TITUS
White Yajur-Veda: Vajasaneyi-Samhita (Madhyandina)
Part No. 16
Previous part

Paragraph: 16 
Verse: 1 
Sentence: a    námas te rudra manyáva utó ta íṣave námaḥ \
Sentence: b    bāhúbʰyām utá te námaḥ \\

Verse: 2 
Sentence: a    yā́ te rudra śivā́ tanū́r ágʰorā́pāpakāśinī \
Sentence: b    táyā nas tanvā̀ śáṃtamayā gíriśantābʰí cākaśīhi \\

Verse: 3 
Sentence: a    yā́m íṣuṃ giriśanta háste bibʰárṣy ástave \
Sentence: b    śivā́ṃ giritra tā́ṃ kuru mā́ him̐sīḥ púruṣaṃ jágat \\

Verse: 4 
Sentence: a    śivéna vácasā tvā giriśā́ccʰā vadāmasi \
Sentence: b    yátʰā naḥ sárvam íj jágad ayakṣmám̐ sumánā ásat \\

Verse: 5 
Sentence: a    ádʰy avocad adʰivaktā́ pratʰamó dáivyo bʰiṣák \
Sentence: b    áhīm̐ś ca sárvān jambʰáyant sárvāś ca yātudʰānyò dʰarā́cīḥ párā suva \\

Verse: 6 
Sentence: a    asáu yás tāmró aruṇá utá babʰrúḥ sumaṅgálaḥ \
Sentence: b    yé cainam̐ rudrā́ abʰíto dikṣú śritā́ḥ sahasraśó vaiṣām̐ héḍa īmahe \\

Verse: 7 
Sentence: a    asáu yò vasárpati nī́lagrīvo vílohitaḥ \
Sentence: b    utáinaṃ gopā́ adr̥śrann ádr̥śrann udahāryàḥ sá dr̥ṣtó mr̥ḍayāti naḥ \\

Verse: 8 
Sentence: a    námo stu nī́lagrīvāya sahasrākṣā́ya mīḍʰúṣe \
Sentence: b    átʰo yé asya sátvāno háṃ tébʰyo karaṃ námaḥ \\

Verse: 9 
Sentence: a    prá muñca dʰánvanas tvám ubʰáyor ā́rtnyor jyā́m \
Sentence: b    yā́ś ca te hásta íṣavaḥ párā tā́ bʰagavo vapa \\

Verse: 10 
Sentence: a    víjyaṃ dʰánuḥ kapardíno víśalyo vā́ṇavām̐ utá \
Sentence: b    áneśann asya yā́ íṣava ābʰúr asya niṣaṅgadʰíḥ \\

Verse: 11 
Sentence: a    yā́ te hetír mīḍʰuṣṭama háste babʰū́va te dʰánuḥ \
Sentence: b    táyāsmā́n viśvátas tvám ayakṣmáyā pári bʰuja \\

Verse: 12 
Sentence: a    pári te dʰánvano hetír asmā́n vr̥ṇaktu viśvátaḥ \
Sentence: b    átʰo yá iṣudʰís távāré asmán ní dʰehi tám \\

Verse: 13 
Sentence: a    avatátya dʰánuṣ ṭvám̐ sáhasrākṣa śáteṣudʰe \
Sentence: b    niśī́rya śalyā́nāṃ múkʰā śivó naḥ sumánā bʰava \\

Verse: 14 
Sentence: a    námas ta ā́yudʰāyā́nātatāya dʰr̥ṣṇáve \
Sentence: b    ubʰā́bʰyām utá te námo bāhúbʰyāṃ táva dʰánvane \\

Verse: 15 
Sentence: a    mā́ no mahā́ntam utá mā́ no arbʰakáṃ mā́ na úkṣantam utá mā́ na ukṣitám \
Sentence: b    mā́ no vadʰīḥ pitáraṃ mótá mātáraṃ mā́ naḥ priyā́s tanvò rudra rīriṣaḥ \\

Verse: 16 
Sentence: a    mā́ nas toké tánaye mā́ na ā́yuṣi mā́ no góṣu mā́ no áśveṣu rīriṣaḥ \
Sentence: b    mā́ no vīrā́n rudra bʰāmíno vadʰīr havíṣmantaḥ sádam ít tvā havāmahe \\

Verse: 17 
Sentence: a    námo híraṇyabāhave senānyè diśā́ṃ ca pátaye námo námo vr̥kṣébʰyo hárikeśebʰyaḥ paśūnā́ṃ pátaye námo námaḥ śaṣpíñjarāya tvíṣīmate patʰīnā́ṃ pátaye námo námp hárikeśāyopavītíne puṣṭā́nāṃ pátaye námaḥ \\

Verse: 18 
Sentence: a    námo babʰluśā́ya vyādʰíné nnānāṃ pátaye námo námo bʰavásya hetyái jágatāṃ pátaye námo námo rudrā́yātatāyíne kṣétrāṇāṃ pátaye námo námaḥ sūtā́yā́hantyaivánānāṃ pátaye námaḥ \\

Verse: 19 
Sentence: a    námo róhitāya stʰapátaye vr̥kṣā́ṇāṃ pátaye námo námo bʰuvantáye vārivaskr̥tā́yáuṣadʰīnāṃ pátaye námo námo mantríṇe vāṇijā́ya kákṣāṇāṃ pátaye námo náma uccáirgʰoṣāyākrandáyate pattīnā́ṃ pátaye námaḥ \\

Verse: 20 
Sentence: a    námaḥ kr̥tsnāyatáyā dʰā́vate sátvanāṃ pátaye námo námaḥ sáhamānāya nivyādʰína āvyādʰínīnāṃ pátaye námo námo niṣaṅgíṇe kakubʰā́ya stenā́nāṃ pátaye námo nám niceráve paricarā́yā́raṇyānāṃ pátaye námaḥ \\

Verse: 21 
Sentence: a    námo váñcate pariváñcate stāyūnā́ṃ pátaye námo námo niṣaṅgíṇa iṣudʰimáte táskarāṇāṃ pátaye námo námaḥ sr̥kāyíbʰyo jígʰām̐sadbʰyo muṣṇatā́ṃ pátaye námo námo simádbʰyo náktaṃ cáradbʰyo vikr̥ntā́nāṃ pátaye námaḥ \\

Verse: 22 
Sentence: a    náma uṣṇīṣíṇe giricarā́ya kuluñcā́nāṃ pátaye námo náma iṣumádʰbyo dʰanvāyíbʰyaś ca vo námo náma ātanvānébʰyaḥ pratidádʰānebʰyaś ca vo námo náma āyáccʰadbʰyó syadbʰyaś ca vo námaḥ \\

Verse: 23 
Sentence: a    námo visr̥jádbʰyo vídʰyadbʰyaś ca vo námo námaḥ svapádbʰyo jā́gradbʰyaś ca vo námo námaḥ śáyānebʰya ā́sīnebʰyaś ca vo námo námas tíṣṭʰadbʰyo dʰā́vadbʰyaś ca vo námaḥ \\

Verse: 24 
Sentence: a    námaḥ sabʰā́bʰyaḥ sabʰā́patibʰyaś ca vo námo námó śvebʰyó śvapatibʰyaś ca vo námo náma āvyādʰínībʰyo vivídʰyantībʰyaś ca vo námo náma úgaṇābʰyas tr̥m̐hatī́bʰyaś ca vo námaḥ \\

Verse: 25 
Sentence: a    námo gaṇébʰyo gaṇápatibʰyaś ca vo námo námo vrā́tebʰyo vrā́tapatibʰyaś ca vo námo námgŕ̥tsebʰyo gŕ̥tsapatibʰyaś ca vo námo námo vírūpebʰyo viśvárūpebʰyaś ca vo námaḥ \\

Verse: 26 
Sentence: a    námaḥ sénābʰyaḥ senāníbʰyaś ca vo námo námo ratʰíbʰyo aratébʰyaś ca vo námo námaḥ kṣattŕ̥bʰyaḥ saṃgrahītŕ̥bʰyaś ca vo námo námo mahádbʰyo arbʰakébʰyaś ca vo námaḥ \\

Verse: 27 
Sentence: a    námas tákṣabʰyo ratʰakārébʰyaś ca vo námo námaḥ kúlālebʰyaḥ kurmā́rebʰyaś ca vo námo námo niṣādébʰyaḥ puñjíṣṭebʰyaś ca vo námo námaḥ śvaníbʰyo mr̥gayúbʰyaś ca vo námaḥ \\

Verse: 28 
Sentence: a    námaḥ śvábʰyaḥ śvápatibʰyaś ca vo námo námo bʰavā́ya ca rudrā́ya ca námaḥ śarvā́ya ca paśupátaye ca námo nī́lagrīvāya ca śitikáṇṭʰāya ca \\

Verse: 29 
Sentence: a    námaḥ kapardíne ca vyùptakeśāya ca námaḥ sahasrākṣā́ya ca śatádʰanvane ca námo giriśayā́ya ca śipiviṣṭā́ya ca námo mīḍʰúṣṭamāya céṣumate ca \\

Verse: 30 
Sentence: a    námo hrasvā́ya ca vāmanā́ya ca námo br̥haté ca várṣīyase ca námo vr̥ddʰā́ya ca savŕ̥dʰe ca námó gryāya ca pratʰamā́ya ca \\

Verse: 31 
Sentence: a    náma āśáve cājirā́ya ca námaḥ śī́gʰryāya ca śī́bʰyāya ca náma ū́rmyāya cāvasvanyā̀ya ca námo nādeyā́ya ca dvī́pyāya ca \\

Verse: 32 
Sentence: a    námo jyeṣṭʰā́ya ca kaniṣṭʰā́ya ca námaḥ pūrvajā́ya cāparajā́ya ca námo madʰyamā́ya cāpagalbʰā́ya ca námo jagʰanyā̀ya ca budʰnyā̀ya ca \\

Verse: 33 
Sentence: a    námaḥ sómyāya ca pratisaryā̀ya ca námo yā́myāya ca kṣémyāya ca námaḥ ślókyāya cāvasānyā̀ya ca náma urvaryā̀ya ca kʰályāya ca \\

Verse: 34 
Sentence: a    námo ványāya ca kákṣṇyāya ca námaḥ śravā́ya ca pratiśravā́ya ca náma āśúṣeṇāya cāśúratʰāya ca námaḥ śū́rāya cāvabʰedíne ca \\

Verse: 35 
Sentence: a    námo bilmíne ca kavacíne ca námo varmíṇe ca varūtʰíne ca námaḥ śrutā́ya ca śrutasenā́ya ca námo dundubʰyā́ya cāhananyā̀ya ca \\

Verse: 36 
Sentence: a    námo dʰr̥ṣṇáve ca pramr̥śā́ya ca námo niṣaṅgíṇe ceṣudʰimáte ca námas tīkṣṇéṣave cāyudʰíne ca námaḥ svāyudʰā́ya ca sudʰánvane ca \\

Verse: 37 
Sentence: a    námaḥ srútyāya ca pátʰyāya ca námaḥ kā́ṭyāya ca nī́pyāya ca námaḥ kúlyāya ca sarasyā̀ya ca námo nādeyā́ya ca vaiśantā́ya ca \\

Verse: 38 
Sentence: a    námaḥ kū́pyāya cāvaṭyā̀ya ca námo vī́dʰryāya cātapyā̀ya ca námo mégʰyāya ca ca vidyutyā̀ya námo várṣyāya cāvarṣyā́ya ca \\

Verse: 39 
Sentence: a    námo vā́tyāya ca réṣmyāya ca námo vāstavyā̀ya ca vāstupā́ya ca námaḥ sómāya ca rudrā́ya ca námas tāmrā́ya cāruṇā́ya ca \\

Verse: 40 
Sentence: a    námaḥ śaṃgáve ca paśupátaye ca náma ugrā́ya ca bʰīmā́ya ca námo agrevadʰā́ya ca dūrevadʰā́ya ca námo hantré ca hánīyase ca námo vr̥kṣébʰyo hárikeśebʰyo námas tārā́ya \\

Verse: 41 
Sentence: a    námaḥ śambʰavā́ya ca mayobʰavā́ya ca námaḥ śaṃkarā́ya ca mayaskarā́ya ca námaḥ śivā́ya ca śivátarāya ca \\

Verse: 42 
Sentence: a    námaḥ pā́ryāya cāvāryā̀ya ca námaḥ pratáraṇāya cottáraṇāya ca námas tī́rtʰyāya ca kū́lyāya ca námaḥ śáṣpyāya ca pʰényāya ca \\

Verse: 43 
Sentence: a    námaḥ sikatyā̀ya ca pravāhyā̀ya ca námaḥ kim̐śilā́ya ca kṣayaṇā́ya ca námaḥ kapardíne ca pulastáye ca náma iriṇyā̀ya ca prapatʰyā̀ya ca \\

Verse: 44 
Sentence: a    námo vrájyāya ca góṣṭʰyāya ca námas tálpyāya ca géhyāya ca námo hr̥dayyā̀ya ca niveṣyā̀ya ca námaḥ kā́ṭyāya ca gahvareṣṭʰā́ya ca \\

Verse: 45 
Sentence: a    námaḥ śúṣkyāya ca harityā̀ya ca námaḥ pām̐savyā̀ya ca rajasyā̀ya ca námo lópyāya colapyā̀ya ca náma ū́rvyāya ca sū́rvyāya ca \\

Verse: 46 
Sentence: a    námaḥ parṇā́ya ca parṇaśadā́ya ca náma udgurámāṇāya cābʰigʰnaté ca náma ākʰidaté ca prakʰidaté ca náma iṣukŕ̥dbʰyo dʰanuṣkŕ̥dbʰyás ca vo námo námo vaḥ kirikébʰyo devā́nām̐ hŕ̥dayebʰyo námo vicinvatkébʰyo námo vikṣiṇatkébʰyo náma ānirhatébʰyaḥ \\

Verse: 47 
Sentence: a    drā́pe ándʰasas pate dáridra nī́lalohita \
Sentence: b    āsā́ṃ prajā́nām eṣā́ṃ paśūnā́ṃ mā́ bʰer mā́ roṅ mó ca naḥ kíṃ canā́mamat \\

Verse: 48 
Sentence: a    imā́ rudrā́ya taváse kapardíne kṣayádvīrāya prá bʰarāmahe matī́ḥ \
Sentence: b    yátʰā śám ásad dvipáde cátuṣpade víśvaṃ puṣṭáṃ grā́me asmínn anāturám \\

Verse: 49 
Sentence: a    yā́ te rudra śivā́ tanū́ḥ śivā́ viśvā́hā bʰeṣajī́ \
Sentence: b    śivā́ rutásya bʰeṣajī́ táyā no mr̥ḍa jīváse \\

Verse: 50 
Sentence: a    pári no rudrásya hetír vr̥ṇaktu pári tveṣásya durmatír agʰāyóḥ \
Sentence: b    áva stʰirā́ magʰávadbʰyas tanuṣva mī́ḍʰvas tokā́ya tánayāya mr̥ḍa \\

Verse: 51 
Sentence: a    mī́ḍʰuṣṭama śívatama śivó naḥ sumánā bʰava \
Sentence: b    paramé vr̥kṣá ā́yudʰaṃ nidʰā́ya kŕ̥ttiṃ vásāna ā́ cara pínākaṃ bíbʰrad ā́ gahi \\

Verse: 52 
Sentence: a    víkiridra vílohita námas te astu bʰagavaḥ \
Sentence: b    yā́s te sahásram̐ hetáyo nyám asmán ní vapantu tā́ḥ \\

Verse: 53 
Sentence: a    sahásrāṇi sahasraśó bāhvós táva hetáyaḥ \
Sentence: b    tā́sām ī́śāno bʰagavaḥ parācī́nā múkʰā kr̥dʰi \\

Verse: 54 
Sentence: a    ásaṃkʰyātā sahásrāṇi yé rudrā́ ádʰi bʰū́myām \
Sentence: b    téṣām̐ sahasrayojané va dʰánvāni tanmasi \\

Verse: 55 
Sentence: a    asmín mahaty àrṇavè ntárikṣe bʰavā́ ádʰi \
Sentence: b    téṣām̐ sahasrayojané va dʰánvāni tanmasi \\

Verse: 56 
Sentence: a    nī́lagrīvāḥ śitikáṇṭʰā dívam̐ rudrā́ úpāśritāḥ \
Sentence: b    téṣām̐ sahasrayojané va dʰánvāni tanmasi \\

Verse: 57 
Sentence: a    nī́lagrīvāḥ śitikáṇṭʰāḥ śarvā́ adʰáḥ kṣamācarā́ḥ \
Sentence: b    téṣām̐ sahasrayojané va dʰánvāni tanmasi \\

Verse: 58 
Sentence: a    yé vr̥kṣéṣu śaṣpíñjarā nī́lagrīvā vílohitāḥ \
Sentence: b    téṣām̐ sahasrayojané va dʰánvāni tanmasi \\

Verse: 59 
Sentence: a    yé bʰūtā́nām ádʰipatayo viśikʰā́saḥ kapardínaḥ \
Sentence: b    téṣām̐ sahasrayojané va dʰánvāni tanmasi \\

Verse: 60 
Sentence: a    yé patʰā́ṃ patʰirákṣasa ailabr̥dā́ āyuryúdʰaḥ \
Sentence: b    téṣām̐ sahasrayojané va dʰánvāni tanmasi \\

Verse: 61 
Sentence: a    yé tīrtʰā́ni pracáranti sr̥kā́hastā niṣaṅgíṇaḥ \
Sentence: b    téṣām̐ sahasrayojané va dʰánvāni tanmasi \\

Verse: 62 
Sentence: a    yé nneṣu vivídʰyanti pā́treṣu píbato jánān \
Sentence: b    téṣām̐ sahasrayojané va dʰánvāni tanmasi \\

Verse: 63 
Sentence: a    yé etā́vantaś ca bʰū́yām̐saś ca díśo rudrā́ vitastʰiré \
Sentence: b    téṣām̐ sahasrayojané va dʰánvāni tanmasi \\

Verse: 64 
Sentence: a    námo stu rudrébʰyo yé diví yéṣāṃ varṣám íṣavaḥ \
Sentence: b    tébʰyo dáśa prā́cīr dáśa dakṣiṇā́ dáśa pratī́cīr dáśódīcīr dáśordʰvā́ḥ \
Sentence: c    tébʰyo námo astu té no vantu té no mr̥ḍayantu té yáṃ dviṣmó yáś ca no dvéṣṭi tám eṣāṃ jámbʰe dadʰmaḥ \\

Verse: 65 
Sentence: a    námo stu rudrébʰyo yè ntárikṣe yéṣāṃ vā́ta íṣavaḥ \
Sentence: b    tébʰyo dáśa prā́cīr dáśa dakṣiṇā́ dáśa pratī́cīr dáśódīcīr dáśordʰvā́ḥ \
Sentence: c    tébʰyo námo astu té no vantu té no mr̥ḍayantu té yáṃ dviṣmó yáś ca no dvéṣṭi tám eṣāṃ jámbʰe dadʰmaḥ \\

Verse: 66 
Sentence: a    námo stu rudrébʰyo yé pr̥tʰivyā́ṃ yéṣām ánnam íṣavaḥ \
Sentence: b    tébʰyo dáśa prā́cīr dáśa dakṣiṇā́ dáśa pratī́cīr dáśódīcīr dáśordʰvā́ḥ \
Sentence: c    tébʰyo námo astu té no vantu té no mr̥ḍayantu té yáṃ dviṣmó yáś ca no dvéṣṭi tám eṣāṃ jámbʰe dadʰmaḥ \\


Next part


This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.