TITUS
Black Yajur-Veda: Taittiriya-Brahmana
Part No. 18
Previous part

Chapter: 2 
Paragraph: 1 
Verse: 1    {BS 3.2.1.1}
Sentence: 1  {a}   tr̥tī́yasyām itó diví sóma āsīt /
Sentence: 2    táṃ gāyatry ā́harat /
Sentence: 3    tásya parṇám accʰidyata /
Sentence: 4    tát parṇò 'bʰavat /
Sentence: 5    tát parṇásya parṇatvám /
Sentence: 6    bráhma vái parṇáḥ /
Sentence: 7    yát parṇaśākʰáyā vatsā́n apākaróti /
Sentence: 8    bráhmaṇā_eváinān apā́karoti /
Sentence: 9    gāyatró vái parṇáḥ /
Sentence: 10    gāyatrā́ḥ paśávaḥ //

Verse: 2    {BS 3.2.1.2}
Sentence: 1    tásmāt trī́ṇi_trīṇi parṇásya palāśā́ni /
Sentence: 2    tripádā gāyatrī́ /
Sentence: 3    yát parṇaśakʰáyā gā́ḥ prārpáyati /
Sentence: 4    sváyā_eváinā devátayā prā́rpayati /
Sentence: 5  {b}   yáṃ kāmáyeta_apaśúḥ syād íti /
Sentence: 6    aparṇā́ṃ tásmai śúṣkāgrām ā́haret /
Sentence: 7    apaśúr evá bʰavati /
Sentence: 8    yáṃ kāmáyeta paśumā́nt syād íti /
Sentence: 9    bahuparṇā́ṃ tásmai bahuśākʰā́m ā́haret /
Sentence: 10    paśumántam eváinaṃ karoti //

Verse: 3    {BS 3.2.1.3}
Sentence: 1    yát prā́cīm āháret /
Sentence: 2    devalokám abʰíjayet /
Sentence: 3    yád údīcīṃ manuṣyalokám /
Sentence: 4    prā́cīm údīcīm āharati /
Sentence: 5    ubʰáyor lokáyor abʰíjityai /
Sentence: 6  {c}   iṣé tvā_ūrjé tvā_íty āha /
Sentence: 7    íṣam evá_ū́rjaṃ yájamāne dadʰāti /
Sentence: 8    vāyávaḥ stʰa_íty āha /
Sentence: 9    vāyúr vā́ antárikṣasya_ádʰyakṣāḥ /
Sentence: 10    antarikṣadevatyā̀ḥ kʰalu vái paśávaḥ //

Verse: 4    {BS 3.2.1.4}
Sentence: 1    vāyáva eváinān páridadāti /
Sentence: 2    prá vā́ enān etád ā́karoti /
Sentence: 3    yád ā́ha /
Sentence: 4    vāyávaḥ stʰa_ity upāyávaḥ stʰa_íty āha /
Sentence: 5    yájamānāya_evá paśū́n úpahvayate /
Sentence: 6    devó vaḥ savitā́ prā́rpáyatv íty āha prásūtyai /
Sentence: 7    śréṣṭhatamāya kármaṇa íty āha /
Sentence: 8    yajñó hí śréṣṭhatamaṃ kárma /
Sentence: 9    tásmād evám āha /
Sentence: 10  {d}   ā́pyāyadʰvam agʰniyā devabʰāgám íty āha //

Verse: 5    {BS 3.2.1.5}
Sentence: 1    vatsébʰyaś ca vā́ etā́ḥ purā́ mauṣyèbʰyaś ca_ā́pyāyanta /
Sentence: 2    devébʰya eváinā índrāya_ā́pyāyati /
Sentence: 3    ū́rjasvatīḥ páyasvatīr íty āha /
Sentence: 4    ū́rjam̐ hí páyaḥ saṃbʰáranti /
Sentence: 5    prajā́vatīr anamīvā́ ayakṣmā́ íty āha prájātyai /
Sentence: 6    mā́ vaḥ stená {AS va stená} īśata mā́_agʰáśam̐sa íty āha gúptyai /
Sentence: 7    rudrásya hetíḥ pári vó vr̥ṇaktv íty āha /
Sentence: 8    rudrā́d eváinās trāyate /
Sentence: 9    dʰruvā́ asmín gópatau syāta bahvī́r íty āha /
Sentence: 10    dʰruvā́ evā́smin bahvī́ḥ karoti //

Verse: 6    {BS 3.2.1.6}
Sentence: 1    yájamānasya paśū́n pāhi_íty āha /
Sentence: 2    paśunā́ṃ gopītʰā́ya /
Sentence: 3    tásmāt sāyáṃ paśáva úpa samā́vartante /
Sentence: 4  {e}   ánadʰaḥ sādayati /
Sentence: 5    gárbʰāṇāṃ dʰŕ̥tyā áprapādāya /
Sentence: 6    tásmād gárbʰāḥ prajā́nām áprapādukāḥ /
Sentence: 7    upári_iva nídadʰāti /
Sentence: 8    upári_iva hí suvargó lokáḥ /
Sentence: 9    suvargásya lokásya sámaṣṭyai //

Paragraph: 2 
Verse: 1    {BS 3.2.2.7}
Sentence: 1  {a}   devásya tvā savitúḥ prasavá íty aśvaparśúm ā́datte prásūtyai /
Sentence: 2    aśvínor bāhúbʰyām íty āha /
Sentence: 3    aśvínau hí devā́nām adʰvaryū́ ā́stām /
Sentence: 4    pūṣṇó hástābʰyām íty āha yátyai /
Sentence: 5    yó vā́ óṣadʰīḥ parvaśó véda /
Sentence: 6    ná_enāḥ sá hinasti /
Sentence: 7    prajā́patir vā́ óṣadʰīḥ parvaśó veda /
Sentence: 8    sá enā ná hinasti aśvaparśvā́ barhír áccʰaiti /
Sentence: 9    prājāpatyó vā́ áśvaḥ sayonitvā́ya //

Verse: 2    {BS 3.2.2.8}
Sentence: 1    óṣadʰīnām áhim̐sāyai /
Sentence: 2  {b}   yajñásya gʰoṣád asi_íty āha /
Sentence: 3    yájamāna evá rayíṃ dadʰāti /
Sentence: 4    prátyuṣṭam̐ rákṣaḥ prátyuṣṭā árātaya íty āha /
Sentence: 5    rákṣasām ápahatyai /
Sentence: 6    prá_iyám agād dʰiṣáṇā barhír áccʰā_íty āha /
Sentence: 7    vidyā́ vái dʰiṣáṇā /
Sentence: 8    vidyáyā_eváinad áccʰaiti /
Sentence: 9    mánunā kr̥tā́ svadʰáyā vítaṣṭa_íty āha /
Sentence: 10    mānavī́ hí párśuḥ svadʰā́kr̥tā //

Verse: 3    {BS 3.2.2.9}
Sentence: 1  {c}   tá ā́vahanti kaváyaḥ purástād íty āha /
Sentence: 2    śuśruvā́m̐so vái kaváyaḥ /
Sentence: 3    yajñáḥ purástāt /
Sentence: 4    mukʰatá evá yajñam ā́rabʰate /
Sentence: 5    átʰo yád etád uktvā́ yátaḥ kútaś ca_āhárati /
Sentence: 6    tát prā́cyā evá diśó bʰavati /
Sentence: 7    devébʰyo júṣṭam ihá barhír āsáda íty āha /
Sentence: 8    barhíṣaḥ sámr̥ddʰyai /
Sentence: 9    kármaṇó 'naparādʰāya /
Sentence: 10    devā́nāṃ pariṣūtám asi_íty āha //

Verse: 4    {BS 3.2.2.10}
Sentence: 1    yád vā́ idáṃ kíṃ ca /
Sentence: 2    tád devā́nāṃ pariṣūtám /
Sentence: 3    átʰo yátʰā vásyase pratiprócya_ā́ha_idáṃ kariṣyāmi_íti /
Sentence: 4    evám evá tád adʰvaryúr devébʰyaḥ pratiprócya barhír dāti /
Sentence: 5    ātmánó 'him̐sāyai /
Sentence: 6  {d}   yā́vataḥ stambā́n paridiśét /
Sentence: 7    yát téṣām uccʰim̐ṣyā́t /
Sentence: 8    áti tád yajñásya recayet /
Sentence: 9    ékam̐ m̐ stambaṃ páridiśet /
Sentence: 10    tám̐ sárvaṃ dāyāt //

Verse: 5    {BS 3.2.2.11}
Sentence: 1    yajñásya_ánatirekāya /
Sentence: 2    varṣávr̥ddʰam asi_íty āha /
Sentence: 3    varṣávr̥ddʰā vā́ óṣadʰayaḥ /
Sentence: 4    dévabarhir íty āha /
Sentence: 5    devébʰya eva_énat karoti /
Sentence: 6    mā́ tvā_anváṅ mā́ tiryág íty āha_áhim̐sāyai /
Sentence: 7    párva te rādʰyāsam íty āha_ŕ̥dʰyai /
Sentence: 8    āccʰettā́ te mā́ riṣam íty āha /
Sentence: 9    ná_asya_ātmáno mīyate /
Sentence: 10    yá eváṃ véda //

Verse: 6    {BS 3.2.2.12}
Sentence: 1    déva barhiś śatávalśaṃ víroha_íty āha /
Sentence: 2    prajā́ vái barhíḥ /
Sentence: 3    prajā́nāṃ prajánanāya /
Sentence: 4    sahásravalśā ví vayám̐ ruhema_íty āha /
Sentence: 5    āśíṣam eva_étā́m ā́śāste /
Sentence: 6    pr̥tʰivyā́ḥ saṃpŕ̥caḥ pāhi_íty āha prátiṣṭhityai /
Sentence: 7    áyuṃ gāyuṃ gān {Dumont áyuṅgāyuṅgān} muṣṭī́n_lunoti /
Sentence: 8    mitʰunatvā́ya prájātyai /
Sentence: 9  {f}   susaṃbʰŕ̥tā tvā sáṃbʰarāmi_íty āha /
Sentence: 10    bráhmaṇā_eváinat sáṃbʰarati //

Verse: 7    {BS 3.2.2.13}
Sentence: 1    ádityai rā́snā_asi_íty āha /
Sentence: 2    iyáṃ vā́ áditiḥ /
Sentence: 3    asyā́ eváinad rā́snāṃ karoti /
Sentence: 4    indrāṇyái saṃnáhanam íty āha /
Sentence: 5    indrāṇī́ vā́ ágre devátānām̐ sámanahyata /
Sentence: 6    sā́_ardʰnot /
Sentence: 7    r̥ddʰyái sáṃnahyati /
Sentence: 8    prajā́ vái barhíḥ /
Sentence: 9    prajā́nām áparāvāpāya /
Sentence: 10    tásmāt snā́vasaṃtatāḥ prajā́ jāyante

Verse: 8    {BS 3.2.2.14}
Sentence: 1  {g}   pūṣā́ te grantʰíṃ gratʰnātv íty āha /
Sentence: 2    púṣṭim evá yájamāne dadʰāti /
Sentence: 3    sá te mā́ stʰād íty āha_áhim̐sāyai /paścāt prā́ñcam úpagūhati /
Sentence: 4    paścā́d vái prācī́nam̐ réto dʰīyate /
Sentence: 5    paścā́d evā́smai prācī́nam̐ réto dadʰāti /
Sentence: 6    índrasya tvā bāhúbʰyām údyaccʰa íty āha /
Sentence: 7    indriyám evá yájamāne dadʰāti /
Sentence: 8    bŕ̥haspáter mūrdʰnā́ harāmi_íty āha /
Sentence: 9    bráhma vái devā́nāṃ bŕ̥haspátiḥ //

Verse: 9    {BS 3.2.2.15}
Sentence: 1    bráhmaṇā_eváinad dʰarati /
Sentence: 2    urv àntarikṣam ánvihī́tyāha gátyai /
Sentence: 3    devaṃgamám asī́ty āha /
Sentence: 4    devā́n evá_enad gamayati /
Sentence: 5  {h}   ánadʰaḥ sādayati /
Sentence: 6    gárbʰāṇāṃ dʰŕ̥tyā áprapādāya /
Sentence: 7    tásmād gárbʰāḥ prajā́nām áprapādukāḥ /
Sentence: 8    upárīva nídadʰāti /
Sentence: 9    upárīva hí suvargó lokáḥ /
Sentence: 10    suvargásya lokásya sámaṣṭyai //

Paragraph: 3 
Verse: 1    {BS 3.2.3.16}
Sentence: 1    pūrvedyúr idʰmā́barhíḥ karoti /
Sentence: 2    yajñám evá_ārábʰya gr̥hītvā́_upavasati /
Sentence: 3    prajā́patir yajñám asr̥jata /
Sentence: 4    tásya_ukʰé asram̐setām /
Sentence: 5    yajñó vái prajā́patiḥ /
Sentence: 6    yát sāṃnāyya_ukʰé bʰávataḥ /
Sentence: 7    yajñásya_evá tád ukʰé úpadadʰāty áprasram̐sāya /
Sentence: 8  {b}   śúndʰadʰvaṃ dáivyāya kármaṇe devayajyā́yā íty āha /
Sentence: 9    devayajyā́yā evá_enāni śundʰati /
Sentence: 10    mātaríśvano gʰarmó 'si_íty āha //

Verse: 2    {BS 3.2.3.17}
Sentence: 1    antárikṣaṃ vái mātaríśvano gʰarmáḥ /
Sentence: 2    eṣā́ṃ lokā́naṃ vídʰr̥tyai /
Sentence: 3    dyáur asi pr̥tʰivy àsī́ty āha /
Sentence: 4    diváś ca hy èṣā́ pr̥tʰivyā́ś ca sáṃbʰr̥tā /
Sentence: 5    yád ukʰā́ /
Sentence: 6    tásmād evám āha /
Sentence: 7    viśvádʰāyā asi paraméṇa dʰā́mnā_íty āha /
Sentence: 8    vŕ̥ṣṭir vái viśvádʰāyāḥ /
Sentence: 9    vŕ̥ṣṭim evá_avarundʰe /
Sentence: 10    dŕ̥m̐hasva mā́ hvār íty āha dʰŕ̥tyai //

Verse: 3    {BS 3.2.3.18}
Sentence: 1  {c}   vásūnāṃ pavítram asī́ty āha /
Sentence: 2    prāṇā́ vái vásavaḥ /
Sentence: 3    téṣāṃ vā́ etád bʰāgadʰéyam /
Sentence: 4    yát pavítram /
Sentence: 5    tébʰya evá_enat karoti /
Sentence: 6    śatádʰāram̐ sahásradʰāram íty āha /
Sentence: 7    prāṇéṣv evā́yur dadʰāti sarvatvā́ya /
Sentence: 8    trivŕ̥t palāśaśākʰā́yāṃ darbʰamáyaṃ bʰavati /
Sentence: 9    trivŕ̥d vái prāṇáḥ /
Sentence: 10    trivŕ̥tam evá prāṇáṃ madʰyató yájamāne dadʰāti //

Verse: 4    {BS 3.2.3.19}
Sentence: 1    saumyáḥ parṇáḥ sayonitvā́ya /
Sentence: 2    sākṣā́t pavítraṃ darbʰā́ḥ /
Sentence: 3  {d}   prā́k sāyám ádʰinídadʰāti /
Sentence: 4    tát prāṇāpānáyo rūpám /
Sentence: 5    tiryák prātáḥ /
Sentence: 6    tád dárśasya rūpám /
Sentence: 7    dārśyám̐ hy ètád áhaḥ /
Sentence: 8    ánnaṃ vái candrámāḥ /
Sentence: 9    ánnaṃ prāṇā́ḥ /
Sentence: 10    ubʰáyam evá_upaity ájāmitvāya //

Verse: 5    {BS 3.2.3.20}
Sentence: 1    tásmād ayám̐ sarvátaḥ pavate /
Sentence: 2  {e}   hutáḥ stokó hutó drapsá íty āha prátiṣṭhityai /
Sentence: 3    havíśó 'skandāya /
Sentence: 4    ná hí hutám̐ svā́hākr̥tam̐ skándati /
Sentence: 5    diví nā́ko nā́māgníḥ /
Sentence: 6    tásya viprúṣo bʰāgadʰéyam /
Sentence: 7    agnáye br̥haté nā́kāya_íty āha /
Sentence: 8    nā́kam evā́gníṃ bʰāgadʰéyena sámardʰayati /
Sentence: 9    svā́hā dyā́vāpr̥tʰivī́bʰyām íty āha /
Sentence: 10    dyā́vāpr̥tʰivyór evá_enat prátiṣṭhāpayati //

Verse: 6    {BS 3.2.3.21}
Sentence: 1    pavítravaty ā́nayati /
Sentence: 2    apā́ṃ ca_evá_óṣadʰīnāṃ ca rásam̐ sám̐sr̥jati /
Sentence: 3    átʰo óṣadʰīṣv evá paśū́n prátiṣṭhāpayati /
Sentence: 4  {f}   anvārábʰya vā́caṃ yaccʰati /
Sentence: 5    yajñásya dʰŕ̥tyai /
Sentence: 6    dʰāráyann āste /
Sentence: 7    dʰāráyanta iva hí duhánti /
Sentence: 8    kā́m adʰukṣa íty āha_ā́ tr̥tī́yasyai /
Sentence: 9    tráya imé lokā́ḥ /
Sentence: 10    imā́n evá lokā́n yájamāno duhe //

Verse: 7    {BS 3.2.3.22}
Sentence: 1    amū́m íti nā́ma gr̥hṇāti /
Sentence: 2    bʰadrám evā́sāṃ kármāvíṣkaroti /
Sentence: 3    sā́ viśvā́yuḥ sā́ viśvávyacāḥ sā́ viśvákarma_íty āha /
Sentence: 4    iyáṃ vái viśvā́yuḥ /
Sentence: 5    antárikṣaṃ viśvávyacāḥ /
Sentence: 6    asáu viśvákarmā /
Sentence: 7    imā́n evá_etā́bʰir lokā́n yatʰāpūrváṃ duhe /
Sentence: 8    átʰo yátʰā pradātré púṇyam āśā́ste /
Sentence: 9    evám evá_énā etád upastauti /
Sentence: 10    tásmāt prā́dād íty unnī́ya vándamānā upastuvántaḥ paśū́n duhanti //

Verse: 8    {BS 3.2.3.23}
Sentence: 1  {g}   bahú dugdʰī́ndrāya devébʰyo havír íti vā́caṃ vísr̥jate /
Sentence: 2    yatʰādevatám evá prásauti /
Sentence: 3    dáivyasya ca mānuṣásya ca vyā́vr̥ttyai /
Sentence: 4    trír āha /
Sentence: 5    tríṣatyā hí devā́ḥ /
Sentence: 6    ávācaṃyamó 'nanvārabʰya_úttarāḥ /
Sentence: 7    áparimitam evā́varundʰe /
Sentence: 8  {h}   ná dārupātréṇa duhyāt /
Sentence: 9    agnivád vái dārupātrám /
Sentence: 10    yád dārupātréṇa duhyāt //

Verse: 9    {BS 3.2.3.24}
Sentence: 1    yātáyāmnā havíṣā yajeta /
Sentence: 2    átʰo kʰálv āhuḥ /
Sentence: 3    puroḍā́śamukʰāni vái havī́m̐ṣi /
Sentence: 4    ná_itáitaḥ puroḍā́śam̐ havíṣo yā́mo 'stī́ti /
Sentence: 5    kā́mam evá dārupātréṇa duhyāt /
Sentence: 6    śūdrá evá ná duhyāt /
Sentence: 7    ásato vā́ eṣá sáṃbʰūtaḥ /
Sentence: 8    yát_śūdráḥ /
Sentence: 9    áhavir evá tád íty āhuḥ /
Sentence: 10    yát_śūdró dógdʰī́ti //

Verse: 10    {BS 3.2.3.25}
Sentence: 1    agnihotrám evá ná duhyāt_śūdráḥ /
Sentence: 2    tád dʰí ná_utpunánti /
Sentence: 3    yadā́ kʰálu vái pavítram atyéti /
Sentence: 4    átʰa tád dʰavír íti /
Sentence: 5  {i}   sáṃpr̥cyadʰvam r̥tāvarīr íty āha /
Sentence: 6    apā́ṃ caivá_oṣadʰīnāṃ ca rásam̐ sám̐sr̥jati /
Sentence: 7    tásmād apā́ṃ ca_óṣadʰīnāṃ ca rásam úpajīvāmaḥ /
Sentence: 8    mandrā́ dʰánasya sātáya íty āha /
Sentence: 9    púṣṭim evá yájamāne dadʰāti /
Sentence: 10    sómena tvā́tanacmī́ndrāya dádʰī́ty āha //

Verse: 11    {BS 3.2.3.26}
Sentence: 1    sómam evá_enat karoti /
Sentence: 2    yó vái sómaṃ bʰakṣayitvā́ /
Sentence: 3    saṃvatsarám̐ sómaṃ ná píbati /
Sentence: 4    punarbʰákṣyo 'sya somapītʰó bʰavati /
Sentence: 5    sómaḥ kʰálu vái sāṃnāyyám /
Sentence: 6    yá eváṃ vidvā́nt sāṃnāyyáṃ píbati /
Sentence: 7    apunarbʰákṣyo 'sya somapītʰó bʰavati /
Sentence: 8  {j}   ná mr̥nmáyenā́pidadʰyāt /
Sentence: 9    yán mr̥nmáyenāpidadʰyā́t /
Sentence: 10    pitr̥devatyàm̐ syāt //

Verse: 12    {BS 3.2.3.27}
Sentence: 1    ayaspātréṇa vā dārupātréṇa vā́_apidadʰāti /
Sentence: 2    tád dʰí sádevam /
Sentence: 3    udanvád bʰavati /
Sentence: 4    ā́po vái rakṣogʰnī́ḥ /
Sentence: 5    rákṣasām ápahatyai /
Sentence: 6    ádastam asi víṣṇave tvā_íty āha /
Sentence: 7    yajñó vái víṣṇuḥ /
Sentence: 8    yajñā́ya_evá_enad ádastaṃ karoti /
Sentence: 9    víṣṇo havyám̐ rakṣasva_íty āha gúptyai /
Sentence: 10  {k}   ánadʰaḥ sādayati /
Sentence: 11    gárbʰāṇāṃ dʰŕ̥tyā áprapādāya /
Sentence: 12    tásmād gárbʰāḥ prajā́nām áprapādukāḥ /
Sentence: 13    upárīva nídadʰāti /
Sentence: 14    upárīva hí suvargó lokáḥ /
Sentence: 15    suvargásya lokásya sámaṣṭyai //

Paragraph: 4 
Verse: 1    {BS 3.2.4.28}
Sentence: 1  {a}   kármaṇe vāṃ devébʰyaś śakeyam íty āha śáktyai /
Sentence: 2    yajñásya vái sáṃtatim ánu prajā́ḥ paśávo yájamānasya sáṃtāyante /
Sentence: 3    yajñásya víccʰittim ánu prajā́ḥ paśávo yájamānasya víccʰidyante /
Sentence: 4    yajñásya sáṃtatir asi yajñásya tvā sáṃtatyai str̥ṇāmi sáṃtatyai tvā yajñásya_íty ā́_ā́havanīyāt sáṃtanoti /
Sentence: 5    yájamānasya prajā́yai paśūnā́m̐ sáṃtatyai /
Sentence: 6  {b}   apáḥ práṇayati /
Sentence: 7    śraddʰā́ vā́ ā́paḥ śraddʰā́m evá_ārábya praṇī́ya prácarati /
Sentence: 8    apáḥ práṇayati /
Sentence: 9    yajñó vā́ ā́paḥ //

Verse: 2    {BS 3.2.4.29}
Sentence: 1    yajñam evá_ārábʰya praṇī́ya prácarati /
Sentence: 2    apáḥ práṇayati /
Sentence: 3    vájro vā́ ā́paḥ /
Sentence: 4    vájram evá bʰrā́tr̥vyebʰyaḥ prahŕ̥tya praṇī́ya prácarati /
Sentence: 5    apáḥ práṇayati /
Sentence: 6    ā́po vái rakṣogʰnī́ḥ /
Sentence: 7    rákṣasām ápahatyai /
Sentence: 8    apáḥ práṇayati /
Sentence: 9    ā́po vái devā́nāṃ priyáṃ dʰā́ma /
Sentence: 10    devā́nām evá priyáṃ dʰā́ma praṇī́ya prácarati //

Verse: 3    {BS 3.2.4.30}
Sentence: 1    apáḥ práṇayati /
Sentence: 2    ā́po vái sárvā devátāḥ /
Sentence: 3    devátā evā́rábʰya praṇī́ya prácarati /
Sentence: 4  {c}   véṣāya tvā_íty āha /
Sentence: 5    véṣāya hy ènad ādatté /
Sentence: 6    prátyuṣṭam̐ rákṣaḥ prátyuṣṭā árātaya íty āha /
Sentence: 7    rákṣasām ápahatyai /
Sentence: 8    dʰū́r asī́ty āha /
Sentence: 9    eṣá vái dʰúryo 'gníḥ /
Sentence: 10    táṃ yád ánupaspr̥śyātīyā́t //

Verse: 4    {BS 3.2.4.31}
Sentence: 1    adʰvaryúṃ ca yájamānaṃ ca prádahet /
Sentence: 2    upaspŕ̥śyā́tyeti /
Sentence: 3    adʰvaryóś ca yájamānasya cā́pradāhāya /
Sentence: 4    dʰū́rva {AS dʰū́rvan} táṃ yo 'smā́n dʰū́rvati táṃ dʰūrva yáṃ vayáṃ dū́rvāma íty āha /
Sentence: 5    dváu vā́vá púruṣau /
Sentence: 6    yáṃ ca_evá dʰū́rvati /
Sentence: 7    yás ca_enaṃ dʰū́rvati /
Sentence: 8    tā́v ubʰáu śucā́_arpayati /
Sentence: 9  {d}   tváṃ devā́nām asi sásnitamaṃ pápritamaṃ júṣṭatamaṃ váhnitamaṃ devahū́tamam íty āha /
Sentence: 10    yatʰāyajúr evá_etát //

Verse: 5    {BS 3.2.4.32}
Sentence: 1    áhrutam asi havirdʰā́nam íty āhá_anārtyai /
Sentence: 2    dŕ̥m̐hasva mā́ hvār íty āha dʰŕ̥tyai /
Sentence: 3    mitrásya tvā cákṣuṣā prekṣa íty āha mitratvā́ya /
Sentence: 4    mā́ bʰér mā́ sáṃviktʰā mā́ tvā him̐siṣam íty āhā́him̐sāyai /
Sentence: 5    yád vái kíṃ ca vā́to ná_abʰivā́ti /
Sentence: 6    tát sárvaṃ varuṇadevatyàm /
Sentence: 7    urú vā́tāya_íty āha /
Sentence: 8    ávāruṇam evá_enat karoti /
Sentence: 9  {e}   devásya tvā savitúḥ prasavá íty āha prásūtyai /
Sentence: 10    aśvínor bāhúbʰyām íty āha //

Verse: 6    {BS 3.2.4.33}
Sentence: 1    aśvínau hí devā́nām adʰvaryū́ ā́stām /
Sentence: 2    pūṣṇó hástābʰyām íty āha /
Sentence: 3    yátyai /
Sentence: 4    agnáye júṣṭaṃ nírvapāmī́ty āha /
Sentence: 5    agnáya evá_enāñ júṣṭaṃ nírvapati /
Sentence: 6    trír yájuṣā /
Sentence: 7    tráya imé lokā́ḥ /
Sentence: 8    eṣā́ṃ lokā́nām ā́ptyai /
Sentence: 9    tūṣṇī́ṃ caturtʰám /
Sentence: 10    áparimitam evá_avarundʰe /
Sentence: 11    sá evám evá_anupūrvám̐ havī́m̐ṣi nírvapati //

Verse: 7    {BS 3.2.4.34}
Sentence: 1  {f}   idáṃ devā́nām idám u naḥ saha_íty āha vyā́vr̥ttyai /
Sentence: 2    spʰātyái tvā ná_árātyā íty āha gúptyai /
Sentence: 3    támasīva vā́ eṣò 'ntáś carati /
Sentence: 4    yáḥ parīṇáhi /
Sentence: 5    súvar abʰí víkʰyeṣaṃ vaiśvānaráṃ jyotir íty āha /
Sentence: 6    súvar evá_abʰí vípaśyati vaiśvānaráṃ jyótiḥ /
Sentence: 7  {g}   dyā́vāpr̥tʰivī́ havíṣi gr̥hītá údavepetām /
Sentence: 8    dŕ̥m̐hantāṃ dúryā dyā́vāpr̥tʰivyór íty āha /
Sentence: 9    gr̥hā́ṇāṃ dyā́vāpr̥tʰivyór dʰŕ̥tyai /
Sentence: 10    urv àntárikṣam ánvihī́ty āha gátyai /
Sentence: 11    ádityās tvā_upástʰe sādayāmī́ty āha /
Sentence: 12    iyáṃ vā́ áditiḥ /
Sentence: 13    asyā́ evá_enad upástʰe sādayati /
Sentence: 14    ágne havyám̐ rakṣasva_íty āha gúptyai //

Paragraph: 5 
Verse: 1    {BS 3.2.5.35}
Sentence: 1    índro vr̥trám ahann /
Sentence: 2    sò 'páḥ / {Dumont takes out /}
Sentence: 3    abʰyàmriyata /
Sentence: 4    tā́sāṃ yán médʰyaṃ yajñíyam̐ sádevam ā́sīt /
Sentence: 5    tád ápódakrāmat /
Sentence: 6    té darbʰā́ abʰavann /
Sentence: 7    yád darbʰáir apá utpunā́ti /
Sentence: 8    yā́ evá médʰyā yajñíyāḥ sádevā ā́paḥ /
Sentence: 9    tā́bʰir evá_enā útpunāti /
Sentence: 10    dvā́bʰyām útpunāti //

Verse: 2    {BS 3.2.5.36}
Sentence: 1    dvipā́d yájamānaḥ prátiṣṭhityai /
Sentence: 2    devó vaḥ savitā́_utpunātv íty āha /
Sentence: 3    savitŕ̥prasūta evá_enā útpunāti /
Sentence: 4    áccʰidreṇa pavítreṇā_íty āha /
Sentence: 5    asáu vā́ adityó 'ccʰidraṃ pavítram /
Sentence: 6    téna_evá_enā útpunāti /
Sentence: 7    vásoḥ sū́ryasya raśmíbʰir íty āha /
Sentence: 8    prāṇā́ vā́ ā́paḥ {BS /} prāṇā́ vásavaḥ /
Sentence: 9    prāṇā́ raśmáyaḥ //

Verse: 3    {BS 3.2.5.37}
Sentence: 1  {a}   prāṇáir evá prāṇā́nt sáṃpr̥ṇakti /
Sentence: 2    sāvitriyā́_r̥cā́ /
Sentence: 3    savitŕ̥prasūtaṃ me kármāsad íti /
Sentence: 4    savitŕ̥prasūtam evá_asya kárma bʰavati /
Sentence: 5    paccʰó gāyatriyā́ triṣṣamr̥ddʰatvā́ya /
Sentence: 6  {b}   ā́po devīr agrepuvo agreguva íty āha /
Sentence: 7    rūpám evá_āsām etán mahimā́naṃ vyā́caṣṭe /
Sentence: 8    ágra imáṃ yajñáṃ nayatā́gre yajñápatim íty āha /
Sentence: 9    ágre evá yajñáṃ nayanti /
Sentence: 10    ágre yajñápatim //

Verse: 4    {BS 3.2.5.38}
Sentence: 1    yuṣmā́n índro 'vr̥ṇīta vr̥tratū́rye yūyám índram avr̥ṇīdʰvaṃ vr̥tratū́rya íty āha /
Sentence: 2    vr̥trám̐ ha haniṣyánn índra ā́po vavre /
Sentence: 3    ā́po ha_índraṃ vavrire /
Sentence: 4    saṃjñā́m evá_āsām etát sā́mānaṃ vyā́caṣṭe /
Sentence: 5    prókṣitāḥ stʰa_íty āha /
Sentence: 6    ténā́paḥ prókṣitāḥ /
Sentence: 7  {c}   agnáye vo júṣṭaṃ prókṣāmy agnī́ṣómābʰyām íty āha /
Sentence: 8    yatʰādevatám evá_enān prókṣati /
Sentence: 9    tríḥ prókṣati /
Sentence: 10    tryā̀vr̥d dʰí yajñaḥ //

Verse: 5    {BS 3.2.5.39}
Sentence: 1    átʰo rákṣasām ápahatyai /
Sentence: 2    śúndʰadʰvaṃ dáivyāya kármaṇe devayajyā́yā íty āha /
Sentence: 3    devayajyā́yā evá_enāni śundʰati /
Sentence: 4    tríḥ prókṣati /
Sentence: 5    tryā̀vr̥d dʰí yajñáḥ /
Sentence: 6    átʰo medʰyatvā́ya /
Sentence: 7    ávadʰūtam̐ rákṣó 'vadʰūtā árātaya íty āha /
Sentence: 8    rákṣasām ápahatyai /
Sentence: 9    ádityās tvág asī́ty āha /
Sentence: 10    iyáṃ vā́ áditiḥ //

Verse: 6    {BS 3.2.5.40}
Sentence: 1    asyā́ evá_enat tvácaṃ karoti /
Sentence: 2    práti tvā pr̥tʰivī́ vettv {AS vetv} íty āha prátiṣṭhityai /
Sentence: 3    purástāt pratīcī́nagrīvam úttaraloma_úpastr̥ṇāti medʰyatvā́ya /
Sentence: 4    tásmāt purástāt pratyáñcaḥ paśā́vo médʰam úpatiṣṭhante /
Sentence: 5    tásmāt prajā́ mr̥gáṃ grā́hukāḥ /
Sentence: 6    yajñó devébʰyo nílāyata /
Sentence: 7    kŕ̥ṣṇo rūpáṃ kr̥tvā́ /
Sentence: 8    yát kr̥ṣṇājiné havír adʰyavahánti /
Sentence: 9    yajñā́d evá tád yajñáṃ práyuṅkte /
Sentence: 10    havíṣó 'skandāya //

Verse: 7    {BS 3.2.5.41}
Sentence: 1  {d}   adʰiṣávaṇam asi vānaspatyám íty āha /
Sentence: 2    adʰiṣávaṇam evá_enat karoti /
Sentence: 3    práti tvā_ā́dityās tvág vettv {AS vetv} íty āha sayatvā́ya /
Sentence: 4    agnés tanū́r asī́ty āha /
Sentence: 5    agnér vā́ eṣā́ tanū́ḥ /
Sentence: 6    yád óṣadʰayaḥ /
Sentence: 7    vācó visárjanam íty āha /
Sentence: 8    yadā́ hí prajā́ óṣadʰīnām aśnánti /
Sentence: 9    átʰa vā́caṃ vísr̥jante /
Sentence: 10    devávītaye tvā gr̥hṇāmī́ty āha //

Verse: 8    {BS 3.2.5.42}
Sentence: 1    devátābʰir evá_enat sámardʰayati /
Sentence: 2    ádrir asi vānaspatyá íty āha /
Sentence: 3    grā́vāṇam evá_enat karoti /
Sentence: 4    sá idáṃ devébʰyo havyám̐ suśámi śamiṣva_íty āha śā́ntyai /
Sentence: 5  {e}   háviṣkr̥d éhī́ty āha /
Sentence: 6    yá evá devā́nām̐ haviṣkŕ̥taḥ /
Sentence: 7    tā́n hvyati /
Sentence: 8    trír hvayati /
Sentence: 9    tríṣatyā hí devā́ḥ /
Sentence: 10    íṣam ā́vada_ū́rjam ā́vada_íty āha //

Verse: 9    {BS 3.2.5.43}
Sentence: 1    íṣam evá_ūrjaṃ yájamāne dadʰāti /
Sentence: 2    dyumád vadata vayám̐ saṃgʰātáṃ jeṣma_íty āha bʰrā́tr̥vyābʰibʰūtyai /
Sentence: 3    mánoḥ śraddʰā́devasya yájamānasya_asuragʰnī́ vā́k /
Sentence: 4    yajñāyudʰéṣu práviṣṭāsīt /
Sentence: 5    té 'surā yā́vanto yajñāyudʰā́nām udvádatām upā́śr̥ṇvann /
Sentence: 6    té párābʰavan /
Sentence: 7    tásmāt svā́nāṃ mádʰye 'vasā́ya yajeta /
Sentence: 8    yā́vanto 'sya bʰrā́tr̥vyā yajñāyudʰā́nām udvádatām upaśr̥ṇvánti /
Sentence: 9    té párābʰavanti /
Sentence: 10    uccáiḥ samā́hantavā́ āha víjityai //

Verse: 10    {BS 3.2.5.44}
Sentence: 1    vr̥ṅktá eṣām indriyáṃ vīryàm /
Sentence: 2    śréṣṭha eṣāṃ bʰavati /
Sentence: 3  {f}   varṣávr̥ddʰam asi práti tvā varṣávr̥ddʰaṃ vettv {AS vetv} íty āha /
Sentence: 4    varṣávr̥ddʰā vā́ óṣadʰayaḥ /
Sentence: 5    varṣávr̥ddʰā iṣī́kāḥ sámr̥ddʰyai /
Sentence: 6    yajñám̐ rákṣām̐sy ánu prā́viśan /
Sentence: 7    tā́ny asnā́ paśúbʰyo nirávādayanta /
Sentence: 8    túṣair óṣadʰībʰyaḥ /
Sentence: 9    párāpūtam̐ rákṣaḥ párāpūtā árātaya íty āha /
Sentence: 10    rákṣasām ápahatyai //

Verse: 11    {BS 3.2.5.45}
Sentence: 1    rákṣasāṃ bʰāgò 'sī́ty āha /
Sentence: 2    túṣair evá rákṣām̐si nirávadayate /
Sentence: 3    apá úpaspr̥śati medʰyatvā́ya /
Sentence: 4  {g}   vāyúr vo vívinaktv íty āha /
Sentence: 5    pavítraṃ vái vāyúḥ /
Sentence: 6    punā́ty evá_enān /
Sentence: 7    antárikṣād iva vā́ eté práskandanti /
Sentence: 8    yé śū́rpāt /
Sentence: 9    devó vaḥ savitā́ híraṇyapāṇiḥ prátigr̥hṇātv íty āha prátiṣṭhityai /
Sentence: 10    havíṣó 'skandāya /
Sentence: 11    tríṣ pʰalī́kartavā́ āha /
Sentence: 12    tryā̀vr̥d dʰí yajñáḥ /
Sentence: 13    átʰo medʰyatvā́ya //

Paragraph: 6 
Verse: 1    {BS 3.2.6.46}
Sentence: 1    ávadʰūtam̐ rákṣó 'vadʰūtā árātaya íty āha /
Sentence: 2    rákṣasām ápahatyai /
Sentence: 3    ádityās tvág asī́ty āha /
Sentence: 4    iyáṃ vā́ áditiḥ /
Sentence: 5    asyā́ evá_enat tvácaṃ karoti /
Sentence: 6    práti tvā pr̥tʰivī́ vettv {AS vetv} íty āha prátiṣṭhityai /
Sentence: 7    purástāt pratīcī́nagrīvam úttaraloma_úpastr̥ṇāti medʰyatvā́ya /
Sentence: 8    tásmāt purástāt pratyáñcaḥ paśávo médʰam úpatiṣṭhante /
Sentence: 9    tásmāt prajā́ mr̥gáṃ grā́hukāḥ /
Sentence: 10    yajñó devébʰyo nílāyata //

Verse: 2    {BS 3.2.6.47}
Sentence: 1  {a}   kŕ̥ṣṇo rūpáṃ kr̥tvā́ /
Sentence: 2    yát kr̥ṣṇājiné havír adʰipináṣṭi /
Sentence: 3    yajñā́d evá tád yajñáṃ práyuṅkte /
Sentence: 4    havíṣó 'skandāya /
Sentence: 5  {b}   dyā́vāpr̥tʰivī́ saha_ā́stām /
Sentence: 6    té śamyāmātrám ékam ahar vyáitām̐ śamyāmātrám ékam áhaḥ /
Sentence: 7    diváḥ skambʰanír asi práti tvā_ā́dityās tvág vettv {AS vetv} íty āha /
Sentence: 8    dyā́vāpr̥tʰivyór vī́tyai /
Sentence: 9    dʰiṣáṇāsi parvatyā́ práti tvā diváḥ skambʰanír vettv {AS vetv} íty āha /
Sentence: 10    dyā́vāpr̥tʰivyór vídʰr̥tyai //

Verse: 3    {BS 3.2.6.48}
Sentence: 1    dʰiṣáṇāsi pārvateyī́ práti tvā parvatír vettv {AS vetv} íty āha /
Sentence: 2    dyā́vā́pr̥tʰivyór dʰŕ̥tyai /
Sentence: 3  {c}   devásya tvā savitúḥ prasavá íty āha prásūtyai /
Sentence: 4    aśvínor bāhúbʰyām íty āha /
Sentence: 5    aśvínau hí devā́nām adʰvaryū́ ā́stām /
Sentence: 6    pūṣṇó hástābʰyām íty āha yátyai /
Sentence: 7    ádʰivapāmī́ty āha /
Sentence: 8    yatʰādevatám evá_enān ádʰivapati /
Sentence: 9    dʰānyàm asi dʰinuhí devā́n íty āha /
Sentence: 10    etásya yájuṣo vīryèṇa //

Verse: 4    {BS 3.2.6.49}
Sentence: 1    yā́vad ékā devátā kāmáyate yā́vad ékā /
Sentence: 2    tā́vad ā́hutiḥ pratʰate /
Sentence: 3    ná hí tád ásti /
Sentence: 4    yát tā́vad evá syā́t /
Sentence: 5    yā́vaj juhóti /
Sentence: 6  {d}   prāṇā́ya tvā_apānā́ya tvā_íty āha /
Sentence: 7    prāṇā́n evá yájamāne dadʰāti /
Sentence: 8    dīrgʰā́m ánu prásitim ā́yuṣe dʰām íty āha /
Sentence: 9    ā́yur evá_asmin dadʰāti /
Sentence: 10    antárikṣād iva vā́ etā́ni práskandanti /
Sentence: 11    yā́ni dr̥ṣádaḥ /
Sentence: 12    devó vaḥ savitā́ híraṇyapāniḥ práti gr̥hṇātv íty āha prátiṣṭhityai /
Sentence: 13    havíṣó 'skandāya /
Sentence: 14    ásaṃvapantī pim̐ṣā_aṇū́ni kurutād íty āha medʰyatvā́ya //

Paragraph: 7 
Verse: 1    {BS 3.2.7.50}
Sentence: 1    dʰŕ̥ṣṭir asi bráhma yaccʰa_íty āha dʰŕ̥tyai /
Sentence: 2    ápāgne 'gním āmā́daṃ jahi níṣkravyā́dam̐ sedʰa_ā́ devayájaṃ vaha_íty āha /
Sentence: 3    yá evá_āmā́t kravyā́t /
Sentence: 4    tám apahátya /
Sentence: 5    médʰye 'gnáu kapā́lam úpadadʰāti /
Sentence: 6    nírdagdʰam̐ rákṣo nírdagdʰā árātaya íty āha /
Sentence: 7    rákṣām̐sy evá nírdahati /
Sentence: 8    agnivátyúpadadʰāti /
Sentence: 9    asmínn evá loke jyótir dʰatte /
Sentence: 10    áṅgāram ádʰivartayati //

Verse: 2    {BS 3.2.7.51}
Sentence: 1    antárikṣa evá jyótir dʰatte /
Sentence: 2    ādityám evá_amúṣmin loké jyótir dʰatte /
Sentence: 3    jyótiṣmanto 'smā imé lokā́ bʰavanti /
Sentence: 4    yá eváṃ véda /
Sentence: 5    dʰruvám asi pr̥tʰivī́ṃ dr̥m̐ha_íty āha /
Sentence: 6    pr̥tʰivī́m evá_eténa dr̥m̐hati /
Sentence: 7  {b}   dʰartrám asy antárikṣaṃ dr̥m̐ha_íty āha /
Sentence: 8    antárikṣam evá_eténa dr̥m̐hati /
Sentence: 9    dʰarúṇam asi dívaṃ dr̥m̐ha_íty āha /
Sentence: 10    dívam evá_eténa dr̥m̐hati //

Verse: 3    {BS 3.2.7.52}
Sentence: 1    dʰármāsi díśo dr̥m̐ha_íty āha /
Sentence: 2    díśa evá_eténa dr̥m̐hati /
Sentence: 3    imā́n evá_etáir lokā́n dr̥m̐hati /
Sentence: 4    dŕ̥m̐hante 'smā imé lokā́ḥ prajáyā paśúbʰiḥ /
Sentence: 5    yá eváṃ véda /
Sentence: 6  {c}   trī́ṇy ágre kapā́lāny úpadadʰāti /
Sentence: 7    tráya imé lokā́ḥ /
Sentence: 8    eṣā́ṃ lokā́nām ā́ptyai /
Sentence: 9    ekam ágre kapā́lam úpadadʰāti /
Sentence: 10    ékaṃ vā́ ágre kapā́laṃ púruṣasya saṃbʰávati //

Verse: 4    {BS 3.2.7.53}
Sentence: 1    átʰa dvé /
Sentence: 2    átʰa trī́ṇi /
Sentence: 3    átʰa catvā́ri /
Sentence: 4    átʰa_aṣṭáu /
Sentence: 5    tásmād aṣṭā́kapālaṃ púruṣasya śíraḥ /
Sentence: 6    yád eváṃ kapā́lāny upadádʰāti /
Sentence: 7    yajñó vái prajā́patiḥ /
Sentence: 8    yajñám evá prajā́patim̐ sám̐skaroti /
Sentence: 9    ātmā́nam evá tát sám̐skaroti /
Sentence: 10    tám̐ sám̐skr̥tam ātmā́nam //

Verse: 5    {BS 3.2.7.54}
Sentence: 1    amúṣmin_loké 'nu páraiti /
Sentence: 2  {d}   yád aṣṭā́v upadádʰāti /
Sentence: 3    gāyatriyā́ tát sáṃmitam /
Sentence: 4    yán náva /
Sentence: 5    trivŕ̥tā tát /
Sentence: 6    yád dáśa /
Sentence: 7    virā́jā tát /
Sentence: 8    yád ékādaśa /
Sentence: 9    triṣṭúbʰā tát /
Sentence: 10    yád dvā́daśa //

Verse: 6    {BS 3.2.7.55}
Sentence: 1    jágatyā tát /
Sentence: 2    cʰándaḥsaṃmitāni sá upadádʰat kapā́lāni /
Sentence: 3    imā́n lokā́n anupūrváṃ díśo vídʰr̥tyai dr̥m̐hati /
Sentence: 4    átʰa_ā́yuḥ prāṇā́n prajā́ṃ paśū́n yájamāne dadʰāti /
Sentence: 5    sajātā́n asmā abʰíto bahulā́n karoti /
Sentence: 6  {e}   cítaḥ stʰa_íty āha /
Sentence: 7    yatʰāyajúr evá_etát /
Sentence: 8    bʰŕ̥gūṇām áṅgirasāṃ tápasā tapyadʰvam íty āha /
Sentence: 9    devátānām evá_enāni tápasā tapati /
Sentence: 10    tā́ni tátaḥ sám̐stʰite /
Sentence: 11    yā́ni gʰarmé kapā́lāny upacinvánti vedʰása íti cátuṣpadayā_r̥cā́ vímuñcati /
Sentence: 12    cátuṣpādaḥ paśávaḥ /
Sentence: 13    paśúṣv evá_upáriṣṭāt prátitiṣṭhati //

Paragraph: 8 
Verse: 1    {BS 3.2.8.56}
Sentence: 1  {a}   devásya tvā savitúḥ prasavá íty āha prásūtyai /
Sentence: 2    aśvínor bāhúbʰyām íty āha /
Sentence: 3    aśvínau hí devā́nām adʰvaryū́ ā́stām /
Sentence: 4    pūṣṇó hástābʰyām íty āha yátyai /
Sentence: 5    sáṃvapāmī́ty āha /
Sentence: 6    yatʰādevatám evá_enāni sáṃvapati /
Sentence: 7  {b}   sám ā́po adbʰír agmata sám óṣadʰayo rásena_íty āha /
Sentence: 8    ā́po vā́ óṣadʰīr jinvanti /
Sentence: 9    óṣadʰayo 'pó jinvanti /
Sentence: 10    anyā́ vā́ etā́sām anyā́ jinvanti //

Verse: 2    {BS 3.2.8.57}
Sentence: 1    tásmād evám āha /
Sentence: 2    sám̐ revátīr jágatībʰir mádʰumatīr mádʰumatībʰiḥ sr̥jyadʰvam íty āha /
Sentence: 3    ā́po vái revátīḥ /
Sentence: 4    paśávo jágatīḥ /
Sentence: 5    óṣadʰayo mádʰumatīḥ /
Sentence: 6    ā́pa óṣadʰīḥ paśū́n /
Sentence: 7    tā́n evá_asmā ekadʰā́ sam̐sŕ̥jya /
Sentence: 8    mádʰumataḥ karoti /
Sentence: 9    adbʰyáḥ pári prájātāḥ stʰa sám adbʰiḥ pr̥cyadʰvam íti paryā́plāvayati /
Sentence: 10    yátʰā súvr̥ṣṭa imā́m anuvisŕ̥tya //

Verse: 3    {BS 3.2.8.58}
Sentence: 1    ā́pa óṣadʰīr maháyanti /
Sentence: 2    tādŕ̥g evá tát /
Sentence: 3    jánayatyai tvā sáṃyaumī́ty āha /
Sentence: 4    prajā́ evá_eténa dādʰāra /
Sentence: 5    agnáye tvā_agnī́ṣómābʰyām íty āha vyā́vr̥ttyai /
Sentence: 6    makʰásya śíro 'sī́ty āha /
Sentence: 7    yajñó vái makʰáḥ /
Sentence: 8    tásya_etát_śíraḥ /
Sentence: 9    yát puroḍā́śaḥ /
Sentence: 10    tásmād evám āha //

Verse: 4    {BS 3.2.8.59}
Sentence: 1  {c}   gʰarmò 'si viśvā́yur íty āha /
Sentence: 2    víśvam evá_ā́yur yájamāne dadʰāti /
Sentence: 3    urú pratʰasva_urú te yajñápatiḥ pratʰatām íty āha /
Sentence: 4    yájamānam evá prajáyā paśúbʰiḥ pratʰayati /
Sentence: 5    tvácaṃ gr̥hṇīṣva_íty āha /
Sentence: 6    sárvam evá_enam̐ sátanuṃ karoti /
Sentence: 7    átʰāpá ānī́ya pári mārṣṭi /
Sentence: 8    mām̐sá evá tát tvácaṃ dadʰāti /
Sentence: 9    tásmāt tvacā́ mām̐sáṃ cʰannám /
Sentence: 10  {d}   gʰarmó vā́ eṣó 'śāntaḥ //

Verse: 5    {BS 3.2.8.60}
Sentence: 1    ardʰamāsè_'rdʰamāse právr̥jyate /
Sentence: 2    yát puroḍā́śaḥ /
Sentence: 3    sá īśvaró yájamānam̐ śucā́ pradáhaḥ /
Sentence: 4    páryagni karoti /
Sentence: 5    paśúm evá_enam akaḥ /
Sentence: 6    śāntyā ápradāhāya /
Sentence: 7    tríḥ páryagni karoti /
Sentence: 8    tryā̀vr̥d dʰí yajñáḥ /
Sentence: 9    átʰo rákṣasām ápahatyai /
Sentence: 10    antáritam̐ rákṣo 'ntáritā árātaya íty āha //

Verse: 6    {BS 3.2.8.61}
Sentence: 1    rákṣasām antárhityai /
Sentence: 2    puroḍā́śaṃ vā́ ádʰiśritam̐ rákṣām̐sy ajigʰām̐san /
Sentence: 3    diví nā́ko nā́māgnī́ rakṣohā́ /
Sentence: 4    sá evá_asmād rákṣām̐sy ápāhann /
Sentence: 5    devás tvā savitā́ śrapayatv íty āha /
Sentence: 6    savitŕ̥prasūta evá_enam̐ śrapayati /
Sentence: 7    várṣiṣṭhe ádʰi nā́ka íty āha /
Sentence: 8    rákṣasām ápahatyai /
Sentence: 9    agnís te tanúvaṃ mā́_atidʰāg íty āhā́natidāhāya /
Sentence: 10    ágne havyám̐ rakṣasva_íty āha gúptyai //

Verse: 7    {BS 3.2.8.62}
Sentence: 1    ávidahantaś śrapayata_íti vā́caṃ vísr̥jate /
Sentence: 2    yajñám evá havīm̐śy abʰivyāhŕ̥tya prátanute /
Sentence: 3    purorúcam ávidāhāya śŕ̥tyai karoti /
Sentence: 4  {e}   mastíṣko vái puroḍā́śaḥ /
Sentence: 5    táṃ yán ná_abʰivāsáyet /
Sentence: 6    āvír mastíṣkaḥ syāt /
Sentence: 7    abʰívāsayati /
Sentence: 8    tásmād gúhā mastíṣkaḥ /
Sentence: 9    bʰásmanā_abʰívāsayati /
Sentence: 10    tásmān mām̐sénā́stʰi cʰannám //

Verse: 8    {BS 3.2.8.63}
Sentence: 1    vedénābʰivāsayati /
Sentence: 2    tásmāt kéśaiḥ śiraś cʰannám /
Sentence: 3    ákʰalatibʰāvuko bʰavati /
Sentence: 4    yá eváṃ véda /
Sentence: 5    paśór vái pratimā́ puroḍā́śaḥ /
Sentence: 6    sá ná_ayajúṣkam abʰivā́syaḥ /
Sentence: 7    vŕ̥tʰā_iva syāt /
Sentence: 8    īśvarā́ yájamānasya paśávaḥ prámetoḥ /
Sentence: 9    sáṃ bráhmaṇā pr̥cyasva_íty āha /
Sentence: 10    prāṇā́ vái bráhma //

Verse: 9    {BS 3.2.8.64}
Sentence: 1    prāṇā́ḥ paśávaḥ /
Sentence: 2    prāṇáir evá paśū́nt sáṃpr̥ṇakti /
Sentence: 3    ná pramā́yukā bʰavanti /
Sentence: 4    yájamāno vái puroḍā́śaḥ /
Sentence: 5    prajā́ paśávaḥ púrīṣam /
Sentence: 6    yád evám abʰivāsáyati /
Sentence: 7    yájamānam evá prajáyā paśúbʰiḥ sámardʰayati /
Sentence: 8  {f}   devā́ vái havír bʰr̥tvā́ {Dumont mr̥tvā́?}_abruvann /
Sentence: 9    kásminn idáṃ mrakṣyāmaha íti /
Sentence: 10    sò 'gnír abravīt //

Verse: 10    {BS 3.2.8.65}
Sentence: 1    máyi tanū́ḥ sáṃ nídʰaddʰvam {BS nídʰadʰvam} /
Sentence: 2    aháṃ vas táṃ janayiṣyāmi /
Sentence: 3    yásmin mrakṣyádʰva íti /
Sentence: 4    té devā́ agnáu tanū́ḥ sáṃ nyàdadʰata /
Sentence: 5    tásmād āhuḥ /
Sentence: 6    agníḥ sárvā devátā íti /
Sentence: 7    só 'ṅgāreṇāpáḥ / {Dumont takes out /}
Sentence: 8    abʰyàpātayat /
Sentence: 9    táta ekatò 'jāyata /
Sentence: 10    sá dvitī́yam abʰyàpātayat //

Verse: 11    {BS 3.2.8.66}
Sentence: 1    táto dvitò 'jāyata /
Sentence: 2    sá tr̥tī́yam abʰyàpātayat /
Sentence: 3    tátas tritò 'jāyata /
Sentence: 4    yád adbʰyó 'jāyanta /
Sentence: 5    tád āpyā́nām āpyatvám /
Sentence: 6    yád ātmábʰyó 'jāyanta /
Sentence: 7    tád ātmyā́nām ātmyatvám /
Sentence: 8    té devā́ āpyéṣv amr̥jata /
Sentence: 9    āpyā́ amr̥jata sū́ryābʰyudite /
Sentence: 10    sū́ryābʰyuditaḥ sū́ryābʰinimrukte //

Verse: 12    {BS 3.2.8.67}
Sentence: 1    sū́ryābʰinimruktaḥ kunakʰíni /
Sentence: 2    kunakʰī́ śyāvádati /
Sentence: 3    śyāvádann agradidʰiṣáu /
Sentence: 4    agradidʰiṣúḥ parivitté /
Sentence: 5    parivittó vīraháṇi /
Sentence: 6    vīrahā́ brahmaháṇi tád brahmaháṇaṃ ná_atyacyavata /
Sentence: 7    antarvedí nínayaty ávarudʰyai /
Sentence: 8    úlmukena_abʰígr̥hṇāti śr̥tatvā́ya /
Sentence: 9    śr̥tákāmā iva hí devāḥ //

Paragraph: 9 
Verse: 1    {BS 3.2.9.68}
Sentence: 1  {a}   devásya tvā savitúḥ prasavá íti spʰyám ā́datte prasūtyái /
Sentence: 2    aśvínor bāhúbʰyām íty āha /
Sentence: 3    aśvínau hí devā́nām adʰvaryū́ ā́stām /
Sentence: 4    pūṣṇó hástābʰyām íty āha yátyai /
Sentence: 5    ā́dada índrasya bāhúr asi dákṣiṇa íty āha /
Sentence: 6    indriyám evá yájamāne dadʰāti /
Sentence: 7    sahásrabʰr̥ṣṭiḥ śatátejā íty āha /
Sentence: 8    rūpám evá_asya_etán mahimā́naṃ vyā́caṣṭe /
Sentence: 9    vāyúr asi tigmátejā íty āha /
Sentence: 10    téjo vái vāyúḥ //

Verse: 2    {BS 3.2.9.69}
Sentence: 1    téja evá_asmin dadʰāti /
Sentence: 2  {b}   viṣā́d vái nā́ma_āsurá āsīt /
Sentence: 3    sò 'bibʰet /
Sentence: 4    yajñéna mā devā́ abʰíbʰaviṣyantī́ti /
Sentence: 5    sá pr̥tʰivī́m abʰyàvamīt /
Sentence: 6    sā́_amedʰyā́_abʰavat /
Sentence: 7    átʰo yád índro vr̥trám áhan /
Sentence: 8    tásya lóhitaṃ pr̥tʰivī́m ánu vyàdʰāvat /
Sentence: 9    sā́_amedʰyā́_abʰavat /
Sentence: 10    pŕ̥tʰivi devayajanī́ty āha //

Verse: 3    {BS 3.2.9.70}
Sentence: 1    médʰyām evá_enāṃ devayájanīṃ karoti /
Sentence: 2    óṣadʰyās te mū́laṃ mā́ him̐siṣam íty āha /
Sentence: 3    óṣadʰīnām áhim̐sāyai /
Sentence: 4  {c}   vrajáṃ gaccʰa gostʰā́nam íty āha /
Sentence: 5    cʰándām̐si vái vrajó gostʰā́naḥ /
Sentence: 6    cʰándām̐sy evá_asmai vrajáṃ gostʰā́naṃ karoti /
Sentence: 7    várṣatu te dyáur íty āha /
Sentence: 8    vŕ̥ṣṭir vái dyáuḥ /
Sentence: 9    vŕ̥ṣṭim evá_avarundʰe /
Sentence: 10    badʰāná deva savitaḥ paramásyāṃ parāvátī́ty āha //

Verse: 4    {BS 3.2.9.71}
Sentence: 1    dváu vā́vá púruṣau /
Sentence: 2    yáṃ caivá dvéṣṭi /
Sentence: 3    yáś ca_enaṃ dvéṣṭi /
Sentence: 4    tā́v ubʰáu badʰnāti paramásyāṃ parāváti śaténa pā́śaiḥ /
Sentence: 5    yò 'smān dveṣṭi yáṃ ca vayáṃ dviṣmás tám áto mā́ maug íty āhā́nimruktyai {Dumont āhā́nirmuktyai} /
Sentence: 6  {d}   arárur vái nā́ma_āsurá āsīt /
Sentence: 7    sá pr̥tʰivyā́m úpamlupto 'śayat /
Sentence: 8    táṃ devā́ ápahato 'ráruḥ pr̥tʰivyā́ íti pr̥tʰivyā́ ápāgʰnann /
Sentence: 9    bʰrā́tr̥vyo vā́ aráruḥ /
Sentence: 10    ápahato 'ráruḥ pr̥tʰivyā́ íti yad ā́ha //

Verse: 5    {BS 3.2.9.72}
Sentence: 1    bʰrā́tr̥vyam evá pr̥tʰivyā́ ápahanti /
Sentence: 2    tè 'manyanta /
Sentence: 3    dívaṃ vā́ ayám itáḥ patiṣyatī́ti /
Sentence: 4    tám aráruste dívaṃ mā́ skān íti diváḥ páryabādʰanta /
Sentence: 5    bʰrā́tr̥vyo vā́ aráruḥ /
Sentence: 6    arárus te dívaṃ mā́ skān íti yád āha /
Sentence: 7    bʰrā́tr̥vyam evá diváḥ páribādʰate /
Sentence: 8    stambayajúr harati /
Sentence: 9    pr̥tʰivyā́ evá bʰrā́tr̥vyam ápahanti /
Sentence: 10    dvitī́yam̐ harati //

Verse: 6    {BS 3.2.9.73}
Sentence: 1    antárikṣād evá_enam ápahanti /
Sentence: 2    tr̥tī́yam̐ harati /
Sentence: 3    divá evá_enam ápahanti /
Sentence: 4    tūṣṇī́ṃ caturtʰám̐ harati /
Sentence: 5    áparimitād evá_enam ápahanti /
Sentence: 6  {e}   ásurāṇāṃ vā́ iyám ágra āsīt /
Sentence: 7    yā́vad ā́sīnaḥ parāpáśyati /
Sentence: 8    tā́vad devā́nām /
Sentence: 9    té devā́ abruvan /
Sentence: 10    ástv evá no 'syā́m ápī́ti //

Verse: 7    {BS 3.2.9.74}
Sentence: 1    kyàn no dāsyatʰa_íti /
Sentence: 2    yā́vat svayáṃ parigr̥hṇītʰa_íti /
Sentence: 3    té vásavas tvā_íti dakṣiṇatáḥ páryagr̥hṇann /
Sentence: 4    rudrā́s tvā_íti paścā́t /
Sentence: 5    ādityā́s tvā_íty uttaratáḥ /
Sentence: 6    tè 'gnínā prā́ñco 'jayann /
Sentence: 7    vásubʰir dakṣiṇā́ /
Sentence: 8    rudráiḥ pratyáñcaḥ /
Sentence: 9    ādityáir údañcaḥ /
Sentence: 10    yásya_eváṃ vidúṣo védiṃ parigr̥hṇánti //

Verse: 8    {BS 3.2.9.75}
Sentence: 1    bʰávaty ātmánā /
Sentence: 2    párāsya bʰrā́tr̥vyo bʰavati /
Sentence: 3  {f}   devásya savitúḥ savá íty āha prásūtyai /
Sentence: 4    kárma kr̥ṇvanti vedʰása íty āha /
Sentence: 5    iṣitám̐ hí kárma kriyáte /
Sentence: 6    pr̥tʰivyái médʰyaṃ cāmédʰyáṃ ca vyúdakrāmatām /
Sentence: 7    prācī́nam udīcī́naṃ médʰyam /
Sentence: 8    pratīcī́naṃ dakṣiṇā́_amedʰyám /
Sentence: 9    prā́cīm údīcīṃ pravaṇā́ṃ karoti /
Sentence: 10    médʰyām evá_enāṃ devayájanīṃ karoti //

Verse: 9    {BS 3.2.9.76}
Sentence: 1    prā́ñcau vedyam̐sā́v únnayati /
Sentence: 2    āhavaníyasya párigr̥hītyai /
Sentence: 3    pratícī śróṇī /
Sentence: 4    gā́rhapatyasya párigr̥hītyai /
Sentence: 5    átʰo mitʰunatvā́ya /
Sentence: 6  {g}   úddʰanti /
Sentence: 7    yád evā́syā amedʰyám /
Sentence: 8    tád ápahanti /
Sentence: 9    úddʰanti tásmād óṣadʰayaḥ párābʰavanti //

Verse: 10    {BS 3.2.9.77}
Sentence: 1    mū́laṃ cʰinatti /
Sentence: 2    bʰrā́tr̥vyasyaivá mū́laṃ cʰinatti /
Sentence: 3    mū́laṃ vā́ atitíṣṭhad rákṣām̐sy ánu_útpipate /
Sentence: 4    yád dʰástena cʰindyā́t /
Sentence: 5    kunakʰínīḥ prajā́ḥ syuḥ /
Sentence: 6    spʰyéna cʰinatti /
Sentence: 7    vájro vái spʰyáḥ /
Sentence: 8    vájreṇaivá yajñā́d rákṣām̐sy ápahanti /
Sentence: 9    pitr̥devatyā́_atikʰātā /
Sentence: 10    íyatīṃ kʰanati //

Verse: 11    {BS 3.2.9.78}
Sentence: 1    prajā́patinā yajñamukʰéna sáṃmitām /
Sentence: 2    védir devébʰyo nílāyata /
Sentence: 3    tā́ṃ caturaṅgulé 'nvavindann /
Sentence: 4    tásmāc caturaṅguláṃ kʰéyā /
Sentence: 5    caturaṅguláṃ kʰanati /
Sentence: 6    caturaṅgulé hy óṣadʰayaḥ pratitíṣṭhanti /
Sentence: 7    ā́ pratiṣṭhā́yai kʰanati /
Sentence: 8    yájamānam evá pratiṣṭhā́ṃ gamayati /
Sentence: 9    dakṣiṇató várṣīyasīṃ karoti /
Sentence: 10    devayájanasyaivá rūpám akaḥ //

Verse: 12    {BS 3.2.9.79}
Sentence: 1  {h}   púrīṣavatīṃ karoti /
Sentence: 2    prajā́ vái paśávaḥ púrīṣam /
Sentence: 3    prjáyā_eváinaṃ paśúbʰiḥ púrīṣavantaṃ karoti /
Sentence: 4    úttaraṃ parigrāháṃ párigr̥hṇāti /
Sentence: 5    etā́vatī vái pr̥tʰivī́ /
Sentence: 6    yā́vatī védiḥ /
Sentence: 7    tásyā etā́vata evá bʰrā́tr̥vyaṃ nirbʰájya /
Sentence: 8    ātmána úttaraṃ parigrāháṃ párigr̥hṇāti /
Sentence: 9  {i}   r̥tám asy r̥tasádanam asy r̥taśrī́r asī́ty āha /
Sentence: 10    yatʰāyajúr eváitát //

Verse: 13    {BS 3.2.9.80}
Sentence: 1    krūrám iva vā́ etát karoti /
Sentence: 2    yad védiṃ karóti /
Sentence: 3    dʰā́ asi svadʰā́ asī́ti yoyupyate śā́ntyai /
Sentence: 4    urvī́ cā́si vásvī cāsī́ty āha /
Sentence: 5    urvī́m eváināṃ vásvīṃ karoti /
Sentence: 6    purā́ krūrásya visŕ̥po virapśinn íty āha medʰyatvā́ya /
Sentence: 7    udādā́ya pr̥tʰivī́ṃ jīrádānur yā́m áirayan candrámasi svadʰā́bʰir íty āha /
Sentence: 8    yád evā́syā amedʰyám /
Sentence: 9    tád apahátya /
Sentence: 10    médʰyāṃ devayájanīṃ kr̥tvā́ //

Verse: 14    {BS 3.2.9.81}
Sentence: 1    yád adáś candrámasi médʰyam /
Sentence: 2    tád asyā́m érayati /
Sentence: 3    tā́ṃ dʰī́rāso anudŕ̥śya yajanta íty āhā́nukʰyātyai /
Sentence: 4  {j}   prókṣaṇīr ā́sādaya /
Sentence: 5    idʰmā́barhír úpasādaya /
Sentence: 6    sruváṃ ca srúcaś ca sáṃmr̥ḍḍhi /
Sentence: 7    pátnīm̐ sáṃnahya /
Sentence: 8    ā́jyena_udéhī́ty āhānupūrvátāyai /
Sentence: 9    prókṣaṇīr ā́sādayati /
Sentence: 10    ā́po vái rakṣogʰnī́ḥ //

Verse: 15    {BS 3.2.9.82}
Sentence: 1    rákṣasām ápahatyai /
Sentence: 2    spʰyásya vártmant sādayati /
Sentence: 3    yajñásya sáṃtatyai /
Sentence: 4    uvā́ca hā́sito daivaláḥ /
Sentence: 5    etā́vatīr vā́ amúṣmin_loká ā́pa āsann /
Sentence: 6    yā́vatīḥ prókṣaṇīr íti /
Sentence: 7    tásmād bahvī́r āsā́dyāḥ /
Sentence: 8    spʰyám udásyan /
Sentence: 9    yáṃ dviṣyāt táṃ dʰyāyet /
Sentence: 10    śucā́_eváinam arpayati //

Paragraph: 10 
Verse: 1    {BS 3.2.10.83}
Sentence: 1  {a}   vájro vái spʰyáḥ /
Sentence: 2    yád anváñcaṃ dʰāráyet /
Sentence: 3    vájre 'dʰvaryúḥ kṣaṇvīta /
Sentence: 4    purástāt tiryáñcaṃ dʰārayati /
Sentence: 5    várjo vái spʰyáḥ /
Sentence: 6    vájreṇaivá yajñásya dakṣiṇató rákṣām̐sy ápahanti /
Sentence: 7    agníbʰyāṃ prā́caś ca pratī́caś ca /
Sentence: 8    spʰyéna_údīcaś ca_adʰrā́caś ca /
Sentence: 9    spʰyéna vā́ eṣá vájreṇāsyái pāpmā́naṃ bʰrā́tr̥vyam apahátya /
Sentence: 10    utkaré 'dʰi právr̥ścati //

Verse: 2    {BS 3.2.10.84}
Sentence: 1    yátʰā_upadʰā́ya vr̥ścánty evám /
Sentence: 2  {b}   hástāv ávanenikte /
Sentence: 3    ātmā́nam evá pavayate /
Sentence: 4    spʰyáṃ prákṣālayati medʰyatvā́ya /
Sentence: 5    átʰo pāpmána evá bʰrā́tr̥vyasya nyaṅgáṃ cʰinatti /
Sentence: 6    idʰmā́barhír úpasādayati yúktyai /
Sentence: 7    yajñásya mitʰunatvā́ya /
Sentence: 8    átʰo purorúcam eváitā́ṃ dadʰāti /
Sentence: 9    úttarasya kármaṇó 'nukʰyātyai /
Sentence: 10  {c}   ná purástāt pratyág úpasādayet //

Verse: 3    {BS 3.2.10.85}
Sentence: 1    yát purástāt pratyág upasādáyet /
Sentence: 2    anyátra_āhutipatʰā́d idʰmáṃ prátipādayet /
Sentence: 3    prajā́ vái barhíḥ /
Sentence: 4    áparādʰnuyād barhíṣā prajā́nāṃ prajánanam /
Sentence: 5    paścā́t prā́g úpasādayati /
Sentence: 6    āhutipatʰéna_idʰmáṃ prátipādayati /
Sentence: 7    saṃpraty èvá barhíṣā prajā́nāṃ prajánanam úpaiti /
Sentence: 8    dákṣiṇam idʰmám /
Sentence: 9    úttaraṃ barhíḥ /
Sentence: 10    ātmā́ vā́ idʰmáḥ /
Sentence: 11    prajā́ barhíḥ /
Sentence: 12    prajā́ hy ātmana úttaratarā tīrtʰé /
Sentence: 13    táto médʰam upanī́ya /
Sentence: 14    yatʰādevatám eváinat prátiṣṭhāpayati /
Sentence: 15    prátitiṣṭhati prajáyā paśúbʰir yájamānaḥ //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.