TITUS
White Yajur-Veda: Vajasaneyi-Samhita (Madhyandina)
Part No. 15
Previous part

Paragraph: 15 

Verse: 1 
Sentence: a    ágne jātā́n prá ṇuda naḥ sapátnān práty ájātān nuda jātavedaḥ \
Sentence: b    ádʰi no brūhi sumánā áheḍam̐s táva syāma śármam̐s trivárūtʰa udbʰáu \\

Verse: 2 
Sentence: a    sáhasā jātā́n prá ṇudā naḥ sapátnān práty ájātān jātavedo nudasva \
Sentence: b    ádʰi no brūhi sumanasyámāno vayám̐ syāma prá ṇudā naḥ sapátnān \\

Verse: 3 
Sentence: a    ṣoḍaśī́ stóma ójo dráviṇam \
Sentence: b    catuścatvārim̐śá stómo várco dráviṇam \
Sentence: c    agnéḥ púrīṣam asya ápso nā́ma tā́ṃ tvā víśve abʰí gr̥ṇantu devā́ḥ \
Sentence: d    stómapr̥ṣṭʰā gʰr̥távatīhá sīda prajā́vad asmé draviṇā́ yajasva \\

Verse: 4 
Sentence: a    évaś cʰándaḥ \
Sentence: b    várivaś cʰándaḥ \
Sentence: c    śaṃbʰū́ś cʰándaḥ \
Sentence: d    paribʰū́ś cʰándaḥ \
Sentence: e    āccʰác cʰándaḥ \
Sentence: f    mánaś cʰándaḥ \
Sentence: g    vyácaś cʰándaḥ \
Sentence: h    síndʰuś cʰándaḥ \
Sentence: i    samudráś cʰándaḥ \
Sentence: j    sariráṃ cʰándaḥ \
Sentence: k    kakúp cʰándaḥ \
Sentence: l    trikakúp cʰándaḥ \
Sentence: m    kāvyáṃ cʰándaḥ \
Sentence: n    aṅkupáṃ cʰándaḥ \
Sentence: o    akṣárapaṅktiś cʰándaḥ \
Sentence: p    padápaṅktiś cʰándaḥ \
Sentence: q    viṣṭārápaṅktiś cʰándaḥ \
Sentence: r    kṣuró bʰrā́jaś cʰándaḥ \\

Verse: 5 
Sentence: a    āccʰác cʰándaḥ \
Sentence: b    praccʰác cʰándaḥ \
Sentence: c    saṃyác cʰándaḥ \
Sentence: d    viyác cʰándaḥ \
Sentence: e    br̥hác cʰándaḥ \
Sentence: f    ratʰantaráṃ cʰándaḥ \
Sentence: g    nikāyáś cʰándaḥ \
Sentence: h    vivadʰáś cʰándaḥ \
Sentence: i    gíraś cʰándaḥ \
Sentence: j    bʰrájaś cʰándaḥ \
Sentence: k    sam̐stúp cʰándaḥ \
Sentence: l    anuṣṭúp cʰándaḥ \
Sentence: m    évaś cʰándaḥ \
Sentence: n    várivaś cʰándaḥ \
Sentence: o    váyaś cʰándaḥ \
Sentence: p    vayaskŕ̥c cʰándaḥ \
Sentence: q    ví=C5ṣpardʰāś cʰándaḥ \
Sentence: r    viśāláṃ cʰándaḥ \
Sentence: s    cʰadíś cʰándaḥ \
Sentence: t    dūrohaṇáṃ cʰándaḥ \
Sentence: u    tandráṃ cʰándaḥ \
Sentence: v    aṅkāṅkáṃ cʰándaḥ \\

Verse: 6 
Sentence: a    raśmínā satyā́ya satyáṃ jinva \
Sentence: b    prétinā dʰármaṇā dʰármaṃ jinva \
Sentence: c    ánvityā divā́ dívaṃ jinva \
Sentence: d    saṃdʰínāntárikṣeṇāntárikṣaṃ jinva \
Sentence: e    pratidʰínā pr̥tʰivyā́ pr̥tʰivī́ṃ jinva \
Sentence: f    viṣṭambʰéna vŕ̥ṣṭyā vŕ̥sṭiṃ jinva \
Sentence: g    praváyā́hnā́har jinva \
Sentence: h    anuyā́ rátryā rā́trīṃ jinva \
Sentence: i    uśíjā vásubʰyo vásūn jinva \
Sentence: j    praketénādityébʰya ādityā́n jinva \\

Verse: 7 
Sentence: a    tántunā rāyáspóṣeṇa rāyáspóṣaṃ jinva \
Sentence: b    sam̐sárpeṇa śrutā́ya śrutáṃ jinva \
Sentence: c    aiḍénáuṣadʰībʰir óṣadʰīr jinva \
Sentence: d    uttaména tanū́bʰis tanū́r jinva \
Sentence: e    vayodʰásā́dʰītenā́dʰītaṃ jinva \
Sentence: f    abʰijítā téjasā téjo jinva \\

Verse: 8 
Sentence: a    pratipád asi pratipáde tvā \
Sentence: b    anupád asy anupáde tvā \
Sentence: c    sampád asi sampáde tvā \
Sentence: d    téjo si téjase tvā \\

Verse: 9 
Sentence: a    trivŕ̥d asi trivŕ̥te tvā \
Sentence: b    pravŕ̥d asi pravŕ̥te tvā \
Sentence: c    vivŕ̥d asi vivŕ̥te tvā \
Sentence: d    savŕ̥d asi savŕ̥te tvā \
Sentence: e    ākramò sy ākramā́ya tvā \
Sentence: f    saṃkramò si saṃkramā́ya tvā \
Sentence: g    utkramò sy utkramā́ya tvā \
Sentence: h    útkrāntir asy útkrāntyai tvā \
Sentence: i    ádʰipatinorjórjaṃ jinva \\

Verse: 10 
Sentence: a    rā́jñy asi prā́cī díg vásavas te devā́ ádʰipatayo gnír hetīnā́ṃ pratidʰartā́ trivŕ̥t tvā stómaḥ pr̥tʰivyā́m̐ śrayatv ā́jyam uktʰám ávyatʰāyai stabʰnātu ratʰantarám̐ sā́ma prátiṣṭʰityā antárikṣa ŕ̥ṣayas tvā pratʰamajā́ devéṣu divó mā́trayā varimṇā́ pratʰantu vidʰartā́ cāyám ádʰipatiś ca té tvā sárve saṃvidātā́ nā́kasya pr̥ṣṭʰé svargé loké yájamānaṃ ca sādayantu \\

Verse: 11 
Sentence: a    virā́ḍ asi dákṣiṇā díg rudrā́s te devā́ ádʰipataya índro hetīnā́ṃ pratidʰartā́ pañcadaśás tvā stómaḥ pr̥tʰivyā́m̐ śrayatu práügam uktʰám ávyatʰāyai stabʰnātu br̥hát sā́ma prátiṣṭʰityā antárikṣa ŕ̥ṣayas tvā pratʰamajā́ devéṣu divó mā́trayā varimṇā́ pratʰantu vidʰartā́ cāyám ádʰipatiś ca té tvā sárve saṃvidātā́ nā́kasya pr̥ṣṭʰé svargé loké yájamānaṃ ca sādayantu \\

Verse: 12 
Sentence: a    samrā́ḍ asi pratī́cī díg ādityā́s te devā́ ádʰipatayo váruṇo hetīnā́ṃ pratidʰartā́ saptadaśás tvā stómaḥ pr̥tʰivyā́m̐ śrayatu marutvatī́yam uktʰám ávyatʰāyai stabʰnātu vairūpám̐ sā́ma prátiṣṭʰityā antárikṣa ŕ̥ṣayas tvā pratʰamajā́ devéṣu divó mā́trayā varimṇā́ pratʰantu vidʰartā́ cāyám ádʰipatiś ca té tvā sárve saṃvidātā́ nā́kasya pr̥ṣṭʰé svargé loké yájamānaṃ ca sādayantu \\

Verse: 13 
Sentence: a    svarā́ḍ asy údīcy díṅ marútas te devā́ ádʰipatayaḥ sómo hetīnā́ṃ pratidʰartáikavim̐śás tvā stómaḥ pr̥tʰivyā́m̐ śrayatu níṣkevalyam uktʰám ávyatʰāyai stabʰnātu vairājám̐ sā́ma prátiṣṭʰityā antárikṣa ŕ̥ṣayas tvā pratʰamajā́ devéṣu divó mā́trayā varimṇā́ pratʰantu vidʰartā́ cāyám ádʰipatiś ca té tvā sárve saṃvidātā́ nā́kasya pr̥ṣṭʰé svargé loké yájamānaṃ ca sādayantu \\

Verse: 14 
Sentence: a    ádʰipatny asi br̥hatī́ díg víśve te devā́ ádʰipatayo bŕ̥haspátir hetīnā́ṃ pratidʰartā́ triṇavatrayastrim̐śáu tvā stómau pr̥tʰivyā́m̐ śrayatāṃ vaiśvadevāgnimāruté uktʰé ávyatʰāyai stabʰnītām̐ śākvararaivaté sā́manī prátiṣṭʰityā antárikṣa ŕ̥ṣayas tvā pratʰamajā́ devéṣu divó mā́trayā varimṇā́ pratʰantu vidʰartā́ cāyám ádʰipatiś ca té tvā sárve saṃvidātā́ nā́kasya pr̥ṣṭʰé svargé loké yájamānaṃ ca sādayantu \\

Verse: 15 
Sentence: a    ayáṃ puró hárikeśaḥ sū́ryaraśmis tásya ratʰagr̥tsáś ca rátʰaujāś ca senānīgrāmaṇyā̀ \
Sentence: b    puñjikastʰalā́ ca kratustʰalā́ cāpsarásau daṅkṣṇávaḥ paśávo hetíḥ páuruṣeyo vadʰáḥ práhetis tébʰyo námo astu té no vantu té no mr̥ḍayantu té yáṃ dviṣmó yáś ca no dvéṣṭi tám eṣāṃ jámbʰe dadʰmaḥ \\

Verse: 16 
Sentence: a    ayáṃ dakṣiṇā́ viśvákarmā tásya ratʰasvanáś ca rátʰecitraś ca senānīgrāmaṇyā̀ \
Sentence: b    menakā́ ca sahajanyā́ cāpsarásau yātudʰānā́ hetī́ rákṣām̐si práhetis tébʰyo námo astu té no vantu té no mr̥ḍayantu té yáṃ dviṣmó yáś ca no dvéṣṭi tám eṣāṃ jámbʰe dadʰmaḥ \\

Verse: 17 
Sentence: a    ayáṃ paścā́d viśvávyacās tásya rátʰaprotáś cā́samaratʰaś ca senānīgrāmaṇyā̀ \
Sentence: b    pramlócantī cānumlócantī cāpsarásau vyāgʰrā́ hetíḥ sarpā́ práhetis tébʰyo námo astu té no vantu té no mr̥ḍayantu té yáṃ dviṣmó yáś ca no dvéṣṭi tám eṣāṃ jámbʰe dadʰmaḥ \\

Verse: 18 
Sentence: a    ayám uttarā́t saṃyádvasus tásya tā́rkṣyaś cā́riṣṭanemiś ca senānīgrāmaṇyā̀ \
Sentence: b    viśvā́cī ca gʰr̥tā́cī cāpsarásāv ā́po hetír vā́taḥ práhetis tébʰyo námo astu té no vantu té no mr̥ḍayantu té yáṃ dviṣmó yáś ca no dvéṣṭi tám eṣāṃ jámbʰe dadʰmaḥ \\

Verse: 19 
Sentence: a    ayám upáry arvā́gvasus tásya senajíc ca suṣéṇaś ca senānīgrāmaṇyā̀ \
Sentence: b    urváśī ca pūrvácittiś cāpsarásāv avaspʰū́rjan hetír vidyút práhetis tébʰyo námo astu té no vantu té no mr̥ḍayantu té yáṃ dviṣmó yáś ca no dvéṣṭi tám eṣāṃ jámbʰe dadʰmaḥ \\

Verse: 20 
Sentence: a    agnír mūrdʰā́ diváḥ kakút pátiḥ pr̥tʰivyā́ ayám \
Sentence: b    apā́m̐ rétām̐si jinvati \\

Verse: 21 
Sentence: a    ayám agníḥ sahasríṇo vā́jasya śatínas pátiḥ \
Sentence: b    mūrdʰā́ kavī́ rayīṇā́m \\

Verse: 22 
Sentence: a    tvā́m agne púṣkarād ádʰy átʰarvā nír amantʰata \
Sentence: b    mūrdʰnó víśvasya vāgʰátaḥ \\

Verse: 23 
Sentence: a    bʰúvo yajñásya rájasaś ca netā́ yátrā niyúdbʰiḥ sácase śivā́bʰiḥ \
Sentence: b    diví mūrdʰā́naṃ dadʰiṣe svarṣā́ṃ jihvā́m agne cakr̥ṣe havyavā́ham \\

Verse: 24 
Sentence: a    ábodʰy agníḥ samídʰā jánānāṃ práti dʰenúm ivāyatī́m uṣā́sam \
Sentence: b    yahvā́ iva prá vayā́m ujjíhānāḥ prá bʰānávaḥ sisrate nā́kam áccʰa \\

Verse: 25 
Sentence: a    ávocāma kaváye médʰyāya váco vandā́ru vr̥ṣabʰā́ya vŕ̥ṣṇe \
Sentence: b    gáviṣṭʰiro námasā stómam agnáu divī̀va rukmám uruvyáñcam aśret \\

Verse: 26 
Sentence: a    ayám ihá pratʰamó dʰāyi dʰātŕ̥bʰir hótā yájiṣṭʰo adʰvaréṣv ī́ḍyaḥ \
Sentence: b    yám ápnavāno bʰŕ̥gavo virurucúr váneṣu citráṃ vibʰvàṃ viśé-viśe \\

Verse: 27 
Sentence: a    jánasya gopā́ ajaniṣṭa jā́gr̥vir agníḥ sudákṣaḥ suvitā́ya návyase \
Sentence: b    gʰr̥tápratīko br̥hatā́ divispŕ̥śā dyumád ví bʰāti bʰaratébʰyaḥ śúciḥ \\

Verse: 28 
Sentence: a    tvā́m agne áṅgiraso gúhā hitám ánv avindañ cʰiśriyāṇáṃ váne-vane \
Sentence: b    sá jāyase matʰyámānaḥ sáho mahát tvā́m āhuḥ sáhasas putrám aṅgiraḥ \\

Verse: 29 
Sentence: a    sákʰāyaḥ sáṃ vaḥ samyáñcam íṣam̐ stómaṃ cāgnáye \
Sentence: b    várṣiṣṭʰāya kṣitīnā́m ūrjó náptre sáhasvate \\

Verse: 30 
Sentence: a    sám̐-sam íd yuvase vr̥ṣann ágne víśvāny aryá ā́ \
Sentence: b    iḍás padé sám idʰyase sá no vásūny ā́ bʰara \\

Verse: 31 
Sentence: a    tvā́ṃ citraśravastama hávante vikṣú jantávaḥ \
Sentence: b    śocíṣkeśaṃ purupriyā́gne havyā́ya vóḍʰave \\

Verse: 32 
Sentence: a    enā́ vo agníṃ námasorjó nápātam ā́ huve \
Sentence: b    priyáṃ cétiṣṭʰam aratím̐ svadʰvaráṃ víśvasya dūtám amŕ̥tam \\

Verse: 33 
Sentence: a    víśvasya dūtám amŕ̥taṃ víśvasya dūtám amŕ̥tam \
Sentence: b    sá yojate aruṣā́ viśvábʰojasā sá dudravat svā̀hutaḥ \\

Verse: 34 
Sentence: a    sá dudravat svā̀hutaḥ sá dudravat svā̀hutaḥ \
Sentence: b    subráhmā yajñáḥ suśámī vásūnāṃ devám̐ rā́dʰo jánānām \\

Verse: 35 
Sentence: a    ágne vā́jasya gómata ī́śānaḥ sahaso yaho \
Sentence: b    asmé dʰehi jātavedo máhi śrávaḥ \\

Verse: 36 
Sentence: a    sá idʰānó vásuṣ kavír agnír īḍényo girā́ \
Sentence: b    revád asmábʰyaṃ purvaṇīka dīdihi \\

Verse: 37 
Sentence: a    kṣapó rājann utá tmánā́gne vástor utóṣásaḥ \
Sentence: b    sá tigmajambʰa rakṣáso daha práti \\

Verse: 38 
Sentence: a    bʰadró no agnír ā́huto bʰadrā́ rātíḥ subʰaga bʰadró adʰvaráḥ \
Sentence: b    bʰadrā́ utá práśastayaḥ \\

Verse: 39 
Sentence: a    bʰadrā́ utá práśastayo bʰadráṃ mánaḥ kr̥ṇuṣva vr̥tratū́rye \
Sentence: b    yénā samátsu sāsáhaḥ \\

Verse: 40 
Sentence: a    yénā samátsu sāsáhó va stʰirā́ tanuhi bʰū́ri śárdʰatām \
Sentence: b    vanémā te abʰíṣṭibʰiḥ \\

Verse: 41 
Sentence: a    agníṃ táṃ manye yó vásur ástaṃ yáṃ yánti dʰenávaḥ \
Sentence: b    ástam árvanta āśávó staṃ nítyāso vājína íṣam̐ stotŕ̥bʰya ā́ bʰara \\

Verse: 42 
Sentence: a    só agnír yó vásur gr̥ṇé sáṃ yám āyánti dʰenávaḥ \
Sentence: b    sám árvanto ragʰudrúvaḥ sám̐ sujātā́saḥ sūráya íṣam̐ stotŕ̥bʰya ā́ bʰara \\

Verse: 43 
Sentence: a    ubʰé suścandra sarpíṣo dárvī śrīṇīṣa āsáni \
Sentence: b    utó na út pupūryā uktʰéṣu śavasas pata íṣam̐ stotŕ̥bʰya ā́ bʰara \\

Verse: 44 
Sentence: a    ágne tám adyā́śvaṃ ná stómaiḥ krátuṃ ná bʰadrám̐ hr̥dispŕ̥śam \
Sentence: b    r̥dʰyā́mā ta óhaiḥ \\

Verse: 45 
Sentence: a    ádʰā hy àgne krátor bʰadrásya dákṣasya sādʰóḥ \
Sentence: b    ratʰī́r r̥tásya br̥ható babʰū́tʰa \\

Verse: 46 
Sentence: a    ebʰír no arkáir bʰávā no arvā́ṅ svàr ṇá jyótiḥ \
Sentence: b    ágne víśvebʰiḥ sumánā ánīkaiḥ \\

Verse: 47 
Sentence: a    agním̐ hótāraṃ manye dā́svantaṃ vásum̐ sūnúm̐ sáhaso jātávedasaṃ vípraṃ ná jātávedasam \
Sentence: b    yá ūrdʰváyā svadʰvaró devó devā́cyā kr̥pā́ \
Sentence: c    gʰr̥tásya víbʰrāṣṭim ánu vaṣṭi śocíṣājúhvānasya sarpíṣaḥ \\

Verse: 48 
Sentence: a    ágne tváṃ no ántama utá trātā́ śivó bʰava varūtʰyàḥ \
Sentence: b    vásur agnír vásuśravā áccʰā nakṣi dyumáttamam̐ rayíṃ dāḥ \
Sentence: c    táṃ tvā śociṣṭʰa dīdivaḥ sumnā́ya nūnám īmahe sákʰibʰyaḥ \\

Verse: 49 
Sentence: a    yéna ŕ̥ṣayas tápasā satrám ā́yann índʰānā agním̐ svàr ābʰárantaḥ \
Sentence: b    tásminn aháṃ ní dadʰe nā́ke asgníṃ yám āhúr mánava stīrṇábarhiṣam \\

Verse: 50 
Sentence: a    táṃ pátnībʰir ánu gaccʰema devāḥ putráir bʰrā́tr̥bʰir utá vā híraṇyaiḥ \
Sentence: b    nā́kaṃ gr̥bʰṇānā́ḥ sukr̥tásya loké tr̥tī́ye pr̥ṣṭʰé ádʰi rocané diváḥ \\

Verse: 51 
Sentence: a    ā́ vācó mádʰyam aruhad guraṇyúr ayám agníḥ sátpatiś cékitānaḥ \
Sentence: b    pr̥ṣṭʰé pr̥tʰivyā́ níhito dávidyutad adʰás padáṃ kr̥ṇutāṃ yé pr̥tanyávaḥ \\

Verse: 52 
Sentence: a    ayám agnír vīrátamo vayodʰā́ḥ sahasríyo dyotatām áprayuccʰan \
Sentence: b    vibʰrā́jamānaḥ sarirásya mádʰya úpa prá yāhi divyā́ni dʰā́ma \\

Verse: 53 
Sentence: a    samprá cyavadʰvam úpa samprá yātāgne patʰó devayā́nān kr̥ṇudʰvam \
Sentence: b    púnaḥ kr̥ṇvānā́ pitárā yúvānānvā́ tām̐sīt tváyi tántum etám \\

Verse: 54 
Sentence: a    úd budʰyasvāgne práti jāgr̥hi tvám iṣṭāpūrté sám̐ sr̥jetʰām ayáṃ ca \
Sentence: b    asmínt sadʰástʰe ádʰy úttarasmin vísve devā yájamānāś ca sīdata \\

Verse: 55 
Sentence: a    yéna váhasi sahásraṃ yénāgne sarvavedasám \
Sentence: b    ténemáṃ yajñáṃ no naya svàr devéṣu gántave \\

Verse: 56 
Sentence: a    ayáṃ te yónir r̥tvíyo yáto jātó árocatʰāḥ \
Sentence: b    táṃ jānánn agna ārohā́tʰā no vardʰayā rayím \\

Verse: 57 
Sentence: a    tápaś ca tapasyàś ca śaiśirā́v r̥tū́ agnér antaḥśleṣò si kálpetāṃ dyā́vāpr̥tʰivī́ kálpantām ā́pa óṣadʰayaḥ kálpantām agnáyaḥ pŕ̥tʰaṅ náma jyáiṣṭʰyāya sávratāḥ \
Sentence: b    yé agnáyaḥ sámanaso ntarā́ dyā́vāpr̥tʰivī́ imé śaiśirā́v r̥tū́ abʰikálpamānā índram iva devā́ abʰisáṃ viśantu táyā devátayāṅgirasvád dʰruvé sīdatam \\

Verse: 58 
Sentence: a    parameṣṭʰī́ tvā sādayatu divás pr̥ṣṭʰé jyótiṣmatīm \
Sentence: b    víśvasmai prāṇā́yāpānā́ya vyānā́yodānā́ya pratiṣṭʰā́yai carítrāya \
Sentence: c    sū́ryas té dʰipatis táyā devátayāṅgirasvád dʰruvā́ sīda \\

Verse: 59 
Sentence: a    lokáṃ pr̥ṇa cʰidráṃ pr̥ṇā́tʰo sīda dʰruvā́ tvám \
Sentence: b    indrāgnī́ tvā bŕ̥haspátir asmín yónāv asīṣadan \\

Verse: 60 
Sentence: a    tā́ asya sū́dadohasaḥ sómam̐ śrīṇanti pŕ̥śnayaḥ \
Sentence: b    jánman devā́nāṃ víśas triṣv ā́ rocané diváḥ \\

Verse: 61 
Sentence: a    índraṃ víśvā avīvr̥dʰant samudrávyacasaṃ gíraḥ \
Sentence: b    ratʰī́tamam̐ ratʰī́nāṃ vā́jānām̐ sátpatiṃ pátim \\

Verse: 62 
Sentence: a    prótʰad áśvo ná yávase viṣyán yadā́ maháḥ saṃváraṇād vy ástʰāt \
Sentence: b    ā́d asya vā́to ánu vāti śocír ádʰa sma te vrájanaṃ kr̥ṣṇám asti \\

Verse: 63 
Sentence: a    āyóṣ ṭvā sádane sādayāmy ávataś cʰāyā́yām̐ samudrásya hŕ̥daye \
Sentence: b    raśmīvátīṃ bʰā́svatīm ā́ yā́ dyā́ṃ bʰā́sy ā́ pr̥tʰivī́m órv àntárikṣam \\

Verse: 64 
Sentence: a    parameṣṭʰī́ tvā sādayatu divás pr̥ṣṭʰé vyácasvatīṃ prátʰasvatīm dívaṃ yaccʰa dívaṃ dr̥m̐ha dívaṃ mā́ him̐sīḥ \
Sentence: b    víśvasmai prāṇā́yāpānā́ya vyānā́yodānā́ya pratiṣṭʰā́yai carítrāya \
Sentence: c    sū́ryas tvābʰí pātu mahyā́ svastyā́ cʰardíṣā śáṃtamena táyā devátayāṅgirasvád dʰruvé sīdatam \\

Verse: 65 
Sentence: a    sahásrasya pramā́si \
Sentence: b    sahásrasya pratimā́si \
Sentence: c    sahásrasyonmā́si \
Sentence: d    sāhasrò si \
Sentence: e    sahásrāya tvā \\



Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.