátīṃ pratʰamā́m anvā́ha

Pada: ac     sárvā vā́ etád devátā apnóti sárvā vyàśnoti

Line : 19  Pada: ad     yátʰā vaí sāmidʰenī́r eváṃ prātaranuvākás \

Pada: ae     āsā́dya vaí havíḥ sāmidʰenī́r ánvāhus \

Page: 67  
Line : 1  Pada: af     etát kʰálu vā́ etárhi havír yát sómas

Pada: ag     tásmāt sómam upāvahŕ̥tyā́nvāha

Line : 2  Pada: ah     gāyatrī́ṃ ca saṃpādáyati jágatīṃ ca

Pada: ai     tád dvé cʰándasī

Pada: aj     ékaṃ cʰándo 'bʰisáṃpādayati br̥hatī́m \

Line : 3  Pada: ak     triṣṭúbʰaṃ ca kakúbʰaṃ ca

Pada: al     tád dvé cʰándasī

Pada: am     ékaṃ cʰándo 'bʰisáṃpādayati br̥hatī́m

Line : 4  Pada: an     anuṣṭúbʰaṃ ca paṅktíṃ ca

Pada: ao     tát ṣáṭ cʰándām̐si \

Pada: ap     ekáṃ cʰándo 'bʰisáṃpādayati br̥hatī́m

Line : 5  Pada: aq     anuṣṭúppratipatkāni cʰándām̐si kuryād yajñā́vakīrṇasya

Line : 6  Pada: ar     vā́g vā́ anuṣṭúb

Pada: as     vācaívaínaṃ bʰiṣajyati

Pada: at     samáyā triṣṭúbʰaṃ ca jágatīṃ cā́nubrūyāt paśúkāmasya

Line : 7  Pada: au     paśávo vaí jágatī

Pada: av     paśumā́n bʰavati

Pada: aw     sárvāṇi cʰándām̐śy ánvāha

Line : 8  Pada: ax     prajā́patir vaí cʰándām̐si

Pada: ay     prajā́patim evā́pnoti

Pada: az     prajā́pater vā́ etád uktʰáṃ yát prātaranuvākás \

Line : 9  Pada: ba     vyùṣṭāyāṃ purā́ sū́ryasyódetor ánubrūyāt \

Pada: bb     eṣá hí prajā́pater lokáḥ

Line : 10  Pada: bc     pavítram̐ vaí prātaranuvākás \

Pada: bd     yájamānam evaíténa punāti

Line : 11  Pada: be     śatám ánubrūyād ā́yuḥkāmasya

Pada: bf     śatā́yur vaí púruṣaḥ śatávīryas \

Pada: bg     ā́yur evá vīryàm āpnoti

Line : 12  Pada: bh     saptá ca śatā́ni vim̐śatíṃ cā́nubrūyāt paśúkāmasya \

Pada: bi     etā́vanti vaí sam̐vatsarásyāhorātrā́ṇi

Line : 13  Pada: bj     sam̐vatsaréṇaivā́smai paśū́n ávarunddʰe

Pada: bk     sahásram ánubrūyāt svargákāmasya

Line : 14  Pada: bl     yā́vad vaí sahásraṃ tā́vad itè 'saú lokáḥ

Pada: bm     svargásya lokásya sámaṣṭyai \

Line : 15  Pada: bn     áparimitā ánvāha \

Pada: bo     áparimitasyā́varuddʰyai

Pada: bp     paṅktyā́ páridadʰāti \

Line : 16  Pada: bq     úttaram evá yajñakratúm abʰígr̥hṇāti //


Anuvaka: 4  
Line : 17  Pada: a     yajñásya vā́ etā́ḥ pannéjanīḥ

Pada: b     pum̐sā́m agnī́t

Pada: c     strīṇā́ṃ néṣṭā

Pada: d     yád agnī́n néṣṭur upástʰam āsī́dati

Line : 18  Pada: e     mitʰunám̐ vā́ etát sáṃbʰavatas \

Pada: f     yát tárhy apá upapravartáyati

Line : 19  Pada: g     tásminn evá mitʰuné réto dadʰāti

Pada: h     pátny upaprávartayati

Pada: i     pátnyā hí prajā́ḥ prajā́yante \


Page: 68  
Line : 1  Pada: j     ūrúṇopaprávartayati \

Pada: k     ūrúm̐ hy ánu prajā́ḥ prajā́yante

Pada: l     dákṣiṇenorúṇopaprávartayati

Line : 2  Pada: m     dákṣiṇam̐ hy ū̀rúm ánu prajā́ḥ prajā́yante \

Pada: n     antaratá upaprávartayati \

Line : 3  Pada: o     antarató hí prajā́ḥ prajā́yante

Pada: p     yád dakṣiṇā́ pravartáyet pitr̥loká enā nídʰuvet \

Line : 4  Pada: q     átʰa yád údīcīr upapravartáyati

Pada: r     manuṣyalokám evaínā upaprájanayati

Line : 5  Pada: s     prājāpatyó vā́ udgātā́

Pada: t     saṃkśāpyámāno vā́ udgātā́ pátnyā rétā ā́datte

Line : 6  Pada: u     yád ā́ha

Pada: v     vāmī́ te saṃdŕ̥śi víśvam̐ réto dʰeṣīyéti

Pada: w     tátʰā ha nā́datte

Line : 7  Pada: x     dvādaśé stotrá upaprávartayati

Pada: y     dvā́daśa mā́sāḥ sam̐vatsarás \

Pada: z     dvā́daśāgniṣṭomé stotrā́ṇi \

Line : 8  Pada: aa     ā́paḥ śā́ntis \

Pada: ab     yát tárhy apá upapravartáyati

Pada: ac     śamáyaty evá

Pada: ad     devásya tvā savitúḥ prasavá íti

Line : 9  Pada: ae     savitŕ̥prasūta evaínam ā́datte \

Pada: af     aśvínor bāhubʰyām íti \

Pada: ag     aśvínau vaí devā́nām adʰvaryū́

Line : 10  Pada: ah     pūṣṇó hástābʰyām íti

Pada: ai     devátābʰir evá

Pada: aj     grā́vāsī́ti

Line : 11  Pada: ak     rāté hy èṣá devébʰyaḥ sómam

Pada: al     adʰvarakŕ̥d devébʰyā íti \

Pada: am     advarám̐ hy èṣá devébʰyaḥ karóti \

Line : 12  Pada: an     índrāya tvā suṣúttamaṃ mádʰumantaṃ páyasvantam íti \

Pada: ao     aindró hí yajñás \

Pada: ap     índraṃ kʰálu vā́ etárhy anyā́ devátā ánu \

Line : 13  Pada: aq     índrāya tvā vásumate rudrávatā íti

Pada: ar     vásavaś ca hy ènam etárhi rudrā́ś cā́nu \

Line : 14  Pada: as     índrāya tvādityávatā íti \

Pada: at     ādityā́ hy ènam etárhy ànu \

Line : 15  Pada: au     agnáye tvā rāyaspoṣadá íti \

Pada: av     agnír vaí sárvā devátās \

Pada: aw     etā́ hy ènam etárhi devátā ánu

Line : 16  Pada: ax     víṣṇave tvéti

Pada: ay     víṣṇur hí yajñás \

Pada: az     vyānó vā́ upām̐śusávanaḥ

Line : 17  Pada: ba     prajā́ am̐śávas \

Pada: bb     vyānám̐ vā́ etát prajā́su dadʰāti

Pada: bc     śvātrā́ḥ stʰa vr̥tratúrā íti \

Line : 18  Pada: bd     eṣá vā́ apā́m̐ somapītʰás \

Pada: be     etám̐ vaí viśvā́mitro 'pā́m̐ somapītʰám̐ vidā́ṃcakāra

Page: 69  
Line : 1  Pada: bf     tásmai síndʰavo dʰokṣám anamanta \

Pada: bg     apā́m̐ vā́ eṣá somapītʰás \

Line : 2  Pada: bh     apó vā́ etát somapītʰéna sámardʰayati

Pada: bi     yó vā́ apā́m̐ somapītʰám̐ véda ná ha vā́ āsv ā́rtim ā́rcʰati karóty āsu vīryàm \

Line : 3  Pada: bj     yát te soma diví jyótir íti

Line : 4  Pada: bk     sómo vaí vā́jas

Pada: bl     tásya candrámās tŕ̥tīyam

Pada: bm     ayám̐ yáḥ pávate sá tŕ̥tīyam \

Line : 5  Pada: bn     yéna yájante sá tŕ̥tīyam \

Pada: bo     gárbʰān amúnā dādʰā́ra prāṇā́n anéna yacʰati \

Line : 6  Pada: bp     ayám̐ yáḥ pávaté 'nnam anéna dādʰāra

Pada: bq     yéna yájante tásya vaí vā́jasya satyám̐ vā́jinam

Line : 7  Pada: br     ánnam̐ vā́jinam \

Pada: bs     dákṣiṇā vā́jinam \

Pada: bt     tā́ vā́ asyaitát tanvàḥ saṃbʰŕ̥tya tám̐ sárvam̐ sátanuṃ bʰūtám ā́pyāyayanti

Line : 8  Pada: bu     vájro vaí grā́vā

Pada: bv     hánū adʰiṣávaṇe

Line : 9  Pada: bw     krūrám iva vā́ etád yajñé kriyate

Pada: bx     yád ā́ha

Pada: by     dʰíṣaṇe īḍité īḍetʰām íti

Pada: bz     śamáyaty evá //


Anuvaka: 5  
Line : 11  Pada: a     vasatīvárībʰiḥ sómam ā́pyāyayanti

Pada: b     ná hí sómena sóma āpyāyate \

Line : 12  Pada: c     adbʰír hí sóma āpyā́yate

Pada: d     nigrābʰyā̀bʰir upām̐śúm

Pada: e     áto hī́tare sómā gr̥hyánte

Line : 13  Pada: f     prāṇó vā́ upām̐śus \

Pada: g     áṅgānī́tare gráhās \

Pada: h     yád anyáta āpyāyáyeyuḥ prāṇéna yajñám̐ vícʰindyus \

Line : 14  Pada: i     aṣṭaú kŕ̥tvaḥ prātár abʰíṣuṇoti \

Pada: j     aṣṭā́kṣarā gāyatrī

Pada: k     gāyatrī́m̐ vā́ etát prātaḥsavané vyā́yātayanti

Line : 15  Pada: l     devā́ś ca vā́ ásurāś cāspardʰanta

Line : 16  Pada: m     té devā́ upām̐śaú yajñám̐ sam̐stʰā́pyam apaśyan \

Pada: n     tám upām̐śaú sámastʰāpayan \

Line : 17  Pada: o     tád upām̐śā́ evá yajñáḥ sam̐stʰā́pyas \

Pada: p     aṣṭaú kŕ̥tvaḥ prātár abʰíṣuṇoti \

Pada: q     aṣṭā́kṣarā gāyatrī́

Line : 18  Pada: r     gāyatrī́m evā́pnoti

Pada: s     yád ékādaśa

Pada: t     triṣṭúbʰaṃ téna

Pada: u     yád dvā́daśa

Pada: v     jágatīṃ téna


Page: 70  
Line : 1  Pada: w     trír vígr̥hṇāti

Pada: x     trī́ṇi vaí sávanāni

Pada: y     sávanāny evā́pnoti \

Pada: z     etád vā́ upām̐śaú yajñám̐ sámatiṣṭʰipan \

Line : 2  Pada: aa     téna sám̐stʰitenā́riṣṭena bʰūténa prácaranti

Line : 3  Pada: ab     trír vígr̥hṇāti

Pada: ac     tráyo hī̀mé prāṇā́ḥ prāṇò 'pānó vyānás \

Pada: ad     átʰo tráyo vā́ imé lokā́s \

Line : 4  Pada: ae     imā́n evá lokā́n āpnoti \

Pada: af     asaú vā́ upām̐śús \

Pada: ag     antárikṣam antaryāmás \

Line : 5  Pada: ah     iyám upayāmás \

Pada: ai     yád upayāmágr̥hītā gr̥hyánte \

Pada: aj     anáyā vā́ etád gr̥hyante

Line : 6  Pada: ak     tád áskannā vā́ eté \

Pada: al     anáyā hí gr̥hyánte

Pada: am     yát stʰālyā́ gr̥hyánte \

Pada: an     anáyā vā́ etád gr̥hyante \

Line : 7  Pada: ao     asyā́ vā́ eṣā́dʰikriyate

Pada: ap     tád áskannā vā́ eté \

Pada: aq     anáyā hí gr̥hyánte

Line : 8  Pada: ar     yád dārumáyeṇa gr̥hyánte \

Pada: as     anáyā vā́ etád gr̥hyante \

Pada: at     iyám̐ hí vánaspátīnām̐ yónis

Line : 9  Pada: au     tád áskannā vā́ eté \

Pada: av     anáyā hí gr̥hyánte \

Pada: aw     eṣá te yónir íti sādayati \

Line : 10  Pada: ax     iyám̐ vaí sómasya yónis \

Pada: ay     asyā́ḥ sómo 'dʰi jāyate

Pada: az     svá evaínam̐ yónau dadʰāti \

Line : 11  Pada: ba     iyám̐ vaí devapātrám \

Pada: bb     tád yá evám̐ véda prá vásīyasaḥ pā́tram āpnoti

Line : 12  Pada: bc     brāmaṇáṃ tú pā́tre ná mīmām̐seta yáḥ pā́triya iva syā́t \

Pada: bd     ánupayāmagr̥hīto gr̥hyate \

Line : 13  Pada: be     ánupayāmagr̥hītam̐ hí prajā́ḥ prāṇám upajī́vanti \

Pada: bf     ápavitrapūto gr̥hyate \

Line : 14  Pada: bg     ápavitrapūtam̐ hí prajā́ḥ prāṇám upajī́vanti \

Pada: bh     ásanno hūyate \

Line : 15  Pada: bi     ásannam̐ hí prajā́ḥ prāṇám upajī́vanti

Pada: bj     pavítrapūtā vā́ anyé sómās \

Pada: bk     átʰa vā́ eṣá vā́kpūto yád upām̐śús

Line : 16  Pada: bl     tásmād vācáspátaye pavasvéty āha

Pada: bm     vā́kpūto hy èṣás \

Line : 17  Pada: bn     am̐śúbʰiḥ pāvayati

Pada: bo     prāṇā́ vā́ am̐śávaḥ

Pada: bp     prāṇaír evaínaṃ pāvayati

Line : 18  Pada: bq     dvā́bʰyāṃdvābʰyāṃ pāvayati

Pada: br     dvaúdvau hī̀mé prāṇā́s \

Pada: bs     devó devā́nāṃ pavítram asī́ti

Line : 19  Pada: bt     yát svit sómam̐ sómena punā́ti

Pada: bu     svā́ṃkr̥to 'sī́ti

Line : 20  Pada: bv     prāṇám evá svám akr̥ta

Pada: bw     mánas tvāṣṭv íti *
      FN Oertel, Zur Kapiṣṭʰala-Kaṭʰa-Saṃhitā, p. 114

Pada: bx     mánasaivá prāṇám āpnoti

Pada: by     svā́hā tvā subʰava sū́ryāyéti

Page: 71  
Line : 1  Pada: bz     sūryadevatyā̀ hí sárve sómā hūyánte \

Pada: ca     átʰo átra vaí devā́nāṃ priyā́s tanvàs

Line : 2  Pada: cb     tā́ evā́varunddʰe

Pada: cc     devébʰyas tvā marīcipébʰyā íti

Line : 3  Pada: cd     raśmáyo vaí devā́ marīcipā́ḥ

Pada: ce     paridʰáyo raśmáyas \

Pada: cf     asā́ ādityá āhavanī́yas

Line : 4  Pada: cg     tā́n evá prīṇāti \

Pada: ch     ūrdʰvás tíṣṭʰan juhoti \

Pada: ci     ūrdʰvó hí tíṣṭʰan vīryàvattaras \

Pada: cj     yáṃ dviṣyā́t tásya jihmás tíṣṭʰan juhuyāt

Line : 5  Pada: ck     prāṇā́n asya vlināti

Pada: cl     vihvā́ruko bʰavati

Pada: cm     yády abʰicáred ā́ támitos tiṣṭʰet \

Line : 6  Pada: cn     agnír ā́hutim abʰitváramāṇas tājág ánugacʰati

Pada: co     yádi kāmáyeta várṣet parjányā íti parimŕ̥jyordʰvám únmr̥jyāt \

Line : 7  Pada: cp     óṣadʰībʰyo vā́ eṣò 'múto varṣati \

Line : 8  Pada: cq     óṣadʰīr evá nédīyo vŕ̥ṣṭyā akar

Pada: cr     yádi kāmáyeta várṣet parjányā íti parimr̥jyāvācī́nam ávamr̥jyāt \

Line : 9  Pada: cs     vaiśvānaréṇaivá vŕ̥ṣṭim ápi hanti

Line : 10  Pada: ct     nā́pidʰéyas \

Pada: cu     yád apidadʰyā́t prāṇám asyā́pidadʰyāt pramā́yukaḥ syāt \

Pada: cv     yáṃ dviṣyā́t tásyā́pidadʰyāt

Line : 11  Pada: cw     prāṇám evā́syā́pidadʰāti

Pada: cx     yády abʰicáret // idám ahám amúṣyāmuṣyāyaṇásya prāṇám ápidadʰāmi // íty apidadʰyāt

Line : 12  Pada: cy     prāṇám evā́syāpidadʰāti //

Line : 13  Pada: cz     idám ahám amúṣyāmuṣyāyaṇásya prāṇé sādayāmi // íty abʰicárant sādayet

Line : 14  Pada: da     prāṇá evā́sya sādayati

Pada: db     pramā́yuko bʰavati

Pada: dc     prāṇā́ya tvéty ánabʰicarant sādayet //


Anuvaka: 6  
Line : 16  Pada: a     pavítram̐ vítanvanti

Pada: b     prāṇāpānáyor vídʰr̥tyai \

Pada: c     upayāmágr̥hīto gr̥hyate \

Line : 17  Pada: d     apānéna vaí prāṇó dʰr̥táḥ

Pada: e     prāṇásya dʰŕ̥tyai \

Pada: f     antárikṣam̐ vā́ antaryāmás \

Line : 18  Pada: g     antárikṣam imā́ḥ prajā́s \

Pada: h     yád etád pā́tram̐ sū́davat sādáyati

Pada: i     prajā́sv evá rásaṃ dadʰāti

Line : 19  Pada: j     devā́ś ca vā́ ásurāś cāspardʰanta

Pada: k     té devā́ upām̐śúm apaśyan \

Pada: l     tám agr̥hṇata

Page: 72  
Line : 1  Pada: m     tám̐ purā́ stotrā́t purā́ śastrā́d dʰótum upódatiṣṭʰan \

Pada: n     té 'surā acikayus \

Pada: o     júhvati vā́ íti

Line : 2  Pada: p     té vájram ādā́yābʰyàpatan \

Pada: q     té devā́ antaryāmám apaśyan \

Pada: r     tám agr̥hṇata

Line : 3  Pada: s     ténā́surān ebʰyó lokébʰyo 'ntáradadʰata

Pada: t     táto devā́ ábʰavan

Pada: u     párā́surās

Line : 4  Pada: v     tád yá evám̐ vidvā́n antaryāmáṃ gr̥hṇītè 'ntaryāménaivá bʰrā́tr̥vyam ebʰyó lokébʰyo 'ntárdʰatte

Line : 5  Pada: w     bʰávaty ātmánā

Pada: x     párāsya bʰrā́tr̥vyo bʰavati

Pada: y     prāṇāpānaú vā́ upām̐śvantaryāmaú

Line : 6  Pada: z     vyāná upām̐śusávanas \

Pada: aa     yád eṣá grā́vāntaraíté pā́tre sādyáte

Line : 7  Pada: ab     prāṇāpānáyor vídʰr̥tyai

Pada: ac     yó vā́ etā́ ī́jate yénaitaú vídʰr̥tā eṣá vā́vá sá upām̐śusávano grā́vā

Line : 8  Pada: ad     prāṇāpānaú vā́ upām̐śvantaryāmaú

Line : 9  Pada: ae     vyāná upām̐śusávanas \

Pada: af     yád eté pā́tre etáṃ grā́vāṇam ā́ tr̥tī́yāt sávanān ná jahītás

Line : 10  Pada: ag     tásmāt suptásya sárvāṇy anyā́ni śrótrāṇy apakrā́manti

Pada: ah     prāṇāpānaú tv ènaṃ ná jahītas \

Line : 11  Pada: ai     átʰa yát púnar ardáyati

Pada: aj     tásmāt suptvā́ púnaḥ prábudʰyante

Pada: ak     prāṇāpānaú vā́ upām̐śvantaryāmaú

Line : 12  Pada: al     vyā́na upām̐śusávanas \

Pada: am     yád eté pā́tre etáṃ grā́vāṇam ā́ tr̥tī́yāt sávanān ná jahītás

Line : 13  Pada: an     tásmāt pakṣíṇo viyátya pakṣā́n īráyanto nā́vapadyante \

Line : 14  Pada: ao     átʰa yát púnar ardáyati

Pada: ap     tásmāt púnar abʰyā́yuvate

Pada: aq     prāṇāpānaú vā́ upām̐śvantaryāmaú

Line : 15  Pada: ar     vyāná upām̐śusávanas \

Pada: as     yád eté pā́tre púnaḥ prayujyéte

Line : 16  Pada: at     tásmād imaú dvā́ ádʰastāt prāṇaú

Pada: au     gʰnánti vā́ etát sómam̐ yád abʰiṣuṇvánti \

Line : 17  Pada: av     advaryúḥ pratʰamò 'bʰíṣuṇoti

Pada: aw     vyárdʰuko bʰavati

Pada: ax     yátra mū́laṃ tád abʰiṣútyas \

Line : 18  Pada: ay     etád vā́ asya vídevatamam \

Pada: az     tátʰā hā́vyardʰuko ha bʰavati

Pada: ba     yó vaí devakṣetrám̐ vidvā́m̐ samarpáyaty ā́rtim ā́rcʰati

Line : 19  Pada: bb     pā́trāṇi vā́vá devakṣetrám \

Pada: bc     yátra vā́ ágre 'dʰvaryúḥ sómaṃ juhóti tád enaṃ devátāḥ prátyāsate \

Line : 20  Pada: bd     ihá no paramā́ ha riṣyatī́ti

Line : 21  Pada: be     yát táto 'nyátra juhuyā́d yád asya sváṃ tád anyébʰyaḥ práyacʰet \

Pada: bf     asvó ha bʰavati \


Page: 73  
Line : 1  Pada: bg     etád vā́ adʰvaryóḥ svám̐ yád āśrāváyati

Pada: bh     yád āśrā́vyā́hutvā pracyáveta yád asya sváṃ tásmāt prácyaveta \

Line : 2  Pada: bi     asvó ha bʰavati \

Pada: bj     etád vā́ adʰvaryóḥ svám̐ yád vāyavyàm \

Line : 3  Pada: bk     yád vāyavyàm ánālabʰyāśrāváyed yád asya sváṃ tásmāc cʰidyeta \

Pada: bl     asvó ha bʰavati

Line : 4  Pada: bm     tád yá evám̐ vidvā́n āśrā́vya hutvā́ vā́hutvā vā pracyávate bahv àsya sváṃ bʰávati ná svā́c cʰidyate

Line : 5  Pada: bn     vāyavyàm ālábʰyā́śrāvayati

Pada: bo     svávān evá bʰavati //


Anuvaka: 7  
Line : 6  Pada: a     brahmavādíno vadanti

Pada: b     kíṃ tád yajñé kriyate yásmād dʰástādānā anyé paśávo múkʰādānā anyá íti

Line : 7  Pada: c     yád upām̐śúr hástena gr̥hyáte

Pada: d     tásmān markáṭaḥ púruṣo * hastī́ té hástādānās \
      FN Correcturen und Conjecturen zu dem ganzen Werk.

Line : 8  Pada: e     múkʰam̐ vaí vāyavyàm \

Pada: f     yád vāyavyè nétare gráhā gr̥hyánte

Line : 9  Pada: g     tásmād ítare paśávo múkʰādānās \

Pada: h     brahmavādíno vadanti

Pada: i     kíṃ tád yajñé kriyate yásmāt sadyó jātā́ḥ paśávaḥ prátitiṣṭʰanti sam̐vatsaré púruṣā íti \

Line : 11  Pada: j     upām̐śvantaryāmaú vā́ ánv anyé paśávaḥ

Pada: k     púruṣas tvaí yajñéna sáṃmitaḥ

Pada: l     prāṇāpānaú vā́ upām̐śvantaryāmaú

Line : 12  Pada: m     yád etaú gráhā ásannau hūyéte

Pada: n     tásmāt sadyó jātā́ḥ paśávaḥ prátitiṣṭʰanti

Line : 13  Pada: o     sam̐vatsaró vā́ agniṣṭomás \

Pada: p     dvā́daśa mā́sāḥ sam̐vatsarás \

Line : 14  Pada: q     yád etá ítare gráhāḥ sādyánte

Pada: r     tásmāt púruṣo jātáḥ sam̐vatsaré prátitiṣṭʰati

Line : 15  Pada: s     yát te somā́dābʰyaṃ nā́ma jā́gr̥vī́ti \

Pada: t     eṣá vaí sómasya somapītʰáḥ

Line : 16  Pada: u     sómam̐ vā́ etát somapītʰéna sámardʰayati

Pada: v     yó vaí sómasya somapītʰám̐ véda ná somapītʰā́c cʰidyate

Line : 17  Pada: w     sómo vā́ imā́ diśò 'bʰyàkāmayata

Line : 18  Pada: x     prā́g ápāg andʰarā́g údag íti \

Pada: y     ābʰír enaṃ digbʰíḥ sámūhati \

Pada: z     ābʰíḥ sámardʰayati

Line : 19  Pada: aa     kā́mam enaṃ gamayati

Pada: ab     kā́mam̐ ha gacʰati

Pada: ac     kā́mukā enam̐ stríyo bʰavanti

Line : 20  Pada: ad     yā́ṃ kāmáyeta tā́ṃ tárhi mánasā dʰyāyet

Pada: ae     sā́ hainaṃ kāmayate \

Pada: af     ámba nísmaréti

Page: 74  
Line : 1  Pada: ag     smáréti vā́ etád āha

Pada: ah     sám arír vidām íti

Pada: ai     sám anéna vitsvéti vā́ etád āha

Line : 2  Pada: aj     catvā́ro vaí pŕ̥śneḥ stánā āsan \

Pada: ak     tátas tribʰír devébʰyo 'duhat

Pada: al     kuśī́bʰir ékó 'nunaddʰa āsīt

Line : 3  Pada: am     tám̐ vā́ índra evā́paśyat

Pada: an     ténéndrāyaivā́duhat

Pada: ao     tád vā́ asya kauśikatvám \

Line : 4  Pada: ap     yád ā́ha // brā́hmaṇa kauśikā́ iva // íti

Pada: aq     catúr nigrābʰám úpaiti

Line : 5  Pada: ar     catvā́ri vaí páyām̐si

Pada: as     yā́vad evá páyas tád āpnoti

Pada: at     tríḥ sáṃbʰarati

Pada: au     tásmād etásyāṃ tráyo bʰā́gāḥ prātár madʰyáṃdine sāyám \

Line : 6  Pada: av     catúr nigrābʰám upaíti tríḥ sáṃbʰarati

Line : 7  Pada: aw     tát saptá

Pada: ax     saptápadā śákvarī

Pada: ay     śākvarā́ḥ paśávaḥ

Pada: az     paśū́n evā́varunddʰe

Pada: ba     náva kŕ̥tvo nigrābʰám upaíti tríḥ sáṃbʰarati

Line : 8  Pada: bb     tád dvā́daśa

Pada: bc     dvā́daśa mā́sāḥ sam̐vatsarás \

Line : 9  Pada: bd     dvā́daśāgniṣṭomé stotrā́ṇi \

Pada: be     eṣā́ yajñásya mā́trā

Pada: bf     svàrbʰānur vā́ āsuráḥ sū́ryaṃ támasāvidʰyat

Line : 10  Pada: bg     tásya devā́s támo 'pāgʰnan

Pada: bh     yát pratʰamáṃ támo 'pā́gʰnant sā́viḥ kr̥ṣṇā́bʰavat \

Line : 11  Pada: bi     yád dvitī́yam̐ sā́ lóhinī

Pada: bj     yát tr̥tī́yam̐ sā́ balakṣī́

Pada: bk     sá svéna rūpéṇa níramucyata

Line : 12  Pada: bl     yád balakṣáḥ pavítraṃ bʰávati tátaḥ śukró gr̥hyate

Line : 13  Pada: bm     yájamānasya vā́ etát pavítram \

Pada: bn     yájamānam evaíténa punāti \

Pada: bo     amotám̐ syāt \

Pada: bp     ātmána evaínad akr̥ta

Line : 14  Pada: bq     yád anyatrotám ápavitram \

Pada: br     tád yájamānasya //


Anuvaka: 8  
Line : 15  Pada: a     vā́g vā́ aindravāyaváḥ

Pada: b     sā́ vaí vā́g ekadʰā́vadadyā́vadávyāvr̥ttā́sīt

Pada: c     sá índro 'bravīt \

Line : 16  Pada: d     máhyam átrā́pi sómaṃ gr̥hṇītāhám̐ va etā́m̐ vā́cam̐ vyā́vartayiṣyāmī́ti

Line : 17  Pada: e     sá vaí * vācaívá vā́cam̐ vyā́vartayat \
      FN emended. Ed.: va

Pada: f     yád aindravāyavó gr̥hyáte

Pada: g     vācó vyā́vr̥ttyai

Line : 18  Pada: h     vāyáve pratʰamáṃ gr̥hṇā́ti vāyáva uttamáṃ madʰyatá índrāya \

Pada: i     indriyéṇa vā́ iyám̐ vā́ṅ madʰyató vídʰr̥tā \

Line : 19  Pada: j     indriyávatīm̐ vā́cam̐ vadati yá evám̐ véda


Page: 75  
Line : 1  Pada: k     devā́ vaí sómam ajigʰām̐san \

Pada: l     táṃ nā́śaknuvan hántum \

Pada: m     vāyúr hy àsminn antárā́sīt prāṇás

Line : 2  Pada: n     táṃ devā́ ápāśāsus \

Pada: o     úpa nā ā́vartasvéti

Pada: p     sò 'bravīt \

Pada: q     bʰāgó me 'stv íti

Line : 3  Pada: r     vr̥ṇīṣvéty abruvan \

Pada: s     sò 'bravīt \

Pada: t     maddevatyā̀ny evá pā́trāṇy āsann íti

Pada: u     tásmād apaturīyám̐ vāyóḥ pā́tram

Line : 4  Pada: v     átʰa vāyavyā̀ny ucyante

Pada: w     táto vaí devā́ḥ sómam agʰnan \

Line : 5  Pada: x     sá hatò 'pūyat

Pada: y     tásmād devā́ údabībʰatsanta

Pada: z     sá vāyúr abravīt \

Pada: aa     ahám̐ va etám̐ sómam̐ svadayiṣyāmi

Line : 6  Pada: ab     bʰāgó me 'stv íti

Pada: ac     vr̥ṇīṣvéty abruvan \

Pada: ad     só 'bravīt \

Line : 7  Pada: ae     mádagrā evá gráhā gr̥hyāntā íti

Pada: af     tám̐ vāyúr madʰyató vyávāṭ

Pada: ag     tám asvadyat

Line : 8  Pada: ah     tásmād vāyvàgrā gráhā gr̥hyante

Pada: ai     tásmād u śuktáṃ pravāté víṣajanti

Line : 9  Pada: aj     devā́ vaí prātaḥsavanám udyámaṃ nā́śaknuvan \

Pada: ak     tr̥tīyasavané tárhi vāyúr āsīt

Pada: al     táṃ devā́ḥ prātaḥsavanám abʰipáryauhan \

Line : 10  Pada: am     téna prātaḥsavanám údayacʰanta

Pada: an     yád aindravāyaváḥ prātaḥsavané gr̥hyáte

Line : 11  Pada: ao     prāṇó vaí vāyúḥ

Pada: ap     prāṇéna vá etán mukʰató yajñám údyacʰante

Line : 12  Pada: aq     devā́ vaí vr̥trám ajigʰām̐san \

Pada: ar     sá mitrò 'bravīt \

Pada: as     mítrò 'hám asmi

Line : 13  Pada: at     nā́hám̐ haniṣyāmī́ti

Pada: au     tè 'bruvan

Pada: av     jahy èvéti

Pada: aw     sò 'bravīt \

Pada: ax     bʰāgó me 'stv íti

Line : 14  Pada: ay     vr̥ṇīṣvéty abruvan \

Pada: az     sò 'bravīt

Pada: ba     páyasaivá me sómam̐ śrīṇān íti

Pada: bb     tásmāt * paśávó 'pākrāman
      FN Correcturen und Conjecturen zu dem ganzen Werk.

Line : 15  Pada: bc     mitráḥ sánn adruhā íti

Pada: bd     paśūṇā́m̐ hí páyas \

Pada: be     yán maitrāvaruṇáṃ páyasā śrīṇā́ti

Line : 16  Pada: bf     paśúbʰir evaínam̐ samyáñcaṃ dadʰāti

Pada: bg     yán maitrāvaruṇáṃ páyasā śrīṇā́ti

Line : 17  Pada: bh     dvidevatyatvā́ya

Pada: bi     yáñ śītám \

Pada: bj     téna maitrám \

Pada: bk     yát taptám \

Pada: bl     téna vāruṇám \

Line : 18  Pada: bm     bráhma vaí mitráḥ

Pada: bn     kṣatrám̐ váruṇas \

Pada: bo     bráhmaṇi ca vā́ etát kṣatré ca páyo dadʰāti

Line : 19  Pada: bp     tásmād bráhma ca kṣatráṃ ca payasvítame

Pada: bq     páñca vaí brāhmaṇásya devátā agníḥ sómaḥ savitā́ br̥haspátiḥ sárasvatī

Line : 20  Pada: br     tásmād brāhmaṇám anyé manuṣyā̀ úpadʰāvanti \

Line : 21  Pada: bs     etásya hí bʰū́yiṣṭʰā devátās

Pada: bt     tā́sāṃ tisrò 'vāntarám̐ śrótriyasyāgnír br̥haspátiḥ sárasvatī

Page: 76  
Line : 1  Pada: bu     tásmāñ śrótriyam áśrotriyā úpadʰāvanti \

Pada: bv     etásya hy àvāntaráṃ bʰū́yiṣṭʰā devátās

Line : 2  Pada: bw     tā́ maitrāvaruṇáṃ práti nyā́gacʰanti

Pada: bx     yán maitrāvaruṇáṃ páyasā śrīṇā́ti

Line : 3  Pada: by     tā́sv evá páyo dadʰāti

Pada: bz     nā́nā vaí purā́ mitrā́váruṇābʰyām̐ sómā agr̥hṇan \

Line : 4  Pada: ca     tā́ḥ prajā́ anyā́nyásyāḥ parihā́yam ā́dadata

Line : 5  Pada: cb     táto mitrā́váruṇābʰyām̐ sahá sómam agr̥hṇan \

Pada: cc     táto vā́ akalpata

Line : 6  Pada: cd     yán maitrāvaruṇáṃ páyasā śrīṇā́ti

Pada: ce     mitréṇa vā́ etád váruṇaṃ kalpáyati váruṇena mitrám \

Line : 7  Pada: cf     mitrám̐ vaí vr̥tráṃ jagʰnivā́m̐sam̐ váruṇo 'gr̥hṇāt

Pada: cg     sá devéṣv anātʰata

Line : 8  Pada: ch     te 'bruvan

Pada: ci     váruṇe nātʰasvéti

Pada: cj     sá váruṇe 'nātʰata

Pada: ck     sò 'bravīt \

Pada: cl     bʰāgó me 'stv íti

Line : 9  Pada: cm     vr̥ṇīṣvéty abruvan \

Pada: cn     sò 'bravīt

Pada: co     sahaívá nau páyasā sómam̐ śrīṇān íti

Line : 10  Pada: cp     yán maitrāvaruṇáṃ páyasā śrīṇā́ti

Pada: cq     yájamānasya nirvaruṇatvā́ya

Pada: cr     yády enaṃ bʰrā́tr̥vyó 'tīva syā́d aṅgúlyāṅguṣṭʰám ávagr̥hṇīyāt \

Line : 11  Pada: cs     yády ánv aṅguṣṭʰénāṅgulim //

Line : 13  Pada: ct     yó no mitrāvaruṇā abʰidā́sāt sapátno bʰrā́tr̥vya utpípīte br̥haspate /

Line : 15  Pada: cu     idám aháṃ tám ádʰaraṃ pādayāmi yátʰāhám uttamáś cetáyāni // íti \

Line : 16  Pada: cv     uttamó ha cetayati //


Anuvaka: 9  
Line : 17  Pada: a     devā́ vaí sattrám āsata kurukṣetrè 'gnír makʰó vāyúr índras

Pada: b     tè 'bruvan

Pada: c     yatamó naḥ pratʰamá r̥dʰnávat tán * naḥ sahéti
      FN Correcturen und Conjecturen zu dem ganzen Werk.

Line : 18  Pada: d     téṣām̐ vaí makʰá ārdʰnot

Pada: e     tán nyàkāmayata

Page: 77  
Line : 1  Pada: f     tán * ná sámasr̥jata
      FN Correcturen und Conjecturen zu dem ganzen Werk.

Pada: g     tád asya prāsáhā́ditsanta

Pada: h     sá itá evá tisró 'janayata \

Line : 2  Pada: i     itó dʰánus

Pada: j     tát tisr̥ṇā́ṃ ca dʰánvanaś ca jánma

Pada: k     sá pratidʰā́yā́pākrāmat tán * nā́bʰyadʰr̥ṣṇuvat
      FN Correcturen und Conjecturen zu dem ganzen Werk.

Line : 3  Pada: l     sá dʰanvārtíṃ pratiṣkábʰyātiṣṭʰat

Pada: m     sá índro vamrī́r abravīt \

Pada: n     etā́ṃ jyā́m ápyattéti *
      FN Correcturen und Conjecturen zu dem ganzen Werk.

Line : 4  Pada: o     tā́ abruvan \

Pada: p     abʰímr̥tāyām̐ vā́ asyā́ṃ ná śakṣyāmo jī́vitum \

Line : 5  Pada: q     bʰāgó no 'stv íti

Pada: r     sò 'bravīt \

Pada: s     rásam evā́syā úpajīvātʰéti

Pada: t     tásmād etā́ḥ śúṣkād ārdrám úddihanti

Line : 6  Pada: u     rásam̐ hy àsyā́ upajī́vanti

Pada: v     tā́ vaí jyā́m ápyādan \

Line : 7  Pada: w     tásya dʰanvārtír udárdya * śíro 'cʰinat
      FN Correcturen und Conjecturen zu dem ganzen Werk.

Pada: x     sá samrā́ḍ abʰavat \

Pada: y     átʰétaraṃ tredʰā́ vyàgr̥hṇatāgníḥ pūrvārdʰám índro mádʰyam̐ vāyúr jagʰanārdʰám \

Line : 8  Pada: z     tásmād āgneyáṃ prātaḥsavanám aindráṃ mā́dʰyaṃdinam̐ sávanam̐ vaiśvadeváṃ tr̥tīyasavanám \

Line : 9  Pada: aa     vāyúr hí víśve devā́ḥ

Line : 10  Pada: ab     prāṇāpānaú vā́ upām̐śvantaryāmaú

Pada: ac     vyāná upām̐śusávanas \

Pada: ad     vā́g aindravāyavás \

Line : 11  Pada: ae     dakṣakratū́ maitrāvaruṇás \

Pada: af     āśvináḥ śrótram \

Pada: ag     cákṣuṣī śukrā́mantʰínau \

Line : 12  Pada: ah     ātmā́grāyaṇás \

Pada: ai     áṅgāny uktʰyā̀s

Pada: aj     ā́yur dʰruváḥ

Pada: ak     stánā r̥tupātré

Pada: al     mūrdʰā́ droṇakalaśáḥ

Line : 13  Pada: am     kukṣī́ kaláśau

Pada: an     hánū adʰiṣávaṇe

Pada: ao     jihvā́dʰiṣávaṇam \

Pada: ap     grā́vāṇo dántās \

Line : 14  Pada: aq     ákṣāḥ paridʰáyas \

Pada: ar     nā́sikottaravedíḥ

Pada: as     śikʰā yū́paḥ

Pada: at     śíro havirdʰā́nam \

Line : 15  Pada: au     pr̥ṣṭʰám ā́gnīdʰram

Pada: av     udáram̐ sádas \

Pada: aw     yád antár udáre tád dʰíṣṇyāḥ pāṇī́

Pada: ax     ā́gnīdʰraś ca mārjālī́yaś ca pā́rṣṇī

Line : 16  Pada: ay     gā́rhapatyaḥ pratiṣṭʰā́ védis \

Pada: az     eṣá vaí prajā́patiḥ pā́trīyaḥ

Line : 17  Pada: ba     sá ha tvā́ enam̐ veda yá evám̐ véda //


Next part


This text is part of the TITUS edition of Black Yajur-Veda: Maitrayani-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.