TITUS
White Yajur-Veda: Vajasaneyi-Samhita (Madhyandina)
Part No. 13
Previous part

Paragraph: 13 
Verse: 1 
Sentence: a    máyi gr̥hṇāmy ágre agním̐ rāyáspóṣāya suprajāstvā́ya suvī́ryāya \
Sentence: b    mā́m u devátāḥ sacantām \\

Verse: 2 
Sentence: a    apā́ṃ pr̥ṣṭʰám asi yónir agnéḥ samudrám abʰítaḥ pínvamānam \
Sentence: b    várdʰamāno mahā́m̐ ā́ ca púṣkare divó mā́trayā varimṇā́ pratʰasva \\

Verse: 3 
Sentence: a    bráhma jajñānáṃ pratʰamáṃ purástād ví sīmatáḥ surúco vená āvaḥ \
Sentence: b    sá budʰnyā̀ upamā́ asya viṣṭʰā́ḥ satáś ca yónim ásataś ca ví vaḥ \\

Verse: 4 
Sentence: a    hiraṇyagarbʰáḥ sám avartatā́gre bʰūtásya jātáḥ pátir éka āsīt \
Sentence: b    sá dādʰāra pr̥tʰivī́ṃ dyā́m utémā́ṃ kásmai devā́ya havíṣā vidʰema \\

Verse: 5 
Sentence: a    drapsáś caskanda pr̥tʰivī́m ánu dyā́m imáṃ ca yónim ánu yáś ca pū́rvaḥ \
Sentence: b    samānáṃ yónim ánu saṃcárantaṃ drapsáṃ juhomy ánu saptá hótrāḥ \\

Verse: 6 
Sentence: a    námo stu sarpébʰyo yé ké ca pr̥tʰivī́m ánu \
Sentence: b    yé antárikṣe yé diví tébʰyaḥ sarpébʰyo námaḥ \\

Verse: 7 
Sentence: a    yā́ íṣavo yātudʰā́nānāṃ yé vā vánaspátīm̐s tú \
Sentence: b    yé vāvaṭéṣu śérate tébʰyaḥ sarpébʰyo námaḥ \\

Verse: 8 
Sentence: a    yé vāmī́ rocané divó yé vā sū́ryasya raśmíṣu \
Sentence: b    yéṣām apsú sádas kr̥táṃ tébʰyaḥ sarpébʰyo námaḥ \\

Verse: 9 
Sentence: a    kr̥ṇuṣvá pā́jaḥ prásitiṃ ná pr̥tʰvī́ṃ yāhí rā́jevā́mavām̐ íbʰena \
Sentence: b    tr̥ṣvī́m ánu prásitiṃ drūṇānó stāsi vídʰya rakṣásas tápiṣṭʰaiḥ \\

Verse: 10 
Sentence: a    táva bʰramā́sa āśuyā́ patanty ánu spr̥śa dʰr̥ṣatā́ śóśucānaḥ \
Sentence: b    tápūm̐ṣy agne juhvā̀ pataṅgā́n ásaṃdito ví sr̥ja víṣvag ulkā́ḥ \\

Verse: 11 
Sentence: a    práti spáśo ví sr̥ja tū́rṇitamo bʰávā pāyúr viśó asyā́ ádabdʰaḥ \
Sentence: b    yó no dūré agʰáśam̐so yó ánty ágne mā́kiṣ ṭe vyátʰir ā́ dadʰarṣīt \\

Verse: 12 
Sentence: a    úd agne tiṣṭʰa práty ā́ tanuṣva ny àmítrām̐ oṣatāt tigmahete \
Sentence: b    yó no árātim̐ samidʰāna cakré nīcā́ táṃ dʰakṣy atasáṃ ná śúṣkam \\

Verse: 13 
Sentence: a    ūrdʰvó bʰava práti vidʰyā́dʰy asmád āvíṣ kr̥ṇuṣva dáivyāny agne \
Sentence: b    áva stʰirā́ tanuhi yātujū́nāṃ jāmím ájāmiṃ prá mr̥ṇīhi śátrūn \
Sentence: c    agnéṣ ṭvā téjasā sādayāmi \\

Verse: 14 
Sentence: a    agnír mūrdʰā́ diváḥ kakút pátiḥ pr̥tʰivyā́ ayám \
Sentence: b    apā́m̐ rétām̐si jinvati \
Sentence: c    índrasya tváujasā sādayāmi \\

Verse: 15 
Sentence: a    bʰúvo yajñásya rájasaś ca netā́ yátrā niyúdbʰiḥ sácase śivā́bʰiḥ \
Sentence: b    diví mūrdʰā́naṃ dadʰiṣe svarṣā́ṃ jihvā́m agne cakriṣe havyavā́ham \\

Verse: 16 
Sentence: a    dʰruvā́si dʰarúṇā́str̥tā viśvákarmaṇā \
Sentence: b    mā́ tvā samudrá úd badʰīn mā́ suparṇó vyatʰamānā pr̥tʰivī́ṃ dr̥m̐ha \\

Verse: 17 
Sentence: a    prajā́patiṣ ṭvā sādayatv apā́ pr̥ṣṭʰé samudrásyéman \
Sentence: b    vyácasvatīṃ prátʰasvatīṃ prátʰasva pr̥tʰivy àsi \\

Verse: 18 
Sentence: a    bʰū́r asi bʰū́mir asy áditir asi viśvádʰāyā víśvasya bʰúvanasya dʰartrī́ \
Sentence: b    pr̥tʰivī́ṃ yaccʰa pr̥tʰivī́ṃ dr̥m̐ha pr̥tʰivī́ṃ mā́ him̐sīḥ \\

Verse: 19 
Sentence: a    víśvasmai prāṇā́yāpānā́ya vyānā́yodānā́ya pratiṣṭʰā́yai carítrāya \
Sentence: b    agníṣ ṭvābʰí pātu mahyā́ svastyā́ cʰardíṣā śáṃtamena táyā devátayāṅgirasvád dʰruvā́ sīda \\

Verse: 20 
Sentence: a    kā́ṇḍāt-kāṇḍāt praróhantī páruṣaḥ-paruṣas pári \
Sentence: b    evā́ no dū́rve prá tanu sahásreṇa śaténa ca \\

Verse: 21 
Sentence: a    yā́ śaténa pratanóṣi sahásreṇa viróhasi \
Sentence: b    tásyās te devīṣṭake vidʰéma havíṣā vayám \\

Verse: 22 
Sentence: a    yā́s te agne sū́rye rúco dívam ātanvánti raśmíbʰiḥ \
Sentence: b    tā́bʰir no adyá sárvābʰī rucé jánāya nas kr̥dʰi \\

Verse: 23 
Sentence: a    yā́ vo devā́ḥ sū́rye rúco góṣv áśveṣu yā́ rúcaḥ \
Sentence: b    índrāgnī tā́bʰiḥ sárvābʰī rúcaṃ no dʰatta br̥haspate \\

Verse: 24 
Sentence: a    virā́ḍ jyótir adʰārayat \
Sentence: b    svarā́ḍ jyótir adʰārayat \
Sentence: c    prajā́patiṣ ṭvā sādayatu pr̥ṣṭʰé pr̥tʰivyā́ jyótiṣmatīm \
Sentence: d    víśvasmai prāṇā́yāpānā́ya vyānā́ya víśvaṃ jyótir yaccʰa \
Sentence: e    agníṣ ṭé dʰipatis táyā devátayāṅgirasvád dʰruvā́ sīda \\

Verse: 25 
Sentence: a    mádʰuś ca mā́dʰavaś ca vā́santikāv r̥tū́ agnér antaḥśleṣò si kálpetāṃ dyā́vāpr̥tʰivī́ kálpantām ā́pa óṣadʰayaḥ kálpantām agnáyaḥ pŕ̥tʰaṅ náma jyáiṣṭʰyāya sávratāḥ \
Sentence: b    yé agnáyaḥ sámanaso ntarā́ dyā́vāpr̥tʰivī́ imé vā́santikāv r̥tū́ abʰikálpamānā índram iva devā́ abʰisáṃ viśantu táyā devátayāṅgirasvád dʰruvé sīdatam \\

Verse: 26 
Sentence: a    áṣāḍʰāsi sáhamānā sáhasvā́rātīḥ sáhasva pr̥tanāyatáḥ \
Sentence: b    sahásravīryāsi sā́ mā jinva \\

Verse: 27 
Sentence: a    mádʰu vā́tā r̥tāyaté mádʰu kṣaranti síndʰavaḥ \
Sentence: b    mā́dʰvīr naḥ santv óṣadʰīḥ \\

Verse: 28 
Sentence: a    mádʰu náktam utóṣáso mádʰumat pā́rtʰivam̐ rájaḥ \
Sentence: b    mádʰu dyáur astu naḥ pitā́ \\

Verse: 29 
Sentence: a    mádʰumān no vánaspátir mádʰumām̐ astu sū́ryaḥ \
Sentence: b    mā́dʰvīr gā́vo bʰavantu naḥ \\

Verse: 30 
Sentence: a    apā́ṃ gámbʰant sīda mā́ tvā sū́ryo bʰí tāpsīn mā́gnír vaiśvānaráḥ \
Sentence: b    áccʰinnapatrāḥ prajā́ anuvī́kṣasvā́nu tvā divyā́ vŕ̥ṣṭiḥ sacatām \\

Verse: 31 
Sentence: a    trī́nt samudrā́nt sám asr̥pat svargā́n apā́ṃ pátir vr̥ṣabʰá íṣṭakānām \
Sentence: b    púrīṣaṃ vásānaḥ sukr̥tásya loké tátra gaccʰa yátra pū́rve páretāḥ \\

Verse: 32 
Sentence: a    mahī́ dyáuḥ pr̥tʰivī́ ca na imáṃ yajñáṃ mimikṣatām \
Sentence: b    pipr̥tā́ṃ no bʰárīmabʰiḥ \\

Verse: 33 
Sentence: a    víṣṇoḥ kármāṇi paśyata yáto vratā́ni paspaśé \
Sentence: b    índrasya yújyaḥ sákʰā \\

Verse: 34 
Sentence: a    dʰruvā́si dʰarúṇetó jajñe pratʰamám ebʰyó yónibʰyo ádʰi jātávedaḥ \
Sentence: b    sá gāyatryā́ triṣṭúbʰānuṣṭúbʰā ca devébʰyo havyáṃ vahatu prajānán \\

Verse: 35 
Sentence: a    iṣé rāyé ramasva sáhase dyumná ūrjé ápatyāya \
Sentence: b    samrā́ḍ asi svarā́ḍ asi sārasvatáu tvótsau prā́vatām \\

Verse: 36 
Sentence: a    ágne yukṣvā́ hí yé távā́śvāso deva sādʰávaḥ \
Sentence: b    áraṃ váhanti manyáve \\

Verse: 37 
Sentence: a    yukṣvā́ hí devahū́tamām̐ áśvām̐ agne ratʰī́r iva \
Sentence: b    ní hótā pūrvyáḥ sadaḥ \\

Verse: 38 
Sentence: a    samyák sravanti saríto ná dʰénā antár hr̥dā́ mánasā pūyámānāḥ \
Sentence: b    gʰr̥tásya dʰā́rā abʰí cākaśīmi hiraṇyáyo vetasó mádʰye agnéḥ \\

Verse: 39 
Sentence: a    r̥cé tvā rucé tvā bʰāsé tvā jyótiṣe tvā \
Sentence: b    ábʰūd idáṃ víśvasya bʰúvanasya vā́jinam agnér vaiśvānarásya ca \\

Verse: 40 
Sentence: a    agnír jyótiṣā jyótiṣmān rukmó várcasā várcasvān \
Sentence: b    sahasradā́ asi sahásrāya tvā \\

Verse: 41 
Sentence: a    ādityáṃ gárbʰaṃ páyasā sám aṅdʰi sahásrasya pratimā́ṃ viśvárūpam \
Sentence: b    pári vr̥ṅdʰi hárasā mā́bʰí mam̐stʰāḥ śatā́yuṣaṃ kr̥ṇuhi cīyámānaḥ \\

Verse: 42 
Sentence: a    vātásya jūtíṃ váruṇasya nā́bʰim áśvaṃ jajñānám̐ sarirásya mádʰye \
Sentence: b    śíśuṃ nadī́nām̐ hárim ádribudʰnam ágne mā́ him̐sīḥ paramé vyòman \\

Verse: 43 
Sentence: a    ájasram índum aruṣáṃ bʰuraṇyúm agním īḍe pūrvácitti námobʰiḥ \
Sentence: b    sá párvabʰir r̥tuśáḥ kálpamāno gā́ṃ mā́ him̐sīr áditiṃ virā́jam \\

Verse: 44 
Sentence: a    várūtrīṃ tváṣṭur váruṇasya nā́bʰim áviṃ jajñānā́m̐ rájasaḥ párasmāt \
Sentence: b    mahī́m̐ sāhasrī́m ásurasya māyā́m ágne mā́ him̐sīḥ parmé vyòman \\

Verse: 45 
Sentence: a    yó gnír agnér ádʰiy ájāyata śókāt pr̥tʰivyā́ utá vā divás pári \
Sentence: b    yéna prajā́ viśvákarmā jajā́na tám agne héḍaḥ pári te vr̥ṇaktu \\

Verse: 46 
Sentence: a    citráṃ devā́nām úd agād ánīkaṃ cákṣur mitrásya váruṇasyāgnéḥ \
Sentence: b    ā́prā dyā́vāpr̥tʰivī́ antárikṣam̐ sū́rya ātmā́ jágatas tastʰúṣaś ca \\

Verse: 47 
Sentence: a    imáṃ mā́ him̐sīr dvipā́daṃ paśúm̐ sahasrākṣó médʰāya cīyámānaḥ \
Sentence: b    mayúṃ paśúṃ médʰam agne juṣasva téna cinvānás tanvò ní ṣīda \
Sentence: c    mayúṃ te śúg r̥ccʰatu yáṃ dviṣmás táṃ te śúg r̥ccʰatu \\

Verse: 48 
Sentence: a    imáṃ mā́ him̐sīr ékaśapʰaṃ paśúṃ kanikradáṃ vājínaṃ vā́jineṣu \
Sentence: b    gaurám āraṇyám ánu te diśāmi téna cinvānás tanvò ní ṣīda \
Sentence: c    gauráṃ te śúg r̥ccʰatu yáṃ dviṣmás táṃ te śúg r̥ccʰatu \\

Verse: 49 
Sentence: a    imám̐ sāhasrám̐ śatádʰāram útsaṃ vyacyámānam̐ sarirásya mádʰye \
Sentence: b    gʰr̥táṃ dúhānām áditiṃ jánāyā́gne mā́ him̐sīḥ paramé vyòman \
Sentence: c    gavayám āraṇyám ánu te diśāmi téna cinvānás tanvò ní ṣīda \
Sentence: d    gavayáṃ te śúg r̥ccʰatu yáṃ dviṣmás táṃ te śúg r̥ccʰatu \\

Verse: 50 
Sentence: a    imám ūrṇāyúṃ váruṇasya nā́bʰiṃ tvácaṃ paśūnā́ṃ dvipádāṃcátuṣpadām \
Sentence: b    tváṣṭuḥ prajā́nāṃ pratʰamáṃ janítram ágne mā́ him̐sīḥ paramé vyòman \
Sentence: c    úṣṭram āraṇyám ánu te diśāmi téna cinvānás tanvò ní ṣīda \
Sentence: d    úṣṭraṃ te śúg r̥ccʰatu yáṃ dviṣmás táṃ te śúg r̥ccʰatu \\

Verse: 51 
Sentence: a    ajó hy agnér ájaniṣṭa śókāt só apaśyaj janitā́ram ágre \
Sentence: b    téna devā́ devátām ágram āyam̐s téna róham āyann úpa médʰyāsaḥ \
Sentence: c    śarabʰám āraṇyám ánu te diśāmi téna cinvānás tanvò ní ṣīda \
Sentence: d    śarabʰáṃ te śúg r̥ccʰatu yáṃ dviṣmás táṃ te śúg r̥ccʰatu \\

Verse: 52 
Sentence: a    tváṃ yaviṣṭʰa dāśúṣo nŕ̥̄m̐ḥ pāhi śr̥ṇudʰī́ gíraḥ \
Sentence: b    rákṣā tokám utá tmánā \\

Verse: 53 
Sentence: a    apā́ṃ tvémant sādayāmi \
Sentence: b    apā́ṃ tvódmant sādayāmi \
Sentence: c    apā́ṃ tvā bʰásmant sādayāmi \
Sentence: d    apā́ṃ tvā jyótiṣi sādayāmi \
Sentence: e    apā́ṃ tvā́yane sādayāmi \
Sentence: f    arṇavé tvā sádane sādayāmi \
Sentence: g    samudré tvā sádane sādayāmi \
Sentence: h    sariré tvā sádane sādayāmi \
Sentence: i    apā́ṃ tvā kṣáye sādayāmi \
Sentence: j    apā́ṃ tvā sádʰiṣi sādayāmi \
Sentence: k    apā́ṃ tvā sádane sādayāmi \
Sentence: l    apā́ṃ tvā sadʰástʰe sādayāmi \
Sentence: m    apā́ṃ tvā yónau sādayāmi \
Sentence: n    apā́ṃ tvā púrīṣe sādayāmi \
Sentence: o    apā́ṃ tvā pā́tʰasi sādayāmi \
Sentence: p    gāyatréṇa tvā cʰándasā sādayāmi \
Sentence: q    tráiṣṭubʰena tvā cʰándasā sādayāmi \
Sentence: r    jā́gatena tvā cʰándasā sādayāmi \
Sentence: s    ā́nuṣṭubʰena tvā cʰándasā sādayāmi \
Sentence: t    pā́ṅktena tvā cʰándasā sādayāmi \\

Verse: 54 
Sentence: a    ayáṃ puró bʰúvaḥ \
Sentence: b    tásya prāṇó bʰauvanāyáḥ \
Sentence: c    vasantáḥ prāṇyanáḥ \
Sentence: d    gāyatrī́ vāsantī́ \
Sentence: e    gāyatryái gāyatrám \
Sentence: f    gāyatrā́d upām̐śúḥ \
Sentence: g    upām̐śós trivŕ̥t \
Sentence: h    trivŕ̥to ratʰantarám \
Sentence: i    vásiṣṭʰa ŕ̥ṣiḥ \
Sentence: j    prajā́patigr̥hītayā tváyā prāṇáṃ gr̥hṇāmi prajā́bʰyaḥ \\

Verse: 55 
Sentence: a    ayáṃ dakṣiṇā́ viśvákarmā \
Sentence: b    tásya máno vaiśvakarmaṇám \
Sentence: c    grīṣmó mānasáḥ \
Sentence: d    triṣṭúb graiṣmī́ \
Sentence: e    triṣṭúbʰaḥ svārám \
Sentence: f    svārā́d antaryāmáḥ \
Sentence: g    antaryāmā́t pañcadaśáḥ \
Sentence: h    pañcadaśā́d br̥hát \
Sentence: i    bʰarádvāja ŕ̥ṣiḥ \
Sentence: j    prajā́patigr̥hītayā tváyā máno gr̥hṇāmi prajā́bʰyaḥ \\

Verse: 56 
Sentence: a    ayáṃ paścā́d viśvávyacāḥ \
Sentence: b    tásya cákṣur vaiśvavyacasám \
Sentence: c    varṣā́ś cā́kṣuṣyaḥ \
Sentence: d    jágatī vārṣī́ \
Sentence: e    jágatyā ŕ̥ksamam \
Sentence: f    ŕ̥ksamāc cʰukráḥ \
Sentence: g    śukrā́t saptadaśáḥ \
Sentence: h    saptadaśā́d vairūpám \
Sentence: i    jamádagnir ŕ̥ṣiḥ \
Sentence: j    prajā́patigr̥hītayā tváyā cákṣur gr̥hṇāmi prajā́bʰyaḥ \\

Verse: 57 
Sentence: a    idáṃ uttarā́t svàḥ \
Sentence: b    tásya śótram̐ sauvám \
Sentence: c    śarác cʰrautrī́ \
Sentence: d    anuṣṭúp śāradī́ \
Sentence: e    anuṣṭúbʰa aiḍám \
Sentence: f    aiḍā́n mantʰī́ \
Sentence: g    mantʰína ekavim̐śáḥ \
Sentence: h    ekavim̐śā́d vairājám \
Sentence: i    viśvā́mitra ŕ̥ṣiḥ \
Sentence: j    prajā́patigr̥hītayā tváyā śrótraṃ gr̥hṇāmi prajā́bʰyaḥ \\

Verse: 58 
Sentence: a    iyáṃ upári matíḥ \
Sentence: b    tásyai vā́ṅ mātyā́ \
Sentence: c    hemantó vācyáḥ \
Sentence: d    paṅktír haimantī́ \
Sentence: e    paṅktyái nidʰánavat \
Sentence: f    nidʰánavata āgrayaṇáḥ \
Sentence: g    āgrayaṇā́t triṇavatrayastrim̐śáu \
Sentence: h    triṇavatrayastrim̐śā́bʰyām̐ śākvararaivaté \
Sentence: i    viśvákarma ŕ̥ṣiḥ \
Sentence: j    prajā́patigr̥hītayā tváyā vā́caṃ gr̥hṇāmi prajā́bʰyaḥ \
Sentence: k    lokáṃ pr̥ṇa cʰidráṃ pr̥ṇā́tʰo sīda dʰruvā́ tvám \
Sentence: l    indrāgnī́ tvā bŕ̥haspátir asmín yónāv asīṣadan \
Sentence: m    tā́ asya sū́dadohasaḥ sómam̐ śrīṇanti pŕ̥śnayaḥ \
Sentence: n    jánman devā́nāṃ víśas triṣv ā́ rocané diváḥ \
Sentence: o    índraṃ víśvā avīvr̥dʰant samudrávyacasaṃ gíraḥ \
Sentence: p    ratʰī́tamam̐ ratʰī́nāṃ vā́jānām̐ sátpatiṃ pátim \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.