TITUS
Black Yajur-Veda: Taittiriya-Brahmana
Part No. 11
Previous part

Chapter: 3 
Paragraph: 1 
Verse: 1    {BS 2.3.1.1}
Sentence: 1    brahmavādíno vadanti /
Sentence: 2    kíṃ cáturhotr̥ṇāṃ caturhotr̥tvám íti /
Sentence: 3    yád eváiṣú caturdʰā́ hótāraḥ /
Sentence: 4    téna cáturhotāraḥ /
Sentence: 5    tásmāc cáturhotāra úcyante /
Sentence: 6    tác cáturhotr̥ṇāṃ caturhotr̥tvám //
Sentence: 7    sómo vái cáturhotā /
Sentence: 8    agníḥ páñcahotā /
Sentence: 9    dʰātā́ ṣáḍḍhotā /
Sentence: 10    índraḥ saptáhotā //

Verse: 2    {BS 2.3.1.2}
Sentence: 1    prajā́patir dáśahotā /
Sentence: 2    yá eváṃ cáturhotr̥ṇām ŕ̥ddʰiṃ véda /
Sentence: 3    r̥dʰnóty evá //
Sentence: 4    yá eṣām eváṃ bandʰútāṃ véda /
Sentence: 5    bándʰumān bʰavati /
Sentence: 6    yá eṣām eváṃ kŀ̥ptiṃ véda /
Sentence: 7    kálpate 'smai /
Sentence: 8    yá eṣām evám āyátanaṃ véda /
Sentence: 9    āyátanavān bʰavati /
Sentence: 10    yá eṣām eváṃ pratiṣṭhā́ṃ véda //

Verse: 3    {BS 2.3.1.3}
Sentence: 1    práty evá tiṣṭhati //
Sentence: 2    brahmavādíno vadanti /
Sentence: 3    dáśahotā cáturhotā /
Sentence: 4    páñcahotā ṣáḍḍhotā saptáhotā /
Sentence: 5    átʰa kásmāc cáturhotāra ucyanta íti /
Sentence: 6    índro vái cáturhotā /
Sentence: 7    índrāḥ kʰálu vái śréṣṭho devátānām upadéśanāt /
Sentence: 8    yá evám índram̐ śréṣṭhaṃ devátānām upadéśanād véda /
Sentence: 9    vásiṣṭhaḥ samānā́nāṃ bʰavati /
Sentence: 10    tásmāt_śréṣṭham āyántaṃ pratʰaména_evá_anubudʰyante /
Sentence: 11    ayám ā́gan /
Sentence: 12    ayám ávāsād íti /
Sentence: 13    kīrtír asya pū́rvā_ā́gaccʰati janátām āyatáḥ /
Sentence: 14    átʰo enaṃ pratʰaména_evá_anubudʰyante /
Sentence: 15    ayám ā́gan /
Sentence: 16    ayám ávāsād íti //

Paragraph: 2 
Verse: 1    {BS 2.3.2.4}
Sentence: 1    dákṣiṇāṃ pratigrahīṣyánt saptádaśa kŕ̥tvó 'pānyāt /
Sentence: 2    ātmā́nam evá sámindʰe /
Sentence: 3    téjase vīryā̀ya /
Sentence: 4    átʰo prajā́patir eváināṃ bʰūtvā́ prátigr̥hṇāti /
Sentence: 5    ātmánó 'nārtyai //
Sentence: 6    yády enam ā́rtvijyād vr̥tám̐ {AS vratáṃ} sántaṃ nirháreran /
Sentence: 7    ā́gnīdʰre juhuyād dáśahotāram /
Sentence: 8    caturgr̥hīténa_ā́jyena /
Sentence: 9    purástāt pratyáṅ tíṣṭhan /
Sentence: 10    pratilomáṃ vigrā́ham //

Verse: 2    {BS 2.3.2.5}
Sentence: 1    prāṇā́n evā́sya_úpadāsayati //
Sentence: 2    yád enaṃ púnar upaśíkṣeyuḥ /
Sentence: 3    ā́gnīdʰra evá juhuyād dáśahotāram /
Sentence: 4    caturgr̥hīténa_ā́jyena /
Sentence: 5    paścā́t prā́ṅ ā́sīnaḥ /
Sentence: 6    anulomám ávigrāham /
Sentence: 7    prāṇā́n evā́smai kalpayati //
Sentence: 8    prā́yaścittī vā́gg_hótā_íty r̥tumukʰá r̥tumukʰe juhoti /
Sentence: 9    r̥tū́n evā́smai kalpayati /
Sentence: 10    kálpante 'smā r̥távaḥ //

Verse: 3    {BS 2.3.2.6}
Sentence: 1    kḷptā́ asmā r̥táva ā́yanti //
Sentence: 2    ṣáḍḍhotā vái bʰūtvā́ prajā́patir idám̐ sárvam asr̥jata /
Sentence: 3    sá máno 'sr̥jata /
Sentence: 4    mánasó 'dʰi gāyatrī́m asr̥jata /
Sentence: 5    tád gāyatrī́ṃ yáśa ārccʰat /
Sentence: 6    tā́m ā́labʰata /
Sentence: 7    gāyatriyā́ ádʰi cʰándām̐sy asr̥jata /
Sentence: 8    cʰándobʰyó 'dʰi sā́ma /
Sentence: 9    tát sā́ma yáśa ārccʰat /
Sentence: 10    tád ā́labʰata //

Verse: 4    {BS 2.3.2.7}
Sentence: 1    sā́mnó 'dʰi yájūm̐ṣy asr̥jata /
Sentence: 2    yájurbyó 'dʰi víṣṇum /
Sentence: 3    tád víṣṇuṃ yáśa ārccʰat /
Sentence: 4    tám ā́labʰata /
Sentence: 5    víṣṇor ádʰy óṣadʰīr asr̥jata /
Sentence: 6    óṣadʰībʰyó 'dʰi sómam /
Sentence: 7    tát sómaṃ yáśa ārccʰat /
Sentence: 8    tám ā́labʰata /
Sentence: 9    sómād ádʰi paśū́n asr̥jata /
Sentence: 10    paśúbʰyó 'dʰi_índram //

Verse: 5    {BS 2.3.2.8}
Sentence: 1    tád índraṃ yáśa ārccʰat /
Sentence: 2    tád enaṃ ná_atiprā́cyavata /
Sentence: 3    índra iva yaśasvī́ bʰavati /
Sentence: 4    yá eváṃ véda ná_enaṃ yáśó 'tiprácyavate //
Sentence: 5    yád vā́ idáṃ kíṃ ca /
Sentence: 6    tát sárvam uttāna evá_āṅgīrasáḥ prátyagr̥hṇāt /
Sentence: 7    tád enaṃ prátigr̥hītaṃ ná_ahinat /
Sentence: 8    yát kíṃ ca pratigr̥hṇīyā́t /
Sentence: 9    tát sárvam uttānás tv āṅgīrasáḥ prátigr̥hṇātv íty evá prátigr̥hṇīyāt /
Sentence: 10    iyáṃ vā́ uttāná āṅgīrasáḥ /
Sentence: 11    anáyā_eváinat prátigr̥hṇāti /
Sentence: 12    ná_enam̐ hinasti //
Sentence: 13    barhíṣā prátīyād gā́ṃ vā_áśvaṃ vā /
Sentence: 14    etád vái paśūnā́ṃ priyáṃ dʰā́ma /
Sentence: 15    priyéṇa_eváinaṃ dʰā́mnā prátyeti //

Paragraph: 3 
Verse: 1    {BS 2.3.3.9}
Sentence: 1    yó vā́ ávidvān nivartáyate /
Sentence: 2    víśīrṣā sápāpmā_amúṣmin_loké bʰavati /
Sentence: 3    átʰa yó vidvā́n nivartáyate /
Sentence: 4    sáśīrṣā vípāpmā_amúṣmin_loké bʰavati //
Sentence: 5    devátā vái saptá púṣṭikāmā nyàvartayanta /
Sentence: 6    agníś ca pr̥tʰivī́ ca /
Sentence: 7    vāyúś ca_antárikṣaṃ ca /
Sentence: 8    ādityáś ca dyáuś ca candrámāḥ /
Sentence: 9    agnír nyàvartayata /
Sentence: 10    sá sāhasrám apuṣyat //

Verse: 2    {BS 2.3.3.10}
Sentence: 1    pr̥tʰivī́ nyàvartayata /
Sentence: 2    sá_oṣadʰībʰir vánaspátibʰir apuṣyat /
Sentence: 3    vāyúr nyàvartayata /
Sentence: 4    sá márīcībʰir apuṣyat /
Sentence: 5    antárikṣaṃ nyàvaratayata /
Sentence: 6    tád váyobʰir apuṣyat /
Sentence: 7    ādityó nyàvartayata /
Sentence: 8    sá raśmibʰir apuṣyat /
Sentence: 9    dyáur nyàvartayata /
Sentence: 10    sā́ nakṣatrair apuṣyat /
Sentence: 11    candrámā nyàvartayata /
Sentence: 12    sò 'horātráir ardʰamāsáir mā́sair r̥túbʰiḥ saṃvatsarená_apuṣyat /
Sentence: 13    tā́n póṣān puṣyati /
Sentence: 14    yā́m̐s té 'puṣyan /
Sentence: 15    yá eváṃ vidā́n ní ca vartáyate pári ca //

Paragraph: 4 
Verse: 1    {BS 2.3.4.11}
Sentence: 1    tásya vā́ agnér híraṇyaṃ pratijagrahúṣaḥ /
Sentence: 2    ardʰám indriyásya_ápākrāmat /
Sentence: 3    tád eténaivá prátyagr̥hṇāt /
Sentence: 4    téna vái sò 'rdʰám indriyásya_ātmánn upā́dʰatta /
Sentence: 5    ardʰám indriyásya_ātmánn upā́dʰatte /
Sentence: 6    yá eváṃ vidvā́n híraṇyaṃ pratigr̥hṇā́ti /
Sentence: 7    átʰa yò 'vidvān pratigr̥hṇā́ti /
Sentence: 8    ardʰám asya_indriyásya_ápakrāmati //
Sentence: 9    tásya vái sómasya vā́saḥ pratijagrahúṣaḥ /
Sentence: 10    tŕ̥tīyam indriyásya_ápākrāmat //

Verse: 2    {BS 2.3.4.12}
Sentence: 1    tád eténaivá prátyagr̥hṇāt /
Sentence: 2    téna vái sá tŕ̥tīyam indriyásya_ātmánn upā́dʰatta /
Sentence: 3    tŕ̥tīyam indriyásya_ātmánn upā́dʰatte /
Sentence: 4    yá eváṃ vidvān vā́saḥ pratigr̥hṇā́ti /
Sentence: 5    átʰa yó 'vidvān pratigr̥hṇā́ti /
Sentence: 6    tŕ̥tīyam asya_indriyásya_ápakrāmati /
Sentence: 7    tásya vái rudrásya gā́ṃ pratijagrahúṣaḥ /
Sentence: 8    caturtʰám indriyásya_ápākrāmat /
Sentence: 9    tā́m eténaivá prátyagr̥hṇāt /
Sentence: 10    téna vái sá caturtʰám indriyásya_ātmánn upā́dʰatta //

Verse: 3    {BS 2.3.4.13}
Sentence: 1    caturtʰám indriyásya_ātmánn upā́dʰatte /
Sentence: 2    yá eváṃ vidvā́n gā́ṃ pratigr̥hṇā́ti /
Sentence: 3    átʰa yó 'vidvān pratigr̥hṇā́ti /
Sentence: 4    caturtʰám asya_indriyásya_ápakrāmati /
Sentence: 5    tásya vái váruṇasya_áśvaṃ pratijagrahúṣaḥ /
Sentence: 6    pañcamám indriyásya_ápākrāmat /
Sentence: 7    tám eténaivá prátyagr̥hṇāt /
Sentence: 8    téna vái sá pañcamám indriyásya_ātmánn upā́dʰatta /
Sentence: 9    pañcamám indriyásya_ātmánn upā́dʰatte /
Sentence: 10    yá eváṃ vidvā́n áśvaṃ pratigr̥hṇā́ti //

Verse: 4    {BS 2.3.4.14}
Sentence: 1    átʰa yó 'vidvān pratigr̥hṇā́ti /
Sentence: 2    pañcamám asya_indriyásya_ápakrāmati /
Sentence: 3    tásya vái prajā́pateḥ púruṣaṃ pratijagrahúṣaḥ /
Sentence: 4    ṣaṣṭhám indriyásya_ápākrāmat /
Sentence: 5    tám eténaivá prátyagr̥hṇāt /
Sentence: 6    téna vái sá ṣaṣṭhám indriyásya_ātmánn upā́dʰatta /
Sentence: 7    ṣaṣṭhám indriyásya_ātmánn upā́dʰatte /
Sentence: 8    yá eváṃ vidvā́n púruṣaṃ pratigr̥hṇā́ti /
Sentence: 9    átʰa yó 'vidvān pratigr̥hṇā́ti /
Sentence: 10    ṣaṣṭhám asya_indriyásya_ápakrāmati //

Verse: 5    {BS 2.3.4.15}
Sentence: 1    tásya vái mános tálpaṃ pratijagrahúṣaḥ /
Sentence: 2    saptamám indriyásya_ápākrāmat /
Sentence: 3    tám eténaivá prátyagr̥hṇāt /
Sentence: 4    téna vái sá saptamám indriyásya_ātmánn upā́dʰatta /
Sentence: 5    saptamám indriyásya_ātmánn upā́dʰatte /
Sentence: 6    yá eváṃ vidvā́m̐s tálpaṃ pratigr̥hṇā́ti /
Sentence: 7    átʰa yó 'vidvān pratigr̥hṇā́ti /
Sentence: 8    saptamám asya_indriyásya_ápakrāmati /
Sentence: 9    tásya vā́ uttānásya_āṅgīrasásya_áprāṇat pratijagrahúṣaḥ /
Sentence: 10    aṣṭamám indriyásya_ápākrāmat //

Verse: 6    {BS 2.3.4.16}
Sentence: 1    tád eténaivá prátyagr̥hṇāt /
Sentence: 2    téna vái sò 'ṣṭamám indriyásya_ātmánn upā́dʰatta /
Sentence: 3    aṣṭamám indriyásya_ātmánn upā́dʰatte /
Sentence: 4    yá eváṃ vidvā́n áprāṇat pratigr̥hṇā́ti /
Sentence: 5    átʰa yò 'vidvān pratigr̥hṇā́ti /
Sentence: 6    aṣṭamám asya_indriyásya_ápakrāmati //
Sentence: 7    yád vā́ idáṃ kíṃ ca /
Sentence: 8    tát sárvam uttāná evá_āṅgīrasáḥ prátyagr̥hṇāt /
Sentence: 9    tád enaṃ prátigr̥hītaṃ ná_ahinat /
Sentence: 10    yát kíṃ ca pratigr̥hṇīyā́t /
Sentence: 11    tát sárvam uttānás tv āṅgīrasáḥ prátigr̥hṇātv íty evá prátigr̥hṇīyāt /
Sentence: 12    iyáṃ vā́ uttāná āṅgīrasáḥ /
Sentence: 13    anáyā_eváinat prátigr̥hṇāti /
Sentence: 14    ná_enam̐ hinasti //

Paragraph: 5 
Verse: 1    {BS 2.3.5.17}
Sentence: 1    brahmavādíno vadanti /
Sentence: 2    yád dáśahotāraḥ sattrám ā́sata /
Sentence: 3    kéna té gr̥hápatinā_ārdʰnuvan /
Sentence: 4    kéna prajā́ asr̥janta_íti /
Sentence: 5    prajā́patinā vái té gr̥hápatinā_ārdʰnuvan /
Sentence: 6    téna prajā́ asr̥janta //
Sentence: 7    yác cáturhotāraḥ sattrám ā́sata /
Sentence: 8    kéna té gr̥hápatinā_ārdʰnuvan /
Sentence: 9    kéna_óṣadʰīr asr̥janta_íti /
Sentence: 10    sómena vái té gr̥hápatinā_ārdʰnuvan //

Verse: 2    {BS 2.3.5.18}
Sentence: 1    téna_óṣadʰīr asr̥janta //
Sentence: 2    yát páñcahotāraḥ sattrám ā́sata /
Sentence: 3    kéna té gr̥hápatinā_ārdʰnuvan /
Sentence: 4    kéna_ebʰyó lokébʰyó 'surān prā́ṇudanta /
Sentence: 5    kéna_eṣāṃ paśū́n avr̥ñjata_íti /
Sentence: 6    agnínā vái té gr̥hápatinā_ārdʰnuvan /
Sentence: 7    téna_ebʰyó lokébʰyó 'surān prā́ṇudanta /
Sentence: 8    téna_eṣāṃ paśū́n avr̥ñjata //
Sentence: 9    yát ṣaḍḍhotāraḥ sattrám ā́sata /
Sentence: 10    kéna té gr̥hápatinā_ārdʰnuvan //

Verse: 3    {BS 2.3.5.19}
Sentence: 1    kéna_r̥tū́n akalpayanta_íti /
Sentence: 2    dʰātrā́ vái té gr̥hápatinā_ārdʰnuvan /
Sentence: 3    téna_r̥tū́n akalpayanta //
Sentence: 4    yát saptáhotāraḥ sattram ā́sata /
Sentence: 5    kéna té gr̥hápatinā_ārdʰnuvan /
Sentence: 6    kéna súvar āyan /
Sentence: 7    kéna_imā́n_lokā́nt sámatanvann íti /
Sentence: 8    aryamṇā́ vái té gr̥hápatinā_ārdʰnuvan /
Sentence: 9    téna súvar āyan /
Sentence: 10    téna_imā́n_lokā́n sámatanvann íti //

Verse: 4    {BS 2.3.5.20}
Sentence: 1    eté vái devā́ gr̥hápatayaḥ /
Sentence: 2    tā́n yá eváṃ vidvā́n /
Sentence: 3    ápy anyásya gārhapaté dī́kṣate /
Sentence: 4    avāntarám evá sattríṇām r̥dʰnoti //
Sentence: 5    yó vā́ aryamáṇaṃ véda /
Sentence: 6    dā́nakāmā asmai prajā́ bʰavanti /
Sentence: 7    yajñó vā́ aryamā́ /
Sentence: 8    ā́ryā vasatír íti vái tám āhur yáṃ praśám̐santi /
Sentence: 9    ā́ryā vasatír bʰavati /
Sentence: 10    yá eváṃ véda //

Verse: 5    {BS 2.3.5.21}
Sentence: 1    yád vā́ idáṃ kíṃ ca /
Sentence: 2    tát sárvaṃ cáturhotāraḥ /
Sentence: 3    cáturhotr̥bʰyó 'dʰi yajñó nírmitaḥ /
Sentence: 4    sá yá eváṃ vidvā́n vivádeta /
Sentence: 5    ahám evá bʰū́yo veda /
Sentence: 6    yáś cáturhotr̥̄n véda_íti /
Sentence: 7    sá hy èvá bʰū́yo véda /
Sentence: 8    yáś cáturhotr̥̄n véda //
Sentence: 9    yó vái cáturhotr̥ṇām̐ hótr̥̄n véda /
Sentence: 10    sárvāsu prajā́sv ánnam atti //

Verse: 6    {BS 2.3.5.22}
Sentence: 1    sárvā díśo 'bʰíjayati /
Sentence: 2    prajā́patir vái dáśahotr̥ṇām̐ hótā /
Sentence: 3    sómaś cáturhotr̥ṇām̐ hótā /
Sentence: 4    agníḥ páñcahotr̥ṇām̐ hótā /
Sentence: 5    dʰātā́ ṣáḍḍhotr̥ṇām̐ hótā /
Sentence: 6    aryamā́ saptáhotr̥ṇām̐ hótā /
Sentence: 7    eté vái cáturhotr̥ṇām̐ hótāraḥ /
Sentence: 8    tā́n yá eváṃ véda /
Sentence: 9    sárvāsu prajā́sv ánnam atti /
Sentence: 10    sárvā díśo 'bʰijayati //

Paragraph: 6 
Verse: 1    {BS 2.3.6.23}
Sentence: 1    prajā́patiḥ prajā́ḥ sr̥ṣṭvā́ vyasram̐sata /
Sentence: 2    sá hŕ̥dayaṃbʰūtò 'śayat /
Sentence: 3    ā́tman hā́3 íty áhvayat /
Sentence: 4    ā́paḥ prátyaśr̥ṇvan /
Sentence: 5    tā́ agnihotréṇa_evá yajñakratúnā_úpaparyā́vartanta /
Sentence: 6    tā́ḥ kúsindʰam úpauhan /
Sentence: 7    tásmād agnihotrásya yajñakratóḥ /
Sentence: 8    éka r̥tvík //
Sentence: 9    catuṣkŕ̥tvó 'hvayat /
Sentence: 10    agnír vāyúr ādityáś candrámāḥ //

Verse: 2    {BS 2.3.6.24}
Sentence: 1    té prátyaśr̥ṇvan /
Sentence: 2    té darśapūrṇamāsā́bʰyām evá yajñakratúnā_úpaparyā́vartanta /
Sentence: 3    tá úpauham̐ś catvā́ry áṅgāni /
Sentence: 4    tásmād darśapūrṇamāsáyor yajñakratóḥ /
Sentence: 5    catvā́ra r̥tvíjaḥ //
Sentence: 6    pañcakŕ̥tvó 'hvayat /
Sentence: 7    paśávaḥ prátyaśr̥ṇvan /
Sentence: 8    té cāturmāsyáir evá yajñakratúnā_úpaparyā́vartanta /
Sentence: 9    tá úpauhan_lóma ccʰavī́ṃ mām̐sám ástʰi majjā́nam /
Sentence: 10    tásmāc cāturmāsyā́nāṃ yajñakratóḥ //

Verse: 3    {BS 2.3.6.25}
Sentence: 1    páñca_r̥tvíjaḥ //
Sentence: 2    ṣaṭkŕ̥tvó 'hvayat /
Sentence: 3    r̥távaḥ prátyaśr̥ṇvan /
Sentence: 4    té paśubandʰéna_evá yajñakratúnā_úpaparyā́vartanta /
Sentence: 5    tá úpauhaṃ stánāv āṇḍáu śiśnám ávāñcaṃ prāṇám /
Sentence: 6    tásmāt paśubandʰásya yajñakratóḥ /
Sentence: 7    ṣáḍ r̥tvíjaḥ //
Sentence: 8    saptakŕ̥tvó 'hvayat /
Sentence: 9    hótrāḥ prátyaśr̥ṇvan /
Sentence: 10    tā́ḥ saumyéna_evá_adʰvaréṇa yajñakratúnā_úpaparyā́vartanta //

Verse: 4    {BS 2.3.6.26}
Sentence: 1    tā́ úpauhant saptá śīrṣaṇyā̀n prāṇā́n /
Sentence: 2    tásmāt saumyásya_adʰvarásya yajñakratóḥ /
Sentence: 3    saptá hótrāḥ prā́cīr váṣaṭkurvanti //
Sentence: 4    daśakŕ̥tvó 'hvayat /
Sentence: 5    tápaḥ prátyaśr̥ṇot /
Sentence: 6    tát kármaṇā_evá saṃvatsaréṇa sárvair yajñakratúbʰir úpaparyā́vartata /
Sentence: 7    tát sárvam ātmā́nam áparivargam úpauhat /
Sentence: 8    tásmāt saṃvatsaré sárve yajñakratávó 'varudʰyante //
Sentence: 9    tásmād dáśahotā cáturhotā /
Sentence: 10    páñcahotā ṣáḍḍhotā saptáhotā /
Sentence: 11    ékahotre balím̐ haranti háranty asmai prajā́ balím /
Sentence: 12    ā́_enam ápratikʰyātaṃ gaccʰati /
Sentence: 13    yá eváṃ véda //

Paragraph: 7 
Verse: 1    {BS 2.3.7.27}
Sentence: 1    prajā́patiḥ púruṣam asr̥jata /
Sentence: 2    sò 'gnír abravīt /
Sentence: 3    mama_ayám ánnam astv íti /
Sentence: 4    sò 'bibʰet /
Sentence: 5    sárvaṃ vái mā_ayáṃ prádʰakṣyati_íti /
Sentence: 6    sá etā́m̐ś cáturhotr̥̄n ātmaspáraṇān apaśyat /
Sentence: 7    tā́n ajuhot /
Sentence: 8    táir vái sá ātmā́nam aspr̥ṇot //
Sentence: 9    yád agnihotráṃ juhóti /
Sentence: 10    ékahotāram evá tád yajñakratúm āpnoty agnihotrám //

Verse: 2    {BS 2.3.7.28}
Sentence: 1    kúsindʰaṃ ca_ātmánaḥ spr̥ṇóti /
Sentence: 2    ādityásya ca sā́yujyaṃ gaccʰati //
Sentence: 3    catúr únnayati /
Sentence: 4    cáturhotāram evá tád yajñakratúm āpnoti {/ not in AS}
Sentence: 5    darśapūrṇamāsáu /
Sentence: 6    catvā́ri ca_ātmánó 'ṅgāni spr̥ṇóti /
Sentence: 7    ādityásya ca sā́yujyaṃ gaccʰati //
Sentence: 8    catúr únnayati /
Sentence: 9    samít pañcamī́ /
Sentence: 10    páñcahotāram evá tád yajñakratúm āpnoti /
Sentence: 11    {not in BS.too?} cāturmāsyā́ni /
Sentence: 12    lóma ccʰavī́ṃ mām̐sám ástʰi majjā́nam //

Verse: 3    {BS 2.3.7.29}
Sentence: 1    tā́ni ca_ātmánaḥ spr̥ṇóti /
Sentence: 2    ādityásya ca sā́yujyaṃ gaccʰati //
Sentence: 3    catúr únnayati /
Sentence: 4    dvír juhoti /
Sentence: 5    ṣáḍḍhotāram evá tád yajñakratúm āpnoti {/ not in AS}
Sentence: 6    paśubandʰám /
Sentence: 7    stánāv āṇḍáu śiśnám ávāñcaṃ prāṇám /
Sentence: 8    tā́ni ca_ātmánaḥ spr̥ṇóti /
Sentence: 9    ādityásya ca sā́yujyaṃ gaccʰati //
Sentence: 10    catúr únnayati /
Sentence: 11    dvír juhoti //

Verse: 4    {BS 2.3.7.30}
Sentence: 1    samít saptamī́ /
Sentence: 2    saptáhotāram evá tád yajñakratúm āpnoti saumyám adʰvarám /
Sentence: 3    saptá ca_ātmánaḥ śīrṣaṇyā̀n prāṇā́n spr̥ṇóti /
Sentence: 4    ādityásya ca sā́yujyaṃ gaccʰati //
Sentence: 5    catúr únnayati /
Sentence: 6    dvír juhóti /
Sentence: 7    dvír nímārṣṭi /
Sentence: 8    dvíḥ prā́śnāti /
Sentence: 9    dáśahotāram evá tád yajñakratúm āpnoti saṃvatsarám /
Sentence: 10    sárvaṃ ca_ātmā́nam áparivargam̐ spr̥ṇóti /
Sentence: 11    ādityásya ca sā́yujyaṃ gaccʰati //

Paragraph: 8 
Verse: 1    {BS 2.3.8.31}
Sentence: 1    prajā́patir akāmayata prájāyeya_íti /
Sentence: 2    sá tápo 'tapyata /
Sentence: 3    sò 'ntárvān abʰavat /
Sentence: 4    sá háritaḥ śyāvò 'bʰavat /
Sentence: 5    tásmāt stry àntárvatnī /
Sentence: 6    hariṇī satī́ śyāvā́ bʰavati /
Sentence: 7    sá vijā́yamāno gárbʰeṇa_atāmyat /
Sentence: 8    sá tāntáḥ kr̥ṣṇáḥ śyāvò 'bʰavat /
Sentence: 9    tásmāt tāntáḥ kr̥ṣṇáḥ śyāvó bʰavati /
Sentence: 10    tásya_ásur evá_ájīvat //

Verse: 2    {BS 2.3.8.32}
Sentence: 1    téna_ásunā_ásurān asr̥jata /
Sentence: 2    tád ásurāṇām asuratvám /
Sentence: 3    yá evám ásurāṇām asuratváṃ véda /
Sentence: 4    ásumān evá bʰavati /
Sentence: 5    ná_énam ásur jahāti //
Sentence: 6    só 'surān sr̥ṣṭvā́ pitā́_iva_amanyata /
Sentence: 7    tád ánu pitŕ̥̄n asr̥jata /
Sentence: 8    tát pitr̥ṇā́ṃ pitr̥tvám /
Sentence: 9    yá eváṃ pitr̥ṇā́ṃ pitr̥tváṃ véda /
Sentence: 10    pitā́_iva_evá {AS pitávaivá} svā́nāṃ bʰavati //

Verse: 3    {BS 2.3.8.33}
Sentence: 1    yánty asya pitáro hávam //
Sentence: 2    sá pitŕ̥̄nt sr̥ṣṭvā́_amanasyat /
Sentence: 3    tád ánu manuṣyā̀n asr̥jata /
Sentence: 4    tán manuṣyā̀ṇāṃ manuṣyatvám /
Sentence: 5    yá eváṃ manuṣyā̀ṇāṃ manuṣyatváṃ véda /
Sentence: 6    manasvy èva bʰavati /
Sentence: 7    ná_enaṃ mánur jahāti /
Sentence: 8    tásmai manuṣyā̀nt sasr̥jānā́ya /
Sentence: 9    dívā devatrā́_abʰavat /
Sentence: 10    tád ánu devā́n asr̥jata /
Sentence: 11    tád devā́nāṃ devatvám /
Sentence: 12    yá eváṃ devā́nāṃ devatváṃ véda /
Sentence: 13    dívā ha_evā́sya devatrā́ bʰavati //
Sentence: 14    tā́ni vā́ etā́ni catvāry ámbʰām̐si /
Sentence: 15    devā́ manuṣyā̀ḥ pitáró 'surāḥ /
Sentence: 16    téṣu sárveṣv ámbʰo nábʰa iva bʰavati /
Sentence: 17    yá eváṃ véda //

Paragraph: 9 
Verse: 1    {BS 2.3.9.34}
Sentence: 1    brahmavādíno vadanti /
Sentence: 2    yó vā́ imáṃ vidyā́t /
Sentence: 3    yáto 'yáṃ pávate /
Sentence: 4    yád abʰipávate /
Sentence: 5    yád abʰisaṃpávate /
Sentence: 6    sárvam ā́yur iyāt /
Sentence: 7    ná purā́_ā́yuṣaḥ prámīyeta /
Sentence: 8    paśumā́nt syāt /
Sentence: 9    vindéta prajā́m //
Sentence: 10    yó vā́ imáṃ véda //

Verse: 2    {BS 2.3.9.35}
Sentence: 1    yáto 'yáṃ pávate /
Sentence: 2    yád abʰipávate /
Sentence: 3    yád abʰisaṃpávate /
Sentence: 4    sárvam ā́yur eti /
Sentence: 5    ná purā́_ā́yuṣaḥ prámīyate /
Sentence: 6    paśumā́n bʰavati /
Sentence: 7    vindáte prajā́m //
Sentence: 8    adbʰyáḥ pavate /
Sentence: 9    apò 'bʰipavate /
Sentence: 10    apò 'bʰisáṃpavate //

Verse: 3    {BS 2.3.9.36}
Sentence: 1    asyā́ḥ pavate /
Sentence: 2    imā́m abʰípavate /
Sentence: 3    imā́m abʰísáṃpavate /
Sentence: 4    agnéḥ pavate /
Sentence: 5    agním abʰípavate /
Sentence: 6    agním abʰísáṃpavate /
Sentence: 7    antárikṣāt pavate /
Sentence: 8    antárikṣam abʰípavate /
Sentence: 9    antárikṣam abʰísáṃpavate /
Sentence: 10    ādityā́t pavate //

Verse: 4    {BS 2.3.9.37}
Sentence: 1    ādityám abʰípavate /
Sentence: 2    ādityám abʰísáṃpavate /
Sentence: 3    dyóḥ pavate /
Sentence: 4    dívam abʰípavate /
Sentence: 5    dívam abʰísáṃpavate /
Sentence: 6    digbʰyáḥ pavate /
Sentence: 7    díśo 'bʰípavate /
Sentence: 8    díśo 'bʰísáṃpavate //
Sentence: 9    sá yát purástād vā́ti /
Sentence: 10    prāṇá evá bʰūtvā́ purástād vāti //

Verse: 5    {BS 2.3.9.38}
Sentence: 1    tásmāt purástād vā́ntam /
Sentence: 2    sárvāḥ prajā́ḥ prátinandanti /
Sentence: 3    prāṇó hí priyáḥ prajā́nām /
Sentence: 4    prāṇá iva priyáḥ prajā́nāṃ bʰavati /
Sentence: 5    yá eváṃ véda /
Sentence: 6    sá vā́ eṣá prāṇá evá //
Sentence: 7    átʰa yád dakṣiṇató vā́ti /
Sentence: 8    mātaríśvā_evá bʰūtvā́ dakṣiṇató vāti /
Sentence: 9    tásmād dakṣiṇató vā́ntaṃ vidyā́t /
Sentence: 10    sárvā díśa ā́vāti //

Verse: 6    {BS 2.3.9.39}
Sentence: 1    sárvā díśó 'nuvívāti /
Sentence: 2    sárvā díśó 'nusáṃvāti_íti /
Sentence: 3    sá vā́ eṣá mātaríśvā_evá //
Sentence: 4    átʰa yát paścā́d vā́ti /
Sentence: 5    pávamāna evá bʰūtvā́ paścā́d vāti /
Sentence: 6    pūtam asmā ā́haranti /
Sentence: 7    pūtám úpaharanti /
Sentence: 8    pūtám aśnāti /
Sentence: 9    yá eváṃ véda /
Sentence: 10    sá vā́ eṣá pávamāna evá //

Verse: 7    {BS 2.3.9.40}
Sentence: 1    átʰa yád uttarató vā́ti /
Sentence: 2    savitā́_évá bʰūtvā́_uttarató vāti /
Sentence: 3    savitā́_iva svā́nāṃ bʰavati /
Sentence: 4    yá eváṃ véda /
Sentence: 5    sá vā́ eṣá savitā́_evá //
Sentence: 6    té yá enaṃ purástād āyántam upavádanti /
Sentence: 7    yá evā́sya purástāt pāpmā́naḥ /
Sentence: 8    tā́m̐s té 'pagʰnanti /
Sentence: 9    purástād ítarān pāpmánaḥ sacante //
Sentence: 10    átʰa yá enaṃ dakṣiṇatá āyántam upavádanti //

Verse: 8    {BS 2.3.9.41}
Sentence: 1    yá evā́sya dakṣiṇatáḥ pāpmā́naḥ /
Sentence: 2    tā́m̐s té 'pagʰnanti /
Sentence: 3    dakṣiṇatá ítarān pāpmánaḥ sacante //
Sentence: 4    átʰa yá enaṃ paścā́d āyántam upavádanti /
Sentence: 5    yá evā́sya paścā́t pāpmā́naḥ /
Sentence: 6    tā́m̐s té 'pagʰnanti /
Sentence: 7    paścā́d ítarān pāpmánaḥ sacante //
Sentence: 8    átʰa yá enam uttaratá āyántam upavádanti /
Sentence: 9    yá evā́sya_uttaratáḥ pāpmā́naḥ /
Sentence: 10    tā́m̐s té 'pagʰnanti //

Verse: 9    {BS 2.3.9.42}
Sentence: 1    uttaratá ítarān pāpmánaḥ sacante //
Sentence: 2    tásmād eváṃ vidvā́n /
Sentence: 3    ví_iva nr̥tyet /
Sentence: 4    prá_iva calet /
Sentence: 5    vy ásya_iva_akṣyáu bʰāṣeta {BS bʰāṣete} /
Sentence: 6    maṇṭáyed iva /
Sentence: 7    krātʰáyed iva /
Sentence: 8    śr̥ṅgāyéta_iva /
Sentence: 9    utá mā_úpavadeyuḥ /
Sentence: 10    utá me pāpmā́nam ápahanyur íti //
Sentence: 11    sá yā́ṃ díśam̐ saním eṣyánt syā́t /
Sentence: 12    yadā́ tā́ṃ díśaṃ vā́to vāyā́t /
Sentence: 13    átʰa práveyāt /
Sentence: 14    prá vā dʰāvayet /
Sentence: 15    sātám evá raditáṃ vyūḍhaṃ gandʰám abʰí prácyavate /
Sentence: 16    ā́_asya táṃ janapadáṃ pū́rvā kīrtír gaccʰati /
Sentence: 17    dā́nakāmā asmai prajā́ bʰavanti /
Sentence: 18    yá eváṃ véda //

Paragraph: 10 
Verse: 1    {BS 2.3.10.43}
Sentence: 1    prajā́patiḥ sómam̐ rā́jānam asr̥jata /
Sentence: 2    táṃ tráyo védā ánvasr̥jyanta /
Sentence: 3    tā́n háste 'kuruta /
Sentence: 4    átʰa há sī́tā sāvitrī́ /
Sentence: 5    sómam̐ rā́jānaṃ cakame /
Sentence: 6    śraddʰā́m u sá cakame /
Sentence: 7    sā́ ha pitáraṃ prajā́patim úpasasāra /
Sentence: 8    tám̐ ha_uvāca /
Sentence: 9    námas te astu bʰagavaḥ /
Sentence: 10    úpa tvā_ayāni //

Verse: 2    {BS 2.3.10.44}
Sentence: 1    prá tvā padye /
Sentence: 2    sómaṃ vái rā́jānaṃ kāmaye /
Sentence: 3    śraddʰā́m u sá kāmayata íti /
Sentence: 4    tásyā u há stʰāgarám alaṅkāráṃ kalpayitvā́ /
Sentence: 5    dáśahotāraṃ purástād vyākʰyā́ya /
Sentence: 6    cáturhotāraṃ dakṣiṇatáḥ /
Sentence: 7    páñcahotāraṃ paścā́t /
Sentence: 8    ṣáḍḍhotāram uttaratáḥ /
Sentence: 9    saptáhotāram upáriṣṭāt /
Sentence: 10    sambʰāráiś ca pátnibʰiś ca múkʰe 'laṅkŕ̥tya //

Verse: 3    {BS 2.3.10.45}
Sentence: 1    ā́_asya_árdʰáṃ vavrāja /
Sentence: 2    tā́m̐ ha_udī́kṣya_uvāca /
Sentence: 3    úpa mā́ vartasva_íti /
Sentence: 4    táṃ ha_uvāca /
Sentence: 5    bʰógaṃ tú ma ā́cakṣva /
Sentence: 6    etán ma ā́cakṣva /
Sentence: 7    yát te pāṇā́v íti /
Sentence: 8    tásyā u há trī́n védān prádadau /
Sentence: 9    tásmād ú ha stríyo bʰógam ā́_evá hārayante //
Sentence: 10    sá yáḥ kāmáyeta priyáḥ syām íti //

Verse: 4    {BS 2.3.10.46}
Sentence: 1    yáṃ vā kāmáyeta priyáḥ syād íti /
Sentence: 2    tásmā etám̐ stʰāgarám alaṅkāráṃ kalpayitvā́ /
Sentence: 3    dáśahotāraṃ purástād vyākʰyā́ya /
Sentence: 4    cáturhotāraṃ dakṣiṇatáḥ /
Sentence: 5    pañcahotāraṃ paścā́t /
Sentence: 6    ṣáḍḍhotāram uttaratáḥ /
Sentence: 7    saptáhotāram upáriṣṭāt /
Sentence: 8    sambʰāráiś ca pátnibʰiś ca múkʰe 'laṅkŕ̥tya /
Sentence: 9    ā́_asya_árdʰaṃ vrajet /
Sentence: 10    priyó ha_evá bʰavati //

Paragraph: 11 
Verse: 1    {BS 2.3.11.47}
Sentence: 1    bráhmā_ātmanvád asr̥jata /
Sentence: 2    tád akāmayata /
Sentence: 3    sám ātmánā pádyeya_íti /
Sentence: 4    ā́tmann ā́tmann íty ā́mantrayata /
Sentence: 5    tásmai daśamám̐ hūtáḥ prátyaśr̥ṇot /
Sentence: 6    sá dáśahūto 'bʰavat /
Sentence: 7    dáśahūto ha vái nā́ma_eṣáḥ /
Sentence: 8    táṃ vā́ etáṃ dáśahūtam̐ sántam /
Sentence: 9    dáśahotā_íty ā́cakṣate {/} parókṣeṇa /
Sentence: 10    parókṣapriyā iva hí devā́ḥ //

Verse: 2    {BS 2.3.11.48}
Sentence: 1    ā́tmann ā́tmann íty ā́mantrayata /
Sentence: 2    tásmai saptamám̐ hūtáḥ prátyaśr̥ṇot /
Sentence: 3    sá saptáhūto 'bʰavat /
Sentence: 4    saptáhūto ha vái nā́ma_eṣáḥ /
Sentence: 5    táṃ vā́ etám̐ saptáhūtam̐ sántam /
Sentence: 6    saptáhotā_íty ā́cakṣate parókṣeṇa /
Sentence: 7    parókṣapriyā iva hí devā́ḥ //
Sentence: 8    ā́tmann ā́tmann íty ā́mantrayata /
Sentence: 9    tásmai ṣaṣṭhám̐ hūtáḥ prátyaśr̥ṇot /
Sentence: 10    sá ṣáḍḍhūto 'bʰavat //

Verse: 3    {BS 2.3.11.49}
Sentence: 1    ṣáḍdʰūto ha vái nā́ma_eṣáḥ /
Sentence: 2    táṃ vā́ etám̐ ṣáḍḍhūtam̐ sántam /
Sentence: 3    ṣáḍḍhotā_íty ā́cakṣate parókṣeṇa /
Sentence: 4    parókṣapriyā iva hí devā́ḥ //
Sentence: 5    ā́tmann ā́tmann íty ā́mantrayata /
Sentence: 6    tásmai pañcamám̐ hūtáḥ prátyaśr̥ṇot /
Sentence: 7    sá páñcahūto 'bʰavat /
Sentence: 8    páñcahūto ha vái nā́ma_eṣáḥ /
Sentence: 9    táṃ vā́ etáṃ páñcahūtam̐ sántaṃ /
Sentence: 10    páñcahotā_íty ā́cakṣate parókṣeṇa //

Verse: 4    {BS 2.3.11.50}
Sentence: 1    parókṣapriyā iva hí devā́ḥ //
Sentence: 2    ā́tmann ā́tmann íty āmantrayata /
Sentence: 3    tásmai caturtʰám̐ hūtáḥ prátyaśr̥ṇot /
Sentence: 4    sá cáturhūto 'bʰavat /
Sentence: 5    cáturhūto ha vái nā́ma_eṣáḥ /
Sentence: 6    táṃ vā́ etáṃ cáturhūtam̐ sántam /
Sentence: 7    cáturhotā_íty ā́cakṣate {/} parókṣeṇa /
Sentence: 8    parókṣapriyā iva hí devā́ḥ //
Sentence: 9    tám abravīt /
Sentence: 10    tváṃ vái me nédiṣṭham̐ hūtáḥ prátyaśrauṣīḥ /
Sentence: 11    tváyā_enān ākʰyātā́ra íti /
Sentence: 12    tásmān nú ha_enām̐ś cáturhotāra íty ā́cakṣate /
Sentence: 13    tásmāc śuśrūṣúḥ putrā́ṇām̐ hŕ̥dyatamaḥ /
Sentence: 14    nédiṣṭho hŕ̥dyatamaḥ /
Sentence: 15    nédiṣṭho bráhmaṇo bʰavati /
Sentence: 16    yá eváṃ véda //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.