TITUS
White Yajur-Veda: Vajasaneyi-Samhita (Madhyandina)
Part No. 8
Previous part

Paragraph: 8 
Verse: 1 
Sentence: a    upayāmágr̥hīto si \
Sentence: b    ādityébʰyas tvā \
Sentence: c    víṣṇa urugāyaiṣá te sómas tám̐ rakṣasva mā́ tvā dabʰan \\

Verse: 2 
Sentence: a    kadā́ caná starī́r asi néndra saścasi dāśúṣe \
Sentence: b    úpopén nú magʰavan bʰū́ya ín nú te dā́naṃ devásya pr̥cyate \
Sentence: c    ādityébʰyas tvā \\

Verse: 3 
Sentence: a    kadā́ caná prá yuccʰasy ubʰé ní pāsi jánmanī \
Sentence: b    túrīyāditya sávanaṃ ta indriyám ā́ tastʰāv amŕ̥taṃ diví \
Sentence: c    ādityébʰyas tvā \\

Verse: 4 
Sentence: a    yajñó devā́nāṃ práty eti sumnám ā́dityāso bʰávatā mr̥ḍayántaḥ \
Sentence: b    ā́ vo rvā́cī sumatír vavr̥tyād ám̐hoś cid yā́ varivovíttarā́sat \
Sentence: c    ādityébʰyas tvā \\

Verse: 5 
Sentence: a    vívasvann ādityaiṣá te somapītʰás tásmin matsva \
Sentence: b    śrád asmai naro vácase dadʰātana yád āśīrdā́ dámpatī vāmám aśnutaḥ \
Sentence: c    púmān putró jāyate vindáte vásv ádʰā viśvā́hār apá edʰate gr̥hé \\

Verse: 6 
Sentence: a    vāmám adyá savitar vāmám u śvó divé-dive vāmám asmábʰyam̐ sāvīḥ \
Sentence: b    vāmásya hí kṣáyasya deva bʰū́rer ayā́ dʰiyā́ vāmabʰā́jaḥ syāma \\

Verse: 7 
Sentence: a    upayāmágr̥hīto si sāvitrò si canodʰā́ś canodʰā́ asi cáno máyi dʰehi \
Sentence: b    jínva yajñáṃ jínva yajñápatiṃ bʰágāya devā́ya tvā savitré \\

Verse: 8 
Sentence: a    upayāmágr̥hīto si suśármāsi supratiṣṭʰānó br̥hádukṣāya námaḥ \
Sentence: b    víśvebʰyas tvā devébʰyaḥ \
Sentence: c    eṣá te yónir víśvebʰyas tvā devébʰyaḥ \\

Verse: 9 
Sentence: a    upayāmágr̥hīto si bŕ̥haspátisutasya deva soma ta índor indriyā́vataṃ pátnīvato gráhām̐ r̥dʰyāsam \
Sentence: b    aháṃ parástād ahám avástād yád antárikṣaṃ tád u me pitā́bʰūt \
Sentence: c    ahám̐ sū́ryam ubʰayáto dadarśāháṃ devā́nāṃ paramáṃ gúhā yát \\

Verse: 10 
Sentence: a    ágnā́3i pátnīvant sajū́r devéna tváṣṭrā sómaṃ piba svā́hā \
Sentence: b    prajā́patir vŕ̥ṣāsi retodʰā́ réto máyi dʰehi prajā́pates ta vŕ̥ṣṇo retodʰáso retodʰā́m aśīya \\

Verse: 11 
Sentence: a    upayāmágr̥hīto si hárir asi hāriyojanó háribʰyāṃ tvā \
Sentence: b    háryor dʰānā́ stʰa sahásomā índrāya \\

Verse: 12 
Sentence: a    yás te aśvasánir bʰakṣó yó gosánis tásya ta iṣṭáyajuṣa stutásomasya śastóktʰasyópahūtasyópahūto bʰakṣayāmi \\

Verse: 13 
Sentence: a    devákr̥tasyáinaso vayájanam asi \
Sentence: b    manuṣyàkr̥tasyáinaso vayájanam asi \
Sentence: c    pitŕ̥kr̥tasyáinaso vayájanam asi \
Sentence: d    ātmákr̥tasyáinaso vayájanam asi \
Sentence: e    énasa-enaso vayájanam asi \
Sentence: f    yác cāhám éno vidvā́m̐ś cakā́ra yác cā́vidvām̐s tásya sárvasyáinaso vayájanam asi /

Verse: 14 
Sentence: a    sáṃ várcasā páyasā sáṃ tanū́bʰir áganmahi mánasā sám̐ śivéna \
Sentence: b    tváṣṭā sudátro ví dadʰātu rā́yó nu mārṣṭu tanvò yád víliṣṭam \\

Verse: 15 
Sentence: a    sám indra ṇo mánasā neṣi góbʰiḥ sám̐ sūríbʰir magʰavant sám̐ svastyā́ \
Sentence: b    sáṃ bráhmaṇā devákr̥taṃ yád ásti sáṃ devā́nām̐ sumatáu yajñíyānām̐ svā́hā \\

Verse: 16 
Sentence: a    sáṃ várcasā páyasā sáṃ tanū́bʰir áganmahi mánasā sám̐ śivéna \
Sentence: b    tváṣṭā sudátro vídadʰātu rā́yó nu mārṣṭu tanvò yád víliṣṭam \\

Verse: 17 
Sentence: a    dʰātā́ rātíḥ savitédáṃ juṣantāṃ prajā́patir nidʰipā́ devó agníḥ \
Sentence: b    tváṣṭā víṣṇuḥ prajáyā sam̐rarāṇā́ yájamānāya dráviṇaṃ dadʰāta svā́hā \\

Verse: 18 
Sentence: a    sugā́ vo devāḥ sádanā akarma yá ājagmédám̐ sávanaṃ juṣāṇā́ḥ \
Sentence: b    bʰáramāṇā váhamānā havī́m̐ṣy asmé dʰatta vasavo vásūni svā́hā \\

Verse: 19 
Sentence: a    yā́m̐ ā́vaha uśató deva devā́m̐s tā́n préraya své agne sadʰástʰe \
Sentence: b    jakṣivā́m̐saḥ papivā́m̐saś ca víśvé suṃ dʰármam̐ svarā́tiṣṭʰatā́nu svā́hā \\

Verse: 20 
Sentence: a    vayám̐ hí tvā prayatí yajñé asmínn agne hótāram ávr̥ṇīmahīhá \
Sentence: b    ŕ̥dʰag ayā ŕ̥dʰag utā́śamiṣṭʰāḥ prajānán yajñám úpa yāhi vidvā́nt svā́hā \\

Verse: 21 
Sentence: a    dévā gātuvido gātúṃ vittvā́ gātúm ita \
Sentence: b    mánasaspata imáṃ deva yajñám̐ svā́hā vā́te dʰāḥ \\

Verse: 22 
Sentence: a    yájña yajñáṃ gaccʰa yajñápátiṃ gaccʰa svā́ṃ yóniṃ gaccʰa svā́hā \
Sentence: b    eṣá te yajñó yajñapate sahásūktavākaḥ sárvavīras táj juṣasva svā́hā \\

Verse: 23 
Sentence: a    mā́hir bʰūr mā́ pŕ̥dākuḥ \
Sentence: b    urúm̐ hí rā́jā váruṇaś cakā́ra sū́ryāya pántʰām ánvetavā́ u \
Sentence: c    apáde pā́dā prátidʰātave kar utā́pavaktā hr̥dayāvídʰaś cit \
Sentence: d    námo váruṇāyābʰíṣṭʰito váruṇasya pā́śaḥ \\

Verse: 24 
Sentence: a    agnér ánīkam apá ā́ viveśāpā́ṃ nápāt pratirákṣann asuryám \
Sentence: b    dáme-dame samídʰaṃ yakṣy agne práti te jihvā́ gʰr̥tám úc caraṇyat svā́hā \\

Verse: 25 
Sentence: a    samudré te hŕ̥dayam apsv àntáḥ sáṃ tvā viśantv óṣadʰīr utā́paḥ \
Sentence: b    yajñásya tvā yajñapate sūktóktau namovāké vidʰema yát svā́hā \\

Verse: 26 
Sentence: a    dévīr āpa eṣá vo gárbʰas tám̐ súprītam̐ súbʰr̥taṃ bibʰr̥ta \
Sentence: b    déva somaiṣá te lokás tásmiñ cʰáṃ ca vákṣva pári ca vákṣva \\

Verse: 27 
Sentence: a    ávabʰr̥tʰa nicumpuṇa nicerúr asi nicumpuṇáḥ \
Sentence: b    áva deváir devákr̥tam éno yāsiṣam áva mártyair mártyakr̥taṃ pururā́vṇo deva riṣás pāhi \
Sentence: c    devā́nām̐ samíd asi \\

Verse: 28 
Sentence: a    éjatu dáśamāsyo gárbʰo jarā́yuṇā sahá \
Sentence: b    yátʰāyáṃ vāyúr éjati yátʰā samudrá éjati \
Sentence: c    evāyáṃ dáśamāsyo ásraj jarā́yuṇā sahá \\

Verse: 29 
Sentence: a    yásyai te yajñíyo gárbʰo yásyai yónir hiraṇyī \
Sentence: b    áṅgāny áhrutā yásya táṃ mātrā́ sám ajīgamam̐ svā́hā \\

Verse: 30 
Sentence: a    purudasmó víṣurūpa índur antár mahimā́nam ānañja dʰī́raḥ \
Sentence: b    ékapadīṃ dvipádīṃ tripádīṃ catuṣpádīm aṣṭā́padīṃ bʰúvanā́nu pratʰantām̐ svā́hā \\

Verse: 31 
Sentence: a    máruto yásya hí kṣáye pātʰā́ divó vimahasaḥ \
Sentence: b    sá sugopā́tamo jánaḥ \\

Verse: 32 
Sentence: a    mahī́ dyáuḥ pr̥tʰivī́ ca na imáṃ yajñáṃ mimikṣatām \
Sentence: b    pipr̥tā́ṃ no bʰárīmabʰiḥ \\

Verse: 33 
Sentence: a    ā́ tiṣṭʰa vr̥trahan rátʰaṃ yuktā́ te bráhmaṇā hárī \
Sentence: b    arvācī́nam̐ sú te máno grā́vā kr̥ṇotu vagnúnā \
Sentence: c    upayāmágr̥hīto sī́ndrāya tvā ṣoḍaśíne \
Sentence: d    eṣá te yónir índrāya tvā ṣoḍaśíne \\

Verse: 34 
Sentence: a    yukṣvā́ hí keśínā hárī vŕ̥ṣaṇā kakṣyaprā́ \
Sentence: b    átʰā na indra somapā girā́m úpaśrutiṃ cara \
Sentence: c    upayāmágr̥hīto sī́ndrāya tvā ṣoḍaśíne \
Sentence: d    eṣá te yónir índrāya tvā ṣoḍaśíne \\

Verse: 35 
Sentence: a    índram íd dʰárī vaható pratidʰr̥ṣṭaśavasam \
Sentence: b    ŕ̥ṣīṇāṃ ca stutī́r úpa yajñáṃ ca mā́nuṣāṇām \
Sentence: c    upayāmágr̥hīto sī́ndrāya tvā ṣoḍaśíne \
Sentence: d    eṣá te yónir índrāya tvā ṣoḍaśíne \\

Verse: 36 
Sentence: a    yásman ná jātáḥ páro anyó ásti yá āvivéśa bʰúvanāni víśvā \
Sentence: b    prajā́patiḥ prajáyā sam̐rarāṇás trī́ṇi jyótīm̐ṣi sacate sá ṣolaśī́ \\

Verse: 37 
Sentence: a    índraś ca samrā́ḍ váruṇaś ca rā́jā táu te bʰakṣáṃ cakratur ágr etám \
Sentence: b    táyor ahám ánu bʰakṣáṃ bʰakṣayāmi vā́g devī́ juṣāṇā́ sómasya tr̥pyatu \
Sentence: c    sahá prāṇéna svā́hā \\

Verse: 38 
Sentence: a    ágne pávasva svápā asmé várcaḥ suvī́ryam \
Sentence: b    dádʰad rayíṃ máyi póṣam \
Sentence: c    upayāmágr̥hīto sy agnáye tvā várcase \
Sentence: d    eṣá te yónir agnáye tvā várcase \
Sentence: e    ágne varcasvin várcasvām̐s tváṃ devéṣv ási várcasvān aháṃ manuṣyèṣu bʰūyāsam \\

Verse: 39 
Sentence: a    uttíṣṭʰann ójasā sahá pītvī́ śípre avepayaḥ \
Sentence: b    sómam indra camū́ sutám \
Sentence: c    upayāmágr̥hīto sī́ndrāya tváujase \
Sentence: d    eṣá te yónir índrāya tváujase \
Sentence: e    índraujiṣṭʰáujiṣṭʰas tváṃ devéṣv ásy ójiṣṭʰo háṃ manuṣyèṣu bʰūyāsam \\

Verse: 40 
Sentence: a    ádr̥śram asya ketávo ví raśmáyo jánām̐ ánu \
Sentence: b    bʰrā́janto agnáyo yatʰā \
Sentence: c    upayāmágr̥hīto si sū́ryāya tvā bʰrājā́ya \
Sentence: d    eṣá te yóniḥ sū́ryāya tvā bʰrājā́ya \
Sentence: e    sū́rya bʰrājiṣṭʰa bʰrā́jiṣṭʰas tváṃ devéṣv ási bʰrā́jiṣṭʰo háṃ manuṣyèṣu bʰūyāsam \\

Verse: 41 
Sentence: a    úd u tyáṃ jātávedasaṃ deváṃ vahanti ketávaḥ \
Sentence: b    dr̥śé víśvāya sū́ryam \
Sentence: c    upayāmágr̥hīto si sū́ryāya tvā bʰrājā́ya \
Sentence: d    eṣá te yóniḥ sū́ryāya tvā bʰrājā́ya \
Sentence: e    sū́rya bʰrājiṣṭʰa bʰrā́jiṣṭʰas tváṃ devéṣv ási bʰrā́jiṣṭʰo háṃ manuṣyèṣu bʰūyāsam \\

Verse: 42 
Sentence: a    sahásraṃ dʰukṣvorúdʰārā páyasvatī púnar mā́viśatād rayíḥ \\

Verse: 43 
Sentence: a    íḍe ránte hávye kā́mye cándre jyóté dite sárasvati máhi víśruti \
Sentence: b    etā́ te agʰnye nā́māni devébʰyo mā sukŕ̥taṃṃ brūtāt \\

Verse: 44 
Sentence: a    ví na indra mŕ̥dʰo jahi nīcā́ yaccʰa pr̥tanyatáḥ \
Sentence: b    yó asmā́m̐ abʰidā́saty ádʰaraṃ gamayā támaḥ \
Sentence: c    upayāmágr̥hīto sī́ndrāya tvā vimŕ̥dʰe \
Sentence: d    eṣá te yónir índrāya tvā vimŕ̥dʰe \\

Verse: 45 
Sentence: a    vācás pátiṃ viśvákarmāṇam ūtáye manojúvaṃ vā́je adyā́ huvema \
Sentence: b    sá no víśvāni hávanāni joṣad viśváśambʰūr ávase sādʰúkarmā \
Sentence: c    upayāmágr̥hīto sī́ndrāya tvā viśvákarmaṇe \
Sentence: d    eṣá te yónir índrāya tvā viśvákarmaṇe \\

Verse: 46 
Sentence: a    víśvakarman havíṣā várdʰanena trātā́ram índram akr̥ṇor avadʰyám \
Sentence: b    tásmai víśaḥ sámanamanta pūrvī́r ayám ugró vihávyo yátʰā́sat \
Sentence: c    upayāmágr̥hīto sī́ndrāya tvā viśvákarmaṇe \
Sentence: d    eṣá te yónir índrāya tvā viśvákarmaṇe \\

Verse: 47 
Sentence: a    upayāmágr̥hīto sy agnáye tvā gāyatráccʰandasaṃ gr̥hṇāmi \
Sentence: b    índrāya tvā triṣṭúpcʰandasaṃ gr̥hṇāmi \
Sentence: c    víśvebʰyas tvā devébʰyo jágaccʰandasaṃ gr̥hṇāmi \
Sentence: d    anuṣṭúp te bʰigaráḥ \\

Verse: 48 
Sentence: a    vréśīnāṃ tvā pátmann ā́ dʰūnomi kukānánānāṃ tvā pátmann ā́ dʰūnomi bʰandánānāṃ tvā pátmann ā́ dʰūnomi madíntamānāṃ tvā pátmann ā́ dʰūnomi madʰúntamānāṃ tvā pátmann ā́ dʰūnomi śukráṃ tvā śukrá ā́ dʰūnomy áhno rūpé sū́ryasya raśmíṣu \\

Verse: 49 
Sentence: a    kakubʰám̐ rūpáṃ vr̥ṣabʰásya rocate br̥hác cʰukráḥ śukrásya purogā́ḥ sómaḥ sómasya purogā́ḥ \
Sentence: b    yát te somādā́bʰyaṃ nā́ma jā́gr̥vi tásmai tvā gr̥hṇāmi tásmai te soma sómāya svā́hā \\

Verse: 50 
Sentence: a    uśík tváṃ deva somāgnéḥ priyáṃ pā́tʰó pīhi \
Sentence: b    vaśī́ tváṃ deva soméndrasya priyáṃ pā́tʰó pīhi \
Sentence: c    asmátsakʰā tváṃ deva soma víśveṣāṃ devā́nāṃ priyáṃ pā́tʰó pīhi \\

Verse: 51 
Sentence: a    ihá ratír ihá ramadʰvam ihá dʰŕ̥tir ihá svádʰr̥tiḥ svā́hā \
Sentence: b    upasr̥ján dʰarúṇaṃ mātré dʰarúṇo mātáraṃ dʰáyan \
Sentence: c    rāyáspóṣam asmā́su dīdʰarat svā́hā \\

Verse: 52 
Sentence: a    satrásya ŕ̥ddʰir asy áganma jyótir amŕ̥tā abʰūma dívaṃ pr̥tʰivyā́ ádʰy ā́ruhāmā́vidāma devā́nt svàr jyótiḥ \\

Verse: 53 
Sentence: a    yuváṃ tám indrāparvatā puroyúdʰā yó naḥ pr̥tanyā́d ápa táṃ-tam íd dʰataṃ vájreṇa táṃ-tam íd dʰatam \
Sentence: b    dūré cattā́ya cʰantsad gáhanaṃ yád ínakṣat \
Sentence: c    asmā́kam̐ śátrūn pári śūra viśváto darmā́ darṣīṣṭa viśvátaḥ \
Sentence: d    bʰū́r bʰúvaḥ svàḥ suprajā́ḥ prajā́bʰiḥ syāma suvī́rā vīráiḥ supóṣāḥ póṣaiḥ \\

Verse: 54 
Sentence: a    parameṣṭʰy àbʰídʰītaḥ \
Sentence: b    prajā́patir vācí vyā́hr̥tāyām \
Sentence: c    ándʰo áccʰetaḥ \
Sentence: d    savitā́ sanyā́m \
Sentence: e    viśvákarmā dīkṣā́yām \
Sentence: f    pūṣā́ somakráyaṇyām \\

Verse: 55 
Sentence: a    índraś ca marútaś ca krayā́yopóttʰitaḥ \
Sentence: b    ásuraḥ paṇyámānaḥ \
Sentence: c    mitráḥ krītáḥ \
Sentence: d    víṣṇuḥ śipiviṣṭá ūrā́v ā́sannaḥ \
Sentence: e    víṣṇur narándʰiṣaḥ prohyámāṇaḥ \\

Verse: 56 
Sentence: a    sóma ā́gataḥ \
Sentence: b    váruṇa āsandyā́m ā́sannaḥ \
Sentence: c    agnír ā́gnīdʰre \
Sentence: d    índro havirdʰā́ne \
Sentence: e    átʰarvopāvahriyámāṇaḥ \\

Verse: 57 
Sentence: a    víśve devā́ am̐śúṣu nyùptaḥ \
Sentence: b    víṣṇur āprītapā́ āpyāyyámānaḥ \
Sentence: c    yamáḥ sūyámānaḥ \
Sentence: d    víṣṇuḥ saṃbʰriyámāṇaḥ \
Sentence: e    vāyúḥ pūyámānaḥ \
Sentence: f    śukráḥ pūtáḥ \
Sentence: g    śukráṃ kṣīraśrī́ḥ \
Sentence: h    mantʰī́ saktuśrī́ḥ \\

Verse: 58 
Sentence: a    víśve devā́ś camaséṣū́nnītaḥ \
Sentence: b    ásur hómāyódyataḥ \
Sentence: c    rudró hūyámānaḥ \
Sentence: d    vā́to bʰyā́vr̥ttaḥ \
Sentence: e    nr̥cákṣāḥ prátikʰyātaḥ \
Sentence: f    bʰakṣó bʰakṣyámāṇaḥ \
Sentence: g    pitáro nārāśam̐sā́ḥ sannáḥ \\

Verse: 59 
Sentence: a    síndʰur avabʰr̥tʰā́yódyataḥ \
Sentence: b    samudrò bʰyavahriyámāṇaḥ \
Sentence: c    saliláḥ práplutaḥ \
Sentence: d    yáyor ójasā skabʰitā́ rájām̐si vīryèbʰir vīrátamā śáviṣṭʰā \
Sentence: e    yā́ pátyete ápratītā sáhobʰir víṣṇū agan váruṇā pūrváhūtau \\

Verse: 60 
Sentence: a    devā́n dívam agan yajñás táto mā dráviṇam aṣṭu manuṣyā̀n antárikṣam agan yajñás táto mā dráviṇam aṣṭu pitŕ̥̄n pr̥tʰivī́m agan yajñás táto mā dráviṇam aṣṭu yáṃ káṃ ca lokám ágan yajñás táto me bʰadráṃ abʰūt \\

Verse: 61 
Sentence: a    cátustrim̐śat tántavo yé vítatniré yá imáṃ yajñám̐ svadʰáyā dádante \
Sentence: b    téṣāṃ cʰinnám̐ sám v etád dadʰāmi svā́hā gʰarmó ápy etu devā́n \\

Verse: 62 
Sentence: a    yajñásya dóho vítataḥ purutrā́ só aṣṭadʰā́ dívam anvā́ tatāna \
Sentence: b    sá yajña dʰukṣva máhi me prajáyām̐ rāyáspóṣaṃ víśvam ā́yur aśīya svā́hā \\

Verse: 63 
Sentence: a    ā́ pavasva híraṇyavad áśvavat soma vīrávat \
Sentence: b    vā́jaṃ gómantam ā́ bʰara svā́hā \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.