TITUS
White Yajur-Veda: Vajasaneyi-Samhita (Madhyandina)
Part No. 12
Previous part

Paragraph: 12 

Verse: 1 
Sentence: a    dr̥śānó rukmá urvyā́ vy àdyaud durmárṣam ā́yuḥ śriyé rucānáḥ \
Sentence: b    agnír amŕ̥to abʰavad váyobʰir yád enaṃ dyáur janáyat surétāḥ \\

Verse: 2 
Sentence: a    náktoṣā́sā sámanasā vírūpe dʰāpáyete śíśum ékam̐ samīcī́ \
Sentence: b    dyā́vākṣā́mā rukmó antár ví bʰāti devā́ agníṃ dʰārayan draviṇodā́ḥ \\

Verse: 3 
Sentence: a    víśvā rūpā́ṇi práti muñcate kavíḥ prā́sāvīd bʰadráṃ dvipáde cátuṣpade \
Sentence: b    ví nā́kam akʰyat savitā́ váreṇyó nu prayā́ṇam uṣáso ví rājati \\

Verse: 4 
Sentence: a    suparṇò si garútmām̐s trivŕ̥t te śíro gāyatráṃ cákṣur br̥hadratʰantaré pakṣáu \
Sentence: b    stóma ātmā́ cʰándām̐sy áṅgāni yájūm̐ṣi nā́ma \
Sentence: c    sā́ma te tanū́r vāmadevyáṃ yajñāyajñíyaṃ púccʰaṃ dʰíṣṇyāḥ śapʰā́ḥ \
Sentence: d    suparṇò si garútmān dívaṃ gaccʰa svàḥ pata \\

Verse: 5 
Sentence: a    víṣṇoḥ krámo si sapatnahā́ gāyatráṃ cʰánda ā́ roha pr̥tʰivī́m ánu ví kramasva \
Sentence: b    víṣṇoḥ krámo sy abʰimātihā́ tráiṣṭubʰaṃ cʰánda ā́ rohāntárikṣam ánu ví kramasva \
Sentence: c    víṣṇoḥ krámo sy arātīyató hantā́ jā́gataṃ cʰánda ā́ roha dívam ánu ví kramasva \
Sentence: d    víṣṇoḥ krámo si śatrūyató hantā́nuṣṭubʰaṃ cʰánda ā́ roha díśó nu ví kramasva \\

Verse: 6 
Sentence: a    ákrandad agní stanáyann iva dyáuḥ kṣā́mā rérihad vīrúdʰaḥ samañján \
Sentence: b    sadyó jajñānó ví hī́m iddʰó ákʰyad ā́ ródasī bʰānúnā bʰāty antáḥ \\

Verse: 7 
Sentence: a    ágne bʰyāvartinn abʰí mā ní vartasvā́yuṣā várcasā prajáyā dʰánena \
Sentence: b    sanyā́ medʰáyā rayyā́ póṣeṇa \\

Verse: 8 
Sentence: a    ágne aṅgiraḥ śatáṃ te santv āvŕ̥taḥ sahásraṃ ta upāvŕ̥taḥ \
Sentence: b    ádʰā póṣasya póṣeṇa púnar no naṣṭám ā́ kr̥dʰi púnar no rayím ā́ kr̥dʰi \\

Verse: 9 
Sentence: a    púnar ūrjā́ ní vartasva púnar agna iṣā́yuṣā \
Sentence: b    púnar naḥ pāhy ám̐hasaḥ \\

Verse: 10 
Sentence: a    sahá rayyā́ ní vartasvā́gne pínvasva dʰā́rayā \
Sentence: b    viśvápsnyā viśvátas pári \\

Verse: 11 
Sentence: a    ā́ tvāhārṣam antár abʰūr dʰruvás tiṣṭʰā́vicācaliḥ \
Sentence: b    víśas tvā sárvā vāñcʰantu mā́ tvád rāṣṭrám ádʰi bʰraśat \\

Verse: 12 
Sentence: a    úd uttamáṃ varuṇa pā́śam asmád ávādʰamáṃ ví madʰyamám̐ śratʰāya \
Sentence: b    átʰā vayám āditya vraté távā́nāgaso áditaye syāma \\

Verse: 13 
Sentence: a    ágre br̥hánn uṣásām ūrdʰvó astʰān nirjaganvā́n támaso jyótiṣā́gāt \
Sentence: b    agnír bʰānúnā rúśatā sváṅga ā́ jātó víśvā sádmāny aprāḥ \\

Verse: 14 
Sentence: a    ham̐sáḥ śuciṣád vásur antarikṣasád dʰótā vediṣád átitʰir dūroṇasát \
Sentence: b    nr̥ṣád varasád r̥tasád vyomasád abjā́ gojā́ r̥tajā́ adrijā́ r̥tám \
Sentence: c    br̥hát \\

Verse: 15 
Sentence: a    sī́da tváṃ mātúr asyā́ upástʰe víśvāny agne vayúnāni vidvā́n \
Sentence: b    máināṃ tápasā mā́rcíṣābʰíśocīr antár asyām̐ śukrájyotir ví bʰāhi \\

Verse: 16 
Sentence: a    antár agne rucā́ tvám ukʰā́yāḥ sádane své \
Sentence: b    tásyās tvám̐ hárasā tápan jā́tavedaḥ śivó bʰava \\

Verse: 17 
Sentence: a    śivó bʰūtvā́ máhyam agne átʰo sīda śivás tvám \
Sentence: b    śiváḥ kr̥tvā́ díśaḥ sárvāḥ sváṃ yónim ihā́sadaḥ \\

Verse: 18 
Sentence: a    divás pári pratʰamáṃ jajñe agnír asmā́d dvitī́yaṃ pári jātávedāḥ \
Sentence: b    tr̥tī́yam apsú nr̥máṇā ájasram índʰāna enaṃ jarate svādʰī́ḥ \\

Verse: 19 
Sentence: a    vidmā́ te agne tredʰā́ trayā́ṇi vidmā́ te dʰā́ma víbʰr̥tā purutrā́ \
Sentence: b    vidmā́ te nā́ma paramáṃ gúhā yád vidmā́ tám útsaṃ yáta ājagántʰa \\

Verse: 20 
Sentence: a    samudré tvā nr̥máṇā apsv àntár nr̥cákṣā īdʰe divó agna ū́dʰan \
Sentence: b    tr̥tī́ye tvā rájasi tastʰivā́m̐sam apā́m upástʰe mahiṣā́ avardʰan \\

Verse: 21 
Sentence: a    ákrandad agní stanáyann iva dyáuḥ kṣā́mā rérihad vīrúdʰaḥ samañján \
Sentence: b    sadyó jajñānó ví hī́m iddʰó ákʰyad ā́ ródasī bʰānúnā bʰāty antáḥ \\

Verse: 22 
Sentence: a    śrīṇā́m udāró dʰarúṇo rayīṇā́ṃ manīṣā́ṇāṃ prā́rpaṇaḥ sómagopāḥ \
Sentence: b    vásuḥ sūnúḥ sáhaso apsú rā́jā ví bʰāty ágra uṣásām idʰānáḥ \\

Verse: 23 
Sentence: a    víśvasya ketúr bʰúvanasya gárbʰa ā́ ródasī apr̥ṇāj jā́yamānaḥ \
Sentence: b    vīḍúṃ cid ádrim abʰinat parāyáñ jánā yád agním áyajanta páñca \\

Verse: 24 
Sentence: a    uśík pāvakó aratíḥ sumedʰā́ mártyeṣv agnír amŕ̥to ní dʰāyi \
Sentence: b    íyarti dʰūmám aruṣáṃ bʰáribʰrad úc cʰukréṇa śocíṣā dyā́m ínakṣan \\

Verse: 25 
Sentence: a    dr̥śānó rukmá urvyā́ vy àdyaud durmárṣam ā́yuḥ śriyé rucānáḥ \
Sentence: b    agnír amŕ̥to abʰavad váyobʰir yád enaṃ dyáur janáyat surétāḥ \\

Verse: 26 
Sentence: a    yás te adyá kr̥ṇávad bʰadraśoce pūpáṃ deva gʰr̥távantam agne \
Sentence: b    prá táṃ naya prataráṃ vásyo áccʰābʰí sumnáṃ devábʰaktaṃ yaviṣṭʰa \\

Verse: 27 
Sentence: a    ā́ táṃ bʰaja sauśravaséṣv agna uktʰá-uktʰa ā́ bʰaja śasyámāne \
Sentence: b    priyáḥ sū́rye priyó agnā́ bʰavāty új jāténa bʰinádad új jánitvaiḥ \\

Verse: 28 
Sentence: a    tvā́m agne yájamānā ánu dyū́n víśvā vásu dadʰire vā́ryāṇi \
Sentence: b    tváyā sahá dráviṇam iccʰámānā vrajáṃ gómantam uśíjo ví vavruḥ \\

Verse: 29 
Sentence: a    ástāvy agnír narā́m̐ suśévo vaiśvānará ŕ̥ṣibʰiḥ sómagopāḥ \
Sentence: b    adveṣé dyā́vāpr̥tʰivī́ huvema dévā dʰattá rayím asmé suvī́ram \\

Verse: 30 
Sentence: a    samídʰāgníṃ duvasyata gʰr̥táir bodʰayatā́titʰim \
Sentence: b    ā́smin havyā́ juhotana \\

Verse: 31 
Sentence: a    úd u tvā víśve devā́ ágne bʰárantu cíttibʰiḥ \
Sentence: b    sá no bʰava śivás tvám̐ suprátīko vibʰā́vasuḥ \\

Verse: 32 
Sentence: a    préd agne jyótiṣmān yāhi śivébʰir arcíbʰiṣ ṭvám \
Sentence: b    br̥hádbʰir bʰānúbʰir bʰā́san mā́ him̐sīs tanvā̀ prajā́ḥ \\

Verse: 33 
Sentence: a    ákrandad agní stanáyann iva dyáuḥ kṣā́mā rérihad vīrúdʰaḥ samañján \
Sentence: b    sadyó jajñānó ví hī́m iddʰó ákʰyad ā́ ródasī bʰānúnā bʰāty antáḥ \\

Verse: 34 
Sentence: a    prá-prāyám agnír bʰaratásya śr̥ṇve ví yát sū́ryo ná rócate br̥hád bʰā́ḥ \
Sentence: b    abʰí yáḥ pūrúṃ pŕ̥tanāsu tastʰáu dīdā́ya dáivyo átitʰiḥ śivó naḥ \\

Verse: 35 
Sentence: a    ā́po devīḥ práti gr̥bʰṇīta bʰásmaitát syoné kr̥ṇudʰvam̐ surabʰā́ loké \
Sentence: b    tásmai namantāṃ jánayaḥ supátnīr mātéva putráṃ bibʰr̥tāpsv ènat \\

Verse: 36 
Sentence: a    apsv àgne sádʰiṣ ṭáva sáuṣadʰīr ánu rudʰyase \
Sentence: b    gárbʰe sán jāyase púnaḥ \\

Verse: 37 
Sentence: a    gárbʰo asy óṣadʰīnāṃ gárbʰo vánaspátīnām \
Sentence: b    gárbʰo víśvasya bʰūtásyā́gne gárbʰo apā́m asi \\

Verse: 38 
Sentence: a    prasádya bʰásmanā yónim apáś ca pr̥tʰivī́m agne \
Sentence: b    sam̐sŕ̥jya mātŕ̥bʰiṣ ṭváṃ jyótiṣmān púnar ā́sadaḥ \\

Verse: 39 
Sentence: a    púnar āsádya sádanam apáś ca pr̥tʰivī́m agne \
Sentence: b    śéṣe mātúr yátʰopástʰe ntár asyām̐ śivátamaḥ \\

Verse: 40 
Sentence: a    púnar ūrjā́ nívartasva púnar agna iṣā́yuṣā \
Sentence: b    púnar naḥ pāhy ám̐hasaḥ \\

Verse: 41 
Sentence: a    sahá rayyā́ ní vartasvā́gne pínvasva dʰā́rayā \
Sentence: b    viśvápsnyā viśvátas pári \\

Verse: 42 
Sentence: a    bódʰā me asyá vácaso yaviṣṭʰa mám̐hiṣṭʰasya prábʰr̥tasya svadʰāvaḥ \
Sentence: b    pī́yati tvo ánu tvo gr̥ṇāti vandā́ruṣ ṭe tanvàṃ vande agne \\

Verse: 43 
Sentence: a    sá bodʰi sūrír magʰávā vásupate vásudāvan \
Sentence: b    yuyodʰy àsmád dvéṣām̐si \
Sentence: c    viśvákarmaṇe svā́hā \\

Verse: 44 
Sentence: a    púnas tvādityā́ rudrā́ vásavaḥ sám indʰatāṃ púnar brahmā́ṇo vasunītʰa yajñáiḥ \
Sentence: b    gʰr̥téna tváṃ tanvàṃ vardʰayasva satyā́ḥ santu yájamānasya kā́māḥ \\

Verse: 45 
Sentence: a    ápeta vī̀ta ví ca sarpatā́to yé tra stʰá purāṇā́ yé ca nū́tanāḥ \
Sentence: b    ádād yamò vasā́naṃ pr̥tʰivyā́ ákrann imáṃ pitáro lokám asmai \\

Verse: 46 
Sentence: a    saṃjñā́nam asi \
Sentence: b    kāmadʰáraṇam \
Sentence: c    máyi te kāmadʰáraṇaṃ bʰūyāt \
Sentence: d    agnér bʰásmāsy agnéḥ púrīṣam asi \
Sentence: e    cíta stʰa paricíta ūrdʰvacítaḥ śnayadʰvam \\

Verse: 47 
Sentence: a    ayám̐ só agnír yásmint sómam índraḥ sutáṃ dadʰé jaṭʰáre vāvaśānáḥ \
Sentence: b    sahasríṇaṃ vā́jam átyaṃ ná sáptim̐ sasavā́nt sánt stūyase jātavedaḥ \\

Verse: 48 
Sentence: a    ágne yát te diví várcaḥ pr̥tʰivyā́ṃ yád óṣadʰīṣv apsv ā́ yajatra \
Sentence: b    yénāntárikṣam urv ā̀tatántʰa tveṣáḥ sá bʰānúr arṇavó nr̥cákṣāḥ \\

Verse: 49 
Sentence: a    ágne divó árṇam áccʰā jigāsy áccʰā devā́m̐ ūciṣe dʰíṣṇyā yé \
Sentence: b    yā́ rocané parástāt sū́ryasya yā́ś cāvástād upatíṣṭʰanta ā́paḥ \\

Verse: 50 
Sentence: a    purīṣyā̀so agnáyaḥ prāvaṇébʰiḥ sajóṣasaḥ \
Sentence: b    juṣántāṃ yajñám adrúho namīvā́ íṣo mahī́ḥ \\

Verse: 51 
Sentence: a    íḍām agne purudám̐sam̐ saníṃ góḥ śaśvattamám̐ hávamānāya sādʰa \
Sentence: b    syā́n naḥ sūnús tánayo vijā́vā́gne sā́ te sumatír bʰūtv asmé \\

Verse: 52 
Sentence: a    ayáṃ te yónir r̥tvíyo yáto jātó árocatʰāḥ \
Sentence: b    táṃ jānánn agna ā́ rohā́tʰā no vardʰayā rayím \\

Verse: 53 
Sentence: a    cíd asi táyā devátayāṅgirasvád dʰruvā́ sīda \
Sentence: b    paricíd asi táyā devátayāṅgirasvád dʰruvā́ sīda \\

Verse: 54 
Sentence: a    lokáṃ pr̥ṇa cʰidráṃ pr̥ṇā́tʰo sīda dʰruvā́ tvám \
Sentence: b    indrāgnī́ tvā bŕ̥haspátir asmín yónāv asīṣadan \\

Verse: 55 
Sentence: a    tā́ asya sū́dadohasaḥ sómam̐ śrīṇanti pŕ̥śnayaḥ \
Sentence: b    jánman devā́nāṃ víśas triṣv ā́ rocané diváḥ \\

Verse: 56 
Sentence: a    índraṃ víśvā avīvr̥dʰant samudrávyacasaṃ gíraḥ \
Sentence: b    ratʰī́tamam̐ ratʰī́nāṃ vā́jānām̐ sátpatiṃ pátim \\

Verse: 57 
Sentence: a    sámitam̐ sáṃ kalpetʰām̐ sámpriyau rociṣṇū́ sumanasyámānau \
Sentence: b    íṣam ū́rjam abʰí saṃvásānau \\

Verse: 58 
Sentence: a    sáṃ vāṃ mánām̐si sáṃ vratā́ sám u cittā́ny ā́karam \
Sentence: b    ágne purīṣyādʰipā́ bʰava tváṃ na íṣam ū́rjaṃ yájamānāya dʰehi \\

Verse: 59 
Sentence: a    ágne tváṃ purīṣyò rayimā́n puṣṭimā́m̐ asi \
Sentence: b    śivā́ḥ kr̥tvā́ díśaḥ sárvāḥ yónim ihā́sadaḥ \\

Verse: 60 
Sentence: a    bʰávataṃ naḥ sámanasau sácetasāv arepásau \
Sentence: b    mā́ yajñám̐ him̐siṣṭaṃ mā́ yajñápatiṃ jātavedasau śiváu bʰavatam adyá naḥ \\

Verse: 61 
Sentence: a    mātéva putráṃ pr̥tʰivī́ purīṣyàm agním̐ své yónāv abʰār ukʰā́ \
Sentence: b    tā́ṃ víśvair deváir r̥túbʰiḥ saṃvidānáḥ prajā́patir viśvákarmā ví muñcatu \\

Verse: 62 
Sentence: a    ásunvantam áyajamānam iccʰa stenásyetyā́m ánv ihi táskarasya \
Sentence: b    anyám asmád iccʰa sā́ ta ityā́ námo devi nirr̥te túbʰyam astu \\

Verse: 63 
Sentence: a    námaḥ sú te nirr̥te tigmatejo yasmáyaṃ ví cr̥tā bandʰám etám \
Sentence: b    yaména tváṃ yamyā́ saṃvidānóttamé nāké ádʰi rohayainam \\

Verse: 64 
Sentence: a    yásyās te gʰora āsán juhómy eṣā́ṃ bandʰā́nām avasárjanāya \
Sentence: b    yā́ṃ tvā jáno bʰū́mir íti pramándate nírr̥tiṃ tvāháṃ pári veda viśvátaḥ \\

Verse: 65 
Sentence: a    yáṃ te devī́ nírr̥tir ābabándʰa pā́śaṃ grīvā́sv avicr̥tyám \
Sentence: b    táṃ te ví ṣyāmy ā́yuṣo ná mádʰyād átʰaitáṃ pitúm addʰi prásūtaḥ \
Sentence: c    námo bʰū́tyai yédáṃ cakā́ra \\

Verse: 66 
Sentence: a    nivéśanaḥ saṃgámano vásunāṃ víśvā rūpā́bʰí caṣṭe śácībʰiḥ \
Sentence: b    devá iva savitā́ satyádʰarméndro ná tastʰau samaré patʰīnā́m \\

Verse: 67 
Sentence: a    sī́rā yuñjanti kaváyo yugā́ ví tanvate pŕ̥tʰak \
Sentence: b    dʰī́rā devéṣu sūmnayā́ \\

Verse: 68 
Sentence: a    yunákta sī́rā ví yugā́ tanudʰvaṃ kr̥té yónau vapatehá bī́jam \
Sentence: b    girā́ ca śruṣṭíḥ sábʰarā ásan no nédīya ít sr̥ṇyàḥ pakvám éyāt \\

Verse: 69 
Sentence: a    śunám̐ sú pʰā́lā ví kr̥ṣantu bʰū́mim̐ śunáṃ kīnā́śā abʰí yantu vāháiḥ \
Sentence: b    śúnāsīrā havíṣā tóśamānā supippalā́ óṣadʰīḥ kartanāsmé \\

Verse: 70 
Sentence: a    gʰr̥téna sī́tā mádʰunā sám ajyatāṃ víśvair deváir ánumatā marúdbʰiḥ \
Sentence: b    ū́rjasvatī páyasā pínvamānāsmā́nt sīte páyasābʰyā́ vavr̥tsva \\

Verse: 71 
Sentence: a    lā́ṅgalaṃ pávīravat suśévam̐ somapítsaru \
Sentence: b    tád úd vapati gā́m áviṃ prapʰarvyàṃ ca pī́varīṃ prastʰā́vad ratʰavā́hanam \\

Verse: 72 
Sentence: a    kā́maṃ kāmadugʰe dʰukṣva mitrā́ya váruṇāya ca \
Sentence: b    índrāyāśvíbʰyāṃ pūṣṇé prajā́bʰya óṣadʰībʰyaḥ \\

Verse: 73 
Sentence: a    ví mucyadʰvam agʰnyā devayānā áganma támasas pārám asyá jyótir āpāma \\

Verse: 74 
Sentence: a    sajū́r ábdo áyavobʰiḥ sajū́r uṣā́ áruṇībʰiḥ sajóṣasāv aśvínā dám̐sobʰiḥ sajū́ḥ sū́ra étaśena sajū́r vaiśvānará íḍayā gʰr̥téna svā́hā \\

Verse: 75 
Sentence: a    yā́ óṣadʰīḥ pū́rvā jātā́ devébʰyas triyugáṃ purā́ \
Sentence: b    mánai nú babʰrū́ṇām ahám̐ śatáṃ dʰā́māni saptá ca \\

Verse: 76 
Sentence: a    śatáṃ vo amba dʰā́māni sahásram utá vo rúhaḥ \
Sentence: b    ádʰā śatakratvo yūyám imáṃ me agadáṃ kr̥ta \\

Verse: 77 
Sentence: a    óṣadʰīḥ práti modadʰvaṃ púṣpavatīḥ prasū́varīḥ \
Sentence: b    áśvā iva sajítvarīr vīrúdʰaḥ pārayiṣṇvàḥ \\

Verse: 78 
Sentence: a    óṣadʰīr íti mātaras tád vo devīr úpa bruve \
Sentence: b    sanéyam áśvaṃ gā́ṃ vā́sa ātmā́naṃ táva pūruṣa \\

Verse: 79 
Sentence: a    aśvattʰé vo niṣádanaṃ parṇé vo vasatíṣ kr̥tā́ \
Sentence: b    gobʰā́ja ít kílāsatʰa yát sanávatʰa pū́ruṣam \\

Verse: 80 
Sentence: a    yátráuṣadʰīḥ samágmata rā́jānaḥ sámitāv iva \
Sentence: b    vípraḥ sá ucyate bʰiṣág rakṣohā́mīvacā́tanaḥ \\

Verse: 81 
Sentence: a    aśvāvatī́m̐ somāvatī́m ūrjáyantīm údojasam \
Sentence: b    ā́vitsi sárvā óṣadʰīr asmā́ ariṣṭátātaye \\

Verse: 82 
Sentence: a    úc cʰúṣmā óṣadʰīnāṃ gā́vo goṣṭʰā́d iverate \
Sentence: b    dʰánam̐ saniṣyántīnām ātmā́naṃ táva pūruṣa \\

Verse: 83 
Sentence: a    íṣkr̥tir nā́ma vo mātā́tʰo yūyám̐ stʰa níṣkr̥tīḥ \
Sentence: b    sīrā́ḥ patatríṇī stʰana yád āmáyati níṣkr̥tʰa \\

Verse: 84 
Sentence: a    áti víśvāḥ pariṣṭʰā́ stená iva vrajám akramuḥ \
Sentence: b    óṣadʰīḥ prā́cucyavur yát kíṃ ca tanvò rápaḥ \\

Verse: 85 
Sentence: a    yád imā́ vājáyann ahám óṣadʰīr hásta ādadʰé \
Sentence: b    ātmā́ yákṣmasya naśyati purā́ jīvagŕ̥bʰo yatʰā \\

Verse: 86 
Sentence: a    yásyauṣadʰīḥ prasárpatʰā́ṅgam-aṅgaṃ páruṣ-paruḥ \
Sentence: b    táto yákṣmaṃ ví bādʰadʰva ugró madʰyamaśī́r iva \\

Verse: 87 
Sentence: a    sākáṃ yakṣma prápata cā́ṣeṇa kikidīvínā \
Sentence: b    sākáṃ vā́tasya dʰrā́jyā sākáṃ naśya nihā́kayā \\

Verse: 88 
Sentence: a    anyā́ vo anyā́m avatv anyā́nyásyā úpāvata \
Sentence: b    tā́ḥ sárvāḥ saṃvidānā́ idáṃ me prā́vatā vácaḥ \\

Verse: 89 
Sentence: a    yā́ḥ pʰalínīr yā́ apʰalā́ apuṣpā́ yā́ś ca puṣpíṇīḥ \
Sentence: b    bŕ̥haspátiprasūtās tā́ no muñcantv ám̐hasaḥ \\

Verse: 90 
Sentence: a    muñcántu mā śapatʰyā̀d átʰo varuṇyā̀d utá \
Sentence: b    átʰo yamásya páḍvīśāt sárvasmād devakilviṣā́t \\

Verse: 91 
Sentence: a    avapátantīr avadan divá óṣadʰayas pári \
Sentence: b    yáṃ jīvám aśnávāmahai ná sá riṣyāti pū́ruṣaḥ \\

Verse: 92 
Sentence: a    yā́ óṣadʰīḥ sómarājñīr bahvī́ḥ śatávicakṣaṇāḥ \
Sentence: b    tā́sām asi tvám uttamā́raṃ kā́māya śám̐ hr̥dé \\

Verse: 93 
Sentence: a    yā́ óṣadʰīḥ sómarājñīr víṣṭʰitāḥ pr̥tʰivī́m ánu \
Sentence: b    bŕ̥haspátiprasūtā asyái sáṃ datta vīryàm \\

Verse: 94 
Sentence: a    yā́ś cedám upaśr̥ṇvánti yā́ś ca dūráṃ párāgatāḥ \
Sentence: b    sárvāḥ saṃgátya vīrudʰo syái sáṃ datta vīryàm \\

Verse: 95 
Sentence: a    mā́ vo riṣat kʰanitā́ yásmai cāháṃ kʰánāmi vaḥ \
Sentence: b    dvipā́c cátuṣpād asmā́kam̐ sárvam astv anāturám \\

Verse: 96 
Sentence: a    óṣadʰayaḥ sám avadanta sómena sahá rā́jñā \
Sentence: b    yásmai kr̥ṇóti brāhmaṇás tám̐ rājan pārayāmasi \\

Verse: 97 
Sentence: a    nāśayitrī́ balā́sasyā́rśasa upacítām asi \
Sentence: b    átʰo śatásya yákṣmāṇāṃ pākārór asi nā́śanī \\

Verse: 98 
Sentence: a    tvā́ṃ gandʰarvā́ akʰanam̐s tvā́m índras tvā́ṃ bŕ̥haspátiḥ \
Sentence: b    tvā́m oṣadʰe sómo rā́jā vidvā́n yákṣmād amucyata \\

Verse: 99 
Sentence: a    sáhasva me árātīḥ sáhasva pr̥tanāyatáḥ \
Sentence: b    sáhasva sárvaṃ pāpmā́nam̐ sáhamānāsy oṣadʰe \\

Verse: 100 
Sentence: a    dīrgʰā́yus ta oṣadʰe kʰanitā́ yásmai ca tvā kʰánāmy ahám \
Sentence: b    átʰo tváṃ dīrgʰā́yur bʰūtvā́ śatávalśā ví rohatāt \\

Verse: 101 
Sentence: a    tvám uttamā́sy oṣadʰe táva vr̥kṣā́ úpastayaḥ \
Sentence: b    úpastir astu sò smā́kaṃ yó asmā́m̐ abʰidā́sati \\

Verse: 102 
Sentence: a    mā́ mā him̐sīj janitā́ yáḥ pr̥tʰivyā́ yó vā dívam̐ satyádʰarmā vyā́naṭ \
Sentence: b    yáś cāpáś candrā́ḥ pratʰamó jajā́na kásmai devā́ya havíṣā vidʰema \\

Verse: 103 
Sentence: a    abʰyā́ vartasva pr̥tʰivi yajñéna páyasā sahá \
Sentence: b    vapā́ṃ te agnír iṣitó arohat \\

Verse: 104 
Sentence: a    ágne yát te śukráṃ yác candráṃ yát pūtáṃ yác ca yajñíyam \
Sentence: b    tád devébʰyo bʰarāmasi \\

Verse: 105 
Sentence: a    íṣam ū́rjam ahám itá ā́dam r̥tásya yóniṃ mahiṣásya dʰā́rām \
Sentence: b    ā́ mā góṣu viśatvā́ tanū́ṣu jáhāmi sedím ánirām ámīvām \\

Verse: 106 
Sentence: a    ágne táva śrávo váyo máhi bʰrājante arcáyo vibʰāvaso \
Sentence: b    bŕ̥hadbʰāno śávasā vā́jam uktʰyàṃ dádʰāsi dāśúṣe kave \\

Verse: 107 
Sentence: a    pāvakávarcāḥ śukrávarcā ánūnavarcā úd iyarṣi bʰānúnā \
Sentence: b    putró mātárā vicárann úpāvasi pr̥ṇákṣi ródasī ubʰé \\

Verse: 108 
Sentence: a    ū́rjo napāj jātavedaḥ suśastíbʰir mándasva dʰītíbʰir hitáḥ \
Sentence: b    tvé íṣaḥ sáṃ dadʰur bʰū́rivarpasaś citrótayo vāmájātāḥ \\

Verse: 109 
Sentence: a    irajyánn agne pratʰayasva jantúbʰir asmé rā́yo amartya \
Sentence: b    sá darśatásya vápuṣo ví rājasi pr̥ṇákṣi sānasíṃ krátum \\

Verse: 110 
Sentence: a    iṣkartā́ram adʰvarásya prácetasaṃ kṣáyantam̐ rā́dʰaso maháḥ \
Sentence: b    rātíṃ vāmásya subʰágāṃ mahī́m íṣaṃ dádʰāsi sānasím̐ rayím \\

Verse: 111 
Sentence: a    r̥tā́vānaṃ mahiṣáṃ viśvádarśatam agním̐ sumnā́ya dadʰire puró jánāḥ \
Sentence: b    śrútkarṇam̐ saprátʰastamaṃ tvā girā́ dáivyaṃ mā́nuṣā yugā́ \\

Verse: 112 
Sentence: a    ā́ pyāyasva sám etu te viśvátaḥ soma vŕ̥ṣṇyam \
Sentence: b    bʰávā vā́jasya saṃgatʰé \\

Verse: 113 
Sentence: a    sáṃ te páyām̐si sám u yantu vā́jāḥ sáṃ vŕ̥ṣṇyāny abʰimātiṣā́haḥ \
Sentence: b    āpyā́yamāno amŕ̥tāya soma diví śrávām̐sy uttamā́ni dʰiṣva \\

Verse: 114 
Sentence: a    ā́ pyāyasva madintama sóma víśvebʰir am̐śúbʰiḥ \
Sentence: b    bʰávā naḥ suśrávastamaḥ sákʰā vr̥dʰé \\

Verse: 115 
Sentence: a    ā́ te vatsó máno yamat paramā́c cit sadʰástʰāt \
Sentence: b    ágne tvā́ṃkāmayā girā́ \\

Verse: 116 
Sentence: a    túbʰyaṃ tā́ aṅgirastama víśvāḥ sukṣitáyaḥ pŕ̥tʰak \
Sentence: b    ágne kā́māya yemire \\

Verse: 117 
Sentence: a    agníḥ priyéṣu dʰā́masu kā́mo bʰūtásya bʰávyasya \
Sentence: b    samrā́ḍ éko ví rājati \\



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.