TITUS
Black Yajur-Veda: Taittiriya-Brahmana
Part No. 9
Previous part

Book: 2 
Chapter: 1 
Paragraph: 1 
Verse: 1    {BS 2.1.1.1}
Sentence: 1    áṅgiraso vái sattrám āsata /
Sentence: 2    téṣāṃ pŕ̥śnir gʰarmadʰúg āsīt /
Sentence: 3    sā́_r̥jīṣéṇa_ajīvat /
Sentence: 4    tè 'bruvan /
Sentence: 5    kásmai nú sattrám āsmahe /
Sentence: 6    yè 'syā́ óṣadʰīr ná janáyāma íti /
Sentence: 7    té divó vŕ̥ṣṭim asr̥janta /
Sentence: 8    yā́vantaḥ stokā́ avā́padyanta /
Sentence: 9    tā́vatīr óṣadʰayo 'jāyanta //
Sentence: 10    tā́ jātā́ḥ pitáro viṣéṇa_alimpan //

Verse: 2    {BS 2.1.1.2}
Sentence: 1    tā́sāṃ jagdʰvā́ rúpyanty áit /
Sentence: 2    tè 'bruvan /
Sentence: 3    ká idám ittʰám akar íti /
Sentence: 4    vayáṃ bʰāgadʰéyam iccʰámānā íti pitáro 'bruvan /
Sentence: 5    kíṃ vo bʰāgadʰéyam íti /
Sentence: 6    agnihotrá evá nó 'py astv íty abruvan /
Sentence: 7    tébʰya etád bʰāgadʰéyaṃ prā́yaccʰan /
Sentence: 8    yád dʰutvā́ nimā́rṣṭi /
Sentence: 9    táto vái tá óṣadʰīr asvadayan /
Sentence: 10    {F yá} {AS yá} {BS tá} eváṃ véda //

Verse: 3    {BS 2.1.1.3}
Sentence: 1    svádante 'smā óṣadʰayaḥ //
Sentence: 2    té vatsám upā́vāsr̥jan /
Sentence: 3    idáṃ no havyáṃ prádāpaya_íti /
Sentence: 4    sò 'bravīd váraṃ vr̥ṇai /
Sentence: 5    dáśa mā rā́trīr jātáṃ ná dohan /
Sentence: 6    āsaṃgaváṃ mātrā́ sahá carāṇi_íti /
Sentence: 7    tásmād vatsáṃ jātáṃ dáśa rā́trīr ná duhanti /
Sentence: 8    āsaṃgaváṃ mātrā́ sahá carati /
Sentence: 9    vā́revr̥tam̐ hy àsyá /
Sentence: 10    tásmād vatsám̐ sam̐sr̥ṣṭadʰayám̐ rudró gʰā́tukaḥ /
Sentence: 11    áti hí sandʰā́ṃ dʰáyati //

Paragraph: 2 
Verse: 1    {BS 2.1.2.4}
Sentence: 1    prajā́patir agním asr̥jata /
Sentence: 2    táṃ prajā́ ánv asr̥jyanta /
Sentence: 3    tám abʰāgá úpāsta /
Sentence: 4    sò 'sya prajā́bʰir ápākrāmat /
Sentence: 5    tám avarúrutsamānó 'nvait /
Sentence: 6    tám avarúdʰan ná_aśaknot /
Sentence: 7    sá tápo 'tapyata /
Sentence: 8    sò 'gnír úpāramata_átāpi vái syá prajā́patir íti //

Verse: 2    {BS 2.1.2.5}
Sentence: 1    tád gʰr̥tám abʰavat /
Sentence: 2    tásmād yásya dakṣiṇatáḥ kéśā únmr̥ṣṭāḥ /
Sentence: 3    tā́ṃ jyeṣṭhalakṣmī́ prājāpatyā́_íty āhuḥ /
Sentence: 4    yád rarā́ṭād udámr̥ṣṭa /
Sentence: 5    tásmād rarā́ṭe kéśā ná santi /
Sentence: 6    tád agnáu prā́gr̥hṇāt /
Sentence: 7    tád vyacikitsat /
Sentence: 8    juhávānī́3 mā́ hauṣā́3m íti /
Sentence: 9    tád vicikitsā́yai jánma /
Sentence: 10    yá eváṃ vidvā́n vicikítsati //

Verse: 3    {BS 2.1.2.6}
Sentence: 1    vásīya evá cetayate //
Sentence: 2    táṃ vā́g abʰyàvadaj juhúdʰi_íti /
Sentence: 3    sò 'bravīt /
Sentence: 4    kás tvám asi_íti /
Sentence: 5    svā́_evá te vā́g íty abravīt /
Sentence: 6    sò 'juhot svā́hā_íti /
Sentence: 7    tát svāhākārásya jánma /
Sentence: 8    yá evám̐ svāhākārásya jánma véda /
Sentence: 9    karóti svāhākāréṇa vīryàm /
Sentence: 10    yásya_eváṃ vidúṣaḥ svāhākāréṇa júhvati //

Verse: 4    {BS 2.1.2.7}
Sentence: 1    bʰógāya_evā́sya hutáṃ bʰavati //
Sentence: 2    tásyā ā́hutyai púruṣam asr̥jata /
Sentence: 3    dvitī́yam ajuhot /
Sentence: 4    só 'śvam asr̥jata /
Sentence: 5    tr̥tī́yam ajuhot /
Sentence: 6    sá gā́m asr̥jata /
Sentence: 7    caturtʰám ajuhot /
Sentence: 8    só 'vima sr̥jata /
Sentence: 9    pañcamám ajuhot /
Sentence: 10    sò 'jā́m asr̥jata //

Verse: 5    {BS 2.1.2.8}
Sentence: 1    sò 'gnír àbibʰet /
Sentence: 2    ā́hutībʰir vái mā_āpnoti_íti /
Sentence: 3    sá prajā́patiṃ púnaḥ prā́viśat /
Sentence: 4    táṃ prajā́patir abravīt /
Sentence: 5    jā́yasva_íti /
Sentence: 6    sò 'bravīt /
Sentence: 7    kíṃ bʰāgadʰéyam abʰíjaniṣya íti /
Sentence: 8    túbʰyam evá_idám̐ hūyātā íty abravīt /
Sentence: 9    sá etád bʰāgadʰéyam abʰyàjāyata /
Sentence: 10    yád agnihotrám //

Verse: 6    {BS 2.1.2.9}
Sentence: 1    tásmād agnihotrám ucyate //
Sentence: 2    tád dʰūyámānam ādityò 'bravīt /
Sentence: 3    mā́ hauṣīḥ /
Sentence: 4    ubʰáyor vái nāv etád íti /
Sentence: 5    sò 'gnír abravīt /
Sentence: 6    katʰáṃ nau hoṣyanti_íti /
Sentence: 7    sāyám evá túbʰyaṃ juhávan /
Sentence: 8    prātár máhyam íty abravīt /
Sentence: 9    tásmād agnáye sāyám̐ {F hūyate} {AS hūyate} {BS huyate} /
Sentence: 10    sū́ryāya prātáḥ //

Verse: 7    {BS 2.1.2.10}
Sentence: 1    āgneyī́ vái rā́triḥ /
Sentence: 2    aindrám áhaḥ /
Sentence: 3    yád ánudite sū́rye prātár juhuyāt /
Sentence: 4    ubʰáyam evá_āgneyám̐ syāt /
Sentence: 5    údite sū́rye prātár juhoti /
Sentence: 6    tátʰā_agnáye sāyám̐ hūyate /
Sentence: 7    sū́ryāya prātáḥ //
Sentence: 8    rā́triṃ vā́ ánu prajā́ḥ prájāyante /
Sentence: 9    áhnā prátitiṣṭhanti /
Sentence: 10    yát sāyáṃ juhóti //

Verse: 8    {BS 2.1.2.11}
Sentence: 1    prá_evá téna jāyate /
Sentence: 2    údite sū́rye prātár juhoti /
Sentence: 3    práty evá téna tiṣṭhati //
Sentence: 4    prajā́patir akāmayata prájāyeya_íti /
Sentence: 5    sá etád agnihotráṃ mitʰunám apaśyat /
Sentence: 6    tád údite sū́rye 'juhot /
Sentence: 7    yájuṣā_anyát /
Sentence: 8    tūṣṇī́m anyát /
Sentence: 9    táto vái sá prā́jāyata /
Sentence: 10    yásya_eváṃ vidúṣa údite sū́rye 'gnihotráṃ juhvati //

Verse: 9    {BS 2.1.2.12}
Sentence: 1    prá_evá jāyate /
Sentence: 2    átʰo yátʰā dívā prajānánn éti /
Sentence: 3    tādŕ̥g evá tát //
Sentence: 4    átʰo kʰálv āhuḥ /
Sentence: 5    yásya vái dváu púṇyau gr̥hé vásataḥ /
Sentence: 6    yás táyor anyám̐ rādʰáyaty anyáṃ ná /
Sentence: 7    ubʰáu vā́vá sá tā́v r̥ccʰati_íti /
Sentence: 8    agníṃ vā́vá_ādityaḥ sāyáṃ práviśati /
Sentence: 9    tásmād agnír dūrā́n náktaṃ dadr̥śe /
Sentence: 10    ubʰé hí téjasī saṃpádyete //

Verse: 10    {BS 2.1.2.13}
Sentence: 1    udyántaṃ vā́vá_ādityám agnír ánusamā́rohati /
Sentence: 2    tásmād dʰūmá evá_agnér dívā dadr̥śe /
Sentence: 3    yád agnáye sāyáṃ juhuyāt /
Sentence: 4    ā́ sū́ryāya vr̥ścyeta /
Sentence: 5    yát sū́ryāya prātár juhuyāt /
Sentence: 6    ā́_agnáye vr̥ścyeta /
Sentence: 7    devátābʰyaḥ samádaṃ dadʰyāt /
Sentence: 8    agnír jyótir jyótiḥ sū́ryaḥ svā́hā_íty evá sāyám̐ hotavyàm /
Sentence: 9    sū́ryo jyótir jyótir agníḥ svā́hā_íti prātáḥ /
Sentence: 10    tátʰā_ubʰā́bʰyām̐ sāyám̐ hūyate //

Verse: 11    {BS 2.1.2.14}
Sentence: 1    ubʰā́bʰyāṃ prātáḥ /
Sentence: 2    ná devátābʰyaḥ samádaṃ dadʰāti //
Sentence: 3    agnír jyótir íty āha /
Sentence: 4    agnír vái retodʰā́ḥ /
Sentence: 5    prajā́ jyótir íty āha /
Sentence: 6    prajā́ evā́smai prájanayati /
Sentence: 7    sū́ryo jyótir íty āha /
Sentence: 8    prajā́sv evá prájātāsu réto dadʰāti /
Sentence: 9    jyótir agníḥ svā́hā_íty āha /
Sentence: 10    prajā́ evá prájātā asyā́ṃ prátiṣṭhāpayati //

Verse: 12    {BS 2.1.2.15}
Sentence: 1    tūṣṇī́m úttarām ā́hutiṃ juhoti /
Sentence: 2    mitʰunatvā́ya prájātyai //
Sentence: 3    yád údite sū́rye prātár juhuyāt /
Sentence: 4    yátʰā_átitʰaye prádrutāya śūnyā́ya_āvasatʰā́ya_āhāryàm̐ háranti /
Sentence: 5    tādŕ̥g evá tát /
Sentence: 6    kvá_aha tátas tád bʰávati_íty āhuḥ /
Sentence: 7    yát sá ná véda /
Sentence: 8    yásmai tád dʰáranti_íti /
Sentence: 9    tásmād yád auṣasáṃ juhóti /
Sentence: 10    tád evá saṃpratí /
Sentence: 11    átʰo yátʰā prā́rtʰam auṣasáṃ párivéveṣṭi /
Sentence: 12    tādŕ̥g evá tát //

Paragraph: 3 
Verse: 1    {BS 2.1.3.16}
Sentence: 1    rudró vā́ eṣáḥ /
Sentence: 2    yád agníḥ /
Sentence: 3    pátnī stʰālī́ /
Sentence: 4    yán mádʰye 'gnér adʰiśráyet /
Sentence: 5    rudrā́ya pátnīm ápidadʰyāt /
Sentence: 6    pramā́yukā syāt /
Sentence: 7    udīcó 'ṅgārān nirū́hya_ádʰiśrayati /
Sentence: 8    pátniyai gopītʰā́ya /
Sentence: 9    vyàntān karoti /
Sentence: 10    tátʰā pátny ápramāyukā bʰavati //

Verse: 2    {BS 2.1.3.17}
Sentence: 1    gʰarmó vā́ eṣó 'śāntaḥ /
Sentence: 2    áhar_ahaḥ právr̥jyate /
Sentence: 3    yád agnihotrám /
Sentence: 4    prátiṣiñcet paśúkāmasya /
Sentence: 5    śāntám iva hí paśavyàm //
Sentence: 6    ná prátiṣiñced brahmavarcasákāmasya /
Sentence: 7    sámiddʰam iva hí brahmavarcasám /
Sentence: 8    átʰo kʰálu /
Sentence: 9    pratiṣícyam evá /
Sentence: 10    yát pratiṣiñcáti //

Verse: 3    {BS 2.1.3.18}
Sentence: 1    tát paśavyàm /
Sentence: 2    yáj juhóti /
Sentence: 3    tád brahmavarcasí /
Sentence: 4    ubʰáyam evá_akaḥ //
Sentence: 5    prácyutaṃ vā́ etád asmā́l lokā́t /
Sentence: 6    ágataṃ devalokám /
Sentence: 7    yát_śr̥tám̐ havír ánabʰigʰāritam /
Sentence: 8    abʰídyotayati /
Sentence: 9    abʰy èváinad gʰārayati /
Sentence: 10    átʰo devatrá_eváinad gamayati //

Verse: 4    {BS 2.1.3.19}
Sentence: 1    páryagni karoti /
Sentence: 2    rákṣasām ápahatyai /
Sentence: 3    tríḥ páryagni karoti /
Sentence: 4    tryā̀vr̥d dʰí yajñáḥ /
Sentence: 5    átʰo medʰyatvā́ya //
Sentence: 6    yát prācī́nam udvāsáyet /
Sentence: 7    yájamānam̐ śucā́_arpayet /
Sentence: 8    yád dakṣiṇā́ /
Sentence: 9    pitr̥devatyàm̐ syāt /
Sentence: 10    yát pratyák //

Verse: 5    {BS 2.1.3.20}
Sentence: 1    pátnīm̐ śucā́_arpayet /
Sentence: 2    udīcī́nam údvāsayati /
Sentence: 3    eṣā́ vái devamanuṣyā́ṇām̐ śāntā́ dík /
Sentence: 4    tā́m eváinad ánū́dvāsayati śā́ntyai //
Sentence: 5    vártma karoti /
Sentence: 6    yajñásya sáṃtatyai //
Sentence: 7    níṣṭapati /
Sentence: 8    úpa_evá tát str̥ṇāti //
Sentence: 9    catúr únnayati /
Sentence: 10    cátuṣpādaḥ paśávaḥ //

Verse: 6    {BS 2.1.3.21}
Sentence: 1    paśū́n evá_avarundʰe /
Sentence: 2    sárvān pūrṇā́n únnayati /
Sentence: 3    sárve hí púṇyā rāddʰā́ḥ /
Sentence: 4    anū́ca únnayati /
Sentence: 5    prajā́yā anūcīnatvā́ya /
Sentence: 6    anū́cy evā́sya prajā́_ardʰukā bʰavati //
Sentence: 7    sáṃmr̥śati vyā́vr̥ttyai //
Sentence: 8    ná_áhoṣyann úpasādayet /
Sentence: 9    yád áhoṣyann upasādáyet /
Sentence: 10    yátʰā_anyásmā upanidʰā́ya //

Verse: 7    {BS 2.1.3.22}
Sentence: 1    anyásmai prayáccʰati /
Sentence: 2    tādŕ̥g evá tát /
Sentence: 3    ā́_asmai vr̥ścyeta /
Sentence: 4    yád evá gā́rhapatye 'dʰiśráyati /
Sentence: 5    téna gā́rhapatyaṃ prīṇāti //
Sentence: 6    agnír abibʰet /
Sentence: 7    ā́hutayo mā_átyeṣyanti_íti /
Sentence: 8    sá etā́m̐ samídʰam apaśyat /
Sentence: 9    tā́m ā́dʰatta /
Sentence: 10    táto vā́ agnā́v ā́hutayo 'dʰriyanta //

Verse: 8    {BS 2.1.3.23}
Sentence: 1    yád enam̐ samáyaccʰat /
Sentence: 2    tát samídʰaḥ samittvám /
Sentence: 3    samídʰam ā́dadʰāti /
Sentence: 4    sám eváinaṃ yaccʰati /
Sentence: 5    ā́hutīnāṃ dʰŕ̥tyai /
Sentence: 6    átʰo agnihotrám evá_idʰmávat karoti /
Sentence: 7    ā́hutīnāṃ prátiṣṭhityai //
Sentence: 8    brahmavādíno vadanti /
Sentence: 9    yád ékām̐ samídʰam ādʰā́ya dvé ā́hutī juhóti /
Sentence: 10    átʰa kásyām̐ samídʰi dvitī́yām ā́hutiṃ juhoti_íti //

Verse: 9    {BS 2.1.3.24}
Sentence: 1    yád dvé samídʰāv ādadʰyā́t /
Sentence: 2    bʰrā́tr̥vyam asmai janayet /
Sentence: 3    ékām̐ samídʰam ādʰā́ya /
Sentence: 4    yájuṣā_anyā́m ā́hutiṃ juhoti /
Sentence: 5    ubʰé evá samídvatī ā́hutī juhoti /
Sentence: 6    ná_asmai bʰrā́tr̥vyaṃ janayati //
Sentence: 7    ā́dīptāyāṃ juhoti /
Sentence: 8    sámiddʰam iva hí brahmavarcasám /
Sentence: 9    átʰo yátʰā_átitʰiṃ jyótiṣ kr̥tvā́ parivéveṣṭi /
Sentence: 10    tādŕ̥g eva tát //
Sentence: 11    catúr únnayati /
Sentence: 12    dvír juhoti /
Sentence: 13    tásmād dvipā́d_cátuṣpādam atti /
Sentence: 14    átʰo dvipády evá cátuṣpadaḥ prátiṣṭhāpayati //

Paragraph: 4 
Verse: 1    {BS 2.1.4.25}
Sentence: 1    uttarā́vatīṃ vái devā́ ā́hutim ájuhavuḥ /
Sentence: 2    ávācīm ásurāḥ /
Sentence: 3    táto devā́ ábʰavan /
Sentence: 4    párā_ásurāḥ /
Sentence: 5    yáṃ kāmáyeta vásīyān syād íti /
Sentence: 6    kánīyas tásya pū́rvam̐ hutvā́ /
Sentence: 7    úttaraṃ bʰū́yo juhuyāt /
Sentence: 8    eṣā́ vā́ uttarā́vaty ā́hutiḥ /
Sentence: 9    tā́ṃ devā́ ajuhavuḥ /
Sentence: 10    tátastè 'bʰavan //

Verse: 2    {BS 2.1.4.26}
Sentence: 1    yásya_eváṃ júhvati /
Sentence: 2    bʰávaty evá //
Sentence: 3    yáṃ kāmáyeta pā́pīyānt syād íti /
Sentence: 4    bʰū́yas tásya pū́rvam̐ hutvā́ /
Sentence: 5    úttaraṃ kánīyo juhuyāt /
Sentence: 6    eṣā́ vā́ ávācy ā́hutiḥ /
Sentence: 7    tā́m ásurā ajuhavuḥ /
Sentence: 8    tátas té párābʰavan /
Sentence: 9    yásya_eváṃ júhvati /
Sentence: 10    párā_evá bʰavati //

Verse: 3    {BS 2.1.4.27}
Sentence: 1    hutvā́_upasādayaty ájāmitvāya /
Sentence: 2    átʰo vyā́vr̥ttyai //
Sentence: 3    gā́rhapatyaṃ prátīkṣate /
Sentence: 4    ánanudʰyāyinam eváinaṃ karoti //
Sentence: 5    agnihotrásya vái stʰāṇúr asti /
Sentence: 6    táṃ yá r̥ccʰét /
Sentence: 7    yajñastʰāṇúm r̥ccʰet /
Sentence: 8    eṣá vā́ agnihotrásya stʰāṇúḥ /
Sentence: 9    yát pū́rvā_ā́hutiḥ /
Sentence: 10    tā́ṃ yád úttarayā_abʰíjuhuyā́t //

Verse: 4    {BS 2.1.4.28}
Sentence: 1    yajñastʰāṇúm r̥ccʰet /
Sentence: 2    atihā́ya pū́rvām ā́hutiṃ juhoti /
Sentence: 3    yajñastʰāṇúm evá párivr̥ṇakti /
Sentence: 4    átʰo bʰrā́tr̥vyam evá_āptvā́_atikrāmati //
Sentence: 5    avācī́nam̐ sāyám úpamārṣṭi /
Sentence: 6    réta evá tád dadʰāti /
Sentence: 7    ūrdʰváṃ prātáḥ /
Sentence: 8    prá janayaty evá tát //
Sentence: 9    brahmavādíno vadanti /
Sentence: 10    catúr únnayati //

Verse: 5    {BS 2.1.4.29}
Sentence: 1    dvír juhoti /
Sentence: 2    átʰa kvà dvé ā́hutī bʰavata íti /
Sentence: 3    agnáu vaiśvānará íti brūyāt /
Sentence: 4    eṣá vā́ agnír vaiśvānaráḥ /
Sentence: 5    yád brāhmaṇáḥ /
Sentence: 6    hutvā́ dvíḥ prā́śnāti /
Sentence: 7    agnā́v evá vaiśvānaré dvé ā́hutī juhoti /
Sentence: 8    dvír juhóti /
Sentence: 9    dvír nímārṣṭi /
Sentence: 10    dvíḥ prā́śnāti //

Verse: 6    {BS 2.1.4.30}
Sentence: 1    ṣáṭ sáṃpadyante /
Sentence: 2    ṣáḍ vā́ r̥távaḥ /
Sentence: 3    r̥tū́n evá prīṇāti //
Sentence: 4    brahvamādíno vadanti /
Sentence: 5    kiṃdevatyàm agnihotrám íti /
Sentence: 6    vaiśvadevám íti brūyāt /
Sentence: 7    yád yájuṣā juhóti /
Sentence: 8    tád aindrāgnám /
Sentence: 9    yát tūṣṇī́m /
Sentence: 10    tát prājāpatyám //

Verse: 7    {BS 2.1.4.31}
Sentence: 1    yán nimā́rṣṭi /
Sentence: 2    tád óṣadʰīnām /
Sentence: 3    yád dvitī́yam /
Sentence: 4    tát pitr̥ṇā́m /
Sentence: 5    yát prā́śnāti /
Sentence: 6    tád gárbʰāṇām /
Sentence: 7    tásmād gárbʰā ánaśnanto vardʰante /
Sentence: 8    yád ācā́mati /
Sentence: 9    tán manuṣyā̀ṇām //
Sentence: 10    údaṅ paryāvŕ̥tya_ā́cāmati //

Verse: 8    {BS 2.1.4.32}
Sentence: 1    ātmáno gopītʰā́ya //
Sentence: 2    nírṇenekti śúddʰyai /
Sentence: 3    níṣṭapati svagā́kr̥tyai /
Sentence: 4    úddiśati /
Sentence: 5    saptar̥ṣī́n evá prīṇāti //
Sentence: 6    dakṣiṇā́ paryā́vartate /
Sentence: 7    svám evá vīryàm ánu paryā́vartate /
Sentence: 8    tásmād dákṣiṇó 'rdʰa ātmáno vīryā̀vattaraḥ /
Sentence: 9    átʰo ādityásyaivá_āvŕ̥tam ánu paryā́vartate //
Sentence: 10    hutvā́_upasámindʰe //

Verse: 9    {BS 2.1.4.33}
Sentence: 1    brahmavarcasásya sámiddʰyai //
Sentence: 2    ná barhír ánu práharet /
Sentence: 3    ásam̐stʰito vā́ eṣá yajñáḥ /
Sentence: 4    yád agnihotrám /
Sentence: 5    yád anupraháret /
Sentence: 6    yajñáṃ víccʰindyāt /
Sentence: 7    tásmān ná_anuprahŕ̥tyam /
Sentence: 8    yajñásya sáṃtatyai //
Sentence: 9    apó nínayati /
Sentence: 10    avabʰr̥tʰásyaivá rūpám akaḥ //

Paragraph: 5 
Verse: 1    {BS 2.1.5.34}
Sentence: 1    brahmavādíno vadanti /
Sentence: 2    agnihotráprāyaṇā yajñā́ḥ /
Sentence: 3    kíṃprāyaṇam agnihotrám íti /
Sentence: 4    vatsó vā́ agnihotrásya prā́yaṇam /
Sentence: 5    agnihotráṃ yajñā́nām /
Sentence: 6    tásya pr̥tʰivī́ sádaḥ /
Sentence: 7    antárikṣam ā́gnīdʰram /
Sentence: 8    dyáur havirdʰā́nam /
Sentence: 9    divyā́ ā́paḥ prókṣaṇayaḥ /
Sentence: 10    óṣadʰayo barhíḥ //

Verse: 2    {BS 2.1.5.35}
Sentence: 1    vánaspátaya idʰmáḥ /
Sentence: 2    díśaḥ paridʰáyaḥ /
Sentence: 3    ādityó yū́paḥ /
Sentence: 4    yájamānaḥ paśúḥ /
Sentence: 5    samudrò 'vabʰr̥tʰáh /
Sentence: 6    saṃvatsaráḥ svagākāráḥ /
Sentence: 7    tásmād ā́hitāgneḥ sárvam evá barhiṣyàṃ dattáṃ bʰavati /
Sentence: 8    yát sāyáṃ juhóti /
Sentence: 9    rā́trim evá téna dakṣiṇyā̀ṃ kurute /
Sentence: 10    yát prātáḥ //

Verse: 3    {BS 2.1.5.36}
Sentence: 1    áhar evá téna dakṣiṇyàṃ kurute /
Sentence: 2    yát táto dádāti /
Sentence: 3    sā́ dákṣiṇā //
Sentence: 4    yā́vanto vái devā́ áhutam ā́dan /
Sentence: 5    té párābʰavan /
Sentence: 6    tá etád agnihotrám̐ sárvasyaivá samavadā́ya_ajuhavuḥ /
Sentence: 7    tásmād āhuḥ /
Sentence: 8    agnihotráṃ vái dvā́ gr̥hā́ṇāṃ níṣkr̥tim apaśyann íti /
Sentence: 9    yát sāyáṃ juhóti /
Sentence: 10    rā́triyā evá tád dʰutā́dyāya //

Verse: 4    {BS 2.1.5.37}
Sentence: 1    yájamānasya_áparābʰāvāya /
Sentence: 2    yát prātáḥ /
Sentence: 3    áhna evá tád dʰutā́dyāya /
Sentence: 4    yájamānasya_áparābʰāvāya /
Sentence: 5    yát táto 'śnā́ti /
Sentence: 6    hutám evá tát //
Sentence: 7    dváyoḥ páyasā juhuyāt paśúkāmasya /
Sentence: 8    etád vā́ agnihotráṃ mitʰunám /
Sentence: 9    yá eváṃ véda /
Sentence: 10    prá prajáyā paśúbʰir mitʰunáir jāyate //

Verse: 5    {BS 2.1.5.38}
Sentence: 1    imā́m evá pū́rvayā duhé /
Sentence: 2    amū́m úttarayā /
Sentence: 3    adʰiśrítya_úttaram ā́nayati /
Sentence: 4    yónāv evá tád rétaḥ siñcati prajánane //
Sentence: 5    ā́jyena juhuyāt téjaskāmasya /
Sentence: 6    téjo vā́ ā́jyam /
Sentence: 7    tejasvy {BS taijasvy} èvá bʰavati /
Sentence: 8    páyasā paśúkāmasya /
Sentence: 9    etád vái paśūnā́m̐ rūpám /
Sentence: 10    rūpéna_evā́smai paśū́n ávarundʰe //

Verse: 6    {BS 2.1.5.39}
Sentence: 1    paśumā́n evá bʰavati /
Sentence: 2    dadʰnā́_indriyákāmasya /
Sentence: 3    indriyáṃ vái dádʰi /
Sentence: 4    indriyāvy èvá bʰavati /
Sentence: 5    yavāgvā̀ grā́makāmasya_oṣadʰā́ vái manuṣyā̀ḥ /
Sentence: 6    bʰāgadʰéyenaivā́smai sajātā́n ávarundʰe /
Sentence: 7    grāmy èvá bʰavati //
Sentence: 8    áyajño vā́ eṣáḥ /
Sentence: 9    yò 'sāmā́ //

Verse: 7    {BS 2.1.5.40}
Sentence: 1    catúr únnayati /
Sentence: 2    cáturakṣaram̐ ratʰaṃtarám /
Sentence: 3    ratʰantarásyaiṣá várṇaḥ /
Sentence: 4    upári_iva harati /
Sentence: 5    antárikṣaṃ vāmadevyám /
Sentence: 6    vāmadevyásyaiṣá várṇaḥ /
Sentence: 7    dvír juhoti /
Sentence: 8    dvyàkṣaraṃ br̥hát /
Sentence: 9    br̥hatá eṣá várṇaḥ /
Sentence: 10    agnihotrám evá tát sā́manvat karoti //

Verse: 8    {BS 2.1.5.41}
Sentence: 1    yó vā́ agnihotrásya_upasádo véda /
Sentence: 2    úpa_enam upasádo namanti /
Sentence: 3    vindáta upasattā́ram /
Sentence: 4    unnī́ya_úpasādayati /
Sentence: 5    pr̥tʰivī́m evá prīṇāti /
Sentence: 6    hoṣyánn úpasādayati /
Sentence: 7    antárikṣam evá prīṇāti /
Sentence: 8    hutvā́_upasādayati /
Sentence: 9    dívam evá prīṇāti /
Sentence: 10    etā́ vā́ agnihotrásya_upasádaḥ //

Verse: 9    {BS 2.1.5.42}
Sentence: 1    yá eváṃ véda /
Sentence: 2    úpa_enam upasádo namanti /
Sentence: 3    vindáta upasattā́ram //
Sentence: 4    yó vā́ agnihotrásya_ā́śrāvitaṃ pratyā́śrā́vitam̐ hótāraṃ brahmā́ṇaṃ vaṣaṭkāráṃ véda /
Sentence: 5    tásya tv èvá hutám /
Sentence: 6    prāṇó vā́ agnihotrásya_ā́śrāvitam /
Sentence: 7    apānáḥ pratyā́śrāvitam /
Sentence: 8    máno hótā /
Sentence: 9    cákṣur brahmā́ /
Sentence: 10    nimeṣó vaṣaṭkāráḥ //

Verse: 10    {BS 2.1.5.43}
Sentence: 1    yá eváṃ véda /
Sentence: 2    tásya tv èvá hutám //
Sentence: 3    sāyaṃyā́vānaś ca vái devā́ḥ prātaryā́vāṇaś ca_agnihotríṇo gr̥hám ā́gaccʰanti /
Sentence: 4    tā́n yán ná tarpáyet /
Sentence: 5    prajáyā_asya paśúbʰir vítiṣṭheran /
Sentence: 6    yát tarpáyet /
Sentence: 7    tr̥ptā́ enaṃ prajáyā paśúbʰis tarpayeyuḥ //
Sentence: 8    sajū́r deváiḥ sāyáṃ yā́vabʰir íti sāyám̐ sáṃmr̥śati /
Sentence: 9    sajū́r deváiḥ prātár yā́vabʰir íti prātáḥ /
Sentence: 10    yé caivá devā́ḥ sāyaṃyā́vāno yé ca prātaryā́vāṇaḥ //

Verse: 11    {BS 2.1.5.44}
Sentence: 1    tā́n evá_ubʰáyām̐s tarpayati /
Sentence: 2    tá enaṃ tr̥ptā́ḥ prajáyā paśúbʰis tarpayanti //
Sentence: 3    aruṇó ha sma_āha_áupaveśiḥ /
Sentence: 4    agnihotrá evá_ahám̐ sāyáṃ_prātar vájraṃ bʰrā́tr̥vyebʰyaḥ práharāmi /
Sentence: 5    tásmān mát pā́pīyām̐so bʰrā́tr̥vyā íti /
Sentence: 6    catúr únnayati /
Sentence: 7    dvír juhoti /
Sentence: 8    samít saptamī́ /
Sentence: 9    saptápadā śákvarī /
Sentence: 10    śākvaró vájraḥ /
Sentence: 11    agnihotrá evá tát sāyáṃ_prātar vájraṃ yájamāno bʰrā́tr̥vyāya práharati /
Sentence: 12    bʰávaty ātmánā /
Sentence: 13    párā_asya bʰrā́tr̥vyo bʰavati //

Paragraph: 6 
Verse: 1    {BS 2.1.6.45}
Sentence: 1    prajā́patir akāmayata_ātmanván me jāyeta_íti /
Sentence: 2    sò 'juhot /
Sentence: 3    tásya_ātmanvád ajāyata /
Sentence: 4    agnír vāyúr ādityáḥ /
Sentence: 5    tè 'bruvan /
Sentence: 6    prajā́patir ahauṣīd ātmanván me jāyeta_íti /
Sentence: 7    tásya vayám ajaniṣmahi /
Sentence: 8    jā́yatāṃ na ātmanvád íti tè 'juhavuḥ /
Sentence: 9    prāṇā́nām agníḥ /
Sentence: 10    tanúvai vāyúḥ //

Verse: 2    {BS 2.1.6.46}
Sentence: 1    cákṣuṣa ādityáḥ /
Sentence: 2    téṣām̐ hutā́d ajāyata gáur evá //
Sentence: 3    tásyai páyasi vyā́yaccʰanta /
Sentence: 4    máma hutā́d ajani máma_íti /
Sentence: 5    té prajā́patiṃ praśnám āyan /
Sentence: 6    sá ādityò 'gním abravīt /
Sentence: 7    yataró nau jáyāt /
Sentence: 8    tán nau sahá_asad íti /
Sentence: 9    kásya_ékó {BS kásyáikó} {AS kásyái kó} 'hauṣīd íti prajā́patir abravīt kásya_éka {BS kásyáikó} {AS kásyái ka} íti /
Sentence: 10    prāṇā́nām ahám íty agníḥ //

Verse: 3    {BS 2.1.6.47}
Sentence: 1    tanúvā ahám íti vāyúḥ /
Sentence: 2    cákṣuṣo 'hám íty ādityáḥ /
Sentence: 3    yá evá prāṇā́nām áhauṣīt /
Sentence: 4    tásya hutā́d ajani_íti /
Sentence: 5    agnér hutā́d ajani_íti /
Sentence: 6    tád agnihotrásya_agnihotratvám /
Sentence: 7    gáur vā́ āgnihotrám /
Sentence: 8    yá eváṃ véda gáur agnihotrám íti /
Sentence: 9    prāṇāpānā́bʰyām evá_agním̐ sámardʰayati /
Sentence: 10    ávyardʰukaḥ prāṇāpānā́bʰyāṃ bʰavati //

Verse: 4    {BS 2.1.6.48}
Sentence: 1    yá eváṃ véda //
Sentence: 2    táu vāyúr abravīt /
Sentence: 3    ánu mā_ā́bʰajatam íti /
Sentence: 4    yád evá gā́rhapatye 'dʰiśrítya_āhavanī́yam abʰyùddrávān /
Sentence: 5    téna tvā́ṃ prīṇān íty abrūtām /
Sentence: 6    tásmād yád gā́rhapatye 'dʰiśrítya_āhavanī́yam abʰyùddravati /
Sentence: 7    vāyúm evá téna prīṇāti //
Sentence: 8    prajā́patir devátāḥ sr̥jámānaḥ /
Sentence: 9    agním evá devátānāṃ pratʰamám asr̥jata /
Sentence: 10    sò 'nyád ālambʰyàm ávittvā //

Verse: 5    {BS 2.1.6.49}
Sentence: 1    prajā́patim abʰí paryā́vartata /
Sentence: 2    sá mr̥tyór abibʰet /
Sentence: 3    sò 'múm ādityám ātmáno níramimīta /
Sentence: 4    tám̐ hutvā́ párāṅ paryā́vartata /
Sentence: 5    táto vái sá mr̥tyúm ápājayat /
Sentence: 6    ápa mr̥tyúṃ jayati /
Sentence: 7    yá eváṃ véda //
Sentence: 8    tásmād yásya_eváṃ vidúṣaḥ /
Sentence: 9    uta_éka_ahám utá dvyaháṃ ná júhvati /
Sentence: 10    hutám evā́sya bʰavati /
Sentence: 11    asáu hy ādityò 'gnihotrám //

Paragraph: 7 
Verse: 1    {BS 2.1.7.50}
Sentence: 1    raudráṃ gávi /
Sentence: 2    vāyavyàm úpasr̥ṣṭam /
Sentence: 3    āśvináṃ duhyámānam /
Sentence: 4    saumyáṃ dugdʰám /
Sentence: 5    vāruṇám ádʰiśritam /
Sentence: 6    vaiśvadevā́ bʰindávaḥ /
Sentence: 7    pauṣṇám údantam /
Sentence: 8    sārasvatáṃ viṣyándamānam /
Sentence: 9    maitrám̐ śáraḥ /
Sentence: 10    dʰātúr údvāsitam /
Sentence: 11    bŕ̥haspáter únnītam /
Sentence: 12    savitúḥ prákrāntam /
Sentence: 13    dyāvāpr̥tʰivyàm̐ hriyámāṇam /
Sentence: 14    aindrāgnám úpasannam /
Sentence: 15    agnéḥ pū́rvā_ā́hutiḥ /
Sentence: 16    prajā́pater úttarā /
Sentence: 17    aindrám̐ hutám //

Paragraph: 8 
Verse: 1    {BS 2.1.8.51}
Sentence: 1    dakṣiṇatá úpasr̥jati /
Sentence: 2    pitr̥lokám evá téna jayati /
Sentence: 3    prā́cīm ā́vartayati /
Sentence: 4    devalokám evá téna jayati /
Sentence: 5    údīcīm āvrátya {BS,AS āvŕ̥tya} dogdʰi /
Sentence: 6    manuṣyalokám evá téna jayati //
Sentence: 7    pū́rvau duhyāj jyeṣṭhásya jyaiṣṭhineyásya /
Sentence: 8    yó vā gatáśrīḥ {Dumont āgatáśrīḥ} syā́t /
Sentence: 9    áparau duhyāt kaniṣṭhásya kāniṣṭhineyásya /
Sentence: 10    yó vā búbʰūṣet //

Verse: 2    {BS 2.1.8.52}
Sentence: 1    ná sáṃmr̥śati /
Sentence: 2    pāpavasyasásya vyā́vr̥ttyai //
Sentence: 3    vāyavyàṃ vā́ etád úpasr̥ṣṭam /
Sentence: 4    āśvináṃ duhyámānam /
Sentence: 5    maitráṃ dugdʰám /
Sentence: 6    aryamṇá udvāsyámānam /
Sentence: 7    tvāṣṭrám unnīyámānam /
Sentence: 8    bŕ̥haspáter únnītam /
Sentence: 9    savitúḥ prákrāntam /
Sentence: 10    dyāvāpr̥tʰivyàm̐ hriyámāṇam //

Verse: 3    {BS 2.1.8.53}
Sentence: 1    aindrāgnám úpasāditam /
Sentence: 2    sárvābʰyo vā́ eṣá devátābʰyo juhoti /
Sentence: 3    yò 'gnihotráṃ juhóti //
Sentence: 4    yátʰā kʰálu vái dʰenúṃ tīrtʰé tarpáyati /
Sentence: 5    evám agnihotrī́ yájamānaṃ tarpayati /
Sentence: 6    tŕ̥pyati prajáyā paśúbʰiḥ /
Sentence: 7    prá suvargáṃ lokáṃ jānāti /
Sentence: 8    páśyati putrám /
Sentence: 9    páśyati páutram /
Sentence: 10    prá prajáyā paśúbʰir mitʰunáir jāyate /
Sentence: 11    yásya_eváṃ vidúṣo 'gnihotráṃ juhvati /
Sentence: 12    yá u cainad eváṃ véda //

Paragraph: 9 
Verse: 1    {BS 2.1.9.54}
Sentence: 1    tráyo vái praiyamedʰā́ āsan /
Sentence: 2    téṣāṃ trír éko 'gnihotrám ajuhot /
Sentence: 3    dvír ékaḥ /
Sentence: 4    sakŕ̥d ékaḥ /
Sentence: 5    téṣāṃ yás trír ajuhot /
Sentence: 6    sá r̥cā́_ajuhot /
Sentence: 7    yó dvíḥ /
Sentence: 8    sá yájuṣā /
Sentence: 9    yáḥ sakŕ̥t /
Sentence: 10    sá tūṣṇī́m //

Verse: 2    {BS 2.1.9.55}
Sentence: 1    yáś ca yájuṣā́_ajuhod yáś ca tūṣṇī́m /
Sentence: 2    tā́v ubʰā́v ārdʰnutām /
Sentence: 3    tásmād yájuṣā_ā́hutiḥ pū́rvā hotavyā̀ /
Sentence: 4    tūṣṇī́m úttarā /
Sentence: 5    ubʰé evá_r̥ddʰī́ ávarundʰe //
Sentence: 6    agnír jyótir jyótir agníḥ svā́hā_íti sāyáṃ juhoti /
Sentence: 7    réta evá tád dadʰāti /
Sentence: 8    sū́ryo jyótir jyótiḥ sū́ryaḥ svā́hā_íti prātáḥ /
Sentence: 9    réta evá hitáṃ prájanayati //
Sentence: 10    réto vā́ etásya hitáṃ ná prájāyate //

Verse: 3    {BS 2.1.9.56}
Sentence: 1    yásya_agnihotrám áhutam̐ sū́ryo 'bʰy ùdéti /
Sentence: 2    yády ánte syā́t /
Sentence: 3    unnī́ya prā́ṅ udā́dravet /
Sentence: 4    sá upasā́dya_ā́támitor āsīta /
Sentence: 5    sá yadā́tā́myet /
Sentence: 6    átʰa bʰū́ḥ svā́hā_íti juhuyāt /
Sentence: 7    prajā́patir vái bʰūtáḥ /
Sentence: 8    tám evá_upāsarat /
Sentence: 9    sá eváinaṃ táta únnayati /
Sentence: 10    ná_ā́rtim ā́rccʰati yájamānaḥ //

Paragraph: 10 
Verse: 1    {BS 2.1.10.57}
Sentence: 1    yád agním uddʰárati /
Sentence: 2    vásavas tárhy agníḥ /
Sentence: 3    tásmin yásya tátʰāvidʰe júhvati /
Sentence: 4    vásuṣv evā́sya_agnihotrám̐ hutáṃ bʰavati //
Sentence: 5    níhito dʰūpāyáñ_ śete /
Sentence: 6    rudrā́s tárhy agníḥ /
Sentence: 7    tásmin yásya tátʰāvidʰe júhvati /
Sentence: 8    rudréṣv evá_asya_agnihotrám̐ hutáṃ bʰavati //
Sentence: 9    pratʰamám idʰmám arcir ā́labʰate /
Sentence: 10    ādityā́s tárhy agníḥ //

Verse: 2    {BS 2.1.10.58}
Sentence: 1    tásmin yásya tátʰāvidʰe júhvati /
Sentence: 2    ādityéṣv evā́sya_agnihotrám̐ hutáṃ bʰavati //
Sentence: 3    sárva evá sarvaśá idʰmá ā́dīpto bʰavati /
Sentence: 4    víśve devā́s tárhy agníḥ /
Sentence: 5    tásmin yásya tátʰāvidʰe júhvati /
Sentence: 6    víśveṣv evā́sya devéṣv agnihotrám̐ hutáṃ bʰavati //
Sentence: 7    nitarā́m arcír upā́vaiti lohinī́kā_iva bʰavati /
Sentence: 8    índras tárhy agníḥ /
Sentence: 9    tásmin yásya tátʰāvidʰe júhvati /
Sentence: 10    índra evā́sya_agnihotrám̐ hutáṃ bʰavati //

Verse: 3    {BS 2.1.10.59}
Sentence: 1    áṅgārā bʰavanti /
Sentence: 2    tébʰyó 'ṅgārebʰyo 'rcír údeti /
Sentence: 3    prajā́patis tárhy agníḥ /
Sentence: 4    tásmin yásya tátʰāvidʰe júhvati /
Sentence: 5    prajā́patāv evā́sya_agnihotrám̐ hutáṃ bʰavati //
Sentence: 6    śáró 'ṅgārā ádʰyūhante /
Sentence: 7    bráhma tárhy agníḥ /
Sentence: 8    tásmin yásya tátʰāvidʰe júhvati /
Sentence: 9    bráhmann evā́sya_agnihotrám̐ hutáṃ bʰavati //
Sentence: 10    vásuṣu rudréṣv ādityéṣu víśveṣu devéṣu /
Sentence: 11    índre prajā́patau bráhman /
Sentence: 12    áparivargam evā́sya_etā́su devátāsu hutáṃ bʰavati /
Sentence: 13    yásya_eváṃ vidúṣo 'gnihotráṃ júhvati /
Sentence: 14    yá u ca_enad eváṃ véda //

Paragraph: 11 
Verse: 1    {BS 2.1.11.60}
Sentence: 1    r̥táṃ tvā satyéna páriṣiñcāmi_íti sāyáṃ páriṣiñcati /
Sentence: 2    satyáṃ tvā_r̥téna páriṣiñcāmi_íti prātáḥ /
Sentence: 3    agnír vā́ r̥tám /
Sentence: 4    asā́v ādityáḥ satyám /
Sentence: 5    agním evá tád ādityéna sāyáṃ páriṣiñcati /
Sentence: 6    agnínā_ādityáṃ prātáḥ sáḥ /
Sentence: 7    yā́vad ahorātré bʰávataḥ /
Sentence: 8    tā́vad asya lokásya /
Sentence: 9    ná_ártir ná ŕ̥ṣṭiḥ /
Sentence: 10    ná_ánto ná paryantò 'sti /
Sentence: 11    yásya_eváṃ vidúṣo 'gnihotráṃ júhvati /
Sentence: 12    yá u ca_enad eváṃ véda //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.