TITUS
Black Yajur-Veda: Taittiriya-Brahmana
Part No. 15
Previous part

Chapter: 7 
Paragraph: 1 
Verse: 1    {BS 2.7.1.1}
Sentence: 1    trivŕ̥t stómo bʰavati /
Sentence: 2    brahmavarcasáṃ vái trívr̥t /
Sentence: 3    brahmavarcasám evá_avarundʰe //
Sentence: 4    agniṣṭomáḥ sómo bʰavati /
Sentence: 5    brahmavarcasáṃ vā́ agniṣṭomáḥ /
Sentence: 6    brahmavarcasám evá_avarundʰe //
Sentence: 7    ratʰaṃtáram̐ sā́ma bʰavati /
Sentence: 8    brahmavarcasáṃ vái ratʰaṃtarám /
Sentence: 9    brahmavarcasám evá_avarundʰe //
Sentence: 10    parisrajī́ hótā bʰavati //

Verse: 2    {BS 2.7.1.2}
Sentence: 1    aruṇó mirmirás tríśukraḥ /
Sentence: 2    etád vái brahmavarcasásya rūpám /
Sentence: 3    rūpéṇa_evá brahmavarcasám ávarundʰe //
Sentence: 4    bŕ̥haspátir akāmayata devā́nāṃ purodʰā́ṃ gaccʰeyam íti /
Sentence: 5    sá etáṃ br̥haspatisavám apaśyat /
Sentence: 6    tám ā́harat /
Sentence: 7    téna_ayajata /
Sentence: 8    táto vái sá devā́nāṃ purodʰā́m agaccʰat /
Sentence: 9    yáḥ purodʰā́kāmaḥ syā́t /
Sentence: 10    sá br̥haspatisavéna yajeta //

Verse: 3    {BS 2.7.1.3}
Sentence: 1    purodʰā́m evá gaccʰati //
Sentence: 2    tásya prātaḥsavané sannéṣu nārāśam̐séṣu /
Sentence: 3    ekā́daśa dákṣiṇā nīyante /
Sentence: 4    ékādaśa mā́dʰyaṃdine sávane sannéṣu nārāśam̐séṣu /
Sentence: 5    ékādaśa tŕ̥tīyasavané sannéṣu nārāśam̐séṣu /
Sentence: 6    tráyastrim̐śat sáṃpadyante /
Sentence: 7    tráyastrim̐śad vái devátāḥ /
Sentence: 8    devátā evá_avarundʰe //
Sentence: 9    áśvaś catustrim̐śáḥ /
Sentence: 10    prājāpatyó vā́ áśvaḥ //

Verse: 4    {BS 2.7.1.4}
Sentence: 1    prajā́patiś catustrim̐śó devátānāṃ /
Sentence: 2    yā́vatīr evá devátāḥ /
Sentence: 3    tā́ evá_avarundʰe //
Sentence: 4    kr̥ṣṇājinè 'bʰíṣiñcati /
Sentence: 5    bráhmaṇo vā́ etád rūpám /
Sentence: 6    yát kr̥ṣṇājinám /
Sentence: 7    brahmavarcaséna_eváinam̐ sámardʰayati //
Sentence: 8    ā́jyena_abʰíṣiñcati /
Sentence: 9    téjo vā́ ā́jyam /
Sentence: 10    téja evá_asmin dadʰāti //

Paragraph: 2 
Verse: 1    {BS 2.7.2.5}
Sentence: 1    yád āgneyó bʰávati /
Sentence: 2    agnímukʰā hy {BI agnímukʰād dʰy} ŕ̥ddʰiḥ //
Sentence: 3    átʰa yát pauṣṇáḥ /
Sentence: 4    púṣṭir vái pūṣā́ /
Sentence: 5    púṣṭir váiśyasya /
Sentence: 6    púṣṭim evá_avarundʰe //
Sentence: 7    prasavā́ya sāvitráḥ //
Sentence: 8    átʰa yát tvāṣṭráḥ /
Sentence: 9    tváṣṭā hí rūpā́ṇi vikaróti //
Sentence: 10    nirvaruṇatvā́ya vāruṇáḥ //

Verse: 2    {BS 2.7.2.6}
Sentence: 1    átʰo yà evá káś ca sántsūyáte /
Sentence: 2    sá hí vāruṇáḥ //
Sentence: 3    átʰa yád vaiśvadeváḥ /
Sentence: 4    váiśvadevó hí váiśyaḥ //
Sentence: 5    átʰa yán mārutáḥ /
Sentence: 6    mārutó hí váiśyaḥ //
Sentence: 7    saptá_etā́ni havī́m̐ṣi bʰavanti /
Sentence: 8    saptágaṇā vái marútaḥ /
Sentence: 9    pŕ̥śniḥ paṣṭhauhī́ mārutyā́_ālabʰyate /
Sentence: 10    víḍ vái marútaḥ /
Sentence: 11    víśa eváitán madʰyatò 'bʰíṣicyate /
Sentence: 12    tásmād vā́ eṣá viśáḥ priyáḥ /
Sentence: 13    viśó hí madʰyatò 'bʰiṣicyáte //
Sentence: 14    r̥ṣabʰacarmé 'dʰyabʰíṣiñcati /
Sentence: 15    sá hí prajanayitā́ //
Sentence: 16    dadʰnā́_abʰíṣiñcati /
Sentence: 17    ū́rg vā́ annā́dyaṃ dádʰi /
Sentence: 18    ūrjā́_eváinam annā́dyena sámardʰayati //

Paragraph: 3 
Verse: 1    {BS 2.7.3.7}
Sentence: 1    yád āgneyó bʰávati /
Sentence: 2    āgneyó vái brāhmaṇáḥ //
Sentence: 3    átʰa yát saumyáḥ /
Sentence: 4    saumyó hí brāhmaṇáḥ //
Sentence: 5    prasavā́ya_evá sāvitráḥ //
Sentence: 6    átʰa yád bārhaspatyáḥ /
Sentence: 7    etád vái brāhmaṇásya vākpatī́yam //
Sentence: 8    átʰa yád agnīṣomī́yaḥ /
Sentence: 9    āgneyó vái brāhmaṇáḥ /
Sentence: 10    táu yadā́ saṃgáccʰete //

Verse: 2    {BS 2.7.3.8}
Sentence: 1    átʰa vīryā̀vattaro bʰavati //
Sentence: 2    átʰa yát sārasvatáḥ /
Sentence: 3    etád dʰí pratyákṣaṃ brāhmaṇásya vākpatī́yam //
Sentence: 4    nirvaruṇatvā́ya_evá vāruṇáḥ /
Sentence: 5    átʰo yá evá káś ca sántsūyáte /
Sentence: 6    sá hí vāruṇáḥ //
Sentence: 7    átʰa yád dyāvāpr̥tʰivyàḥ /
Sentence: 8    índro vr̥trā́ya vájram údayaccʰat /
Sentence: 9    táṃ dyā́vāpr̥tʰivī́ ná_ánvamanyetām /
Sentence: 10    tám eténaivá bʰāgadʰéyena_ánvamanyetām //

Verse: 3    {BS 2.7.3.9}
Sentence: 1    vájrasya {BS vájrásya} vā́ eṣò 'numānā́ya /
Sentence: 2    ánumatavajraḥ sūyātā íti //
Sentence: 3    aṣṭā́v etā́ni havī́m̐ṣi bʰavanti /
Sentence: 4    aṣṭa_ákṣarā gāyatrī́ /
Sentence: 5    gāyatrī́ brahmavarcasám /
Sentence: 6    gāyatriyā́_evá brahmavarcasám ávarundʰe //
Sentence: 7    híraṇyena gʰr̥tám útpunāti /
Sentence: 8    téjasa evá rucé //
Sentence: 9    kr̥ṣṇājinè 'bʰíṣiñcati /
Sentence: 10    bráhmaṇo vā́ etád r̥ksāmáyo rūpám /
Sentence: 11    yát kr̥ṣṇājinám /
Sentence: 12    bráhmann eváinam r̥ksāmáyor ádʰy abʰíṣiñcati //
Sentence: 13    gʰr̥téna_abʰíṣiñcati /
Sentence: 14    tátʰā vīryā́vattaro {BS vīryàvattaro} bʰavati //

Paragraph: 4 
Verse: 1    {BS 2.7.4.10}
Sentence: 1    ná vái sómena somasya savò 'sti /
Sentence: 2    ható hy èṣáḥ /
Sentence: 3    abʰíṣuto hy èṣáḥ /
Sentence: 4    ná hí hatáḥ sūyáte /
Sentence: 5    saumī́m̐ sūtávaśām ā́labʰate /
Sentence: 6    sómo vái retodʰā́ḥ /
Sentence: 7    réta evá tád dadʰāti //
Sentence: 8    saumyā́_r̥cā́_abʰíṣiñcati /
Sentence: 9    retodʰā́ hy èṣā́ /
Sentence: 10    rétaḥ sómaḥ /
Sentence: 11    réta evā́smin dadʰāti //
Sentence: 12    yát kíṃ ca rājasū́yam r̥té sómam /
Sentence: 13    tát sárvaṃ bʰavati //
Sentence: 14    áṣāḍhaṃ yutsú pŕ̥tanāsu páprim /
Sentence: 15    suvarṣā́m apsvā́ṃ vr̥jánasya gopā́m /
Sentence: 16    bʰareṣujā́m̐ súkṣitíṃ suśrávasam /
Sentence: 17    jáyantaṃ tvā́m ánu madema soma //

Paragraph: 5 
Verse: 1    {BS 2.7.5.11}
Sentence: 1    yó vái sómena sūyáte /
Sentence: 2    sá devasaváḥ /
Sentence: 3    yáḥ paśúnā sūyáte /
Sentence: 4    sá devasaváḥ /
Sentence: 5    yá íṣṭyā sūyáte /
Sentence: 6    sá manuṣyasaváḥ /
Sentence: 7    etáṃ vái pŕ̥tʰaye devā́ḥ prā́yaccʰan /
Sentence: 8    táto vái só 'py āraṇyā́nāṃ paśūnā́m asūyata /
Sentence: 9    yā́vatīḥ kíyatīś ca prajā́ vā́caṃ vádanti /
Sentence: 10    tā́sām̐ sárvāsām̐ sūyate //

Verse: 2    {BS 2.7.5.12}
Sentence: 1    yá eténa yájate /
Sentence: 2    yá u cainam eváṃ véda //
Sentence: 3    nārāśam̐syā́_r̥cā́_abʰíṣiñcati /
Sentence: 4    manuṣyā̀ vái nárāśám̐saḥ /
Sentence: 5    nihnútya vā́vá_etát /
Sentence: 6    átʰa_abʰíṣiñcati //
Sentence: 7    yát kíṃ ca rājasū́yam anuttaravedī́kam /
Sentence: 8    tát sárvaṃ bʰavati //
Sentence: 9    yé me pañcāśátaṃ dadúḥ /
Sentence: 10    áśvānām̐ sadʰástutiḥ /
Sentence: 11    dyumád agne máhi śrávaḥ /
Sentence: 12    br̥hát kr̥dʰi magʰónām /
Sentence: 13    nr̥vád amr̥ta nr̥ṇā́m //

Paragraph: 6 
Verse: 1    {BS 2.7.6.13}
Sentence: 1    eṣá gosaváḥ /
Sentence: 2    ṣaṭtrim̐śá uktʰyò br̥hátsāmā /
Sentence: 3    pávamāne kaṇvaratʰaṃtaráṃ bʰavati //
Sentence: 4    yó vái vājapéyaḥ /
Sentence: 5    sá samrāṭtsaváḥ /
Sentence: 6    yó rājasū́yaḥ /
Sentence: 7    sá varuṇasaváḥ /
Sentence: 8    prajā́patiḥ svā́rājyaṃ parameṣṭhī́ /
Sentence: 9    svā́rājyaṃ gáur evá //
Sentence: 10    gáur iva bʰavati //

Verse: 2    {BS 2.7.6.14}
Sentence: 1    yá eténa yájate /
Sentence: 2    yá u cainam eváṃ véda //
Sentence: 3    ubʰé br̥hadratʰaṃtaré bʰavataḥ /
Sentence: 4    tád dʰí svā́rājyam //
Sentence: 5    ayútaṃ dákṣiṇāḥ /
Sentence: 6    tád dʰí svā́rājyam //
Sentence: 7    pratidʰúṣā_abʰíṣiñcati /
Sentence: 8    tád dʰí svā́rājyam //
Sentence: 9    ánuddʰate védyai dakṣiṇatá āhavanī́yasya br̥hatástotráṃ praty abʰíṣiñcati /
Sentence: 10    iyáṃ vā́vá ratʰaṃtarám //

Verse: 3    {BS 2.7.6.15}
Sentence: 1    asáu br̥hát /
Sentence: 2    anáyor eváinam ánantarhitam abʰíṣiñcati //
Sentence: 3    paśustomó vā́ eṣáḥ /
Sentence: 4    téna gosaváḥ /
Sentence: 5    ṣaṭtrim̐śáḥ sarváḥ //
Sentence: 6    reváj jātáḥ sáhasā vr̥ddʰáḥ /
Sentence: 7    kṣatrā́ṇāṃ kṣatrabʰŕ̥ttamo vayodʰā́ḥ /
Sentence: 8    mahā́n mahitvé tastabʰānáḥ /
Sentence: 9    kṣatré rāṣṭré ca jāgr̥hi /
Sentence: 10    prajā́pates tvā parameṣṭhínaḥ svā́rājyenā_abʰíṣiñcāmi_íty āha /
Sentence: 11    svā́rājyam eváinaṃ gamayati //

Paragraph: 7 
Verse: 1    {BS 2.7.7.16}
Sentence: 1    sim̐hé vyāgʰrá utá yā́ pŕ̥dākau /
Sentence: 2    tvíṣir agnáu brāhmaṇé sū́rye yā́ /
Sentence: 3    índraṃ yā́ devī́ subʰágā jajā́na /
Sentence: 4    sā́ na ā́gan várcasā saṃvidānā́ //
Sentence: 5    yā́ rājanyè dundubʰā́v ā́yatāyām /
Sentence: 6    áśvasya krandye púruṣasya māyáu /
Sentence: 7    índraṃ yā́ devī́ subʰágā jajā́na /
Sentence: 8    sā́ na ā́gan várcasā saṃvidānā́ //
Sentence: 9    yā́ hastíni dvipíni yā́ híraṇye /
Sentence: 10    tvíṣir áśveṣu púruṣeṣu góṣu //

Verse: 2    {BS 2.7.7.17}
Sentence: 1    índraṃ yā́ devī́ subʰágā jajā́na /
Sentence: 2    sā́ na ā́gan várcasā saṃvidānā́ //
Sentence: 3    rátʰe akṣéṣu vr̥ṣabʰásya vā́je /
Sentence: 4    vā́te parjánye váruṇasya śuṣme /
Sentence: 5    índraṃ yā́ devī́ subʰágā jajā́na /
Sentence: 6    sā́ na ā́gan várcasā saṃvidānā́ //
Sentence: 7    rā́ḍ asi virā́ḍ asi /
Sentence: 8    samrā́ḍ asi svarā́ḍ asi //
Sentence: 9    índrāya tvā téjasvate téjasvantam̐ śrīṇāmi /
Sentence: 10    índrāya tvā_ójasvata ójasavantam̐ śrīṇāmi //

Verse: 3    {BS 2.7.7.18}
Sentence: 1    índrāya tvā páyasvate páyasvantam̐ śrīṇāmi /
Sentence: 2    índrāya tvā_ā́yuṣmata ā́yuṣmantam̐ śrīṇāmi //
Sentence: 3    téjo 'si /
Sentence: 4    tát te práyaccʰāmi /
Sentence: 5    téjasvad astu me múkʰam /
Sentence: 6    téjasvat_śíro astu me /
Sentence: 7    téjasvān viśvátaḥ pratyáṅ /
Sentence: 8    téjasā sáṃpipr̥gdʰi mā //
Sentence: 9    ójo 'si /
Sentence: 10    tát te práyaccʰāmi //

Verse: 4    {BS 2.7.7.19}
Sentence: 1    ójasvad astu me múkʰam /
Sentence: 2    ójasvat_śíro astu me /
Sentence: 3    ójasvān viśvátaḥ pratyáṅ /
Sentence: 4    ójasā sáṃpipr̥gdʰi mā //
Sentence: 5    páyo 'si /
Sentence: 6    tát te práyaccʰāmi /
Sentence: 7    páyasvad astu me múkʰam /
Sentence: 8    páyasvat_śíro astu me /
Sentence: 9    páyasvān viśvátaḥ pratyáṅ /
Sentence: 10    páyasā sáṃpipr̥gdʰi mā //

Verse: 5    {BS 2.7.7.20}
Sentence: 1    ā́yur asi /
Sentence: 2    tát te práyaccʰāmi /
Sentence: 3    ā́yuṣmad astu me múkʰam /
Sentence: 4    ā́yuṣmat_śíro astu me ā́yuṣmān viśvátaḥ pratyáṅ /
Sentence: 5    ā́yuṣā sáṃpipr̥gdʰi mā //
Sentence: 6    imám agna ā́yuṣe várcase kr̥dʰi /
Sentence: 7    priyám̐ réto varuṇa soma rājan /
Sentence: 8    mātā́_iva_asmā adite śárma yaccʰa /
Sentence: 9    víśve devā járadaṣṭir yátʰā́ sat //

Verse: 6    {BS 2.7.7.21}
Sentence: 1    ā́yur asi viśvā́yur asi /
Sentence: 2    sarvā́yur asi sárvam ā́yur asi //
Sentence: 3    yáto vā́to mánojavāḥ /
Sentence: 4    yátaḥ kṣáranti síndʰavaḥ /
Sentence: 5    tā́sāṃ tvā sárvāsām̐ rucā /
Sentence: 6    abʰíṣiñcāmi várcasā //
Sentence: 7    samudrá iva_asi gahmánā /
Sentence: 8    sóma iva_asy ádābʰyaḥ /
Sentence: 9    agnír iva viśvátaḥ pratyáṅ /
Sentence: 10    sū́rya iva jyótiṣā vibʰū́ḥ //

Verse: 7    {BS 2.7.7.22}
Sentence: 1    apā́ṃ yó drávaṇe rásaḥ /
Sentence: 2    tám ahám asmā́ āmuṣyāyaṇā́ya /
Sentence: 3    téjase brahmavarcasā́ya gr̥hṇāmi /
Sentence: 4    apā́ṃ yá ūrmáu rásaḥ /
Sentence: 5    tám ahám asmā́ āmuṣyāyaṇā́ya /
Sentence: 6    ójase vīryā̀ya gr̥hṇāmi /
Sentence: 7    apā́ṃ yó madʰyató rásaḥ /
Sentence: 8    tám ahám asmā́ āmuṣyāyaṇā́ya /
Sentence: 9    púṣṭyai prajánanāya gr̥hṇāmi /
Sentence: 10    apā́ṃ yó yajñíyo rásaḥ /
Sentence: 11    tám ahám asmā́ āmuṣyāyaṇā́ya /
Sentence: 12    ā́yuṣe dīrgʰāyutvā́ya gr̥hṇāmi //

Paragraph: 8 
Verse: 1    {BS 2.7.8.23}
Sentence: 1    abʰípréhi vīráyasva /
Sentence: 2    ugráś céttā sapatnahā́ /
Sentence: 3    ā́tiṣṭha mitravárdʰanaḥ /
Sentence: 4    túbʰyaṃ devā́ ádʰibruvan //
Sentence: 5    aṅkáu nyaṅkā́v abʰíta ā́tiṣṭha vr̥trahan rátʰam /
Sentence: 6    ātíṣṭhantaṃ pári víśve abʰūṣan /
Sentence: 7    śríyaṃ vásānaś carati svárocāḥ /
Sentence: 8    mahát tád asyá_asurasya nā́ma /
Sentence: 9    ā́ viśvárūpo amŕ̥tāni tastʰau //
Sentence: 10    ánu tvā_índro madatv ánu bŕ̥haspátiḥ /

Verse: 2    {BS 2.7.8.24}
Sentence: 1    ánu sómo ánv agnír āvīt /
Sentence: 2    ánu tvā víśve devā́ avantu /
Sentence: 3    ánu saptá rā́jāno yá uta_abʰíṣiktāḥ //
Sentence: 4    ánu tvā mitrā́varuṇāv ihá_avatam /
Sentence: 5    ánu dyā́vāpr̥tʰivī́ viśváśaṃbʰū /
Sentence: 6    sū́ryo áhobʰir ánu tvā_avatu /
Sentence: 7    candrámā nákṣatrair ánu tvā_avatu //
Sentence: 8    dyáuś ca tvā pr̥tʰivī́ ca prácetasā /
Sentence: 9    śukró br̥hád dákṣinā tvā pipartu /
Sentence: 10    ánu svadʰā́ cikitām̐ sómo agníḥ /
Sentence: 11    ā́_ayáṃ pr̥ṇaktu rájasī {AS rájasi} upástʰam //

Paragraph: 9 
Verse: 1    {BS 2.7.9.25}
Sentence: 1    prajā́patiḥ prajā́ asr̥jata /
Sentence: 2    tā́ asmāt sr̥ṣṭā́ḥ párācīr āyan /
Sentence: 3    sá etáṃ prajā́patir odanám apaśyat /
Sentence: 4    só 'nnaṃ bʰūtò 'tiṣṭhat /
Sentence: 5    tā́ anyátra_annā́dyam ávittvā /
Sentence: 6    prajā́patiṃ prajā́ upā́vartanta /
Sentence: 7    ánnam eváinaṃ bʰūtáṃ paśyantīḥ prajā́ upā́vartante /
Sentence: 8    yá eténa yájate /
Sentence: 9    yá u cainam eváṃ véda /
Sentence: 10    sárvāṇy ánnāni bʰavanti //

Verse: 2    {BS 2.7.9.26}
Sentence: 1    sárve púruṣāḥ /
Sentence: 2    sárvāṇy evá_annāny ávarundʰe /
Sentence: 3    sárvān púruṣān //
Sentence: 4    rā́ḍ asi virā́ḍ asi_íty āha /
Sentence: 5    svā́rājyam eváinaṃ gamayati //
Sentence: 6    yád dʰíraṇyaṃ dádāti /
Sentence: 7    téjas téna_ávarundʰe /
Sentence: 8    yát tisr̥dʰanvám /
Sentence: 9    vīryàṃ téna /
Sentence: 10    yád áṣṭrām //

Verse: 3    {BS 2.7.9.27}
Sentence: 1    púṣṭiṃ téna /
Sentence: 2    yát kamaṇḍálum /
Sentence: 3    ā́yuṣṭéna //
Sentence: 4    yád dʰíraṇyam ābadʰnā́ti /
Sentence: 5    jyótir vái híraṇyam /
Sentence: 6    jyótir evā́smin dadʰāti /
Sentence: 7    átʰo téjo vái híraṇyam /
Sentence: 8    téja evá_ātmán dʰatte //
Sentence: 9    yád odanáṃ prāśnā́ti /
Sentence: 10    etád evá sárvam avarúdʰya //

Verse: 4    {BS 2.7.9.28}
Sentence: 1    tád asminn ekadʰā́_adʰāt //
Sentence: 2    rohiṇyā́ṃ kāryàḥ /
Sentence: 3    yád brāhmaṇá evá rohiṇī́ /
Sentence: 4    tásmād evá /
Sentence: 5    átʰo várṣma_eváinam̐ samānā́nāṃ karoti //
Sentence: 6    udyatā́ sū́ryeṇa kāryàḥ /
Sentence: 7    udyántaṃ vā́ etám̐ sárvāḥ prajā́ḥ prátinandanti //
Sentence: 8    didr̥kṣéṇyo darśanī́yo bʰavati /
Sentence: 9    {not in BS} yá eváṃ véda //
Sentence: 10    brahmavādíno vadanti //

Verse: 5    {BS 2.7.9.29}
Sentence: 1    avétyo 'vabʰr̥tʰā́3 nā́3 íti /
Sentence: 2    yád darbʰapuñjīláiḥ paváyati /
Sentence: 3    tát svid evá_avaiti /
Sentence: 4    tán ná_avaiti //
Sentence: 5    tribʰíḥ pavayati /
Sentence: 6    tráya imé lokā́ḥ /
Sentence: 7    ebʰír eváinaṃ lokáiḥ pavayati /
Sentence: 8    átʰo apā́ṃ vā́ etát téjo várcaḥ /
Sentence: 9    yád darbʰā́ḥ /
Sentence: 10    yád darbʰapuñjīláiḥ paváyati /
Sentence: 11    apā́m eváinaṃ téjasā várcasā_abʰíṣiñcati //

Paragraph: 10 
Verse: 1    {BS 2.7.10.30}
Sentence: 1    prajā́patir akāmayata bahór bʰū́yānt syām íti /
Sentence: 2    sá etáṃ pañcaśāradī́yam apaśyat /
Sentence: 3    tám ā́harat /
Sentence: 4    téna_ayajata /
Sentence: 5    táto vái sá bahór bʰū́yān abʰavat /
Sentence: 6    yáḥ kāmáyeta bahór bʰū́yānt syām íti /
Sentence: 7    sá pañcaśāradī́yena yajeta /
Sentence: 8    bahór evá bʰū́yān bʰavati //
Sentence: 9    marutstomó vā́ eṣáḥ /
Sentence: 10    marúto hí devā́nāṃ bʰū́yiṣṭhāḥ //

Verse: 2    {BS 2.7.10.31}
Sentence: 1    bahúr bʰavati /
Sentence: 2    yá eténa yájate /
Sentence: 3    yá u ca_enameváṃ véda //
Sentence: 4    pañcaśāradī́yo bʰavati /
Sentence: 5    páñca vā́ r̥távaḥ saṃvatsaráḥ /
Sentence: 6    r̥túṣv evá saṃvatsaré prátitiṣṭhati /
Sentence: 7    átʰo páñca.akṣarā paṅktíḥ /
Sentence: 8    pā́ṅkto yajñáḥ /
Sentence: 9    yajñam evá_avarundʰe //
Sentence: 10    saptadaśám̐ stómā ná_atiyanti /
Sentence: 11    saptadaśáḥ prajā́patiḥ /
Sentence: 12    prajā́pater ā́ptyai //

Paragraph: 11 
Verse: 1    {BS 2.7.11.32}
Sentence: 1    agástyo marúdbʰya ukṣṇáḥ práukṣat /
Sentence: 2    tā́n índra ā́datta /
Sentence: 3    tá enaṃ vájram udyátya_abʰyā̀yanta /
Sentence: 4    tā́n agástyaś caivá_índraśca kayāśubʰī́yena_aśamayatām /
Sentence: 5    tā́ṇ_śāntā́n úpāhvayata /
Sentence: 6    yát kayāśubʰī́yaṃ bʰávati śā́ntyai /
Sentence: 7    tásmād etá aindrā mārutā́ ukṣā́ṇaḥ savanī́yā bʰavanti /
Sentence: 8    tráyaḥ pratʰamé 'hann ā́labʰyante /
Sentence: 9    eváṃ dvitī́ye /
Sentence: 10    eváṃ tr̥tī́ye //

Verse: 2    {BS 2.7.11.33}
Sentence: 1    eváṃ caturtʰé /
Sentence: 2    páñca_uttamé 'hann ā́labʰyante /
Sentence: 3    várṣiṣṭham iva hy ètád áhaḥ /
Sentence: 4    várṣiṣṭhaḥ samānā́nāṃ bʰavati /
Sentence: 5    yá eténa yájate /
Sentence: 6    yá u cainam eváṃ véda //
Sentence: 7    svā́rājyaṃ vā́ eṣá yajñáḥ /
Sentence: 8    eténa vā́ ékayā́vā kāndamáḥ svā́rājyam agaccʰat /
Sentence: 9    svā́rājyaṃ gaccʰati /
Sentence: 10    yá eténa yájate //

Verse: 3    {BS 2.7.11.34}
Sentence: 1    yá u cainam eváṃ véda //
Sentence: 2    mārutó vā́ eṣá stómaḥ /
Sentence: 3    eténa vái marúto devā́nāṃ bʰū́yiṣṭhā abʰavan /
Sentence: 4    bʰū́yiṣṭhaḥ samānā́nāṃ bʰavati /
Sentence: 5    yá eténa yájate /
Sentence: 6    yá u cainam eváṃ véda //
Sentence: 7    pañcaśāradī́yo vā́ eṣá yajñáḥ /
Sentence: 8    ā́ pañcamā́t púruṣād ánnam atti /
Sentence: 9    yá eténa yájate /
Sentence: 10    yá u cainam eváṃ véda //
Sentence: 11    saptadaśám̐ stómā ná_atiyanti /
Sentence: 12    saptadaśáḥ prajā́patiḥ /
Sentence: 13    prajā́pater evá ná_eti //

Paragraph: 12 
Verse: 1    {BS 2.7.12.35}
Sentence: 1    asya_ájarāso damā́ marítrāḥ /
Sentence: 2    arcáddʰūmāso agnáyaḥ pāvakā́ḥ /
Sentence: 3    śvicīcáyaḥ śvātrā́so bʰuraṇyávaḥ /
Sentence: 4    vanarṣádo vāyávo ná sómāḥ //
Sentence: 5    yájā no mitrā́váruṇā /
Sentence: 6    yájā devā́m̐ r̥táṃ br̥hát /
Sentence: 7    ágne yákṣi sváṃ dámam //
Sentence: 8    áśvinā píbatam̐ sutám /
Sentence: 9    dī́dyagnī śucivratā /
Sentence: 10    r̥túnā yajñavāhasā //

Verse: 2    {BS 2.7.12.36}
Sentence: 1    dvé vírūpe carataḥ {BS vírū́pé cárátas} svártʰe /
Sentence: 2    anyá_anyā vatsám úpadʰāpayete /
Sentence: 3    hárir anyásyāṃ bʰávati svadʰā́vān /
Sentence: 4    śukró anyásyāṃ dadr̥śe suvárcāḥ //
Sentence: 5    pūrvāparáṃ carato māyáyā_etáu /
Sentence: 6    śíśū krī́ḍantau páriyāto adʰvarám /
Sentence: 7    víśvāny anyó bʰúvanā_abʰicáṣṭe /
Sentence: 8    r̥tū́n anyó vidádʰaj jāyate púnaḥ //
Sentence: 9    trī́ṇi śatā́ trī́_ sahásrāṇy agním /
Sentence: 10    trim̐śát_ ca devā́ náva ca_asaparyan //

Verse: 3    {BS 2.7.12.37}
Sentence: 1    áukṣan gʰr̥táir ā́str̥ṇan barhír asmai /
Sentence: 2    ā́d íd dʰótāraṃ nyàṣādayanta //
Sentence: 3    agnínā_agníḥ sámidʰyate /
Sentence: 4    kavír gr̥hápatir yúvā /
Sentence: 5    havyavā́ḍ juhvā̀syaḥ //
Sentence: 6    agnír devā́nāṃ jaṭháram /
Sentence: 7    pūtádakṣaḥ kavíkratuḥ /
Sentence: 8    devó devébʰir ā́gamat //
Sentence: 9    agniśríyo marúto viśvákr̥ṣṭayaḥ /
Sentence: 10    ā́ tveṣám ugrám áva īmahe vayám //

Verse: 4    {BS 2.7.12.38}
Sentence: 1    té svāmíno rudríyā varṣánirṇijaḥ /
Sentence: 2    sim̐hā́ ná heṣákratavaḥ sudā́navaḥ //
Sentence: 3    yád uttamé maruto madʰyamé vā /
Sentence: 4    yád vā_avamé subʰagāso divíṣṭha {BS divíṣṭhá} {?} /
Sentence: 5    táto no rudrā utá vā_anvásya /
Sentence: 6    ágne vittā́d dʰavíṣo yád yájāmaḥ //
Sentence: 7    ī́ḍe agním̐ svávasaṃ námobʰiḥ /
Sentence: 8    ihá prasaptó vícayat kr̥táṃ naḥ /
Sentence: 9    rátʰair iva prábʰare vājapádbʰiḥ {BS vājapádbʰiḥ} /
Sentence: 10    pradakṣiṇín marútām̐ stómam r̥dʰyām //

Verse: 5    {BS 2.7.12.39}
Sentence: 1    śrudʰí {BS śrúdʰí {?}} śrutkarṇa váhnibʰiḥ /
Sentence: 2    deváir agne sayā́vabʰiḥ /
Sentence: 3    ā́sīdantu barhíṣi /
Sentence: 4    mitró váruṇo aryamā́ /
Sentence: 5    prātaryā́vāṇo adʰvarám //
Sentence: 6    víśveṣām áditir yajñíyānām /
Sentence: 7    víśveṣām {BS víśvéṣām} átitʰir mā́nuṣāṇām /
Sentence: 8    agnír devā́nām áva āvr̥ṇānáḥ /
Sentence: 9    sumr̥ḍīkó bʰavatu viśvávedāḥ //
Sentence: 10    tvé agne sumatíṃ bʰíkṣamānāḥ //

Verse: 6    {BS 2.7.12.40}
Sentence: 1    diví śrávo dadʰire yajñíyāsaḥ /
Sentence: 2    náktā ca cakrúr uṣásā vírūpe /
Sentence: 3    kr̥ṣṇáṃ {BS kr̥ṣṇàṃ} ca várṇam aruṇáṃ ca sáṃdʰuḥ //
Sentence: 4    tvā́m agna ādityā́sa āsyàm /
Sentence: 5    tvā́ṃ jihvā́m̐ śúcayaś cakrire kave /
Sentence: 6    tvā́m̐ rātiṣā́co adʰvaréṣu saścire /
Sentence: 7    tvé devā́ havír adanty ā́hutam //
Sentence: 8    ní tvā yajñásya sā́dʰanam /
Sentence: 9    ágne hótāram r̥tvíjam /
Sentence: 10    vanuṣvád deva dʰīmahi prácetasam /
Sentence: 11    jīráṃ dūtám ámartyam //

Paragraph: 13 
Verse: 1    {BS 2.7.13.41}
Sentence: 1    tíṣṭhā hárī rátʰa ā́ yujyámānā yāhí /
Sentence: 2    vāyúr ná niyúto no áccʰa /
Sentence: 3    píbāsy ándʰo abʰísr̥ṣṭo asme /
Sentence: 4    índra svā́hā rarimā́ te mádāya //
Sentence: 5    kásya vŕ̥ṣā suté sácā /
Sentence: 6    niyútvān vr̥ṣabʰó raṇat /
Sentence: 7    vr̥trahā́ sómapītaye //
Sentence: 8    índraṃ vayáṃ mahādʰané /
Sentence: 9    índram árbʰe havāmahe /
Sentence: 10    yújaṃ vr̥tréṣu vajríṇam //

Verse: 2    {BS 2.7.13.42}
Sentence: 1    dvitā́ yó vr̥trahántamaḥ /
Sentence: 2    vidá índraḥ śatákratuḥ /
Sentence: 3    úpa no háribʰiḥ sutám //
Sentence: 4    sá sū́ra ā́ janáyañ jyótir índram /
Sentence: 5    ayā́ dʰiyā́ taráṇir ádribarhāḥ /
Sentence: 6    r̥téna śuṣmī́n ávamāno arkáiḥ /
Sentence: 7    vyùsrídʰo asró ádrir bibʰeda //
Sentence: 8    utá tyád āśváśviyam /
Sentence: 9    yád indra nā́huṣīṣv ā́ /
Sentence: 10    ágre vikṣú prátīdayat //

Verse: 3    {BS 2.7.13.43}
Sentence: 1    bʰáreṣv índram̐ suhávam̐ havāmahe /
Sentence: 2    am̐homúcam̐ sukŕ̥taṃ dáivyaṃ jánam /
Sentence: 3    agníṃ mitráṃ váruṇam̐ sātáye bʰágam /
Sentence: 4    dyā́vāpr̥tʰivī́ marútaḥ svastaye //
Sentence: 5    mahí kṣétraṃ purúś candráṃ vívidvā́n /
Sentence: 6    ā́dít sákʰibʰyaś ca rátʰam̐ sámairat /
Sentence: 7    índro nŕ̥bʰir ajanad dī́dyānaḥ sākám /
Sentence: 8    sū́ryam uṣásaṃ gātúm agním //
Sentence: 9    urúṃ no lokám ánuneṣi vidvā́n /
Sentence: 10    súvarvaj jyótir ábʰayam̐ svastí //

Verse: 4    {BS 2.7.13.44}
Sentence: 1    r̥ṣvā́ ta indra stʰávirasya bāhū́ /
Sentence: 2    úpastʰeyāma śaraṇā́ br̥hántā //
Sentence: 3    ā́ no víśvābʰir ūtíbʰiḥ sajóṣāḥ /
Sentence: 4    bráhma juṣāṇó haryaśva yāhi /
Sentence: 5    várīvr̥jat stʰávirebʰiḥ suśipra /
Sentence: 6    asmé dádʰad vŕ̥ṣaṇam̐ śúṣmam indra //
Sentence: 7    índrāya gā́va āśíram /
Sentence: 8    duduhré vajríṇe mádʰu /
Sentence: 9    yát sīm upahvaré 'vidát //
Sentence: 10    tā́s te vajrin dʰenávo jojayur naḥ //

Verse: 5    {BS 2.7.13.45}
Sentence: 1    gábʰastayo niyúto viśvávārāḥ /
Sentence: 2    áhar_ahar bʰū́ya íj jóguvānāḥ /
Sentence: 3    pūrṇā́ indra kṣumáto bʰójanasya //
Sentence: 4    imā́ṃ te dʰíyaṃ prábʰare mahó mahī́m /
Sentence: 5    asyá stotré dʰiṣáṇā yát ta ānajé /
Sentence: 6    tám utsavé ca prasavé ca sāsahím /
Sentence: 7    índraṃ devā́saḥ śávasā madann ánu //

Paragraph: 14 
Verse: 1    {BS 2.7.14.46}
Sentence: 1    prajā́patiḥ paśū́n asr̥jata /
Sentence: 2    tè 'smāt sr̥ṣṭā́ḥ párāñca āyan /
Sentence: 3    tā́n agniṣṭoména ná_āpnot /
Sentence: 4    tā́n uktʰyèna ná_āpnot /
Sentence: 5    tā́n ṣoḍaśínā ná_āpnot /
Sentence: 6    tā́n rā́triyā ná_āpnot /
Sentence: 7    tā́nt saṃdʰínā ná_āpnot /
Sentence: 8    sò 'gním abravīt /
Sentence: 9    imā́n ma īpsa_íti /
Sentence: 10    tā́n agnís trivŕ̥tā stómena ná_āpnot //

Verse: 2    {BS 2.7.14.47}
Sentence: 1    sá índram abravīt /
Sentence: 2    imā́n ma īpsa_íti {AS īpsatéti} /
Sentence: 3    tā́n índraḥ pañcadaśéna stómena ná_āpnot /
Sentence: 4    sá víśvān devā́n abravīt /
Sentence: 5    imā́n ma īpsata_íti /
Sentence: 6    tā́n víśve devā́ḥ saptadaśéna stómena ná_āpnuvan /
Sentence: 7    sá víṣṇum abravīt /
Sentence: 8    imā́n ma īpsa_íti /
Sentence: 9    tā́n víṣṇur ekavim̐śéna stómena_āpnot /
Sentence: 10    vāravantī́yena_avārayata //

Verse: 3    {BS 2.7.14.48}
Sentence: 1    idáṃ víṣṇur vícakrama íti vyàkramata //
Sentence: 2    yásmāt paśávaḥ prá prá_iva bʰrám̐śeran /
Sentence: 3    sá eténa yajeta //
Sentence: 4    yád ā́pnot /
Sentence: 5    tád aptóryā́masya_āptoryāmatvám /
Sentence: 6    eténa vái devā́ jáitvāni jitvā́ /
Sentence: 7    yáṃ kā́mam ákāmayanta tám āpnuvan /
Sentence: 8    yáṃ kā́maṃ kāmáyate /
Sentence: 9    tám eténa_āpnoti //

Paragraph: 15 
Verse: 1    {BS 2.7.15.49}
Sentence: 1    vyāgʰrò 'yám agnáu carati práviṣṭaḥ /
Sentence: 2    ŕ̥ṣīṇāṃ putró abʰiśastipā́ ayám /
Sentence: 3    namaskāréṇa /
Sentence: 4    námasā te juhomi /
Sentence: 5    mā́ devā́nāṃ mitʰuyā́ karma {?} bʰāgám //
Sentence: 6    sā́vīrhí deva prasavā́ya pitre /
Sentence: 7    varṣmā́ṇam asmai varimā́ṇam asmai /
Sentence: 8    átʰa_asmábʰyam̐ savitaḥ sarvátātā /
Sentence: 9    divé díva ā́suvā bʰū́ripaśváḥ //
Sentence: 10    bʰūtó bʰutéṣu carati práviṣṭaḥ /
Sentence: 11    sá bʰūtā́nām ádʰipatir babʰūva //

Verse: 2    {BS 2.7.15.50}
Sentence: 1    tásya mr̥tyáu carati rājasū́yam /
Sentence: 2    sá rā́jā rājyám anumanyatām idám //
Sentence: 3    yébʰiś śílpaiḥ papratʰānā́m ádr̥m̐hat /
Sentence: 4    yébʰir dyā́m abʰyápim̐śat prajā́patiḥ /
Sentence: 5    yébʰir vā́caṃ viśvárūpām̐ samávyayat /
Sentence: 6    téna_imám agna ihá várcasā sámaṅgdʰi //
Sentence: 7    yébʰir ādityás tápati práketúbʰiḥ /
Sentence: 8    yébʰiḥ sū́ryo dadr̥śé citrábʰānuḥ /
Sentence: 9    yébʰir vā́caṃ puṣkalébʰir ávyayat /
Sentence: 10    téna_imám agna ihá várcasā sámaṅgdʰi //

Verse: 3    {BS 2.7.15.51}
Sentence: 1    ā́_ayáṃ bʰātu śávasā páñca kr̥ṣṭī́ḥ /
Sentence: 2    índra iva jyeṣṭhó bʰavatu prajā́vān /
Sentence: 3    asmā́ astu puṣkaláṃ citrábʰānu /
Sentence: 4    ā́_ayáṃ pr̥ṇaktu rájasī upástʰam //
Sentence: 5    yát te śílpaṃ kaśyapa rocanā́vat /
Sentence: 6    indriyā́vat puṣkaláṃ citrábʰānu /
Sentence: 7    yásmint sū́ryā árpitāḥ saptá sākám /
Sentence: 8    tásmin rā́jānam ádʰivíśraya_imám //
Sentence: 9    dyáur asi pr̥tʰivy àsi //
Sentence: 10    vyāgʰró váiyāgʰré 'dʰi //

Verse: 4    {BS 2.7.15.52}
Sentence: 1    víśrayasva díśo mahī́ḥ /
Sentence: 2    víśas tvā sárvā vāñcʰantu /
Sentence: 3    mā́ tvád rāṣṭrám ádʰibʰraśat //
Sentence: 4    yā́ divyā́ ā́paḥ páyasā saṃbabʰūvúḥ /
Sentence: 5    yā́ antárikṣa utá pā́rtʰivīr yā́ḥ /
Sentence: 6    tā́sāṃ tvā sárvāsām̐ rucā́ /
Sentence: 7    abʰíṣiñcāmi várcasā /
Sentence: 8    abʰí tvā várcasā sicaṃ divyéna /
Sentence: 9    páyasā sahá /
Sentence: 10    yátʰā_āsā rāṣṭravárdʰanaḥ //

Verse: 5    {BS 2.7.15.53}
Sentence: 1    tátʰā tvā savitā́ karat /
Sentence: 2    índraṃ víśvā avīvr̥dʰan /
Sentence: 3    samudrávyacasaṃ gíraḥ /
Sentence: 4    ratʰī́tamam̐ ratʰīnā́m /
Sentence: 5    vā́jānām̐ sátpatiṃ pátim /
Sentence: 6    vásavas tvā purástād abʰíṣiñcantu gāyatréṇa cʰándasā /
Sentence: 7    rudrā́s tvā dakṣiṇatò 'bʰíṣiñcantu tráiṣṭubʰena cʰándasā /
Sentence: 8    ādityā́s tvā paścā́d abʰíṣiñcantu jā́gatena cʰándasā /
Sentence: 9    víśve tvā devā́ uttaratò 'bʰíṣiñcantv ā́nuṣṭubʰena cʰándasā /
Sentence: 10    bŕ̥haspátis tvā_upáriṣṭād abʰíṣiñcatu pā́ṅktena cʰándasā //

Verse: 6    {BS 2.7.15.54}
Sentence: 1    aruṇáṃ tvā vŕ̥kam ugráṃ kʰajaṃkarám /
Sentence: 2    rócamānaṃ marútām ágre arcíṣaḥ /
Sentence: 3    sū́ryavantaṃ magʰávānaṃ viṣāsahím /
Sentence: 4    índram uktʰyéṣu nāmahū́tamam̐ huvema //
Sentence: 5    prá bāhávā sisr̥taṃ jīváse naḥ /
Sentence: 6    ā́ no gávyūtim ukṣataṃ gʰr̥téna /
Sentence: 7    ā́ no jáne śravayataṃ yuvānā /
Sentence: 8    śrutáṃ me mitrāvaruṇā havemā́ //
Sentence: 9    índrasya te vīryakŕ̥taḥ /
Sentence: 10    bāhū́ upā́vaharāmi //

Paragraph: 16 
Verse: 1    {BS 2.7.16.55}
Sentence: 1    abʰí préhi vīráyasva /
Sentence: 2    ugráś céttā sapatnahā́ //
Sentence: 3    ā́tiṣṭha vr̥trahántamaḥ /
Sentence: 4    túbʰyaṃ devā́ ádʰibruvan /
Sentence: 5    aṅkáu nyaṅkā́v abʰíto rátʰaṃ yáu /
Sentence: 6    dʰvāntáṃ vātāgrám ánusaṃcárantau /
Sentence: 7    dūréhetir indriyā́vān patatrī́ /
Sentence: 8    té no 'gnáyaḥ páprayaḥ pārayantu //
Sentence: 9    námas ta r̥ṣe gada /
Sentence: 10    ávyatʰāyai {AS ávyadʰāyai} tvā svadʰā́yai tvā //

Verse: 2    {BS 2.7.16.56}
Sentence: 1    mā́ na indra_abʰítas tvád r̥ṣva_áriṣṭāsaḥ /
Sentence: 2    evā́ brahman táva_íd astu //
Sentence: 3    tíṣṭhā rátʰe ádʰi yád vájrahastaḥ //
Sentence: 4    ā́ raśmī́n deva yuvase sváśvaḥ //
Sentence: 5    ā́tiṣṭha vr̥trahann ātíṣṭhantaṃ pári /
Sentence: 6    ánu tvā_índro madatv ánu tvā mitrā́váruṇau //
Sentence: 7    dyáuś ca tvā pr̥tʰivī́ ca prácetasā /
Sentence: 8    śukró br̥hád dákṣiṇā tvā pipartu /
Sentence: 9    ánu svadʰā́ cikítām̐ sómo agníḥ /
Sentence: 10    ánu tvā_avatu savitā́ savéna //

Verse: 3    {BS 2.7.16.57}
Sentence: 1    índraṃ víśvā avīvr̥dʰan /
Sentence: 2    samudrávyācasaṃ gíraḥ /
Sentence: 3    ratʰī́tamam̐ {AS ratʰī́tatam̐} ratʰīnā́m /
Sentence: 4    vā́jānām̐ sátpatiṃ pátim //
Sentence: 5    pári mā senyā́ gʰóṣāḥ /
Sentence: 6    jyā́nāṃ vr̥ñjantu gr̥dʰnávaḥ {AS gr̥vadʰnaḥ?} metʰiṣṭhā́ḥ pínvamānā ihá /
Sentence: 7    mā́ṃ gópatim abʰísáṃviśantu //
Sentence: 8    tán mé 'numatir ánumanyatām /
Sentence: 9    tán mātā́ pr̥tʰivī́ tát pitā́ dyáuḥ //

Verse: 4    {BS 2.7.16.58}
Sentence: 1    tád grā́vāṇaḥ somasúto mayobʰúvaḥ /
Sentence: 2    tád aśvinā śr̥ṇutam̐ saubʰagā yuvám //
Sentence: 3    ávate héḍa úd uttamám //
Sentence: 4    enā́ vyāgʰráṃ pariṣasvajānā́ḥ /
Sentence: 5    sim̐hám̐ hinvanti {AS hinvati} mahaté sáubʰagāya /
Sentence: 6    samudráṃ ná suhávaṃ tastʰivā́m̐sam /
Sentence: 7    marmr̥jyánte dvīpínam apsv àntáḥ //
Sentence: 8    úd asā́v etu sū́ryaḥ /
Sentence: 9    úd idáṃ māmakáṃ vácaḥ /
Sentence: 10    údihi deva sūrya /
Sentence: 11    sahá vagnúnā máma /
Sentence: 12    aháṃ vācó vivā́canam /
Sentence: 13    máyi vā́g astu dʰarṇasíḥ /
Sentence: 14    yántu nadáyo várṣantu parjányāḥ /
Sentence: 15    supippalā́ óṣadʰayo bʰavantu //
Sentence: 16    ánnavatām odanávatām āmíkṣavatām /
Sentence: 17    eṣā́m̐ rā́jā bʰūyāsam //

Paragraph: 17 
Verse: 1    {BS 2.7.17.59}
Sentence: 1    yé keśínaḥ pratʰamā́ḥ sattrám ā́sata /
Sentence: 2    yébʰir ā́bʰr̥taṃ yád idáṃ virócate /
Sentence: 3    tébʰyo juhomi bahudʰā́ gʰr̥téna /
Sentence: 4    rāyás póṣeṇa_imáṃ várcasā sám̐sr̥jātʰa //
Sentence: 5    ná_r̥té bráhmaṇas tápaso vimokáḥ /
Sentence: 6    dvinā́mnī dīkṣā́ vaśínī hy ùgrā́ /
Sentence: 7    prá kéśāḥ suváte kāṇḍíno bʰavanti /
Sentence: 8    téṣāṃ brahma_íd ī́śe vápanasya ná_anyáḥ //
Sentence: 9    ā́roha próṣṭhaṃ víṣahasva śátrūn /
Sentence: 10    ávāsrāg dīkṣā́ vaśínī hy ùgrā́ //

Verse: 2    {BS 2.7.17.60}
Sentence: 1    dehí dákṣiṇāṃ prátirasva_ā́yuḥ /
Sentence: 2    átʰā mucyasva váruṇasya pā́śāt //
Sentence: 3    yéna_ávapat savitā́ kṣuréṇa /
Sentence: 4    sómasya rā́jño váruṇasya vidvā́n /
Sentence: 5    téna brahmāṇo vapata_idám asya_ū́rjā_imám /
Sentence: 6    rayyā́ várcasā sám̐sr̥jātʰa //
Sentence: 7    mā́ te kéśān ánu gād várca etát /
Sentence: 8    tátʰā dʰātā́ karotu te /
Sentence: 9    túbʰyam índro bŕ̥haspátiḥ /
Sentence: 10    savitā́ várca ā́dadʰāt //

Verse: 3    {BS 2.7.17.61}
Sentence: 1    tébʰyo nidʰā́naṃ bahudʰā́ vyáiccʰan /
Sentence: 2    antarā́ dyā́vāpr̥tʰivī́ apáḥ súvaḥ /
Sentence: 3    darbʰastambé vīryàkr̥te nidʰā́ya /
Sentence: 4    páum̐syena_imáṃ várcasā sám̐sr̥jātʰa //
Sentence: 5    bálaṃ te bāhuvóḥ savitā́ dadʰātu /
Sentence: 6    sómas tvā_anaktu páyasā gʰr̥téna /
Sentence: 7    strīṣú rūpám aśvinā_etán nídʰattam /
Sentence: 8    páum̐syena_imáṃ {BS póṃsyenemáṃ} várcasā sám̐sr̥jātʰa //
Sentence: 9    yát sīmántaṃ káṅkatas te lilékʰa /
Sentence: 10    yád vā kṣuráḥ parivavárja vápam̐s te /
Sentence: 11    strīṣú rūpám aśvínā_etán nídʰattam /
Sentence: 12    páum̐syena_imám̐ sám̐sr̥jātʰo vīryèṇa //

Paragraph: 18 
Verse: 1    {BS 2.7.18.62}
Sentence: 1    índraṃ vái svā́ víśo marúto ná_apācāyan /
Sentence: 2    só 'napacāyyamāna etáṃ vigʰanám apaśyat /
Sentence: 3    tám āharat /
Sentence: 4    téna_ayajata /
Sentence: 5    téna_evá_āsāṃ tám̐ sám̐stambʰáṃ vyàhan /
Sentence: 6    yád vyáhan /
Sentence: 7    tád vigʰanásya vigʰanatvám //
Sentence: 8    ví pāpmā́naṃ bʰrā́tr̥vyam̐ hate /
Sentence: 9    yá eténa yájate /
Sentence: 10    yá u cainam eváṃ véda //

Verse: 2    {BS 2.7.18.63}
Sentence: 1    yám̐ rā́jānaṃ víśo ná_apacā́yeyuḥ /
Sentence: 2    yó vā brāhmaṇás támasā pāpmánā prā́vr̥taḥ syā́t /
Sentence: 3    sá eténa yajeta /
Sentence: 4    vigʰanéna_eváinad vihátya /
Sentence: 5    viśā́m ā́dʰipatyaṃ gaccʰati //
Sentence: 6    tásya dvé dvādaśe stotré bʰávataḥ /
Sentence: 7    dvé caturvim̐śé /
Sentence: 8    áudbʰidyam evá tát /
Sentence: 9    etád vái kṣatrásya_áudbʰidyam /
Sentence: 10    yád asmai svā́ víśo balím̐ háranti //

Verse: 3    {BS 2.7.18.64}
Sentence: 1    háranty asmai víśo balím /
Sentence: 2    ā́_énam ápratikʰyātaṃ gaccʰati /
Sentence: 3    yá eváṃ véda //
Sentence: 4    prabā́hug vā́ ágre kṣatrā́ṇy ā́tepuḥ /
Sentence: 5    téṣām índraḥ kṣatrā́ṇy ā́datta /
Sentence: 6    ná vā́ imā́ni kṣatrā́ṇy abʰūvann íti /
Sentence: 7    tán nákṣatrāṇāṃ nakṣatratvám /
Sentence: 8    ā́ śréyaso bʰrā́tr̥vyasya téja indriyáṃ datte /
Sentence: 9    yá eténa yájate /
Sentence: 10    yá u cainam eváṃ véda //

Verse: 4    {BS 2.7.18.65}
Sentence: 1    tád yátʰā ha vái sacākríṇau káplakāv upā́vahitau syā́tām /
Sentence: 2    evám etáu yugmántau stómau /
Sentence: 3    ayúkṣu stómeṣu kriyete /
Sentence: 4    pāpmánó 'pahatyai //
Sentence: 5    ápa pāpmā́naṃ bʰrā́tr̥vyam̐ hate /
Sentence: 6    yá eténa yájate /
Sentence: 7    yá u cainam eváṃ véda //
Sentence: 8    tád yátʰā ha vái sūtagrāmaṇyàḥ /
Sentence: 9    eváṃ cʰándām̐si /
Sentence: 10    téṣv asā́v ādityó br̥hatī́r abʰyū̀ḍhaḥ {AS abʰyū̀ḍaḥ} //

Verse: 5    {BS 2.7.18.66}
Sentence: 1    satóbr̥hatīṣu stuvate sató br̥han /
Sentence: 2    prajáyā paśúbʰir asāni_íty evá //
Sentence: 3    vyátiṣaktābʰiḥ stuvate /
Sentence: 4    vyátiṣaktaṃ vái kṣatráṃ viśā́ /
Sentence: 5    viśā́_eváinaṃ kṣatréṇa vyátiṣajati //
Sentence: 6    vyátiṣaktābʰiḥ stuvate /
Sentence: 7    vyátiṣakto vái grāmaṇīḥ sajātáiḥ /
Sentence: 8    sajātáir eváinaṃ vyátiṣajati //
Sentence: 9    vyátiṣaktābʰiḥ stuvate /
Sentence: 10    vyátiṣakto vái púruṣaḥ pāpmábʰiḥ /
Sentence: 11    vyátiṣaktābʰir evā́sya pāpmáno nudate //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.