TITUS
Black Yajur-Veda: Taittiriya-Brahmana
Part No. 12
Previous part

Chapter: 4 
Paragraph: 1 
Verse: 1    {BS 2.4.1.1}
Sentence: 1    júṣṭo dámūnā átitʰir duroṇé /
Sentence: 2    imáṃ no yajñám úpayāhi vidvā́n /
Sentence: 3    víśvā agne 'bʰiyújo vihátya /
Sentence: 4    śatrūyatā́m ā́bʰarā bʰójanāni //
Sentence: 5    ágne śárdʰa mahaté sáubʰagāya /
Sentence: 6    táva dyumnā́ny uttamā́ni santu /
Sentence: 7    sáṃ jāspatyám̐ suyámam ā́kr̥ṇuṣva /
Sentence: 8    śatrūyatā́m abʰítiṣṭhā máhām̐si //
Sentence: 9    ágne yó no 'bʰíto jánaḥ /
Sentence: 10    vŕ̥ko vā́ro jígʰām̐sati //

Verse: 2    {BS 2.4.1.2}
Sentence: 1    tā́m̐s tváṃ vr̥trahañ jahi /
Sentence: 2    vásv asmábʰyam ā́bʰara //
Sentence: 3    ágne yó no 'bʰidā́sati /
Sentence: 4    samā́no yáś ca níṣṭyaḥ /
Sentence: 5    idʰmásya_iva prakṣā́yataḥ /
Sentence: 6    mā́ tásya_úccʰeṣi kíñ caná /
Sentence: 7    tvám indra_abʰibʰū́r asi /
Sentence: 8    devó víjñātavīryaḥ /
Sentence: 9    vr̥trahā́ purucétanaḥ //
Sentence: 10    ápa prā́ca índra víśvām̐ amítrān //

Verse: 3    {BS 2.4.1.3}
Sentence: 1    ápa_ápāco abʰibʰūte nudasva /
Sentence: 2    ápa_údīco ápa śūra_dʰarā́ca ūráu /
Sentence: 3    yátʰā táva śárman mádema //
Sentence: 4    tám índraṃ vājayāmasi /
Sentence: 5    mahé vr̥trā́ya hántave /
Sentence: 6    sá vŕ̥ṣā vr̥ṣabʰó bʰuvat['bʰuvat?] //
Sentence: 7    yujé rátʰaṃ gavéṣaṇam̐ háribʰyām /
Sentence: 8    úpa bráhmāṇi jujuṣāṇám astʰuḥ /
Sentence: 9    víbādʰiṣṭa_asyá ródasī mahitvā́ /
Sentence: 10    índro vr̥trā́ṇy apratī́jagʰanvā́n //

Verse: 4    {BS 2.4.1.4}
Sentence: 1    havyavā́ham abʰimātiṣā_áham /
Sentence: 2    rakṣoháṇaṃ pŕ̥tanāsu jiṣṇúm /
Sentence: 3    jyótiṣmantaṃ dī́dyataṃ púrandʰim /
Sentence: 4    agním̐ sviṣṭakŕ̥tam {F ā́huvema} {AS ā́humeva} {BI ā́huvema} {BS ā́huvema} //
Sentence: 5    svìṣṭam agne abʰí tát pr̥ṇāhi /
Sentence: 6    víśvā deva pŕ̥tanā abʰíṣyá /
Sentence: 7    urúṃ naḥ pántʰāṃ pradiśán víbʰāhi /
Sentence: 8    jyótiṣmad dʰehy ajáraṃ na {F ā́yuḥ} {AS ā́yuḥ} {BI ā́yaḥ} {BS ā́yuḥ} //
Sentence: 9    tvā́m agne havíṣmantaḥ /
Sentence: 10    deváṃ mártāsa īḍate //

Verse: 5    {BS 2.4.1.5}
Sentence: 1    mánye tvā jātávedasam /
Sentence: 2    sá havyā́ vakṣyā_anuṣák //
Sentence: 3    víśvāni no durgáhā jātavedaḥ /
Sentence: 4    síndʰuṃ ná nāvā́ duritā_átiparṣi /
Sentence: 5    ágne atriván mánasā gr̥ṇānáḥ /
Sentence: 6    asmā́kaṃ bodʰyavitā́ tanū́nām //
Sentence: 7    pūṣā́ gā́ ánvetu naḥ /
Sentence: 8    pūṣā́ rakṣatv árvataḥ /
Sentence: 9    pūṣā́ vā́jam̐ sanotu naḥ //
Sentence: 10    pūṣā́_ímā́ ā́śā ánuveda sárvāḥ //

Verse: 6    {BS 2.4.1.6}
Sentence: 1    só asmā́m̐ ábʰayatamena neṣat /
Sentence: 2    svastidā́ ágʰr̥ṇiḥ sárvavīraḥ /
Sentence: 3    áprayuccʰan purá etu prájānán //
Sentence: 4    {F tvám} {AS tvám} {BI svám} {BS tvám} agne saprátʰā asi /
Sentence: 5    júṣṭo hótā váreṇyaḥ /
Sentence: 6    tváyā yajñáṃ vítanvate //
Sentence: 7    agnī́ rákṣām̐si sedʰati /
Sentence: 8    śukráśocir ámartyaḥ /
Sentence: 9    śúciḥ pāvaká ī́ḍyaḥ //
Sentence: 10    ágne rákṣāṇo ám̐hasaḥ //

Verse: 7    {BS 2.4.1.7}
Sentence: 1    prátiṣma deva rī́ṣataḥ /
Sentence: 2    tápiṣṭhair ajáro daha /
Sentence: 3    ágne hám̐si nyàtriṇam /
Sentence: 4    dī́dyan mártyeṣv ā́ /
Sentence: 5    své kṣáye śucivrata //
Sentence: 6    ā́ vāta vāhi bʰeṣajám /
Sentence: 7    ví vāta vāhi yád rápaḥ /
Sentence: 8    tvám̐ hí viśvábʰeṣajaḥ /
Sentence: 9    devā́nāṃ dūtá ī́yase //
Sentence: 10    dvā́v imáu vā́tau vātaḥ //

Verse: 8    {BS 2.4.1.8}
Sentence: 1    ā́ síndʰor ā́ parāvátaḥ /
Sentence: 2    dákṣaṃ me anyá āvā́tu /
Sentence: 3    párā_anyó vātu yád rápaḥ //
Sentence: 4    yád adó vāta té gr̥hé /
Sentence: 5    amŕ̥tasya nidʰír hitáḥ /
Sentence: 6    táto no dehi jīváse /
Sentence: 7    táto no dʰehi bʰeṣajám /
Sentence: 8    táto no máha ā́vaha //
Sentence: 9    vā́ta ā́vātu bʰeṣajám /
Sentence: 10    śambʰū́r mayobʰū́r no hr̥dé //

Verse: 9    {BS 2.4.1.9}
Sentence: 1    prá ṇa ā́yūm̐ṣi tāriṣat //
Sentence: 2    tvám agne ayā́si /
Sentence: 3    ayā́ sánmánasā hitáḥ /
Sentence: 4    ayā́ sán havyámūhiṣe /
Sentence: 5    ayā́ no dʰehi bʰeṣajám //
Sentence: 6    iṣṭó agnír ā́hutaḥ /
Sentence: 7    svā́hākr̥taḥ pipartu naḥ /
Sentence: 8    svagā́ devébʰya idáṃ námaḥ //
Sentence: 9    kā́mo bʰūtásya bʰávyasya /
Sentence: 10    samrā́ḍ éko vírājati //

Verse: 10    {BS 2.4.1.10}
Sentence: 1    sá idáṃ prátipapratʰe /
Sentence: 2    r̥tū́n útsr̥jate vaśī́ //
Sentence: 3    kā́mas tád ágre sámavartata_ádʰi /
Sentence: 4    mánaso rétaḥ pratʰamáṃ yád ā́sīt /
Sentence: 5    sató bándʰum ásati níravindan /
Sentence: 6    hr̥dí pratī́ṣyā kaváyo manīṣā́ //
Sentence: 7    tváyā manyo sarátʰam ārujántaḥ /
Sentence: 8    hárṣamāṇāso dʰr̥ṣatā́ marutvaḥ /
Sentence: 9    tigma_íṣava ā́yudʰā sam̐śíśānāḥ /
Sentence: 10    úpapráyanti náro agnírūpāḥ //

Verse: 11    {BS 2.4.1.11}
Sentence: 1    manyúr bʰágo manyúr evá_āsa deváḥ /
Sentence: 2    manyúr hótā váruṇo viśvávedāḥ /
Sentence: 3    manyúṃ víśa īḍate devayántīḥ /
Sentence: 4    pāhí no manyo tápasā śrámeṇa //
Sentence: 5    tvám agne vratabʰŕ̥t_śúciḥ /
Sentence: 6    devā́m̐ ā́sādayā ihá /
Sentence: 7    ágne havyā́ya vóḍhave //
Sentence: 8    vratā́ nú bíbʰrad vratapā́ ádābʰyaḥ /
Sentence: 9    yájāno devā́m̐ ajáraḥ suvī́raḥ /
Sentence: 10    dádʰad rátnāni suvidānó agne /
Sentence: 11    gopāyá no jīváse jātavedaḥ //

Paragraph: 2 
Verse: 1    {BS 2.4.2.12}
Sentence: 1    cákṣuṣo hete mánaso hete /
Sentence: 2    vā́co hete bráhmaṇo hete /
Sentence: 3    yó mā_agʰāyúr abʰidā́sati /
Sentence: 4    tám agne menyā́_ameníṃ kr̥ṇu //
Sentence: 5    yó mā cákṣuṣā yó mánasā /
Sentence: 6    yó vācā́ bráhmaṇā_agʰāyúr abʰidā́sati /
Sentence: 7    táyā_agne tváṃ menyā́ /
Sentence: 8    amúm ameníṃ kr̥ṇu //
Sentence: 9    yát kíṃ ca_asáu mánasā yác ca vācā́ /
Sentence: 10    yajñáir juhóti yájuṣā havírbʰiḥ //

Verse: 2    {BS 2.4.2.13}
Sentence: 1    tán mr̥tyúr nírr̥tyā saṃvidānáḥ /
Sentence: 2    purā́ diṣṭā́d ā́hutīr asya hantu //
Sentence: 3    yātudʰā́nā nírr̥tir ā́d u rákṣaḥ /
Sentence: 4    té asya gʰnantv ánr̥tena satyám /
Sentence: 5    índra_iṣitā ā́jyam asya matʰnantu /
Sentence: 6    mā́ tát sámr̥ddʰi yád asáu karóti //
Sentence: 7    hánmi te 'háṃ kr̥tám̐ havíḥ /
Sentence: 8    yó me gʰorám ácīkr̥taḥ /
Sentence: 9    ápāñcau tá ubʰáu bāhū́ /
Sentence: 10    ápanahyāmy āsyàm //

Verse: 3    {BS 2.4.2.14}
Sentence: 1    ápanahyāmi te bāhū́ /
Sentence: 2    ápanahyāmy āsyàm /
Sentence: 3    agnér devásya bráhmaṇā /
Sentence: 4    sárvaṃ te 'vadʰiṣaṃ kr̥táṃ //
Sentence: 5    purā́_amúṣya vaṣaṭkārā́t /
Sentence: 6    yajñáṃ devéṣu nas kr̥dʰi /
Sentence: 7    svìṣṭam asmā́kaṃ bʰūyāt /
Sentence: 8    mā́_asmā́n prā́pann árātayaḥ //
Sentence: 9    ánti dūré sató agne /
Sentence: 10    bʰrā́tr̥vyasyā_abʰidā́sataḥ //

Verse: 4    {BS 2.4.2.15}
Sentence: 1    vaṣaṭkāréṇa vájreṇa /
Sentence: 2    kr̥tyā́m̐ hanmi kr̥tā́m ahám //
Sentence: 3    yó mā náktaṃ dívā sāyám /
Sentence: 4    prātáś ca_áhno nipī́yati /
Sentence: 5    adyā́ tám indra vájreṇa /
Sentence: 6    bʰrā́tr̥vyaṃ pādayāmasi //
Sentence: 7    índrasya gr̥hò 'si táṃ tvā /
Sentence: 8    prápadye ságuḥ sa_áśvaḥ /
Sentence: 9    sahá yán me ásti téna //
Sentence: 10    ī́ḍe agníṃ vipaścítam //

Verse: 5    {BS 2.4.2.16}
Sentence: 1    girā́ yajñásya sā́dʰanam /
Sentence: 2    śruṣṭīvā́naṃ dʰitā́vānam //
Sentence: 3    ágne śakéma te vayám /
Sentence: 4    yámaṃ devásya vājínaḥ /
Sentence: 5    áti dvéṣām̐ṣi tarema //
Sentence: 6    ávataṃ mā sámanasau sámokasau /
Sentence: 7    sácetasau sáretasau /
Sentence: 8    ubʰáu mā́m avataṃ jātavedasau /
Sentence: 9    śiváu bʰavatam adyá naḥ //
Sentence: 10    svayáṃ kr̥ṇvānáḥ sugám áprayāvam //

Verse: 6    {BS 2.4.2.17}
Sentence: 1    tigmáśr̥ṅgo vr̥ṣabʰáḥ śóśucānaḥ /
Sentence: 2    pratnám̐ sadʰástʰam ánupáśyamānaḥ /
Sentence: 3    ā́ tántum agnír divyáṃ tatāna //
Sentence: 4    tváṃ nas tántur utá sétur agne /
Sentence: 5    tváṃ pántʰā bʰavasi devayā́naḥ /
Sentence: 6    tváyā_agne pr̥ṣṭháṃ vayám ā́ruhema {BS ā́ruheya} {AS,BI ā́ruhema} /
Sentence: 7    átʰā deváiḥ sadʰamā́daṃ madema //
Sentence: 8    úd uttamáṃ mumugdʰi naḥ /
Sentence: 9    ví pā́śaṃ madʰyamáṃ cr̥ta /
Sentence: 10    áva_adʰamā́ni jīváse //

Verse: 7    {BS 2.4.2.18}
Sentence: 1    vayám̐ soma vraté táva /
Sentence: 2    mánas tanū́ṣu bíbʰrataḥ /
Sentence: 3    prajā́vanto áśīmahi //
Sentence: 4    indrāṇī́ devī́ subʰágā supátnī /
Sentence: 5    úd ám̐śena pativídye jigāya /
Sentence: 6    trim̐śád asyā jagʰánaṃ yójanāni /
Sentence: 7    upástʰa índram̐ stʰáviraṃ bibʰarti //
Sentence: 8    sénā ha nā́ma pr̥tʰivī́ dʰanaṃjayā́ /
Sentence: 9    viśvávyacā áditiḥ sū́ryatvak /
Sentence: 10    indrāṇī́ devī́ prāsáhā dádānā //

Verse: 8    {BS 2.4.2.19}
Sentence: 1    sā́ no devī́ suhávā śárma yaccʰatu //
Sentence: 2    ā́ tvā_ahārṣam antárabʰūḥ /
Sentence: 3    dʰruvás tiṣṭha_ávicācaliḥ /
Sentence: 4    víśas tvā sárvā vāñcʰantu /
Sentence: 5    mā́ tvád rāṣṭrám ádʰibʰraśat //
Sentence: 6    dʰruvā́ dyáur dʰruvā́ pr̥tʰivī́ /
Sentence: 7    dʰruváṃ víśvam idáṃ jágat /
Sentence: 8    dʰruvā́ ha párvatā imé /
Sentence: 9    dʰruvó rā́jā viśā́m ayám //
Sentence: 10    ihá_evá_edʰi mā́ vyatʰiṣṭhāḥ //

Verse: 9    {BS 2.4.2.20}
Sentence: 1    párvata iva_ávicācaliḥ /
Sentence: 2    índra iva_ihá dʰruvás tiṣṭha /
Sentence: 3    ihá rāṣṭrám u dʰāraya //
Sentence: 4    abʰítiṣṭha pr̥tanyatáḥ /
Sentence: 5    ádʰare santu śátravaḥ /
Sentence: 6    índra iva vr̥trahā́ tiṣṭha /
Sentence: 7    apáḥ kṣétrāṇi saṃjáyan //
Sentence: 8    índra eṇam adīdʰarat /
Sentence: 9    dʰruváṃ dʰruvéṇa havíṣā /
Sentence: 10    tásmai devā́ ádʰibravan /
Sentence: 11    ayáṃ ca bráhmaṇaspátiḥ //

Paragraph: 3 
Verse: 1    {BS 2.4.3.21}
Sentence: 1    júṣṭī naro bráhmaṇā vaḥ pitr̥ṇā́m /
Sentence: 2    ákṣam avyayaṃ ná kílā riṣātʰa /
Sentence: 3    yát_śákvarīṣu br̥hatā́ ráveṇa /
Sentence: 4    índre śúṣmam ádadʰātʰā vasiṣṭhāḥ //
Sentence: 5    pāvakā́ naḥ sárasvatī /
Sentence: 6    vā́jebʰir vājínīvatī /
Sentence: 7    yajñáṃ vaṣṭu dʰiyā́ vasuḥ /
Sentence: 8    sárasvaty abʰí no neṣi vásyaḥ mā́ paspʰarīḥ páyasā mā́ na ā́dʰak /
Sentence: 9    juṣásva naḥ sakʰyā̀ veśyā̀ {BS veṣyā̀} ca //

Verse: 2    {BS 2.4.3.22}
Sentence: 1    mā́ tvát kṣétrāṇy áraṇāni ganma //
Sentence: 2    vr̥ñjé havír námasā barhír agnáu /
Sentence: 3    áyāmi srúc_ gʰr̥távatī suvr̥ktíḥ /
Sentence: 4    ámyakṣi sádma sádane pr̥tʰivyā́ḥ /
Sentence: 5    áśrāyi yajñáḥ sū́rye ná cákṣuḥ //
Sentence: 6    ihá_arvā́ñcam átihvaye /
Sentence: 7    índraṃ jáitrāya jétave {BS jétava} /
Sentence: 8    asmā́kam astu kévalaḥ //
Sentence: 9    arvā́ñcam índram amúto havāmahe /
Sentence: 10    yó gojíd dʰanajíd aśvajíd yáḥ //

Verse: 3    {BS 2.4.3.23}
Sentence: 1    imáṃ no yajñáṃ vihavé juṣasva /
Sentence: 2    asyá kurmo harivo medínaṃ tvā //
Sentence: 3    ásaṃmr̥ṣṭo jāyase mātr̥vóḥ {AS notes the reading mātr̥vvoḥ} śúciḥ /
Sentence: 4    mandráḥ kavír údatiṣṭho vívasvataḥ /
Sentence: 5    gʰr̥téna tvā vardʰayann agna āhuta /
Sentence: 6    dʰūmás te ketúr abʰavad diví śritáḥ //
Sentence: 7    agnír ágre pratʰamó devátānām /
Sentence: 8    sáṃyātānām uttamó víṣṇur āsīt /
Sentence: 9    yájamānāya parigŕ̥hya devā́n /
Sentence: 10    dīkṣáyā_idám̐ havír ā́gaccʰataṃ naḥ //

Verse: 4    {BS 2.4.3.24}
Sentence: 1    agníś ca viṣṇo tápa uttamáṃ maháḥ /
Sentence: 2    dīkṣāpālébʰyo vánatam̐ hí śakrā́ /
Sentence: 3    víśvair deváir yajñíyaiḥ saṃvidānáu /
Sentence: 4    dīkṣā́m asmái yájamānāya dʰattam //
Sentence: 5    prá tád víṣṇuḥ stavate vīryā̀ya /
Sentence: 6    mr̥gó ná bʰīmáḥ kucaró giriṣṭhā́ḥ /
Sentence: 7    yásya_ūrúṣu triṣú vikrámaṇeṣu /
Sentence: 8    ádʰikṣiyánti bʰúvanāni víśvā //
Sentence: 9    nū́ márto dayate saniṣyán yáḥ /
Sentence: 10    víṣṇava urugāyā́ya dā́śat //

Verse: 5    {BS 2.4.3.25}
Sentence: 1    prá yáḥ satrā́cā mánasā yájātai /
Sentence: 2    etā́vantaṃ náryam āvívāsāt //
Sentence: 3    vícakrame pr̥tʰivī́m eṣá etā́m /
Sentence: 4    kṣétrāya víṣṇur mánuṣe daśasyán /
Sentence: 5    dʰruvā́so asya kīráyo jánāsaḥ /
Sentence: 6    urukṣitím̐ sujánimā cakāra //
Sentence: 7    trír deváḥ pr̥tʰivī́m eṣá etā́m /
Sentence: 8    vícakrame śatárcasaṃ mahitvā́ /
Sentence: 9    prá víṣṇur astu tavásas távīyān /
Sentence: 10    tveṣám̐ hy asya stʰávirasya nā́ma //

Verse: 6    {BS 2.4.3.26}
Sentence: 1    hótāraṃ citráratʰam adʰvarásya /
Sentence: 2    yajñásya yajñasya ketúm̐ rúśantam /
Sentence: 3    prátyardʰiṃ devásya devasya mahnā́ /
Sentence: 4    śriyā́ tvā_agním átitʰiṃ janānām //
Sentence: 5    ā́ no víśvābʰir ūtíbʰiḥ sajóṣāḥ /
Sentence: 6    bráhma juṣāṇó haryaśva yāhi /
Sentence: 7    várīvr̥jat stʰávirebʰiḥ suśipra /
Sentence: 8    asmé dádʰad vŕ̥ṣaṇam̐ śúṣmam indra //
Sentence: 9    índraḥ suvarṣā́ janáyann áhāni /
Sentence: 10    jigā́ya_uśígbʰiḥ pŕ̥tanā abʰiśrī́ḥ //

Verse: 7    {BS 2.4.3.27}
Sentence: 1    prā́rocayan mánave ketúm áhnām /
Sentence: 2    ávindaj jyótir br̥haté ráṇāya //
Sentence: 3    áśvināv ávase níhvaye vām /
Sentence: 4    ā́ nūnáṃ yātam̐ sukr̥tā́ya viprā /
Sentence: 5    prātaryukténa suvŕ̥tā rátʰena /
Sentence: 6    upā́gaccʰatam ávasā_ā́gataṃ naḥ /
Sentence: 7    aviṣṭáṃ dʰīṣv áśvinā na āsú /
Sentence: 8    prajā́vad réto áhrayaṃ no astu /
Sentence: 9    ā́vāṃ toké tánaye tū́tujānāḥ /
Sentence: 10    surátnāso devávītiṃ gamema //

Verse: 8    {BS 2.4.3.28}
Sentence: 1    tvám̐ soma krátubʰiḥ sukrátur bʰūḥ /
Sentence: 2    tváṃ dákṣaiḥsudákṣo viśvávedāḥ /
Sentence: 3    tváṃ vŕ̥ṣā vr̥ṣatv ébʰir mahitvā́ /
Sentence: 4    dyumnébʰir dyumny àbʰavo nr̥cákṣāḥ //
Sentence: 5    áṣāḍhaṃ yutsú pŕ̥tanāsu pápriyam /
Sentence: 6    suvarṣā́m apsvā́ṃ vr̥jánasya gopā́m /
Sentence: 7    bʰareṣujā́m̐ sukṣitím̐ suśrávasam /
Sentence: 8    jáyantaṃ tvā́m ánu madema soma //
Sentence: 9    bʰávā mitró ná śévyo gʰr̥tā́sutiḥ /
Sentence: 10    víbʰūtadyumna evayā́ u saprátʰāḥ //

Verse: 9    {BS 2.4.3.29}
Sentence: 1    ádʰā {BS ádʰo} te viṣṇo vidúṣācid ŕ̥dʰyaḥ /
Sentence: 2    stómo yajñásya rā́dʰyo havíṣmataḥ //
Sentence: 3    yáḥ pūrvyā́ya vedʰáse návīyase /
Sentence: 4    sumájjānaye víṣṇave dádāśati /
Sentence: 5    yó jātám asyá maható mahí brávāt /
Sentence: 6    séduḥ śrávobʰir yujyàṃcíd abʰyàsat /
Sentence: 7    tám u stotāraḥ pūrvyáṃ yátʰā vidá r̥tásya /
Sentence: 8    gárbʰam̐ havíṣā pipartana /
Sentence: 9    ā́_asya jānánto nā́ma cid vivaktana /
Sentence: 10    br̥hát te viṣṇo sumatíṃ bʰajāmahe //

Verse: 10    {BS 2.4.3.30}
Sentence: 1    imā́ dʰānā́ gʰr̥tasnúvaḥ /
Sentence: 2    hárī ihá_úpavakṣataḥ /
Sentence: 3    índram̐ sukʰátame rátʰe //
Sentence: 4    eṣá brahmā́ prá te mahé /
Sentence: 5    vidátʰe śam̐siṣam̐ hárī /
Sentence: 6    yá r̥tvíyaḥ prá te vanve /
Sentence: 7    vanúṣo haryatáṃ mádam /
Sentence: 8    índro nā́ma gʰr̥táṃ ná yáḥ /
Sentence: 9    háribʰiś cā́ru sécate /
Sentence: 10    śrutó gaṇá ā́ tvā viśantu //

Verse: 11    {BS 2.4.3.31}
Sentence: 1    hárivarpasaṃ gíraḥ //
Sentence: 2    ā́ carṣaṇiprā́ vr̥ṣabʰó jánānām /
Sentence: 3    rā́jā kr̥ṣṭīnā́ṃ puruhūtá índraḥ /
Sentence: 4    stutáḥ śravasyánn ávasā_úpa madrík /
Sentence: 5    yuktvā́ hárī vŕ̥ṣaṇā_ā́yāhy arvā́ṅ //
Sentence: 6    prá yát síndʰavaḥ prasaváṃ yád ā́yan /
Sentence: 7    ā́paḥ samudrám̐ ratʰyā́_iva jagmuḥ /
Sentence: 8    átaś cid índraḥ sádaso várīyān /
Sentence: 9    yád īm̐ sómaḥ pr̥ṇā́ti dugdʰó am̐śúḥ //
Sentence: 10    hváyāmasi tvā_índra yāhy àrvāṅ //

Verse: 12    {BS 2.4.3.32}
Sentence: 1    áraṃ te sómas tanúve bʰavāti /
Sentence: 2    śátakrato mādáyasvā sutéṣu /
Sentence: 3    prá_asmā́m̐ ava pŕ̥tanāsu prá yutsú //
Sentence: 4    índrāya sómāḥ pradívo vídānāḥ /
Sentence: 5    r̥bʰúr yébʰir vŕ̥ṣaparvā víhāyāḥ /
Sentence: 6    prayamyámāṇān práti ṣū́ gr̥bʰāya /
Sentence: 7    índra píba vŕ̥ṣadʰūtasya vŕ̥ṣṇaḥ /
Sentence: 8    áheḍamāna úpayāhi yajñám /
Sentence: 9    túbʰyaṃ pavanta índavaḥ sutā́saḥ /
Sentence: 10    gā́vo ná vajrint svamóko áccʰa //

Verse: 13    {BS 2.4.3.33}
Sentence: 1    índra_āgahi pratʰamó yajñíyānām //
Sentence: 2    yā́ te kākút súkr̥tā yā́ váriṣṭhā /
Sentence: 3    yáyā śáśvat píbasi mádʰva ūrmím /
Sentence: 4    táyā pāhi prá te adʰvaryúr astʰāt /
Sentence: 5    sáṃ te vájro vartatām indra gavyúḥ //
Sentence: 6    prātaryújā víbodʰaya /
Sentence: 7    áśvināv ā́_ihá gaccʰatam /
Sentence: 8    asyá sómasya pītáye //
Sentence: 9    {not in BS?} prātaryā́vāṇā pratʰamā́ yajadʰvam /
Sentence: 10    purā́ gŕ̥dʰrād áraruṣaḥ pibātʰaḥ /
Sentence: 11    prātár hí yajñám aśvínā dádʰāte /
Sentence: 12    práśam̐santi kaváyaḥ pūrvabʰā́jaḥ //
Sentence: 13    prātár yajadʰvam aśvínā hinota /
Sentence: 14    ná sāyám asti devayā́ ájuṣṭam /
Sentence: 15    utá_ányó asmád yajate vícāyaḥ /
Sentence: 16    pū́rvaḥ pūrvo yájamāno vánīyān //

Paragraph: 4 
Verse: 1    {BS 2.4.4.34}
Sentence: 1    naktaṃ jātā́_asy oṣadʰe /
Sentence: 2    rā́me kŕ̥ṣṇe ásikni ca /
Sentence: 3    idám̐ rajani rajaya /
Sentence: 4    kilā́saṃ palitáṃ ca yát //
Sentence: 5    kilā́saṃ ca palitáṃ ca /
Sentence: 6    níritó nāśayā pŕ̥ṣat /
Sentence: 7    ā́ naḥ svó aśnutāṃ várṇaḥ /
Sentence: 8    párā śvetā́ni pātaya //
Sentence: 9    ásitaṃ te niláyanam /
Sentence: 10    āstʰā́nam ásitaṃ táva //

Verse: 2    {BS 2.4.4.35}
Sentence: 1    ásikniy asy oṣadʰe /
Sentence: 2    nír itó nāśayā pŕ̥ṣat //
Sentence: 3    astʰijásya kilā́sasya /
Sentence: 4    tanūjásya ca yát tvací /
Sentence: 5    kr̥tyáyā kr̥tásya bráhmaṇā /
Sentence: 6    lákṣma śvetám anīnaśam //
Sentence: 7    sárūpā nā́ma te mātā́ /
Sentence: 8    sárūpo nā́ma te pitā́ /
Sentence: 9    sárūpā_asy oṣadʰe sā́ /
Sentence: 10    sárūpam idáṃ kr̥dʰi //

Verse: 3    {BS 2.4.4.36}
Sentence: 1    śunám̐ huvema magʰávānam índram /
Sentence: 2    asmín bʰáre nŕ̥tamaṃ vā́jasātau /
Sentence: 3    śr̥ṇvántam ugrám ūtáye /
Sentence: 4    samátsu /
Sentence: 5    gʰnántaṃ vr̥trā́ṇi saṃjítaṃ dʰánānām //
Sentence: 6    dʰūnutʰá dyā́ṃ párvatān dāśúṣe vásu /
Sentence: 7    ní vo vánā jihate yā́mano bʰiyā́ /
Sentence: 8    kopáyatʰa pr̥tʰivī́ṃ pr̥śnimātaraḥ /
Sentence: 9    yudʰé yád ugrāḥ pŕ̥ṣatīr áyugdʰvam //
Sentence: 10    právepayanti párvatān /
Sentence: 11    víviñcanti vánaspátīn //

Verse: 4    {BS 2.4.4.37}
Sentence: 1    pró 'vārata maruto durmádā iva /
Sentence: 2    dévāsaḥ sárvayā viśā́ /
Sentence: 3    purutrā́ hí sadŕ̥ṅṅ ási /
Sentence: 4    víśo víśvā ánu prabʰú /
Sentence: 5    samátsu tvā havāmahe //
Sentence: 6    samátsv agním ávase /
Sentence: 7    vājayánto havāmahe /
Sentence: 8    vā́jeṣu citrárādʰasam //
Sentence: 9    sáṃgaccʰadʰvam̐ sáṃvadadʰvam /
Sentence: 10    sáṃ vo mánām̐si jānatām //

Verse: 5    {BS 2.4.4.38}
Sentence: 1    devā́ bʰāgáṃ yátʰā pū́rve /
Sentence: 2    saṃjānānā́ upā́sata //
Sentence: 3    samānó mántraḥ sámitiḥ samānī́ /
Sentence: 4    samānáṃ mánaḥ sahá cittám eṣām /
Sentence: 5    samānáṃ kéto abʰí sám̐rabʰadʰvam /
Sentence: 6    saṃjñā́nena vo havíṣā yajāmaḥ //
Sentence: 7    samānī́ va ā́kūtiḥ /
Sentence: 8    samānā́ hŕ̥dayāni vaḥ /
Sentence: 9    samānám astu vo mánaḥ /
Sentence: 10    yátʰā vaḥ súsahā́sati //

Verse: 6    {BS 2.4.4.39}
Sentence: 1    saṃjñā́naṃ naḥ sváiḥ /
Sentence: 2    saṃjñā́nam áraṇaiḥ /
Sentence: 3    saṃjñā́nam aśvinā yuvám /
Sentence: 4    ihá_asmā́su níyaccʰatam //
Sentence: 5    saṃjñā́naṃ me bŕ̥haspátiḥ /
Sentence: 6    saṃjñā́nam̐ savitā́_akarat /
Sentence: 7    saṃjñā́nam aśvinā yuvám /
Sentence: 8    ihá máhyaṃ níyaccʰatam //
Sentence: 9    úpa ccʰāyā́m iva gʰŕ̥ṇeḥ /
Sentence: 10    áganma śárma te vayám //

Verse: 7    {BS 2.4.4.40}
Sentence: 1    ágne híraṇyasaṃdr̥śaḥ /
Sentence: 2    ádabdʰebʰiḥ savitaḥ pāyúbʰiṣ ṭvám /
Sentence: 3    śivébʰir adyá páripāhi no gáyam /
Sentence: 4    hiranyajihvaḥ suvitā́ya návyase /
Sentence: 5    rákṣā mā́kir no agʰáśam̐sa īśata //
Sentence: 6    máde_made hí no dadúḥ /
Sentence: 7    yutʰā́ gávām r̥jukrátuḥ /
Sentence: 8    sáṃgr̥bʰāya purū́ {BS pūrū́} śatā́ /
Sentence: 9    ubʰayā́ hastyā́ vásu /
Sentence: 10    śiśīhí rāyá ā́bʰara //

Verse: 8    {BS 2.4.4.41}
Sentence: 1    śíprin vājānāṃ pate /
Sentence: 2    śácīvas táva dam̐sánā /
Sentence: 3    ā́ tū́ na indra bʰājaya /
Sentence: 4    góṣv áśveṣu śubʰrúṣu /
Sentence: 5    sahásreṣu tuvīmagʰa //
Sentence: 6    yád devā deva héḍanam /
Sentence: 7    dévāsaś cakr̥mā́ vayám /
Sentence: 8    ā́dityās tásmān mā yūyám /
Sentence: 9    r̥tásya_r̥téna muñcata //
Sentence: 10    r̥tásya_r̥téna_ādityāḥ //

Verse: 9    {BS 2.4.4.42}
Sentence: 1    yájatrā muñcata_ihá mā /
Sentence: 2    yajñáir vo yajñavāhasaḥ /
Sentence: 3    āśíkṣanto na śekima //
Sentence: 4    médasvatā yájamānāḥ /
Sentence: 5    srucā́_ā́jyena júhvataḥ /
Sentence: 6    akāmā́ vo viśve devāḥ /
Sentence: 7    śíkṣanto ná_upaśekima //
Sentence: 8    yádi dívā yádi náktam /
Sentence: 9    éna enasyó 'karat /
Sentence: 10    bʰū́táṃ mā tásmād bʰávyaṃ ca //

Verse: 10    {BS 2.4.4.43}
Sentence: 1    drupadā́d iva muñcatu //
Sentence: 2    drupadā́d iva_ín mumucānáḥ /
Sentence: 3    svin náḥ srātvī́ málād iva /
Sentence: 4    pūtáṃ pavítreṇa_iva_ā́jyam /
Sentence: 5    víśve muñcantu mā_énasaḥ //
Sentence: 6    úd váyáṃ támasas pári /
Sentence: 7    páśyanto jyotir úttaram /
Sentence: 8    deváṃ devatrā́ sū́ryam /
Sentence: 9    áganma jyótir uttamam //

Paragraph: 5 
Verse: 1    {BS 2.4.5.44}
Sentence: 1    vŕ̥ṣā só am̐śúḥ pavate havíṣmānt sómaḥ /
Sentence: 2    índrasya bʰāgá r̥tayúḥ śata_ā́yuḥ /
Sentence: 3    sá mā vŕ̥ṣāṇaṃ vr̥ṣabʰáṃ kr̥ṇotu /
Sentence: 4    priyáṃ viśā́m̐ sárvavīram̐ suvī́ram //
Sentence: 5    kásya vŕ̥ṣā saté sácā /
Sentence: 6    niyútvān vr̥ṣabʰó raṇat /
Sentence: 7    vr̥trahā́ sómapītaye //
Sentence: 8    yás te śr̥ṅga vr̥ṣo napāt /
Sentence: 9    práṇapāt kuṇḍapā́yyaḥ /
Sentence: 10    ny àsmin dadʰra ā́ manaḥ //

Verse: 2    {BS 2.4.5.45}
Sentence: 1    tám̐ sadʰrī́cīr ūtáyo vŕ̥ṣṇiyāni /
Sentence: 2    páum̐syāni niyútaḥ saścur índram /
Sentence: 3    samudráṃ ná síndʰava uktʰáśuṣmāḥ /
Sentence: 4    uruvyácasaṃ gíra ā́viśanti //
Sentence: 5    índrāya gíro ániśitasargāḥ /
Sentence: 6    apáḥ práirayant ságarasya budʰnā́t /
Sentence: 7    yó ákṣeṇa_iva cakríyā śácibʰiḥ /
Sentence: 8    víṣvaktastámbʰa pr̥tʰivī́m utá dyā́m //
Sentence: 9    ákṣodayat_śávasā kṣā́ma budʰnám /
Sentence: 10    vā́rṇávātas táviṣībʰir índraḥ //

Verse: 3    {BS 2.4.5.46}
Sentence: 1    dr̥ḍhā́ny augʰnād uśámāna ójaḥ /
Sentence: 2    ávābʰinat kakúbʰaḥ párvatānām //
Sentence: 3    ā́ no agne suketúnā /
Sentence: 4    rayíṃ viśvā́yupoṣasam /
Sentence: 5    mārḍīkáṃ dʰehi jīváse //
Sentence: 6    tvám̐ soma mahé bʰágam /
Sentence: 7    tváṃ yū́na r̥tāyaté /
Sentence: 8    dákṣaṃ dadʰāsi jīváse //
Sentence: 9    rátʰaṃ yuñjate marútaḥ śubʰé sugám sū́ro ná mitrāvaruṇā gáviṣṭiṣu //

Verse: 4    {BS 2.4.5.47}
Sentence: 1    rájām̐si citrā́ vícaranti tanyávaḥ /
Sentence: 2    diváḥ samrājā páyasā na ukṣatam //
Sentence: 3    vā́cam̐ sú mitrāvaruṇāv írāvatīm /
Sentence: 4    parjányaś citrā́ṃ vadati tvíṣīmatīm /
Sentence: 5    abʰrā́ vasata marutaḥ su māyáyā /
Sentence: 6    dyā́ṃ varṣayatam aruṇā́m arepásam //
Sentence: 7    áyukta saptá śundʰyúvaḥ /
Sentence: 8    sū́ro rátʰasya naptríyaḥ /
Sentence: 9    tā́bʰir yāti sváyuktibʰiḥ //
Sentence: 10    váhiṣṭhebʰir viháran yā́si {BS vī́haṣṭhebʰir vaháran yāsi} tántum //

Verse: 5    {BS 2.4.5.48}
Sentence: 1    avavyáyann ásitaṃ deva vásvaḥ /
Sentence: 2    dávidʰvato raśmáyaḥ sū́ryasya /
Sentence: 3    cárma_iva_ávādʰus támo apsv àntaḥ //
Sentence: 4    parjányāya prágāyata /
Sentence: 5    divás putrā́ya mīḍhúṣe /
Sentence: 6    sá no yavásam iccʰatu //
Sentence: 7    áccʰā vada tavásaṃ gīrbʰír ābʰíḥ {BS ābʰí} /
Sentence: 8    stuhí parjányaṃ námasā́ vivāsa /
Sentence: 9    kánikradad vr̥ṣabʰó jīrádānuḥ /
Sentence: 10    réto dadʰātv óṣadʰīṣu gárbʰam //

Verse: 6    {BS 2.4.5.49}
Sentence: 1    yó gárbʰam óṣadʰīnām /
Sentence: 2    gávāṃ kr̥ṇóty árvatām /
Sentence: 3    parjányaḥ puruṣī́ṇām //
Sentence: 4    tásmā ídāsyè havíḥ /
Sentence: 5    juhótā mádʰumattamam /
Sentence: 6    íḍāṃ naḥ saṃyátaṃ karat //
Sentence: 7    tisró yád agne śarádas tvā́m ít /
Sentence: 8    śúciṃ gʰr̥téna śúcayaḥ saparyán /
Sentence: 9    nā́māni cid dadʰire yajñíyāni /
Sentence: 10    ásūdayanta tanúvaḥ sújātāḥ //

Verse: 7    {BS 2.4.5.50}
Sentence: 1    índraś ca naḥ śunāsīrau /
Sentence: 2    imáṃ yajñáṃ mimikṣatam /
Sentence: 3    gárbʰaṃ dʰattám̐ svastáye //
Sentence: 4    yáyor idáṃ víśvaṃ bʰúvanam āvivéśa /
Sentence: 5    yáyor ānandó níhito máhaś ca /
Sentence: 6    śúnāsīrāv r̥túbʰiḥ saṃvidānáu /
Sentence: 7    índravantau havír idáṃ {BS hr̥díridáṃ} juṣetʰām //
Sentence: 8    ā́ gʰā yé agním indʰaté /
Sentence: 9    str̥ṇánti barhír ānuṣak /
Sentence: 10    yéṣām índro yúvā sákʰā //
Sentence: 11    ágne índraś ca medínā /
Sentence: 12    hatʰó vr̥trā́ṇy apratí /
Sentence: 13    yuvám̐ hí vr̥trahántamā //
Sentence: 14    yā́bʰyām̐ súvar ájayann ágra evá /
Sentence: 15    yā́v ātastʰatúr bʰúvanasya mádʰye /
Sentence: 16    prácarṣaṇī́ vr̥ṣaṇā vájrabāhū /
Sentence: 17    agnī́ índrā vr̥traháṇā huve vām //

Paragraph: 6 
Verse: 1    {BS 2.4.6.51}
Sentence: 1    utá naḥ priyā́ priyā́su /
Sentence: 2    saptásvasā {BS saptásvásā} sújuṣṭā /
Sentence: 3    sárasvatī stómyā_abʰūt //
Sentence: 4    imā́ júhvānā yuṣmád ā́ námobʰiḥ /
Sentence: 5    práti stómam̐ sarasvati juṣasva /
Sentence: 6    táva śárman priyátame dádʰānāḥ /
Sentence: 7    úpastʰeyāma śaraṇáṃ ná vr̥kṣám //
Sentence: 8    trī́ṇi padā́ vícakrame /
Sentence: 9    víṣṇur gopā́ ádābʰyaḥ /
Sentence: 10    táto dʰármāṇi dʰāráyan //

Verse: 2    {BS 2.4.6.52}
Sentence: 1    tád asya priyám abʰí pā́tʰo aśyām /
Sentence: 2    náro yátra devayávo mádanti /
Sentence: 3    urukramásya sá hí bándʰur ittʰā́ /
Sentence: 4    víṣṇoḥ padé paramé mádʰva útsaḥ //
Sentence: 5    kratvā dā́ astʰu śréṣṭhaḥ /
Sentence: 6    adyá tvā vanvánt surékṇāḥ /
Sentence: 7    márta ānāśa suvr̥ktím //
Sentence: 8    imā́ brahma brahmavāha /
Sentence: 9    priyā́ ta ā́ barhíḥ sīda /
Sentence: 10    vīhí sūra puroḍā́śam //

Verse: 3    {BS 2.4.6.53}
Sentence: 1    úpa naḥ sūnávo gíraḥ /
Sentence: 2    śr̥ṇván tvam ŕ̥tasya yé /
Sentence: 3    sumr̥ḍīkā́ bʰavantu naḥ //
Sentence: 4    adyā́ no deva savitaḥ /
Sentence: 5    prajā́vat sāvīḥ sáubʰagam /
Sentence: 6    párā duṣṣvápniyam̐ {AS duṣṣvápnim̐} suva //
Sentence: 7    víśvāni deva savitaḥ /
Sentence: 8    duritā́ni párāsuva /
Sentence: 9    yád bʰadráṃ tán ma ā́suva //
Sentence: 10    śúcim arkáir bŕ̥haspátim //

Verse: 4    {BS 2.4.6.54}
Sentence: 1    adʰvaréṣu namasyata /
Sentence: 2    anāmy ója ā́cake //
Sentence: 3    yā́_adʰāráyanta devā́ sudákṣā dákṣapitārā /
Sentence: 4    asuryā̀ya prámahasā //
Sentence: 5    sá ít kṣéti súdʰita ókasi své /
Sentence: 6    tásmā íḍā pinvate viśvadā́nī /
Sentence: 7    tásmai víśaḥ svayám evá_ānamanti /
Sentence: 8    yásmin brahmā́ rā́jani pū́rva éti //
Sentence: 9    sákūtim indra sácyutim /
Sentence: 10    sácyutiṃ jagʰánacyutim //

Verse: 5    {BS 2.4.6.55}
Sentence: 1    kanā́t kābʰā́ṃ na ā́bʰara /
Sentence: 2    prayapsyánn iva saktʰyàu //
Sentence: 3    ví na indra mŕ̥dʰo jahi /
Sentence: 4    kánīkʰunad iva sāpáyan /
Sentence: 5    abʰí naḥ súṣṭutiṃ naya //
Sentence: 6    prajā́patiḥ striyā́ṃ yáśaḥ /
Sentence: 7    muṣkáyor adadʰāt sápam /
Sentence: 8    kā́masya tŕ̥ptim ānandám /
Sentence: 9    tásya_agne bʰājaya_ihá mā //
Sentence: 10    módaḥ pramodá ānandáḥ //

Verse: 6    {BS 2.4.6.56}
Sentence: 1    muṣkáyor níhitaḥ sápaḥ /
Sentence: 2    sr̥tvā́_iva kā́masya tr̥pyāṇi /
Sentence: 3    dákṣiṇānāṃ pratigrahé //
Sentence: 4    mánasaś cit tám ā́kūtim /
Sentence: 5    vācáḥ satyám aśīmahi /
Sentence: 6    paśūnā́m̐ rūpám ánnasya /
Sentence: 7    yáśaḥ śrī́ḥ śrayatāṃ máyi //
Sentence: 8    yátʰā_ahám asyā́ átr̥pam̐ striyái púmān /
Sentence: 9    yátʰā strī́ tŕ̥pyati pum̐sí priyé priyā́ /
Sentence: 10    eváṃ bʰágasya tŕ̥pyāṇi //

Verse: 7    {BS 2.4.6.57}
Sentence: 1    yajñásya kā́myaḥ priyáḥ //
Sentence: 2    dádāmi_íty agnír vadati /
Sentence: 3    tátʰā_íti vāyúr āha tát /
Sentence: 4    hánta_íti satyáṃ candrámāḥ /
Sentence: 5    ādityáḥ satyám óm íti //
Sentence: 6    ā́pas tát satyám ā́bʰaran /
Sentence: 7    yáśo yajñásya dákṣiṇām /
Sentence: 8    asáu me kā́maḥ sámr̥dʰyatām //
Sentence: 9    ná hí spáśam ávidann anyám asmā́t /
Sentence: 10    vaiśvānarā́t puraetā́ram {BS pura tā́ram} agnéḥ //

Verse: 8    {BS 2.4.6.58}
Sentence: 1    átʰa_im amantʰann amŕ̥tam ámūrāḥ /
Sentence: 2    vaiśvānaráṃ kṣetrajítyāya devā́ḥ //
Sentence: 3    yéṣām imé pū́rve ármāsa ā́san /
Sentence: 4    ayūpā́ḥ sádma víbʰr̥tā purū́ṇi /
Sentence: 5    váiśvānara tváyā té nuttā́ḥ /
Sentence: 6    pr̥tʰivī́m anyā́m abʰítastʰur jánāsaḥ //
Sentence: 7    pr̥tʰivī́ṃ mātáraṃ mahī́m /
Sentence: 8    antárikṣam úpabruve /
Sentence: 9    br̥hatī́m ūtáye dívam //
Sentence: 10    víśvaṃ bibʰarti pr̥tʰivī́ {AS pr̥tʰivī́m} //

Verse: 9    {BS 2.4.6.59}
Sentence: 1    antárikṣaṃ vípapratʰe /
Sentence: 2    duhé dyáur br̥hatī́ páyaḥ //
Sentence: 3    ná tā́ naśanti ná dabʰāti táskaraḥ /
Sentence: 4    ná_enā amitró vyátʰir ā́dadʰarṣati {BS vyatʰirā́dadʰarṣati} /
Sentence: 5    devā́m̐ś ca yā́bʰir yájate dádāti ca /
Sentence: 6    jyóg it tā́bʰiḥ sacate gópatiḥ sahá //
Sentence: 7    ná tā́ árvā reṇúkakāṭo aśnute /
Sentence: 8    ná sam̐skr̥tatrám úpayanti tā́ abʰí /
Sentence: 9    urugāyám ábʰayaṃ tásya tā́ ánu /
Sentence: 10    gā́vo mártyasya vícaranti yájvanaḥ //

Verse: 10    {BS 2.4.6.60}
Sentence: 1    rā́trī vyàkʰyad āyatī́ /
Sentence: 2    purutrā́ devy àkṣábʰiḥ /
Sentence: 3    víśvā ádʰi śríyo 'dʰita //
Sentence: 4    {not in BS} úpa te gā́ iva_ákaram /
Sentence: 5    vr̥ṇīṣvá duhitar divaḥ /
Sentence: 6    rā́trī stómaṃ ná jigyúṣī //
Sentence: 7    devī́ṃ vā́cam ajanayanta devā́ḥ /
Sentence: 8    tā́ṃ viśvárūpāḥ paśávo vadanti /
Sentence: 9    sā́ no mandréṣam ū́rjaṃ dúhānā dʰenúr vā́g asmā́n úpa súṣṭutā_étu {BS súṣṭatáitu} //

Verse: 11    {BS 2.4.6.61}
Sentence: 1    yád vā́g vádanty avicetanā́ni /
Sentence: 2    rā́ṣṭrī devā́nāṃ niṣasā́da mandrā́ /
Sentence: 3    cátasra ū́rjaṃ duduhe páyām̐si /
Sentence: 4    kvà svid asyāḥ paramáṃ jagāma //
Sentence: 5    gaurī́ mimāya salilā́ni tákṣatī /
Sentence: 6    ékapadī dvipádī sā́ cátuṣpadī /
Sentence: 7    aṣṭā́padī návapadī babʰūvúṣī /
Sentence: 8    sahásra_akṣarā paramé vyòman //
Sentence: 9    tásyām̐ samudrā́ ádʰi víkṣaranti /
Sentence: 10    téna jīvanti pradíśaś cátasraḥ //

Verse: 12    {BS 2.4.6.62}
Sentence: 1    tátaḥ kṣaraty akṣáram /
Sentence: 2    tád víśvam úpajīvati //
Sentence: 3    índrā sū́rā janáyan viśvákarmā /
Sentence: 4    marútvām̐ astu gaṇávānt sajātávān /
Sentence: 5    asyá snuṣā́ śváśurasya práśiṣṭim /
Sentence: 6    sapátnā vā́caṃ mánasā úpāsatām //
Sentence: 7    índraḥ sū́ro atarad rájām̐si /
Sentence: 8    snuṣā́ sapátnaḥ śváśuro 'yám astu /
Sentence: 9    ayám̐ śátrūñ jayatu járhr̥ṣāṇaḥ /
Sentence: 10    ayáṃ vā́jaṃ jayatu vā́jasātau //
Sentence: 11    agníḥ kṣatrabʰŕ̥d ánibʰr̥ṣṭam ójaḥ /
Sentence: 12    sahasríyo dīpyatām áprayuccʰan /
Sentence: 13    vibʰrā́jamānaḥ samidʰāná ugráḥ /
Sentence: 14    ā́_antárikṣam aruhad ágan dyā́m //

Paragraph: 7 
Verse: 1    {BS 2.4.7.63}
Sentence: 1    vŕ̥ṣā_asy am̐śúr vr̥ṣabʰā́ya gr̥hyase /
Sentence: 2    vŕ̥ṣā_ayám ugró nr̥cákṣase /
Sentence: 3    divyáḥ karmaṇyò hitó br̥hán nā́ma /
Sentence: 4    vr̥ṣabʰásya yā́ kakút //
Sentence: 5    viṣūvā́n viṣṇo bʰavatu /
Sentence: 6    ayáṃ yó māmakó vŕ̥ṣā /
Sentence: 7    átʰo índra iva devébʰyaḥ /
Sentence: 8    víbravītu jánebʰyaḥ //
Sentence: 9    ā́yuṣmantaṃ várcasvantam /
Sentence: 10    átʰo ádʰipatiṃ viśā́m //

Verse: 2    {BS 2.4.7.64}
Sentence: 1    asyā́ḥ pr̥tʰivyā́ ádʰyakṣam /
Sentence: 2    imám indra vr̥ṣabʰáṃ kr̥ṇu /
Sentence: 3    yáḥ suśŕ̥ṅgaḥ suvr̥ṣabʰáḥ /
Sentence: 4    kalyā́ṇo dróṇa ā́hitaḥ /
Sentence: 5    kā́rṣīvalapragāṇena /
Sentence: 6    vr̥ṣabʰéṇa yajāmahe //
Sentence: 7    vr̥ṣabʰéṇa yájamānāḥ /
Sentence: 8    ákrūreṇa_iva sarpíṣā /
Sentence: 9    mŕ̥dʰaś ca sárvā índreṇa /
Sentence: 10    pŕ̥tanāś ca jayāmasi //

Verse: 3    {BS 2.4.7.65}
Sentence: 1    yásya_ayám r̥ṣabʰó havíḥ /
Sentence: 2    índrāya pariṇīyáte /
Sentence: 3    jáyāti śátrum āyántam /
Sentence: 4    átʰo hanti pr̥tanyatáḥ //
Sentence: 5    nr̥ṇā́m áha praṇī́r ásat /
Sentence: 6    ágra udbʰindatā́m asat //
Sentence: 7    índra śúṣmaṃ tanúvā mérayasva /
Sentence: 8    nīcā́ víśvā abʰítiṣṭha_abʰímātīḥ /
Sentence: 9    níśr̥ṇīhy ābādʰáṃ yó no ásti /
Sentence: 10    urúṃ no lokáṃ kr̥ṇuhi jīradāno //

Verse: 4    {BS 2.4.7.66}
Sentence: 1    préhy abʰípréhi prábʰarā sáhasva /
Sentence: 2    mā́ víveno víśr̥ṇuṣvā jáneṣu /
Sentence: 3    úd īḍitó vr̥ṣabʰa tíṣṭha śúṣmaiḥ /
Sentence: 4    índra śátrūn puró asmā́ka yudʰya //
Sentence: 5    ágne jétā tváṃ jaya /
Sentence: 6    śátrūnt sahasa ójasā /
Sentence: 7    ví śátrūn vímŕ̥dʰo nuda //
Sentence: 8    etáṃ te stómaṃ tuvijāta vípraḥ /
Sentence: 9    rátʰaṃ ná dʰīraḥ svápā atakṣam /
Sentence: 10    yád ī́d agne práti tváṃ deva háryāḥ //

Verse: 5    {BS 2.4.7.67}
Sentence: 1    súvarvatīr apá enā jayema //
Sentence: 2    yó gʰr̥téna_abʰímānitaḥ /
Sentence: 3    índra jáitrāya jajñiṣe /
Sentence: 4    sá naḥ sáṃkāsu pāraya /
Sentence: 5    pr̥tanāsā́hyeṣu ca //
Sentence: 6    índro jigāya pr̥tʰivī́m /
Sentence: 7    antárikṣam̐ súvar mahát /
Sentence: 8    vr̥trahā́ purucétanaḥ //
Sentence: 9    índro jigāya sáhasā sáhām̐si /
Sentence: 10    índro jigāya pŕ̥tanāni víśvā //

Verse: 6    {BS 2.4.7.68}
Sentence: 1    índro jātó ví púro ruroja /
Sentence: 2    sá naḥ paraspā́ várivaḥ kr̥ṇotu //
Sentence: 3    ayáṃ kr̥tnúr ágr̥bʰītaḥ /
Sentence: 4    viśvajíd udbʰíd ít sómaḥ /
Sentence: 5    ŕ̥ṣir vípraḥ kā́vyena //
Sentence: 6    vāyúr agregā́ yajñaprī́ḥ /
Sentence: 7    sākáṃ gan mánasā yajñám /
Sentence: 8    śivó niyúdbʰiḥ śivā́bʰiḥ //
Sentence: 9    vā́yo śukró ayāmi te /
Sentence: 10    mádʰvo ágraṃ díviṣṭiṣu //

Verse: 7    {BS 2.4.7.69}
Sentence: 1    ā́yāhi sómapītaye /
Sentence: 2    svāruhó deva niyútvatā //
Sentence: 3    imám indra vardʰaya kṣatríyāṇām /
Sentence: 4    ayáṃ viśā́ṃ viśpátir astu rā́jā /
Sentence: 5    asmā́ indra máhi várcām̐si dʰehi /
Sentence: 6    avarcásaṃ kr̥ṇuhi śátrum asya //
Sentence: 7    imám ā́bʰaja grā́me áśveṣu góṣu /
Sentence: 8    nír amúṃ bʰaja yò 'mítro asya /
Sentence: 9    várṣman kṣatrásya kakúbʰi śrayasva /
Sentence: 10    táto na ugró víbʰajā vásūni //

Verse: 8    {BS 2.4.7.70}
Sentence: 1    asmé dyāvāpr̥tʰivī bʰū́ri vāmám /
Sentence: 2    sáṃduhātʰāṃ gʰarmadúgʰā_iva dʰenúḥ /
Sentence: 3    ayám̐ rā́jā priyá índrasya bʰūyāt /
Sentence: 4    priyó gávām óṣadʰīnām utá_apā́m //
Sentence: 5    yunájmi ta uttarā́vantam índram /
Sentence: 6    yéna jáyāsi ná párājáyāsai /
Sentence: 7    sá tvā_akar ekavr̥ṣabʰám̐ svā́nām /
Sentence: 8    átʰo rājann uttamáṃ mānavā́nām //
Sentence: 9    úttaras tvám ádʰare te sapátnāḥ /
Sentence: 10    ékavr̥ṣā índrasakʰā jigīvā́n //

Verse: 9    {BS 2.4.7.71}
Sentence: 1    víśvā ā́śāḥ pŕ̥tanāḥ saṃjáyaṃ jáyan /
Sentence: 2    abʰítiṣṭha śatrūyatáḥ sahasva //
Sentence: 3    túbʰyaṃ bʰaranti kṣitáyo yaviṣṭha /
Sentence: 4    balím agne ánti ta ótá dūrā́t /
Sentence: 5    ā́ bʰándiṣṭhasya sumatíṃ cikiddʰi /
Sentence: 6    br̥hát te agne máhi śárma bʰadrám //
Sentence: 7    yó dehyó ánamayad vadʰasnáiḥ /
Sentence: 8    yó áryapatnīr uṣásaś cakā́ra /
Sentence: 9    sá nirúdʰyā náhuṣo yahvó agníḥ /
Sentence: 10    víśaś cakre balihŕ̥taḥ sáhobʰiḥ //

Verse: 10    {BS 2.4.7.72}
Sentence: 1    prá sadyó agne átyeṣy anyā́n /
Sentence: 2    āvír yásmai cā́rutaro babʰū́tʰa /
Sentence: 3    īḍé 'nyo vapuṣyò vibʰā́vā /
Sentence: 4    priyó viśā́m átitʰir mā́nuṣīṇām //
Sentence: 5    bráhma jyeṣṭhā vīryā̀ sáṃbʰr̥tāni /
Sentence: 6    bráhma_ágre jyéṣṭhaṃ dívam ā́tatāna /
Sentence: 7    r̥tásya bráhma pratʰamā́_utá jajñe /
Sentence: 8    téna_arhati bráhmaṇā spárdʰituṃ káḥ //
Sentence: 9    bráhma srúco gʰr̥távatīḥ /
Sentence: 10    bráhmaṇā sváravo mitā́ḥ //

Verse: 11    {BS 2.4.7.73}
Sentence: 1    bráhma yajñásya tántavaḥ /
Sentence: 2    r̥tvíjo yé haviṣkŕ̥taḥ //
Sentence: 3    śŕ̥ṅgāṇi_iva_ít_śr̥ṅgíṇām̐ sáṃdadr̥śrire /
Sentence: 4    caṣā́lavantaḥ sváravaḥ pr̥tʰivyā́m /
Sentence: 5    té devā́saḥ sváravas tastʰivā́m̐saḥ /
Sentence: 6    námaḥ sákʰibʰyaḥ sannā́n mā́_avagāta /
Sentence: 7    abʰibʰū́r agnír atarad rájā́m̐si /
Sentence: 8    spŕ̥dʰo vihátya pŕ̥tanā abʰiśrī́ḥ /
Sentence: 9    juṣāṇó ma ā́hutiṃ mā mahiṣṭa /
Sentence: 10    hatvā́ sapátnān várivaskaraṃ naḥ /
Sentence: 11    ī́śānaṃ tvā bʰúvanānām abʰiśríyam /
Sentence: 12    stáumy agna urukŕ̥tam̐ suvī́ram /
Sentence: 13    havír juṣāṇáḥ sapátnām̐ abʰibʰū́r asi /
Sentence: 14    jahí śátrūm̐r ápa mŕ̥dʰo nudasva //

Paragraph: 8 
Verse: 1    {BS 2.4.8.74}
Sentence: 1    sá pratnaván návīyasā /
Sentence: 2    ágne dyumnéna saṃyátā /
Sentence: 3    br̥hát tanantʰa bʰānúnā /
Sentence: 4    návaṃ nú stómam agnáye /
Sentence: 5    diváḥ śyenā́ya jījanam /
Sentence: 6    vásoḥ kuvíd vanā́ti naḥ /
Sentence: 7    svāruhā́ yásya śríyo dr̥śé /
Sentence: 8    rayír vīrávato yatʰā /
Sentence: 9    ágre yajñásya cétataḥ //
Sentence: 10    ádābʰyaḥ puraetā́ //

Verse: 2    {BS 2.4.8.75}
Sentence: 1    agnír viśā́ṃ mā́nuṣīṇām /
Sentence: 2    tū́rṇī rátʰaḥ sádā návaḥ //
Sentence: 3    návam̐ sómāya vājíne /
Sentence: 4    ā́jyaṃ páyaso 'jani /
Sentence: 5    júṣṭam̐ śúcitamaṃ vásu //
Sentence: 6    návam̐ soma juṣasva naḥ /
Sentence: 7    pīyū́ṣasya_ihá {BS pīyū́ṣasvyehá} tr̥pṇuhi /
Sentence: 8    yás te bʰāgá r̥tā́ vayám //
Sentence: 9    návasya soma te vayám /
Sentence: 10    ā́ sumatíṃ vr̥ṇīmahe //

Verse: 3    {BS 2.4.8.76}
Sentence: 1    sá no rāsva sahasríṇaḥ //
Sentence: 2    návam̐ havír juṣasva naḥ /
Sentence: 3    r̥túbʰiḥ soma bʰū́tamam /
Sentence: 4    tád aṅga prátiharya naḥ /
Sentence: 5    rā́jant soma svastáye //
Sentence: 6    návam̐ stómaṃ návam̐ havíḥ /
Sentence: 7    indrāgníbʰyāṃ nívedaya /
Sentence: 8    táj juṣetām̐ sácetasā //
Sentence: 9    śúciṃ nú stómaṃ návajātam adyá /
Sentence: 10    índrāgnī vr̥trahaṇā juṣétʰām //

Verse: 4    {BS 2.4.8.77}
Sentence: 1    ubʰā́ hí vām̐ suhávā jóhavīmi /
Sentence: 2    tā́ vā́jam̐ sadyá uśaté dʰéṣṭhā //
Sentence: 3    agnír índro návasya naḥ /
Sentence: 4    asya havyásya tr̥pyatām /
Sentence: 5    ihá deváu sahasríṇau //
Sentence: 6    yajñáṃ na ā́ hí gáccʰatām /
Sentence: 7    vásumantam̐ suvarvídam /
Sentence: 8    asyá havyásya tr̥pyatām /
Sentence: 9    agnír índro návasya naḥ /
Sentence: 10    {not in BS} víśvān devā́m̐s tarpayata //

Verse: 5    {BS 2.4.8.78}
Sentence: 1    havíṣo 'syá návasya naḥ /
Sentence: 2    suvarvído hí jajñiré //
Sentence: 3    ā́ _idáṃ barhíḥ suṣṭárīmā návena /
Sentence: 4    ayáṃ yajñó yájamānasya bʰāgáḥ /
Sentence: 5    ayáṃ babʰūva bʰúvanasya gárbʰaḥ /
Sentence: 6    víśve devā́ idám adyá_āgamiṣṭhāḥ //
Sentence: 7    imé nú dyā́vāpr̥tʰivī́ samī́cī /
Sentence: 8    tanvāné yajñáṃ purupéśasaṃ dʰiyā́ /
Sentence: 9    ā́ _asmai pr̥ṇītāṃ bʰúvanāni víśvā /
Sentence: 10    prajā́ṃ púṣṭim amŕ̥taṃ návena //

Verse: 6    {BS 2.4.8.79}
Sentence: 1    imé dʰenū́ amŕ̥taṃ yé duhā́te /
Sentence: 2    páyasvaty uttarā́m etu púṣṭiḥ /
Sentence: 3    imáṃ yajñáṃ juṣámāṇe návena /
Sentence: 4    samī́cī dyā́vāpr̥tʰivī́ gʰr̥tā́cī //
Sentence: 5    yáviṣṭho havyavā́hanaḥ /
Sentence: 6    citrábʰānur gʰr̥tā́sutiḥ /
Sentence: 7    návajāto vírocase /
Sentence: 8    ágne tát te mahitvanám //
Sentence: 9    tvám agne devátābʰyaḥ /
Sentence: 10    bʰāgé deva ná mīyase //

Verse: 7    {BS 2.4.8.80}
Sentence: 1    sá enā vidvā́n yakṣyasi /
Sentence: 2    návam̐ stómaṃ juṣasva naḥ //
Sentence: 3    agníḥ pratʰamáḥ prā́śnātu /
Sentence: 4    sá hí véda yátʰā havíḥ /
Sentence: 5    śivā́ asmábʰyam óṣadʰīḥ /
Sentence: 6    kr̥ṇótu viśvácarṣaṇiḥ //
Sentence: 7    bʰadrā́n naḥ śréḥ sámanaiṣṭa devāḥ /
Sentence: 8    tváyā vaséna sámaśīmahi tvā /
Sentence: 9    sá no mayobʰū́ḥ pito ā́viśasva /
Sentence: 10    śáṃ tokā́ya tanúve syonáḥ //
Sentence: 11    etám ú tyáṃ mádʰunā sáṃyutaṃ yávam /
Sentence: 12    sárasvatyā ádʰimanā́va carkruṣuḥ {BS carkr̥ṣṭuḥ} /
Sentence: 13    índra āsīt sī́rapatiḥ śatákratuḥ /
Sentence: 14    kīnā́śā āsan marútaḥ sudā́navaḥ //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.