TITUS
Black Yajur-Veda: Taittiriya-Brahmana
Part No. 24
Previous part

Chapter: 8 
Paragraph: 1 
Verse: 1    {BS 3.8.1.1}
Sentence: 1    sāṃgrahaṇyā_íṣṭyā yajate /
Sentence: 2    imā́ṃ janátām̐ sáṃgr̥hṇānī́ti //
Sentence: 3    dvā́daśāratnī raśanā́ bʰavati /
Sentence: 4    dvā́daśa mā́sāḥ saṃvatsaráḥ /
Sentence: 5    saṃvatsarám evā́varundʰe /
Sentence: 6    mauñjī́ bʰavati /
Sentence: 7    ū́rg vái múñjāḥ /
Sentence: 8    ū́rjam evā́varundʰe //
Sentence: 9    citrā́ nákṣatraṃ bʰavati /
Sentence: 10    citráṃ vā́ etát kárma //

Verse: 2    {BS 3.8.1.2}
Sentence: 1    yád aśvamedʰáḥ sámr̥ddʰyai //
Sentence: 2    púṇyanāma devayájanam adʰyávasyati /
Sentence: 3    púṇyām evá téna kīrtím abʰíjayati //
Sentence: 4    ápadātīn r̥tvíjaḥ samā́vahanty ā́ subrahmaṇyā́yāḥ /
Sentence: 5    suvargásya lokásya sámaṣṭyai //
Sentence: 6    keśaśmaśrú vapate /
Sentence: 7    nakʰā́ni níkr̥ntate /
Sentence: 8    dató dʰāvate /
Sentence: 9    snā́ti /
Sentence: 10    áhataṃ vā́saḥ páridʰatte /
Sentence: 11    pāpmánó 'pahatyai /
Sentence: 12    vā́caṃ yatvā́_upavasati /
Sentence: 13    suvargásya lokásya gúptyai /
Sentence: 14    rā́triṃ jāgaráyanta āsate /
Sentence: 15    suvargásya lokásya sámaṣṭyai //

Paragraph: 2 
Verse: 1    {BS 3.8.2.3}
Sentence: 1    cátuṣṭayya ā́po bʰavanti /
Sentence: 2    cátuḥśapʰo vā́ áśvaḥ prājāpatyáḥ sámr̥ddʰyai //
Sentence: 3    tā́ digbʰyáḥ samā́bʰr̥tā bʰavanti /
Sentence: 4    dikṣú vā́ ā́paḥ /
Sentence: 5    ánnaṃ vā́ ā́paḥ /
Sentence: 6    adbʰyó vā́ ánnaṃ jāyate /
Sentence: 7    yád evā́dbʰyó 'nnaṃ jā́yate /
Sentence: 8    tád ávarundʰe //
Sentence: 9    tā́su brahmaudanáṃ pacati /
Sentence: 10    réta evá tád dadʰāti //

Verse: 2    {BS 3.8.2.4}
Sentence: 1    cátuḥśarāvo bʰavati /
Sentence: 2    dikṣv èvá práti tiṣṭhati //
Sentence: 3    ubʰayáto rukmáu bʰavataḥ /
Sentence: 4    ubʰayáta evā́smin rúcaṃ dadʰāti /
Sentence: 5    úddʰarati śr̥tatvā́ya /
Sentence: 6    sarpíṣvān bʰavati medʰyatvā́ya /
Sentence: 7    catvā́ra ārṣeyā́ḥ prā́śnanti /
Sentence: 8    diśā́m evá jyótiṣi juhoti /
Sentence: 9    catvā́ri híraṇyāni dadāti /
Sentence: 10    diśā́m evá jyótīm̐ṣy ávarundʰe //

Verse: 3    {BS 3.8.2.5}
Sentence: 1    yád ā́jyam uccʰíṣyate /
Sentence: 2    tásmin raśanā́ṃ nyunatti /
Sentence: 3    prajā́patir vā́ odanáḥ /
Sentence: 4    réta ā́jyam /
Sentence: 5    yád ā́jye raśanāṃ nyunátti /
Sentence: 6    prajā́patim evá rétasā sámardʰayati /
Sentence: 7    darbʰamáyī raśanā́ bʰavati /
Sentence: 8    bahú vā́ eṣá kucarò 'medʰyám úpagaccʰati /
Sentence: 9    yád áśvaḥ /
Sentence: 10    pavítraṃ vái darbʰā́ḥ //

Verse: 4    {BS 3.8.2.6}
Sentence: 1    yád darbʰamáyī raśaṇā́ bʰávati /
Sentence: 2    punā́ty evá_enam /
Sentence: 3    pūtám enaṃ médʰyam ā́labʰate //
Sentence: 4    áśvasya vā́ ā́labdʰasya mahimā́_udakrāmat /
Sentence: 5    sá mahártvijaḥ prā́viśat /
Sentence: 6    tán mahartvijāṃ mahartviktvám /
Sentence: 7    yán mahártvijaḥ prāśnánti /
Sentence: 8    mahimā́nam evā́smin tád dadʰati /
Sentence: 9    áśvasya vā́ ā́labdʰasya réta údakrāmat /
Sentence: 10    tát suvárṇam̐ híraṇyam abʰavat /
Sentence: 11    yát suvárṇam̐ híraṇyaṃ dádāti /
Sentence: 12    réta evá tád dadʰāti /
Sentence: 13    odané dadāti /
Sentence: 14    réto vā́ odanáḥ /
Sentence: 15    réto híraṇyam /
Sentence: 16    rétasā_evā́smin réto dadʰāti //

Paragraph: 3 
Verse: 1    {BS 3.8.3.7}
Sentence: 1    yó vái bráhmaṇe devébʰyaḥ prajā́patayé 'pratiprocyā́śvaṃ médʰyaṃ badʰnā́ti /
Sentence: 2    ā́ devátābʰyo vr̥ścyate /
Sentence: 3    pā́pīyān bʰavati /
Sentence: 4    yáḥ pratiprócya /
Sentence: 5    ná devátābʰya ā́vr̥ścyate /
Sentence: 6    vásīyān bʰavati //
Sentence: 7    yád ā́ha /
Sentence: 8    bráhmann áśvaṃ médʰyaṃ bʰantsyāmi devébʰyaḥ prajā́pataye téna rādʰyāsam íti /
Sentence: 9    bráhma vái brahmā́ /
Sentence: 10    bráhmaṇa evá devébʰyaḥ prajā́pataye pratiprócyā́śvaṃ médʰyaṃ badʰnāti //

Verse: 2    {BS 3.8.3.8}
Sentence: 1    ná devátābʰya ā́vr̥ścyate /
Sentence: 2    vásīyān bʰavati //
Sentence: 3    devásya tvā savitúḥ prasavá íti raśanā́m ā́datte prásūtyai /
Sentence: 4    aśvínor bāhúbʰyām íty āha /
Sentence: 5    aśvínau hi devā́nām adʰvaryū́ ā́stām /
Sentence: 6    pūṣṇó hástābʰyām íty āha yátyai //
Sentence: 7    vyr̥̀ddʰaṃ vā́ etád yajñásya /
Sentence: 8    yád ayajúṣkeṇa kriyáte /
Sentence: 9    imā́m agr̥bʰṇan raśnā́m r̥tásya_íty ádʰivadati yájuṣkr̥tyai /
Sentence: 10    yajñásya sámr̥ddʰyai //

Verse: 3    {BS 3.8.3.9}
Sentence: 1    tád āhuḥ /
Sentence: 2    dvā́daśāratnī raśanā́ kartavyā́3 tráyodaśāratnī́3r íti /
Sentence: 3    r̥ṣabʰó vā́ eṣá r̥tūnā́m /
Sentence: 4    yátʰā {!} saṃvatsaráḥ /
Sentence: 5    tásya trayodaśó mā́so viṣṭápam /
Sentence: 6    r̥ṣabʰá eṣá yajñā́nām /
Sentence: 7    yád aśvamedʰáḥ /
Sentence: 8    yátʰā vā́ r̥ṣabʰásya viṣṭápam /
Sentence: 9    evám etásya viṣṭápam /
Sentence: 10    trayodaśám aratním̐ raśanā́yām upā́dadʰāti //

Verse: 4    {BS 3.8.3.10}
Sentence: 1    yátʰā_r̥ṣabʰásya viṣṭápam̐ sam̐skaróti /
Sentence: 2    tādŕ̥g evá tát //
Sentence: 3    pū́rva ā́yuṣi vidátʰeṣu kavya_íty āha /
Sentence: 4    ā́yur evā́smin dadʰāti /
Sentence: 5    táyā devā́ḥ sutám ā́babʰūvur íty āha /
Sentence: 6    bʰū́tim evá_upā́vartate //
Sentence: 7    r̥tásya sā́mant sarám ārápantī́ty āha /
Sentence: 8    satyáṃ vā́ r̥tám /
Sentence: 9    satyéna_eváinam r̥téna_ā́rabʰate //
Sentence: 10    abʰidʰā́ asī́ty āha //

Verse: 5    {BS 3.8.3.11}
Sentence: 1    tásmād aśvamedʰayājī́ sárvāṇi bʰūtā́ny abʰíbʰavati /
Sentence: 2    bʰúvanam asī́ty āha /
Sentence: 3    bʰūmā́nam evá_upaiti /
Sentence: 4    yantā́_asī́ty āha /
Sentence: 5    yantā́ram eváinaṃ karoti /
Sentence: 6    dʰartā́_asī́ty āha /
Sentence: 7    dʰartā́ram eváinaṃ karoti /
Sentence: 8    sò 'gníṃ vaiśvānarám íty āha /
Sentence: 9    agnā́v eváinaṃ vaiśvānaré juhoti /
Sentence: 10    sápratʰasam íty āha //

Verse: 6    {BS 3.8.3.12}
Sentence: 1    prajáya_eváinaṃ paśúbʰiḥ pratʰayati /
Sentence: 2    svā́hākr̥ta íty āha /
Sentence: 3    hóma evā́sya_eṣáḥ /
Sentence: 4    pr̥tʰivyā́m íty āha /
Sentence: 5    asyā́m evá_enaṃ prátiṣṭhāpayati /
Sentence: 6    yantā́ rā́ḍ yantā́_asi yámano dʰartā́_asi dʰarúṇa íty āha /
Sentence: 7    rūpám evā́syaitán mahimā́naṃ vyā́caṣṭe /
Sentence: 8    kr̥ṣyái tvā kṣémāya tvā rayyái tvā póṣāya tvā_íty āha /
Sentence: 9    āśíṣam evá_etā́m āśāste //
Sentence: 10    svagā́ tvā devébʰya íty āha /
Sentence: 11    devébʰya evá_enam̐ svagā́ karoti /
Sentence: 12    svā́hā tvā prajā́pataya íty āha /
Sentence: 13    prājāpatyó vā́ áśvaḥ /
Sentence: 14    yásyā evá devátāyā ālabʰyáte /
Sentence: 15    táyā_evá_enam̐ sámardʰayati //

Paragraph: 4 
Verse: 1    {BS 3.8.4.13}
Sentence: 1    yáḥ pitúr anujā́yāḥ putráḥ /
Sentence: 2    sá purástān nayati /
Sentence: 3    yó mātúr anujā́yāḥ putráḥ /
Sentence: 4    sá paścā́n nayati /
Sentence: 5    víṣvañcam evā́smāt pāpmā́naṃ vívr̥hataḥ //
Sentence: 6    yó árvantaṃ jígʰām̐sati tám abʰyàmīti váruṇa íti śvā́naṃ caturakṣáṃ prásauti /
Sentence: 7    paró mártaḥ paráḥ śvā́_íti śúnaś caturakṣásya práhanti /
Sentence: 8    śvā́_iva vái pāpmā́ bʰrā́tr̥vyaḥ /
Sentence: 9    pāpmā́nam evā́sya bʰrā́tr̥vyam̐ hanti //
Sentence: 10    saidʰrakáṃ músalaṃ bʰavati //

Verse: 2    {BS 3.8.4.14}
Sentence: 1    kárma_karma_evā́smai sādʰayati //
Sentence: 2    paum̐ścaleyó hanti /
Sentence: 3    pum̐ścalvā́ṃ vái devā́ḥ śúcaṃ nyàdadʰuḥ /
Sentence: 4    śucā_évā́sya śúcam̐ hanti //
Sentence: 5    pāpmā́ vā́ etám īpsatī́ty āhuḥ /
Sentence: 6    yò 'śvamedʰéna yájata íti /
Sentence: 7    áśvasyādʰaspadám úpāsyati /
Sentence: 8    vajrī́ vā́ áśvaḥ prājāpatyáḥ /
Sentence: 9    vájreṇa_evá pāpmā́naṃ bʰrā́tr̥vyam ávakrāmati //
Sentence: 10    dakṣiṇā́_apaplāvayati /

Verse: 3    {BS 3.8.4.15}
Sentence: 1    pāpmā́nam evā́smāt_śámalam ápaplāvayati //
Sentence: 2    aiṣīká udūhó bʰavati /
Sentence: 3    ā́yur vā́ iṣī́kāḥ /
Sentence: 4    ā́yur evā́smin dadʰati /
Sentence: 5    amŕ̥taṃ vā́ iṣī́kāḥ /
Sentence: 6    amŕ̥tam evā́smin dadʰati //
Sentence: 7    vetasaśākʰā́_upasáṃbaddʰā bʰavati /
Sentence: 8    apsúyonir vā́ áśvaḥ /
Sentence: 9    apsujó vetasáḥ /
Sentence: 10    svā́d evá_enaṃ yónir nírmimīte //
Sentence: 11    purástāt pratyáñcam abʰyúdūhati /
Sentence: 12    purástād evā́smin pratī́cy amŕ̥taṃ dadʰāti //
Sentence: 13    aháṃ ca tváṃ ca vr̥trahann íti brahmā́ yájamānasya hástaṃ gr̥hṇāti /
Sentence: 14    brahmakṣattré evá sáṃdadʰāti /
Sentence: 15    abʰí krátvā_indra bʰūr ádʰa jmánn íty adʰvaryúr yájamānaṃ vācayaty abʰíjityai //

Paragraph: 5 
Verse: 1    {BS 3.8.5.16}
Sentence: 1    catvā́ra r̥tvíjaḥ sámukṣanti /
Sentence: 2    ābʰyá eváinaṃ catasŕ̥bʰyo digbʰyò 'bʰísámīrayanti //
Sentence: 3    śaténa rājaputráiḥ sahā́dʰvaryúḥ /
Sentence: 4    purástāt pratyáṅ tíṣṭhan prókṣati /
Sentence: 5    anénā́śvena médʰyena_iṣṭvā́ /
Sentence: 6    ayám̐ rā́jā vr̥tráṃ vadʰyād íti /
Sentence: 7    rājyáṃ vā́ adʰvaryúḥ /
Sentence: 8    kṣattrám̐ {= kṣatrám̐ } rājaputráḥ /
Sentence: 9    rājyéna_evā́smin kṣattráṃ {= kṣatráṃ } dadʰāti //
Sentence: 10    śaténārājábʰir ugráiḥ sahá brahmā́ //

Verse: 2    {BS 3.8.5.17}
Sentence: 1    dakṣiṇatá údaṅ tíṣṭhan prókṣati /
Sentence: 2    anénā́śvena médʰyena_iṣṭvā́ /
Sentence: 3    ayám̐ rā́jāpratidʰr̥ṣyò 'stv íti /
Sentence: 4    bálaṃ vái brahmā́ /
Sentence: 5    bálam arājā́_ugráḥ /
Sentence: 6    bálena_evā́smin bálaṃ dadʰāti //
Sentence: 7    śaténa sūtagrāmaṇíbʰiḥ sahá hótā /
Sentence: 8    paścā́t prā́ṅ tíṣṭhan prókṣati /
Sentence: 9    anénā́śvena médʰyena_iṣṭvā́ /
Sentence: 10    ayám̐ rā́jā_asyái viśáḥ //

Verse: 3    {BS 3.8.5.18}
Sentence: 1    bahugvái bahvaśvā́yai bahvajāvikā́yai /
Sentence: 2    bahuvrīhiyavā́yai bahumāṣatilā́yai /
Sentence: 3    bahuhiraṇyā́yai bahuhastíkāyai /
Sentence: 4    bahudāsapūruṣā́yai rayimátyai púṣṭimatyai /
Sentence: 5    bahurāyaspoṣā́yai rā́jā_astv íti /
Sentence: 6    bʰūmā́ vái hótā /
Sentence: 7    bʰūmā́ sūtagrāmaṇyàḥ /
Sentence: 8    bʰūmnā́_evā́smin bʰūmā́naṃ dadʰāti //
Sentence: 9    śaténa kṣattasaṃgrahītŕ̥bʰiḥ saha_údgātā́ /
Sentence: 10    uttarató dakṣiṇā́ tíṣṭhan prókṣati //

Verse: 4    {BS 3.8.5.19}
Sentence: 1    anénā́śvena médʰyena_iṣṭvā́ /
Sentence: 2    ayám̐ rā́jā sárvam ā́yur etv íti /
Sentence: 3    ā́yur vā́ udgātā́ /
Sentence: 4    ā́yuḥ kṣattasaṃgrahītā́raḥ /
Sentence: 5    ā́yuṣā_evā́sminn ā́yur dadʰāti //
Sentence: 6    śatám̐_śataṃ bʰavanti /
Sentence: 7    śatā́yuḥ púruṣaḥ śata_índriyaḥ /
Sentence: 8    ā́yuṣy evá_indriyé prátitiṣṭhati catuḥśatā́ bʰavanti /
Sentence: 9    cátasro díśaḥ /
Sentence: 10    dikṣv èvá prátitiṣṭhati //

Paragraph: 6 
Verse: 1    {BS 3.8.6.20}
Sentence: 1    yátʰā vái havíṣo gr̥hītásya skándati /
Sentence: 2    eváṃ vā́ etád áśvasya skandati /
Sentence: 3    yán niktám ánālabdʰam utsr̥jánti /
Sentence: 4    yát stókyā anvā́ha /
Sentence: 5    sarvahútam eváinaṃ karoty áksandāya /
Sentence: 6    áskannam̐ hí tát /
Sentence: 7    yád dʰutásya skándati //
Sentence: 8    sahásram ánvāha /
Sentence: 9    sahásrasaṃmitaḥ suvargó lokáḥ /
Sentence: 10    suvargásya lokásyābʰíjityai //

Verse: 2    {BS 3.8.6.21}
Sentence: 1    yátpárimitā anubrū́yāt /
Sentence: 2    párimitam ávarundʰīta /
Sentence: 3    áparimitā ánvāha /
Sentence: 4    áparimitaḥ suvargó lokáḥ /
Sentence: 5    suvargásya lokásya sámaṣṭyai //
Sentence: 6    stókyā juhoti /
Sentence: 7    yā́ evá várṣyā ā́paḥ /
Sentence: 8    tā́ ávarundʰe //
Sentence: 9    asyā́ṃ juhoti /
Sentence: 10    iyáṃ vā́ agnír vaiśvānaráḥ /

Verse: 3    {BS 3.8.6.22}
Sentence: 1    asyā́m evá_enāḥ prátiṣṭhāpayati //
Sentence: 2    uvā́ca ha prajā́patiḥ /
Sentence: 3    stókyāsu vā́ ahám aśvamedʰám̐ sám̐stʰāpayāmi /
Sentence: 4    téna tátaḥ sám̐stʰitena carāmī́ti //
Sentence: 5    agnáye svā́hā_íty āha /
Sentence: 6    agnáya eváinaṃ juhoti //
Sentence: 7    sómāya svā́hā_íty āha /
Sentence: 8    sómāya_eváinaṃ juhoti /
Sentence: 9    savitré svā́hā_íty āha /
Sentence: 10    savitrá eváinaṃ juhoti /

Verse: 4    {BS 3.8.6.23}
Sentence: 1    sárasvatyai svā́hā_íty āha /
Sentence: 2    sárasvatyā eváinaṃ juhoti /
Sentence: 3    pūṣṇé svā́hā_íty āha /
Sentence: 4    pūṣṇá eváinaṃ juhoti /
Sentence: 5    bŕ̥haspátaye svā́hā_íty āha /
Sentence: 6    bŕ̥haspátaya eváinaṃ juhoti /
Sentence: 7    apā́ṃ módāya svā́hā_íty āha /
Sentence: 8    adbʰyá eváinaṃ juhoti /
Sentence: 9    vāyáve svā́hā_íty āha /
Sentence: 10    vāyáva eváinaṃ juhoti //

Verse: 5    {BS 3.8.6.24}
Sentence: 1    mitrā́ya svā́hā_íty āha /
Sentence: 2    mitrā́ya_eváinaṃ juhoti /
Sentence: 3    váruṇāya svā́hā_íty āha /
Sentence: 4    váruṇāya_eváinaṃ juhoti //
Sentence: 5    etā́bʰya eváinaṃ devátābʰyo juhoti //
Sentence: 6    dáśa_daśa saṃpā́daṃ juhoti /
Sentence: 7    dáśākṣarā virā́ṭ /
Sentence: 8    ánnaṃ virā́ṭ /
Sentence: 9    virā́jā_evā́nnā́dyam ávarundʰe //
Sentence: 10    prá vā́ eṣò 'smā́l lokā́c cyavate /
Sentence: 11    yáḥ párācīr ā́hutīr juhóti /
Sentence: 12    púnaḥ_punar abʰyāvártaṃ juhoti /
Sentence: 13    asmínn evá loké prátitiṣṭhati //
Sentence: 14    etā́m̐ ha vā́vá sò 'śvamedʰásya sám̐stʰitim uvācā́skandāya /
Sentence: 15    áskannam̐ hí tát /
Sentence: 16    yád yajñásya sám̐stʰitasya skándati //

Paragraph: 7 
Verse: 1    {BS 3.8.7.25}
Sentence: 1    prajā́pataye tvā júṣṭaṃ prókṣāmī́ti purástāt pratyáṅ tíṣṭhan prókṣati /
Sentence: 2    prajā́patir vai devā́nām annādó vīryā̀vān /
Sentence: 3    annā́dyam evā́smin vīryàṃ dadʰāti /
Sentence: 4    tásmād áśvaḥ paśūnā́m annādó vīryā̀vattamaḥ //
Sentence: 5    indrāgníbʰyāṃ tvā_íti dakṣiṇatáḥ /
Sentence: 6    indrāgnī́ vái devā́nām ójiṣṭhau báliṣṭhau /
Sentence: 7    ója evā́smin bálaṃ dadʰāti /
Sentence: 8    tásmād áśvaḥ paśūnā́m ójiṣṭho báliṣṭhaḥ //
Sentence: 9    vāyáve tvā_íti paścā́t /
Sentence: 10    vāyúr vái devā́nām āśúḥ sārasārítamaḥ //

Verse: 2    {BS 3.8.7.26}
Sentence: 1    javám evā́smin dadʰāti /
Sentence: 2    tásmād áśvaḥ /
Sentence: 3    paśūnā́m āśúḥ sārasārítamaḥ //
Sentence: 4    víśvebʰyas tvā devébʰya íty uttaratáḥ /
Sentence: 5    víśve vái devā́ devā́nāṃ yaśasvítamāḥ /
Sentence: 6    yáśa evā́smin dadʰāti /
Sentence: 7    tásmād áśvaḥ paśūnā́ṃ yaśasvítamaḥ //
Sentence: 8    devébʰyas tvā_íty adʰástāt /
Sentence: 9    devā́ vái devā́nām ápacitatamāḥ /
Sentence: 10    ápacitim evā́smin dadʰāti /
Sentence: 11    tásmād áśvaḥ paśūnā́m ápacitatamaḥ //

Verse: 3    {BS 3.8.7.27}
Sentence: 1    sárvebʰyas tvā devébʰya íty upáriṣṭāt /
Sentence: 2    sárve vái devā́s tvíṣimanto harasvínaḥ /
Sentence: 3    tvíṣim evā́smin háro dadʰāti /
Sentence: 4    tásmād áśvaḥ paśūnā́ṃ tvíṣimān harasvítamaḥ //
Sentence: 5    divé tvā_antárikṣāya tvā pr̥tʰivyái tvā_íty āha /
Sentence: 6    ebʰyá eváinaṃ lokébʰyaḥ prókṣati //
Sentence: 7    saté tvā_ásate tvā_adbʰyás tvā_óṣadʰībʰyas tvā víśvebʰyas tvā bʰutébʰya íty āha /
Sentence: 8    tásmād aśvamedʰayājínam̐ sárvāṇi bʰutā́ny úpajīvanti //
Sentence: 9    brahmavādíno vadanti /
Sentence: 10    yát prājāpatyó 'śvaḥ /
Sentence: 11    átʰa kásmād enam anyā́bʰyo devátābʰyó 'pi prókṣatī́ti /
Sentence: 12    áśve vái sárvā devátā anvā́yattāḥ /
Sentence: 13    táṃ yád víśvebʰyas tvā bʰūtébʰya íti prókṣáti /
Sentence: 14    devátā evā́sminn anvā́yātayati /
Sentence: 15    tásmād áśve sárvā devátā anvā́yattāḥ //

Paragraph: 8 
Verse: 1    {BS 3.8.8.28}
Sentence: 1    yátʰā vái havíṣo gr̥hītásya skándati /
Sentence: 2    eváṃ vā́ etád áśvasya skandati /
Sentence: 3    yát prókṣitam ánālabdʰam utsr̥jánti /
Sentence: 4    yád aśvacaritā́ni juhóti /
Sentence: 5    sarvahútam eváinaṃ karoty áskandāya /
Sentence: 6    áskannam̐ hí tát /
Sentence: 7    yád dʰutásya skándati //
Sentence: 8    īṃkārā́ya svā́hā_ī́ṃkr̥tāya svā́hā_íty āha /
Sentence: 9    etā́ni vā́ aśvacaritā́ni /
Sentence: 10    caritáir eváinam̐ sámardʰayati //

Verse: 2    {BS 3.8.8.29}
Sentence: 1    tád āhuḥ /
Sentence: 2    ánāhutayo vā́ aśvacaritā́ni /
Sentence: 3    ná_etā́ hotavyā̀ íti /
Sentence: 4    átʰo kʰálv āhuḥ /
Sentence: 5    hotavyā̀ evá /
Sentence: 6    átra vā́vá_eváṃ vidvā́n aśvamedʰám̐ sám̐stʰāpayati /
Sentence: 7    yád aśvacaritā́ni juhóti /
Sentence: 8    tásmād dʰotavyā̀ íti //
Sentence: 9    bahirdʰā́ vā́ enam etád āyátanād dadʰāti /
Sentence: 10    bʰrā́tr̥vyam asmai janayati //

Verse: 3    {BS 3.8.8.30}
Sentence: 1    yásyānāyatanè 'nyátrāgnér ā́hutīr juhóti /
Sentence: 2    sāvitriyā́ íṣṭyāḥ purástāt sviṣṭakŕ̥taḥ /
Sentence: 3    āhavanī́ye 'śvacaritā́ni juhoti /
Sentence: 4    āyátana evā́sya_ā́hutīr juhoti /
Sentence: 5    nā́smai bʰrā́tr̥vyaṃ janayati //
Sentence: 6    tád āhuḥ /
Sentence: 7    yajñamukʰé_yajñamukʰe hotavyā̀ḥ /
Sentence: 8    yajñásya kŀ̥ptyai /
Sentence: 9    suvargásya lokásyānukʰyātyā íti //
Sentence: 10    átʰo kʰálv āhuḥ /

Verse: 4    {BS 3.8.8.31}
Sentence: 1    yád yajñamukʰé_yajñamukʰe juhuyā́t /
Sentence: 2    paśúbʰir yájamānaṃ vyàrdʰayet /
Sentence: 3    áva suvargā́l lokā́t padyeta /
Sentence: 4    pā́pīyānt syād íti /
Sentence: 5    sakŕ̥d evá hotavyā̀ḥ /
Sentence: 6    ná yájamānaṃ paśúbʰir vyàrdʰayati /
Sentence: 7    abʰí suvargáṃ lokáṃ jayati /
Sentence: 8    ná pā́pīyān bʰavati /
Sentence: 9    aṣṭā́catvārim̐śatam aśvarūpā́ṇi juhoti /
Sentence: 10    aṣṭā́catvārim̐śadakṣarā jágatī /
Sentence: 11    jā́gató 'śvaḥ prājāpatyáḥ sámr̥ddʰyai //
Sentence: 12    ékam átiriktaṃ juhoti /
Sentence: 13    tásmād ékaḥ prajā́sv árdʰukaḥ //

Paragraph: 9 
Verse: 1    {BS 3.8.9.32}
Sentence: 1    vibʰū́r mātrā́ prabʰū́ḥ pitrā_íty āha /
Sentence: 2    iyáṃ vái mātā́ /
Sentence: 3    asáu pitā́ /
Sentence: 4    ābʰyā́m eváinaṃ páridadāti //
Sentence: 5    áśvo 'si háyo 'sī́ty āha /
Sentence: 6    śā́sty eváinam etát /
Sentence: 7    tásmāt_śiṣṭā́ḥ prajā́ jāyante /
Sentence: 8    átyo 'sī́ty āha /
Sentence: 9    tásmād áśvaḥ sárvān paśū́n átyeti /
Sentence: 10    tásmād áśvaḥ sárveṣāṃ paśūnā́m̐ śráiṣṭhyaṃ gaccʰati //

Verse: 2    {BS 3.8.9.33}
Sentence: 1    prá yáśaḥ śráiṣṭhyam āpnoti /
Sentence: 2    yá eváṃ véda //
Sentence: 3    náro 'sy árvā_asi sáptir asi vājy àsī́ty āha /
Sentence: 4    rūpám evā́sya_etán māhimā́naṃ vyā́caṣṭe //
Sentence: 5    yáyur nā́māsī́ty āha /
Sentence: 6    etád vā́ áśvasya priyáṃ nāmadʰéyam /
Sentence: 7    priyéṇa_eváinaṃ nāmadʰéyenābʰívadati /
Sentence: 8    tásmād ápy ā_amitráu saṃgátya /
Sentence: 9    nā́mnā céd dʰváyete {BS cédʰváyete} /
Sentence: 10    mitrám evá bʰavataḥ //

Verse: 3    {BS 3.8.9.34}
Sentence: 1    ādityā́nāṃ pátvā_ánvihī́ty āha /
Sentence: 2    ādityā́n eváinaṃ gamayati //
Sentence: 3    agnáye svā́hā svā́hā_indrāgnibʰyām íti pūrvahomā́ñ juhoti /
Sentence: 4    pū́rva evá dviṣántaṃ bʰrā́tr̥vyam átikrāmati //
Sentence: 5    bʰū́r asi bʰuvé tvā bʰávyāya tvā bʰaviṣyaté tvā_íty útsr̥jati sarvatvā́ya //
Sentence: 6    dévā āśāpālā etáṃ devébʰyó 'śvaṃ médʰāya prókṣitaṃ gopāyata_íty āha //
Sentence: 7    śatáṃ vái tálpyā rājaputrā́ devā́ āśāpālā́ḥ /
Sentence: 8    tébʰya eváinaṃ páridadāti //
Sentence: 9    īśvaró vā́ áśvaḥ prámuktaḥ párāṃ parāvátaṃ gántoḥ /
Sentence: 10    ihá dʰŕ̥tiḥ svā́hā_ihá vídʰr̥tiḥ svā́hā_ihá rántiḥ svā́hā_ihá rámatiḥ svā́hā_íti catr̥ṣú patsú juhoti /

Verse: 4    {BS 3.8.9.35}
Sentence: 1    etā́ vā́ áśvasya bándʰanam /
Sentence: 2    tā́bʰir eváinaṃ badʰnāti /
Sentence: 3    tásmād áśvaḥ prámukto bándʰanam ā́gaccʰati /
Sentence: 4    tásmād áśvaḥ prámukto bándʰanaṃ ná jahāti //
Sentence: 5    rāṣṭráṃ vā́ aśvamedʰáḥ /
Sentence: 6    rāṣṭré kʰálu vā́ eté vyā́yaccʰante /
Sentence: 7    yé 'śvaṃ médʰyam̐ rákṣanti /
Sentence: 8    téṣāṃ yá udŕ̥caṃ gáccʰanti /
Sentence: 9    rāṣṭrā́d evá té rāṣṭráṃ gaccʰanti /
Sentence: 10    átʰa yá udŕ̥caṃ ná gáccʰanti //
{BS 3.8.9.36}
Sentence: 11    rāṣṭrā́d evá té vyávaccʰidyante /
Sentence: 12    párā vā́ eṣá sicyate /
Sentence: 13    yò 'balò 'śvamedʰéna yájate /
Sentence: 14    yád amítrā áśvaṃ vindéran /
Sentence: 15    hanyétāsya yajñáḥ /
Sentence: 16    catuśśatā́ rakṣanti /
Sentence: 17    yajñásyā́gʰātāya //
Sentence: 18    átʰānyám ānī́ya prókṣeyuḥ /
Sentence: 19    sā́_evá tátaḥ prā́yaścittiḥ //

Paragraph: 10 
Verse: 1    {BS 3.8.10.37}
Sentence: 1    prajā́patir akāmayatāśvamehéna yajeya_íti /
Sentence: 2    sá tápo 'tapyata /
Sentence: 3    tásya tepānásya /
Sentence: 4    saptá_ātmáno devátā údakrāman /
Sentence: 5    sā́ dīkṣā́_abʰavat /
Sentence: 6    sá etā́ni vaiśvadevā́ny apaśyat /
Sentence: 7    tā́ny ajuhot /
Sentence: 8    táir vái sá dīkṣā́m ávārundʰa /
Sentence: 9    yád vaiśvadevā́ni juhóti /
Sentence: 10    dīkṣā́m evá táir yájamānó 'varundʰe //

Verse: 2    {BS 3.8.10.38}
Sentence: 1    saptá juhoti /
Sentence: 2    saptá hí tā́ devátā udákrāman //
Sentence: 3    anvaháṃ juhoti /
Sentence: 4    anvahám evá dīkṣā́m ávarundʰe //
Sentence: 5    trī́ṇi vaiśvadevā́ni juhoti /
Sentence: 6    catvā́ry audgrahaṇā́ni /
Sentence: 7    saptá sáṃpadyante /
Sentence: 8    saptá vái śīrṣaṇyā̀ḥ prāṇā́ḥ /
Sentence: 9    prāṇā́ dīkṣā́ /
Sentence: 10    prāṇáir evá prāṇā́n dīkṣā́m ávarundʰe //

Verse: 3    {BS 3.8.10.39}
Sentence: 1    ékavim̐śatiṃ vaiśvadevā́ni juhoti /
Sentence: 2    ékavim̐śatir vái devalokā́ḥ /
Sentence: 3    dvā́daśa mā́sāḥ páñca_r̥távaḥ /
Sentence: 4    tráya imé lokā́ḥ /
Sentence: 5    asā́v ādityá ekavim̐śáḥ //
Sentence: 6    eṣá suvargó lokáḥ /
Sentence: 7    tád dáivyaṃ kṣattrám {BS kṣatrám} /
Sentence: 8    sā́ śrī́ḥ /
Sentence: 9    tád bradʰnásya viṣṭápam /
Sentence: 10    tát svā́rājyam ucyate //

Verse: 4    {BS 3.8.10.40}
Sentence: 1    trim̐śátam audgrahaṇā́ni juhoti /
Sentence: 2    trim̐śádakṣarā virā́ṭ /
Sentence: 3    ánnaṃ virā́ṭ /
Sentence: 4    virā́jā_evā́nnā́dyam ávarundʰe //
Sentence: 5    tredʰā́ vibʰájya devátāṃ juhoti /
Sentence: 6    tryā̀vr̥to vái devā́ḥ /
Sentence: 7    tryā̀vr̥ta imé lokā́ḥ /
Sentence: 8    eṣā́ṃ lokā́nām ā́ptyai /
Sentence: 9    eṣā́ṃ lokā́nāṃ kŀ̥ptyai //
Sentence: 10    ápa vā́ etásmāt prāṇā́ḥ krāmanti //

Verse: 5    {BS 3.8.10.41}
Sentence: 1    yó dīkṣā́m atirecáyati /
Sentence: 2    saptāháṃ prácaranti /
Sentence: 3    saptá vái śīrṣanyā̀ḥ prāṇáḥ /
Sentence: 4    prāṇā́ dīkṣā́ /
Sentence: 5    prāṇáir evá prāṇā́n dīkṣā́m ávarundʰe //
Sentence: 6    pūrṇāhutím uttamā́ṃ juhoti /
Sentence: 7    sárvaṃ vái pūrṇāhutíḥ /
Sentence: 8    sárvam evá_āpnoti /
Sentence: 9    átʰo iyáṃ vái pūrṇāhutíḥ /
Sentence: 10    asyā́m evá prátitiṣṭhati //

Paragraph: 11 
Verse: 1    {BS 3.8.11.42}
Sentence: 1    prajā́patir aśvamedʰám asr̥jata /
Sentence: 2    tám̐ sr̥ṣṭáṃ ná kíṃ caná_udayaccʰat /
Sentence: 3    táṃ vaiśvadevā́ny evá_udayaccʰan /
Sentence: 4    yád vaiśvadevā́ni juhóti /
Sentence: 5    yajñásya_údyatyai //
Sentence: 6    svā́hā_ādʰím ā́dʰītāya svā́hā /
Sentence: 7    svā́hā_ā́dʰītaṃ mánase svā́hā /
Sentence: 8    svā́hā mánaḥ prajā́pataye svā́hā /
Sentence: 9    kā́ya svā́ha kásmai svā́hā katamásmai svā́hā_íti prājāpatyé múkʰye bʰavataḥ /
Sentence: 10    prajā́patimukʰābʰir eváinaṃ devátābʰir údyaccʰate //

Verse: 2    {BS 3.8.11.43}
Sentence: 1    ádityai svā́hā_ádityai mahyài svā́hā_ádityai sumr̥ḍīkā́yai svā́hā_íty āha /
Sentence: 2    iyáṃ vā́ áditiḥ /
Sentence: 3    asyā́ eváinaṃ pratiṣṭhā́ya_údyaccʰate //
Sentence: 4    sárasvatyai svā́hā sárasvatyai br̥hatyài svā́hā sárasvatyai pāvakā́yai svā́hā_íty āha /
Sentence: 5    vā́g vái sárasvatī /
Sentence: 6    vācā́_eváinam údyaccʰate //
Sentence: 7    pūṣṇé svā́hā pūṣṇé prapatʰyā̀ya svā́hā pūṣṇé naráṃdʰiṣāya sváhā_íty āha /
Sentence: 8    paśávo vái pūṣā́ /
Sentence: 9    paśúbʰir eváinam údyaccʰate //
Sentence: 10    tváṣṭre svā́hā tváṣṭre turī́pāya svā́hā tváṣṭre pururū́pāya svā́hā_íty āha /
Sentence: 11    tváṣṭā vái paśūnā́ṃ mitʰunā́nām̐ rūpakŕ̥t /
Sentence: 12    rūpám evá paśúṣu dadʰāti /
Sentence: 13    átʰo rūpáir eváinam údyaccʰate //
Sentence: 14    víṣṇave svā́hā víṣṇave nikʰuryapā́ya sváhā víṣṇave nibʰūyapā́ya svā́hā_íty āha /
Sentence: 15    yajñó vái víṣṇuḥ /
Sentence: 16    yajñā́ya_eváinam údyaccʰate /
Sentence: 17    pūrṇāhutím uttamā́ṃ juhoti /
Sentence: 18    prátyúttabdʰyai sayatvā́ya //

Paragraph: 12 
Verse: 1    {BS 3.8.12.44}
Sentence: 1    sāvitrám aṣṭā́kapālaṃ prātár nírvapati /
Sentence: 2    aṣṭā́kṣarā gāyatrī́ /
Sentence: 3    gāyatráṃ prātaḥsavanám /
Sentence: 4    prātaḥsavanā́d eváinaṃ gāyatriyā́ś cʰándaso 'dʰi nirmímīte /
Sentence: 5    átʰo prātaḥsavanám evá téna_āpnoti /
Sentence: 6    gāyatrī́ṃ cʰándaḥ //
Sentence: 7    savitré prasavitrá ékādaśakapālaṃ madʰyáṃdine /
Sentence: 8    ékādaśākṣarā triṣṭúp /
Sentence: 9    tráiṣṭubʰaṃ mā́dʰyaṃdinam̐ sávanam /
Sentence: 10    mā́dʰyaṃdinād eváinam̐ sávanāt triṣṭúbʰaś cʰándasó 'dʰi nírmimīte //

Verse: 2    {BS 3.8.12.45}
Sentence: 1    átʰo mā́dʰyaṃdinam evá sávanaṃ téna_āpnoti /
Sentence: 2    triṣṭúbʰaṃ cʰándaḥ //
Sentence: 3    savitrá āsavitré dvā́daśakapālam aparāhṇé /
Sentence: 4    dvā́daśākṣarā jágatī /
Sentence: 5    jā́gataṃ tr̥tīyasavanám /
Sentence: 6    tr̥tīyasavanā́d eváinaṃ jágatyāś cʰándasó 'dʰi nírmimīte /
Sentence: 7    átʰo tr̥tīyasavanám evá téna_āpnoti /
Sentence: 8    jágatīṃ cʰándaḥ //
Sentence: 9    īśvaró vā́ áśvaḥ prámuktaḥ párāṃ parāvátaṃ gántoḥ /
Sentence: 10    ihá dʰŕ̥tiḥ svā́hā_ihá vídʰr̥tiḥ svā́hā_ihá rántiḥ svā́hā_ihá rántiḥ svā́hā_íti cátasra ā́hutīr juhoti /

Verse: 3    {BS 3.8.12.46}
Sentence: 1    cátasro díśaḥ /
Sentence: 2    digbʰír eváinaṃ párigr̥hṇāti //
Sentence: 3    ā́śvattʰo vrajó bʰavati /
Sentence: 4    prajā́patir devébʰyo nílāyata /
Sentence: 5    áśvo rūpáṃ kr̥tvā́ /
Sentence: 6    sò 'śvattʰé saṃvatsarám atiṣṭhat /
Sentence: 7    tád aśvattʰásyāśvattʰatvám /
Sentence: 8    yád ā́śvattʰo vrajó bʰávati /
Sentence: 9    svá eváinaṃ yónau prátiṣṭhāpayati //

Paragraph: 13 
Verse: 1    {BS 3.8.13.47}
Sentence: 1    ā́ bráhman brāhmaṇó brahmavarcasī́ jāyatām íty āha /
Sentence: 2    brāhmaṇá evá brahmavarcasáṃ dadʰāti /
Sentence: 3    tásmāt purā́ brāhmaṇó brahmavarcasy àjāyata /
Sentence: 4    ā́_asmín rāṣṭré rājanyà iṣavyàḥ śū́ro mahāratʰò jāyatām íty āha /
Sentence: 5    rājanyà evá śauryáṃ mahimā́naṃ dadʰāti /
Sentence: 6    tásmāt purā́ rājanyà iṣavyàḥ śū́ro mahāratʰò 'jāyata //
Sentence: 7    dógdʰrī dʰenúr íty āha /
Sentence: 8    dʰenvā́m evá páyo dadʰāti /
Sentence: 9    tásmāt purā́ dógdʰrī dʰenúr ajāyata //
Sentence: 10    vóḍhā_anaḍvā́n íy āha /

Verse: 2    {BS 3.8.13.48}
Sentence: 1    anaḍúhy evá vīryàṃ dadʰāti /
Sentence: 2    tásmāt purā́ vóḍhā_anaḍvā́n ajāyata //
Sentence: 3    āśúḥ sáptir íty āha /
Sentence: 4    áśva evá javáṃ dadʰāti /
Sentence: 5    tásmāt purā́_āśúr áśvo 'jāyata //
Sentence: 6    púraṃdʰir yóṣā_íty āha /
Sentence: 7    yoṣíty evá rūpáṃ dadʰāti /
Sentence: 8    tásmāt strī́ yuvatíḥ priyā́ bʰā́vukā //
Sentence: 9    jiṣṇū́ ratʰeṣṭhā́ íty āha /
Sentence: 10    ā́ ha vái tátra jiṣṇū́ ratʰeṣṭhā́ jāyate /

Verse: 3    {BS 3.8.13.49}
Sentence: 1    yátra_eténa yajñéna yájante //
Sentence: 2    sabʰéyo yúvā_íty āha /
Sentence: 3    yó vái pūrvavayasī́ /
Sentence: 4    sá sabʰéyo yúvā /
Sentence: 5    tásmād yúvā púmān priyó bʰā́vukaḥ //
Sentence: 6    ā́_asyá yájamānasya vīró jāyatām íty āha /
Sentence: 7    ā́ ha vái tátra yájamānasya vīró jāyate /
Sentence: 8    yátra_eténa yajñéna yájante //
Sentence: 9    nikāmé_nikāme naḥ parjányo varṣatv íty āha /
Sentence: 10    nikāmé_nikāme ha vái tátra parjányo varṣati /
Sentence: 11    yátra_eténa yajñéna yájante //
Sentence: 12    pʰalínyo na óṣadʰayaḥ pácyantām íty āha /
Sentence: 13    pʰalínyo ha vái tátra_óṣadʰayaḥ pacyante /
Sentence: 14    yátra_eténa yajñéna yájante //
Sentence: 15    yogakṣemó naḥ kalpatām íty āha /
Sentence: 16    kálpate ha vái tátra prajā́bʰyo yogakṣemáḥ /
Sentence: 17    yátra_eténa yajñéna yájante //

Paragraph: 14 
Verse: 1    {BS 3.8.14.50}
Sentence: 1    prajā́patir devébʰyo yajñā́n vyā́diśat /
Sentence: 2    sá ātmánn aśvamedʰám adʰatta /
Sentence: 3    táṃ devā́ abruvan /
Sentence: 4    eṣá vā́vá yajñáḥ /
Sentence: 5    yád aśvamedʰáḥ /
Sentence: 6    ápy evá nó 'trāstv íti /
Sentence: 7    tébʰya etā́n annahomā́n prā́yaccʰat /
Sentence: 8    tā́n ajuhot /
Sentence: 9    táir vái sá devā́n aprīṇāt /
Sentence: 10    yád annahomā́ñ juhóti /

Verse: 2    {BS 3.8.14.51}
Sentence: 1    devā́n evá táir yájamānaḥ prīṇāti //
Sentence: 2    ā́jyena juhoti /
Sentence: 3    agnér vā́ etád rūpám /
Sentence: 4    yád ā́jyam /
Sentence: 5    yád ā́jyena juhóti /
Sentence: 6    agním evá tát prīṇāti //
Sentence: 7    mádʰunā juhoti /
Sentence: 8    mahatyái vā́ etád devátāyai rūpám /
Sentence: 9    yán mádʰu /
Sentence: 10    yán mádʰunā juhóti /

Verse: 3    {BS 3.8.14.52}
Sentence: 1    mahatī́m evá tád devátāṃ prīṇāti //
Sentence: 2    taṇḍuláir juhóti /
Sentence: 3    vásūnāṃ vā́ etád rūpám /
Sentence: 4    yát taṇḍulā́ḥ /
Sentence: 5    yát taṇḍuláir juhóti /
Sentence: 6    vásūn evá tát prīṇāti //
Sentence: 7    pŕ̥tʰukair juhoti /
Sentence: 8    rudrā́ṇāṃ vā́ etád rūpám /
Sentence: 9    yát pŕ̥tʰukāḥ /
Sentence: 10    yát pŕ̥tʰukair juhóti /

Verse: 4    {BS 3.8.14.53}
Sentence: 1    rudrā́n evá tát prīṇāti //
Sentence: 2    lājáir juhoti /
Sentence: 3    ādityā́nāṃ vā́ etád rūpám /
Sentence: 4    yál lājā́ḥ /
Sentence: 5    yál lājáir juhóti /
Sentence: 6    ādityā́n evá tát prīṇāti //
Sentence: 7    karámbair juhoti /
Sentence: 8    víśveṣāṃ vā́ etád devā́nām̐ rūpám /
Sentence: 9    yát karámbāḥ /
Sentence: 10    yát karámbair juhóti /

Verse: 5    {BS 3.8.14.54}
Sentence: 1    víśvān evá tád devā́n prīṇāti //
Sentence: 2    dʰānā́bʰir juhoti /
Sentence: 3    nákṣatrāṇāṃ vā́ etád rūpám /
Sentence: 4    yád dʰānā́ḥ /
Sentence: 5    yád dʰānā́bʰir juhóti /
Sentence: 6    nákṣatrāṇy evá tát prīṇāti //
Sentence: 7    sáktubʰir juhoti /
Sentence: 8    prajā́pater vā́ etád rūpám /
Sentence: 9    yát sáktavaḥ /
Sentence: 10    yát sáktubʰir juhóti /

Verse: 6    {BS 3.8.14.55}
Sentence: 1    prajā́patim evá tát prīṇāti //
Sentence: 2    masū́syair juhoti /
Sentence: 3    sárvāsāṃ vā́ etád devátām̐ rūpám /
Sentence: 4    yán masū́syāni /
Sentence: 5    yán masū́syair juhóti /
Sentence: 6    sárvā evá tád devátāḥ prīṇāti //
Sentence: 7    priyaṅgutaṇḍuláir juhoti /
Sentence: 8    priyā́ṅgā ha vái nā́ma_eté /
Sentence: 9    etáir vái devā́ áśvasyā́ṅgāni sámadadʰuḥ /
Sentence: 10    yát priyaṅgutaṇḍuláir juhóti /
Sentence: 11    áśvasya_evā́ṅgāni sáṃdadʰāti /
Sentence: 12    dáśā́nnāni juhoti /
Sentence: 13    dáśākṣarā virā́ṭ /
Sentence: 14    virā́ṭ kr̥tsnásyānnā́dyasyā́varuddʰyai //

Paragraph: 15 
Verse: 1    {BS 3.8.15.56}
Sentence: 1    prajā́patir aśvamedʰám asr̥jata /
Sentence: 2    tám̐ sr̥ṣtám̐ rákṣām̐sy ajigʰām̐san /
Sentence: 3    sá etā́n prajā́patir naktam̐homā́n apaśyat /
Sentence: 4    tā́n ajuhoti /
Sentence: 5    táir vái sá yajñā́d rákṣām̐sy ápāhan /
Sentence: 6    yán naktam̐homāñ juhóti /
Sentence: 7    yajñā́d evá táir yájamāno rákṣām̐sy ápahanti //
Sentence: 8    ā́jyena juhoti /
Sentence: 9    vájro vā́ ā́jyam /
Sentence: 10    vájreṇa_evá yajñā́d rákṣām̐sy ápahanti //

Verse: 2    {BS 3.8.15.57}
Sentence: 1    ā́jyasya pratipádaṃ karoti /
Sentence: 2    prāṇó vā́ ā́jyam /
Sentence: 3    mukʰatá evā́sya prāṇáṃ dadʰāti //
Sentence: 4    annahomā́ñ juhoti /
Sentence: 5    śárīravad evā́varundʰe //
Sentence: 6    vyatyā́saṃ juhoti /
Sentence: 7    ubʰáyasyā́varudʰyai //
Sentence: 8    náktaṃ juhoti /
Sentence: 9    rákṣasām ápahatyai //
Sentence: 10    ā́jyenānnatató juhoti /

Verse: 3    {BS 3.8.15.58}
Sentence: 1    prāṇó vā́ ā́jyam /
Sentence: 2    ubʰayáta evā́sya prāṇáṃ dadʰāti /
Sentence: 3    purástāc ca_upáriṣṭāc ca //
Sentence: 4    ékasmai svā́hā_íty āha /
Sentence: 5    asmínn evá loké prátitiṣṭhati /
Sentence: 6    dvā́bʰyām̐ svā́hā_íty āha /
Sentence: 7    amúṣminn evá loké prátitiṣṭhati /
Sentence: 8    ubʰáyor evá lokáyoḥ prátitiṣṭhati /
Sentence: 9    asmím̐ś cāmúṣmim̐ś ca //
Sentence: 10    śatā́ya svā́hā_íty āha /
Sentence: 11    śatā́yur vái púruṣaḥ śatávīryaḥ /
Sentence: 12    ā́yur evá vīryàm ávarundʰe /
Sentence: 13    sahásrāya svā́hā_íty āha /
Sentence: 14    ā́yur vái sahásram /
Sentence: 15    ā́yur evā́varundʰe /
Sentence: 16    sárvasmai svā́hā_íty āha /
Sentence: 17    áparimitam evā́varundʰe //

Paragraph: 16 
Verse: 1    {BS 3.8.16.59}
Sentence: 1    prajā́patiṃ vā́ eṣá īpsatī́ty āhuḥ /
Sentence: 2    yò 'śvamedʰéna yájata íti /
Sentence: 3    átʰo āhuḥ /
Sentence: 4    sárvāṇi bʰūtā́nī́ti //
Sentence: 5    ékasmai svā́hā_íty āha /
Sentence: 6    prajā́patir vā́ ékaḥ /
Sentence: 7    tám evá_āpnoti //
Sentence: 8    ékasmai svā́hā dvā́bʰyām̐ svā́hā_íty abʰipūrvám ā́hutīr juhoti /
Sentence: 9    abʰipūrvám evá suvargáṃ lokám eti //
Sentence: 10    ekottaráṃ juhoti /

Verse: 2    {BS 3.8.16.60}
Sentence: 1    ekavád evá suvargáṃ lokám eti //
Sentence: 2    sáṃtataṃ juhoti /
Sentence: 3    suvargásya lokásya sáṃtatyai //
Sentence: 4    śatā́ya svā́hā_íty āha /
Sentence: 5    śatā́yur vái púruṣaḥ śatávīryaḥ /
Sentence: 6    ā́yur evá vīryàm ávarundʰe /
Sentence: 7    sahásrāya svā́hā_íty āha /
Sentence: 8    ā́yur vái sahásram /
Sentence: 9    ā́yur evā́varundʰe //
Sentence: 10    ayútāya svā́hā niyútāya svā́hā prayútāya svā́hā_íty āha //

Verse: 3    {BS 3.8.16.61}
Sentence: 1    tráya imé lokā́ḥ /
Sentence: 2    imā́n evá lokā́n ávarundʰe //
Sentence: 3    árbudāya svā́hā_íty āha /
Sentence: 4    vā́g vā́ arbudam /
Sentence: 5    vā́cam evā́varundʰe /
Sentence: 6    nyàrbudāya svā́hā_íty āha /
Sentence: 7    yó vái vācó bʰūmā́ /
Sentence: 8    tán nyarbudam /
Sentence: 9    vācá evá bʰūmā́nam ávarundʰe //
Sentence: 10    samudrā́ya svā́hā_íty āha /

Verse: 4    {BS 3.8.16.62}
Sentence: 1    samudrám evá_āpnoti /
Sentence: 2    mádʰyāya svā́hā_íty āha /
Sentence: 3    mádʰyam evá_āpnoti /
Sentence: 4    ántāya svā́hā_íty āha /
Sentence: 5    ántam eva_ā́pnoti /
Sentence: 6    parārdʰā́ya svā́hā_íty āha /
Sentence: 7    parārdʰám evá_āpnoti //
Sentence: 8    uṣáse svā́hā vyùṣṭyai svā́hā_íty āha /
Sentence: 9    rā́tir vā́ uṣā́ḥ /
Sentence: 10    áhar vyùṣṭiḥ /
Sentence: 11    ahorātré evā́varundʰe /
Sentence: 12    átʰo ahorātráyor evá prátitiṣṭhati //
Sentence: 13    tā́ yád ubʰáyīr dívā vā náktaṃ vā́ juhuyā́t /
Sentence: 14    ahorātré mohayet /
Sentence: 15    uṣáse svā́hā vyùṣṭyai svā́hā_udeṣyaté svā́hā_údyate svā́hā_íty ánudite juhoti /
Sentence: 16    úditāya svā́hā suvargā́ya svā́hā lokā́ya svā́hā_íty údite juhoti /
Sentence: 17    ahorātráyor avyàtimohāya //

Paragraph: 17 
Verse: 1    {BS 3.8.17.63}
Sentence: 1    vibʰū́r mātrā́ prabʰū́ḥ pitrā_íty aśvanāmā́ni juhoti /
Sentence: 2    ubʰáyor eváinaṃ lokáyor nāmadʰéyaṃ gamayati //
Sentence: 3    ā́yanāya svā́hā prā́yaṇāya svā́hā_íty uddrāvā́ñ juhoti /
Sentence: 4    sárvam eváinam áskannam̐ suvargáṃ lokáṃ gamayati //
Sentence: 5    agnáye svā́hā sómāya svā́hā_íti pūrvahomā́ñ juhoti /
Sentence: 6    pū́rva evá dviṣántaṃ bʰrā́tr̥vyam átikrāmati //
Sentence: 7    pr̥tʰivyái svā́hā_antárikṣāya svā́hā_íty āha /
Sentence: 8    yatʰāyajúr evá_etát //
Sentence: 9    agnáye svā́hā sómāya svā́hā_íti pūrvadīkṣā́ juhoti /
Sentence: 10    pū́rva evá dviṣántaṃ bʰrā́tr̥vyam átikrāmati //

Verse: 2    {BS 3.8.17.64}
Sentence: 1    pr̥tʰivyái svā́hā_antárikṣāya svā́hā_íty ekavim̐śínīṃ dīkṣā́ṃ juhoti /
Sentence: 2    ékavím̐śatir vái devalokā́ḥ /
Sentence: 3    dvā́daśa mā́sāḥ páñca_r̥távaḥ /
Sentence: 4    tráya imé lokā́ḥ /
Sentence: 5    asā́v ādityá ekavim̐śáḥ /
Sentence: 6    eṣá suvargó lokáḥ /
Sentence: 7    suvargásya lokásya sámaṣṭyai //
Sentence: 8    bʰúvo devā́nāṃ kármaṇā_íty r̥tudīkṣā́ juhoti /
Sentence: 9    r̥tūn evā́smai kalpayati //
Sentence: 10    agnáye svā́hā vāyáve svā́hā_íti juhoty ánantarityai //

Verse: 3    {BS 3.8.17.65}
Sentence: 1    arvā́ṅ yajñáḥ sáṃkrāmatv íty ā́ptīr juhoti /
Sentence: 2    suvargásya lokásya_ā́ptyai //
Sentence: 3    bʰūtáṃ bʰávyaṃ bʰaviṣyád íti páryāptīr juhoti /
Sentence: 4    suvargásya lokásya páryāptyai //
Sentence: 5    ā́ me gr̥hā́ bʰavantv íty ābʰū́r juhoti /
Sentence: 6    suvargásya lokásya_ā́bʰūtyai //
Sentence: 7    agnínā tápó 'nvabʰavad íty anubʰū́r juhoti /
Sentence: 8    suvargásya lokásya_ánubʰūtyai //
Sentence: 9    svā́hā_ādʰím ā́dʰītāya svā́hā_íti sámastāni vaiśvadevā́ni juhoti /
Sentence: 10    sámastam evá dviṣántaṃ bʰrā́tr̥vyam átikrāmati //

Verse: 4    {BS 3.8.7.66}
Sentence: 1    dadbʰyáḥ svā́hā hánūbʰyām̐ svā́hā_íty aṅgahomā́ñ juhoti /
Sentence: 2    áṅge_aṅge vái púruṣasya pāpmā́_úpaśliṣṭaḥ /
Sentence: 3    áṅgād_aṅgād eváinaṃ pāpmánas téna muñcati //
Sentence: 4    añjyetā́ya svā́hā kr̥ṣṇā́ya svā́hā śvetā́ya svā́hā_íty aśvarūpā́ṇi juhoti /
Sentence: 5    rūpáir eváinam̐ sámardʰayati //
Sentence: 6    óṣadʰībʰyaḥ svā́hā mū́lebʰyasḥ svā́hā_íty oṣadʰihomā́ñ juhoti /
Sentence: 7    dvayyó vā́ óṣadʰayaḥ /
Sentence: 8    púṣpebʰyo 'nyā́ḥ pʰálaṃ gr̥hṇánti /
Sentence: 9    mū́lebʰyo 'nyā́ḥ /
Sentence: 10    tā́ evá_ubʰáyīr ávarundʰe //

Verse: 5    {BS 3.8.17.67}
Sentence: 1    vánasapátibʰyaḥ svā́hā_íti vanaspatihomā́ñ juhoti /
Sentence: 2    āraṇyásyānnā́dyasyā́varudʰyai //
Sentence: 3    meṣás tvā pacatáir avatv íty ápāvyāni juhoti /
Sentence: 4    prāṇā́ vái devā́ ápāvyāḥ /
Sentence: 5    prāṇā́n evā́varundʰe //
Sentence: 6    kū́pyābʰyaḥ svā́hā_adbʰyáḥ svā́hā_íty apā́m̐ hómāñ juhoti /
Sentence: 7    apsú vā́ ā́paḥ /
Sentence: 8    ánnaṃ vā́ ā́paḥ /
Sentence: 9    adbʰyó vā́ ánnaṃ jāyate /
Sentence: 10    yád evā́dbʰyó 'nnaṃ jā́yate /
Sentence: 11    tád ávarundʰe //

Paragraph: 18 
Verse: 1    {BS 3.8.18.68}
Sentence: 1    ámbʰām̐si juhoti /
Sentence: 2    ayáṃ vái lokó 'mbʰā́m̐si /
Sentence: 3    tásya vásavó 'dʰipatayaḥ /
Sentence: 4    agnír jyótiḥ /
Sentence: 5    yád ámbʰām̐si juhóti /
Sentence: 6    imám evá lokám ávarundʰe /
Sentence: 7    vásūnām̐ sā́yujyaṃ gaccʰati /
Sentence: 8    agníṃ jyótir ávarundʰe //
Sentence: 9    nábʰām̐si juhoti /
Sentence: 10    antárikṣaṃ vái nábʰām̐si /

Verse: 2    {BS 3.8.18.69}
Sentence: 1    tásya rudrā́ ádʰipatayaḥ /
Sentence: 2    vāyúr jyótiḥ /
Sentence: 3    yán nábʰām̐si juhóti /
Sentence: 4    antárikṣam evā́varundʰe /
Sentence: 5    rudrā́ṇām̐ sā́yujyaṃ gaccʰati /
Sentence: 6    vāyúṃ jyótir ávarundʰe //
Sentence: 7    máhām̐si juhoti /
Sentence: 8    asáu vái lokó máhām̐si /
Sentence: 9    tásya_ādityā́ ádʰipatayaḥ /
Sentence: 10    sū́ryo jyótiḥ //

Verse: 3    {BS 3.8.18.70}
Sentence: 1    yán máhām̐si juhóti /
Sentence: 2    amúm evá lokám ávarundʰe /
Sentence: 3    ādityā́nām̐ sā́yujyaṃ gaccʰati /
Sentence: 4    sū́ryaṃ jyótir ávarundʰe //
Sentence: 5    námo rā́jñe námo váruṇáya_íti yavyā́ni juhoti /
Sentence: 6    annā́dyasyā́varudʰyai //
Sentence: 7    mayobʰū́r vā́to abʰí vātūsrā́ iti gavyā́ni juhoti /
Sentence: 8    paśūnā́m ávarudʰyai //
Sentence: 9    prāṇā́ya svā́hā vyānā́ya svā́hā_íti saṃtatihomáñ juhoti /
Sentence: 10    suvargásya lokásya sáṃtatyai //

Verse: 4    {BS 3.8.18.71}
Sentence: 1    sitā́ya svā́hā_ásitāya svā́hā_íti prámuktīr juhoti /
Sentence: 2    suvargásya lokásya prámuktyai //
Sentence: 3    pr̥tʰivyái svā́hā_antárikṣāya svā́hā_íty āha /
Sentence: 4    yatʰāyajúr eváitát /
Sentence: 5    datváte sváhā_adantákāya svā́hā_íti śarīrahomā́ñ juhoti /
Sentence: 6    pitr̥lokám evá táir yájamānó 'varundʰe /
Sentence: 7    kás tvā yunakti sá tvā yunaktv íti paridʰī́n yunakti /
Sentence: 8    imé vái lokā́ḥ paridʰáyaḥ /
Sentence: 9    imā́n evā́smai lokā́n yunakti /
Sentence: 10    suvargásya lokásya sámaṣṭyai //

Verse: 5    {BS 3.8.18.72}
Sentence: 1    yáḥ prāṇató yá ātmadā́ íti mahimā́nau juhoti /
Sentence: 2    suvargó vái lokó máhaḥ /
Sentence: 3    suvargám evá tā́bʰyāṃ lokáṃ yájamānó 'varundʰe /
Sentence: 4    ā́ bráhman brāhmaṇó brahmavarcasī́ jāyatām íti sámastāni brahmavarcasā́ni juhoti /
Sentence: 5    brahmavarcasám evá táir yájamānó 'varundʰe //
Sentence: 6    jájñi bī́jam íti juhoty ánantarityai //
Sentence: 7    agnáye sámanamat pr̥tʰivyái sámanamad íti saṃnatihomā́ñ juhoti /
Sentence: 8    suvargásya lokásya sáṃnatyai //
Sentence: 9    bʰūtā́ya svā́hā bʰaviṣyaté svā́hā_íti bʰūtābʰavyáu hómau juhoti /
Sentence: 10    ayáṃ vái lokó bʰūtám /

Verse: 6    {BS 3.8.18.73}
Sentence: 1    asáu bʰaviṣyát /
Sentence: 2    anáyor evá lokáyoḥ prátitiṣṭhati /
Sentence: 3    sárvasya_ā́ptyai /
Sentence: 4    sárvasya_ávaruddʰyai /
Sentence: 5    yád ákrandaḥ pratʰamáṃ jā́yamāna íty aśvastomī́yaṃ juhoti /
Sentence: 6    sárvasya_ā́ptyai /
Sentence: 7    sárvasya jítyai //
Sentence: 8    sárvam evá téna_āpnoti /
Sentence: 9    sárvaṃ jayati /
Sentence: 10    yò 'śvamedʰéna yájate /

Verse: 7    {BS 3.8.18.74}
Sentence: 1    yá u ca_enam eváṃ véda //
Sentence: 2    yajñám̐ rákṣām̐sy ajigʰām̐san /
Sentence: 3    sá etā́n prajā́patir naktam̐homā́n apaśyat /
Sentence: 4    tā́n ajuhot /
Sentence: 5    táir vái sá yajñā́d rákṣām̐sy ápāhan /
Sentence: 6    yán naktaṃhomā́ñ juhoti /
Sentence: 7    yajñā́d evá táir yájamāno rákṣām̐sy ápahanti //
Sentence: 8    uṣáse svā́hā vyùṣṭyai svā́hā_íty antató juhoti /
Sentence: 9    suvargásya lokásya sámaṣṭyai //

Paragraph: 19 
Verse: 1    {BS 3.8.19.75}
Sentence: 1    ekayūpó vā_ekādaśínī vā /
Sentence: 2    anyéṣāṃ yajñā́nāṃ yū́pā bʰavanti /
Sentence: 3    ekavim̐śíny aśvamedʰásya /
Sentence: 4    svargásya lokásyābʰíjityai //
Sentence: 5    bailvó vā kʰādiró vā pālāśó vā /
Sentence: 6    anyéṣāṃ yajñakratūnā́ṃ yū́pā bʰavanti /
Sentence: 7    rā́jjudāla ékavim̐śatyaratnir aśvamedʰásya /
Sentence: 8    suvargásya lokásya sámaṣṭyai //
Sentence: 9    nā́nyéṣāṃ paśūnā́ṃ tejanyā́ {Dumont tedanyā́} avadyánti /
Sentence: 10    ávadyanty áśvasya /

Verse: 2    {BS 3.8.19.76}
Sentence: 1    pāpmā́ vái tejanī́ {Dumont tedanī́} /
Sentence: 2    pāpmánó 'pahatyai //
Sentence: 3    plakṣaśākʰā́yām anyéṣāṃ paśūnā́m avadyánti /
Sentence: 4    vetasaśākʰā́yām áśvasya /
Sentence: 5    apsúyonir vā́ áśvaḥ /
Sentence: 6    apsujó vetasáḥ /
Sentence: 7    svá evā́sya yónāv ávadyati //
Sentence: 8    yū́peṣu grāmyā́n paśū́n niyuñjánti /
Sentence: 9    ārokéṣv āraṇyā́n dʰārayanti /
Sentence: 10    paśūnā́ṃ vyā́vr̥ttyai //
Sentence: 11    ā́ grāmyā́n paśū́n_lábʰante /
Sentence: 12    prá_āraṇyā́nt sr̥janti /
Sentence: 13    pāpmánó 'pahatyai //

Paragraph: 20 
Verse: 1    {BS 3.8.20.77}
Sentence: 1    rā́jjudālam agniṣṭháṃ minoti /
Sentence: 2    bʰrūṇahatyā́yā ápahatyai //
Sentence: 3    páutudravāv abʰíto bʰavataḥ /
Sentence: 4    púṇyasya gandʰásyā́varudʰyai /
Sentence: 5    bʰrūṇahatyā́m evā́smād apahátya /
Sentence: 6    púṇyena gandʰéna_ubʰayátaḥ párigr̥hṇāti //
Sentence: 7    ṣáḍ bailvā́ bʰavanti /
Sentence: 8    bramavarcasásyā́varuddʰyai /
Sentence: 9    ṣáṭ kʰādirā́ḥ /
Sentence: 10    téjasó 'varudʰyai //

Verse: 2    {BS 3.8.20.78}
Sentence: 1    ṣáṭ pālāśā́ḥ /
Sentence: 2    somapītʰásyā́varudʰyai /
Sentence: 3    ékavim̐śatiḥ sáṃpadyante /
Sentence: 4    ékavim̐śatir vái devalokā́ḥ /
Sentence: 5    dvā́daśa mā́sāḥ páñca_r̥távaḥ /
Sentence: 6    tráya imé lokā́ḥ /
Sentence: 7    asā́v ādityá ekavim̐śáḥ /
Sentence: 8    eṣá suvargó lokáḥ /
Sentence: 9    suvargásya lokásya sámaṣṭyai //
Sentence: 10    śatáṃ paśávo bʰavanti /

Verse: 3    {BS 3.8.20.79}
Sentence: 1    śatā́yuḥ púruṣaḥ śata_índriyaḥ /
Sentence: 2    ā́yuṣy evá_indriyé prátitiṣṭhati //
Sentence: 3    sárvaṃ vā́ aśvamedʰy ā́pnoti /
Sentence: 4    áparimitā bʰavanti /
Sentence: 5    áparimitasyā́varuddʰyai //
Sentence: 6    brahmavādíno vadanti /
Sentence: 7    kásmāt satyā́t /
Sentence: 8    dakṣiṇatò 'nyéṣāṃ paśūnā́m avadyánti /
Sentence: 9    uttarató 'śvasya_íti /
Sentence: 10    vāruṇó vā́ áśvaḥ /

Verse: 4    {BS 3.8.20.80}
Sentence: 1    eṣā́ vái váruṇasya dík /
Sentence: 2    svā́yām evā́sya diśy ávadyati /
Sentence: 3    yád ítareṣāṃ paśūnā́m avadyáti /
Sentence: 4    śatadevatyàṃ ténā́varundʰe //
Sentence: 5    citè 'gnā́v ádʰi vaitasé káṭé 'śvaṃ cinoti /
Sentence: 6    apsúyonir vā́ áśvaḥ apsujó vetasáḥ /
Sentence: 7    svá evá_enaṃ yónau prátiṣṭhāpayati //
Sentence: 8    purástāt pratyáñcaṃ tūparáṃ cinoti /
Sentence: 9    paścā́t prācī́naṃ gomr̥gám /

Verse: 5    {BS 3.8.20.81}
Sentence: 1    prāṇāpānā́v evā́smint samyáñcau dadʰāti //
Sentence: 2    áśvaṃ tūparáṃ gomr̥gám íti sarvahúta etā́ñ juhoti /
Sentence: 3    eṣā́ṃ lokā́nām abʰíjityai //
Sentence: 4    ātmánā_abʰíjuhoti /
Sentence: 5    sā́tmānam evá_enam̐ sátanuṃ karoti //
Sentence: 6    sā́tmā_amúṣmin_loké bʰavati /
Sentence: 7    yá eváṃ véda /
Sentence: 8    átʰo vásor evá dʰā́rāṃ ténā́varundʰe //
Sentence: 9    iluvárdāya svā́hā balivárdāya svā́hā_íty āha /
Sentence: 10    saṃvatsaró vā́ iluvárdaḥ /
Sentence: 11    parivatsaró balivárdaḥ /
Sentence: 12    saṃvatsarā́d evá parivatsarā́d ā́yur ávarundʰe /
Sentence: 13    ā́yur evā́smin dadʰāti /
Sentence: 14    tásmād aśvamedʰayājī́ jarásā visrásā_amúṃ lokám eti //

Paragraph: 21 
Verse: 1    {BS 3.8.21.82}
Sentence: 1    ekavim̐śò 'gnír bʰavati /
Sentence: 2    ekavim̐śáḥ stómaḥ /
Sentence: 3    ékavim̐śatir yū́pāḥ //
Sentence: 4    yátʰā vā́ áśvā varṣabʰā́ vā vŕ̥ṣāṇaḥ sam̐spʰurérán /
Sentence: 5    evám etát stómāḥ sám̐spʰurante /
Sentence: 6    yád ekavim̐śā́ḥ /
Sentence: 7    té yát samr̥ccʰéran /
Sentence: 8    hanyétāsya yajñáḥ //
Sentence: 9    dvādaśá evā́gníḥ syād íty āhuḥ /
Sentence: 10    dvādaśáḥ stómaḥ /

Verse: 2    {BS 3.8.21.83}
Sentence: 1    ékādaśa yúpāḥ //
Sentence: 2    yád dvādaśò 'gnír bʰávati /
Sentence: 3    dvā́daśa mā́sāḥ saṃvatsaráḥ /
Sentence: 4    saṃvatsaréṇa_evā́smā ánnam ávarundʰe //
Sentence: 5    yád dáśa yū́pā bʰávanti /
Sentence: 6    dáśākṣarā virā́ṭ /
Sentence: 7    ánnaṃ virā́ṭ /
Sentence: 8    virā́jā_evā́nnā́dyam ávarundʰe /
Sentence: 9    yá {AS sá} ekādaśáḥ /
Sentence: 10    stána evā́syai sáḥ /

Verse: 3    {BS 3.8.21.84}
Sentence: 1    duhá evá_enāṃ téna //
Sentence: 2    tád āhuḥ /
Sentence: 3    yád dvādaśò 'gníḥ syād dvādaśáḥ stóma ékādaśa yū́pāḥ /
Sentence: 4    yátʰā stʰúriṇā yāyā́t /
Sentence: 5    tādŕ̥k tát //
Sentence: 6    ekavim̐śá evā́gníḥ syād íty āhuḥ /
Sentence: 7    ekavim̐śáḥ stómaḥ /
Sentence: 8    ékavim̐śatir yū́pāḥ /
Sentence: 9    yátʰā práṣṭibʰir yā́ti /
Sentence: 10    tādŕ̥g evá tát //

Verse: 4    {BS 3.8.21.85}
Sentence: 1    yó vā́ aśvamedʰé tisráḥ kakúbʰo véda /
Sentence: 2    kakúd dʰa rā́jñāṃ bʰavati /
Sentence: 3    ekavim̐śò 'nír bʰavati /
Sentence: 4    ekavim̐śáḥ stómaḥ /
Sentence: 5    ékavim̐śatir yū́pāḥ /
Sentence: 6    etā́ vā́ aśvamedʰé tisráḥ kakúbʰaḥ /
Sentence: 7    yá eváṃ véda /
Sentence: 8    kakúd dʰa rā́jñāṃ bʰavati //
Sentence: 9    yó vā́ aśvamedʰé trī́ṇi śīrṣā́ṇi véda /
Sentence: 10    śíro ha rā́jñāṃ bʰavati /
Sentence: 11    ekavim̐śò 'gnír bʰavati /
Sentence: 12    ekavim̐śaḥ stómaḥ /
Sentence: 13    ékavim̐śatir yū́pāḥ /
Sentence: 14    etā́ni vā́ aśvamedʰé trī́ṇi śīrṣā́ṇi /
Sentence: 15    yá eváṃ véda /
Sentence: 16    śíro ha rā́jñāṃ bʰavati //

Paragraph: 22 
Verse: 1    {BS 3.8.22.86}
Sentence: 1    devā́ vā́ aśvamedʰé pávamāne /
Sentence: 2    suvargáṃ lokáṃ ná prā́jānan /
Sentence: 3    tám áśvaḥ prā́jānāt /
Sentence: 4    yád aśvamedʰé 'śvèna médʰyena_údañco bahiṣpavamānám̐ sárpanti /
Sentence: 5    suvargásya lokásya prájñātyai /
Sentence: 6    ná vái manuṣyaḥ suvargáṃ lokám áñjasā veda /
Sentence: 7    áśvo vái suvargáṃ lokám áñjasā veda //
Sentence: 8    yád udgātā́_udgā́yet /
Sentence: 9    yátʰā_ákṣetrajño 'nyéna patʰā́ pratipādáyet /
Sentence: 10    tādŕ̥k tát /

Verse: 2    {BS 3.8.22.87}
Sentence: 1    udgātā́ram aparúddʰya /
Sentence: 2    áśvam udgītʰā́ya vr̥ṇīte /
Sentence: 3    yátʰā kṣétrajñó 'ñjasā náyati /
Sentence: 4    evám eváinam áśvaḥ suvargáṃ lokám áñjasā nayati //
Sentence: 5    púccʰam anvā́rabʰante /
Sentence: 6    suvargásya lokásya sámaṣṭyai //
Sentence: 7    híṃ karoti /
Sentence: 8    sā́ma_evā́kaḥ /
Sentence: 9    híṃ karoti /
Sentence: 10    udgītʰá evā́sya sáḥ //

Verse: 3    {BS 3.8.22.88}
Sentence: 1    váḍabā úparundʰanti /
Sentence: 2    mitʰunatvā́ya prájātyai /
Sentence: 3    átʰo yátʰā_upagātā́ra upagā́yanti /
Sentence: 4    tādŕ̥g evá tát //
Sentence: 5    údagāsīd áśvo médʰya íty āha /
Sentence: 6    prājāpatyó vā́ áśvaḥ /
Sentence: 7    prajā́patir udgītʰáḥ /
Sentence: 8    udgītʰám evā́varundʰe /
Sentence: 9    átʰo r̥ksāmáyor evá prátitiṣṭhati //
Sentence: 10    híraṇyena_upā́karoti /
Sentence: 11    jyótir vái híraṇyam /
Sentence: 12    jyótir evá mukʰató dadʰāti /
Sentence: 13    yájamāne ca prajā́su ca /
Sentence: 14    átʰo híraṇyajyotir evá yájamānaḥ suvargáṃ lokám eti //

Paragraph: 23 
Verse: 1    {BS 3.8.23.89}
Sentence: 1    púruṣo vái yajñáḥ /
Sentence: 2    yajñáḥ prajā́patiḥ /
Sentence: 3    yád áśve paśū́n niyuñjánti /
Sentence: 4    yajñā́d evá tád yajñáṃ práyuṅkte //
Sentence: 5    áśvaṃ tūparáṃ gomr̥gám /
Sentence: 6    tā́n agniṣṭhá ā́labʰate /
Sentence: 7    senāmukʰám evá tát sám̐śyati /
Sentence: 8    tásmād rājamukʰáṃ bʰīṣmáṃ bʰā́vukam //
Sentence: 9    āgneyáṃ kr̥ṣṇágrīvaṃ purástāl lalā́ṭe /
Sentence: 10    pūrvāgním evá táṃ kurute /

Verse: 2    {BS 3.8.23.90}
Sentence: 1    tásmāt pūrvāgníṃ purástāt stʰāpayanti //
Sentence: 2    pauṣṇám anváñcam /
Sentence: 3    ánnaṃ vái pūṣā́ /
Sentence: 4    tásmāt pūrvāgnā́v āhāryàm ā́haranti //
Sentence: 5    aindrāpauṣṇám upáriṣṭāt /
Sentence: 6    aindró vái rājanyò 'nnaṃ pūṣā́ /
Sentence: 7    annā́dyena_eváinam ubʰayátaḥ párigr̥hṇāti /
Sentence: 8    tásmād rājanyò 'nnādó bʰā́vukaḥ //
Sentence: 9    āgneyáu kr̥ṣṇágrīvau bāhuvóḥ /
Sentence: 10    bāhuvór evá vīryàṃ dʰatte /

Verse: 3    {BS 3.8.23.91}
Sentence: 1    tásmād rājanyò bāhubalī́ bʰā́vukaḥ //
Sentence: 2    tvāṣṭráu lomaśasaktʰáu saktʰyóḥ /
Sentence: 3    saktʰyór evá vīryàṃ dʰatte /
Sentence: 4    tásmād rājanyà ūrubalī́ bʰā́vukaḥ //
Sentence: 5    śitipr̥ṣṭháu bārhaspatyáu pr̥ṣṭhé /
Sentence: 6    brahmavarcasám evá_upáriṣṭād dʰatte /
Sentence: 7    átʰo kaváce eváité abʰítaḥ páryūhate /
Sentence: 8    tásmād rājanyàḥ saṃnaddʰó vīryàṃ karoti //
Sentence: 9    dʰātré pr̥ṣa_udarám adʰástāt /
Sentence: 10    pratiṣṭhā́m eváitā́ṃ kurute /
Sentence: 11    átʰo iyáṃ vái dʰātā́ /
Sentence: 12    asyā́m evá prátitiṣṭhati //
Sentence: 13    sauryáṃ balákṣaṃ púccʰe /
Sentence: 14    utsedʰám evá táṃ kurute /
Sentence: 15    tásmād utsedʰáṃ bʰayé prajā́ abʰísám̐śrayanti //

Next part


This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.