TITUS
White Yajur-Veda: Vajasaneyi-Samhita (Madhyandina)
Part No. 9
Previous part

Paragraph: 9 

Verse: 1 
Sentence: a    déva savitaḥ prá suva yajñáṃ prá suva yajñápatiṃ bʰágāya \
Sentence: b    divyó gandʰarváḥ ketupū́ḥ kétaṃ naḥ punātu vācáspátir vā́jaṃ naḥ svadatu svā́hā \\

Verse: 2 
Sentence: a    dʰruvasádaṃ tvā nr̥ṣádaṃ manaḥsádam \
Sentence: b    upayāmágr̥hīto sī́ndrāya tvā júṣṭaṃ gr̥hṇāmi \
Sentence: c    eṣá te yónir índrāya tvā júṣṭatamam \
Sentence: d    apsuṣádaṃ tvā gʰr̥tasádaṃ vyomasádam \
Sentence: e    upayāmágr̥hīto sī́ndrāya tvā júṣṭaṃ gr̥hṇāmi \
Sentence: f    eṣá te yónir índrāya tvā júṣṭatamam \
Sentence: g    pr̥tʰivīsádaṃ tvāntarikṣasádaṃ divisádaṃ devasádaṃ nākasádam \
Sentence: h    upayāmágr̥hīto sī́ndrāya tvā júṣṭaṃ gr̥hṇāmi \
Sentence: i    eṣá te yónir índrāya tvā júṣṭatamam \\

Verse: 3 
Sentence: a    apā́m̐ rásam údvayasam̐ sū́rye sántam̐ samā́hitam \
Sentence: b    apā́m̐ rásasya yó rásas táṃ vo gr̥hṇāmy uttamám \
Sentence: c    upayāmágr̥hīto sī́ndrāya tvā júṣṭaṃ gr̥hṇāmi \
Sentence: d    eṣá te yónir índrāya tvā júṣṭatamam \\

Verse: 4 
Sentence: a    gráhā ūrjāhutayo vyánto víprāya matím \
Sentence: b    téṣāṃ víśipriyāṇāṃ vo hám íṣam ū́rjam̐ sám agrabʰam \
Sentence: c    upayāmágr̥hīto sī́ndrāya tvā júṣṭaṃ gr̥hṇāmi \
Sentence: d    eṣá te yónir índrāya tvā júṣṭatamam \
Sentence: e    sampŕ̥cau stʰaḥ sáṃ mā bʰadréṇa pr̥ṅktam \
Sentence: f    vipŕ̥cau stʰo ví mā pāpmánā pr̥ṅktam \\

Verse: 5 
Sentence: a    índrasya vájro si vājasā́s tváyāyám̐ set \
Sentence: b    vā́jasya nú prasavé mātáraṃ mahī́m áditiṃ nā́ma vácasā karāmahe \
Sentence: c    yásyām idáṃ víśvaṃ bʰúvanam āvivéśa tásyāṃ no deváḥ savitā́ dʰárma sāviṣat \\

Verse: 6 
Sentence: a    apsv àntár amŕ̥tam apsú bʰeṣajám apā́m utá práśastiṣv áśvā bʰávata vājínaḥ \
Sentence: b    dévīr āpo yó va ūrmíḥ prátūrtiḥ kakúnmān vājasā́s ténāyáṃ vā́jam̐ set \\

Verse: 7 
Sentence: a    vā́to vā máno vā gandʰarvā́ḥ saptávim̐śatiḥ \
Sentence: b    té ágré śvam ayuñjam̐s té asmin javám ā́dadʰuḥ \\

Verse: 8 
Sentence: a    vā́taram̐hā bʰava vājin yujyámāna índrasyeva dákṣiṇaḥ śriyáidʰi \
Sentence: b    yuñjántu tvā marúto viśvavédasa ā́ te tváṣṭā patsú javáṃ dadʰātu \\

Verse: 9 
Sentence: a    javó yás te vājin níhito gúhā yáḥ śyené párītto ácarac ca vā́te \
Sentence: b    téna no vājin bálavān bálena vājajíc ca bʰáva sámane ca pārayiṣṇúḥ \
Sentence: c    vā́jino vājajito vā́jam̐ sariṣyánto bŕ̥haspáter bʰāgám áva jigʰrata \\

Verse: 10 
Sentence: a    devásyāhám̐ savitúḥ savé satyásavaso bŕ̥haspáter uttamáṃ nā́kam̐ ruheyam \
Sentence: b    devásyāhám̐ savitúḥ savé satyásavasa índrasyottamáṃ nā́kam̐ ruheyam \
Sentence: c    devásyāhám̐ savitúḥ savé satyáprasavaso bŕ̥haspáter uttamáṃ nā́kam aruham \
Sentence: d    devásyāhám̐ savitúḥ savé satyáprasavasa índrasyottamáṃ nā́kam aruham \\

Verse: 11 
Sentence: a    bŕ̥haspate vā́jaṃ jaya bŕ̥haspátaye vā́caṃ vadata bŕ̥haspátiṃ vā́jaṃ jāpayata \
Sentence: b    índra vā́jaṃ jayéndrāya vā́caṃ vadaténdraṃ vā́jaṃ jāpayata \\

Verse: 12 
Sentence: a    eṣā́ vaḥ sā́ satyā́ saṃvā́g abʰūd yáyā bŕ̥haspátiṃ vā́jam ájījapatā́jījapata bŕ̥haspátiṃ vā́jaṃ vánaspatayo ví mucyadʰvam \
Sentence: b    eṣā́ vaḥ sā́ satyā́ saṃvā́g abʰūd yáyéndraṃ vā́jam ájījapatā́jījapaténdraṃ vā́jaṃ vánaspatayo ví mucyadʰvam \\

Verse: 13 
Sentence: a    devásyāhám̐ savitúḥ savé satyáprasavaso bŕ̥haspáter vājajíto vā́jaṃ jeṣam \
Sentence: b    vā́jino vājajitó dʰvana skabʰnuvánto yójanā mímānāḥ kā́ṣṭʰāṃ gaccʰata \\

Verse: 14 
Sentence: a    eṣá syá vājī́ kṣipaṇíṃ turaṇyati grīvā́yāṃ baddʰó apikakṣá āsáni \
Sentence: b    krátuṃ dadʰikrā́ ánu sam̐sániṣyadat patʰā́m áṅgām̐sy ánv āpánīpʰaṇat svā́hā \\

Verse: 15 
Sentence: a    utá smāsya drúvatas turaṇayatáḥ parṇáṃ ná vér ánu vāti pragardʰínaḥ \
Sentence: b    śyenásyeva dʰrájato aṅkasáṃ pári dadʰikrā́vṇaḥ sahórjā́ táritraḥ svā́hā \\

Verse: 16 
Sentence: a    śáṃ no bʰavantu vājíno háveṣu devátātā mitádravaḥ svarkā́ḥ \
Sentence: b    jambʰáyantó hiṃ vŕ̥kam̐ rákṣām̐si sánemy asmád yuyavann ámīvāḥ \\

Verse: 17 
Sentence: a    té no árvanto havanaśrúto hávaṃ víśve śr̥ṇvantu vājíno mitádravaḥ \
Sentence: b    sahasrasā́ medʰásātā saniṣyávo mahó yé dʰánam̐ samitʰéṣu jabʰriré \\

Verse: 18 
Sentence: a    vā́je-vāje vata vājino no dʰáneṣu viprā amr̥tā r̥tajñāḥ \
Sentence: b    asyá mádʰvaḥ pibata mādáyadʰvaṃ tr̥ptā́ yāta patʰíbʰir devayā́naiḥ \\

Verse: 19 
Sentence: a    ā́ mā vā́jasya prasavó jagamyād émé dyā́vāpr̥tʰivī́ viśvárūpe \
Sentence: b    ā́ mā gantāṃ pitárā mātárā cā́ mā sómo amr̥tatvéna gamyāt \
Sentence: c    vā́jino vājajito vā́jam̐ sasr̥vā́m̐so bŕ̥haspáter bʰāgám áva jigʰrata nimr̥jānā́ḥ \\

Verse: 20 
Sentence: a    āpáye svā́hā \
Sentence: b    svāpáye svā́hā \
Sentence: c    āpijā́ya svā́hā \
Sentence: d    krátave svā́hā \
Sentence: e    vásave svā́hā \
Sentence: f    aharpátaye svā́hā \
Sentence: g    áhne mugdʰā́ya svā́hā \
Sentence: h    mugdʰā́ya vainam̐śinā́ya svā́hā \
Sentence: i    vinam̐śína āntyāyanā́ya svā́hā \
Sentence: j    ántyāya bʰauvanā́ya svā́hā \
Sentence: k    bʰúvanasya pátaye svā́hā \
Sentence: l    ádʰipataye svā́hā \\

Verse: 21 
Sentence: a    ā́yur yajñéna kalpatām \
Sentence: b    prāṇó yajñéna kalpatām \
Sentence: c    cákṣur yajñéna kalpatām \
Sentence: d    śrótraṃ yajñéna kalpatām \
Sentence: e    pr̥ṣṭʰáṃ yajñéna kalpatām \
Sentence: f    yajñó yajñéna kalpatām \
Sentence: g    prajā́pateḥ prajā́ abʰūma \
Sentence: h    svàrdevā aganma \
Sentence: i    amŕ̥tā abʰūma \\

Verse: 22 
Sentence: a    asmé vo astv indriyám asmé nr̥mṇám utá krátur asmé várcām̐si santu vaḥ \
Sentence: b    námo mātré pr̥tʰivyái námo mātré pr̥tʰivyái \
Sentence: c    iyáṃ te rā́ṭ \
Sentence: d    yantā́si yámano dʰruvò si dʰarúṇaḥ kr̥ṣyái tvā kṣémāya tvā rayyái tvā póṣāya tvā \\

Verse: 23 
Sentence: a    vā́jasyemáṃ prasaváḥ suṣuvé gre sómam̐ rā́jānam óṣadʰīṣv apsú \
Sentence: b    tā́ asmábʰyaṃ mádʰumatīr bʰavantu vayám̐ rāṣṭr̥é jāgr̥yāma puróhitāḥ svā́hā \\

Verse: 24 
Sentence: a    vā́jasyemā́ṃ prasaváḥ śiśriye dívam imā́ ca víśvā bʰúvanāni samrā́ṭ \
Sentence: b    áditsantaṃ dāpayati prajānán sá no rayím̐ sárvavīraṃ ní yaccʰatu svā́hā \\

Verse: 25 
Sentence: a    vā́jasya nú prasavá ā́babʰūvemā́ ca víśvā bʰúvanāni sarvátaḥ \
Sentence: b    sánemi rā́jā páriyāti vidvā́n prajā́ṃ púṣṭiṃ vardʰáyamāno asmé svā́hā \\

Verse: 26 
Sentence: a    ādityā́n víṣṇum̐ sū́ryaṃ brahmā́ṇaṃ ca bŕ̥haspátim̐ svā́hā \\

Verse: 27 
Sentence: a    aryamáṇaṃ bŕ̥haspátim índraṃ dā́nāya codaya \
Sentence: b    vā́caṃ víṣṇum̐ sárasvatīm̐ savitā́raṃ ca vājínam̐ svā́hā \\

Verse: 28 
Sentence: a    ágne áccʰāvadehá naḥ práti naḥ sumánā bʰava \
Sentence: b    prá no yaccʰa sahasrajittvám̐ hí dʰanadā́ ási svā́hā \\

Verse: 29 
Sentence: a    prá no yaccʰatv aryamā́ prá pūṣā́ prá bŕ̥haspátiḥ \
Sentence: b    prá vā́g devī́ dadātu naḥ svā́hā \\

Verse: 30 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    sárasvatyai vācó yantúr yantríye dadʰāmi bŕ̥haspáteṣ ṭvā sā́mrājyenābʰí ṣiñcāmy asáu \\

Verse: 31 
Sentence: a    agnír ékākṣareṇa prāṇám úd ajayat tám új jeṣam \
Sentence: b    aśvínau dvyàkṣareṇa dvipádo manuṣyā̀n úd ajayatāṃ tā́n új jeṣam \
Sentence: c    víṣṇus tryàkṣareṇa trī́m̐l lokā́n úd ajayat tā́n új jeṣam \
Sentence: d    sómaś cáturakṣareṇa cátuṣpadaḥ paśū́n úd ajayat tā́n új jeṣam \\

Verse: 32 
Sentence: a    pūṣā́ páñcākṣareṇa páñca díśa úd ajayat tā́ új jeṣam \
Sentence: b    savitā́ ṣáḍakṣareṇa ṣáḍ r̥tū́n úd ajayat tā́n új jeṣam \
Sentence: c    marútaḥ saptā́kṣareṇa saptá grāmyā́n paśū́n úd ajayam̐s tā́n új jeṣam \
Sentence: d    bŕ̥haspátir aṣṭā́kṣareṇa gāyatrī́m úd ajayat tā́m új jeṣam \\

Verse: 33 
Sentence: a    mitró návākṣareṇa trivŕ̥tam̐ stómam úd ajayat tám új jeṣam \
Sentence: b    váruṇo dáśākṣareṇa virā́jam úd ajayat tā́m új jeṣam \
Sentence: c    índra ekā́daśākṣareṇa triṣṭúbʰam úd ajayat tā́m új jeṣam \
Sentence: d    víśve devā́ dvā́daśākṣareṇa jágatīm úd ajayam̐s tā́m új jeṣam \\

Verse: 34 
Sentence: a    vásavas tráyodaśākṣareṇa trayodaśám̐ stómam úd ajayam̐s tám új jeṣam \
Sentence: b    rudrā́ś cáturdaśākṣareṇa caturdaśám̐ stómam úd ajayam̐s tám új jeṣam \
Sentence: c    ādityā́ḥ páñcadaśākṣareṇa pañcadaśám̐ stómam úd ajayam̐s tám új jeṣam \
Sentence: d    áditiḥ ṣóḍaśākṣareṇa ṣoḍaśám̐ stómam úd ajayat tám új jeṣam \
Sentence: e    prajā́patiḥ saptádaśākṣareṇa saptadaśám̐ stómam úd ajayat tám új jeṣam \\

Verse: 35 
Sentence: a    eṣá te nirr̥te bʰāgás táṃ juṣasva svā́hā \
Sentence: b    agnínetrebʰyo devébʰyaḥ puraḥsádbʰyaḥ svā́hā \
Sentence: c    yamánetrebʰyo devébʰyo dakṣiṇā́sadbʰyaḥ svā́hā \
Sentence: d    viśvádevanetrebʰyo devébʰyo paścātsádbʰyaḥ svā́hā \
Sentence: e    mitrā́váruṇanetrebʰyo vā marúnnetrebʰyo vā devébʰya uttarāsádbʰyaḥ svā́hā \
Sentence: f    sómanetrebʰyo devébʰyo uparisádbʰyo dúvasvadbʰyaḥ svā́hā \\

Verse: 36 
Sentence: a    yé devā́ agnínetrāḥ puraḥsádas tébʰyaḥ svā́hā \
Sentence: b    yé devā́ yamánetrā dakṣiṇā́sádas tébʰyaḥ svā́hā \
Sentence: c    yé devā́ viśvádevanetrāḥ paścātsádas tébʰyaḥ svā́hā \
Sentence: d    yé devā́ mitrā́váruṇanetrā vā marúnnetrā vottarāsádas tébʰyaḥ svā́hā \
Sentence: e    yé devā́ḥ sómanetrā uparisádo dúvasvantas tébʰyaḥ svā́hā \\

Verse: 37 
Sentence: a    ágne sáhasva pŕ̥tanā abʰímātīr ápāsya \
Sentence: b    dusṭáras tárann árātīr várco dʰā yajñávāhasi \\

Verse: 38 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    upām̐śór vīryèṇa juhomi hatám̐ rákṣaḥ svā́hā \
Sentence: c    rákṣasāṃ tvā badʰā́ya \
Sentence: d    ábadʰiṣma rákṣó badʰiṣmāmúm asáu hatáḥ \\

Verse: 39 
Sentence: a    savitā́ tvā savā́nām̐ suvatā́m agnír gr̥hápatīnām̐ sómo vánaspátīnām \
Sentence: b    bŕ̥haspátir vācá índro jyáiṣṭʰyāya rudráḥ paśúbʰyo mitráḥ satyó váruṇo dʰármapatīnām \\

Verse: 40 
Sentence: a    imáṃ devā asupatnám̐ suvadʰvaṃ mahaté kṣatrā́ya mahaté jyáiṣṭʰyāya mahaté jā́narājyāyéndrasyendriyā́ya \
Sentence: b    imám amúṣya putrám amúṣyai putrám asyái viśá eṣá vo mī rā́jā sómo smā́kaṃ brāhmaṇā́nām̐ rā́jā \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.