TITUS
Black Yajur-Veda: Taittiriya-Brahmana
Part No. 10
Previous part

Chapter: 2 
Paragraph: 1 
Verse: 1    {BS 2.2.1.1}
Sentence: 1    prajā́patir akāmayata prajā́ḥ sr̥jeya_íti /
Sentence: 2    sá etáṃ dáśahotāram apaśyat /
Sentence: 3    táṃ mánasā_anudrútya darbʰastámbe 'juhot /
Sentence: 4    táto vái sá prajā́ asr̥jata /
Sentence: 5    tā́ asmāt sr̥ṣṭā́ ápākrāman /
Sentence: 6    tā́ gráheṇa_agr̥hṇāt /
Sentence: 7    tád gráhasya grahatvám /
Sentence: 8    yáḥ kāmáyeta prájāyeya_íti /
Sentence: 9    sá dáśahotāraṃ mánasā_anudrútya darbʰastambé juhuyāt /
Sentence: 10    prajā́patir vái dáśahotā //

Verse: 2    {BS 2.2.1.2}
Sentence: 1    prajā́patir evá bʰūtvā́ prájāyate //
Sentence: 2    mánasā juhoti /
Sentence: 3    mána iva hí prajā́patiḥ /
Sentence: 4    prajā́pater ā́ptyai {//} pūrṇáyā juhoti /
Sentence: 5    pūrṇá iva hí prajā́patiḥ /
Sentence: 6    prajā́paterā́ptyai //
Sentence: 7    nyū̀nayā juhoti /
Sentence: 8    nyū̀nād dʰí prajā́patiḥ prajā́ ásr̥jata /
Sentence: 9    prajā́nām̐ sŕ̥ṣṭyai //

Verse: 3    {BS 2.2.1.3}
Sentence: 1    darbʰastambé juhoti /
Sentence: 2    etásmād vái yóneḥ prajā́patiḥ prajā́ asr̥jata /
Sentence: 3    yásmād evá yóneḥ prajā́patiḥ prajā́ ásr̥jata /
Sentence: 4    tásmād evá yóneḥ prá jāyate //
Sentence: 5    brāhmaṇó dakṣiṇatá úpāste /
Sentence: 6    brāhmaṇó vái prajā́nām upadraṣṭā́ /
Sentence: 7    upadraṣṭumáty evá prájāyate //
Sentence: 8    gráho bʰavati /
Sentence: 9    prajā́nām̐ sr̥ṣṭā́nāṃ dʰŕ̥tyai //
Sentence: 10    yáṃ brāhmaṇáṃ vidyā́ṃ vidvā́m̐saṃ yáśo ná_r̥ccʰet {BS nárccʰét} //

Verse: 4    {BS 2.2.1.4}
Sentence: 1    só 'raṇyaṃ parétya /
Sentence: 2    darbʰastambám udgrátʰya /
Sentence: 3    brāhmaṇáṃ dakṣiṇató niṣádya /
Sentence: 4    cáturhotr̥̄n vyā́cakṣīta /
Sentence: 5    etád vái devā́nāṃ paramáṃ gúhyaṃ bráhma /
Sentence: 6    yác cáturhotāraḥ /
Sentence: 7    tád evá prakāśáṃ gamayati /
Sentence: 8    tád enaṃ prakāśáṃ gatám /
Sentence: 9    prakāśáṃ prajā́nāṃ gamayati //
Sentence: 10    darbʰastambám udgrátʰya vyā́caṣṭe //

Verse: 5    {BS 2.2.1.5}
Sentence: 1    agnivā́n vái darbʰastambáḥ /
Sentence: 2    agniváty evá vyā́caṣṭe //
Sentence: 3    brāhmaṇó dakṣiṇatá úpāste /
Sentence: 4    brāhmaṇó vái prajā́nām upadraṣṭā́ /
Sentence: 5    upadraṣṭumáty eváinaṃ yáśa r̥ccʰati //
Sentence: 6    īśvaráṃ táṃ yáśó 'rtor íty āhuḥ /
Sentence: 7    yásyā́ṃ te vyācáṣṭa íti /
Sentence: 8    váras tásmai déyaḥ /
Sentence: 9    yád eváinaṃ tátra_upanámati /
Sentence: 10    tád evá_avarundʰe //

Verse: 6    {BS 2.2.1.6}
Sentence: 1    agním ādádʰāno dáśahotrā_aráṇim ávadadʰyāt /
Sentence: 2    prájātam eváinam ā́dʰatte /
Sentence: 3    ténaivá_uddrútya_agnihotráṃ juhuyāt /
Sentence: 4    prájātam eváinaj juhoti /
Sentence: 5    havír nirvapsyán dáśahotāraṃ vyā́cakṣīta /
Sentence: 6    prájātam eváinaṃ nírvapati /
Sentence: 7    sāmidʰenī́r anuvakṣyán dáśahotāraṃ vyā́cakṣīta /
Sentence: 8    sāmidʰenír evá sr̥ṣṭvā́_ārábʰya prátanute /
Sentence: 9    átʰo yajñó vái dáśahotā /
Sentence: 10    yajñám evá tanute //

Verse: 7    {BS 2.2.1.7}
Sentence: 1    abʰicáran dáśahotāraṃ juhuyāt /
Sentence: 2    náva vái púruṣe prāṇāḥ /
Sentence: 3    nā́bʰir daśamī́ /
Sentence: 4    sáprāṇam eváinam abʰícarati /
Sentence: 5    etā́vad vái púruṣasya svám /
Sentence: 6    yā́vat prāṇā́ḥ /
Sentence: 7    yā́vad evā́sya_ásti /
Sentence: 8    tád abʰícarati //
Sentence: 9    svákr̥ta íriṇe juhoti pradaré vā /
Sentence: 10    etád vā́ asyái nírr̥tigr̥hītam /
Sentence: 11    nírr̥tigr̥hīta eváinaṃ nírr̥tyā grāhayati //
Sentence: 12    yád vācáḥ krūrám /
Sentence: 13    téna váṣaṭkaroti /
Sentence: 14    vācá eváinaṃ krūréṇa právr̥ścati /
Sentence: 15    tā jágā́rtim ā́rccʰati //

Paragraph: 2 
Verse: 1    {BS 2.2.2.8}
Sentence: 1    prajā́patir akāmayata darśapūrṇamāsáu sr̥jeya_íti /
Sentence: 2    sá etáṃ cáturhotāram apaśyat /
Sentence: 3    táṃ mánasā_anudrútya_āhavanī́ye 'juhot /
Sentence: 4    táto vái sá darśapūrṇamāsā́v asr̥jata /
Sentence: 5    tā́v asmāt sr̥ṣṭā́v ápākrāmatām {BS apākrāmatām} /
Sentence: 6    táu gráheṇa_agr̥hṇāt /
Sentence: 7    tád gráhasya grahatvám /
Sentence: 8    darśapūrṇamāsā́v ālábʰamānaḥ /
Sentence: 9    cáturhotāraṃ mánasā_anudrútya_āhavanī́ye juhuyāt /
Sentence: 10    darśapūrṇamāsā́v evá sr̥ṣṭvā́_ārábʰya prátanute //

Verse: 2    {BS 2.2.2.9}
Sentence: 1    gráho bʰavati /
Sentence: 2    darśapūrṇamāsáyoḥ sr̥ṣṭáyor dʰŕ̥tyai //
Sentence: 3    sò 'kāmayata cāturmāsyā́ni sr̥jeya_íti /
Sentence: 4    sá etáṃ páñcahotāram apaśyat /
Sentence: 5    táṃ mánasā_anudrútya_āhavanī́ye 'juhot /
Sentence: 6    táto vái sá cāturmāsyā́ny asr̥jata /
Sentence: 7    tā́ny asmāt sr̥ṣṭā́ny ápākrāman /
Sentence: 8    tā́ni gráheṇa_agr̥hṇāt /
Sentence: 9    tád gráhasya grahatvám /
Sentence: 10    cāturmāsyā́ny ālábʰamānaḥ //

Verse: 3    {BS 2.2.2.10}
Sentence: 1    páñcahotāraṃ mánasā_anudrútya_āhavanī́ye juhuyāt /
Sentence: 2    cāturmāsyā́ny evá sr̥ṣṭvā́_ārábʰya prátanute /
Sentence: 3    gráho bʰavati /
Sentence: 4    cāturmāsyā́nām̐ sr̥ṣṭā́nāṃ dʰŕ̥tyai //
Sentence: 5    sò 'kāmayata paśubandʰám̐ sr̥jeya_iti /
Sentence: 6    sá etám̐ ṣáḍḍhotāram apaśyat /
Sentence: 7    táṃ mánsā_anudrútya_āhavanī́ye 'juhot /
Sentence: 8    táto vái sá paśubandʰám asr̥jata /
Sentence: 9    sò 'smā́t sr̥ṣṭó 'pākrāmat /
Sentence: 10    táṃ gráheṇa_agr̥hṇāt //

Verse: 4    {BS 2.2.2.11}
Sentence: 1    tád gráhasya grahatvám /
Sentence: 2    paśubandʰéna yakṣyámāṇaḥ /
Sentence: 3    ṣáḍḍhotāraṃ mánasā_anudrútya_āhavanī́ye juhuyāt /
Sentence: 4    paśubandʰám evá sr̥ṣṭvā́_ārábʰya prátanute /
Sentence: 5    gráho bʰavati /
Sentence: 6    paśubandʰásya sr̥ṣṭásya dʰŕ̥tyai //
Sentence: 7    sò 'kāmayata saumyám adʰvarám̐ sr̥jeya_íti /
Sentence: 8    sá etám̐ saptáhotāram apaśyat /
Sentence: 9    táṃ mánasā_anudrútya_āhavanī́ye 'juhot /
Sentence: 10    táto vái sá saumyám adʰvarám asr̥jata //

Verse: 5    {BS 2.2.2.12}
Sentence: 1    sò 'smā́t sr̥ṣṭó 'pākrāmat /
Sentence: 2    táṃ gráheṇa_agr̥hṇāt /
Sentence: 3    tád gráhasya grahatvám /
Sentence: 4    dīkṣiṣyámāṇaḥ /
Sentence: 5    saptáhotāraṃ mánasā_anudrútya_āhavanī́ye juhuyāt /
Sentence: 6    saumyám evá_adʰvarám̐ sr̥ṣṭvā́_ārábʰya prátanute /
Sentence: 7    gráho bʰavati /
Sentence: 8    saumyásya_adʰvarásya sr̥ṣṭásya dʰŕ̥tyai //
Sentence: 9    devébʰyo vái yajñó na prā́bʰavat /
Sentence: 10    tám etā́vat_śas sámabʰaran //

Verse: 6    {BS 2.2.2.13}
Sentence: 1    yát saṃbʰārā́ḥ /
Sentence: 2    táto vái tébʰyo yajñáḥ prā́bʰavat /
Sentence: 3    yát saṃbʰārā́ bʰavani /
Sentence: 4    yajñásya prábʰūtyai /
Sentence: 5    ātitʰyám āsā́dya vyā́caṣṭe /
Sentence: 6    yajñamukʰáṃ vā́ ātitʰyáṃ /
Sentence: 7    mukʰatá evá yajñám̐ saṃbʰŕ̥tya prátanute //
Sentence: 8    áyajño vā́ eṣáḥ /
Sentence: 9    yò 'patnī́kaḥ /
Sentence: 10    ná prajā́ḥ {BS /} prájāyeran /
Sentence: 11    pátnīr vyā́caṣṭe /
Sentence: 12    yajñám evá_akaḥ /
Sentence: 13    prajā́nāṃ prajánanāya //
Sentence: 14    upasátsu vyā́caṣṭe /
Sentence: 15    etád vái pátnīnām āyátanam /
Sentence: 16    svá eváinā āyátané 'vakalpayati //

Paragraph: 3 
Verse: 1    {BS 2.2.3.14}
Sentence: 1    prajā́patir akāmayata prájāyeya_íti /
Sentence: 2    sá tápo 'tapyata /
Sentence: 3    sá trivr̥tam̐ stómam asr̥jata /
Sentence: 4    táṃ pañcadaśástómo madʰyatá údatr̥ṇat /
Sentence: 5    táu pūrvapakṣáś ca_aparapakṣáś ca_abʰavatām /
Sentence: 6    pūrvapakṣáṃ devā́ ánvásr̥jyanta /
Sentence: 7    aparapakṣám ánv ásurāḥ /
Sentence: 8    táto devā́ ábʰavan /
Sentence: 9    párā_ásurāḥ /
Sentence: 10    yáṃ kāmáyeta vásīyānt syād íti //

Verse: 2    {BS 2.2.3.15}
Sentence: 1    táṃ pūrvapakṣé yājayet /
Sentence: 2    vásīyān evá bʰavati /
Sentence: 3    yáṃ kāmáyeta pā́pīyānt syād íti /
Sentence: 4    tám aparapakṣé yājayet /
Sentence: 5    pā́pīyān evá bʰavati /
Sentence: 6    tásmāt pūrvapakṣò 'parapakṣā́t karuṇyàtaraḥ //
Sentence: 7    prajā́patir vái dáśahotā /
Sentence: 8    cáturhotā páñcahotā /
Sentence: 9    ṣáḍḍhotā saptáhotā /
Sentence: 10    r̥távaḥ saṃvatsaráḥ //

Verse: 3    {BS 2.2.3.16}
Sentence: 1    prajā́ḥ paśáva imé lokā́ḥ /
Sentence: 2    yá eváṃ prajā́patiṃ bahór bʰū́yām̐saṃ véda /
Sentence: 3    bahór evá bʰū́yān bʰavati //
Sentence: 4    prajā́patir deva_asurā́n asr̥jata /
Sentence: 5    sá índram ápi ná_asr̥jata /
Sentence: 6    táṃ devā́ abruvan /
Sentence: 7    índraṃ no janaya_íti /
Sentence: 8    sò 'bravīt /
Sentence: 9    yátʰā_aháṃ yuṣmā́m̐s tápasā_ásr̥kṣi /
Sentence: 10    evám índraṃ janayadʰvam íti //

Verse: 4    {BS 2.2.3.17}
Sentence: 1    té tápo 'tapyanta /
Sentence: 2    tá ātmánn índram apaśyan /
Sentence: 3    tám abruvan /
Sentence: 4    jā́yasva_íti /
Sentence: 5    sò 'bravīt /
Sentence: 6    kím bʰāgadʰéyam abʰíjaniṣya íti /
Sentence: 7    r̥tū́nt saṃvatsarám /
Sentence: 8    prajā́ḥ praśū́n /
Sentence: 9    imā́n_lokā́n íty abruvan /
Sentence: 10    táṃ vái mā_ā́hutyā prájanayata_íty abravīt //

Verse: 5    {BS 2.2.3.18}
Sentence: 1    táṃ cáturhotrā prā́janayan //
Sentence: 2    yáḥ kāmáyeta vīró ma ā́jāyeta_íti /
Sentence: 3    sá cáturhotāraṃ juhuyāt /
Sentence: 4    prajā́patir vái cáturhotā /
Sentence: 5    prajā́patir evá bʰūtvā́ prájāyate /
Sentence: 6    jajánad índram indriyā́ya svā́hā_íti gráheṇa juhoti /
Sentence: 7    ā́sya vīró jāyate /
Sentence: 8    vīrám̐ hí devā́ etáyā_ā́hutyā prā́janayan //
Sentence: 9    ādityā́ś ca_áṅgirasaś ca suvargé lokè 'spardʰanta /
Sentence: 10    vayáṃ pū́rve suvargáṃ lokám iyāma vayáṃ pū́rva íti //

Verse: 6    {BS 2.2.3.19}
Sentence: 1    tá ādityā́ etáṃ páñcahotāram apaśyan /
Sentence: 2    táṃ purā́ prātaranuvākā́d ā́gnīdʰre 'juhavuḥ /
Sentence: 3    táto vái té pū́rve suvargáṃ lokám āyan /
Sentence: 4    yáḥ suvargákāmaḥ syā́t /
Sentence: 5    sá páñcahotāraṃ purā́ prātaranuvākā́d ā́gnīdʰre juhuyāt /
Sentence: 6    saṃvatsaró vái páñcahotā /
Sentence: 7    saṃvatsaráḥ suvargó lokáḥ /
Sentence: 8    saṃvatsará evá_r̥túṣu pratiṣṭhā́ya /
Sentence: 9    suvargáṃ lokám eti //
Sentence: 10    té 'bruvann áṅgirasa ādityā́n //

Verse: 7    {BS 2.2.3.20}
Sentence: 1    kvà stʰa /
Sentence: 2    kvà vaḥ sadbʰyó havyáṃ vakṣyāma íti /
Sentence: 3    cʰándaḥsv íty abruvan /
Sentence: 4    gāyatriyā́ṃ triṣṭúbʰi jágatyām íti /
Sentence: 5    tásmāc cʰándaḥsu sadbʰyá ādityébʰyaḥ /
Sentence: 6    āṅgīrasī́ḥ prajā́ havyáṃ vahanti /
Sentence: 7    váhanty asmai prajā́ balím /
Sentence: 8    ā́_enam ápratikʰyātaṃ gaccʰati /
Sentence: 9    yá eváṃ véda //
Sentence: 10    dvā́daśa mā́sāḥ páñca_r̥távaḥ /
Sentence: 11    tráya imé lokā́ḥ /
Sentence: 12    asā́v ādityá ekavim̐śáḥ /
Sentence: 13    etásmin vā́ eṣá śritáḥ /
Sentence: 14    etásmin prátiṣṭhitaḥ /
Sentence: 15    yá evám etám̐ śritáṃ prátiṣṭhitaṃ véda /
Sentence: 16    práty evá tiṣṭhati //

Paragraph: 4 
Verse: 1    {BS 2.2.4.21}
Sentence: 1    prajā́patir akāmayata prájāyeya_íti /
Sentence: 2    sá etáṃ dáśahotāram apaśyat /
Sentence: 3    téna daśadʰā́_ātmā́naṃ vidʰā́ya /
Sentence: 4    dáśahotrā_atapyata /
Sentence: 5    tásya cíttiḥ srúg ā́sīt /
Sentence: 6    cittám ā́jyam /
Sentence: 7    tásya_etā̀vaty evá vā́g ā́sīt /
Sentence: 8    etā́vān yajñakratúḥ //
Sentence: 9    sá cáturhotāram asr̥jata /
Sentence: 10    sò 'nandat //

Verse: 2    {BS 2.2.4.22}
Sentence: 1    ásr̥kṣi vā́ imám íti /
Sentence: 2    tásya sómo havír ā́sit /
Sentence: 3    sá cáturhotrā_atapyata /
Sentence: 4    sò 'tāmyat /
Sentence: 5    sá bʰū́r íti vyā́harat /
Sentence: 6    sá bʰū́mim asr̥jata /
Sentence: 7    agnihotráṃ darśāpūrṇamāsáu yájūm̐ṣi /
Sentence: 8    sá dvitī́yam atapyata /
Sentence: 9    sò 'tāmyat /
Sentence: 10    sá bʰúva íti vyā́harat //

Verse: 3    {BS 2.2.4.23}
Sentence: 1    sò 'ntárikṣam asr̥jata /
Sentence: 2    cāturmāsyā́ni sā́māni /
Sentence: 3    sá tr̥tī́yam atapyata /
Sentence: 4    sò 'tāmyat /
Sentence: 5    sá súvar íti vyā́harat /
Sentence: 6    sá dívam asr̥jata /
Sentence: 7    agniṣṭomám uktʰyàm atirātrám ŕ̥caḥ /
Sentence: 8    etā́ vái vyā́hr̥taya imé lokā́ḥ /
Sentence: 9    imā́n kʰálu vái lokā́n ánu prajā́ḥ paśávaś cʰándām̐si prā́jāyanta /
Sentence: 10    yá evám etā́ḥ prajā́pateḥ pratʰamā́ vyā́hr̥tīḥ prájātā véda //

Verse: 4    {BS 2.2.4.24}
Sentence: 1    prá prajáyā paśúbʰir mitʰunáir jāyate //
Sentence: 2    sá páñcahotāram asr̥jata /
Sentence: 3    sá havir ná_avindata /
Sentence: 4    tásmai sómas tanúvaṃ prā́yaccʰat /
Sentence: 5    etát te havír íti /
Sentence: 6    sá páñcahotrā_atapyata /
Sentence: 7    sò 'tāmyat /
Sentence: 8    sá pratyáṅṅ abādʰata /
Sentence: 9    sò 'surān asr̥jata /
Sentence: 10    tád asya_ápriyam āsīt //

Verse: 5    {BS 2.2.4.25}
Sentence: 1    tád durvárṇam̐ híraṇyam abʰavat /
Sentence: 2    tád durvárṇasya híraṇyasya jánma /
Sentence: 3    sá dvitī́yam atapyata /
Sentence: 4    sò 'tāmyat /
Sentence: 5    sá prā́ṅ abādʰata /
Sentence: 6    sá devā́n asr̥jata /
Sentence: 7    tád asya priyám asīt /
Sentence: 8    tát suvárṇam̐ híraṇyam abʰavat /
Sentence: 9    tát suvárṇasya híraṇyasya jánma /
Sentence: 10    yá evám̐ suvárṇasya híraṇyasya jánma véda //

Verse: 6    {BS 2.2.4.26}
Sentence: 1    suvárṇa ātmánā bʰavati /
Sentence: 2    durvárṇo 'sya bʰrā́tr̥vyaḥ /
Sentence: 3    tásmāt suvárṇam̐ híraṇyaṃ bʰāryàm /
Sentence: 4    suvárṇa evá bʰavati /
Sentence: 5    ā́_énaṃ priyáṃ gaccʰati ná_ápriyam //
Sentence: 6    sá saptáhotāram asr̥jata /
Sentence: 7    sá saptáhotrā_evá suvargáṃ lokám ait //
Sentence: 8    triṇavéna stómena_ebʰyó lokébʰyó 'surān prā́ṇudata /
Sentence: 9    trayastrim̐śéna prátyatiṣṭhat /
Sentence: 10    ekavim̐śéna rúcam adʰatta //

Verse: 7    {BS 2.2.4.27}
Sentence: 1    saptadaśéna prā́jāyata /
Sentence: 2    yá eváṃ vidvā́nt sómena yájate /
Sentence: 3    saptáhotrā_evá suvargáṃ lokám eti /
Sentence: 4    triṇavéna stomena_ebʰyó lokébʰyo bʰrā́tr̥vyān práṇudate /
Sentence: 5    trayastrim̐śéna prátitiṣṭhati /
Sentence: 6    ekavim̐śéna rúcaṃ dʰatte /
Sentence: 7    saptadaśéna prájāyate /
Sentence: 8    tásmāt saptadaśáḥ stómo ná nirhŕ̥tyaḥ /
Sentence: 9    prajā́patir vái saptadaśáḥ /
Sentence: 10    prajā́patim evá madʰyató dʰatte prájātyai //

Paragraph: 5 
Verse: 1    {BS 2.2.5.28}
Sentence: 1    devā́ vái váruṇam ayājayan /
Sentence: 2    sá yásyai_yasyai devátāyai dákṣiṇām ánayat /
Sentence: 3    tā́m avlīnāt /
Sentence: 4    tè 'bruvan /
Sentence: 5    vyāvŕ̥tya práti gr̥hṇāma /
Sentence: 6    tátʰā no dákṣiṇā ná vleṣyati_íti /
Sentence: 7    té vyāvŕ̥tya prátyagr̥hṇan /
Sentence: 8    táto vái tā́n {BS tā́ṃ} dákṣiṇā ná_avlīnāt /
Sentence: 9    yá eváṃ vidvā́n vyāvŕ̥tya dákṣiṇāṃ pratigr̥hṇā́ti /
Sentence: 10    ná_enaṃ dákṣiṇā vlīnāti //

Verse: 2    {BS 2.2.5.29}
Sentence: 1    rā́jā tvā váruṇo nayatu devi dakṣiṇè 'gnáye híraṇyam íty āha /
Sentence: 2    āgneyáṃ vái híraṇyam /
Sentence: 3    sváyā_eváinad devátayā prátigr̥hṇāti /
Sentence: 4    sómāya vā́sa íty āha /
Sentence: 5    saumyáṃ vái vā́saḥ /
Sentence: 6    sváyā_eváinad devátayā prátigr̥hṇāti /
Sentence: 7    rudrā́ya gā́m íty āha /
Sentence: 8    raudrī́ vái gáuḥ /
Sentence: 9    sváyā_eváinā́ṃ devátayā prátigr̥hṇāti /
Sentence: 10    váruṇāya_áśvam íty āha //

Verse: 3    {BS 2.2.5.30}
Sentence: 1    vāruṇó vā́ áśvaḥ /
Sentence: 2    sváyā_eváinaṃ devátayā prátigr̥hṇāti /
Sentence: 3    prājā́pataye púruṣam íty āha /
Sentence: 4    prājāpatyó vái púruṣaḥ /
Sentence: 5    sváyā_eváinaṃ devátayā prátigr̥hṇāti /
Sentence: 6    mánave tálpam íty āha /
Sentence: 7    mānavó vái tálpaḥ /
Sentence: 8    sváyā_eváinaṃ devátayā prátigr̥hṇāti /
Sentence: 9    uttānā́yā_āṅgīrasa_áyā́na íty āha /
Sentence: 10    iyáṃ vā́ uttāná āṅgīrasáḥ //

Verse: 4    {BS 2.2.5.31}
Sentence: 1    anáyā_eváinat prátigr̥hṇāti //
Sentence: 2    vaiśvānaryā́_r̥cā́ rátʰaṃ prátigr̥hṇāti /
Sentence: 3    vaiśvānaró vái devátayā rátʰaḥ /
Sentence: 4    sváyā_eváinaṃ devátayā prátigr̥hṇāti //
Sentence: 5    téna_amr̥tatvám aśyām íty āha /
Sentence: 6    amŕ̥tam evá_ātmán dʰatte //
Sentence: 7    váyo dātrá íty āha /
Sentence: 8    váya eváinaṃ kr̥tvā́ /
Sentence: 9    suvargáṃ lokáṃ gamayati /
Sentence: 10    máyo máhyam astu pratigrahītrá íty āha //

Verse: 5    {BS 2.2.5.32}
Sentence: 1    yád vái śivám /
Sentence: 2    tán máyaḥ /
Sentence: 3    ātmána eváiṣā́ párīttiḥ //
Sentence: 4    ká idáṃ kásmā adād íty āha /
Sentence: 5    prajā́patir vái káḥ /
Sentence: 6    sá prajā́pataye dadāti //
Sentence: 7    kā́maḥ kā́māya_íty āha /
Sentence: 8    kā́mena hí dádāti /
Sentence: 9    kā́mena pratigr̥hṇā́ti //
Sentence: 10    kā́mo dātā́ kā́maḥ pratigrahītā́_íty āha //

Verse: 6    {BS 2.2.5.33}
Sentence: 1    kā́mo hí dātā́ /
Sentence: 2    kā́maḥ pratigrahītā́ //
Sentence: 3    kā́mam̐ samudrámā́viśa_íty āha /
Sentence: 4    samudrá iva hí kā́maḥ /
Sentence: 5    ná_iva hí kā́masya_ántò 'sti /
Sentence: 6    ná samudrásya //
Sentence: 7    kā́mena tvā prátigr̥hṇāmi_íty āha /
Sentence: 8    yéna kā́mena pratigr̥hṇā́ti /
Sentence: 9    sá eváinam amúṣmin_loké kā́ma ā́gaccʰati //
Sentence: 10    kā́ma_etát ta eṣā́ te kā́ma dákṣiṇā_íty āha /
Sentence: 11    kā́ma evá tád yájamāno 'múṣmin_loké dákṣiṇām iccʰti /
Sentence: 12    ná pratigrahītári //
Sentence: 13    yá eváṃ vidvā́n dákṣiṇāṃ pratigr̥hṇā́ti /
Sentence: 14    anr̥ṇā́m eváināṃ prátigr̥hṇāti //

Paragraph: 6 
Verse: 1    {BS 2.2.6.34}
Sentence: 1    ánto vā́ eṣá yajñásya /
Sentence: 2    yád daśamám áhaḥ /
Sentence: 3    daśamé 'han sarparājñíyā r̥gbʰíḥ stuvanti /
Sentence: 4    yajñásya_evá_ántaṃ gatvā́ /
Sentence: 5    annā́dyam ávarundʰate //
Sentence: 6    tisŕ̥bʰiḥ stuvanti /
Sentence: 7    tráya imé lokā́ḥ /
Sentence: 8    ebʰyá evá lokébʰyo 'nnā́dyam ávarundʰate /
Sentence: 9    pŕ̥śnivatīr bʰavanti /
Sentence: 10    ánnaṃ vái pŕ̥śni //

Verse: 2    {BS 2.2.6.35}
Sentence: 1    ánnam evá_avarundʰate //
Sentence: 2    mánasā prástauti /
Sentence: 3    mánasā_údgāyati /
Sentence: 4    mánasā prátiharati /
Sentence: 5    mána iva hí prajā́patiḥ /
Sentence: 6    prajā́pater ā́ptyai //
Sentence: 7    devā́ vái sarpā́ḥ /
Sentence: 8    téṣām iyám̐ rā́jñī /
Sentence: 9    yát sarparājñíyā r̥gbʰíḥ stuvánti /
Sentence: 10    asyā́m evá prátitiṣṭhanti //

Verse: 3    {BS 2.2.6.36}
Sentence: 1    cáturhotr̥̄n hótā vyā́caṣṭe /
Sentence: 2    stutám ánuśam̐sati śā́ntyai //
Sentence: 3    ánto vā́ eṣá yajñásya /
Sentence: 4    yád daśamám áhaḥ /
Sentence: 5    etát kʰálu vái devā́nāṃ páramaṃ gúhyaṃ bráhma /
Sentence: 6    yác cáturhotāraḥ /
Sentence: 7    daśamé 'ham̐ś cáturhotr̥̄n vyā́caṣṭe /
Sentence: 8    yajñásya_evá_ántaṃ gatvā́ /
Sentence: 9    paramáṃ devā́nāṃ gúhyaṃ bráhma_ávarundʰe /
Sentence: 10    tád evá prakāśáṃ gamayati //

Verse: 4    {BS 2.2.6.37}
Sentence: 1    tád enaṃ prakāśáṃ gatám /
Sentence: 2    prakāśáṃ prajā́nāṃ gamayati //
Sentence: 3    vā́caṃ yaccʰati /
Sentence: 4    yájñásya dʰŕ̥tyai //
Sentence: 5    yajamānadevatyàṃ vā́ áhaḥ /
Sentence: 6    bʰrātr̥vyadevatyā̀ rā́triḥ /
Sentence: 7    áhnā rā́triṃ dʰyāyet /
Sentence: 8    bʰrā́tr̥vyasya_evá tál lokáṃ vr̥ṅkte /
Sentence: 9    yád dívā vā́caṃ visr̥jét /
Sentence: 10    áhar bʰrā́tr̥vyāya_úccʰim̐ṣet /
Sentence: 11    yán náktaṃ visr̥jét /
Sentence: 12    rā́triṃ bʰrā́tr̥vyāya_úccʰim̐ṣet /
Sentence: 13    adʰivr̥kṣasūryé vā́caṃ vísr̥jati /
Sentence: 14    etā́vantam evā́smai lokám úccʰim̐ṣati /
Sentence: 15    yā́vad ādityò 'staméti //

Paragraph: 7 
Verse: 1    {BS 2.2.7.38}
Sentence: 1    prajā́patiḥ prajā́ asr̥jata /
Sentence: 2    tā́ḥ sr̥ṣṭā́ḥ sámaśliṣyan /
Sentence: 3    tā́ rūpéṇa_ánuprā́viśat /
Sentence: 4    tásmād āhuḥ /
Sentence: 5    rūpáṃ vái prajā́patir íti /
Sentence: 6    tā́ nā́mnā_ánuprā́viśat /
Sentence: 7    tásmād āhuḥ /
Sentence: 8    nā́ma vái prajā́patir íti /
Sentence: 9    tásmād ápy āmitráu saṃgátya /
Sentence: 10    nā́mnā céd dʰváyete //

Verse: 2    {BS 2.2.7.39}
Sentence: 1    mitrám evá bʰavataḥ //
Sentence: 2    prajā́patir deva_asurā́n asr̥jata /
Sentence: 3    sá índram ápi ná_asr̥jata /
Sentence: 4    táṃ devā́ abruvan /
Sentence: 5    índraṃ no janaya_íti /
Sentence: 6    sá ātmánn índram apaśyat /
Sentence: 7    tám asr̥jata /
Sentence: 8    táṃ triṣṭúg vīryàṃ bʰūtvā́_anuprā́viśat /
Sentence: 9    tásya vájraḥ pañcadaśó hásta ā́padyata /
Sentence: 10    téna_udáyya_ásurān abʰyàbʰavat //

Verse: 3    {BS 2.2.7.40}
Sentence: 1    yá eváṃ véda /
Sentence: 2    abʰí bʰrā́tr̥vyān bʰavati //
Sentence: 3    té devā́ ásurair vijítya /
Sentence: 4    suvargáṃ lokám āyan /
Sentence: 5    tè 'múṣmin_loké vyakṣudʰyan /
Sentence: 6    tè 'bruvan /
Sentence: 7    amútaḥ pradānaṃ vā́ úpajijīvima_íti /
Sentence: 8    té saptáhotāraṃ yajñáṃ vidʰā́ya_ayā́syam /
Sentence: 9    āṅgīrasáṃ prā́hiṇvan /
Sentence: 10    eténa_amútra kalpaya_íti //

Verse: 4    {BS 2.2.7.41}
Sentence: 1    tásya vā́ iyáṃ kŀ̥ptiḥ /
Sentence: 2    yád idáṃ kíṃ ca /
Sentence: 3    yá eváṃ véda /
Sentence: 4    kálpate 'smai /
Sentence: 5    sá vā́ ayáṃ manuṣyèṣu yajñáḥ saptáhotā /
Sentence: 6    amútra sadbʰyó devébʰyo havyáṃ vahati /
Sentence: 7    yá eváṃ véda /
Sentence: 8    úpa_enaṃ yajñó namati //
Sentence: 9    sò 'manyata /
Sentence: 10    abʰí vā́ imè 'smāl lokā́d amúṃ lokáṃ kamiṣyanta íti /
Sentence: 11    sá vā́caspate hŕ̥d íti vyā́harat /
Sentence: 12    tásmāt puttró hŕ̥dayam /
Sentence: 13    tásmād asmā́l lokā́d amúṃ lokáṃ ná_abʰíkāmayante /
Sentence: 14    putró hí hŕ̥dayam //

Paragraph: 8 
Verse: 1    {BS 2.2.8.42}
Sentence: 1    devā́ vái cáturhotr̥bʰir yajñám atanvata /
Sentence: 2    té ví pāpmánā bʰrā́tr̥vyeṇa_ájayanta /
Sentence: 3    abʰí suvargáṃ lokám ajayan /
Sentence: 4    yá eváṃ vidvā́m̐ś cáturhotr̥bʰir yajñáṃ tanuté /
Sentence: 5    ví pāpmánā bʰrā́tr̥vyeṇa jayate /
Sentence: 6    abʰí suvargáṃ lokáṃ jayati //
Sentence: 7    ṣáḍḍhotrā prāyaṇī́yam ā́sādayati /
Sentence: 8    amúṣmai vái lokā́ya ṣáḍḍhotā /
Sentence: 9    gʰnánti kʰálu vā́ etát sómam /
Sentence: 10    yád abʰiṣuṇvánti //

Verse: 2    {BS 2.2.8.43}
Sentence: 1    r̥judʰā_éváinam amúṃ lokáṃ gamayati /
Sentence: 2    cáturhotrā_ātitʰyám /
Sentence: 3    yáśo vái cáturhotā /
Sentence: 4    yáśa evá_ātmán dʰatte /
Sentence: 5    páñcahotrā paśúm úpasādayati /
Sentence: 6    suvargyò vái páñcahotā /
Sentence: 7    yájamānaḥ paśúḥ /
Sentence: 8    yájamānam evá suvargáṃ lokáṃ gamayati /
Sentence: 9    gráhān gr̥hītvā́ saptáhotāraṃ juhoti /
Sentence: 10    indriyáṃ vái saptáhotā //

Verse: 3    {BS 2.2.8.44}
Sentence: 1    indriyám evá_ātmán dʰatte //
Sentence: 2    yó vái cáturhotr̥̄n anusavanáṃ tarpáyati /
Sentence: 3    tŕ̥pyati prajáyā paśúbʰiḥ /
Sentence: 4    úpa_enam̐ somapītʰó namati /
Sentence: 5    bahiṣpavamāné dáśahotāraṃ vyā́cakṣīta /
Sentence: 6    mā́dʰyandine pávamāne cáturhotāram /
Sentence: 7    ā́rbʰave pávamāne páñcahotāram /
Sentence: 8    pitr̥yajñé ṣáḍḍhotāram /
Sentence: 9    yajñāyajñíyasya stotré saptáhotāram /
Sentence: 10    anusavanám eváinām̐s tarpayati //

Verse: 4    {BS 2.2.8.45} {AS misses the number!}
Sentence: 1    tŕ̥pyati prajáyā paśúbʰiḥ /
Sentence: 2    úpa_enam̐ somapītʰó namati //
Sentence: 3    devā́ vái cáturhotr̥bʰiḥ sattrám āsata /
Sentence: 4    ŕ̥ddʰiparimitaṃ yáśaskāmāḥ /
Sentence: 5    tè 'bruvan /
Sentence: 6    yán naḥ pratʰamáṃ yáśa r̥ccʰā́t /
Sentence: 7    sárveṣāṃ nas tát sahá_asad íti /
Sentence: 8    sómaś cáturhotrā /
Sentence: 9    agníḥ páñcahotrā /
Sentence: 10    dʰātā́ ṣáḍḍhotrā //

Verse: 5    {BS 2.2.8.46}
Sentence: 1    índraḥ saptáhotrā /
Sentence: 2    prajā́patir dáśahotrā /
Sentence: 3    téṣām̐ sómam̐ rā́jānaṃ yáśa ārccat //
Sentence: 4    tán nyakāmayata /
Sentence: 5    téna_ápākrāmat /
Sentence: 6    téna pralā́yam acarat /
Sentence: 7    táṃ devā́ḥ praiṣáiḥ práiṣam aiccʰan /
Sentence: 8    tát praiṣā́ṇāṃ praiṣatvám /
Sentence: 9    nivídbʰir nyàvedayan /
Sentence: 10    tán nivídāṃ nivittvám //

Verse: 6    {BS 2.2.8.47}
Sentence: 1    āprī́bʰir āpnuvan /tád āprī́ṇām āpritvám /
Sentence: 2    tám agʰnan /
Sentence: 3    tásya yáśo vyàgr̥hṇata /
Sentence: 4    té gráhā abʰavan /
Sentence: 5    tád gráhāṇāṃ grahatvám /
Sentence: 6    yásya_eváṃ vidúṣo gráhā gr̥hyánte /
Sentence: 7    tásya tv èva gr̥hītā́ḥ //
Sentence: 8    tè 'bruvan /
Sentence: 9    yó vái naḥ śréṣṭhó 'bʰūt //

Verse: 7    {BS 2.2.8.48}
Sentence: 1    tám avadʰiṣma /
Sentence: 2    púnar imám̐ suvāmahā íti /
Sentence: 3    táṃ cʰándobʰir asuvanta /
Sentence: 4    tác cʰándasāṃ cʰandastvám /
Sentence: 5    sā́mnā sámā́nayan /
Sentence: 6    tát sā́mnaḥ sāmatvám /
Sentence: 7    uktʰáir údastʰāpayan /
Sentence: 8    tád uktʰā́nām uktʰatvám /
Sentence: 9    yá eváṃ véda /
Sentence: 10    práty evá tiṣṭhati //

Verse: 8    {BS 2.2.8.49}
Sentence: 1    sárvam ā́yur eti //
Sentence: 2    sómo vái yáśaḥ /
Sentence: 3    yá eváṃ vidvā́nt sómam āgáccʰati /
Sentence: 4    yáśa eváinam r̥ccʰati /
Sentence: 5    tásmād āhuḥ /
Sentence: 6    yáś ca_eváṃ véda yáś ca ná /
Sentence: 7    tā́v ubʰáu sómam ā́gaccʰataḥ /
Sentence: 8    sómo hí yáśaḥ /
Sentence: 9    táṃ tvā́ vá yáśa r̥ccʰati_íty āhuḥ /
Sentence: 10    yáḥ sóme sómaṃ prā́ha_íti /
Sentence: 11    tásmāt sóme sómaḥ prócyaḥ /
Sentence: 12    yáśa eváinam r̥ccʰati //

Paragraph: 9 
Verse: 1    {BS 2.2.9.50}
Sentence: 1    idáṃ vā́ ágre ná_evá kíṃ caná_āsīt /
Sentence: 2    ná dyáur āsīt /
Sentence: 3    ná pr̥tʰivī́ /
Sentence: 4    ná_antárikṣam /
Sentence: 5    tád ásad evá sán máno 'kuruta syā́m íti /
Sentence: 6    tád atapyata /
Sentence: 7    tásmāt tepānā́d dʰūmò 'jāyata /
Sentence: 8    tád bʰū́yo 'tapyata /
Sentence: 9    tásmāt tepānā́d agnír ajāyata /
Sentence: 10    tád bʰū́yo 'tapyata //

Verse: 2    {BS 2.2.9.51}
Sentence: 1    tásmāt tepānā́j jyótir ajāyata /
Sentence: 2    tád bʰū́yo 'tapyata /
Sentence: 3    tásmāt tepānā́d arcír ajāyata /
Sentence: 4    tád bʰū́yo 'tapyata /
Sentence: 5    tásmāt tepānā́n márīcayo 'jāyanta /
Sentence: 6    tád bʰū́yo 'tapyata /
Sentence: 7    tásmāt tepānā́d udārā́ ajāyanta /
Sentence: 8    tád bʰū́yo 'tapyata /
Sentence: 9    tád abbʰrám iva sámahanyata //
Sentence: 10    tád vastím abʰinat //

Verse: 3    {BS 2.2.9.52}
Sentence: 1    sá samudrò 'bʰavat /
Sentence: 2    tásmāt samudrásya ná pibanti /
Sentence: 3    prajánanam iva hí mányante /
Sentence: 4    tásmāt paśór jā́yamānād ā́paḥ purást ādyanti //
Sentence: 5    tád dáśahotā_anvasr̥jyata /
Sentence: 6    prajā́patir vái dáśahotā /
Sentence: 7    yá eváṃ tápaso vīryàṃ vidvā́m̐s tápyate /
Sentence: 8    bʰávaty evá //
Sentence: 9    tád vā́ idám ā́pas salilám āsīt /
Sentence: 10    sò 'rodīt prajā́patiḥ //

Verse: 4    {BS 2.2.9.53}
Sentence: 1    sá kásmā ajñi /
Sentence: 2    yády asyā́ ápratiṣṭhāyā íti /
Sentence: 3    yád apsv àvā́padyata /
Sentence: 4    sā́ pr̥tʰivy àbʰavat /
Sentence: 5    yád vyámr̥ṣṭa /
Sentence: 6    tád antárikṣam abʰavat /
Sentence: 7    yád ūrdʰvám udámr̥ṣṭa /
Sentence: 8    sā́ dyáur abʰavat /
Sentence: 9    yád árodīt /
Sentence: 10    tád anáyo rodastvám //

Verse: 5    {BS 2.2.9.54}
Sentence: 1    yá eváṃ véda /
Sentence: 2    ná_asya gr̥hé rudanti /
Sentence: 3    etád vā́ eṣā́ṃ lokā́nāṃ jánma /
Sentence: 4    yá evám eṣā́ṃ lokā́nāṃ jánma véda /
Sentence: 5    ná_eṣú lokéṣv ā́rtim ā́rccʰati /
Sentence: 6    sá imā́ṃ pratiṣṭhā́m avindata //
Sentence: 7    sá imā́ṃ pratiṣṭhā́ṃ vittvā́_akāmayata prájāyeya_íti /
Sentence: 8    sá tápo 'tapyata /
Sentence: 9    sò 'ntárvān abʰavat /
Sentence: 10    sá jagʰánād ásurān asr̥jata //

Verse: 6    {BS 2.2.9.55}
Sentence: 1    tébʰyo mr̥nmáye pā́tré 'nnam aduhat /
Sentence: 2    yā́_asya sā́ tanū́r ā́sīt /
Sentence: 3    tā́m ápāhata /
Sentence: 4    sā́ támisrā_abʰavat //
Sentence: 5    sò 'kāmayata prájāyeya_íti /
Sentence: 6    sá tápo 'tapyata /
Sentence: 7    sò 'ntárvān abʰavat /
Sentence: 8    sá prajánanād evá prajā́ asr̥jata /
Sentence: 9    tásmād imā́ bʰū́yiṣṭhāḥ /
Sentence: 10    prajánanād dʰy ènā ásr̥jata //

Verse: 7    {BS 2.2.9.56}
Sentence: 1    tā́bʰyo dārumáye pā́tre páyo 'duhata /
Sentence: 2    yā́_asya sā́ tanū́r ā́sīt /
Sentence: 3    tā́m ápāhata sā́ jótsnā_abʰavat //
Sentence: 4    sò 'kāmayata prájāyeya_íti /
Sentence: 5    sá tápo 'tapyata /
Sentence: 6    sò 'ntárvān abʰavat /
Sentence: 7    sá upapakṣā́bʰyām evá_r̥tū́n asr̥jata /
Sentence: 8    tébʰyo rajaté pā́tre gʰr̥tám aduhat /
Sentence: 9    yā́_asya sā́ tanū́r ā́sīt //

Verse: 8    {BS 2.2.9.57}
Sentence: 1    tám ápāhata /
Sentence: 2    sò 'horātráyoḥ sandʰír abʰavat //
Sentence: 3    sò 'kāmayata prájāyeya_íti /
Sentence: 4    sá tápo 'tapyata /
Sentence: 5    sò 'natárvān abʰavat /
Sentence: 6    sá múkʰād devā́n asr̥jata /
Sentence: 7    tébʰyo hárite pā́tre sómam aduhata /
Sentence: 8    yā́_asya sā́ tanū́r ā́sīt /
Sentence: 9    tā́m ápāhata /
Sentence: 10    tád áhar abʰavat //

Verse: 9    {BS 2.2.9.58}
Sentence: 1    eté vái prajā́pater dóhāḥ /
Sentence: 2    yá eváṃ véda /
Sentence: 3    duhá evá prajā́ḥ //
Sentence: 4    dívā vái no 'bʰūd íti /
Sentence: 5    tád devā́nāṃ devatvám /
Sentence: 6    yá eváṃ devā́nāṃ devatváṃ véda /
Sentence: 7    devávān evá bʰvati //
Sentence: 8    etád vā́ ahorātrā́ṇāṃ jánma /
Sentence: 9    yá evám ahorātrā́ṇāṃ jánma véda /
Sentence: 10    ná_ahorātréṣv ā́rtim ā́rccʰati //

Verse: 10    {BS 2.2.9.59}
Sentence: 1    ásató 'dʰi máno 'sr̥jyata /
Sentence: 2    mánaḥ prajā́patim asr̥jata /
Sentence: 3    prajā́patiḥ prajā́ asr̥jata /
Sentence: 4    tád vā́ idáṃ mánasy evá paramáṃ prátiṣṭhitam /
Sentence: 5    yád idáṃ kíṃ ca /
Sentence: 6    tád etát_śvòvasyasáṃ nā́ma bráhma //
Sentence: 7    vyuccʰántī vyuccʰanty asmai vásyasī vasyasī vyuccʰati /
Sentence: 8    prájāyate prajáyā paśúbʰiḥ /
Sentence: 9    prá parameṣṭhíno mā́trām āpnoti /
Sentence: 10    yá eváṃ véda //

Paragraph: 10 
Verse: 1    {BS 2.2.10.60}
Sentence: 1    prajā́patir índram asr̥jata_ānujāvaráṃ devā́nām /
Sentence: 2    táṃ prā́hiṇot /
Sentence: 3    párehi /
Sentence: 4    etéṣāṃ devā́nām ádʰipatir edʰi_íti /
Sentence: 5    táṃ devā́ abruvan /
Sentence: 6    kás tvám ási /
Sentence: 7    vayáṃ vái tvát_śréyām̐saḥ sma íti /
Sentence: 8    sò 'bravīt /
Sentence: 9    kás tvám ási vayáṃ vái tvát_śréyām̐saḥ sma íti mā devā́ avocann íti //
Sentence: 10    átʰa vā́ idáṃ tárhi prajā́patau hára āsīt //

Verse: 2    {BS 2.2.10.61}
Sentence: 1    yád asmínn ādityé /
Sentence: 2    tád enam abravīt /
Sentence: 3    etán me práyaccʰa /
Sentence: 4    átʰa_ahám etéṣāṃ devā́nām ádʰipatir bʰaviṣyāmi_íti /
Sentence: 5    kò 'ham̐ syām íty abravīt /
Sentence: 6    etát pradā́ya_íti /
Sentence: 7    etát syā íty abravīt /
Sentence: 8    yád etád brávīṣi_íti /
Sentence: 9    kó ha vái nā́ma prajā́patiḥ /
Sentence: 10    yá eváṃ véda //

Verse: 3    {BS 2.2.10.62}
Sentence: 1    vidúr enaṃ nā́mnā /
Sentence: 2    tád asmai rukmáṃ kr̥tvā́ prátyamuñcat /
Sentence: 3    táto vā́ índro devā́nām ádʰipatir abʰavat /
Sentence: 4    yá eváṃ véda /
Sentence: 5    ádʰipatir evá samānā́nāṃ bʰavati //
Sentence: 6    sò 'manyata /
Sentence: 7    kíṃ_kiṃ vā́ akaram íti /
Sentence: 8    sá candráṃ ma ā́hara_íti {BS /} prā́lapat /
Sentence: 9    tác candrámasaś candramastvám /
Sentence: 10    yá eváṃ véda //

Verse: 4    {BS 2.2.10.63}
Sentence: 1    candrávān evá bʰavati //
Sentence: 2    táṃ devā́ abruvan /
Sentence: 3    suvī́ryo maryā yátʰā gopāyáta íti /
Sentence: 4    tát sū́ryasya sūryatvám /
Sentence: 5    yá eváṃ véda /
Sentence: 6    {not in BS} náinaṃ dabʰnoti //
Sentence: 7    káś ca ná_asmin vā́ idám indriyáṃ prátyastʰād íti /
Sentence: 8    tád índrasya_indratvám /
Sentence: 9    yá eváṃ véda /
Sentence: 10    indriyāvy èvá bʰavati //

Verse: 5    {BS 2.2.10.64}
Sentence: 1    ayáṃ vā́ idáṃ paramò 'bʰūd íti /
Sentence: 2    tát parameṣṭhínaḥ parameṣṭhitvám /
Sentence: 3    yá eváṃ véda /
Sentence: 4    paramā́m evá kā́ṣṭhāṃ gaccʰati //
Sentence: 5    táṃ devā́ḥ samantáṃ páryaviśan /
Sentence: 6    vásavaḥ purástāt /
Sentence: 7    rudrā́ dakṣiṇatáḥ /
Sentence: 8    ādityā́ḥ paścā́t /
Sentence: 9    víśve devā́ uttaratáḥ /
Sentence: 10    áṅgirasaḥ pratyáñcam //

Verse: 6    {BS 2.2.10.65}
Sentence: 1    sādʰyā́ḥ párāñcam /
Sentence: 2    yá eváṃ véda /
Sentence: 3    úpa_enam̐ samānā́ḥ sáṃviśanti //
Sentence: 4    sá prajā́patir evá bʰūtvā́ prajā́ ā́vayat /
Sentence: 5    tā́ asmai ná_atiṣṭhanta_annā́dyāya /
Sentence: 6    tā́ múkʰaṃ purástāt páśyantīḥ /
Sentence: 7    dakṣiṇatáḥ páryāyan /
Sentence: 8    sá dakṣiṇatáḥ páryavartayata /
Sentence: 9    tā́ múkʰaṃ purástāt páśyantīḥ /
Sentence: 10    múkʰaṃ dakṣiṇatáḥ //

Verse: 7    {BS 2.2.10.66}
Sentence: 1    paścā́t páryāyan /
Sentence: 2    sá paścā́t páryavartayata /
Sentence: 3    tā́ múkʰaṃ purástāt páśyantīḥ /
Sentence: 4    múkʰaṃ dakṣiṇatáḥ /
Sentence: 5    múkʰaṃ paścā́t /
Sentence: 6    uttaratáḥ páryāyan /
Sentence: 7    sā́ uttaratáḥ páryavartayata /
Sentence: 8    tā́ múkʰaṃ purástāt páśyantīḥ /
Sentence: 9    múkʰaṃ dakṣiṇatáḥ /
Sentence: 10    múkʰaṃ paścā́t //
{BS 2.2.10.67}
Sentence: 11    múkʰam uttaratáḥ /
Sentence: 12    ūrdʰvā́ údāyan /
Sentence: 13    sá upáriṣṭān nyàvartayata /
Sentence: 14    tā́ḥ sarvátomukʰo bʰūtvā́_ā́vayat /
Sentence: 15    táto vái tásmai prajā́ átiṣṭhanta_annā́dyāya /
Sentence: 16    yá eváṃ vidvā́n pári ca vartáyate ní ca /
Sentence: 17    prajā́patir evá bʰutvā́ prajā́ atti /
Sentence: 18    tíṣṭhante 'smai prajā́ annā́dyāya /
Sentence: 19    annādá evá bʰavati //

Paragraph: 11 
Verse: 1    {BS 2.2.11.68}
Sentence: 1    prajā́patir akāmayata bahór bʰū́yānt syām íti /
Sentence: 2    sá etáṃ dáśahotāram apaśyat /
Sentence: 3    táṃ prā́yuṅkta /
Sentence: 4    tásya práyukti bahór bʰū́yān abʰavat /
Sentence: 5    yáḥ kāmáyeta bahór bʰū́yānt syām íti /
Sentence: 6    sá dáśahotāraṃ práyuñjīta /
Sentence: 7    bahór evá bʰū́yān bʰavati //
Sentence: 8    sò 'kāmayata vīró ma ā́jāyeta_íti /
Sentence: 9    sá dáśahotuś cáturhotāraṃ níramimīta /
Sentence: 10    táṃ prā́yuṅkta //

Verse: 2    {BS 2.2.11.69}
Sentence: 1    tásya práyukti_índro 'jāyata /
Sentence: 2    yáḥ kāmáyeta vīró ma ā́jāyeta_íti /
Sentence: 3    sá cáturhotāraṃ práyuñjīta /
Sentence: 4    ā́_asya vīró jāyate //
Sentence: 5    sò 'kāmayata paśumā́nt syām íti /
Sentence: 6    sá cáturhotuḥ páñcahotāraṃ níramimīta /
Sentence: 7    táṃ prā́yuṅkta /
Sentence: 8    tásya práyukti paśumā́n abʰavat /
Sentence: 9    yáḥ kāmáyeta paśumā́nt syām íti /
Sentence: 10    sá páñcahotāraṃ práyuñjīta //

Verse: 3    {BS 2.2.11.70}
Sentence: 1    paśumā́n evá bʰavati /
Sentence: 2    sò 'kāmayata_r̥távo me kalperann íti /
Sentence: 3    sá páñcahotuḥ ṣáḍḍhotāraṃ níramimīta /
Sentence: 4    táṃ prā́yuṅkta /
Sentence: 5    tásya práyukty r̥távo 'smā akalpanta /
Sentence: 6    yáḥ kāmáyeta_r̥távo me kalperann íti /
Sentence: 7    sá ṣáḍḍhotāraṃ práyuñjīta /
Sentence: 8    kálpante 'smā r̥távaḥ //
Sentence: 9    sò 'kāmayata somapáḥ somayājī́ syām /
Sentence: 10    ā́ me somapáḥ somayājī́ jāyeta_íti //

Verse: 4    {BS 2.2.11.71}
Sentence: 1    sá ṣáḍḍhotuḥ saptáhotāraṃ níramimīta /
Sentence: 2    táṃ prā́yuṅkta /
Sentence: 3    tásya práyukti somapáḥ somayājy àbʰavat /
Sentence: 4    ā́_asya somapáḥ somayājy àjāyata /
Sentence: 5    yáḥ kāmáyeta somapáḥ somayājī́ syām /
Sentence: 6    ā́ me somapáḥ somayājī́ jāyeta_íti /
Sentence: 7    sá saptáhotāraṃ práyuñjīta /
Sentence: 8    somapá evá somayājī́ bʰavati /
Sentence: 9    ā́_asya somapáḥ somayājī́ jāyate //
Sentence: 10    sá vā́ eṣá paśúḥ pañcadʰā́ pratitiṣṭhati //

Verse: 5    {BS 2.2.11.72}
Sentence: 1    padbʰír múkʰena //
Sentence: 2    té devā́ḥ paśū́n vittvā́ /
Sentence: 3    suvargáṃ lokám āyan /
Sentence: 4    tè 'múṣmin_loké vyakṣudʰyan /
Sentence: 5    tè 'bruvan /
Sentence: 6    amútaḥ pradānaṃ vā́ úpajijīvima_íti /
Sentence: 7    té saptáhotāraṃ yajñáṃ vidʰā́ya_ayā́syam /
Sentence: 8    āṅgīrasáṃ prā́hiṇvan /
Sentence: 9    eténa_amútra kalpaya_íti /
Sentence: 10    tásya ā́ iyáṃ kŀ̥ptiḥ //

Verse: 6    {BS 2.2.11.73}
Sentence: 1    yád idáṃ kíñ ca /
Sentence: 2    yá eváṃ véda kálpate 'smai /
Sentence: 3    sá vā́ ayáṃ manuṣyèṣu yajñáḥ saptáhotā /
Sentence: 4    amútra sadbʰyó devébʰyo havyáṃ vahati /
Sentence: 5    yá eváṃ véda /
Sentence: 6    úpa_enaṃ yajñó namati //
Sentence: 7    yó vái cáturhotr̥ṇāṃ nidā́naṃ véda /
Sentence: 8    nidā́navān bʰavati /
Sentence: 9    agnihotráṃ vái dáśahotur nidā́nam /
Sentence: 10    darśapūrṇamāsáu cáturhotuḥ /
Sentence: 11    cāturmāsyā́ni páñcahotuḥ /
Sentence: 12    paśubandʰáḥ ṣáḍḍhotuḥ /
Sentence: 13    saumyò 'dʰvaráḥ saptáhotuḥ /
Sentence: 14    etád vái cáturhotr̥ṇāṃ nidā́nam /
Sentence: 15    yá eváṃ véda /
Sentence: 16    nidā́navān bʰavati //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.