TITUS
Black Yajur-Veda: Taittiriya-Brahmana
Part No. 13
Previous part

Chapter: 5 
Paragraph: 1 
Verse: 1    {BS 2.5.1.1}
Sentence: 1    prāṇó rakṣati víśvam éjat /
Sentence: 2    íryo bʰūtvā́ bahudʰā́ bahū́ni /
Sentence: 3    sá ít sárvaṃ vyā̀naśe //
Sentence: 4    yó devó devéṣu vibʰū́r antáḥ /
Sentence: 5    ā́vr̥d ūdā́t kṣetríyadʰvagád {kṣetrī́_adʰvagád?} vŕ̥ṣā /
Sentence: 6    tám ít prāṇáṃ mánasā_úpaśikṣata /
Sentence: 7    ágraṃ devā́nām idám attu no havíḥ //
Sentence: 8    mánasaś cíttā_idám /
Sentence: 9    bʰūtáṃ bʰávyaṃ ca gupyate /
Sentence: 10    tád dʰí devéṣv agriyám //

Verse: 2    {BS 2.5.1.2}
Sentence: 1    ā́ na etu puraścarám /
Sentence: 2    sahá deváir imám̐ hávam /
Sentence: 3    mánaḥ śréyasi_śreyasi /
Sentence: 4    kárman yajñápatiṃ dádʰat //
Sentence: 5    juṣátāṃ me vā́g idám̐ havíḥ /
Sentence: 6    virā́ḍ devī́ puróhitā /
Sentence: 7    havyavā́ḍ ánapāyinī //
Sentence: 8    yáyā rūpā́ṇi bahudʰā́ vádanti /
Sentence: 9    péśām̐si devā́ḥ paramé janítre /
Sentence: 10    sā́ no virā́ḍ ánapaspʰurantī //

Verse: 3    {BS 2.5.1.3}
Sentence: 1    vā́g devī́ juṣatām idám̐ havíḥ //
Sentence: 2    cákṣur devā́nāṃ jyótir amŕ̥te nyàktam /
Sentence: 3    asyá vijñā́nāya bahudʰā́ nídʰīyate /
Sentence: 4    tásya sumnám {BS sumrám} aśīmahi /
Sentence: 5    mā́ no hāsīd vicakṣaṇám //
Sentence: 6    ā́yur ít _naḥ prátīryatām /
Sentence: 7    ánandʰāś cákṣuṣā vayám /
Sentence: 8    jīvā́ jyótir aśīmahi /
Sentence: 9    súvar jyótir utá_amŕ̥tam //
Sentence: 10    śrotreṇa bʰadrám utá śr̥ṇvanti satyám /
Sentence: 11    śrótreṇa vā́caṃ bahudʰā́_udyámānām /
Sentence: 12    śrótreṇa módaś ca máhaś ca śrūyate /
Sentence: 13    śrótreṇa sárvā diśá ā́śr̥ṇomi //
Sentence: 14    yéna prā́cyā utá dakṣiṇā /
Sentence: 15    pratī́cyai diśáḥ śr̥ṇvánty uttarā́t /
Sentence: 16    tád ít _śrótraṃ bahudʰā́ udyámānam /
Sentence: 17    arā́n ná nemíḥ pári sárvaṃ babʰūva //

Paragraph: 2 
Verse: 1    {BS 2.5.2.4}
Sentence: 1    udéhi vājinyó asy apsv àntaḥ /
Sentence: 2    idám̐ rāṣṭrám ā́viśa sūnŕ̥tāvat /
Sentence: 3    yó róhito víśvam idáṃ jajā́na /
Sentence: 4    sá no rāṣṭréṣu súdʰitān dadʰātu /
Sentence: 5    róham̐_roham̐ róhita ā́ruroha /
Sentence: 6    prajā́bʰir vŕ̥ddʰiṃ janúṣām upástʰam /
Sentence: 7    tā́bʰíḥ sám̐rabdʰo avidat ṣáḍ urvī́ḥ /
Sentence: 8    gātúṃ prapáśyann ihá rāṣṭrám ā́hāḥ //
Sentence: 9    ā́hārṣīd rāṣṭrám ihá róhitaḥ /
Sentence: 10    mŕ̥dʰo vyā̀stʰad ábʰayaṃ no astu //

Verse: 2    {BS 2.5.2.5}
Sentence: 1    asmábʰyaṃ dyāvāpr̥tʰivī śakvarībʰiḥ /
Sentence: 2    rāṣṭráṃ duhātʰām ihá revátībʰiḥ /
Sentence: 3    vímamarśa róhito viśvárūpaḥ /
Sentence: 4    samācakāṇáḥ prarúho rúhaś ca /
Sentence: 5    dívaṃ gatvā́ya mahatā́ mahimnā́ /
Sentence: 6    ví no rāṣṭrám unattu páyasā svéna /
Sentence: 7    yā́s te víśas tápasā saṃbabʰūvúḥ /
Sentence: 8    gāyatráṃ vatsám ánu tā́s ta ā́guḥ /
Sentence: 9    tā́s tvā́ viśantu máhasā svéna /
Sentence: 10    sáṃ mātā putró abʰyètu róhitaḥ //

Verse: 3    {BS 2.5.2.6}
Sentence: 1    yūyám ugrā marutaḥ pr̥śnimātaraḥ /
Sentence: 2    índreṇa sayújā prámr̥ṇītʰa śátrūn /
Sentence: 3    ā́ vo róhito aśr̥ṇod abʰidyavaḥ /
Sentence: 4    trísaptāso marutaḥ svādusaṃmudaḥ //
Sentence: 5    róhito dyā́vāpr̥tʰivī́ jajāna /
Sentence: 6    tásmim̐s tántuṃ parameṣṭhī́ tatāna /
Sentence: 7    tásmin_śiśriye ajá ékapāt /
Sentence: 8    ádr̥m̐had dyā́vāpr̥tʰivī́ bálena //
Sentence: 9    róhito dyā́vāpr̥tʰivī́ adr̥m̐hat /
Sentence: 10    téna súvaḥ stabʰitáṃ téna nā́kaḥ //

Verse: 4    {BS 2.5.2.7}
Sentence: 1    só antárikṣe rájaso vimā́naḥ /
Sentence: 2    téna devā́ḥ súvar ánvavindan //
Sentence: 3    suśévaṃ tvā bʰānávo dīdivā́m̐sam /
Sentence: 4    sámagrāso juhvò jātavedaḥ /
Sentence: 5    ukṣánti tvā vājínam ā́ gʰr̥téna /
Sentence: 6    sám̐sam agne yuvase bʰójanāni //
Sentence: 7    ágne śárdʰa mahaté sáubʰagāya /
Sentence: 8    táva dyumnā́ny uttamā́ni santu /
Sentence: 9    sáṃ jāspatyám̐ suyámam ā́kr̥ṇuṣva /
Sentence: 10    śatrūyatā́m abʰítiṣṭhā máhām̐si //

Paragraph: 3 
Verse: 1    {BS 2.5.3.8}
Sentence: 1    púnar na índro magʰávā dadātu /
Sentence: 2    dʰánāni śakró gʰányaḥ surā́dʰāḥ /
Sentence: 3    arvācī́nam kr̥ṇutāṃ yācitó mánaḥ /
Sentence: 4    śruṣṭī́ no asyá havíṣo juṣāṇáḥ //
Sentence: 5    yā́ni no jinán dʰánāni /
Sentence: 6    jahártʰa śūra manyúnā /
Sentence: 7    índra_anuvinda nas tā́ni /
Sentence: 8    anéna havíṣā púnaḥ //
Sentence: 9    índra ā́śābʰyaḥ pári /
Sentence: 10    sárvābʰyó 'bʰayaṃ karat //

Verse: 2    {BS 2.5.3.9}
Sentence: 1    jétā śátrūn vícarṣaṇiḥ //
Sentence: 2    ā́kūtyai tvā kā́māya tvā samŕ̥dʰe tvā /
Sentence: 3    puró dadʰe amr̥tatvā́ya jīváse //
Sentence: 4    ā́kūtim asya_ávase /
Sentence: 5    kā́mam asya sámr̥ddʰyai /
Sentence: 6    índrasya yuñjate dʰíyaḥ //
Sentence: 7    ā́kūtiṃ devī́ṃ mánasaḥ puró dadʰe /
Sentence: 8    yajñásya mātā́ suhávā me astu /
Sentence: 9    yád iccʰā́mi mánasā sákāmaḥ /
Sentence: 10    vidéyam enad dʰŕ̥daye níviṣṭam //

Verse: 3    {BS 2.5.3.10}
Sentence: 1    sa_íd agnír agnī́m̐r átyety anyā́n /
Sentence: 2    yátra vājī́ tánayo vīḍúpāṇiḥ /
Sentence: 3    sahásrapātʰā akṣárā saméti //
Sentence: 4    ā́śānāṃ tvā_āśāpālébʰyaḥ /
Sentence: 5    catúrbʰyo amŕ̥tebʰyaḥ /
Sentence: 6    idáṃ bʰūtásya_ádʰyakṣebʰyaḥ /
Sentence: 7    vidʰéma havíṣā vayám //
Sentence: 8    víśvā ā́śā mádʰunā sám̐sr̥jāmi /
Sentence: 9    anamīvā́ ā́pa óṣadʰayo bʰavantu /
Sentence: 10    ayáṃ yájamāno mŕ̥dʰo vyàsyatām //

Verse: 4    {BS 2.5.3.11}
Sentence: 1    ágr̥bʰītā́ḥ paśávaḥ santu sárve //
Sentence: 2    agníḥ sómo váruṇo mitrá índraḥ /
Sentence: 3    bŕ̥haspátiḥ savitā́ yáḥ sahasrī́ /
Sentence: 4    pūṣā́ no góbʰir ávasā sárasvatī /
Sentence: 5    tváṣṭā rūpā́ṇi sámanaktu yajñáiḥ {AS yajñáḥ} //
Sentence: 6    tváṣṭā rūpā́ṇi dádʰatī sárasvatī /
Sentence: 7    pūṣā́ bʰágam̐ savitā́ no dadātu /
Sentence: 8    bŕ̥haspátir dádad índraḥ sahásram /
Sentence: 9    mitró dātā́ váruṇaḥ sómo agníḥ //

Paragraph: 4 
Verse: 1    {BS 2.5.4.12}
Sentence: 1    ā́ no bʰara bʰágam indra dyumántam /
Sentence: 2    ní te deṣṇásya dʰīmahi prareké /
Sentence: 3    urvá iva papratʰe kā́mo asmé /
Sentence: 4    tám ā́pr̥ṇā vasupate vásūnām //
Sentence: 5    imáṃ kā́maṃ mandayā góbʰir áśvaiḥ /
Sentence: 6    candrávatā rā́dʰasā paprátʰaś ca /
Sentence: 7    suvaryávo matíbʰis túbʰyaṃ víprāḥ /
Sentence: 8    índrāya vā́haḥ kuśikā́so akran //
Sentence: 9    índrasya nú vīryā̀ṇi právocam /
Sentence: 10    yā́ni cakā́ra pratʰamā́ni vajrī́ //

Verse: 2    {BS 2.5.4.13}
Sentence: 1    áhann áhim ánv apás tatarda /
Sentence: 2    prá vakṣáṇā abʰinat párvatānām //
Sentence: 3    áhann áhiṃ párvate śiśriyāṇám /
Sentence: 4    tváṣṭā_asmai vájram̐ svaryàṃ tatakṣa /
Sentence: 5    vāśrā́ iva dʰenávaḥ syándamānāḥ /
Sentence: 6    áñjaḥ samudrám ávajagmur ā́paḥ /
Sentence: 7    vr̥ṣāyámāṇo 'vr̥ṇīta {AS vr̥ṇīta} sómam /
Sentence: 8    tríkadrukeṣv apibat sutásya /
Sentence: 9    ā́ sā́yakaṃ magʰávā_ādatta vájram /
Sentence: 10    áhann enaṃ pratʰamajā́m áhīnām //

Verse: 3    {BS 2.5.4.14}
Sentence: 1    yád índra_áhan pratʰamajā́m áhīnām /
Sentence: 2    ā́t _māyínām ámināḥ prota māyā́ḥ /
Sentence: 3    ā́t sū́ryaṃ janáyan dyā́m uṣā́sam /
Sentence: 4    tādī́knā śátrūn ná kíla_āvivitse //
Sentence: 5    áhan vr̥tráṃ vr̥tratáraṃ vyám̐sam /
Sentence: 6    índro vájreṇa mahatā́ vadʰéna /
Sentence: 7    skándʰām̐si_iva kúliśenā vívr̥kṇā /
Sentence: 8    áhiḥ śayata upapŕ̥k pr̥tʰivyā́m /
Sentence: 9    ayodʰy évá durmáda ā́ hí juhvé /
Sentence: 10    mahāvīráṃ tu vibādʰám r̥jīṣám //

Verse: 4    {BS 2.5.4.15}
Sentence: 1    ná_ātārīr asya sámr̥tíṃ vadʰā́nām /
Sentence: 2    sám̐ rujā́nāḥ /
Sentence: 3    pipiṣa índraśatruḥ //
Sentence: 4    víśvo víhāyā aratíḥ /
Sentence: 5    vásur dadʰe háste dákṣiṇe /
Sentence: 6    taráṇir ná śiśratʰat /
Sentence: 7    śravasyàyā ná śiśratʰat /
Sentence: 8    víśvasmā íd iṣudʰyasé /
Sentence: 9    devatrā́ havyám ū́hiṣe /
Sentence: 10    víśvasmā ít sukŕ̥te vā́ram r̥ṇvati /
Sentence: 11    agnír dvā́rā vyr̥̀ṇvati //

Verse: 5    {BS 2.5.4.16}
Sentence: 1    úd ujjíhāno abʰí kā́mam īráyan /
Sentence: 2    prapr̥ñcán víśvā bʰúvanāni pūrvátʰā /
Sentence: 3    ā́ ketúnā súṣamiddʰo yájiṣṭhaḥ /
Sentence: 4    kā́maṃ no agne abʰíharya digbʰyáḥ //
Sentence: 5    juṣāṇó havyámam ŕ̥teṣu dūḍhyàḥ /
Sentence: 6    ā́ no rayíṃ bahulā́ gómatīm íṣam /
Sentence: 7    nídʰehi yákṣad amŕ̥teṣu bʰū́ṣan //
Sentence: 8    áśvinā yajñám ā́gatam /
Sentence: 9    dāśuṣaḥ púrudam̐sasā /
Sentence: 10    pūṣā́ rakṣatu no rayím //

Verse: 6    {BS 2.5.4.17}
Sentence: 1    imáṃ yajñám aśvínā vardʰáyantā /
Sentence: 2    imáu rayíṃ yájamānāya dʰattam /
Sentence: 3    imáu paśū́n rakṣatāṃ viśváto naḥ /
Sentence: 4    pūṣā́ naḥ pātu sádam áprayuccʰan //
Sentence: 5    prá te mahé sarasvati /
Sentence: 6    súbʰage vā́jinīvati /
Sentence: 7    satyavā́ce bʰare matím //
Sentence: 8    idáṃ te havyáṃ gʰr̥távat sarasvati /
Sentence: 9    satyavā́ce prábʰaremā havī́m̐ṣi /
Sentence: 10    imā́ni te duritā́ sáubʰagāni /
Sentence: 11    tébʰir vayám̐ subʰáḥ syāma //

Paragraph: 5 
Verse: 1    {BS 2.5.5.18}
Sentence: 1    yajñó rāyó yajñá īśe vásūnām /
Sentence: 2    yajñáḥ sasyā́nām utá sukṣitīnā́m /
Sentence: 3    yajñá iṣṭáḥ pūrvácittiṃ dadʰātu /
Sentence: 4    yajñó brahmaṇvā́m̐ ápyetu devā́n //
Sentence: 5    ayáṃ yajñó vardʰatāṃ góbʰir áśvaiḥ /
Sentence: 6    iyáṃ védiḥ svapatyā́ suvī́rā /
Sentence: 7    idáṃ barhír áti barhī́m̐ṣy anyā́ /
Sentence: 8    imáṃ yajñáṃ víśve avantu devā́ḥ //
Sentence: 9    bʰága evá bʰágavām̐ astu devāḥ /
Sentence: 10    téna vayáṃ bʰágavantaḥ syāma //

Verse: 2    {BS 2.5.5.19}
Sentence: 1    táṃ tvā bʰaga sárva ít _ johavīmi /
Sentence: 2    sá no bʰaga puraetā́ bʰava_ihá /
Sentence: 3    bʰága práṇetar bʰága sátyarādʰaḥ /
Sentence: 4    bʰága_imā́ṃ dʰíyam úd avadádan naḥ /
Sentence: 5    bʰága prá ṇo janaya góbʰir áśvaiḥ /
Sentence: 6    bʰága prá nŕ̥bʰir nr̥vántaḥ syāma //
Sentence: 7    śáśvatīḥ sámā úpayanti lokā́ḥ /
Sentence: 8    śáśvatīḥ sámā úpayanty ā́paḥ /
Sentence: 9    iṣṭáṃ pūrtám̐ śáśvatīnām̐ sámānām̐ śāśvaténa /
Sentence: 10    havíṣā_iṣṭvā́_anantáṃ lokáṃ páram ā́ruroha //

Verse: 3    {BS 2.5.5.20}
Sentence: 1    iyám evá sā́ yā́ pratʰamā́ vyáuccʰat /
Sentence: 2    sā́ rūpā́ṇi kurute páñca devī́ //
Sentence: 3    dvé svásārau vayatas tántram etát /
Sentence: 4    sanātánaṃ vítatam̐ ṣáṇmayūkʰam /
Sentence: 5    áva_anyā́m̐s tántūn kiráto dʰattó anyā́n /
Sentence: 6    ná_avapr̥jyā́te ná gamāte ántam //
Sentence: 7    ā́ vo yantu_udavāhā́so adyá /
Sentence: 8    vŕ̥ṣṭiṃ yé víśve marúto junánti /
Sentence: 9    ayáṃ yó agnír marutaḥ sámiddʰaḥ /
Sentence: 10    etáṃ juṣadʰvaṃ kavayo yuvānaḥ //

Verse: 4    {BS 2.5.5.21}
Sentence: 1    dʰārāvarā́ marúto dʰr̥ṣṇú v ojasaḥ {?} /
Sentence: 2    mr̥gā́ ná bʰīmā́s taviṣébʰir ūrmíbʰiḥ /
Sentence: 3    agnáyo ná śuśucānā́ r̥jīṣíṇaḥ /
Sentence: 4    bʰrúmiṃ dʰámanta úpa gā́ avr̥ṇvata //
Sentence: 5    vícakrame trír deváḥ /
Sentence: 6    ā́vedʰásaṃ nī́lapr̥ṣṭhaṃ br̥hántam /
Sentence: 7    bŕ̥haspátim̐ sádane sādayadʰvam /
Sentence: 8    sādádyoniṃ dáma ā́dīdivā́m̐sam /
Sentence: 9    híraṇyavarṇam aruṣám̐ sapema //
Sentence: 10    sá hí śúciḥ śatápatraḥ sá śundʰyū́ḥ //

Verse: 5    {BS 2.5.5.22}
Sentence: 1    híraṇyavāśīr iṣiráḥ suvarṣā́ḥ /
Sentence: 2    bŕ̥haspátiḥ sá svāveśá r̥ṣvā́ḥ /
Sentence: 3    pūrū́ sákʰibʰya āsutíṃ kariṣṭhaḥ //
Sentence: 4    pū́ṣam̐s táva vraté vayám /
Sentence: 5    ná riṣyema kadā́ caná /
Sentence: 6    stotā́ras ta ihá smasi //
Sentence: 7    yā́s te pūṣan nā́vo antáḥ samudré /
Sentence: 8    hiraṇyáyīr antárikṣe cáranti /
Sentence: 9    yā́bʰir yāsi dūtyā́m̐ sū́ryasya /
Sentence: 10    kā́mena kr̥táḥ śráva iccʰámānaḥ //

Verse: 6    {BS 2.5.5.23}
Sentence: 1    áraṇyāny áraṇyāny asáu /
Sentence: 2    yā́ prá_iva náśyasi /
Sentence: 3    katʰā́ grā́maṃ ná pr̥ccʰasi /
Sentence: 4    ná tvā bʰī́r iva vindatī3 //
Sentence: 5    vr̥ṣāravā́ya vádate /
Sentence: 6    yád upā́vati ciccikáḥ /
Sentence: 7    āgʰāṭī́bʰir iva dʰāváyan /
Sentence: 8    araṇyānír mahīyate //
Sentence: 9    utá gā́va iva_ādan /
Sentence: 10    utó véśma_iva dr̥śyate //

Verse: 7    {BS 2.5.5.24}
Sentence: 1    utó araṇyāníḥ sāyám /
Sentence: 2    śakaṭī́r iva sarjati //
Sentence: 3    gā́m aṅga_éṣa ā́hvayati /
Sentence: 4    dā́rv aṅga_éṣa úpāvardʰīt /
Sentence: 5    vásann araṇyānyā́m̐ sāyám /
Sentence: 6    ákrukṣad íti manyate //
Sentence: 7    ná vā́ araṇyānír hanti /
Sentence: 8    anyáś ca_ín ná_abʰigáccʰati /
Sentence: 9    svādóḥ pʰálasya jagdʰvā́ /
Sentence: 10    yátra kā́maṃ nípadyate //
Sentence: 11    ā́ñjanagandʰīm̐ surabʰī́m /
Sentence: 12    bahvannā́m ákr̥ṣīvalām /
Sentence: 13    prá_aháṃ mr̥gā́ṇāṃ mātáram /
Sentence: 14    araṇyānī́m aśam̐siṣam //

Paragraph: 6 
Verse: 1    {BS 2.5.6.25}
Sentence: 1    vā́rtrahatyāya śávase /
Sentence: 2    pr̥tanāsā́hyāya ca /
Sentence: 3    índra tvāvartayāmasi //
Sentence: 4    subráhmāṇaṃ vīrávantaṃ br̥hántam /
Sentence: 5    urúṃ gabʰīráṃ pr̥tʰúbudʰnam indra /
Sentence: 6    śrutárṣim ugrám abʰimātiṣā́ham /
Sentence: 7    asmábʰyaṃ citráṃ vŕ̥ṣaṇam̐ rayíṃ dāḥ /
Sentence: 8    kṣetriyái tvā nírr̥tyai {BS níŕ̥r̥tyai} tvā /
Sentence: 9    druhó muñcāmi váruṇasya pā́śāt /
Sentence: 10    anāgásaṃ bráhmaṇe tvā karomi //

Verse: 2    {BS 2.5.6.26}
Sentence: 1    śivé te dyā́vāpr̥tʰivī́ ubʰé imé //
Sentence: 2    śáṃ te agníḥ sahá_ádbʰir astu /
Sentence: 3    śáṃ te cátasraḥ pradíśo bʰavantu //
Sentence: 4    yā́ dáivīś cátasraḥ pradíśaḥ /
Sentence: 5    vā́tapatnīr abʰí sū́ryo vicaṣṭé /
Sentence: 6    tā́sāṃ tvā jarása ā́dadʰāmi /
Sentence: 7    prá yákṣma etu nírr̥tiṃ {BS níŕ̥r̥tiṃ} parācáiḥ /
Sentence: 8    ámoci yákṣmād duritā́d ávartyai //

Verse: 3    {BS 2.5.6.27}
Sentence: 1    druháḥ pā́śān nírr̥tyai {BS níŕ̥r̥tyai} ca_údamoci /
Sentence: 2    áhā ávartim ávidat syonám /
Sentence: 3    ápyabʰūd bʰadré sukr̥tásya loké //
Sentence: 4    sū́ryam r̥táṃ támaso grā́hyā yát /
Sentence: 5    devā́ ámuñcann ásr̥jan vyènasaḥ /
Sentence: 6    evám ahám imáṃ kṣetriyā́j jāmiśam̐sā́t /
Sentence: 7    druhó muñcāmi váruṇasya pā́śāt //
Sentence: 8    bŕ̥haspate yuvám índraś ca vásvaḥ /
Sentence: 9    divyásya_iśātʰe utá pā́rtʰivasya /
Sentence: 10    dʰattám̐ rayím̐ stuvaté kīráye cit //

Verse: 4    {BS 2.5.6.28}
Sentence: 1    yūyáṃ pāta svastíbʰiḥ sádā naḥ /
Sentence: 2    devāyúdʰam índram ā́jóhuvānāḥ /
Sentence: 3    viśvāvŕ̥dʰam abʰí yé rákṣamāṇāḥ /
Sentence: 4    yéna hatā́ dīrgʰám ádʰvānam ā́yan /
Sentence: 5    anantám ártʰam nivartsyamānāḥ //
Sentence: 6    yát te sujāte himávatsu bʰeṣajám /
Sentence: 7    mayobʰū́ḥ śáṃtamā yád dʰr̥dó 'si /
Sentence: 8    táto no dehi sībale //
Sentence: 9    adó giríbʰyo ádʰi yát pradʰā́vasi /
Sentence: 10    sam̐śóbʰamānā kanyā_ìva śubʰre //

Verse: 5    {BS 2.5.6.29}
Sentence: 1    tā́ṃ tvā múdgalā havíṣā vardʰayanti /
Sentence: 2    sā́ naḥ sībale rayím ā́bʰājaya_ihá /
Sentence: 3    pū́rvaṃ devā ápareṇa_anupáśyañ jánmabʰiḥ /
Sentence: 4    jánma_anyávaraiḥ párāṇi /
Sentence: 5    védāni devā ayám asmi_íti mā́m /
Sentence: 6    ahám̐ hitvā́ śárīraṃ jarásaḥ parástāt //
Sentence: 7    prāṇāpānáu cákṣuḥ śrótram /
Sentence: 8    vā́caṃ mánasi sáṃbʰr̥tām /
Sentence: 9    hitvā́ śárīraṃ jarásaḥ parástāt /
Sentence: 10    ā́ bʰū́tiṃ bʰū́tiṃ vayám aśnavāmahai //
Sentence: 11    imā́ evá tā́ uṣáso yā́ḥ pratʰamā́ vyáuccʰan /
Sentence: 12    tā́ devyàḥ kurvate páñca rūpā́ /
Sentence: 13    śáśvatīr ná_avapr̥jyanti /
Sentence: 14    ná gamanty ántam //

Paragraph: 7 
Verse: 1    {BS 2.5.7.30}
Sentence: 1    vásūnāṃ tvā_ádʰītena /
Sentence: 2    rudrā́ṇām ūrmyā́ /
Sentence: 3    ādityā́nāṃ téjasā /
Sentence: 4    víśveṣāṃ devā́nāṃ krátunā /
Sentence: 5    marútām émnā juhomi svā́hā //
Sentence: 6    abʰíbʰūtir ahám ā́gamam /
Sentence: 7    índrasakʰā svāyúdʰaḥ /
Sentence: 8    ā́ssva_ā́śāsu {BS ā́svāśāsu} duṣṣáhaḥ //
Sentence: 9    idáṃ várco agnínā dattám ā́gāt /
Sentence: 10    yáśo bʰárgaḥ sáha ójo bálaṃ ca //

Verse: 2    {BS 2.5.7.31}
Sentence: 1    dīrgʰāyutvā́ya śatáśāradāya /
Sentence: 2    prátigr̥bʰṇāmi mahaté vīryā̀ya //
Sentence: 3    ā́yur asi viśvā́yur asi /
Sentence: 4    sarvā́yur asi sárvam ā́yur asi /
Sentence: 5    sárvaṃ ma ā́yur bʰūyāt /
Sentence: 6    sárvam ā́yur geṣam //
Sentence: 7    bʰū́r bʰuvaḥ súvaḥ /
Sentence: 8    agnír dʰármeṇa_annādáḥ /
Sentence: 9    mr̥tyúr dʰármeṇa_ánnapatiḥ /
Sentence: 10    bráhma kṣatrám̐ svā́hā //

Verse: 3    {BS 2.5.7.32}
Sentence: 1    prajā́patiḥ praṇetā́ /
Sentence: 2    bŕ̥haspátiḥ puraetā́ /
Sentence: 3    yamáḥ pántʰāḥ /
Sentence: 4    candrámāḥ punarasúḥ svā́hā /
Sentence: 5    agnír annādó 'nnapatiḥ /
Sentence: 6    annā́dyam asmín yajñé yájamānāya dadātu svā́hā //
Sentence: 7    sómo rā́jā rā́japatiḥ /
Sentence: 8    rājyám asmín yajñé yájamānāya dadātu svā́hā //
Sentence: 9    váruṇaḥ samrā́ṭ samrā́ṭpatiḥ /
Sentence: 10    sā́mrājyam asmín yajñé yájamānāya dadātu svā́hā //

Verse: 4    {BS 2.5.7.33}
Sentence: 1    mitráḥ kṣatráṃ kṣatrápatiḥ /
Sentence: 2    kṣatrám asmín yajñé yájamānāya dadātu svā́hā //
Sentence: 3    índro bálaṃ bálapatiḥ /
Sentence: 4    bálam asmín yajñé yájamānāya dadātu svā́hā //
Sentence: 5    bŕ̥haspátir bráhma bráhmapatiḥ /
Sentence: 6    bráhma_asmín yajñé yájamānāya dadātu svā́hā //
Sentence: 7    savitā́ rāṣṭrám̐ rāṣṭrápatiḥ /
Sentence: 8    rāṣṭrám asmín yajñé yájamānāya dadātu svā́hā //
Sentence: 9    pūṣā́ viśā́ṃ víṭpatiḥ víśam asmín yajñé yájamānāya dadātu svā́hā //
Sentence: 10    sárasvatī púṣṭiḥ púṣṭipatnī /
Sentence: 11    púṣṭim asmín yajñé yájamānāya dadātu svā́hā //
Sentence: 12    tváṣṭā paśūnā́ṃ mitʰunā́nām̐ rūpakŕ̥d rupápatiḥ /
Sentence: 13    rūpéṇa_asmín yajñé yájamānāya paśū́n dadātu svā́hā //

Paragraph: 8 
Verse: 1    {BS 2.5.8.34}
Sentence: 1    sá īṃ pāhi yá r̥jīṣī́ tárutraḥ /
Sentence: 2    yáśśípravān vr̥ṣabʰó yó matīnā́m /
Sentence: 3    yó gotrabʰíd vajrabʰŕ̥d yó hariṣṭhā́ḥ /
Sentence: 4    sá indra citrā́m̐ abʰítr̥ndʰi vā́jān //
Sentence: 5    ā́ te śúṣmo vr̥ṣabʰá etu paścā́t /
Sentence: 6    ā́_uttarā́d adʰarā́gā́ purástāt /
Sentence: 7    ā́ viśváto abʰí sámetv arvā́ṅ /
Sentence: 8    índra dyumnám̐ súvarvad dʰehy asmé //
Sentence: 9    próṣv asmai puroratʰám /
Sentence: 10    índrāya śūṣám arcata //

Verse: 2    {BS 2.5.8.35}
Sentence: 1    abʰī́ke cid u lokakŕ̥t /
Sentence: 2    saṅgé samátsu vr̥trahā́ /
Sentence: 3    asmā́kaṃ bodʰi coditā́ /
Sentence: 4    nábʰantām anyakéṣām /
Sentence: 5    jyākā́ ádʰi dʰánvasu //
Sentence: 6    índraṃ vayám̐ śunāsī́ram /
Sentence: 7    asmín yajñé havāmahe /
Sentence: 8    ā́ vā́jair úpa no gamat //
Sentence: 9    índrāya śúnāsī́rāya /
Sentence: 10    srucā́ juhuta no havíḥ //

Verse: 3    {BS 2.5.8.36}
Sentence: 1    juṣátāṃ práti médʰiraḥ //
Sentence: 2    prá havyā́ni gʰr̥távanty asmai /
Sentence: 3    háryaśvāya bʰartā sajóṣāḥ /
Sentence: 4    índra_r̥túbʰir bráhmaṇā vāvr̥dʰānáḥ /
Sentence: 5    śunāsīrī́ havír idáṃ juṣasva //
Sentence: 6    váyaḥ suparṇā́ úpasedur índram /
Sentence: 7    priyámedʰā ŕ̥ṣayo nā́dʰamānāḥ /
Sentence: 8    ápa dʰvāntám ūrṇuhí pūrdʰí cákṣuḥ /
Sentence: 9    mumugdʰy àsmān nidʰáya_iva baddʰā́n //
Sentence: 10    br̥hád índrāya gāyata //

Verse: 4    {BS 2.5.8.37}
Sentence: 1    máruto vr̥trahántamam /
Sentence: 2    yéna jyótir ájanayann r̥tāvŕ̥dʰaḥ /
Sentence: 3    deváṃ devā́ya jā́gr̥vi //
Sentence: 4    kā́ miháikāḥ ká imé pataṅgā́ḥ /
Sentence: 5    māntʰālā́ḥ kúli pári mā patanti /
Sentence: 6    ánāvr̥tā_enān prádʰamantu devā́ḥ /
Sentence: 7    sáuparṇaṃ cákṣus tanúvā videya //
Sentence: 8    evá_āvandasva váruṇaṃ br̥hántam /
Sentence: 9    namasyā́ dʰī́ram amŕ̥tasya gopā́m /
Sentence: 10    sá naḥ śárma trivárūtʰaṃ víyam̐sat //

Verse: 5    {BS 2.5.8.38}
Sentence: 1    yūyáṃ pāta svastíbʰiḥ sádā naḥ //
Sentence: 2    nā́ke suparṇám úpa yát pátantam /
Sentence: 3    hr̥dā́ vénanto abʰyácakṣata tvā /
Sentence: 4    híraṇyapakṣaṃ váruṇasya dūtám /
Sentence: 5    yamásya yónau śakunáṃ bʰuraṇyúm //
Sentence: 6    śáṃ no devī́r abʰíṣṭaye /
Sentence: 7    ā́po bʰavantu pītáye /
Sentence: 8    śáṃ yór abʰísravantu naḥ //
Sentence: 9    ī́śānā vā́ryāṇām /
Sentence: 10    kṣáyantīś carṣaṇīnā́m //

Verse: 6    {BS 2.5.8.39}
Sentence: 1    apó yācāmi bʰeṣajám //
Sentence: 2    apsú me sómo abravīt /
Sentence: 3    antár víśvāni bʰeṣajā́ /
Sentence: 4    agníṃ ca viśváśaṃbʰuvam /
Sentence: 5    ā́paś ca viśvábʰeṣajīḥ //
Sentence: 6    yád apsú te sarasvati /
Sentence: 7    góṣv áśveṣu yán mádʰu /
Sentence: 8    téna me vājinīvati /
Sentence: 9    múkʰam {F aṅgdʰi} {AS aṅgdʰi} {BI aṅdʰi} {BS aṅgdʰi} sarasvati //
Sentence: 10    yā́ sárasvatī vaiśambʰalyā́ //

Verse: 7    {BS 2.5.8.40}
Sentence: 1    tásyāṃ me rāsva /
Sentence: 2    tásyās te bʰakṣīya /
Sentence: 3    tásyās te bʰūyiṣṭhabʰā́jo bʰūyāsma //
Sentence: 4    aháṃ tvád asmi mád asi tvám etát /
Sentence: 5    máma_asi yónis táva yónir asmi /
Sentence: 6    máma_ivá sán vaha havyā́ny agne /
Sentence: 7    putráḥ pitré lokakŕ̥t_ jātavedaḥ //
Sentence: 8    ihá_evá sán tatra sántaṃ tvā_agne /
Sentence: 9    prāṇéna vācā́ mánasā bibʰarmi /
Sentence: 10    tiró mā sántam ā́yur mā́ práhāsīt //

Verse: 8    {BS 2.5.8.41}
Sentence: 1    jyótiṣā tvā vaiśvānaréṇa_úpatiṣṭhe //
Sentence: 2    ayáṃ te yónir r̥tvíyaḥ /
Sentence: 3    yáto jātó árocatʰāḥ /
Sentence: 4    táṃ jānánn agna ā́roha /
Sentence: 5    átʰā no vardʰayā rayím //
Sentence: 6    yā́ te agne yajñíyā tanū́s táyā_íhy {BI tápéhy} ā́roha_ātmā́nam {AS ā́rohātmā́nam} {BS ā́rohātmā́tmā́nam} {BI ā́rohātyā́tmā́naṃ} /
Sentence: 7    áccʰā {F vásūni} {BI vásū́tí} kr̥ṇvánn asmé {BI asmín} náryā purū́ṇi /
Sentence: 8    yajñó bʰūtvā́ yajñám ā́sīda svā́ṃ yónim /
Sentence: 9    jā́tavedo bʰúva ā́jā́yamānaḥ sákṣaya éhi //
Sentence: 10    upā́varoha jātavedaḥ púnas tvám //

Verse: 9    {BS 2.5.8.42}
Sentence: 1    devébʰyo havyáṃ vaha naḥ prajānán /
Sentence: 2    ā́yuḥ prajā́m̐ rayím asmā́su dʰehi /
Sentence: 3    ájasro dīdihi no duroṇé //
Sentence: 4    tám índraṃ johavīmi /
Sentence: 5    magʰávānam ugrám /
Sentence: 6    satrā́dádʰānam ápratiṣkutam̐ śávām̐si /
Sentence: 7    mám̐hiṣṭho gīrbʰír ā́ ca yajñíyo 'vavártat {BS vavártat} /
Sentence: 8    rāyé no víśvā supátʰā kr̥ṇotu {AS kr̥ṇota} vajrī́ /
Sentence: 9    tríkadrukeṣu mahiṣó yávāśiraṃ tuviśúṣmas tr̥pát /
Sentence: 10    sómam apibad víṣṇunā sutáṃ yátʰā_ávaśat /
Sentence: 11    sá īṃ mamāda máhi kárma kártave mahā́m urúm //

Verse: 10    {BS 2.5.8.43}
Sentence: 1    sáinam̐ saścad deváṃ deváḥ satyám índum̐ satyá índraḥ //
Sentence: 2    vidád yátī sarámā rugṇam ádreḥ /
Sentence: 3    máhi pā́tʰaḥ pūrvyám̐ sadʰríyakkaḥ /
Sentence: 4    ágraṃ nayat supády ákṣarāṇām /
Sentence: 5    áccʰā rávaṃ pratʰamā́ jānatī́ gāt //
Sentence: 6    vidád gávyam̐ sarámā dr̥ḍhám ūrvám /
Sentence: 7    yénā núkaṃ mā́nusī bʰójate víṭ /
Sentence: 8    ā́ yé víśvā svapatyā́ni cakrúḥ /
Sentence: 9    kr̥ṇvānā́so amr̥tatvā́ya gātúm //
Sentence: 10    tváṃ nŕ̥bʰir nr̥pate deváhūtau //

Verse: 11    {BS 2.5.8.44}
Sentence: 1    bʰū́rīṇi vr̥tvā́ haryaśva ham̐si /
Sentence: 2    tváṃ nídasyuṃ cúmurim /
Sentence: 3    dʰúniṃ ca_ásvāpayo dabʰī́taye suhántu //
Sentence: 4    evā́ pāhi pratnátʰā mándatu tvā /
Sentence: 5    śrudʰí bráhma vāvr̥dʰasva_utá gīrbʰíḥ /
Sentence: 6    āvíḥ sū́ryaṃ kr̥ṇuhí pīpíhīṣáḥ /
Sentence: 7    jahí śátrūm̐r {AS śatrūm̐s} abʰí gā́ indra tr̥ndʰi //
Sentence: 8    ágne bā́dʰasva ví mŕ̥dʰo nudasva /
Sentence: 9    ápa_amīvā ápa rákṣām̐si sedʰa /
Sentence: 10    asmā́t samudrā́d br̥ható divó naḥ //

Verse: 12    {BS 2.5.8.45}
Sentence: 1    apā́ṃ bʰūmā́nam úpa naḥ sr̥ja_ihá /
Sentence: 2    yájña prátitiṣṭha sumatáu {F suśévā} {AS suśévā} {BI suśávā} {BS seśévā} ā́ tvā /
Sentence: 3    vásūni purudʰā́ viśantu /
Sentence: 4    dīrgʰám ā́yur yájamānāya kr̥ṇván /
Sentence: 5    {F ádʰāmŕ̥tena} {AS ádʰāmŕ̥tena} {BI átʰāmŕ̥tena} {BS ádʰāmŕ̥tena} jaritā́ram {F aṅgdʰi} {AS aṅgdʰi} {BI aṅdʰi} {BS aṅgdʰi} //
Sentence: 6    índraḥ śunā́vad vítanoti sī́ram /
Sentence: 7    saṃvatsarásya pratimā́ṇam etát /
Sentence: 8    arkásya jyótis tád íd āsa jyéṣṭham /
Sentence: 9    saṃvatsarám̐ śunávat sī́ram etát //
Sentence: 10    índrasya rā́dʰaḥ práyataṃ purú tmánā /
Sentence: 11    tád arkarūpáṃ vimímānam eti /
Sentence: 12    dvā́daśa_are prátitiṣṭhati_íd vŕ̥ṣā //
Sentence: 13    aśvāyánto gavyánto vājáyantaḥ /
Sentence: 14    hávāmahe tvā_úpaganta vā́ u /
Sentence: 15    ābʰū́ṣantas tvā sumatáu návāyām /
Sentence: 16    vayám indra tvā śunám̐ huvema //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.