TITUS
White Yajur-Veda: Vajasaneyi-Samhita (Madhyandina)
Part No. 14
Previous part

Paragraph: 14 

Verse: 1 
Sentence: a    dʰruvákṣitir dʰruváyonir dʰruvā́si dʰruváṃ yónim ā́ sīda sādʰuyā́ \
Sentence: b    úkʰyasya ketúṃ pratʰamáṃ juṣāṇā́ \
Sentence: c    aśvínādʰvaryū́ sādayatām ihá tvā \\

Verse: 2 
Sentence: a    kulāyínī gʰr̥távatī púraṃdʰiḥ syoné sīda sádane pr̥tʰivyā́ḥ \
Sentence: b    abʰí tvā rudrā́ vásavo gr̥ṇantv imā́ bráhma pīpihi sáubʰagāya \
Sentence: c    aśvínādʰvaryū́ sādayatām ihá tvā \\

Verse: 3 
Sentence: a    sváir dákṣair dákṣapitehá sīda devā́nām̐ sumné br̥haté ráṇāya \
Sentence: b    pitévaidʰi sūnáva ā́ suśévā svāveśā́ tanvā̀ sáṃ viśasva \
Sentence: c    aśvínādʰvaryū́ sādayatām ihá tvā \\

Verse: 4 
Sentence: a    pr̥tʰivyā́ḥ púrīṣam asy ápso nā́ma tā́ṃ tvā víśve abʰí gr̥ṇantu devā́ḥ \
Sentence: b    stómapr̥ṣṭʰā gʰr̥távatīhá sīda prajā́vad asmé darviṇā́ yajasva \
Sentence: c    aśvínādʰvaryū́ sādayatām ihá tvā \\

Verse: 5 
Sentence: a    ádityās tvā pr̥ṣṭʰé sādayāmy antárikṣasya dʰartrī́ṃ viṣṭámbʰanīṃ diśā́mádʰipatnīṃ bʰúvanānām ūrmír drapsó apā́m asi viśvákarmā ta ŕ̥ṣiḥ \
Sentence: b    aśvínādʰvaryū́ sādayatām ihá tvā \\

Verse: 6 
Sentence: a    śukráś ca śúciś ca gráiṣmāv r̥tū́ agnér antaḥśleṣò si kálpetāṃ dyā́vāpr̥tʰivī́ kálpantām ā́pa óṣadʰayaḥ kálpantām agnáyaḥ pŕ̥tʰaṅ náma jyáiṣṭʰyāya sávratāḥ \
Sentence: b    yé agnáyaḥ sámanaso ntarā́ dyā́vāpr̥tʰivī́ imé graiṣmā́v r̥tū́ abʰikálpamānā índram iva devā́ abʰisáṃ viśantu táyā devátayāṅgirasvád dʰruvé sīdatam \\

Verse: 7 
Sentence: a    sajū́r r̥túbʰiḥ sajū́r vidʰā́bʰiḥ sajū́r deváiḥ sajū́r deváir vayonādʰáir agnáye tvā vaiśvānarā́yāśvínādʰvaryū́ sādayatām ihá tvā \
Sentence: b    sajū́r r̥túbʰiḥ sajū́r vidʰā́bʰiḥ sajū́r vásubʰiḥ sajū́r deváir vayonādʰáir agnáye tvā vaiśvānarā́yāśvínādʰvaryū́ sādayatām ihá tvā \
Sentence: c    sajū́r r̥túbʰiḥ sajū́r vidʰā́bʰiḥ sajū́ rudráiḥ sajū́r deváir vayonādʰáir agnáye tvā vaiśvānarā́yāśvínādʰvaryū́ sādayatām ihá tvā \
Sentence: d    sajū́r r̥túbʰiḥ sajū́r vidʰā́bʰiḥ sajū́r ādityáiḥ sajū́r deváir vayonādʰáir agnáye tvā vaiśvānarā́yāśvínādʰvaryū́ sādayatām ihá tvā \
Sentence: e    sajū́r r̥túbʰiḥ sajū́r vidʰā́bʰiḥ sajū́r víśvair deváiḥ sajū́r deváir vayonādʰáir agnáye tvā vaiśvānarā́yāśvínādʰvaryū́ sādayatām ihá tvā \\

Verse: 8 
Sentence: a    prāṇáṃ me pāhi \
Sentence: b    apānáṃ me pāhi \
Sentence: c    vyānáṃ me pāhi \
Sentence: d    cákṣur ma urvyā́ ví bʰāhi \
Sentence: e    śrótraṃ me ślokaya \
Sentence: f    apáḥ pinva \
Sentence: g    óṣadʰīr jinva \
Sentence: h    dvipā́d ava \
Sentence: i    cátuṣpāt pāhi \
Sentence: j    divó vŕ̥ṣṭim éraya \\

Verse: 9 
Sentence: a    mūrdʰā́ váyaḥ prajā́patiś cʰándaḥ \
Sentence: b    kṣatráṃ váyo máyaṃdaṃ cʰándaḥ \
Sentence: c    viṣṭambʰó váyó dʰipatiś cʰándaḥ \
Sentence: d    viśvákarmā váyaḥ parameṣṭʰī́ cʰándaḥ \
Sentence: e    vastó váyo vivaláṃ cʰándaḥ \
Sentence: f    vŕ̥ṣṇir váyo viśāláṃ cʰándaḥ \
Sentence: g    púruṣo váyas tandráṃ cʰándaḥ \
Sentence: h    vyāgʰró váyó nādʰr̥ṣṭaṃ cʰándaḥ \
Sentence: i    sim̐hó váyaś cʰadíś cʰándaḥ \
Sentence: j    paṣṭʰavā́ḍ váyo br̥hatī́ cʰándaḥ \
Sentence: k    ukṣā́ váyaḥ kakúp cʰándaḥ \
Sentence: l    r̥ṣabʰó váyaḥ satóbr̥hatī cʰándaḥ \\

Verse: 10 
Sentence: a    anaḍvā́n váyaḥ paṅktíś cʰándaḥ \
Sentence: b    dʰenúr váyo jágatī cʰándaḥ \
Sentence: c    tryávir váyas triṣṭúp cʰándaḥ \
Sentence: d    dityavā́ḍ váyo virā́ṭ cʰándaḥ \
Sentence: e    páñcāvir váyo gāyatrī́ cʰándaḥ \
Sentence: f    trivatsó váya uṣṇík cʰándaḥ \
Sentence: g    turyavā́ḍ váyo nuṣṭúp cʰándaḥ \
Sentence: h    lokáṃ pr̥ṇa cʰidráṃ pr̥ṇā́tʰo sīda dʰruvā́ tvám \
Sentence: i    indrāgnī́ tvā bŕ̥haspátir asmín yónāv asīṣadan \
Sentence: j    tā́ asya sū́dadohasaḥ sómam̐ śrīṇanti pŕ̥śnayaḥ \
Sentence: k    jánman devā́nāṃ víśas triṣv ā́ rocané diváḥ \
Sentence: l    índraṃ víśvā avīvr̥dʰant samudrávyacasaṃ gíraḥ \
Sentence: m    ratʰī́tamam̐ ratʰī́nāṃ vā́jānām̐ sátpatiṃ pátim \\

Verse: 11 
Sentence: a    índrāgnī ávyatʰamānām íṣṭakāṃ dr̥m̐hataṃ yuvám \
Sentence: b    pr̥ṣṭʰéna dyā́vāpr̥tʰivī́ antárikṣaṃ ca víbādʰase \\

Verse: 12 
Sentence: a    viśvákarmā tvā sādayatv antárik=C5asya pr̥ṣṭʰé vyácasvatīṃ prátʰasvatīm antárikṣaṃ yaccʰāntárikṣaṃ dr̥m̐hāntárikṣaṃ mā́ him̐sīḥ \
Sentence: b    víśvasmai prāṇā́yāpānā́ya vyānā́yodānā́ya pratiṣṭʰā́yai carítrāya \
Sentence: c    vāyúṣ ṭvābʰí pātu mahyā́ svastyā́ cʰardíṣā śáṃtamena táyā devátayāṅgirasvád dʰruvā́ sīda \\

Verse: 13 
Sentence: a    rā́jñy asi prā́cī dík \
Sentence: b    virā́ḍ asi dákṣiṇā dík \
Sentence: c    samrā́ḍ asi pratícī dík \
Sentence: d    svarā́ḍ asy údīcī dík \
Sentence: e    ádʰipatny asi br̥hatī́ dík \\

Verse: 14 
Sentence: a    viśvákarmā tvā sādayatv antárik=C5asya pr̥ṣṭʰé jyótiṣmatīm \
Sentence: b    víśvasmai prāṇā́yāpānā́ya vyānā́ya víśvaṃ jyótir yaccʰa \
Sentence: c    vāyúṣ ṭé dʰipatis táyā devátayāṅgirasvád dʰruvā́ sīda \\

Verse: 15 
Sentence: a    nábʰaś ca nabʰasyàś ca vā́rṣikāv r̥tū́ agnér antaḥśleṣò si kálpetāṃ dyā́vāpr̥tʰivī́ kálpantām ā́pa óṣadʰayaḥ kálpantām agnáyaḥ pŕ̥tʰaṅ náma jyáiṣṭʰyāya sávratāḥ \
Sentence: b    yé agnáyaḥ sámanaso ntarā́ dyā́vāpr̥tʰivī́ imé vā́rṣikāv r̥tū́ abʰikálpamānā índram iva devā́ abʰisáṃ viśantu táyā devátayāṅgirasvád dʰruvé sīdatam \\

Verse: 16 
Sentence: a    iṣáś corjáś ca śāradā́v r̥tū́ agnér antaḥśleṣò si kálpetāṃ dyā́vāpr̥tʰivī́ kálpantām ā́pa óṣadʰayaḥ kálpantām agnáyaḥ pŕ̥tʰaṅ náma jyáiṣṭʰyāya sávratāḥ \
Sentence: b    yé agnáyaḥ sámanaso ntarā́ dyā́vāpr̥tʰivī́ imé śāradā́v r̥tū́ abʰikálpamānā índram iva devā́ abʰisáṃ viśantu táyā devátayāṅgirasvád dʰruvé sīdatam \\

Verse: 17 
Sentence: a    ā́yur me pāhi \
Sentence: b    prāṇáṃ me pāhi \
Sentence: c    apānáṃ me pāhi \
Sentence: d    vyānáṃ me pāhi \
Sentence: e    cákṣur me pāhi \
Sentence: f    śrótraṃ me pāhi \
Sentence: g    vā́caṃ me pinva \
Sentence: h    máno me jinva \
Sentence: i    ātmā́naṃ me pāhi \
Sentence: j    jyótir me yaccʰa \\

Verse: 18 
Sentence: a    mā́ cʰándaḥ \
Sentence: b    pramā́ cʰándaḥ \
Sentence: c    pratimā́ cʰándaḥ \
Sentence: d    amrīváyaś cʰándaḥ \
Sentence: e    paṅktíś cʰándaḥ \
Sentence: f    uṣṇík cʰándaḥ \
Sentence: g    br̥hatī́ cʰándaḥ \
Sentence: h    anuṣṭúp cʰándaḥ \
Sentence: i    virā́ṭ cʰándaḥ \
Sentence: j    gāyatrī́ cʰándaḥ \
Sentence: k    triṣṭúp cʰándaḥ \
Sentence: l    jágatī cʰándaḥ \\

Verse: 19 
Sentence: a    pr̥tʰivī́ cʰándaḥ \
Sentence: b    antárikṣaṃ cʰándaḥ \
Sentence: c    dyáuś cʰándaḥ \
Sentence: d    sámāś cʰándaḥ \
Sentence: e    nákṣatrāṇi cʰándaḥ \
Sentence: f    vā́k cʰándaḥ \
Sentence: g    mánaś cʰándaḥ \
Sentence: h    kr̥ṣíś cʰándaḥ \
Sentence: i    híraṇyaṃ cʰándaḥ \
Sentence: j    gáuś cʰándaḥ \
Sentence: k    ajā́ cʰándaḥ \
Sentence: l    áśvaś cʰándaḥ \\

Verse: 20 
Sentence: a    agnír devátā \
Sentence: b    vā́to devátā \
Sentence: c    sū́ryo devátā \
Sentence: d    candrámā devátā \
Sentence: e    vásavo devátā \
Sentence: f    rudrā́ devátā \
Sentence: g    ādityā́ devátā \
Sentence: h    marúto devátā \
Sentence: i    víśve devā́ devátā \
Sentence: j    bŕ̥haspátir devátā \
Sentence: k    índro devátā \
Sentence: l    váruṇo devátā \\

Verse: 21 
Sentence: a    mūrdʰā́si rā́ḍ dʰruvā́si dʰarúṇā dʰartry àsi dʰáraṇī \
Sentence: b    ā́yuṣe tvā várcase tvā kr̥ṣyái tvā kṣémāya tvā \\

Verse: 22 
Sentence: a    yántrī rā́ḍ yantry àsi yámanī dʰruvā́si dʰáritrī \
Sentence: b    iṣé tvorjé tvā rayyái tvā póṣāya tvā \
Sentence: c    lokáṃ pr̥ṇa cʰidráṃ pr̥ṇā́tʰo sīda dʰruvā́ tvám \
Sentence: d    indrāgnī́ tvā bŕ̥haspátir asmín yónāv asīṣadan \
Sentence: e    tā́ asya sū́dadohasaḥ sómam̐ śrīṇanti pŕ̥śnayaḥ \
Sentence: f    jánman devā́nāṃ víśas triṣv ā́ rocané diváḥ \
Sentence: g    índraṃ víśvā avīvr̥dʰant samudrávyacasaṃ gíraḥ \
Sentence: h    ratʰī́tamam̐ ratʰī́nāṃ vā́jānām̐ sátpatiṃ pátim \\

Verse: 23 
Sentence: a    āśúr trivŕ̥t \
Sentence: b    bʰāntáḥ pañcadaśáḥ \
Sentence: c    vyòmā saptadaśáḥ \
Sentence: d    dʰáruṇa ekavim̐śáḥ \
Sentence: e    prátūrtir aṣṭādaśáḥ \
Sentence: f    tápo navadaśáḥ \
Sentence: g    abʰīvartáḥ savim̐śáḥ \
Sentence: h    várco dvāvim̐śáḥ \
Sentence: i    saṃbʰáraṇas trayovim̐śáḥ \
Sentence: j    yóniś caturvim̐śáḥ \
Sentence: k    gárbʰāḥ pañcavim̐śáḥ \
Sentence: l    ójas triṇaváḥ \
Sentence: m    krátur ekatrim̐śáḥ \
Sentence: n    pratiṣṭʰā́ trayastrim̐śáḥ \
Sentence: o    bradʰnásya viṣṭápaṃ catustrim̐śáḥ \
Sentence: p    nā́kaḥ ṣaṭtrim̐śáḥ \
Sentence: q    vivartò ṣṭācatvārim̐śaḥ \
Sentence: r    dʰartráṃ catuṣṭomáḥ \\

Verse: 24 
Sentence: a    agnér bʰāgò si dīkṣā́yā ā́dʰipatyaṃ bráhma spr̥táṃ trivŕ̥t stómaḥ \
Sentence: b    índrasya bʰāgò si víṣṇor ā́dʰipatyaṃ ksatrám̐ spr̥táṃ pañcadaśáḥ stómaḥ \
Sentence: c    nr̥cákṣasāṃ bʰāgò si dʰātúr ā́dʰipatyaṃ janítram̐ spr̥tám̐ saptadaśáḥ stómaḥ \
Sentence: d    mitrásya bʰāgò si váruṇasyā́dʰipatyaṃ divó vŕ̥ṣṭir vā́ta spr̥tá ekavim̐śá stómaḥ \\

Verse: 25 
Sentence: a    vásūnāṃ bʰāgò si rudrā́ṇām ā́dʰipatyaṃ cátuṣpāt spr̥táṃ caturvim̐śá stómaḥ \
Sentence: b    ādityā́nāṃ bʰāgò si marútām ā́dʰipatyaṃ gárbʰā spr̥tā́ḥ pañcavim̐śa stómaḥ \
Sentence: c    ádityai bʰāgò si pūṣṇá ā́dʰipatyam ója spr̥táṃ triṇavá stómaḥ \
Sentence: d    devásya savitúr bʰāgò si bŕ̥haspáter ā́dʰipatyam̐ samī́cīr díśa spr̥tā́ś catuṣṭomá stómaḥ \\

Verse: 26 
Sentence: a    yávānāṃ bʰāgò sy áyavānām ā́dʰipatyaṃ prajā́ spr̥tā́ś catuścatvārim̐śá stómaḥ \
Sentence: b    r̥bʰūṇā́ṃ bʰāgò si víśveṣāṃ devā́nām ā́dʰipatyaṃ bʰūtám̐ spr̥táṃ trayastrim̐śá stómaḥ \\

Verse: 27 
Sentence: a    sáhaś ca sahasyàś ca háimantikāv r̥tū́ agnér antaḥśleṣò si kálpetāṃ dyā́vāpr̥tʰivī́ kálpantām ā́pa óṣadʰayaḥ kálpantām agnáyaḥ pŕ̥tʰaṅ náma jyáiṣṭʰyāya sávratāḥ \
Sentence: b    yé agnáyaḥ sámanaso ntarā́ dyā́vāpr̥tʰivī́ imé háimantikāv r̥tū́ abʰikálpamānā índram iva devā́ abʰisáṃ viśantu táyā devátayāṅgirasvád dʰruvé sīdatam \\

Verse: 28 
Sentence: a    ékayāstuvata prajā́ adʰīyanta prajā́patir ádʰipatir āsīt \
Sentence: b    tisŕ̥bʰir astuvata bráhmāsr̥jyata bráhmaṇaspátir ádʰipatir āsīt \
Sentence: c    pañcábʰir astuvata bʰūtā́ny asr̥jyanta bʰūtā́nāṃ pátir ádʰipatir āsīt \
Sentence: d    saptábʰir astuvata sapta r̥ṣáyo sr̥jyanta dʰātā́dʰipatir āsīt \\

Verse: 29 
Sentence: a    navábʰir astuvata pitáro sr̥jyantā́ditir ádʰnipatny āsīt \
Sentence: b    ekādaśábʰir astuvata r̥távo sr̥jyantārtavā́ ádʰipataya āsan \
Sentence: c    trayodaśábʰir astuvata mā́sā asr̥jyanta saṃvatsaró dʰipatir āsīt \
Sentence: d    pañcadaśábʰir astuvata kṣatrám asr̥jyaténdro dʰipatir āsīt \
Sentence: e    saptadaśábʰir astuvata grāmyā́ḥ paśávo sr̥jyanta bŕ̥haspátir ádʰipatir āsīt \\

Verse: 30 
Sentence: a    navadaśábʰir astuvata śūdrāryā́v asr̥jyetām ahorātré ádʰipatnī āstām \
Sentence: b    ékavim̐śatyāstuvatáikaśapʰāḥ paśávo sr̥jyanta váruṇo dʰipatir āsīt \
Sentence: c    tráyovim̐śatyāstuvata kṣudrā́ṃ paśávo sr̥jyanta pūṣā́dʰipatir āsīt \
Sentence: d    páñcavim̐śatyāstuvatāraṇyā́ḥ paśávo sr̥jyanta vāyúr ádʰipatir āsīt \
Sentence: e    saptávim̐śatyāstuvata dyā́vāpr̥tʰivī́ vyàitāṃ vásavo rudrā́ ādityā́ anuvy ā̀yam̐s tá evā́dʰipataya āsan \\

Verse: 31 
Sentence: a    návasim̐śatyāstuvata vánaspátayo sr̥jyanta sómó dʰipatir āsīt \
Sentence: b    ékatrim̐śatāstuvata prajā́ asr̥jyanta yávāś cā́yavāś cā́dʰipataya āsan \
Sentence: c    tráyastrim̐śatāstuvata bʰūtā́ny aśāmyan prajā́patiḥ parameṣṭʰy ádʰipatir āsīt \
Sentence: d    lokáṃ pr̥ṇa cʰidráṃ pr̥ṇā́tʰo sīda dʰruvā́ tvám \
Sentence: e    indrāgnī́ tvā bŕ̥haspátir asmín yónāv asīṣadan \
Sentence: f    tā́ asya sū́dadohasaḥ sómam̐ śrīṇanti pŕ̥śnayaḥ \
Sentence: g    jánman devā́nāṃ víśas triṣv ā́ rocané diváḥ \
Sentence: h    índraṃ víśvā avīvr̥dʰant samudrávyacasaṃ gíraḥ \
Sentence: i    ratʰī́tamam̐ ratʰī́nāṃ vā́jānām̐ sátpatiṃ pátim \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.