TITUS
Black Yajur-Veda: Taittiriya-Brahmana
Part No. 16
Previous part

Chapter: 8 
Paragraph: 1 
Verse: 1    {BS 2.8.1.1}
Sentence: 1  {a}   pī́vonnām̐ {Dumont pī́voannām̐} rayivŕ̥dʰaḥ sumedʰā́ḥ /
Sentence: 2    śvetáḥ siṣakti niyútām abʰiśrī́ḥ /
Sentence: 3    té vāyáve sámanaso vítastʰuḥ /
Sentence: 4    víśvā_ít_ náraḥ svapatyā́ni cakruḥ /
Sentence: 5  {b}   rāyé 'nú yáṃ jajñátū ródasī ubʰé /
Sentence: 6    rāyé devī́ dʰiṣáṇā dʰāti devám /
Sentence: 7    ádʰā vāyúṃ niyútaḥ saścata svā́ḥ /
Sentence: 8    utá śvetáṃ vásudʰitiṃ nireké /
Sentence: 9  {c}   ā́ vāyo, {d} prá yā́bʰiḥ /
Sentence: 10  {d}   prá vāyúm áccʰā br̥hatī́ manīṣā́ //

Verse: 2    {BS 2.8.1.2}
Sentence: 1    br̥hádrayiṃ viśvávārām̐ {Dumont viśvávāram̐} ratʰaprā́m /
Sentence: 2    dyutádyāmā niyútaḥ pátyamānaḥ /
Sentence: 3    kavíḥ kavím iyakṣasi prayajyo /
Sentence: 4  {f}   ā́ no niyúdbʰiḥ śatínībʰir adʰvarám /
Sentence: 5    sahasríṇībʰir úpa yāhi yajñám /
Sentence: 6    vā́yo asmín havíṣi mādayasva /
Sentence: 7    yūyáṃ pāta svastíbʰiḥ sádā naḥ /
Sentence: 8  {g}   prájāpate ná tvád etā́ny anyáḥ /
Sentence: 9    víśvā jātā́ni pári tā́ babʰūva /
Sentence: 10    yátkāmās te juhumás tán no astu //

Verse: 3    {BS 2.8.1.3}
Sentence: 1    vayám̐ syāma pátayo rayīṇā́m /
Sentence: 2  {h}   rayīṇā́ṃ pátiṃ yajatáṃ br̥hántam /
Sentence: 3    asmín bʰáre nŕ̥tamaṃ vā́jasātau /
Sentence: 4    prajā́patiṃ pratʰamajā́m r̥tásya /
Sentence: 5    yájāma devám ádʰi no bravītu /
Sentence: 6  {i}   prájāpate tváṃ nidʰipā́ḥ purāṇáḥ /
Sentence: 7    devā́nāṃ pitā́ janitā́ prajā́nām /
Sentence: 8    pátir víśvasya jágataḥ paraspā́ḥ /
Sentence: 9    havír no deva vihavé juṣasva /
Sentence: 10  {j}   táva_imé lokā́ḥ pradíśo díśaś ca //

Verse: 4    {BS 2.8.1.4}
Sentence: 1    parāváto niváta udvátaś ca /
Sentence: 2    prájāpate viśvasŕ̥j jīvádʰanya idáṃ no deva /
Sentence: 3    prátiharya havyám /
Sentence: 4  {k}   prajā́patiṃ pratʰamáṃ yajñíyānām /
Sentence: 5    devā́nām ágre yajatáṃ yajadʰvam /
Sentence: 6    sá no dadātu dráviṇam̐ {AS draviṇám̐} suvī́ryam /
Sentence: 7    rāyás póṣaṃ víṣyatu nā́bʰim asme /
Sentence: 8  {l}   yó rāyá ī́śe śatadāyá uktʰyàḥ /
Sentence: 9    yáḥ paśūnā́m̐ rakṣitā́ víṣṭhitānām /
Sentence: 10    prajā́patiḥ pratʰamajā́ r̥tásya //

Verse: 5    {BS 2.8.1.5}
Sentence: 1    sahásradʰāmā juṣatām̐ havír naḥ /
Sentence: 2  {m}   sómāpūṣaṇā_ {n} imáu deváu /
Sentence: 3  {o}   sómāpūṣaṇā rájaso vimā́nam /
Sentence: 4    saptácakram̐ rátʰam áviśvaminvam /
Sentence: 5    viṣūvŕ̥taṃ mánasā yujyámānam /
Sentence: 6    táṃ jinvatʰo vr̥ṣaṇā páñcaraśmim /
Sentence: 7  {p}   divy ànyáḥ sádanaṃ cakrá uccā́ /
Sentence: 8    pr̥tʰivyā́m anyó ádʰy antárikṣe /
Sentence: 9    tā́v asmábʰyaṃ puruvā́raṃ purukṣúm /
Sentence: 10    rāyás póṣaṃ víṣyatāṃ nā́bʰim asmé //

Verse: 6    {BS 2.8.1.6}
Sentence: 1    dʰíyaṃ pūṣā́ jinvatu viśvaminváḥ /
Sentence: 2    rayím̐ sómo rayipátir dadʰātu /
Sentence: 3    ávatu devy áditir anarvā́ /
Sentence: 4    br̥hád vadema vidátʰe suvī́rāḥ /
Sentence: 5  {r}   víśvāny anyó bʰúvanā jajā́na /
Sentence: 6    víśvam anyó abʰicákṣāṇa eti /
Sentence: 7    sómāpūṣaṇāv ávataṃ dʰíyaṃ me /
Sentence: 8    yuvábʰyāṃ víśvāḥ pŕ̥tanā jayema /
Sentence: 9  {s}   úd uttamáṃ varuṇa_ {t} ástabʰnād dyā́m {so TS.1.8.2.2; BS,AS: yā́m} /
Sentence: 10  {u}   yát kíṃ ca_idáṃ {v} kitavā́saḥ /
Sentence: 11  {w}   áva te héḍas {x} tát tvā yāmi /
Sentence: 12  {y}   ādityā́nām ávasā {z} ná dakṣiṇā́ /
Sentence: 13  {aa}   dʰāráyanta ādityā́sas {bb} tisró bʰū́mīr dʰārayan /
Sentence: 14  {cc}   yajñó devā́nām̐ {dd} śúcir apáḥ //

Paragraph: 2 
Verse: 1    {BS 2.8.2.7}
Sentence: 1  {a}   té śukrā́saḥ śúcayo raśmivántaḥ /
Sentence: 2    sī́dann ādityā́ ádʰi barhíṣi priyé /
Sentence: 3    kā́mena devā́ḥ sarátʰaṃ divó naḥ /
Sentence: 4    ā́yāntu yajñám úpa no juṣāṇā́ḥ /
Sentence: 5  {b}   té sūnávo áditeḥ pīvasā́m íṣam /
Sentence: 6    gʰr̥táṃ pínvat prátiharyann r̥tejā́ḥ /
Sentence: 7    prá yajñíyā yájamānāya yemure /
Sentence: 8    ādityā́ḥ kā́maṃ pitumántam asme /
Sentence: 9  {c}   ā́ naḥ putrā́ aditer yāntu yajñám /
Sentence: 10    ādityā́saḥ patʰíbʰir devayā́naiḥ //

Verse: 2    {BS 2.8.2.8}
Sentence: 1    asmé kā́maṃ dāśúṣe sannámantaḥ /
Sentence: 2    puroḍā́śaṃ gʰr̥távantaṃ juṣantām /
Sentence: 3  {d}   skabʰāyáta nírr̥tim̐ sédʰata_ā́matim /
Sentence: 4    prá raśmíbʰir yátamānā amr̥dʰrāḥ /
Sentence: 5    ā́dityāḥ kā́ma práyatāṃ váṣaṭkr̥tim /
Sentence: 6    juṣádʰvaṃ no havyádātiṃ yajatrāḥ /
Sentence: 7  {e}   ādityā́n kā́mam ávase huvema /
Sentence: 8    yé bʰūtā́ni janáyanto vicikʰyuḥ /
Sentence: 9    sī́dantu putrā́ áditer upástʰam /
Sentence: 10    stīrṇáṃ barhír havirádyāya devā́ḥ //

Verse: 3    {BS 2.8.2.9}
Sentence: 1  {f}   stīrṇáṃ barhíḥ sīdatā yajñé asmín /
Sentence: 2    dʰrājā́ḥ sédʰanto ámatiṃ durévām /
Sentence: 3    asmábʰyaṃ putrā aditeḥ práyam̐sata /
Sentence: 4    ā́dityāḥ kā́ma havíṣo juṣāṇā́ḥ /
Sentence: 5  {g}   ágne náya supátʰā rāyé asmā́n /
Sentence: 6    víśvāni deva vayúnāni vidvā́n /
Sentence: 7    yuyodʰy àsmaj juhurāṇám énaḥ /
Sentence: 8    bʰū́yiṣṭhāṃ te námauktiṃ vidʰema /
Sentence: 9  {h}   prá vaḥ śukrā́ya bʰānáve bʰaradʰvam /
Sentence: 10    havyáṃ matíṃ ca_agnáye súpūtam //

Verse: 4    {BS 2.8.2.10}
Sentence: 1    yó dáivyāni mā́nuṣā janū́m̐ṣi /
Sentence: 2    antár víśvāni vidmánā jígāti /
Sentence: 3  {i}   áccʰā gíro matáyo devayántīḥ /
Sentence: 4    agníṃ yanti dráviṇaṃ bʰíkṣamāṇāḥ /
Sentence: 5    susaṃdŕ̥śam̐ suprátīkam̐ sváñcam /
Sentence: 6    havyavā́ham aratíṃ mā́nuṣāṇām /
Sentence: 7  {j}   ágne tvám asmád yuyodʰy ámīvāḥ /
Sentence: 8    ánagnitrā abʰyàmanta kr̥ṣṭī́ḥ /
Sentence: 9    púnar asmábʰyam̐ suvitā́ya deva /
Sentence: 10    kṣā́ṃ víśvebʰir ajárebʰir yajatra //

Verse: 5    {BS 2.8.2.11}
Sentence: 1  {k}   ágne tváṃ pā́rayā návyo asmā́n /
Sentence: 2    svastíbʰir áti durgā́ṇi víśvā /
Sentence: 3    pū́ś ca pr̥tʰvī́ bahulā́ na urvī́ /
Sentence: 4    bʰávā tokā́ya tánayāya śáṃ yóḥ /
Sentence: 5  {l}   prá kāravo mananā́ vacyámānāḥ /
Sentence: 6    devadrī́cīṃ nayatʰa devayántaḥ /
Sentence: 7    dakṣiṇāvā́ḍ vājínī prā́cy eti /
Sentence: 8    havír bʰaranty agnáye gʰr̥tā́cī /
Sentence: 9  {m}   índraṃ náro, {n} yujé rátʰam, /
Sentence: 10  {o}   jagr̥bʰṇā́ {Dumont jagr̥bʰmā́} te dakṣiṇām indra hástam //

Verse: 6    {BS 2.8.2.12}
Sentence: 1    vasūyávo vasupate vásūnām /
Sentence: 2    vidmā́ hí tvā gópatim̐ śūra gónām /
Sentence: 3    asmábʰyaṃ citráṃ vŕ̥ṣaṇam̐ rayíṃ dāḥ /
Sentence: 4  {p}   táva_idáṃ víśvam abʰítaḥ paśavyàm /
Sentence: 5    yát páśyasi cákṣasā sū́ryasya /
Sentence: 6    gávām asi gópatir éka indra /
Sentence: 7    bʰakṣīmáhi te práyatasya vásvaḥ /
Sentence: 8  {q}   sám indra ṇo mánasā neṣi góbʰiḥ /
Sentence: 9    sám̐ sūríbʰir magʰavant sám̐ svastyā́ /
Sentence: 10    sáṃ bráhmaṇā devákr̥taṃ yád ásti //

Verse: 7    {BS 2.8.2.13}
Sentence: 1    sáṃ devā́nām̐ sumatyā́ yajñíyānām /
Sentence: 2  {r}   ārāt_śátrum ápa bādʰasva dūrám /
Sentence: 3    ugró yáḥ śambaḥ puruhūta téna /
Sentence: 4    asmé dʰehi yávamad gómad indra /
Sentence: 5    kr̥dʰī́ dʰíyaṃ jaritré vā́jaratnām /
Sentence: 6  {s}   ā́ vedʰásam̐, {t} sá hí śúciḥ, /
Sentence: 7  {u}   bŕ̥haspátiḥ pratʰamáṃ jā́yamānaḥ /
Sentence: 8    mahó jyótiṣaḥ paramé vyòman /
Sentence: 9    saptā́syas tuvijātó ráveṇa /
Sentence: 10    ví saptáraśmir adʰamat támām̐si //

Verse: 8    {BS 2.8.2.14}
Sentence: 1  {v}   bŕ̥haspátiḥ sámajayad vásūni /
Sentence: 2    mahó vrajā́n gómato devá eṣáḥ /
Sentence: 3    apáḥ síṣāsant súvar ápratīttaḥ /
Sentence: 4    bŕ̥haspátir hánty amítram arkáiḥ /
Sentence: 5  {w}   bŕ̥haspate páry, {x} evā́ pitré, /
Sentence: 6  {y}   ā́ no diváḥ, {z} pā́vīravī, /
Sentence: 7_(aa}    imā́ júhvānā, {bb} yás te stánaḥ, /
Sentence: 8_(cc}    sárasvaty abʰí no neṣi, /
Sentence: 9_(dd}    iyám̐ śúṣmebʰir bisakʰā́ iva_arujat /
Sentence: 10    sā́nu girīṇā́ṃ taviṣébʰir ūrmíbʰiḥ /
Sentence: 11    pārāvadagʰnī́m {Dumont pārāvatagʰī́m} ávase suvr̥ktíbʰiḥ /
Sentence: 12    sárasvatīm ā́vivāsema dʰītíbʰiḥ //

Paragraph: 3 
Verse: 1    {BS 2.8.3.15}
Sentence: 1  {a}   sómo dʰenúm̐ sómo árvantam āśúm /
Sentence: 2    sómo vīráṃ karmaṇyàṃ dadātu /
Sentence: 3    sādanyàṃ vidatʰyàm̐ sabʰéyam /
Sentence: 4    pituḥśrávaṇaṃ yó dádāśad asmai /
Sentence: 5  {b}   áṣāḍhaṃ yutsú, {c} tvám̐ soma krátubʰiḥ, /
Sentence: 6  {d}   yā́ te dʰā́māni havíṣā yájanti, /
Sentence: 7  {e}   tvám imā́ óṣadʰīḥ soma víśvāḥ /
Sentence: 8    tvám apó ajanayas tváṃ gā́ḥ /
Sentence: 9    tvámā́tatantʰa_urv àntárikṣam /
Sentence: 10    tváṃ jyótiṣā ví támo vavartʰa //

Verse: 2    {BS 2.8.3.16}
Sentence: 1  {f}   yā́ te dʰā́māni diví yā́ pr̥tʰivyā́m /
Sentence: 2    yā́ párvateṣv óṣadʰīṣv apsú /
Sentence: 3    tébʰir no víśvaiḥ sumánā áheḍan /
Sentence: 4    rā́jant soma práti havyā́ gr̥bʰāya /
Sentence: 5  {g}   víṣṇor nú kaṃ, {h} tád asya priyám, /
Sentence: 6  {i}   prá tád víṇuḥ, /
Sentence: 7  {j}   paró mā́trayā tanúvā vr̥dʰāna /
Sentence: 8    ná te mahitvám ánvaśnuvanti /
Sentence: 9    ubʰé te vidma rájasī pr̥tʰivyā́ víṣṇo deva tvám /
Sentence: 10    paramásya vitse //

Verse: 3    {BS 2.8.3.17}
Sentence: 1  {k}   vícakrame, {l} trír deváḥ, /
Sentence: 2  {m}   ā́ te mahó, {n} yó jātá evá. /
Sentence: 3  {o}   abʰí gotrā́ṇi. /
Sentence: 4  {p}   ā́bʰiḥ spŕ̥dʰo mitʰatī́r áriṣaṇyan /
Sentence: 5    amítrasya vyatʰayā manyúm indra ā́bʰir víśvā abʰiyújo víṣūcīḥ /
Sentence: 6    ā́ryāya víśo 'vatarīr dā́sīḥ /
Sentence: 7  {q}   ayám̐ śr̥ṇve ádʰa jáyann uta gʰnán /
Sentence: 8    ayám utá prákr̥ṇute yudʰā́ gā́ḥ /
Sentence: 9    yadā́ satyáṃ kr̥ṇuté manyúm índraḥ //

Verse: 4    {BS 2.8.3.18}
Sentence: 1    víśvaṃ dr̥ḍháṃ bʰayata éjad asmāt /
Sentence: 2  {r}   ánu svadʰā́m akṣarann ā́po asya /
Sentence: 3    ávardʰata mádʰya ā́ nāvyā̀nām /
Sentence: 4    sadʰrīcī́nena mánasā tám indra ójiṣṭhena /
Sentence: 5    hánmanā_ahann abʰí dyū́n /
Sentence: 6  {s}   marútvantaṃ vr̥ṣabʰáṃ vāvr̥dʰānám /
Sentence: 7    ákavāriṃ divyám̐ śāsám índram /
Sentence: 8    viśvāsā́ham áváse nū́tanāya /
Sentence: 9    ugrám̐ sahodā́m ihá tám̐ huvema /
Sentence: 10  {t}   jániṣṭhā ugráḥ sáhase turā́ya //

Verse: 5    {BS 2.8.3.19}
Sentence: 1    mandrá ójiṣṭho bahulā́bʰimānaḥ /
Sentence: 2    ávardʰann índraṃ marútaś cid átra /
Sentence: 3    mātā́ yád vīráṃ dadʰánad dʰániṣṭhā /
Sentence: 4  {u}   kvà syā vo marutaḥ svadʰā́_āsīt /
Sentence: 5    yán mā́m ékam̐ samádʰattā_ahihátye /
Sentence: 6    ahám̐ hy ùgrás taviṣás túviṣmān /
Sentence: 7    víśvasya śátror ánamaṃ vadʰasnáiḥ /
Sentence: 8  {v}   vr̥trásya tvā śvasátʰād ī́ṣamāṇāḥ /
Sentence: 9    víśve devā́ ajahur yé sákʰāyaḥ /
Sentence: 10    marúdbʰir indra sakʰyáṃ te astu //

Verse: 6    {BS 2.8.3.20}
Sentence: 1    átʰa_imā́ víśvāḥ pŕ̥tanā jayāsi /
Sentence: 2  {w}   vádʰīṃ {BS várdʰīṃ ?} vr̥tráṃ maruta indriyéṇa /
Sentence: 3    svéna bʰā́mena taviṣó babʰūvā́n /
Sentence: 4    ahám etā́ mánave viśváścandrāḥ /
Sentence: 5    sugā́ apáś cakara vájrabāhuḥ /
Sentence: 6  {x}   sá yó vŕ̥ṣā vŕ̥ṣṇiyebʰiḥ sámokāḥ /
Sentence: 7    mahó diváḥ pr̥tʰivyā́ś ca samrā́ṭ /
Sentence: 8    satīnásattvā {Dumont satīnásatvā} hávyo bʰáreṣu /
Sentence: 9    marútvān no bʰavatv índra ūtī́ /
Sentence: 10  {y}   índro vr̥trám atarad vr̥tratū́rye //

Verse: 7    {BS 2.8.3.21}
Sentence: 1    anādʰr̥ṣyó magʰávā śū́ra índraḥ /
Sentence: 2    ánv enaṃ víśo amadanta pūrvíḥ /
Sentence: 3    ayám̐ rā́jā jágataś carṣaṇīnā́m /
Sentence: 4  {z}   sá evá vīráḥ sá u vīryā̀vān /
Sentence: 5    sá ekarājó jágataḥ paraspā́ḥ /
Sentence: 6    yadā́ vr̥trám átarat_śū́ra índraḥ /
Sentence: 7    átʰa_abʰavad damitā́_abʰíkratūnām /
Sentence: 8_(aa}    índro yajñáṃ vardʰáyan viśvávedāḥ /
Sentence: 9    puroḍā́śasya juṣatām̐ havír naḥ /
Sentence: 10    vr̥tráṃ tīrtvā́ dānaváṃ vájrabāhuḥ //

Verse: 8    {BS 2.8.3.22}
Sentence: 1    díśo 'dr̥m̐had dr̥m̐hitā́ dŕ̥m̐haṇena /
Sentence: 2_(bb}    imáṃ yajñáṃ vardʰáyan viśvávedāḥ /
Sentence: 3    puroḍā́śaṃ prátigr̥bʰṇātv índraḥ /
Sentence: 4    yadā́ vr̥trám átart_śū́ra índraḥ /
Sentence: 5    átʰa_ekarājó abʰavaj jánānām /
Sentence: 6_(cc}    índro devā́n_śambarahátya āvat /
Sentence: 7    índro devā́nām abʰavat purogā́ḥ /
Sentence: 8    índro yajñé havíṣā vāvr̥dʰānáḥ /
Sentence: 9    vr̥tratū́r ṇo ábʰayam̐ śárma yam̐sat /
Sentence: 10{dd } yáḥ saptá síndʰūm̐r ádadʰāt pr̥tʰivyā́m /
Sentence: 11    yáḥ saptá lokā́n ákr̥ṇod díśaś ca /
Sentence: 12    índro havíṣmānt ságaṇo marúdbʰiḥ /
Sentence: 13    vr̥tratū́r ṇo yajñám ihá_upayāsat //

Paragraph: 4 
Verse: 1    {BS 2.8.4.23}
Sentence: 1  {a}   índras tárasvān abʰimātihā́_ugráḥ /
Sentence: 2    híraṇyavāśīr iṣiráḥ suvarṣā́ḥ /tásya vayám̐ sumatáu yajñíyasya /
Sentence: 3    ápi bʰadré saumanasé syāma /
Sentence: 4  {b}   híraṇyavarṇo ábʰayaṃ kr̥ṇotu /
Sentence: 5    abʰimātihā́_índraḥ pŕ̥tanāsu jiṣṇúḥ /
Sentence: 6    sá naḥ śárma trivárūtʰaṃ víyam̐sat /
Sentence: 7    yūyáṃ pāta svastíbʰiḥ sádā naḥ /
Sentence: 8  {c}   índram̐ stuhi vajríṇam̐ stómapr̥ṣṭham {Dumont sómapr̥ṣṭham} /
Sentence: 9    puroḍā́śasya juṣatām̐ havír naḥ //

Verse: 2    {BS 2.8.4.24}
Sentence: 1    hatvā́_abʰímātīḥ pŕ̥tanāḥ sáhasvān /
Sentence: 2    átʰa_ábʰayaṃ kr̥ṇuhi {BS átʰā́bʰáyáṃ kŕ̥ṇúhí} viśváto naḥ /
Sentence: 3  {d}   stuhí śū́raṃ vajríṇam ápratītam /
Sentence: 4    abʰimātihánaṃ puruhūtam índram /
Sentence: 5    yá éka ít_śatápatir jáneṣu /
Sentence: 6    tásmā índrāya havír ā́juhota /
Sentence: 7  {e}   índro devā́nām adʰipā́ḥ puróhitaḥ /
Sentence: 8    diśā́ṃ pátir abʰavad vājínīvān /
Sentence: 9    abʰimātihā́ taviṣás túviṣmān /
Sentence: 10    asmábʰyaṃ citráṃ vŕ̥ṣaṇam̐ rayíṃ dāt //

Verse: 3    {BS 2.8.4.25}
Sentence: 1  {f}   yá imé dyā́vāpr̥tʰivī́ mahitvā́ /
Sentence: 2    bálena_ádr̥m̐had abʰimātihā́_índraḥ /
Sentence: 3    sá no havíḥ prátigr̥bʰṇātu rātáye /
Sentence: 4    devā́nāṃ devó nidʰipā́ no avyāt /
Sentence: 5  {g}   ánavas te rátʰaṃ, {h} vr̥ṣṇe yát te. /
Sentence: 6  {i}   índrasya nú vīryā̀ṇy, {j} ahann áhim, /
Sentence: 7  {k}   índro yātó 'vasitasya rā́jā /
Sentence: 8    śámasya ca śr̥ṅgíṇo vájrabāhuḥ /
Sentence: 9    sa_íd u rā́jā kṣeti carṣaṇīnā́m /
Sentence: 10    arā́n ná nemíḥ pári tā́ babʰūva //

Verse: 4    {BS 2.8.4.26}
Sentence: 1  {l}   abʰí sidʰmó ajigād asya śátrūn /
Sentence: 2    ví tigména vr̥ṣabʰéṇā púro 'bʰet /
Sentence: 3    sáṃ vájreṇa_asr̥jad vr̥trám índraḥ /
Sentence: 4    prá svā́ṃ matím atirat_śā́śadānaḥ /
Sentence: 5  {m}   víṣṇuṃ deváṃ váruṇam ūtáye bʰágam /
Sentence: 6    médasā devā́ vapáyā yajadʰvam /
Sentence: 7    tā́ no yajñám ā́gataṃ viśvádʰenā /
Sentence: 8    prajā́vad asmé dráviṇā_ihá dʰattam /
Sentence: 9  {n}   médasā devā́ vapáyā yajadʰvam /
Sentence: 10    víṣṇuṃ ca deváṃ váruṇaṃ ca rātím //

Verse: 5    {BS 2.8.4.27}
Sentence: 1    tā́ no ámīvā apabā́dʰamānau /
Sentence: 2    imáṃ yajñáṃ juṣámāṇāv úpétam /
Sentence: 3  {o}   víṣṇūvaruṇā yuvám adʰvarā́ya naḥ /
Sentence: 4    viśé jánāya máhi śárma yaccʰatam /
Sentence: 5    dīrgʰáprayajyū havíṣā vr̥dʰānā́ /
Sentence: 6    jyotiṣā́_árātīr dahataṃ támām̐si /
Sentence: 7  {p}   yáyor ójasā skabʰitā́ rájām̐si /
Sentence: 8    vīryèbʰir vīrátamā śáviṣṭhā /
Sentence: 9    yā́ pátyete ápratītā śahobʰiḥ /
Sentence: 10    víṣṇū agán váruṇā pūrváhūtau //

Verse: 6    {BS 2.8.4.28}
Sentence: 1  {q}   víṣṇūvaruṇāv abʰiśastipā́ vām /
Sentence: 2    devā́ yajanta havíṣā gʰr̥téna /
Sentence: 3    ápa_ámīvām̐ sedʰatam̐ rakṣásaś ca /
Sentence: 4    átʰā dʰattaṃ yájamānāya śáṃ yóḥ /
Sentence: 5  {r}   am̐homúcā vr̥ṣabʰā́ suprátūrtī /
Sentence: 6    devā́nāṃ devátamā śáviṣṭhā /
Sentence: 7    víṣṇūvaruṇā prátiharyataṃ naḥ /
Sentence: 8    idáṃ nárā {Dumont narā} práyatam ūtáye havíḥ /
Sentence: 9  {s}   mahī́ nú dyā́vāpr̥tʰivī́ ihá jyéṣṭhe /
Sentence: 10    rucā́ bʰavatām̐ śucáyadbʰir arkáiḥ //

Verse: 7    {BS 2.8.4.29}
Sentence: 1    yát sīṃ váriṣṭhe br̥hatī́ viminván /
Sentence: 2    nr̥vádbʰyó {Dumont ruvád dʰo} 'kṣā́ papratʰānébʰir évaiḥ /
Sentence: 3  {t}   prá pūrvajé pitárā návyasībʰiḥ /
Sentence: 4    gīrbʰíḥ kr̥ṇudʰvam̐ sádane r̥tásya /
Sentence: 5    ā́ no dyāvāpr̥tʰivī dáivyena /
Sentence: 6    jánena yātaṃ máhi vāṃ várūtʰam /
Sentence: 7  {u}   sá ít svápā bʰúvaneṣv āsa /
Sentence: 8    yá imé dyā́vāpr̥tʰivī́ jajā́na /
Sentence: 9    urvī́ gabʰīré rájasī suméke /
Sentence: 10    avam̐śé dʰī́raḥ śácyā sámairat //

Verse: 8    {BS 2.8.4.30}
Sentence: 1  {v}   bʰū́riṃ dvé ácarantī cárantam /
Sentence: 2    padvántaṃ gárbʰam apádī dadʰāte /
Sentence: 3    nítyaṃ ná sūnúṃ pitrór upástʰe /
Sentence: 4    táṃ pipr̥tam̐ rodasī satyavā́cam /
Sentence: 5  {w}   idáṃ dyāvāpr̥tʰivī satyám astu /
Sentence: 6    pítar mā́tar yád ihá_upabruvé vām /
Sentence: 7    bʰūtáṃ devā́nām avamé ávobʰiḥ /
Sentence: 8    vídyā́ma_iṣáṃ vr̥jánaṃ jīrádānum /
Sentence: 9  {x}   urvī́ pr̥tʰvī́ bahulé dūré_ante /
Sentence: 10    úpabruve námasā yajñé asmín /
Sentence: 11    dádʰāte yé subʰáge suprátūrtī /
Sentence: 12    dyā́vā rákṣataṃ pr̥tʰivī́ no ábʰvāt /
Sentence: 13  {y}   yā́ jātā́ óṣadʰayó, {z} 'ti víśvāḥ pariṣṭhā́ḥ, /
Sentence: 14{aa } yā́ óṣadʰayaḥ sómarājñīr, {bb} aśvāvatī́m̐ somavatī́m, /
Sentence: 15{cc } óṣadʰīr íti mātaro, {dd} 'nyā́ vo anyā́m avatu, //

Paragraph: 5 
Verse: 1    {BS 2.8.5.31}
Sentence: 1  {a}   śúciṃ nú stómam̐, {b} śnátʰad vr̥trám, /
Sentence: 2  {c}   ubʰā́ vām indrāgnī, {d} prá carṣaṇíbʰyaḥ, /
Sentence: 3  {c}   ā́ vr̥trahaṇā, {d} gīrbʰír vípraḥ, /
Sentence: 4  {e}   bráhmaṇaspate tvám asyá yantā́ /
Sentence: 5    sūktásya bodʰi tánayaṃ ca jinva /
Sentence: 6    víśvaṃ tád bʰadráṃ yád avánti devā́ḥ /
Sentence: 7    br̥hád vadema vidátʰe suvī́rāḥ /
Sentence: 8  {h}   sá īm̐ satyébʰiḥ sákʰibʰiḥ śucádbʰiḥ /
Sentence: 9    gódʰāyasaṃ ví dʰanasáir atardat /
Sentence: 10    bráhmaṇaspátir vŕ̥ṣabʰir varā́haiḥ //

Verse: 2    {BS 2.8.5.32}
Sentence: 1    gʰarmásvedobʰir dráviṇaṃ vyā̀naṭ /
Sentence: 2  {i}   bráhmaṇaspáter abʰavad yatʰāvaśám /
Sentence: 3    satyó manyúr máhi kármā kariṣyatáḥ /
Sentence: 4    yó gā́ udā́jat sá divé ví ca_abʰajat /
Sentence: 5    mahí_iva rītíḥ śávasā sarat {Dumont śávasā_'sarat} pŕ̥tʰak /
Sentence: 6  {j}   índʰāno agníṃ vanavad vanuṣyatáḥ /
Sentence: 7    kr̥tábrahmā śūśuvad rātáhavya ít /
Sentence: 8    jāténa jātám áti sŕ̥t prásr̥m̐sate {Dumont áti sá prásarsr̥te, probably based upon RV.2.25.1} /
Sentence: 9    yáṃ_yaṃ yújaṃ kr̥ṇuté bráhmaṇaspátiḥ /
Sentence: 10  {k}   bráhmaṇaspate suyámasya viśváhā //

Verse: 3    {BS 2.8.5.33}
Sentence: 1    rāyáḥ syāma ratʰyò vívasvataḥ /
Sentence: 2    vīréṣu vīrā́m̐ úpapr̥ṅgdʰi nas tvám /
Sentence: 3    yád ī́śāno bráhmaṇā véṣi me hávam /
Sentence: 4  {l}   sá íj jánena sá viśā́ sá jánmanā /
Sentence: 5    sá putráir vā́jaṃ bʰarate dʰánā nŕ̥bʰiḥ /
Sentence: 6    devā́nāṃ yáḥ pitáram āvívāsati /
Sentence: 7    śraddʰā́manā havíṣā bráhmaṇaspátim /
Sentence: 8  {m}   yás te pūṣan nā́vo antáḥ, /
Sentence: 9  {n}   śukráṃ te anyát, {o} pūṣā́_imā́ ā́śāḥ, /
Sentence: 10  {p}   prápatʰe patʰā́m ajaniṣṭa pūṣā́ //

Verse: 4    {BS 2.8.5.34}
Sentence: 1    prápatʰe diváḥ prápatʰe pr̥tʰivyā́ḥ /
Sentence: 2    ubʰé abʰí priyátame sadʰástʰe /
Sentence: 3    ā́ ca párā ca carati prajānán /
Sentence: 4  {q}   pūṣā́ subándʰur divá ā́ pr̥tʰivyā́ḥ /
Sentence: 5    iḍas pátir magʰávā dasmávarcāḥ /
Sentence: 6    táṃ devā́so ádaduḥ sūryā́yai /
Sentence: 7    kā́mena kr̥táṃ tavásam̐ sváñcam /
Sentence: 8  {r}   ajā́śvaḥ paśupā́ vā́javastyaḥ /
Sentence: 9    dʰiyaṃjinvó víśve bʰúvane árpitaḥ /
Sentence: 10    áṣṭrāṃ pūṣā́ śitʰirā́m udvárīvr̥jat //

Verse: 5    {BS 2.8.5.35}
Sentence: 1    saṃcákṣāṇo bʰúvanā devá īyate /
Sentence: 2  {s}   śúcī vo havyā́ marutaḥ śúcīnām /
Sentence: 3    śúcim̐ hinomy adʰvarám̐ śúcibʰyaḥ /
Sentence: 4    r̥téna {BS r̥téná} satyám ŕ̥tasā́pa āyan /
Sentence: 5    śúcijanmānaḥ śúcayaḥ pāvakā́ḥ /
Sentence: 6  {t}   prá citrám arkáṃ gr̥ṇate turā́ya /
Sentence: 7    mā́rutāya svátavase bʰaradʰvam /
Sentence: 8    yé sáhām̐si sáhasā sáhante /
Sentence: 9    réjate agne pr̥tʰivī́ makʰébʰyaḥ /
Sentence: 10  {u}   ám̐seṣv ā́ marutaḥ kʰādáyo vaḥ //

Verse: 6    {BS 2.8.5.36}
Sentence: 1    vákṣaḥsu rukmā́ úpaśiśriyāṇā́ḥ /
Sentence: 2    ví vidyúto ná vyr̥ṣṭíbʰī rucānā́ḥ /
Sentence: 3    ánu svadʰā́m ā́yudʰair yát_śamānāḥ /
Sentence: 4  {v}   yā́ vaḥ śárma śaśamānā́ya sánti /
Sentence: 5    tridʰā́tūni dāśúṣe yaccʰata_ádʰi /
Sentence: 6    asmábʰyaṃ tā́ni maruto víyanta /
Sentence: 7    rayíṃ no dʰatta vr̥ṣaṇaḥ suvī́ram /
Sentence: 8  {w}   imé turáṃ marúto rāmayanti /
Sentence: 9    imé saháḥ sáhasa ā́namanti /
Sentence: 10    imé śám̐saṃ vanuṣyató nípānti //

Verse: 7    {BS 2.8.5.37}
Sentence: 1    gurú dvéṣo áraruṣe dadʰanti /
Sentence: 2  {x}   arā́ iva_íd ácaramā áha_iva /
Sentence: 3    prá prajāyante ákavā máhobʰiḥ /
Sentence: 4    pŕ̥śneḥ putrā́ upamā́so rábʰiṣṭhāḥ /
Sentence: 5    sváyā matyā́ marútaḥ sáṃmimikṣuḥ /
Sentence: 6  {y}   ánu te dāyi mahá indriyā́ya /
Sentence: 7    satrā́ te víśvam ánu vr̥trahátye /
Sentence: 8    ánu kṣattrám ánu sáho yajatra /
Sentence: 9    índra devébʰir ánu te nr̥ṣáhye /
Sentence: 10  {z}   yá índra śúṣmo magʰavan te ásti //

Verse: 8    {BS 2.8.5.38}
Sentence: 1    śíkṣā sákʰibʰyaḥ puruhūta nŕ̥bʰyaḥ /
Sentence: 2    tvám̐ hí dr̥ḍhā́ magʰavan vícetāḥ /
Sentence: 3    ápāvr̥dʰi párivr̥tiṃ ná rā́dʰaḥ /
Sentence: 4_(aa}    índro rā́jā jágataś carṣaṇīnā́m /
Sentence: 5    ádʰi kṣámi víṣurūpaṃ yád ásti /
Sentence: 6    táto dadātu dāśúṣe vásūni /
Sentence: 7    códad rā́dʰa úpastutaś cid arvā́k /
Sentence: 8_(bb}    tám u ṣṭuhi yó abʰíbʰūtyojāḥ /
Sentence: 9    vanvánn ávātaḥ puruhūtá índraḥ /
Sentence: 10    áṣāḍham ugrám̐ sáhamānam ābʰíḥ //
{BS 2.8.5.39}
Sentence: 11    gīrbʰír vardʰa vr̥ṣabʰáṃ carṣaṇīnā́m /
Sentence: 12{cc } stʰūrásya rāyó br̥ható yá ī́śe /
Sentence: 13    tám u ṣṭavāma vidátʰeṣv índram /
Sentence: 14    yó vāyúnā jáyati gómatīṣu /
Sentence: 15    prá dʰr̥ṣṇuyā́ nayati vásyo áccʰa /
Sentence: 16{dd } ā́ te śúṣmo vr̥ṣabʰá étu paścā́t /
Sentence: 17    ā́_uttarā́d adʰarā́g ā́ purástāt /
Sentence: 18    ā́ viśváto abʰí sámetv arvā́ṅ /
Sentence: 19    índra dyumnám̐ súvarvad dʰehy asmé //

Paragraph: 6 
Verse: 1    {BS 2.8.6.40}
Sentence: 1  {a}   ā́ devó yātu savitā́ surátnaḥ /
Sentence: 2    antarikṣaprā́ váhamāno áśvaiḥ /
Sentence: 3    háste dádʰāno náryā purū́ṇi /
Sentence: 4    niveśáyan ca prasuván ca bʰū́ma /
Sentence: 5  {b}   abʰī́vr̥taṃ kŕ̥śanair viśvárūpam /
Sentence: 6    híraṇyaśamyaṃ yajató br̥hántam /
Sentence: 7    ā́stʰād rátʰam̐ savitā́ citrábʰānuḥ /
Sentence: 8    kr̥ṣṇā́ rájām̐si táviṣīṃ dádʰānaḥ /
Sentence: 9  {c}   sá gʰā no deváḥ savitā́ savā́ya /
Sentence: 10    ā́sāviṣad vásupatir vásūni //

Verse: 2    {BS 2.8.6.41}
Sentence: 1    viśráyamāṇo ámatim {Dumont ámatim} urūcī́m /
Sentence: 2    martabʰójanam ádʰa rāsate na {Dumont naḥ} /
Sentence: 3  {d}   ví jánān_śyāvā́ḥ śitipā́do akʰyan /
Sentence: 4    rátʰam̐ híraṇyapraugaṃ váhantaḥ /
Sentence: 5    śáśvad díśaḥ savitúr dáivyasya /
Sentence: 6    upástʰe víśvā bʰúvanāni tastʰuḥ /
Sentence: 7  {e}   ví suparṇó antárikṣāṇy akʰyat /
Sentence: 8    gabʰīrávepā ásuraḥ sunītʰáḥ /
Sentence: 9    kva_ìdānīm̐ sū́ryaḥ káś ciketa /
Sentence: 10    katamā́ṃ dyā́m̐ raśmír asya_ā́tatāna //

Verse: 3    {BS 2.8.6.42}
Sentence: 1  {f}   bʰágaṃ dʰíyaṃ vājáyantaḥ púrandʰim /
Sentence: 2    nárāśám̐so gnā́spátir no avyāt /
Sentence: 3    ā́ 'yé {Dumont āyé} vāmásya saṃgatʰé rayīṇā́m /
Sentence: 4    priyā́ devásya savitúḥ syāma /
Sentence: 5  {g}   ā́ no víśve áskrā gamantu devā́ḥ /
Sentence: 6    mitró aryamā́ váruṇaḥ sajóṣāḥ /
Sentence: 7    bʰúvan yátʰā no víśve vr̥dʰā́saḥ /
Sentence: 8    kárant suṣáhā vitʰuráṃ ná śávaḥ /
Sentence: 9  {h}   śáṃ no devā́ viśvádevā bʰavantu /
Sentence: 10    śám̐ sárasvatī sahá dʰībʰír astu //

Verse: 4    {BS 2.8.6.43}
Sentence: 1    śám abʰiṣācaḥ śám u rātiṣā́caḥ /
Sentence: 2    śáṃ no divyā́ḥ pā́rtʰivāḥ śáṃ no ápyāḥ /
Sentence: 3  {i}   yé savitúḥ satyásavasya víśve /
Sentence: 4    mitrásya vraté váruṇasya devā́ḥ /
Sentence: 5    té sáubʰagaṃ vīrávad gómad ápnaḥ /
Sentence: 6    dádʰātana dráviṇaṃ citrám asmé /
Sentence: 7  {j}   ágne yāhí dūtyàṃ vā́riṣeṇyaḥ {Dumont mā́ viṣaṇyaḥ} /
Sentence: 8    devā́m̐ áccʰā brahmakŕ̥tā gaṇéna /
Sentence: 9    sárasvatīṃ marúto aśvínā_apáḥ /
Sentence: 10    yakṣi devā́n ratnadʰéyāya víśvān //

Verse: 5    {BS 2.8.6.44}
Sentence: 1  {k}   dyáuḥ pitaḥ pŕ̥tʰivi mā́tar ádʰruka /
Sentence: 2    ágne bʰrātarvasavo mr̥ḍátā naḥ /
Sentence: 3    víśva ādityā ādite sajóṣāḥ /
Sentence: 4    asmábʰyam̐ śárma bahuláṃ víyanta /
Sentence: 5  {l}   víśve devāḥ śr̥ṇuta_ímám̐ hávaṃ me /
Sentence: 6    yé antárikṣe yá úpa dyávi ṣṭhá /
Sentence: 7    yé agnijihvā́ utá vā yájatrāḥ /
Sentence: 8    āsádya_asmín barhíṣi mādayadʰvam /
Sentence: 9  {m}   ā́ vāṃ mitrāvaruṇā havyájuṣṭim /
Sentence: 10    námasā devāváv avasā vavr̥tyām //

Verse: 6    {BS 2.8.6.45}
Sentence: 1    asmā́kaṃ bráhma pŕ̥tanāsu sahyā asmā́kam /
Sentence: 2    {Dumont suggests not to put /} vr̥ṣṭír divyā́ supārā́ /
Sentence: 3  {m}   yuváṃ vástrāṇi pīvasā́ vasātʰe /
Sentence: 4    yuvór áccʰidrā mántavo ha sárgāḥ /
Sentence: 5    ávātiratam ánr̥tāni víśvā /
Sentence: 6    r̥téna mitrāvaruṇā sacetʰe /
Sentence: 7  {o}   tát sú vāṃ mitrāvaruṇā mahitvám /
Sentence: 8    īrmā́ tastʰúṣīr áhabʰir duduhre /
Sentence: 9    víśvāḥ pinvatʰa svásarasya dʰénāḥ ánu vām ékaḥ pavír ā́vavarti //

Verse: 7    {BS 2.8.6.46}
Sentence: 1  {p}   yád bám̐hiṣṭhaṃ ná_ativíde {Dumont nā́tivídʰe} sudānū /
Sentence: 2    áccʰidram̐ śárma bʰúvanasya gopā /
Sentence: 3    táto {Dumont téna} no mitrāvaruṇāv avīṣṭam /
Sentence: 4    síṣāsanto jīgivā́m̐saḥ syāma /
Sentence: 5  {q}   ā́ no mitrāvaruṇā havyádātim /
Sentence: 6    gʰr̥táir gávyūtim ukṣatam íḍābʰiḥ /
Sentence: 7    práti vām átra váram ā́ jánāya /
Sentence: 8    pr̥ṇītám udgó divyásyaṃ cā́roḥ /
Sentence: 9  {r}   prá bāhávā sisr̥taṃ jīváse naḥ /
Sentence: 10    ā́ no gávyūtim ukṣataṃ gʰr̥téna //

Verse: 8    {BS 2.8.6.47}
Sentence: 1    ā́ no jáne śravayataṃ yuvānā /
Sentence: 2    śrutáṃ me mitrāvaruṇā háva_imā́ /
Sentence: 3  {s}   imā́ rudrā́ya stʰirádʰanvane gíraḥ /
Sentence: 4    kṣipréṣave devā́ya svadʰā́mne /
Sentence: 5    áṣāḍhāya sáhamānāya mīḍhúṣe /
Sentence: 6    tigmā́yudʰāya bʰaratā śr̥ṇótana {Dumont śr̥ṇótu noḥ} /
Sentence: 7    tvā́ dattebʰī rudra śáṃtamebʰiḥ /
Sentence: 8    śatám̐ hímā aśīya bʰeṣajébʰiḥ /
Sentence: 9    vy àsmád dvéṣo vitaráṃ vy ám̐haḥ /
Sentence: 10    vy ámīvām̐ś cātayasvā víṣūcīḥ //

Verse: 9    {BS 2.8.6.48}
Sentence: 1  {u}   árhan bibʰarṣi, {v} mā́ nás toké, /
Sentence: 2  {w}   ā́ te pitar marutām̐ sumnám etu /
Sentence: 3    mā́ naḥ sū́ryasya saṃdŕ̥śo yuyotʰāḥ /
Sentence: 4    abʰí no vīró árvati kṣameta /
Sentence: 5    prájāyemahi rudra prajā́bʰiḥ /
Sentence: 6  {x}   evā́ babʰro vr̥ṣabʰa cekitāna /
Sentence: 7    yátʰā deva ná hr̥ṇīṣé ná hám̐si /
Sentence: 8    hāvanaśrū́r no rudra_ihá bodʰi /
Sentence: 9    br̥hád vadema vidátʰe suvī́rāḥ /
Sentence: 10  {y}   pári ṇo rudrásya hetíḥ, {z} stuhí śrutám, /
Sentence: 11{aa } mī́ḍhuṣṭama_, {bb} árhan bibʰarṣi, /
Sentence: 12{cc } tvám agne rudrá, {dd} ā́ vo rā́jānam, //

Paragraph: 7 
Verse: 1    {BS 2.8.7.49}
Sentence: 1  {a}   sū́ryo devī́m uṣásam̐ rócamānā {Dumont rócamānām} máryaḥ {Dumont máryo} / {Dumont takes out /}
Sentence: 2    ná yóṣām abʰyèti paścā́t /
Sentence: 3    yátrā náro devayánto yugā́ni /
Sentence: 4    vitanváte práti bʰadrā́ya bʰadrám /
Sentence: 5  {b}   bʰadrā́ áśvā harítaḥ sū́ryasya /
Sentence: 6    citrā́ édagvā {Dumont étagvā} anumā́dyāsaḥ /
Sentence: 7    namasyánto divá ā́ pr̥ṣṭhám astʰuḥ /
Sentence: 8    pári dyā́vāpr̥tʰivī́ yanti sadyáḥ /
Sentence: 9  {c}   tát sū́ryasya devatváṃ tán mahitvám /
Sentence: 10    madʰyā́ kártor vítatam̐ sáṃjabʰāra //

Verse: 2    {BS 2.8.7.50}
Sentence: 1    yadā́_id áyukta harítaḥ sadʰástʰāt /
Sentence: 2    ā́d rā́trī vā́sas tanute simásmai /
Sentence: 3  {d}   tán mitrásya váruṇasya_abʰicákṣe /
Sentence: 4    sū́ryo rūpáṃ kr̥ṇute dyór upástʰe /
Sentence: 5    anantám anyád drúśad asya pā́jaḥ /
Sentence: 6    kr̥ṣṇám anyád dʰarítaḥ sáṃbʰaranti /
Sentence: 7  {e}   adyā́ devā úditā sū́ryasya /
Sentence: 8    nír ám̐hasaḥ pipr̥tā́n níravadyā́t /
Sentence: 9    tán no mitró váruṇo māmahantām /
Sentence: 10    áditiḥ síndʰuḥ pr̥tʰivī́ utá dyáuḥ //

Verse: 3    {BS 2.8.7.51}
Sentence: 1  {f}   divó rukmá urucákṣā údeti /
Sentence: 2    dūré_artʰas taráṇir bʰrā́jamānaḥ /
Sentence: 3    nūnáṃ jánāḥ sū́ryeṇa prásūtāḥ /
Sentence: 4    ā́yánn ártʰāni kr̥ṇávann ápām̐si /
Sentence: 5  {g}   śáṃ no bʰava cákṣasā śáṃ no áhnā /
Sentence: 6    śáṃ bʰānúnā śám̐ himā́ śáṃ gʰr̥ṇéna /
Sentence: 7    yátʰā śám asmái {Dumont ádʰvān_} śám ásad duroṇé /
Sentence: 8    tát sūrya dráviṇaṃ dʰehí citrám /
Sentence: 9  {h}   citráṃ devā́nām údagād ánīkam /
Sentence: 10    cákṣur mitrásya váruṇasya_agnéḥ //

Verse: 4    {BS 2.8.7.52}
Sentence: 1    ā́prā dyā́vāpr̥tʰivī́ antárikṣam /
Sentence: 2    sū́rya ātmā́ jágatas tastʰúṣaś ca /
Sentence: 3  {i}   tváṣṭā dádʰat, {j} tán nas turī́pam, /
Sentence: 4  {k}   tváṣṭā vīráṃ, {l} piśáṅgarūpaḥ, /
Sentence: 5  {m}   dáśa_imáṃ tváṣṭur janayanta gárbʰam /
Sentence: 6    átandrāso yuvatáyo bíbʰartram {Dumont víbʰr̥tram} /
Sentence: 7    tigmā́nīkam̐ sváyaśasaṃ jáneṣu /
Sentence: 8    virócamānaṃ pári ṣīṃ nayanti /
Sentence: 9  {n}   ā́víṣṭyo vardʰate cā́rur āsu /
Sentence: 10    jihmā́nām ūrdʰváḥ sváyaśā upástʰe //

Verse: 5    {BS 2.8.7.53}
Sentence: 1    ubʰé tváṣṭur bibʰyatur jā́yamānāt /
Sentence: 2    pratī́cī sim̐háṃ prátijoṣayete /
Sentence: 3  {o}   mitró jánān, {p} prá sá mitra, /
Sentence: 4  {q}   ayáṃ mitró namasyàḥ suśévaḥ /
Sentence: 5    rā́jā sukṣatró ajaniṣṭa vedʰā́ḥ /
Sentence: 6    tásya vayám̐ sumatáu yajñíyasya ápi bʰadré saumanasé syāma /
Sentence: 7  {r}   anamīvā́saṃ íḍayā mádantaḥ /
Sentence: 8    mitájmavo {Dumont mitájñavo} várimann ā́ pr̥tʰivyā́ḥ /
Sentence: 9    ādityásya vratám upakṣyántaḥ {Dumont upakṣiyantaḥ} //

Verse: 6    {BS 2.8.7.54}
Sentence: 1    vayáṃ mitrásya sumatáu syāma /
Sentence: 2  {s}   mitráṃ ná ī́m̐ śímyā góṣu gavyávat {Dumont gavyávaḥ} /
Sentence: 3    svādʰíyo vidátʰe apsv ájījanan /
Sentence: 4    árejayatām̐ {ám̐} ródasī pā́jasā girā́ /
Sentence: 5    práti priyáṃ yajatáṃ janúṣām ávaḥ /
Sentence: 6  {t}   mahā́m̐ ādityó námasā_upasádyah /
Sentence: 7    yātayájjano gr̥ṇaté suśévaḥ /
Sentence: 8    tásmā etát pányatamāya júṣṭam /
Sentence: 9    agnáu mitrā́ya havír ā́juhota /
Sentence: 10  {u}   ā́ vām̐ rátʰo ródasī badbadʰānáḥ //

Verse: 7    {BS 2.8.7.55}
Sentence: 1    hiraṇyáyo vŕ̥ṣabʰir yātv áśvaiḥ /
Sentence: 2    gʰr̥távartaniḥ pavíbʰī rucānáḥ /
Sentence: 3    iṣā́ṃ voḍhā́ nr̥pátir vājínīvān /
Sentence: 4  {v}   sá papratʰānó abʰí páñca bʰū́ma /
Sentence: 5    trivandʰuró mánasā_ā́yātu yuktáḥ /
Sentence: 6    víśo yéna gáccʰatʰo devayántīḥ /
Sentence: 7    kútrācid yā́mam aśvinā dádʰānā /
Sentence: 8  {w}   sváśvā yaśásā_ā́yātam arvā́k /
Sentence: 9    dásrā nidʰíṃ mádʰumantaṃ pibātʰaḥ /
Sentence: 10    ví vām̐ rátʰo vadʰvā̀ yā́damānaḥ //

Verse: 8    {BS 2.8.7.56}
Sentence: 1    ántān divó bādʰate vartaníbʰyām /
Sentence: 2  {x}   yuvóḥ śríyaṃ pári yóṣā vr̥ṇīta /
Sentence: 3    sū́ro duhitā́ páritakmiyāyām {Dumont páritakmyāyām} /
Sentence: 4    yád devayántam ávatʰaḥ śácībʰiḥ /
Sentence: 5    párígʰram̐sá vāṃ mánā vāṃ váyo gām {Dumont pári gʰram̐sam ománā vāṃ váyo gāt} /
Sentence: 6  {y}   yó ha syá vām̐ ratʰirā vásta usrā́ḥ /
Sentence: 7    rátʰo yujānáḥ pariyā́ti vartíḥ /
Sentence: 8    téna naḥ śáṃ yór uṣáso vyùṣṭau /
Sentence: 9    ny àśvínā vahataṃ yajñé asmín /
Sentence: 10  {z}   yuváṃ bʰujyúm ávaviddʰam̐ samudré //

Verse: 9    {BS 2.8.7.57}
Sentence: 1    údūhatʰur árṇasó ásridʰānaiḥ /
Sentence: 2    patatríbʰir aśramáir avyatʰíbʰiḥ /
Sentence: 3    dam̐sánābʰir aśvinā pāráyantām /
Sentence: 4_(aa}    ágnīṣomā yó adyá vām /
Sentence: 5    idáṃ vácaḥ saparyáti /
Sentence: 6    tásmai dʰattam̐ suvī́ryam /
Sentence: 7    gávāṃ póṣam̐ sváśviyaṃ /
Sentence: 8_(bb}    yó agnī́ṣómā havíṣā saparyā́t /
Sentence: 9    devadrī́cā mánasā yó gʰr̥téna /
Sentence: 10    tásya vratám̐ rakṣataṃ pātám ám̐hasaḥ //

Verse: 10    {BS 2.8.7.58}
Sentence: 1    viśé jánāya mahi śárma yaccʰatam /
Sentence: 2_(cc}    ágnīṣomā yá ā́hutim /
Sentence: 3    yó vāṃ dā́śād dʰavíṣkr̥tim /
Sentence: 4    sá prajáyā suvī́ryam /
Sentence: 5    víśvam ā́yur vyàśnavat /
Sentence: 6_(dd}    ágnīṣomā céti tád vīryàṃ vām /
Sentence: 7    yád ámuṣṇītam avasáṃ paṇíṃ góḥ /
Sentence: 8    ávātirataṃ prátʰayasya śéṣaḥ ávindataṃ jyótir ékaṃ bahúbʰyaḥ /
Sentence: 9_(ee}    ágnīṣomāv imám̐ sú mé, {ff} 'gnīṣomā havíṣaḥ prástʰitasya, //

Paragraph: 8 
Verse: 1    {BS 2.8.8.59}
Sentence: 1  {a}   ahám asmi pratʰamajā́ r̥tásya /
Sentence: 2    pū́rvaṃ devébʰyo amŕ̥tasya nā́bʰiḥ /
Sentence: 3    yó mā dádāti sá íd evá mā́_āvāḥ /
Sentence: 4    ahám ánnam ánnam adántam admi /
Sentence: 5  {b}   pū́rvam agnér ápi dahaty ánnam /
Sentence: 6    yattáu ha_āsāte {Dumont hā́sāte} ahamuttaréṣu /
Sentence: 7    vyā́ttam asya paśávaḥ sujámbʰam /
Sentence: 8    páśyanti dʰī́rāḥ prácaranti pā́kāḥ /
Sentence: 9  {c}   jáhāmy anyáṃ ná jahāmy anyám /
Sentence: 10    ahám ánnaṃ váśam ít_carāmi //

Verse: 2    {BS 2.8.8.60}
Sentence: 1    samānám ártʰaṃ páryemi bʰuñját /
Sentence: 2    kó mā́m ánnaṃ manuṣyò dayeta /
Sentence: 3  {d}   párāke ánnaṃ níhitaṃ loká etát /
Sentence: 4    víśvair deváiḥ pitŕ̥bʰir guptám ánnam /
Sentence: 5    yád adyáte lupyáte yát paropyáte /
Sentence: 6    śatatamī́ sā́ tanū́r me babʰūva /
Sentence: 7  {e}   mahā́ntau carū́ sakr̥ddugdʰéna paprau /
Sentence: 8    dívaṃ ca pŕ̥śni pr̥tʰivī́ṃ ca sākám /
Sentence: 9    tát saṃpíbanto ná minanti vedʰásaḥ /
Sentence: 10    ná_etád bʰū́yo bʰávati nó kánīyaḥ //

Verse: 3    {BS 2.8.8.61}
Sentence: 1  {f}   ánnaṃ prāṇám ánnam apānám āhuḥ /
Sentence: 2    ánnaṃ mr̥tyúṃ tám u jīvā́tum āhuḥ /
Sentence: 3    ánnaṃ brahmā́ṇo jarásaṃ vadanti /
Sentence: 4    ánnam āhuḥ prajánanaṃ prajā́nām /
Sentence: 5  {g}   mógʰam ánnaṃ vindate ápracetāḥ /
Sentence: 6    satyáṃ bravīmi vadʰá ít sá tásya /
Sentence: 7    ná_aryamáṇaṃ púṣyati nó sákʰāyam /
Sentence: 8    kévalāgʰo bʰavati kevalādī́ /
Sentence: 9  {h}   aháṃ megʰáḥ stanáyan várṣann asmi /
Sentence: 10    mā́m adanty ahám admy anyā́n //

Verse: 4    {BS 2.8.8.62}
Sentence: 1    áham̐ sád amŕ̥to bʰavāmi /
Sentence: 2    mád ādityā́ ádʰi sárve tapanti /
Sentence: 3  {i}   devī́ṃ vā́cam ajanayanta, {j} yád vā́g vádanti, /
Sentence: 4  {k}   anantā́m ántād ádʰi nírmitāṃ mahī́m /
Sentence: 5    yásyāṃ devā́ adadʰur bʰójanāni /
Sentence: 6    ékākṣarāṃ dvipádām̐ ṣáṭpadāṃ ca /
Sentence: 7    vā́caṃ devā́ úpajīvanti víśve /
Sentence: 8  {l}   vā́caṃ devā́ úpajīvanti víśve /
Sentence: 9    vā́caṃ gandʰarvā́ḥ paśávo manuṣyā̀ḥ /
Sentence: 10    vācí_ímā́ víśvā bʰúvanāny árpitā //

Verse: 5    {BS 2.8.8.63}
Sentence: 1    sā́ no hávaṃ juṣatām índrapatnī /
Sentence: 2  {m}   vā́g akṣáraṃ pratʰamajā́ r̥tásya /
Sentence: 3    védānāṃ mātā́_amŕ̥tasya nā́bʰiḥ /
Sentence: 4    sā́ no juṣāṇó 'payajñám ā́gāt /
Sentence: 5    ávantī devī́ suhávā me astu /
Sentence: 6  {n}   yā́m ŕ̥ṣayo mantrakŕ̥to manīṣíṇaḥ /
Sentence: 7    anváiccʰan devā́s tápasā śrámeṇa /
Sentence: 8    tā́ṃ devī́ṃ vā́cam̐ havíṣā yajāmahe /
Sentence: 9    sā́ no dadʰātu sukr̥tásya loké /
Sentence: 10  {o}   catvā́ri vā́k párimitā padā́ni //

Verse: 6    {BS 2.8.8.64}
Sentence: 1    tā́ni vidur brāhmaṇā́ yé manīṣíṇaḥ /
Sentence: 2    gúhā trī́ṇi níhitā ná_iṅgayanti /
Sentence: 3    turī́yaṃ vācó manuṣyā̀ vadanti /
Sentence: 4  {p}   śraddʰáyā_agníḥ sámidʰyate /
Sentence: 5    śraddʰáyā vindate {Dumont hūyate} havíḥ /
Sentence: 6    śraddʰā́ṃ bʰágasya mūrdʰáni /
Sentence: 7    vácasā_ā́vedayāmasi /
Sentence: 8  {q}   priyám̐ śraddʰe dádataḥ /
Sentence: 9    priyám̐ śraddʰe dídāsataḥ /
Sentence: 10    priyáṃ bʰojéṣu yájvasu //

Verse: 7    {BS 2.8.8.65}
Sentence: 1    idáṃ ma uditáṃ kr̥dʰi /
Sentence: 2  {r}   yátʰā devā́ ásureṣu /
Sentence: 3    śraddʰā́m ugréṣu cakriré /
Sentence: 4    eváṃ bʰojéṣu yájvasu /
Sentence: 5    asmā́kam uditáṃ kr̥dʰi /
Sentence: 6  {s}   śraddʰā́ṃ devā {Dumont devā́} yájamānāḥ /
Sentence: 7    vāyúgopā úpāsate /
Sentence: 8    śraddʰā́m̐ hr̥dayyàyā_ā́kūtyā /
Sentence: 9    śraddʰáyā hūyate havíḥ {Dumont vindate vasu ?} /
Sentence: 10    śraddʰā́ṃ prātár havāmahe //

Verse: 8    {BS 2.8.8.66}
Sentence: 1    śraddʰā́ṃ madʰyáṃdinaṃ pári /
Sentence: 2    śraddʰā́m̐ sū́ryasya nimrúci /
Sentence: 3    śráddʰe śráddʰāpaya_ihá mā /
Sentence: 4  {u}   śraddʰā́ devā́n ádʰivaste /
Sentence: 5    śraddʰā́ víśvam idáṃ jágat /
Sentence: 6    śraddʰā́ṃ {BS śraddʰā́} kā́masya mātáram /
Sentence: 7    havíṣā vardʰayāmasi /
Sentence: 8  {v}   bráhma jajñānáṃ pratʰamáṃ purástāt /
Sentence: 9    ví sīmatáḥ surúco vená āvaḥ /
Sentence: 10    sá budʰníyā upamā́ asya viṣṭhā́ḥ //

Verse: 9    {BS 2.8.8.67}
Sentence: 1    satáś ca yónim ásataś ca vívaḥ /
Sentence: 2  {w}   pitā́ virā́jām r̥ṣabʰó rayīṇā́m /
Sentence: 3    antárikṣaṃ viśvárūpa ā́viveśa /
Sentence: 4    tám arkáir abʰyàrcanti vahsám /
Sentence: 5    bráhma sántaṃ bráhmaṇā vardʰáyantaḥ /
Sentence: 6  {x}   bráhma devā́n ajanayat /
Sentence: 7    bráhma víśvam idáṃ jágat /
Sentence: 8    bráhmaṇaḥ kṣatráṃ nírmitam /
Sentence: 9    bráhma brāhmaṇá ātmánā /
Sentence: 10  {y}   antár asminn imé lokā́ḥ //

Verse: 10    {BS 2.8.8.68}
Sentence: 1    antár víśvam idáṃ jágat /
Sentence: 2    bráhma_evá bʰūtā́nāṃ jyéṣṭham /
Sentence: 3    téna kò 'rhati spárdʰitum /
Sentence: 4  {z}   bráhman devā́s tráyastrim̐śat /
Sentence: 5    bráhmann indraprajāpatī́ /
Sentence: 6    bráhman ha víśvā bʰūtā́ni /
Sentence: 7    nāví_iva_antáḥ samā́hitā /
Sentence: 8_(aa}    cátasra ā́śāḥ prácarantv agnáyaḥ /
Sentence: 9    imáṃ no yajñáṃ nayatu prajānán /
Sentence: 10    gʰr̥táṃ pínvann ajáráṃ suvī́ram //

Verse: 11    {BS 2.8.8.69}
Sentence: 1    bráhma samíd bʰávaty ā́hutīnām /
Sentence: 2_(bb}    ā́ gā́vo agmann utá bʰadrám akran /
Sentence: 3    sī́dantu goṣṭhé raṇáyantv asmé /
Sentence: 4    prajā́vatīḥ pururū́pā ihá syuḥ /
Sentence: 5    índrāya pūrvī́r uṣáso dúhānāḥ /
Sentence: 6_(cc}    índro yájvane pr̥ṇaté ca śikṣati /
Sentence: 7    úpa_íd dadāti ná sváṃ muṣāyati /
Sentence: 8    bʰū́yo_bʰūyo rayím íd asya vardʰáyan /
Sentence: 9    ábʰinne kʰillé nídadʰāti devayúm /
Sentence: 10{dd } ná tā́ naśanti, {ee} ná tā́ árvā, //

Verse: 12    {BS 2.8.8.70}
Sentence: 1_(ff}    gā́vo bʰágo gā́va índro me accʰāt {Dumont accʰān}, /
Sentence: 2    gā́vaḥ sómasya pratʰamásya bʰakṣáḥ /
Sentence: 3    imā́ yā́ gā́vaḥ sá janāsa índraḥ /
Sentence: 4    iccʰā́mi_íd dʰr̥dā́ mánasā cid índram /
Sentence: 5_(gg}    yūyáṃ gāvo medayatʰā kr̥śáṃ cit /
Sentence: 6    aślīláṃ {Dumont aśrīráṃ} cit kr̥ṇutʰā suprátīkam /
Sentence: 7    bʰadráṃ gr̥háṃ kr̥ṇutʰa bʰadravācaḥ /
Sentence: 8    br̥hád vo váya ucyate sabʰā́su /
Sentence: 9_(hh}    prajā́vatīḥ sūyávasam̐ riśántīḥ {AS ruśántīḥ} /
Sentence: 10    śuddʰā́ apá suprapāṇé píbantīḥ /
Sentence: 11    mā́ vaḥ stená īśata mā́_agʰáśam̐saḥ /
Sentence: 12    pári vo hetī́ rudrásya vr̥ñjyāt {Dumont vr̥jyāḥ} /
Sentence: 13  {ii}   úpa_idám úpapárcanam /
Sentence: 14    āsú góṣu_úpapr̥cyatām /
Sentence: 15    úpa_ r̥ṣabʰásya rétasi /
Sentence: 16    úpa_indra táva vīryé //

Paragraph: 9 
Verse: 1    {BS 2.8.9.71}
Sentence: 1  {a}   tā́ sūryācandramásā viśvabʰŕ̥ttamā {Dumont /} mahát / {Dumont takes out /}
Sentence: 2    téjo vásumad rājato diví /
Sentence: 3    sā́mātmānā carataḥ sāmacāríṇā /
Sentence: 4    yáyor vratáṃ ná mamé jā́tu deváyoḥ /
Sentence: 5  {b}   ubʰā́v antau páriyāta ármyā {Dumont ūrmyā?[sic.]} /
Sentence: 6    divó ná raśmī́m̐s tanutó vy arṇavé /
Sentence: 7    ubʰā́ bʰuvantī́ bʰúvanā kavíkratū /
Sentence: 8    sū́ryā ná candrā́ carato hatā́matī /
Sentence: 9  {c}   pátī dyumád viśvavídā ubʰā́ diváḥ /
Sentence: 10    sū́ryā ubʰā́ candrámasā vicakṣaṇā́ //

Verse: 2    {BS 2.8.9.72}
Sentence: 1    viśvávārā virivo_bʰā́ váreṇyā {Dumont váreṇyau} /
Sentence: 2    tā́ no 'vataṃ matimántā máhivratā /
Sentence: 3  {d}   viśvaváparī pratáraṇā tarantā́ /
Sentence: 4    suvarvídā dr̥śáye bʰū́riraśmī /
Sentence: 5    sū́ryā hí candrā́ vásu tveṣá darśatā /
Sentence: 6    manasvínā_ubʰā́_anucarató nu sáṃ dívam /
Sentence: 7  {e}   asyá śrávo nadyàḥ saptá bibʰrati /
Sentence: 8    dyā́vākṣā́mā pr̥tʰivī́ darśatáṃ vápuḥ /
Sentence: 9    asmé sūryācandramásā_abʰicákṣe /
Sentence: 10    śraddʰé kám indra carato vicarturám //

Verse: 3    {BS 2.8.9.73}
Sentence: 1  {f}   pūrvāparáṃ carato māyáyā_etáu /
Sentence: 2    śíśū krī́ḍantau páriyāto adʰvarám /
Sentence: 3    víśvāny anyó bʰúvanā_abʰicáṣṭe /
Sentence: 4    r̥tū́n anyó vidádʰaj jāyate púnaḥ /
Sentence: 5  {g}   híraṇyavarṇāḥ śúcayaḥ pāvakā́, {h} yā́sām̐ rā́jā, /
Sentence: 6  {i}   yā́sāṃ devā́ḥ, {j} śivéna mā cákṣuṣā paśyata, /
Sentence: 7  {k}   ā́po bʰadrā́, {l} ā́d ít paśyāmi, /
Sentence: 8  {m}   ná_asad āsīn nó sád āsīt tadā́nīm /
Sentence: 9    ná_āsīd rájo nó vyòma_aparó yát /
Sentence: 10    kím ā́varīvaḥ kúha kásya śárman //

Verse: 4    {BS 2.8.9.74}
Sentence: 1    ámbʰaḥ kím āsīd gáhanaṃ gabʰīrám /
Sentence: 2  {n}   ná mr̥tyúr amŕ̥taṃ tárhi {Dumont ná mr̥tyúr āsīd amŕ̥tam ná tárhi,} ná {BS has /
Sentence: 3    here} rā́triyā áhna āsīt praketáḥ /
Sentence: 4    ā́nīd avātám̐ svadʰáyā tád ékam /
Sentence: 5    tásmād dʰa_anyáṃ ná paráḥ kíṃ cana_ā́sa /
Sentence: 6  {o}   táma āsīt támasā gūḍhám ágre {Dumont puts "," here} praketám {Dumont apraketáṃ} / {Dumont takes out /}
Sentence: 7    salilám̐ sárvam ā idám /
Sentence: 8    tuccʰénābʰv {Dumont tuccʰéna bʰv} ápihitaṃ yád ā́sīt /
Sentence: 9    támasas {Dumont tápasas} tán mahinā́_ajāyata_ékam /
Sentence: 10  {p}   kā́mas tád ágre sám avartata_ádʰi //

Verse: 5    {BS 2.8.9.75}
Sentence: 1    mánaso rétaḥ pratʰamáṃ yád ā́sīt /
Sentence: 2    sató bándʰum ásati níravindan /
Sentence: 3    hr̥dí pratī́ṣyā kaváyo manīṣā́ /
Sentence: 4  {q}   tiraścī́no vítato raśmír eṣām /
Sentence: 5    adʰáḥ svid {AS adʰásvid} āsī3d upári svid āsī3t /
Sentence: 6    retodʰā́ āsan mahimā́na āsan /
Sentence: 7    svadʰā́ avástāt práyatiḥ parástāt /
Sentence: 8  {r}   kó addʰā́ veda ká ihá právocat /
Sentence: 9    kúta ā́jātā kúta iyáṃ vísr̥ṣṭiḥ /
Sentence: 10    arvā́g devā́ asyá visárjanāya {Dumont visárjanena} //

Verse: 6    {BS 2.8.9.76}
Sentence: 1    átʰā kó veda yáta ābabʰū́va /
Sentence: 2  {s}   iyáṃ vísr̥ṣṭir yáta ābabʰū́va /
Sentence: 3    yádi vā dadʰé yádi vā ná /
Sentence: 4    yó asyā́_adʰyakṣaḥ paramé vyòman /
Sentence: 5    só aṅgá véda yádi vā ná véda /
Sentence: 6  {t}   kím̐ svid vánaṃ ká u sá vr̥kṣá āsīt /
Sentence: 7    yáto dyā́vāpr̥tʰivī́ niṣṭatakṣúḥ /
Sentence: 8    mánīṣiṇo mánasā pr̥ccʰáta_íd u tát /
Sentence: 9    yád adʰyátiṣṭhad bʰúvanāni dʰāráyan /
Sentence: 10  {u}   bráhma vánaṃ bráhma sá vr̥kṣá āsīt //

Verse: 7    {BS 2.8.9.77}
Sentence: 1    yáto dyā́vāpr̥tʰivī́ niṣṭatakṣúḥ /
Sentence: 2    mánīṣiṇo mánasā víbravīmi vaḥ /
Sentence: 3    bráhmā_adʰyátiṣṭhad bʰúvanāni dʰāráyan /
Sentence: 4  {v}   prātár agníṃ prātár índram̐ havāmahe /
Sentence: 5    prātár mitrā́váruṇā prātár aśvínā /
Sentence: 6    prātár bʰágaṃ pūṣáṇaṃ bráhmaṇaspátim /
Sentence: 7    prātáḥ sómam utá rudrám̐ huvema /
Sentence: 8  {w}   prātár jítaṃ bʰágam ugrám̐ huvema /
Sentence: 9    vayáṃ putrám áditer yó vidʰartā́ /
Sentence: 10    ādʰráś cid yáṃ mányamānas turáś cit //

Verse: 8    {BS 2.8.9.78}
Sentence: 1    rā́jā cid yáṃ bʰágaṃ bʰakṣi_íty ā́ha /
Sentence: 2  {x}   bʰága práṇetar bʰága sátyarādʰaḥ /
Sentence: 3    bʰága_imā́ṃ dʰíyam údava dádan naḥ /
Sentence: 4    bʰága prá ṇo janaya góbʰir áśvaiḥ /
Sentence: 5    bʰága prá nŕ̥bʰir nr̥vántaḥ syāma /
Sentence: 6  {y}   utá_idā́nīṃ bʰágavantaḥ syāma /
Sentence: 7    utá prápitvá utá mádʰye áhnām /
Sentence: 8    uta_úditā magʰavant sū́ryasya /
Sentence: 9    vayáṃ devā́nām̐ sumatáu syāma /
Sentence: 10  {z}   bʰága evá bʰágavām̐ astu devāḥ //

Verse: 9    {BS 2.8.9.79}
Sentence: 1    téna vayáṃ bʰágavantaḥ syāma /
Sentence: 2    táṃ tvā bʰaga sárva ít_ johavīmi {Dumont johavīti} /
Sentence: 3    sá no bʰaga pura etā́ bʰava_ihá /
Sentence: 4_(aa}    sám adʰvarā́ya_uṣáso namanta /
Sentence: 5    dadʰikrā́vā_iva śúcaye padā́ya /
Sentence: 6    arvācīnáṃ vasuvídaṃ bʰágaṃ naḥ /
Sentence: 7    rátʰam iva_áśvā vājína ā́vahantu /
Sentence: 8_(bb}    áśvāvatīr gómatīr na uṣā́saḥ /
Sentence: 9    vīrávatīḥ sádam uccʰantu bʰadrā́ḥ /
Sentence: 10    gʰr̥táṃ dúhānā viśvátaḥ prápīnāḥ /
Sentence: 11    yūyáṃ pāta svastíbʰiḥ sádā naḥ //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.