TITUS
White Yajur-Veda: Vajasaneyi-Samhita (Madhyandina)
Part No. 10
Previous part

Paragraph: 10 

Verse: 1 
Sentence: a    apó devā́ mádʰumatīr agr̥bʰṇann ū́rjasvatī rājasvàś cítānāḥ \
Sentence: b    yā́bʰir mitrā́váruṇāv abʰyáṣiñcan yā́bʰir índram ánayann áty árātīḥ \\

Verse: 2 
Sentence: a    vŕ̥ṣṇa ūrmír asi rāṣṭradā́ rāṣṭráṃ me dehi svā́hā \
Sentence: b    vŕ̥ṣṇa ūrmír asi rāṣṭradā́ rāṣṭrám amúṣmai dehi \
Sentence: c    vr̥ṣasenò si rāṣṭradā́ rāṣṭráṃ me dehi svā́hā \
Sentence: d    vr̥ṣasenò si rāṣṭradā́ rāṣṭrám amúṣmai dehi \\

Verse: 3 
Sentence: a    artʰéta stʰa rāṣṭradā́ rāṣṭráṃ me datta svā́hā \
Sentence: b    artʰéta stʰa rāṣṭradā́ rāṣṭrám amúṣmai datta \
Sentence: c    ójasvatī stʰa rāṣṭradā́ rāṣṭráṃ me datta svā́hā \
Sentence: d    ójasvatī stʰa rāṣṭradā́ rāṣṭrám amúṣmai datta \
Sentence: e    ā́paḥ parivāhíṇī stʰa rāṣṭradā́ rāṣṭráṃ me datta svā́hā \
Sentence: f    ā́paḥ parivāhíṇī stʰa rāṣṭradā́ rāṣṭrám amúṣmai datta \
Sentence: g    apā́ṃ pátir asi rāṣṭradā́ rāṣṭráṃ me dehi svā́hā \
Sentence: h    apā́ṃ pátir asi rāṣṭradā́ rāṣṭrám amúṣmai dehi \
Sentence: i    apā́ṃ gárbʰo si rāṣṭradā́ rāṣṭráṃ me dehi svā́hā \
Sentence: j    apā́ṃ gárbʰo si rāṣṭradā́ rāṣṭrám amúṣmai dehi \\

Verse: 4 
Sentence: a    sū́ryatvacasa stʰa rāṣṭradā́ rāṣṭráṃ me datta svā́hā \
Sentence: b    sū́ryatvacasa stʰa rāṣṭradā́ rāṣṭrám amúṣmai datta \
Sentence: c    sū́ryavarcasa stʰa rāṣṭradā́ rāṣṭráṃ me datta svā́hā \
Sentence: d    sū́ryavarcasa stʰa rāṣṭradā́ rāṣṭrám amúṣmai datta \
Sentence: e    mā́ndā stʰa rāṣṭradā́ rāṣṭráṃ me datta svā́hā \
Sentence: f    mā́ndā stʰa rāṣṭradā́ rāṣṭrám amúṣmai datta \
Sentence: g    vrajakṣíta stʰa rāṣṭradā́ rāṣṭráṃ me datta svā́hā \
Sentence: h    vrajakṣíta stʰa rāṣṭradā́ rāṣṭrám amúṣmai datta \
Sentence: i    vā́śā stʰa rāṣṭradā́ rāṣṭráṃ me datta svā́hā \
Sentence: j    vā́śā stʰa rāṣṭradā́ rāṣṭrám amúṣmai datta \
Sentence: k    śáviṣṭʰā stʰa rāṣṭradā́ rāṣṭráṃ me datta svā́hā \
Sentence: l    śáviṣṭʰā stʰa rāṣṭradā́ rāṣṭrám amúṣmai datta \
Sentence: m    śákvarī stʰa rāṣṭradā́ rāṣṭráṃ me datta svā́hā \
Sentence: n    śákvarī stʰa rāṣṭradā́ rāṣṭrám amúṣmai datta \
Sentence: o    janabʰŕ̥ta stʰa rāṣṭradā́ rāṣṭráṃ me datta svā́hā \
Sentence: p    janabʰŕ̥ta stʰa rāṣṭradā́ rāṣṭrám amúṣmai datta \
Sentence: q    viśvabʰŕ̥ta stʰa rāṣṭradā́ rāṣṭráṃ me datta svā́hā \
Sentence: r    viśvabʰŕ̥ta stʰa rāṣṭradā́ rāṣṭrám amúṣmai datta \
Sentence: s    ā́paḥ svarā́ja stʰa rāṣṭradā́ rāṣṭrám amúṃai datta \
Sentence: t    mádʰumatīr mádʰumatībʰiḥ pr̥cyantāṃ máhi kṣatráṃ kṣatríyāya vanvānā́ḥ \
Sentence: u    ánādʰr̥ṣṭāḥ sīdata saháujaso máhi kṣatráṃ kṣatríyāya dádʰatīḥ \\

Verse: 5 
Sentence: a    sómasya tvíṣir asi táveva me tvíṣir bʰūyāt \
Sentence: b    agnáye svā́hā \
Sentence: c    sómāya svā́hā \
Sentence: d    savitré svā́hā \
Sentence: e    sárasvatyai svā́hā \
Sentence: f    pūṣṇé svā́hā \
Sentence: g    bŕ̥haspátaye svā́hā \
Sentence: h    índrāya svā́hā \
Sentence: i    gʰóṣāya svā́hā \
Sentence: j    ślókāya svā́hā \
Sentence: k    ám̐śāya svā́hā \
Sentence: l    bʰágāya svā́hā \
Sentence: m    aryamṇé svā́hā \\

Verse: 6 
Sentence: a    pavítre stʰo vaiṣṇavyàu \
Sentence: b    savitúr vaḥ prasavá út punāmy áccʰidreṇa pavítreṇa sū́ryasya raśmíbʰiḥ \
Sentence: c    ánibʰr̥ṣṭam asi vācó bándʰus tapojā́ḥ sómasya dātrám asi svā́hā rājasvàḥ \\

Verse: 7 
Sentence: a    sadʰamā́do dyumnínīr ā́pa etā́ ánādʰr̥ṣṭā apasyò vásānāḥ \
Sentence: b    pastyā̀su cakre váruṇaḥ sadʰástʰam apā́m̐ śíśur mātŕ̥tamāsv antáḥ \\

Verse: 8 
Sentence: a    kṣatrásyólvam asi \
Sentence: b    kṣatrásya jarā́yv asi \
Sentence: c    kṣatrásya yónir asi \
Sentence: d    kṣatrásya nā́bʰir asi \
Sentence: e    índrasya vā́tragʰnam \
Sentence: f    mitrásyāsi váruṇasyāsi \
Sentence: g    tváyāyáṃ vr̥tráṃ badʰet \
Sentence: h    dr̥vā́si \
Sentence: i    rujā́si \
Sentence: j    kṣumā́si \
Sentence: k    pātáinaṃ prā́ñcam \
Sentence: l    pātáinaṃ pratyáñcam \
Sentence: m    pātáinaṃ tiryáñcaṃ digbʰyáḥ pāta \\

Verse: 9 
Sentence: a    āvírmayāḥ \
Sentence: b    ā́vitto agnír gr̥hápatiḥ \
Sentence: c    ā́vitta índro vr̥ddʰáśravāḥ \
Sentence: d    ā́vittau mitrā́váruṇau dʰr̥távratau \
Sentence: e    ā́vittaḥ pūṣā́ viśvávedāḥ \
Sentence: f    ā́vitte dyā́vāpr̥tʰivī́ viśváśambʰuvau \
Sentence: g    ā́vittā́ditir urúśarmā \\

Verse: 10 
Sentence: a    áveṣṭā dandaśū́kāḥ \
Sentence: b    prā́cīm ā́ roha gāyatrī́ tvāvatu ratʰantarám̐ sā́ma trivŕ̥t stómo vasantá r̥túr bráhma dráviṇam \\

Verse: 11 
Sentence: a    dákṣiṇām ā́ roha triṣṭúp tvāvatu br̥hát sā́ma pañcadaśá stómo grīṣmá r̥túḥ kṣatráṃ dráviṇam \\

Verse: 12 
Sentence: a    pratī́cīm ā́ roha jágatī tvāvatu vairūpám̐ sā́ma saptadaśá stómo varṣā́ r̥túḥ víḍ dráviṇam \\

Verse: 13 
Sentence: a    údīcīm ā́ rohānuṣṭúp tvāvatu vairājám̐ sā́máikavim̐śá stómaḥ śarád r̥túḥ pʰálaṃ dráviṇam \\

Verse: 14 
Sentence: a    ūrdʰvā́m ā́ roha paṅktís tvāvatu śākvararaivaté sā́manī triṇavatrayastrim̐śáu stómau hemantaśiśirā́v r̥tū́ várco dráviṇam \
Sentence: b    prátyastaṃ námuceḥ śíraḥ \\

Verse: 15 
Sentence: a    sómasya tvíṣir asi táveva me tvíṣir bʰūyāt \
Sentence: b    mr̥tyóḥ pāhi \
Sentence: c    ójo si sáho sy amŕ̥tam asi \\

Verse: 16 
Sentence: a    híraṇyarūpā uṣáso viroká ubʰā́v indrā úditʰaḥ sū́ryaś ca \
Sentence: b    ā́ rohataṃ varuṇa mitra gártaṃ tátaś cakṣātʰām áditiṃ dítiṃ ca \
Sentence: c    mitrò si váruṇo si \\

Verse: 17 
Sentence: a    sómasya tvā dyumnénābʰíṣiñcāmy agnér bʰrā́jasā sū́ryasya várcaséndrasyendriyéṇa \
Sentence: b    kṣatrā́ṇāṃ kṣatrápatir edʰy áti didyū́n pāhi \\

Verse: 18 
Sentence: a    imáṃ devā asupatnám̐ suvadʰvaṃ mahaté kṣatrā́ya mahaté jyáiṣṭʰyāya mahaté jā́narājyāyéndrasyendriyā́ya \
Sentence: b    imám amúṣya putrám amúṣyai putrám asyái viśá eṣá vo mī rā́jā sómo smā́kaṃ brāhmaṇā́nām̐ rā́jā \\

Verse: 19 
Sentence: a    prá párvatasya vr̥ṣabʰásya pr̥ṣṭʰā́n nā́vaś caranti svasíca iyānā́ḥ \
Sentence: b    tā́ ā́vavr̥trann adʰarā́g údaktā áhiṃ budʰnyàm ánu rīyamāṇāḥ \
Sentence: c    víṣṇor vikármaṇam asi \
Sentence: d    víṣṇor víkrāntam asi \
Sentence: e    víṣṇoḥ krāntám asi \\

Verse: 20 
Sentence: a    prájāpate ná tvád etā́ny anyó víśvā rūpā́ṇi pári tā́ babʰūva \
Sentence: b    yátkāmās te juhumás tán no astu \
Sentence: c    ayám amúṣya pitā́sā́v asyá pitā́ \
Sentence: d    vayám̐ syāma pátayo rayīṇā́m̐ svā́hā \
Sentence: e    rúdra yát te krívi páraṃ nā́ma tásmin hutám asy ameṣṭám asi svā́hā \\

Verse: 21 
Sentence: a    índrasya vájro si \
Sentence: b    mitrā́váruṇayos tvā praśāstróḥ praśíṣā yunajmi \
Sentence: c    ávyatʰāyai tvā svadʰā́yai tvā́riṣṭo árjunaḥ \
Sentence: d    marútāṃ prasavéna jaya \
Sentence: e    ā́pāma mánasā \
Sentence: f    sám indriyéṇa \\

Verse: 22 
Sentence: a    mā́ ta indra te vayáṃ turāṣāḍ áyuktāso abrahmátā vídasāma \
Sentence: b    tíṣṭʰā rátʰam ádʰi yáṃ vajrahastā́ raśmī́n deva yuvase sváśvān \\

Verse: 23 
Sentence: a    agnáye gr̥hápataye svā́hā \
Sentence: b    sómāya vánaspátaye svā́hā \
Sentence: c    marútām ójase svā́hā \
Sentence: d    índrasyendriyā́ya svā́hā \
Sentence: e    pŕ̥tʰivi mātar mā́ mā him̐sīr mó aháṃ tvā́m \\

Verse: 24 
Sentence: a    ham̐sáḥ śuciṣád vásur antarikṣasád dʰótā vediṣád átitʰir duroṇasát \
Sentence: b    nr̥ṣád varasád r̥tasád vyomasád abjā́ gojā́ r̥tajā́ adrijā́ r̥táṃ br̥hát \\

Verse: 25 
Sentence: a    íyad asyā́yur asyā́yur máyi dʰehi yúṅṅ asi várco si várco máyi dʰehi \
Sentence: b    ū́rg asy ū́rjaṃ máyi dʰehi \
Sentence: c    índrasya vāṃ vīryakr̥tó bāhū́ abʰyupā́va harāmi \\

Verse: 26 
Sentence: a    syonā́si suṣádāsi \
Sentence: b    kṣatrásya yónir asi \
Sentence: c    syonā́m ā́ sīda suṣádām ā́ sīda kṣatrásya yónim ā́ sīda \\

Verse: 27 
Sentence: a    ní ṣasāda gʰr̥távrato váruṇaḥ pastyā̀sv ā́ \
Sentence: b    sā́mrājyāya sukrátuḥ \\

Verse: 28 
Sentence: a    abʰibʰū́r asy etā́s te páñca díśaḥ kalpantām \
Sentence: b    bráhmam̐s tváṃ bráhmāsi savitā́si satyáprasavaḥ \
Sentence: c    váruṇo si satyáujāḥ \
Sentence: d    índro si víśaujāḥ \
Sentence: e    rudró si suśévaḥ \
Sentence: f    báhukāra śréyaskara bʰū́yaskara \
Sentence: g    índrasya vájró si téna me radʰya \\

Verse: 29 
Sentence: a    agníḥ pr̥tʰúr dʰármaṇas pátir juṣāṇó agníḥ pr̥tʰúr dʰármaṇas pátir ā́jyasya vetu svā́hā \
Sentence: b    svā́hākr̥tāḥ sū́ryasya raśmíbir yatadʰvam̐ sajātā́nāṃ madʰyaméṣṭʰyāya \\

Verse: 30 
Sentence: a    savitrā́ prasavitrā́ sárasvatyā vācā́ tváṣṭrā rūpáiḥ pūṣṇā́ paśúbʰir índreṇāsmé bŕ̥haspátinā bráhmaṇā váruṇenáujasāgnínā téjasā sómena rā́jñā víṣṇunā daśamyā́ devátayā prásūtaḥ prá sarpāmi \\

Verse: 31 
Sentence: a    aśvíbʰyāṃ pacyasva \
Sentence: b    sárasvatyai pacyasva \
Sentence: c    índrāya sutrā́mṇe pacyasva \
Sentence: d    vāyúḥ pūtáḥ pavítreṇa pratyáṅk sómo átisrutaḥ \
Sentence: e    índrasya yújyaḥ sákʰā \\

Verse: 32 
Sentence: a    kuvíd aṅgá yávamanto vayáṃ cid yátʰā dā́nty anupūrváṃ viyū́ya \
Sentence: b    ihéhaiṣāṃ kr̥ṇuhi bʰójanāni yé barhíṣo námaüktiṃ yájanti \
Sentence: c    upayāmágr̥hīto sy aśvíbʰyāṃ tvā sárasvatyai tvéndrāya tvā sutrā́mṇe \\

Verse: 33 
Sentence: a    vayám̐ surā́mam aśvinā námucāv āsuré sácā \
Sentence: b    vipipānā́ śubʰas patī índraṃ kármasv āvatam \\

Verse: 34 
Sentence: a    putrám iva pitárāv aśvínobʰéndrāvátʰuḥ kā́vyair dam̐sánābʰiḥ \
Sentence: b    yát surā́maṃ vyápibaḥ śácībʰiḥ sárasvatī tvā magʰavann abʰiṣṇak \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.