TITUS
Black Yajur-Veda: Taittiriya-Brahmana
Part No. 17
Previous part

Book: 3 
Chapter: 1 
Paragraph: 1 
Verse: 1    {BS 3.1.1.1}
Sentence: 1_(1a}    agnír naḥ pātu kŕ̥ttikāḥ /
Sentence: 2    nákṣatraṃ devám indriyám /
Sentence: 3    idám āsāṃ vicakṣaṇám /
Sentence: 4    havír āsáṃ juhotana /
Sentence: 5_(1b}    yásya bʰā́nti raśmáyo yásya ketávaḥ /
Sentence: 6    yásya_imā́ víśvā bʰúvanāni sárvā /
Sentence: 7    sá kr̥ttikābʰir abʰí saṃvásānaḥ /
Sentence: 8    agnír no deváḥ suvité dadʰātu /
Sentence: 9_(2a}    prajā́pate rohiṇī́ vetu pátnī /
Sentence: 10    viśvárūpā br̥hatī́ citrábʰānuḥ //

Verse: 2    {BS 3.1.1.2}
Sentence: 1    sā́ no yajñásya suvité dadʰātu /
Sentence: 2    yátʰā jī́vema śarádaḥ sávīrāḥ /
Sentence: 3_(2b}    rohiṇī́ devy údagāt purástāt /
Sentence: 4    víśvā rūpā́ṇi pratimódamānā /
Sentence: 5    prajā́patim̐ havíṣā vardʰáyantī /
Sentence: 6    priyā́ devā́nām úpayātu yajñám /
Sentence: 7_(3a}    sómo rā́jā mr̥gaśīrṣéṇa ā́gann /
Sentence: 8    śiváṃ nákṣatraṃ priyám asya dʰā́ma /
Sentence: 9    āpyā́yamāno bahudʰā́ jáneṣu /
Sentence: 10    rétaḥ prajā́ṃ yájamāne dadʰātu //

Verse: 3    {BS 3.1.1.3}
Sentence: 1_(3b}    yát te nákṣatraṃ mr̥gaśīrṣám ásti /
Sentence: 2    priyám̐ rājan priyátamaṃ priyā́ṇām /
Sentence: 3    tásmai te soma havíṣā vidʰema /
Sentence: 4    śáṃ na edʰi dvipáde śáṃ cátuṣpade /
Sentence: 5_(4a}    ārdráyā rudráḥ prátʰamāna eti /
Sentence: 6    śréṣṭho devā́nāṃ pátir agʰniyā́nām /
Sentence: 7    nákṣatram asya havíṣā vidʰema /
Sentence: 8    mā́ naḥ prajā́m̐ rīriṣan mā́_utá vīrā́n /
Sentence: 9_(4b}    hetī́ rudrásya pári ṇo vr̥ṇaktu /
Sentence: 10    ārdrā́ nákṣatraṃ juṣatām̐ havír naḥ //

Verse: 4    {BS 3.1.1.4}
Sentence: 1    pramuñcámānau duritā́ni víśvā /
Sentence: 2    ápa_agʰáśam̐saṃ nudatām árātim /
Sentence: 3_(5a}    púnar no devy áditiḥ spr̥ṇotu /
Sentence: 4    púnarvasū naḥ púnar étāṃ yajñám /
Sentence: 5    púnar no devā́ abʰíyantu sárve /
Sentence: 6    púnaḥ_punar vo havíṣā yajāmaḥ /
Sentence: 7_(5b}    evā́ ná {Dumont évā ná} devy áditir anarvā́ /
Sentence: 8    víśvasya bʰartrī́ jágataḥ pratiṣṭhā́ /
Sentence: 9    púnarvasū havíṣā vardʰáyantī /
Sentence: 10    priyáṃ devā́nām ápyetu pā́tʰaḥ //

Verse: 5    {BS 3.1.1.5}
Sentence: 1_(6a}    bŕ̥haspátiḥ pratʰamáṃ jā́yamānaḥ /
Sentence: 2    tiṣyàṃ nákṣatram abʰí sáṃbabʰūva /
Sentence: 3    śréṣṭho devā́nāṃ pŕ̥tanāsu jiṣṇúḥ /
Sentence: 4    díśó 'nu sárvā ábʰayaṃ no astu /
Sentence: 5_(6b}    tiṣyàḥ purástād utá madʰyató naḥ /
Sentence: 6    bŕ̥haspátir naḥ páripātu paścā́t /
Sentence: 7    bā́dʰetāṃ dvéṣo ábʰayaṃ kr̥ṇutām /
Sentence: 8    suvī́ryasya pátayaḥ syāma /
Sentence: 9_(7a}    idám̐ sarpébʰyo havír astu júṣṭam /
Sentence: 10    āśreṣā́ yéṣām anuyánti cétaḥ //

Verse: 6    {BS 3.1.1.6}
Sentence: 1    yé antárikṣaṃ pr̥tʰivī́ṃ kṣiyánti /
Sentence: 2    té naḥ sarpā́so hávam ā́gamiṣṭhāḥ /
Sentence: 3_(7b}    yé rocané sū́ryasya_ápi sarpā́ḥ /
Sentence: 4    yé dívaṃ devī́m ánu saṃcáranti /
Sentence: 5    yéṣām āśreṣā́ anuyánti kā́mam /
Sentence: 6    tébʰyaḥ sarpébʰyo mádʰumat_ juhomi /
Sentence: 7_(8a}    úpahūtāḥ pitáro yé magʰā́su /
Sentence: 8    mánojavasaḥ sukŕ̥taḥ sukr̥tyā́ḥ /
Sentence: 9    té no nákṣatre hávam ā́gamiṣṭhāḥ /
Sentence: 10    svadʰā́bʰir yajñáṃ práyataṃ juṣantām //

Verse: 7    {BS 3.1.1.7}
Sentence: 1_(8b}    yé agnidagdʰā́ yé 'nāgnidagdʰāḥ /
Sentence: 2    yè 'múṃ lokáṃ pitáraḥ kṣiyánti /
Sentence: 3    yā́m̐ś ca vidmá yā́m̐ u ca ná pravidmá /
Sentence: 4    magʰā́su yajñám̐ súkr̥taṃ juṣantām /
Sentence: 5_(9a}    gávāṃ pátiḥ pʰálgunīnām asi tvám /
Sentence: 6    tád aryaman varuṇa mitra cā́ru /
Sentence: 7    táṃ tvā vayám̐ sanitā́ram̐ sanīnā́m /
Sentence: 8    jīvā́ jī́vantam úpa sáṃviśema /
Sentence: 9_(9b}    yéna_imā́ víśvā bʰúvanāni sáṃjitā /
Sentence: 10    yásya devā́ anusaṃyánti cétaḥ //

Verse: 8    {BS 3.1.1.8}
Sentence: 1    aryamā́ rā́jā_ajáras túviṣmān /
Sentence: 2    pʰálgunīnām r̥ṣabʰó roravīti /
Sentence: 3  {10a}   śréṣṭho devā́nāṃ bʰagavo bʰaga_asi /
Sentence: 4    tát tvā viduḥ pʰálugunīs tásya vittāt /
Sentence: 5    asmábʰyaṃ kṣatrám ajáram̐ suvī́ryam /
Sentence: 6    gómad áśvavad úpa sáṃnuda_ihá /
Sentence: 7  {10b}   bʰágo ha dātā́ bʰága ít pradātā́ /
Sentence: 8    bʰágo devī́ḥ pʰálgunīr ā́viveśa /
Sentence: 9    bʰágasya_ít táṃ prasaváṃ gamema /
Sentence: 10    yátra deváiḥ sadʰamā́daṃ madema //

Verse: 9    {BS 3.1.1.9}
Sentence: 1  {11a}   ā́yātu deváḥ savitā_úpayātu /
Sentence: 2    hiraṇyáyena suvŕ̥tā rátʰena /
Sentence: 3    váhan hástam̐ subʰágaṃ vidmanā́pasam /
Sentence: 4    prayáccʰantaṃ pápuriṃ púṇyam áccʰa /
Sentence: 5  {11b}   hástaḥ práyaccʰatv amŕ̥taṃ vásīyaḥ /
Sentence: 6    dákṣiṇena prátigr̥bʰṇīma enat /
Sentence: 7    dātā́ram adyá savitā́ videya /
Sentence: 8    yó no hástāya prasuvā́ti yajñám /
Sentence: 9  {12a}   tváṣṭā nákṣatram abʰyèti citrā́m /
Sentence: 10    subʰám̐sasaṃ yuvatím̐ rócamānām //

Verse: 10    {BS 3.1.1.10}
Sentence: 1    niveśáyann amŕ̥tān mártyām̐ś ca /
Sentence: 2    rūpā́ṇi pim̐śán bʰúvanāni víśvā /
Sentence: 3  {12b}   tán nas tváṣṭā tád u citrā́ vícaṣṭām /
Sentence: 4    tán nákṣatraṃ bʰūridā́ astu máhyam /
Sentence: 5    tán naḥ prajā́ṃ vīrávatīm̐ sanotu /
Sentence: 6    góbʰir no áśvaiḥ sámanaktu yajñám /
Sentence: 7  {13a}   vāyúr nákṣatram abʰyèti níṣṭyām /
Sentence: 8    tigmáśr̥ṅgo vr̥ṣabʰó róruvāṇaḥ /
Sentence: 9    samīráyan bʰúvanā mātaríśvā /
Sentence: 10    ápa dvéṣām̐si nudatām árātīḥ //

Verse: 11    {BS 3.1.1.11}
Sentence: 1  {13b}   tán no vāyús tád u níṣṭyā śr̥ṇotu /
Sentence: 2    tán nákṣattraṃ bʰūridā́ astu máhyam /
Sentence: 3    tán no devā́so ánujānantu kā́mam /
Sentence: 4    yátʰā tárema duritā́ni víśvā /
Sentence: 5  {14a}   dūrám asmát_śátravo yantu bʰītā́ḥ /
Sentence: 6    tád indrāgnī́ kr̥ṇutāṃ tád víśākʰe /
Sentence: 7    tán no devā́ ánumadantu yajñám /
Sentence: 8    paścā́t purástād ábʰayaṃ no astu /
Sentence: 9  {14b}   nákṣatrāṇām ádʰipatnī víśākʰe /
Sentence: 10    śréṣṭhāv indrāgnī́ bʰúvanasya gopáu //

Verse: 12    {BS 3.1.1.12}
Sentence: 1    víṣūcaḥ śátrūn apabā́dʰamānau /
Sentence: 2    ápa kṣúdʰaṃ nudatām árātim /
Sentence: 3  {15a}   pūrṇā́ paścā́d utá pūrṇā́ purástāt /
Sentence: 4    út_madʰyatáḥ paurṇamāsī́ jigāya /
Sentence: 5    tásyāṃ devā́ ádʰi saṃvásantaḥ /
Sentence: 6    uttamé nā́ka ihá mādayantām /
Sentence: 7  {15b}   pr̥tʰvī́ suvárcā yuvatíḥ sajóṣāḥ /
Sentence: 8    paurṇamāsy údagāt_śóbʰamānā /
Sentence: 9    āpyāyáyantī duritā́ni víśvā /
Sentence: 10    urúṃ dúhāṃ {Dumont duhāṃ} yájamānāya yajñám //

Paragraph: 2 
Verse: 1    {BS 3.1.2.13}
Sentence: 1_(1a}    r̥dʰyā́sma havyáir námasā_upasádya /
Sentence: 2    mitráṃ deváṃ mitradʰéyaṃ no astu /
Sentence: 3    anūrādʰā́n havíṣā vardʰáyantaḥ /
Sentence: 4    śatáṃ jīvema śarádaḥ sávīrāḥ /
Sentence: 5_(1b}    citráṃ nákṣatram údagāt purástāt /
Sentence: 6    anūrādʰā́sa íti yád vádanti /
Sentence: 7    tán mitrá eti patʰíbʰir devayā́naiḥ /
Sentence: 8    hiraṇyáyair vítatair antárikṣe /
Sentence: 9_(2a}    índro jyeṣṭhā́m ánu nákṣatram eti /
Sentence: 10    yásmin vr̥tráṃ vr̥tratū́rye tatā́ra //

Verse: 2    {BS 3.1.2.14}
Sentence: 1    tásmin vayám amŕ̥taṃ dúhānāḥ /
Sentence: 2    kṣúdʰaṃ tarema dúritiṃ dúriṣṭim /
Sentence: 3_(2b}    purandarā́ya vr̥ṣabʰā́ya dʰr̥ṣṇáve /
Sentence: 4    áṣāḍhāya sáhamānāya mīḍhúṣe /
Sentence: 5    índrāya jyeṣṭhā́ mádʰumad dúhānā /
Sentence: 6    urúṃ kr̥ṇotu yájamānāya lokám /
Sentence: 7_(3a}    mū́laṃ prajā́ṃ vīrávatīṃ videya /
Sentence: 8    párācy etu nírr̥tiḥ parācā́ /
Sentence: 9    góbʰir nákṣatraṃ paśúbʰiḥ sámaktam /
Sentence: 10    áhar bʰūyād yájamānāya máhyam //

Verse: 3    {BS 3.1.2.15}
Sentence: 1_(3b}    áhar no adyá suvité dadʰātu /
Sentence: 2    mū́laṃ nákṣatram íti yád vádanti /
Sentence: 3    párācīṃ vācā́ nírr̥tiṃ nudāmi /
Sentence: 4    śiváṃ prajā́yai śivám astu máhyam /
Sentence: 5_(4a}    yā́ divyā́ ā́paḥ páyasā saṃbabʰūvúḥ /
Sentence: 6    yā́ antárikṣa utá pā́rtʰivīr yā́ḥ /
Sentence: 7    yā́sām aṣāḍhā́ anuyánti kā́mam /
Sentence: 8    tā́ na ā́paḥ śám̐ syonā́ bʰavantu /
Sentence: 9_(4b}    yā́ś ca kū́pyā yā́ś ca nādyā̀ḥ samudríyāḥ /
Sentence: 10    yā́ś ca vaiśantī́r utá prāsacī́r yā́ḥ //

Verse: 4    {BS 3.1.2.16}
Sentence: 1    yā́sām aṣāḍhā́ mádʰu bʰakṣáyanti /
Sentence: 2    tā́ na ā́paḥ śám̐ syonā́ bʰavantu /
Sentence: 3_(5a}    tán no víśve úpaśr̥ṇvantu devā́ḥ /
Sentence: 4    tád aṣāḍhā́ abʰí sáṃyantu yajñám /
Sentence: 5    tán nákṣatraṃ pratʰatāṃ paśúbʰyaḥ /
Sentence: 6    kr̥ṣír vr̥ṣṭír yájamānāya kalpatām /
Sentence: 7_(5b}    śubʰrā́ḥ kanyā̀ yuvatáyaḥ supéśasaḥ /
Sentence: 8    karmakŕ̥taḥ sukŕ̥to vīryā̀vatīḥ /
Sentence: 9    víśvān devā́n havíṣā vardʰáyantīḥ /
Sentence: 10    aṣāḍhā́ḥ kā́mam úpayāntu yajñám //

Verse: 5    {BS 3.1.2.17}
Sentence: 1_(6a}    yásmin bráhma_abʰyájayat sárvam etát /
Sentence: 2    amúṃ ca lokám idám ū ca sárvam /
Sentence: 3    tán no nákṣatram abʰijíd vijítya /
Sentence: 4    śríyaṃ dadʰātv áhr̥ṇīyamānam /
Sentence: 5_(6b}    ubʰáu lokáu bráhmaṇā sáṃjitā_imáu /
Sentence: 6    tán no nákṣatram abʰijíd vícaṣṭām /
Sentence: 7    tásmin vayáṃ pŕ̥tanāḥ sáṃjayema /
Sentence: 8    táṃ no devā́so ánujānantu kā́mam /
Sentence: 9_(7a}    śr̥ṇvánti śroṇām amŕ̥tasya gopā́m /
Sentence: 10    púṇyām asyā úpaśr̥ṇomi vā́cam //

Verse: 6    {BS 3.1.2.18}
Sentence: 1    mahī́ṃ devī́ṃ víṣṇupatnīm ajūryā́m /
Sentence: 2    pratī́cīm enām̐ havíṣā yajāmaḥ /
Sentence: 3_(7b}    tredʰā́ víṣṇur urugāyó vícakrame /
Sentence: 4    mahī́ṃ dívaṃ pr̥tʰivī́m antárikṣam /
Sentence: 5    tát_śroṇā́_eti śráva iccʰámānā /
Sentence: 6    púṇyam̐ ślókaṃ yájamānāya kr̥ṇvatī́ /
Sentence: 7_(8a}    aṣṭáu devā́ vásavaḥ somyā́saḥ /
Sentence: 8    cátasro devī́r ajárāḥ śráviṣṭhāḥ /
Sentence: 9    té yajñáṃ pāntu rájasaḥ parástāt /
Sentence: 10    saṃvatsarī́ṇam amŕ̥tam̐ svastí //

Verse: 7    {BS 3.1.2.19}
Sentence: 1_(8b}    yajñáṃ naḥ pāntu vásavaḥ purástāt /
Sentence: 2    dakṣiṇatò 'bʰíyantu śráviṣṭhāḥ /
Sentence: 3    púṇyaṃ nákṣatram abʰí sáṃviśāma /
Sentence: 4    mā́ no árātir agʰáśam̐sā_ā́gann /
Sentence: 5_(9a}    kṣatrásya rā́jā váruṇo 'dʰirājáḥ /
Sentence: 6    nákṣatrāṇām̐ śatábʰiṣag vásiṣṭhaḥ /
Sentence: 7    táu devébʰyaḥ kr̥ṇuto dīrgʰám ā́yuḥ /
Sentence: 8    śatám̐ sahásrā bʰeṣajā́ni dʰattaḥ /
Sentence: 9_(9b}    yajñáṃ no rā́jā váruṇa úpayātu /
Sentence: 10    tán no víśve abʰí sáṃyantu devā́ḥ //

Verse: 8    {BS 3.1.2.20}
Sentence: 1    tán no nákṣatram̐ śatábʰiṣag juṣāṇám {BS śatábʰigjuṣāṇám} /dīrgʰám ā́yuḥ prátirad bʰeṣajā́ni /
Sentence: 2  {10a}   ajá ékapād údagāt purástāt /
Sentence: 3    víśvā bʰūtā́ni pratimódamānaḥ /
Sentence: 4    tásya devā́ḥ prasaváṃ yanti sárve /
Sentence: 5    proṣṭhapadā́so amŕ̥tasya gopā́ḥ /
Sentence: 6  {10b}   vibʰrā́jamānaḥ samidʰāná ugráḥ /
Sentence: 7    ā́_antárikṣam aruhad ágaṃ dyā́m /
Sentence: 8    tám̐ sū́ryaṃ devám ajám ékapādam /
Sentence: 9    proṣṭhapadā́so ánuyanti sárve //

Verse: 9    {BS 3.1.2.21}
Sentence: 1  {11a}   áhir budʰníyaḥ prátʰamāna eti /
Sentence: 2    śréṣṭho devā́nām utá mā́nuṣāṇām /
Sentence: 3    táṃ brāhmaṇā́ḥ somapā́ḥ somyā́saḥ /
Sentence: 4    proṣṭhapadā́so abʰírakṣanti sárve /
Sentence: 5  {11b}   catvā́ra ékam abʰí kárma devā́ḥ /
Sentence: 6    proṣṭhapadā́sa íti yā́n vádanti /
Sentence: 7    té budʰníyaṃ pariṣádyam̐ stuvántaḥ /
Sentence: 8    áhim̐ rakṣanti námasā_apasádya /
Sentence: 9  {12a}   pūṣā́ revaty ánveti pántʰām /
Sentence: 10    puṣṭipátī paśupā́ vā́jabastyau //

Verse: 10    {BS 3.1.2.22}
Sentence: 1    imā́ni havyā́ práyatā juṣāṇā́ /
Sentence: 2    sugáir no yā́nair úpayātāṃ yajñám /
Sentence: 3  {12b}   kṣudrā́n paśū́n rakṣatu revátī naḥ /
Sentence: 4    gā́vo no áśvām̐ ánvetu pūṣā́ /
Sentence: 5    ánnam̐ rákṣantau bahudʰā́ vírūpam /
Sentence: 6    vā́jam̐ sanutāṃ yájamānāya yajñám /
Sentence: 7  {13a}   tád aśvínāv aśvayújā_úpayātām /
Sentence: 8    śúbʰaṃ gámiṣṭhau suyámebʰir áśvaiḥ /
Sentence: 9    sváṃ nákṣatram̐ havíṣā yájantau /
Sentence: 10    mádʰvā sáṃpr̥ktau yájuṣā sámaktau //

Verse: 11    {BS 3.1.2.23}
Sentence: 1  {13b}   yáu devā́nāṃ bʰiṣájau havyavāháu /
Sentence: 2    víśvasya dūtā́v amŕ̥tasya gopáu /
Sentence: 3    táu nákṣatraṃ jujuṣāṇā_úpayātām /
Sentence: 4    námo 'śvíbʰyāṃ kr̥ṇumo 'śvayúgbʰyām /
Sentence: 5  {14a}   ápa pāpmā́naṃ bʰáraṇīr bʰarantu /
Sentence: 6    tád yamó rā́jā bʰágavān vícaṣṭām /
Sentence: 7    lokásya rā́jā maható mahā́n hí /
Sentence: 8    sugáṃ naḥ pántʰām ábʰayaṃ kr̥ṇotu /
Sentence: 9  {14b}   yásmin nákṣatre yamá éti rā́jā /
Sentence: 10    yásminn enam abʰyáṣiñcanta devā́ḥ /
Sentence: 11    tád asya citrám̐ havíṣā yajāma /
Sentence: 12    ápa pāpmā́naṃ bʰáraṇīr bʰarantu /
Sentence: 13  {15a}   nivéśanī {15b} yát te devā́ ádadʰuḥ //

Paragraph: 3 
Verse: 1    {BS 3.1.3.24}
Sentence: 1    návo_navo bʰavati jā́yamāno {TS.2.4.14.a:p} yám ādityā́ am̐śúm āpyāyáyanti {TS.2.4.14.b:part} /
Sentence: 2    yé vírūpe sámanasā saṃvyáyantī /
Sentence: 3    samānáṃ tántuṃ pari tātanā́te /
Sentence: 4    vibʰū́ prabʰū́ anubʰū́ viśváto huve /
Sentence: 5    té no nákṣatre havam ā́gametam //
Sentence: 6    vayáṃ devī́ bráhmaṇā saṃvidānā́ḥ /
Sentence: 7    surátnāso devávītiṃ dádʰānāḥ /
Sentence: 8    ahorātré havíṣā vardʰáyantaḥ /
Sentence: 9    áti pāpmā́nam átimuktyā gamema //
Sentence: 10    práty uv adr̥śy āyatī́ //

Verse: 2    {BS 3.1.3.25}
Sentence: 1    vyuccʰántī duhitā́ diváḥ /
Sentence: 2    apó mahī́ vr̥ṇute cákṣuṣā //
Sentence: 3    támo jyótiṣkr̥ṇoti sūnárī /
Sentence: 4    úd usríyāḥ sacate sū́ryaḥ /
Sentence: 5    sácā udyán nákṣatram arcimát /
Sentence: 6    táva_íd uṣo vyúṣi sū́ryasya ca //
Sentence: 7    sáṃ bʰakténa gamemahi /
Sentence: 8    tán no nákṣatram arcimát /
Sentence: 9    bʰānumát téja uccárat /
Sentence: 10    úpa yajñám ihá_āgamat //

Verse: 3    {BS 3.1.3.26}
Sentence: 1    prá nákṣatrāya devā́ya /
Sentence: 2    índrāya_índum̐ havāmahe /
Sentence: 3    sá naḥ savitā́ suvat saním /
Sentence: 4    puṣṭidā́ṃ vīrávattamam //
Sentence: 5    úd u tyáṃ {TS.1.2.8.2:part} citrám {TS.1.4.43.1:part} //
Sentence: 6    áditir na uruṣyatu {TS.1.5.11.r:part} mahī́m ū ṣú mātáram {TS.1.5.11.s p.} /
Sentence: 7    idáṃ víṣṇuḥ {TS.1.2.13.1:part = RV} prá tád víṣṇuḥ {RV.1.154.2:part} /
Sentence: 8    agnír mūrdʰā́ {TS.4.4.4.1.a = RV:part}, bʰúvaḥ {TS.4.4.4.1.d = RV:part} /
Sentence: 9    ánu no 'dya_ánumatir {TS.3.3.11.3.l:part} ánv íd anumate tvám {TS.3.3.11.3.m:part} /
Sentence: 10    havyavā́ham̐ {TB.2.4.1.4.a:part} svìṣṭam {TB.2.4.1.4.b:part} //

Paragraph: 4 
Verse: 1    {BS 3.1.4.27}
Sentence: 1    agnír vā́ akāmayata /
Sentence: 2    annādó devā́nām̐ syām íti /
Sentence: 3    sá etám agnáye kŕ̥ttikābʰyaḥ puroḍā́śam aṣṭā́kapālaṃ níravapat /
Sentence: 4    táto vái sò 'nnādó devā́nām abʰavat /
Sentence: 5    agnír vái devā́nām annādáḥ /
Sentence: 6    yátʰā ha vā́ agnír devánām annādáḥ /
Sentence: 7    evám̐ ha vā́ eṣá manuṣyā̀ṇāṃ bʰavati /
Sentence: 8    yá eténa havíṣā yájate /
Sentence: 9    yá u ca_enad eváṃ véda /
Sentence: 10    só 'tra juhoti /
Sentence: 11    agnáye svā́hā kŕ̥ttikābʰyaḥ svā́hā /
Sentence: 12    ambā́yai svā́hā dulā́yai svā́hā /
Sentence: 13    nitatnyái svā́hā_abʰráyantyai svā́hā /
Sentence: 14    megʰáyantyai svā́hā varṣáyantyai svā́hā /
Sentence: 15    cupuṇī́kāyai svā́hā_íti //

Verse: 2    {BS 3.1.4.28}
Sentence: 1    prajā́patiḥ prajā́ asr̥jata /
Sentence: 2    tā́ asmāt sr̥ṣṭā́ḥ párācīr āyann /
Sentence: 3    tā́sām̐ rohiṇīm abʰyàdʰyāyat /
Sentence: 4    sò 'kāmayata /
Sentence: 5    úpa mā́_āvarteta {BS,AS mā́ varteta) /
Sentence: 6    sám enayā gaccʰeya_íti /
Sentence: 7    sá etáṃ prajā́pataye rohiṇyái carúṃ níravapat /
Sentence: 8    táto vái sā́ tám upā́vartata /
Sentence: 9    sám enayā_agaccʰata {BS enayā gaccʰata} /
Sentence: 10    úpa ha vā́ enaṃ priyám ā́vartate /
Sentence: 11    sáṃ priyéṇa gaccʰate /
Sentence: 12    yá eténa havíṣā yájate /
Sentence: 13    yá u ca_enad eváṃ véda /
Sentence: 14    só 'tra juhoti /
Sentence: 15    prajā́pataye svā́hā rohiṇyái svā́hā rócamānāyai svā́hā prajā́bʰyaḥ svā́hā_íti //

Verse: 3    {BS 3.1.4.29}
Sentence: 1    sómo vā́ akāmayata /
Sentence: 2    óṣadʰīnām̐ rājyám abʰíjayeyam íti /
Sentence: 3    sá etám̐ sómāya mr̥gaśīrṣā́ya śyāmākáṃ carúṃ páyasi níravapat /
Sentence: 4    táto vái sá óṣadʰīnām̐ rājyám abʰyàjayat /
Sentence: 5    samānā́nām̐ ha vái rājyám abʰíjayati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    sómāya svā́hā mr̥gaśīrṣā́ya svā́hā /
Sentence: 10    invakā́bʰyaḥ svā́hā_óṣadʰībʰyaḥ svā́hā /
Sentence: 11    rājyā́ya svā́hā_abʰíjityai svā́hā_íti //

Verse: 4    {BS 3.1.4.30}
Sentence: 1    rudró vā́ akāmayata /
Sentence: 2    paśumā́nt syām íti /
Sentence: 3    sá etám̐ rudrā́ya_ārdrā́yai práiyaṃgavaṃ {BS práiyyaṅgavaṃ} carúṃ páyasi níravapat /
Sentence: 4    táto vái sá paśumā́n abʰavat /
Sentence: 5    paśumā́n ha vái bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    rudrā́ya svā́hā_ārdrā́yai svā́hā /
Sentence: 10    pínvamānāyai svā́hā paśúbʰyaḥ svā́hā_íti //

Verse: 5    {BS 3.1.4.31}
Sentence: 1    r̥kṣā́ vā́ iyám alomákā_āsīt /
Sentence: 2    sā́_akāmayata /
Sentence: 3    óṣadʰībʰir vánaspátibʰiḥ prájāyeya_íti /
Sentence: 4    sá_etám ádityai púnarvasubʰyāṃ carúṃ níravapat /
Sentence: 5    táto vā́ iyám óṣadʰībʰir vánaspátibʰiḥ prā́jāyata /
Sentence: 6    prájāyate ha vái prajáyā paśúbʰiḥ /
Sentence: 7    yá eténa havíṣā yájate /
Sentence: 8    yá u ca_enad eváṃ véda /
Sentence: 9    só 'tra juhoti ádityai svā́hā púnarvasubʰyām {BS,AS /} svā́hā_ā́bʰūtyai svā́hā prájātyai svā́hā_íti //

Verse: 6    {BS 3.1.4.32}
Sentence: 1    bŕ̥haspátir vā́ akāmayata /
Sentence: 2    brahmavarcasī́ syām íti /
Sentence: 3    sá etáṃ bŕ̥haspátaye tiṣyā̀ya naivāráṃ carúṃ páyasi níravapat /
Sentence: 4    táto vái sá brahmavarcasy àbʰavat /
Sentence: 5    brahmavarcasī́ ha vái bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    bŕ̥haspátaye svā́hā tiṣyā̀ya sváhā /
Sentence: 10    brahmavarcasā́ya svā́hā_íti //

Verse: 7    {BS 3.1.4.33}
Sentence: 1    devāsurā́ḥ sáṃyattā āsann /
Sentence: 2    té devā́ḥ sarpébʰya āśreṣā́bʰya ā́jye karambʰáṃ níravapann /
Sentence: 3    tán etā́bʰir evá devátābʰir úpānayan /
Sentence: 4    etā́bʰir ha vái devátābʰir dviṣántaṃ bʰrā́tr̥vyam úpanayati /
Sentence: 5    yá eténa havíṣā yájate /
Sentence: 6    yá u ca_énad eváṃ véda /
Sentence: 7    só 'tra juhoti /
Sentence: 8    sarpébʰyaḥ svā́hā śreṣā́bʰyaḥ svā́hā /
Sentence: 9    dandaśū́kebʰyaḥ svā́hā_íti //

Verse: 8    {BS 3.1.4.34}
Sentence: 1    pitáro vā́ akāmayanta /
Sentence: 2    pitr̥loká r̥dʰnuyāma_íti /
Sentence: 3    tá etáṃ pitŕ̥bʰyo magʰā́bʰyaḥ puroḍā́śam̐ ṣáṭkapālaṃ níravapann /
Sentence: 4    táto vái té pitr̥loká ārdʰnuvan /
Sentence: 5    pitr̥loké ha vā́ r̥dʰnoti /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    pitŕ̥bʰyaḥ svā́hā magʰā́bʰyaḥ {BS,AS /} svā́hā_anagʰā́bʰyaḥ svā́hā_agadā́bʰyaḥ {BS,AS /} svā́hā_arundʰatī́bʰyaḥ svā́hā_íti //

Verse: 9    {BS 3.1.4.35}
Sentence: 1    aryamā́ vā́ akāmayata /
Sentence: 2    paśumā́nt syām íti /
Sentence: 3    sá etám aryamṇé pʰálgunībʰyāṃ carúṃ níravapat /
Sentence: 4    táto vái sá paśumā́n abʰavat /
Sentence: 5    paśumā́n ha vái bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    aryamṇé svā́hā pʰálgunībʰyām̐ svā́hā /
Sentence: 10    paśúbʰyaḥ svā́hā_íti //

Verse: 10    {BS 3.1.4.36}
Sentence: 1    bʰágo vā́ akāmayata /
Sentence: 2    bʰagī́ śreṣṭhī́ devā́nām̐ syām íti /
Sentence: 3    sá etáṃ bʰágāya pʰálgunībʰyāṃ carúṃ níravapat /
Sentence: 4    táto vái sá bʰagī́ śreṣṭhī́ devā́nām abʰavat /
Sentence: 5    bʰagī́ ha vái śreṣṭhī́ samānā́nāṃ bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    bʰágāya svā́hā pʰálgunībʰyām̐ svā́hā /
Sentence: 10    śráiṣṭhyāya svā́hā_íti //

Verse: 11    {BS 3.1.4.37}
Sentence: 1    savitā́ vā́ akāmayata śrán me devā́ dádʰīrann /
Sentence: 2    savitā́ syām íti /
Sentence: 3    sá etám̐ savitré hástāya puroḍā́śaṃ dvā́daśakapālaṃ níravapad āśūnā́ṃ vrīhīṇā́m /
Sentence: 4    táto vái tásmai śrád devā́ ádadʰata /
Sentence: 5    savitā́_abʰavat /
Sentence: 6    śráddʰa vā́ asmai manuṣyā̀ dadʰate /
Sentence: 7    savitā́ samānā́nāṃ bʰavati /
Sentence: 8    yá eténa havíṣā yájate /
Sentence: 9    yá u ca_enad eváṃ véda /
Sentence: 10    só 'tra juhoti /
Sentence: 11    savitré svā́hā hástāya {BS,AS /} svā́hā dadaté {Dumont dádate} svā́hā pr̥ṇaté {BS,AS /} svā́hā prayáccʰate svā́hā pratigr̥bʰṇaté svā́hā_íti //

Verse: 12    {BS 3.1.4.38}
Sentence: 1    tváṣṭā vā́ akāmayata /
Sentence: 2    citráṃ prajā́ṃ vindeya_íti /
Sentence: 3    sá etáṃ tváṣṭre citrā́yai puroḍā́śam aṣṭā́kapālaṃ níravapat /
Sentence: 4    táto vái sá citráṃ prajā́m avindata /
Sentence: 5    citrám̐ ha vái prajā́ṃ vindate /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    tváṣṭre svā́hā citrā́yai svā́hā /
Sentence: 10    cáitrāya svā́hā prajā́yai svā́hā_íti //

Verse: 13    {BS 3.1.4.39}
Sentence: 1    vāyúr vā́ akāmayata /
Sentence: 2    kāmacā́ram eṣú lokéṣv abʰíjayeyam íti /
Sentence: 3    sá etád vāyáve níṣṭyāyai gr̥ṣṭyái dugdʰáṃ páyo níravapat /
Sentence: 4    táto vái sá kāmacā́ram eṣú lokéṣv abʰyàjayat /
Sentence: 5    kāmacā́ram̐ ha vā́ eṣú lokéṣv abʰíjayati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    vāyáve svā́hā níṣṭyāyai svā́hā /
Sentence: 10    kāmacā́rāya svā́hā_abʰíjityai svā́hā_íti //

Verse: 14    {BS 3.1.4.40}
Sentence: 1    indrāgnī́ vā́ akāmayetām /
Sentence: 2    śráiṣṭhyaṃ devā́nām abʰíjayeva_íti /
Sentence: 3    tā́v etám indrāgníbʰyāṃ víśākʰābʰyāṃ puroḍā́śam ékādaśakapālaṃ níravapatām táto vái táu śráiṣṭhyaṃ devā́nām abʰyàjayatām /
Sentence: 4    śráiṣṭhyam̐ ha vái samānā́nām abʰíjayati /
Sentence: 5    yá eténa havíṣā yájate /
Sentence: 6    yá u ca_enad eváṃ véda /
Sentence: 7    só 'tra juhoti /
Sentence: 8    indrāgníbʰyām̐ svā́hā víśākʰābʰyām̐ svā́hā /
Sentence: 9    śráiṣṭhyāya svā́hā_abʰíjityai svā́hā_íti //

Verse: 15    {BS 3.1.4.41}
Sentence: 1    átʰa_etát paurṇamāsyā́ ā́jyaṃ nírvapati /
Sentence: 2    kā́mo vái paurnamāsī́ /
Sentence: 3    kā́ma ā́jyam /
Sentence: 4    kā́mena_evá kā́mam̐ sámardʰayati /
Sentence: 5    kṣiprám enam̐ sá kā́ma úpanamati /
Sentence: 6    yéna kā́mena yájate /
Sentence: 7    só 'tra juhoti /
Sentence: 8    paurṇamāsyái svā́hā kā́māya svā́hā_āgatyai svā́hā_íti //

Paragraph: 5 
Verse: 1    {BS 3.1.5.42}
Sentence: 1    mitró vā́ akāmayata /
Sentence: 2    mitradʰéyam eṣú lokéṣv abʰíjayeyam íti /
Sentence: 3    sá etáṃ mitrā́ya_anūrādʰébʰyaś carúṃ níravapat /
Sentence: 4    táto vái sá mitradʰéyam eṣú lokéṣv abʰyàjayat /
Sentence: 5    mitradʰéyam̐ ha vā́ eṣú lokéṣv abʰíjayati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    mitrā́ya svā́hā_anūrādʰébʰyaḥ svā́hā /
Sentence: 10    mitradʰéyāya svā́hā_abʰíjityai svā́hā_íti //

Verse: 2    {BS 3.1.5.43}
Sentence: 1    índro vā́ akāmayata /
Sentence: 2    jyáiṣṭhyaṃ devā́nām abʰíjayeyam íti /
Sentence: 3    sá etám índrāya jyeṣṭhā́yai puroḍā́śam ékādaśakapālaṃ níravapan mahā́vrīhīṇām /
Sentence: 4    táto vái sá jyáiṣṭhyaṃ devā́nām abʰyàjayat /
Sentence: 5    jyáiṣṭhyam̐ ha vái samānā́nām abʰíjayati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    índrāya svā́hā jyeṣṭhā́yai svā́hā jyáiṣṭhyāya svā́hā_abʰíjityai svā́hā_íti //

Verse: 3    {BS 3.1.5.44}
Sentence: 1    prajā́patir vā́ akāmayata /
Sentence: 2    mū́laṃ prajā́ṃ vindeya_íti /
Sentence: 3    sá etáṃ prajā́pataye mū́lāya carúṃ níravapat /
Sentence: 4    táto vái sá mū́laṃ prajā́m avindata /
Sentence: 5    mū́lam̐ ha vái prajā́ṃ vindate /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    prajā́pataye svā́hā mū́lāya svā́hā /
Sentence: 10    prajā́yai svā́hā_íti //

Verse: 4    {BS 3.1.5.45}
Sentence: 1    ā́po vā́ akāmayanta /
Sentence: 2    samudráṃ kā́mam abʰíjayema_íti /
Sentence: 3    tā́ etám adbʰyò 'ṣāḍhā́bʰyaś carúṃ níravapann /
Sentence: 4    táto vái tā́ḥ samudráṃ kā́mam abʰyàjayan /
Sentence: 5    samudrám̐ ha vái kā́mam abʰíjayati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    adbʰyáḥ svā́hā_aṣāḍhā́bʰyaḥ svā́hā /
Sentence: 10    samudrā́ya svā́hā kā́māya svā́hā /
Sentence: 11    abʰíjityai svā́hā_íti //

Verse: 5    {BS 3.1.5.46}
Sentence: 1    víśve vái devā́ akāmayanta /
Sentence: 2    anapajayyáṃ jayema_íti /
Sentence: 3    tá etáṃ víśvebʰyo devébʰyo 'ṣāḍhā́bʰyaś carúṃ níravapan /
Sentence: 4    táto vái tè 'napajayyám ajayann /
Sentence: 5    anapajayyám̐ ha vái jayati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    víśvebʰyo devébʰyaḥ svā́hā_aṣāḍhā́bʰyaḥ svā́hā /
Sentence: 10    anapajayyā́ya svā́hā jítyai svā́hā_íti //

Verse: 6    {BS 3.1.5.47}
Sentence: 1    bráhma vā́ akāmayata {BS akāmaya} /
Sentence: 2    brahmalokám abʰíjayeyam íti /
Sentence: 3    tád etáṃ bráhmaṇe 'bʰijíte carúṃ níravapat /
Sentence: 4    táto vái tád brahmalokám abʰyàjayat /
Sentence: 5    brahmalokám̐ ha vā́ abʰíjayati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /bráhmaṇe svā́hā_abʰijíte svā́hā /
Sentence: 9    brahmalokā́ya svā́hā_abʰíjityai svā́hā_íti //

Verse: 7    {BS 3.1.5.48}
Sentence: 1    víṣṇur vā́ akāmayata /
Sentence: 2    púṇyam̐ ślókam̐ śr̥ṇvīya /
Sentence: 3    ná mā pāpī́ kīrtír ā́gaccʰed íti /
Sentence: 4    sá etáṃ víṣṇave śroṇā́yai puroḍā́śaṃ trikapāláṃ níravapat /
Sentence: 5    táto vái sá púṇyam̐ ślókam aśr̥ṇuta /
Sentence: 6    ná_enaṃ pāpī́ kīrtír ā́gaccʰat /
Sentence: 7    púṇyam̐ ha vái ślókam̐ śr̥ṇute /
Sentence: 8    ná_enaṃ pāpī́ kīrtir ā́gaccʰati /
Sentence: 9    yá eténa havíṣā yájate /
Sentence: 10    yá u ca_enad eváṃ véda /
Sentence: 11    só 'tra juhoti /
Sentence: 12    víṣṇave svā́hā śroṇā́yai svā́hā /
Sentence: 13    ślókāya svā́hā śrutā́ya svā́hā_íti //

Verse: 8    {BS 3.1.5.49}
Sentence: 1    vásavo vā́ akāmayanta /
Sentence: 2    ágraṃ devátānāṃ párīyāma_íti /
Sentence: 3    tá etáṃ vásubʰyaḥ śráviṣṭhābʰyaḥ puroḍā́śam aṣṭā́kapālaṃ níravapan /
Sentence: 4    táto vái té 'graṃ devátānāṃ páryāyann /
Sentence: 5    ágram̐ ha vái samānā́nāṃ páryeti /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    vásubʰyaḥ svā́hā śráviṣṭhābʰyaḥ svā́hā /
Sentence: 10    ágrāya svā́hā párītyai svā́hā_íti //

Verse: 9    {BS 3.1.5.50}
Sentence: 1    índro vā́ akāmayata /
Sentence: 2    dr̥ḍhó 'śitʰilaḥ syām íti /
Sentence: 3    sá etáṃ váruṇāya śatábʰiṣaje bʰeṣajébʰyaḥ puroḍā́śaṃ dáśakapālaṃ níravapat kr̥ṣṇā́nāṃ vrīhīṇā́m /
Sentence: 4    táto vái sá dr̥ḍhó 'śitʰilo 'bʰavat /
Sentence: 5    dr̥ḍhó ha vā́ áśitʰilo bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    váruṇāya svā́hā śatábʰiṣaje svā́hā /
Sentence: 10    bʰeṣajébʰyaḥ svā́hā_íti //

Verse: 10    {BS 3.1.5.51}
Sentence: 1    ajó vā́ ékapād akāmayata /
Sentence: 2    tejasvī́ brahmavarcasī́ syām íti /
Sentence: 3    sá etám ajā́ya_ékapade proṣṭhapadébʰyaś carúṃ níravapat /
Sentence: 4    táto vái sá tejasvī́ brahmavarcasy àbʰavat /
Sentence: 5    téjasvī́ ha vái brahmavarcasī́ bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    ajā́ya_ékapade svā́hā proṣṭhapadébʰyaḥ svā́hā /
Sentence: 10    téjase svā́hā brahmavarcasā́ya svā́hā_íti //

Verse: 11    {BS 3.1.5.52}
Sentence: 1    áhir vái budʰníyo 'kāmayata /
Sentence: 2    imā́ṃ pratiṣṭhā́ṃ vindeya_íti /
Sentence: 3    sá etám áhaye budʰníyāya proṣṭhapadébʰyaḥ puroḍā́śaṃ bʰū́mikapālaṃ níravapat /
Sentence: 4    táto vái sá imā́ṃ pratiṣṭhām avindata /
Sentence: 5    imā́m̐ ha vái pratiṣṭhā́ṃ vindate /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    áhaye budʰníyāya svā́hā proṣṭhapadébʰyaḥ svā́hā /
Sentence: 10    pratiṣṭhā́yai svā́hā_íti //

Verse: 12    {BS 3.1.5.53}
Sentence: 1    pūṣā́ vā́ akāmayata /
Sentence: 2    paśumā́nt syām íti /
Sentence: 3    sá etáṃ pūṣṇé revátyai carúṃ níravapat /
Sentence: 4    táto vái sá paśumā́n abʰavat /
Sentence: 5    paśumā́n ha vái bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    pūṣṇé svā́hā revátyai svā́hā /
Sentence: 10    paśúbʰyaḥ svā́hā_íti //

Verse: 13    {BS 3.1.5.54}
Sentence: 1    aśvínau vā́ akāmayetām /
Sentence: 2    śrotrasvínāv ábadʰirau syāva_íti /
Sentence: 3    táv etám aśvíbʰyām aśvayúgbʰyāṃ puroḍā́śaṃ dvikapāláṃ níravapatām /
Sentence: 4    táto vái táu śrotrasvínāv ábadʰirāv abʰavatām /
Sentence: 5    śrotrasvī́ ha vā́ ábadʰiro bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    aśvíbʰyām̐ svā́hā_aśvayúgbʰyām̐ svā́hā /
Sentence: 10    śrótrāya svā́hā śrútyai svā́hā_íti //

Verse: 14    {BS 3.1.5.55}
Sentence: 1    yamó vā́ akāmayata /
Sentence: 2    pitr̥ṇā́m̐ rājyám abʰíjayeyam íti /
Sentence: 3    sá etáṃ yamā́yā_apabʰáraṇībʰyaś carúṃ níravapat /
Sentence: 4    táto vái sá pitr̥ṇā́m̐ rājyám abʰyàjayat /
Sentence: 5    samānā́nām̐ ha vái rājyám abʰíjayati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    yamā́ya svā́hā_apabʰáraṇībʰyaḥ svā́hā /
Sentence: 10    rājyā́ya svā́hā_abʰíjityai svā́hā_íti //

Verse: 15    {BS 3.1.5.56}
Sentence: 1    átʰaitád amāvāsyā̀yā ā́jyaṃ nírvapati /
Sentence: 2    kā́mo vā́ amāvāsyā̀ /
Sentence: 3    kā́ma ā́jyam /
Sentence: 4    kā́mena_evá kā́mam̐ sámardʰayati /
Sentence: 5    kṣiprám enam̐ sá kā́ma úpanamati /
Sentence: 6    yéna kā́mena yájate /
Sentence: 7    só 'tra juhoti /
Sentence: 8    amāvāsyā̀yai svā́hā kā́māya svā́hā_ā́gatyai svā́hā_íti //

Paragraph: 6 
Verse: 1    {BS 3.1.6.57}
Sentence: 1    candrámā vā́ akāmayata /
Sentence: 2    ahorātrā́n ardʰamāsā́n mā́sān r̥tū́nt saṃvatsarám āptvā́ /
Sentence: 3    candrámasaḥ sā́yujyam̐ salokátām āpnuyām íti /
Sentence: 4    sá etáṃ candrámase pratīdŕ̥śyāyai puroḍā́śaṃ páñcadaśakapālaṃ níravapat /
Sentence: 5    táto vái sò 'horātrā́n ardʰamāsā́n mā́sān r̥tū́nt saṃvatsarám āptvā́ /
Sentence: 6    candrámasaḥ sā́yujyam̐ salokátām āpnot /
Sentence: 7    ahorātrā́n ha vā́ ardʰamāsā́n mā́sān r̥tū́nt saṃvatsarám āptvā́ /
Sentence: 8    candrámasaḥ sā́yujyam̐ salokátām āpnoti /
Sentence: 9    yá eténa havíṣā yájate /
Sentence: 10    yá u ca_enad eváṃ véda /
Sentence: 11    só 'tra juhoti /
Sentence: 12    candrámase svā́hā pratīdŕ̥śyāyai svā́hā /
Sentence: 13    ahorātrébʰyaḥ svā́hā_ardʰamāsébʰyaḥ svā́hā /
Sentence: 14    mā́sebʰyaḥ svā́hā_r̥túbʰyaḥ svā́hā /
Sentence: 15    saṃvatsarā́ya svā́hā_íti //

Verse: 2    {BS 3.1.6.58}
Sentence: 1    ahorātré vā́ akāmayetām /
Sentence: 2    áty ahorātré mucyevahi /
Sentence: 3    ná nāv ahorātré āpnuyātām íti /
Sentence: 4    té etám ahorātrā́bʰyāṃ carúṃ níravapatām /
Sentence: 5    dvayā́nāṃ vrīhīṇā́m /
Sentence: 6    śuklā́nāṃ ca kr̥ṣṇā́nāṃ ca /
Sentence: 7    savātyór dugdʰé /
Sentence: 8    śvetā́yai ca kr̥ṣṇā́yai ca /
Sentence: 9    táto vái té áty ahorātré amucyete /
Sentence: 10    ná_ene ahorātré āpnutām /
Sentence: 11    áti ha vā́ ahorātré mucyate /
Sentence: 12    ná_enam ahorātré āpnutaḥ /
Sentence: 13    yá eténa havíṣā yájate /
Sentence: 14    yá u ca_enad eváṃ véda /
Sentence: 15    só 'tra juhoti /
Sentence: 16    áhne svā́hā rā́triyai svā́hā /
Sentence: 17    átimuktyai svā́hā_íti //

Verse: 3    {BS 3.1.6.59}
Sentence: 1    uṣā́ vā́ akāmayata /
Sentence: 2    priyā́_ādityásya subʰágā syām íti /
Sentence: 3    sá_etám uṣáse carúṃ níravapat /
Sentence: 4    táto vái sā́ priyā́_ādityásya subʰágā_abʰavat /
Sentence: 5    priyó ha vái samānā́nām̐ subʰágo bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    uṣáse svā́hā vyùṣṭyai svā́hā /
Sentence: 10    vyūṣúṣyai svā́hā vyùccʰantyai svā́hā /
Sentence: 11    vyùṣṭāyai svā́hā_íti //

Verse: 4    {BS 3.1.6.60}
Sentence: 1    átʰa_etásmai nákṣatrāya carúṃ nírvapati /
Sentence: 2    yátʰā tváṃ devā́nām ási /
Sentence: 3    evám aháṃ manuṣyā̀ṇāṃ bʰūyāsam íti /
Sentence: 4    yátʰā ha vā́ etád devā́nām /
Sentence: 5    evám̐ ha vā́ eṣá manuṣyā̀ṇāṃ bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    nákṣatrāya svā́hā_udeṣyaté svā́hā /
Sentence: 10    udyaté svā́hā_úditāya svā́hā /
Sentence: 11    hárase svā́hā bʰárase svā́hā /
Sentence: 12    bʰrā́jase svā́hā téjase svā́hā /
Sentence: 13    tápase svā́hā brahmavarcasā́ya svā́hā_íti //

Verse: 5    {BS 3.1.6.61}
Sentence: 1    sū́ryo vā́ akāmayata /
Sentence: 2    nákṣatrāṇāṃ pratiṣṭhā́ syām íti /
Sentence: 3    sá etám̐ sū́ryāya nákṣatrebʰyaś carúṃ níravapat /
Sentence: 4    táto vái sá nákṣatrāṇāṃ pratiṣṭhā́_abʰavat /
Sentence: 5    pratiṣṭhā́ ha vái samānā́nāṃ bʰavati /
Sentence: 6    yá eténa havíṣā yájate /
Sentence: 7    yá u ca_enad eváṃ véda /
Sentence: 8    só 'tra juhoti /
Sentence: 9    sū́ryāya svā́hā nákṣatrebʰyaḥ svā́hā /
Sentence: 10    pratiṣṭhā́yai svā́hā_íti //

Verse: 6    {BS 3.1.6.62}
Sentence: 1    átʰa_etam ádityai carúṃ nírvapati /
Sentence: 2    iyáṃ vā́ áditiḥ /
Sentence: 3    asyā́m evá prátitiṣṭhati /
Sentence: 4    só 'tra juhoti /
Sentence: 5    ádityai svā́hā pratiṣṭhā́yai svā́hā_íti //

Verse: 7    {BS 3.1.6.63}
Sentence: 1    átʰa_etáṃ víṣṇave carúṃ nírvapati /
Sentence: 2    yajñó vái víṣṇuḥ /
Sentence: 3    yajñá evá_antatáḥ prátitiṣṭhati /
Sentence: 4    só 'tra juhoti /
Sentence: 5    víṣṇave svā́hā yajñā́ya svā́hā /
Sentence: 6    pratiṣṭhā́yai svā́hā_íti //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.