TITUS
White Yajur-Veda: Vajasaneyi-Samhita (Madhyandina)
Part No. 11
Previous part

Paragraph: 11 

Verse: 1 
Sentence: a    yuñjānáḥ pratʰamáṃ mánas tatvā́ya savitā́ dʰíyam \
Sentence: b    agnér jyótir nicā́yya pr̥tʰivyā́ ádʰy ā́bʰarat \\

Verse: 2 
Sentence: a    yukténa mánasā vayáṃ devásya savitúḥ savé \
Sentence: b    svargyā̀ya śáktyā \\

Verse: 3 
Sentence: a    yuktvā́ya savitā́ devā́nt svaryató dʰiyā́ dívam \
Sentence: b    br̥háj jyótiḥ kariṣyatáḥ savitā́ prá suvāti tā́n \\

Verse: 4 
Sentence: a    yuñjáte mána utá yuñjate dʰíyo víprā víprasya br̥ható vipaścítaḥ \
Sentence: b    ví hótrā dadʰe vayunāvíd éka ín mahī́ devásya savitúḥ páriṣṭutiḥ \\

Verse: 5 
Sentence: a    yujé vāṃ bráhma pūrvyáṃ námobʰir ví ślóka etu patʰyèva sūréḥ \
Sentence: b    śr̥ṇvántu víśve amŕ̥tasya putrā́ ā́ yé dʰā́māni divyā́ni tastʰúḥ \\

Verse: 6 
Sentence: a    yásya prayā́ṇam ánv anyá íd yayúr devā́ devásya mahimā́nam ójasā \
Sentence: b    yáḥ pā́rtʰivāni vimamé sá étaśo rájām̐si deváḥ savitā́ mahitvanā́ \\

Verse: 7 
Sentence: a    déva savitaḥ prá suva yajñáṃ prá suva yajñápatiṃ bʰágāya \
Sentence: b    divyó gandʰarváḥ ketapū́ḥ kétaṃ naḥ punātu vācás pátir vā́caṃ naḥ svadatu \\

Verse: 8 
Sentence: a    imáṃ no deva savitar yajñáṃ prá ṇaya devāvyàm̐ sakʰivídam̐ satrājítaṃ dʰanajítam̐ svarjítam \
Sentence: b    r̥cā́ stómam̐ sámardʰaya gāyatréṇa ratʰantaráṃ br̥hád gāyatrávartani svā́hā \\

Verse: 9 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    ā́ dade gāyatréṇa cʰándasāṅgirasvát pr̥tʰivyā́ḥ sadʰástʰād agníṃ purīṣyàm aṅgirasvád ā́ bʰara tráiṣṭubʰena cʰándasāṅgirasvát \\

Verse: 10 
Sentence: a    ábʰrir asi nā́ry asi tváyā vayám agním̐ śakema kʰánitum̐ sadʰástʰa ā́ jā́gatena cʰándasāṅgirasvát \\

Verse: 11 
Sentence: a    hásta ādʰā́ya savitā́ bíbʰrad ábʰrim̐ hiraṇyáyīm \
Sentence: b    agnér jyótir nicā́yya pr̥tʰivyā́ ádʰy ā́ bʰara \
Sentence: c    ā́nuṣṭubʰena cʰándasāṅgirasvát \\

Verse: 12 
Sentence: a    prátūrtaṃ vājinn ā́ drava váriṣṭʰām ánu samvátam \
Sentence: b    diví te jánma paramám antárikṣe táva nā́bʰiḥ pr̥tʰivyā́m ádʰi yónir ít \\

Verse: 13 
Sentence: a    yuñjā́tʰām̐ rā́sabʰaṃ yuvám asmín yā́me vr̥ṣaṇvasū \
Sentence: b    agníṃ bʰárantam asmayúm \\

Verse: 14 
Sentence: a    yóge-yoge tavástaraṃ vā́je-vāje havāmahe \
Sentence: b    sákʰāya índram ūtáye \\

Verse: 15 
Sentence: a    pratū́rvann éhy avakrā́mann áśasto rudrásya gā́ṇapatyaṃ mayobʰū́r éhi \
Sentence: b    urv àntárikṣaṃ vī̀hi \
Sentence: c    svastígavyūtir ábʰayāni kr̥ṇván pūṣṇā́ sayújā sahá \\

Verse: 16 
Sentence: a    pr̥tʰivyā́ḥ sadʰástʰād agníṃ purīṣyàm aṅgirasvád ā́ bʰara \
Sentence: b    agníṃ purīṣyàm aṅgirasvád áccʰemaḥ \
Sentence: c    agníṃ purīṣyàm aṅgirasvád bʰariṣyāmaḥ \\

Verse: 17 
Sentence: a    ánv agnír uṣásām ágram akʰyad ánv áhāni pratʰamó jātávedāḥ \
Sentence: b    ánu sū́ryasya purutrā́ ca raśmī́n ánu dyā́vāpr̥tʰivī́ ā́ tatantʰa \\

Verse: 18 
Sentence: a    āgátya vājy ádʰvānam̐ sárvā mŕ̥dʰo vídʰūnute \
Sentence: b    agním̐ sadʰástʰe mahatí cákṣuṣā ní cikīṣate \\

Verse: 19 
Sentence: a    ākrámya vājin pr̥tʰivī́m agním iccʰa rucā́ tvám \
Sentence: b    bʰū́myā vr̥ktvā́ya no brūhi yátaḥ kʰánema táṃ vayám \\

Verse: 20 
Sentence: a    dyáus te pr̥ṣṭʰáṃ pr̥tʰivī́ sadʰástʰam ātmā́ntarikṣam̐ samudró yóniḥ \
Sentence: b    vikʰyā́ya cákṣuṣā tvám abʰí tiṣṭʰa pr̥tanyatáḥ \\

Verse: 21 
Sentence: a    út krāma mahaté sáubʰagāyāsmā́d āstʰā́nād draviṇodā́ vājin \
Sentence: b    vayám̐ syāma sumatáu pr̥tʰivyā́ agníṃ kʰánanta upástʰe asyāḥ \\

Verse: 22 
Sentence: a    úd akramīd draviṇodā́ vājy àrvā́kaḥ sú lokám̐ súkr̥taṃ pr̥tʰivyā́m \
Sentence: b    tátaḥ kʰanema suprátīkam agním̐ svo rúhāṇā ádʰi nā́kam uttamám \\

Verse: 23 
Sentence: a    ā́ tvā jigʰarmi mánasā gʰr̥téna pratikṣiyántaṃ bʰúvanāni víśvā \
Sentence: b    pr̥tʰúṃ tiraścā́ váyasā br̥hántaṃ vyáciṣṭʰam ánnai rabʰasáṃ dŕ̥śānam \\

Verse: 24 
Sentence: a    ā́ viśvátaḥ pratyáñcaṃ jigʰarmy arakṣásā mánasā táj juṣeta \
Sentence: b    máryaśrī spr̥hayádvarṇo agnír nā́bʰimŕ̥śe tanvā̀ járbʰurāṇaḥ \\

Verse: 25 
Sentence: a    pári vā́japatiḥ kavír agnír havyā́ny akramīt \
Sentence: b    dádʰad rátnāni dāśúṣe \\

Verse: 26 
Sentence: a    pári tvāgne púraṃ vayáṃ vípram̐ sahasya dʰīmahi \
Sentence: b    dʰr̥ṣádvarṇaṃ divé-dive hantā́raṃ bʰaṅgurā́vatām \\

Verse: 27 
Sentence: a    tvám agne dyúbʰis tvám āśuśukṣáṇis tvám adbʰyás tvám áśmanas pári \
Sentence: b    tváṃ vánebʰyas tvám óṣadʰībʰyas tváṃ nr̥ṇā́ṃ nr̥pate jāyase śúciḥ \\

Verse: 28 
Sentence: a    devásya tvā savitúḥ prasavè śvínor bāhúbʰyāṃ pūṣṇó hástābʰyām \
Sentence: b    pr̥tʰivyā́ḥ sadʰástʰād agníṃ purīṣyàm aṅgirasvát kʰanāmi \
Sentence: c    jyótiṣmantaṃ tvāgne suprátīkam ájasreṇa bʰānúnā dī́dyatam \
Sentence: d    śiváṃ prajā́bʰyó him̐santaṃ pr̥tʰivyā́ sadʰástʰād agníṃ purīṣyàm aṅgirasvát kʰanāmaḥ \\

Verse: 29 
Sentence: a    apā́ṃ pr̥ṣṭʰám asi yónir agnéḥ samudrám abʰítaḥ pínvamānam \
Sentence: b    várdʰamāno mahā́m̐ ā́ ca púṣkare divó mā́trayā varimṇā́ pratʰasva \\

Verse: 30 
Sentence: a    śárma ca stʰo várma ca stʰó ccʰidre bahulé ubʰé \
Sentence: b    vyácasvatī sáṃ vasātʰāṃ bʰr̥tám agníṃ purīṣyàm \\

Verse: 31 
Sentence: a    sáṃvasātʰām̐ svarvídā samī́cī úrasā tmánā \
Sentence: b    agním antár bʰariṣyántī jyótiṣmantam ájasram ít \\

Verse: 32 
Sentence: a    purīṣyò si viśvábʰarā átʰarvā tvā pratʰamó nír amantʰad agne \
Sentence: b    tvā́m agne púṣkarād ádʰy átʰarvā nír amantʰata \
Sentence: c    mūrdʰnó víśvasya vāgʰátaḥ \\

Verse: 33 
Sentence: a    tám u tvā dadʰyáṅṅ ŕ̥ṣiḥ putrá īdʰe átʰarvaṇaḥ \
Sentence: b    vr̥traháṇaṃ puraṃdarám \\

Verse: 34 
Sentence: a    tám u tvā pātʰyó vŕ̥ṣā sámīdʰe dasyuhántamam \
Sentence: b    dʰanaṃjayám̐ ráṇe-raṇe \\

Verse: 35 
Sentence: a    sī́da hotaḥ svá u loké cikitvā́n sādáyā yajñám̐ sukr̥tásya yónau \
Sentence: b    devāvī́r devā́n havíṣā yajāsy ágne br̥hád yájamāne váyo dʰāḥ \\

Verse: 36 
Sentence: a    ní hótā hotr̥ṣádane vídānas tveṣó dīdivā́m̐ asadat sudákṣaḥ \
Sentence: b    ádabdʰavratapramatir vásiṣṭʰaḥ sahasrambʰaráḥ śúcijihvo agníḥ \\

Verse: 37 
Sentence: a    sám̐ sīdasva mahā́m̐ asi śócasva devavī́tamaḥ \
Sentence: b    ví dʰūmám agne aruṣáṃ miyedʰya sr̥já praśasta darśatám \\

Verse: 38 
Sentence: a    apó devī́r úpasr̥ja mádʰumatīr ayakṣmā́ya prajā́bʰyaḥ \
Sentence: b    tā́sām āstʰā́nād új jihatām óṣadʰayaḥ supippalā́ḥ \\

Verse: 39 
Sentence: a    sáṃ te vāyúr mātaríśvā dadʰātūttānā́yā hŕ̥dayaṃ yád víkastam \
Sentence: b    yó devā́nāṃ cárasi prāṇátʰena kásmai deva váṣaḍ astu túbʰyam \\

Verse: 40 
Sentence: a    sújāto jyótiṣā sahá śárma várūtʰam ā́sadat svàḥ \
Sentence: b    vā́so agne viśvárūpam̐ sáṃvyayasva vibʰāvaso \\

Verse: 41 
Sentence: a    úd u tiṣṭʰa svadʰvarā́vā no devyā́ dʰiyā́ \
Sentence: b    dr̥śé ca bʰāsā́ br̥hatā́ śuśukvánir ā́gne yāhi suśastíbʰiḥ \\

Verse: 42 
Sentence: a    ūrdʰvá ū ṣú ṇa ūtáye tíṣṭʰā devó ná savitā́ \
Sentence: b    ūrdʰvó vā́jasya sánitā yád añjíbʰir vāgʰádbʰir vihváyāmahe \\

Verse: 43 
Sentence: a    sá jātó gárbʰo asi ródasyor agne cā́rur víbʰr̥ta óṣadʰīṣu \
Sentence: b    citráḥ śíśuḥ pári támām̐sy aktū́n prá mātŕ̥bʰyo ádʰi kánikradad gā́ḥ \\

Verse: 44 
Sentence: a    stʰiró bʰava vīḍv àṅgá āśúr bʰava vājy àrvan \
Sentence: b    pr̥tʰúr bʰava suṣádas tvám agnéḥ purīṣavā́haṇaḥ \\

Verse: 45 
Sentence: a    śivó bʰava prajā́bʰyo mā́nuṣībʰyas tvám aṅgiraḥ \
Sentence: b    mā́ dyā́vāpr̥tʰivī́ abʰí śocīr mā́ntárikṣaṃ mā́ vánaspátīn \\

Verse: 46 
Sentence: a    práitu vājī́ kánikradan nā́nadad rā́sabʰaḥ pátvā \
Sentence: b    bʰárann agníṃ purīṣyàṃ mā́ pādy ā́yuṣaḥ purā́ \
Sentence: c    vŕ̥ṣāgníṃ vŕ̥ṣaṇaṃ bʰárann apā́ṃ gárbʰam̐ samudríyam \
Sentence: d    ágna ā́yāhi vītáye \\

Verse: 47 
Sentence: a    r̥tám̐ satyám r̥tám̐ satyám \
Sentence: b    agníṃ purīṣyàm aṅgirasvád bʰarāmaḥ \
Sentence: c    óṣadʰayaḥ práti modadʰvam agním etám̐ śivám āyántam abʰy átra yuṣmā́ḥ \
Sentence: d    vyásyan víśvā ánirā ámīvā niṣī́dan no ápa durmatíṃ jahi \\

Verse: 48 
Sentence: a    óṣadʰayaḥ práti gr̥bʰṇīta púṣpavatīḥ supippalā́ḥ \
Sentence: b    ayáṃ vo gárbʰa r̥tvíyaḥ pratnám̐ sadʰástʰam ā́sadat \\

Verse: 49 
Sentence: a    ví pā́jasā pr̥tʰúnā śóśucāno bā́dʰasva dviṣó rakṣáso ámīvāḥ \
Sentence: b    suśármaṇo br̥hatáḥ śármaṇi syām agner ahám̐ suhávasya práṇītau \\

Verse: 50 
Sentence: a    ā́po hí ṣṭʰā́ mayobʰúvas tā́ na ūrjé dadʰātana \
Sentence: b    mahé ráṇāya cákṣase \\

Verse: 51 
Sentence: a    yó vaḥ śivátamo rásas tásya bʰājayatehá naḥ \
Sentence: b    uśatī́r iva mātáraḥ \\

Verse: 52 
Sentence: a    tásmā áraṃ gamāma vo yásya kṣáyāya jínvatʰa \
Sentence: b    ā́po janáyatʰā ca naḥ \\

Verse: 53 
Sentence: a    mitráḥ sam̐sŕ̥jya pr̥tʰivī́ṃ bʰū́miṃ ca jyótiṣā sahá \
Sentence: b    sújātaṃ jātávedasam ayakṣmā́ya tvā sám̐ sr̥jāmi prajā́bʰyaḥ \\

Verse: 54 
Sentence: a    rudrā́ḥ sam̐sŕ̥jya pr̥tʰivī́ṃ br̥háj jyótiḥ sám īdʰire \
Sentence: b    téṣāṃ bʰānúr ájasra íc cʰukró devéṣu rocate \\

Verse: 55 
Sentence: a    sám̐sr̥ṣṭā vásubʰī rudráir dʰī́raiḥ karmaṇyā̀ṃ mŕ̥dam \
Sentence: b    hástābʰyāṃ mr̥dvī́ṃ kr̥tvā́ sinīvālī́ kr̥ṇotu tā́m \\

Verse: 56 
Sentence: a    sinīvālī́ sukapardā́ sukurīrā́ svaupaśā́ \
Sentence: b    sā́ túbʰyam adite mahyókʰā́ṃ dadʰātu hástayoḥ \\

Verse: 57 
Sentence: a    ukʰā́ṃ kr̥ṇotu śáktyā bāhúbʰyām áditir dʰiyā́ \
Sentence: b    mātā́ putráṃ yátʰopástʰe sā́gníṃ bibʰartu gárbʰa ā́ \
Sentence: c    makʰásya śíro si \\

Verse: 58 
Sentence: a    vásavas tvā kr̥ṇvantu gāyatréṇa cʰándasāṅgirasvád dʰruvā́si pr̥tʰivy àsi \
Sentence: b    dʰāráyā máyi prajā́m̐ rāyáspóṣaṃ gaupatyám̐ suvī́ryam̐ sajātā́n yájamānāya \
Sentence: c    rudrā́s tvā kr̥ṇvantu tráiṣṭubʰena cʰándasāṅgirasvád dʰruvā́sy antárikṣam asi \
Sentence: d    dʰāráyā máyi prajā́m̐ rāyáspóṣaṃ gaupatyám̐ suvī́ryam̐ sajātā́n yájamānāya \
Sentence: e    ādityā́s tvā kr̥ṇvantu jā́gatena cʰándasāṅgirasvád dʰruvā́si dyáur asi \
Sentence: f    dʰāráyā máyi prajā́m̐ rāyáspóṣaṃ gaupatyám̐ suvī́ryam̐ sajātā́n yájamānāya \
Sentence: g    víśve tvā devā́ vaiśvānarā́ḥ kr̥ṇvantv ā́nuṣṭubʰena cʰándasāṅgirasvád dʰruvā́si díśo si \
Sentence: h    dʰāráyā máyi prajā́m̐ rāyáspóṣaṃ gaupatyám̐ suvī́ryam̐ sajātā́n yájamānāya \\

Verse: 59 
Sentence: a    ádityai rā́mnāsi \
Sentence: b    áditiṣ ṭe bílaṃ gr̥bʰṇātu \
Sentence: c    kr̥tvā́ya sā́ mahī́m ukʰā́ṃ mr̥nmáyīṃ yónim agnáye \
Sentence: d    putrébʰyaḥ prā́yaccʰad áditiḥ śrapáyān íti \\

Verse: 60 
Sentence: a    vásavas tvā dʰūpayantu gāyatréṇa cʰándasāṅgirasvát \
Sentence: b    rudrā́s tvā dʰūpayantu tráiṣṭubʰena cʰándasāṅgirasvát \
Sentence: c    ādityā́s tvā dʰūpayantu jā́gatena cʰándasāṅgirasvát \
Sentence: d    víśve tvā devā́ vaiśvānarā́ dʰūpayantv ā́nuṣṭubʰena cʰándasāṅgirasvát \
Sentence: e    índras tvā dʰūpayatu \
Sentence: f    váruṇas tvā dʰūpayatu \
Sentence: g    víṣṇu tvā dʰūpayatu \\

Verse: 61 
Sentence: a    áditiṣ ṭvā devī́ viśvádevyāvatī pr̥tʰivyā́ḥ sadʰástʰe aṅgirasvát kʰanatv avaṭa \
Sentence: b    devā́nām tvā pátnīr devī́r viśvádevyāvatīḥ pr̥tʰivyā́ḥ sadʰástʰe aṅgirasvád dadʰatūkʰe \
Sentence: c    dʰiṣáṇās tvā devī́r viśvádevyāvatīḥ pr̥tʰivyā́ḥ sadʰástʰe aṅgirasvád abʰī̀ndʰatām ukʰe \
Sentence: d    várūtrīṣ ṭvā devī́r viśvádevyāvatīḥ pr̥tʰivyā́ḥ sadʰástʰe aṅgirasvác cʰrapayantūkʰe \
Sentence: e    gnā́s tvā devī́r viśvádevyāvatīḥ pr̥tʰivyā́ḥ sadʰástʰe aṅgirasvát pacantūkʰe \
Sentence: f    jánayas tvā́ccʰinnapatrā devī́r viśvádevyāvatīḥ pr̥tʰivyā́ḥ sadʰástʰe aṅgirasvát pacantūkʰe \\

Verse: 62 
Sentence: a    mitrásya carṣaṇīdʰŕ̥tó vo devásya sānasí \
Sentence: b    dyumnáṃ citráśravastamam \\

Verse: 63 
Sentence: a    devás tvā savitódvapatu supāṇíḥ svaṅguríḥ subāhúr utá śaktyā \
Sentence: b    ávyatʰamānā pr̥tʰivyā́m ā́śā díśa ā́ pr̥ṇa \\

Verse: 64 
Sentence: a    uttʰā́ya br̥hatī́ bʰavód u tiṣṭʰa dʰruvā́ tvám \
Sentence: b    mítraitā́ṃ ta ukʰā́ṃ pári dadāmy ábʰittyā eṣā́ mā́ bʰedi \\

Verse: 65 
Sentence: a    vásavas tvā́ cʰr̥ndantu gāyatréṇa cʰándasāṅgirasvát \
Sentence: b    rudrā́s tvā́ cʰr̥ndantu tráiṣṭubʰena cʰándasāṅgirasvát \
Sentence: c    ādityā́s tvā́ cʰr̥ndantu jā́gatena cʰándasāṅgirasvát \
Sentence: d    víśve tvā devā́ vaiśvānarā́ ā́ cʰr̥ndantv ā́nuṣṭubʰena cʰándasāṅgirasvát \\

Verse: 66 
Sentence: a    ā́kūtim agníṃ prayújam̐ svā́hā \
Sentence: b    máno medʰā́m agníṃ prayújam̐ svā́hā \
Sentence: c    cittáṃ víjñātam agníṃ prayújam̐ svā́hā \
Sentence: d    vācó vídʰr̥tim agníṃ prayújam̐ svā́hā \
Sentence: e    prajā́pataye mánave svā́hā \
Sentence: f    agnáye vaiśvānarā́ya svā́hā \\

Verse: 67 
Sentence: a    víśvo devásya netúr márto vurīta sakʰyám \
Sentence: b    víśvo rāyá iṣudʰyati dyumnáṃ vr̥ṇīta puṣyáse svā́hā \\

Verse: 68 
Sentence: a    mā́ sú bʰittʰā mā́ sú riṣó mba dʰr̥ṣṇú vīráyasva sú \
Sentence: b    agníś cedáṃ kariṣyatʰaḥ \\

Verse: 69 
Sentence: a    dŕ̥m̐hasva devi pr̥tʰivi svastáya āsurī́ māyā́ svadʰáyā kr̥tā́si \
Sentence: b    júṣṭaṃ devébʰya idám astu havyám áriṣṭā tvám úd ihi yajñé asmín \\

Verse: 70 
Sentence: a    drvànna sarpírāsutiḥ pratnó hótā váreṇyaḥ \
Sentence: b    sáhasas putró ádbʰutaḥ \\

Verse: 71 
Sentence: a    párasyā ádʰi saṃvátó varām̐ abʰy ā́tara \
Sentence: b    yátrāhám asmi tā́m̐ ava \\

Verse: 72 
Sentence: a    paramásyāḥ parāváto rohíd aśva ihā́ gahi \
Sentence: b    purīṣyàḥ purupriyó gne tváṃ tarā mŕ̥dʰaḥ \\

Verse: 73 
Sentence: a    yád agne kā́ni kā́ni cid ā́ te dā́rūṇi dadʰmási \
Sentence: b    sárvaṃ tád astu te gʰr̥táṃ táj juṣasva yaviṣṭʰya \\

Verse: 74 
Sentence: a    yád átty upajíhvikā yád vamró atisárpati \
Sentence: b    sárvaṃ tád astu te gʰr̥táṃ táj juṣásva yaviṣṭʰya \\

Verse: 75 
Sentence: a    áhar-ahar áprayāvaṃ bʰárantó śvāyeva tíṣṭʰate gʰāsám asmai \
Sentence: b    rāyáspóṣeṇa sám iṣā́ mádantó gne mā́ te prátiveśā riṣāma \\

Verse: 76 
Sentence: a    nā́bʰā pr̥tʰivyā́ḥ samidʰāné agnáu rāyáspóṣāya br̥haté havāmahe \
Sentence: b    iraṃmadáṃ br̥háduktʰyaṃ yájatraṃ jétāram agníṃ pŕ̥tanāsu sāsahím \\

Verse: 77 
Sentence: a    yā́ḥ sénā abʰī́tvarīr āvyādʰínīr úgaṇā utá \
Sentence: b    yé stenā́ yé ca táskarās tā́m̐s te agné pi dadʰāmy āsyè \\

Verse: 78 
Sentence: a    dám̐ṣṭrābʰyāṃ malímlūn jámbʰyais táskarām̐ utá \
Sentence: b    hánubʰyām̐ stenā́n bʰagavas tā́m̐s tváṃ kʰāda súkʰāditān \\

Verse: 79 
Sentence: a    yé jáneṣu malímlava stenā́sas táskarā váne \
Sentence: b    yé kákṣeṣv agʰāyávas tā́m̐s te dadʰāmi jámbʰayoḥ \\

Verse: 80 
Sentence: a    yó asmábʰyam arātīyā́d yáś ca no dvéṣate jánaḥ \
Sentence: b    níndād yó asmā́n dʰípsāc ca sárvaṃ táṃ bʰasmasā́ kuru \\

Verse: 81 
Sentence: a    sám̐śitaṃ me bráhma sám̐śitaṃ vīryàṃ bálam \
Sentence: b    sám̐śitaṃ kṣatráṃ jiṣṇú yásyāhám ásmi puróhitaḥ \\

Verse: 82 
Sentence: a    úd eṣāṃ bāhū́ atiram úd várco átʰo bálam \
Sentence: b    kṣiṇómi bráhmaṇāmítrān ún nayāmi svā́m̐ ahám \\

Verse: 83 
Sentence: a    ánnapaté nnasya no dehy anamīvásya śuṣmíṇaḥ \
Sentence: b    prá-pra dātā́raṃ tāriṣa ū́rjaṃ no dʰehi dvipáde cátuṣpade \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.